رواية لأني عاقر الفصل الواحد والثلاثون بقلم مريم خفاجة
٣١
ضيقت عيوني وگلت:-لا بس ماحب ابحث
ومامهتمة لهاي السوالف اصلاً
غيث:-هممم
ملاك:-اي سولف
غيث:-مو كلتي ماهتم لهاي السوالف شكو
ملاك:-لاتسولف ماريد
ضحك بصوت عالي
درت وجهي
غيث:-راح احجيها الج بشكل مختصر
لان الاكل راح يجي
ملاك:-اي عادي
غيث:-هو كاتب يهودي الماني
اول شي جان عايش ويا ابو وأمة
ابو جان متسلط وبس فلوس وثراء
درس قانون برغبة والدة
بعدها اتجهه للفنون والأدب والتاريخ
ماجان مشهور
هواية يعني رواياتة قليلة الشهرة
وجان يومية يخطب ويفصخ
بسبب العُزلة العايش بيها
جانت حياتة سوداوية عايش بأكتئاب بعيد
عن العالم الخارجي
رواياتة كابوسية غريبة تختلف عن
الروايات الباقية لا رومانسية ولا شي
اما ميلينا جانت متزوجة من فيلسوف
بسنة 1918 انتقلوا لفيينا يعني بعد الزواج
التقوا الثُنائي
بمطعم جان لقائهم شبه صامت
والمطلب من اللقاء هي تترجم روايتة
ملاك:-اي
غيث:-تحولت طلبية ميلينا من ترجمة الكُتُب
ألى رسائل عاطفية بيناتهم
بدة كافكا يكشف لميلينا بالتدريج عن عذابة
وضلمة
حسها مثل المَلجأ گدرت تفتهمة
ومع ذلك سمح انو تقرأ أعمالة وكُتبة قبل لاتنعرض
بالرغم هو ماجان يحب احد يقرة رواياتة
والي يكتبة
جانت علاقتهم ؏ الحار والبارد
يعني من واحد يبادر يبرد الثاني
والعكس
بعدها تحول كلشي وكللها تطلك
من زوجها
جاي احجيها ؏ السريع طبعاً هي مو هيج
ضحكت:-عادي عادي والله تحمست كمل
غيث:-هاي لو يشوفني كافكا
احجيها هيج يرگعني
ميت نعال ويگلي انعل ابوك لابو ميلينا وياك
حطيت ايدي ؏ حلگي ومتت ضحك
گمت ادمع وهو مبتسم
ملاك:-كمل لاتضحكني العالم تباوعلنة گامت
غيث:-ضحكتج حلوة اضحكي معليج بالعالم
ملاك:-كمل حباب
غيث:-وين وصلنة
ملاك:-گاللها تطلك
وافقت؟
غيث:-لا أكيد ماگدرت توافق واتبعت گلبها
وماهتمتلة جان كلشي يگولة ماتمشي وياه
ولاتوافق عليّ
التقوا ؏ ارض الواقع مرتين بس
المرة الأولى ضلو سوة اربعة ايام
ملاك:-جا ليش تگول بس مرتين
اربعة ايام ضلو
ابتسم:-اي بس مو يومية يروح ويرجع
هي مرة ضلت يمة هسة حطيتي عينج عليهم
ضحكت
وهو كمل:-ماجان بينهم علاقة جسدية
جان حبهم نقي
فكر بهذا كافكا كم مرة يتقربلها بس جان
مستحيل
فـ گاللها بجملة
لا أجرؤ على ان اعرض عليك يدي
يدي القذرة ، المرتجفة ، الشبيهه بالمخلب
المملوءة ، غير المستقرة ، الساخنة والباردة
ملاك:-خطية
غيث:-بالمرة الثانية التقوا ؏ حدود
النمساوية لفترة معينة
بعدها تمرضت ميلينا بالمرض الرئوي
وكافكا طبعاً هم جان مريض بالسل الرئوي
ملاك:-يااا بس والله حلو
غيث:-هسة تشوفين الحلو شنو
ملاك:-شنو لاتكلي النهاية مو حلوة؟
غيث:-جايج گلبي جايج
رسائل كافكا وتحفيزة لميلينا علمود المرض
هو الشي الوحيد الي جان يطمنها
وگتلج علاقتها ويا زوجها ملكلكة
لان هو جان يتصرف بطيش وغباء
وهو اصلاً اتزوجت غصباً عنها بسبب اهلها
ملاك:-جا ليش ماتطلگت؟
غيث:-غبية وماكو كرامة
بلعت ريگي من تذكرت علاقتي ويا كمال
شجنت احس؟
غيث:-المرض هذا السل جان معقد كافكا
لان ماجان يلتقي بميلينا هواية ولا يكدر يتزوجها
بسبب المرض يعني حتى لو اتطلكت
من زوجها گاللها ماگدر اتزوجج لان
ماتگدرين تتحملين وياي يومين
بسبب حياة الرهبنة الأعيشها
بسنة 1924 انتهت الرسائل بينهم بسبب
سوء فهم بيناتهم بعد ما جانوا 3 سنين
؏ تواصل مستمر
وهو الي قطع العلاقة لأن شافها تافهه
وماكو جدوى من الوضعية
وميلينا هم ماكدرت تعوف زوجها
وتروح ويا
ملاك:-لا ليش حلوين
غيث:-ولج خلي اكمل هاي شون سالفة هاي
والأكل تأخر شو
ملاك:-عوف الاكل كمل راح اموت
غيث:-تدهورت صحة كافكا بعد سنوات
طويلة عاشها ببرلين
فضل انو يرجع لبراد يم أختة
حتى يضل يمها
وتعتني بي
ضل آخر أيامة بمصحة يم فيينا
ملاك:-لاااا لتكول مات
غيث:-لا حبيبي منتضرج
ملاك:-يمة گلبي كمل بروح الحسين
غيث:-بهالاثناء جان عمرة 41 سنة
قبل لايتوفى بفترة وصى صديقة براد
يحرك كل كتبة ورواياتة الي باقيات وماكملهن
لان ضن انو هنة مايستحقن النشر اصلاً
بس صديقة الگـ****
خالف الوصية ونشر هاي الروايات وخلاها
توصل بين الادباء
ووصلت شهرة جبيرة
ملاك:-يااا ومن جان عدل ماجان معروف مو؟
غيث:-اي باعي حكمة ربج
وفوك هذا رواياتة القصيرة والمامطروقة
تصنفت من نوع جديد من الأدب
سُمي بالأدب الكابوسي
ووصلت أعمالة بين انحاء العالم
وهو ميت طبعاً
ملاك:-خطية والله يعني هو عايش مضلوم
ومات مضلوم شكد خطية
غيث:-دباعي النغلة بت النغل
ميلينا استمرت بحياتها وعادي الأمور طبيعية
وتدرين شسوت؟
ملاك:-شسوووت؟
غيث:-طلگت من زوجها وتزوجت واحد ثاني
عطت:-يااااا
خزرني وهو لام شفتة مانع الضحكة
وهمس:-ولج فضحتينة بت الاوادم
ملاك:-هاااي ليش هيج سوووت ليش
غيث:-بـربوك
ملاك:-انقهرت وتالي؟
غيث:-اعتقلوها بسبب مامعروف وماتت
بأحد سجون
ملاك:-حللل تستاهل
غيث:-وضلت قصتهم المملؤة بحزن وكآبة
ومرض يقروها الناس من خلال الرسائل
الي انتشرت وصارت حالياً كتاب
ملاك:-بالقصة كلهم جلاب بس هوَ خطية
يعني لمن مات كلها غدرتة
غيث:-راح تبجين يابة؟
ملاك:-لا بس انقهرت
وهسة قصتهم كتاب؟
غيث:-اي رسائلهم ؏ شكل كتاب
اذا تقريها تنقهرين بالزايد هذا الحجيتة كلة
خرط وما متأكد منة بعد اكو هواي تفاصيل
خطوبتة وعلاقاتة ويا الأدباء
وجان زير نساء هو
ملاك:-ليش عبالي ميلينا اول حب الة
غيث:-لا مو گتلج جان عايش بحالة اكتئاب
ومايختلط بالناس فـ يفصخ ويخطب بكيفة لان
عندة انفصام بالشخصية هيج بعض الروايات تگول
ملاك:-خطية
غيث:-اي ياعيني
جابوا الاكل وهو يسولف وياي مستمر
بالقصة دنگت آكل
وافكر بيهم وبقصتهم
خلصنة دفع الحساب وكمت غسلت
واجيت وهو مد ايدة لأيدي
ولزمها وابتسم دنگت راسي
ومشينة واني لازمة عبايتي
جاسر جان برة كاعد ؏ كراسي
ويدخن ويباوع طوبة
ضربة غيث ؏ كيف ؏ علابيتة فز وباوعلنة:-تأخرتوا عمي اكلت وشبعت وانتوا بعدكم
غيث:-جتت احجي لأختك قصة
جاسر:-قصص ماقبل النوم شني
ضحكنة ومشينة سوة
وغيث بقة لازم ايدي كل ما اريد اوخرها
يلزمها بقوة
اشر ؏ فرع طبينة بي
ودخلنة لمحل أضلم من فتح
الباب شفتها مكتبة كُتب ضليت معزولة
؏ صفحة وغيث راح يم الولد
باوعلي واشرلي تعاي وهو مبتسم
حط بأيدي كتاب شفت أسمة
"رسائل كافكا الى ميلينا"
ابتسمت بحماس
وحضنتة بين ادية دفع فلوسة وطلعنة
ملاك:-عززا ماعبالي اكو هنا يبيعوا
غيث:-لا يبيعوا عادي
صعدنة بالسيارة واني بالكشن
الورا فتحت الجيس وفتحت اول صفحاتة
اگلب بي
لحد ما وصلنة واني عقلي فاصل
قبل لا نوصل بشوية
فززني صوت غيث:-ملاك
ملاك:-ها
غيث:-يابة رقمج
ارتبكت وباوعت لجاسر ضربة
وگال:-لك شو تطلب رقم اختي گبالي
شهالأكلان تبن هذا
غيث:-معليج بابا ردي الرقم خلي نتغزل بنعمة الله
راد يشيل رجلة جاسر وهو عاط بي
وضل يصيح بشقة
فتحت التلفون وانطيتيها
باوعلي وهو عينة ؏ الدرب:-بابا شسوي
بالتلفون الرقم طلعي وردي
وانتَ لك سجل يمك
جاسر:-انعل ابوك لابو حتى ابوي اني هم صوجي وافقت عليك شني تطلب رقمممم اختتتتي
شمر الموبايل علية
واني سجلت رقمي عندة وانطيتيها
شفتة كتب ؏ الرقم بس مابين يمي
وصلنة للبيت
فتحت الباب ونزلت بدون ماسلم
وطبيت للبيت
امي جانت كاعدة بالمطبخ
شافتني وكامت:-ليش تأخرتوا؟
جاسر:-ضلوا ذولة المثقفين يحجون قصص
وينكم وين القصص انتوا
ملاك:-لا حجالي هواي اشياء حلوة
ابتسمت امي:-يعني حجيتوا سوة؟
بدون نفس گتلها اي
وصعدت وهي تباوع للكتاب البيدي
بدلت وملك نايمة
فتحت التيبلام اليمي وفتحت الكتاب
ضليت اقرة بي لحد مادخت
ونمت...
ــــــــــــــــــــــــــ
كافكا:-كيف يمكن لمحادثة بسيطة
ان تزرع هذا الحشد الهائل من المشاعر؟
ميلينا:-كُنا نتعانق في النصوص...
ـــــــــــــــــــــــ
مَرت أيام وغيث مرات يجي
ومايراسلني غير وقت العصر ومايتصل
أبد
شخصية غيث ابداً مو غامضة
جان يحجي ؏ طبيعتة عادي ماحس بعيونة
اكو شي مضموم
ابد ماتقرب او حاول يسوي اي شي
عدى لزمة ايدي وبوسة گصتي
هذا الحد الأدنى الي وصلة غيث
نوعاً ما گدرت اتجاوب وياه
بس مرات تجي لحظات يفصل بيها
عقلي واكرهها واكره روحي واتندم لأن
وافقت
وهذا بسبب الماضي لا اكثر
ومن کد التفكير المُفرط بالطريق الطويل
شراح يصير بعد؟
وشنو المستقبل الضموم؟
خوفي من المستقبل خوفي منة معقولة
يكمل وياي؟
بيوم اجت ملك
گالت:-ملاك باجر حيسون حفلة النة للدكاترة
الجدد بالمستشفى مو گتلج فتحوها
واحنة انقلنة بيها راح يسون حفلة وهيج
بيناتنة ماتجين وياي
ملاك:-مابية حيل والله
ملك:-لاعليج الله مو اني محد وياي
واسيل تكول لو اجي لو ما اجي حبابة تعالي
ملاك:-مادري الله كريم
راحت وعافتني
بليل رحت لجاسر گتلة:-باجر راح اروح ويا ملك
للمستشفى تكول حفلة مدري شنو
جاسر:-اي عادي بس شوفي غيث يقبل
ملاك:-خابرة انت وگلة
جاسر:-تؤ بابا خابري انتي شنو متزوجني الي
ملاك:-لا حباب خابرة تلفوني مابي شحن
هز راسة واني طلعت رحت لأمي
گتلها شوية وجاسر دزلي:-روحي قبل غيث
بس يگول مكياج مو طوخ
شفتها ومارديت
وكلت لملك كامت تطفر واختارينة
الملابس سوة
ونمت
ثاني يوم بدلت ولبست عبايتي
واني لابسة جوة قاط كامل لملك وكعب
احمر
ونزلت
محد جان كاعد اجة سايق ملك
غشيت وجهي بالعباية طالعات بس عيوني
وخشمي لان حمرتي طوخ
ودخلت للسيارة
وصلنة لهناك الدنيا مگلوبة
جمالة تگلي حفلة بسيطة
هوسة وضحك وسوالف
واسيل صديقة ملك هم جاية
وهواي صديقاتها هم ضليت اسولف وياهن
نور:-لااا ليش تدرسين خارجي سادس
هو بس قدمي مسائي
ملاك:-اي اني قدمت قبل كم سنة وطلعلي
تخدير هو اني ناجحة من السادس شلون اعيدة
بعد
زهراء:-مادري اني سامعة هيج
بس ليش ماداومتي؟
ملاك:-جنت تعبانة واني اصلاً
مالي خلك بعد ادرس
نور:-احسلج خية انشگينة بالنص انعل ابو
الدراسة لابو اليدرس
اخذلي واحد يموت علية واكل براسة عليمن
هالشلعان گلب هذا اوي
ضحكت:-بالعكس يمكن اني
لو دارسة قبل ودخلت جامعة جان هسة
اني متخرجة وحالي مو هذا
الدراسة سند صدگي
ملك:-هاي مثل المايصلي وينصح الناس صلوا
النذلة شگد كتلها داومي واني احول وياج
مسائي لو تسوين استثناء صباحي
وتجين وياية بس هي عوبة
نور:-متندمة هسة انتي مادرستي؟
ملاك:-قبل عشر سنين متندمة هواي ؏ عمري
الضيعتة بس بعد التعب الانسان يريد بس
يرتاح
اسيل:-يكول عمرها بالخمسين يابة ترة بعدج كتكوت
ملاك:-التعب التعبتة كل سنة بعشرين سنة
زهراء:-اي صدك والله اليتعب مايدور بعد
شي يتعبة بالزايد اهم شي راحتة
وهذا رجلج رواتنياه ملك صورتة مانتقاسم
بي اني وياج
ضحكت
واسيل گالت:-اي ولجن يخبل
نور:-جا اني ليش ماتشوفنياه شو اشوفة
فتحت ملك صفحتة ؏ فيس
وجانت صورة الة وهو ؏ بحر بالشورت
حتى اني استحيت منهن والنذلة مالگت اله
هاي الصورة
شهگت نور وگالت:-عليج العباس هذا؟
ملك:-اي هههههه
نور:-شسمة اگلج انطيج شهادتي وانطيني رجلج
متت ضحك
ملاك:-اخذي ولاتنطيني لاشهادة ولا بطيخ خليني نايمة ببيت اهلي
ملك:-دنجبي الولد كاتل روحها عليها
يممممة هاي البنية تحب واحد يصفك بيها
ابتسمت
وهمست:-اريد اغسل
اسيل:-تعاي نمشي اني وياج هاي بتي الغبرة هم وصخت روحها
طلعنة لبرة جانت الحمامات
طبيت غسلت ومن الخنگة طلعت بسرعة
وهي ضلت جوة تغسل لبتها
افتريت شوية
صوت دراجة وراية صارت
وصوت اشبهه بالهمس بس ينسمع
_الف مبروك مهناية عيني
درت وجهي بسرعة
وهو مشة بسرعة وحاط الخوذة ؏ وجهه
هو أعرف هيأتة
وملابسة العسكرية؟؟
شجابة مراقبني معقولة؟؟
شلون عرف اني هنا شلون؟
جسمي ضل يرعش واباوع لايدي
صارت صفرة حيل
اجت اسيل وهي تگلي:-ولج وينج شبسرعة طرتي لهناك امشي يلة
كلبي يدك بسرعة
وهي كالت:-شبيج ملاك امشي
مشيت واني احس الدنيا تدور
بية ملك واكفة وتصفك
لزمت ايدها من ورا ونفسي سريع
وهي دارت عليو بسرعة وعگدت حاجبها:-شبيج؟
كلمتها خلت الباقيات يندارن
علي هم ويباوعلي مستغربات:-دخت
تعاي
لزمتها من ايدها وابلع ريگي
بحرگة
وكفنة ؏ صفحة همست بتوتر:-كمال كمال ملك
ملك:-شبي وينة شبيج ولج ياا اكعدي وينة نعال
ملاك:-هسة شفتة راح اموت
ملك:-ولج ؏ كيفج انعل ابو لابو الجابة
وشنو يعني واذا اجة
ملاك:-يراقبني مراقبني شلون عرف اني هنا
يعني هو مراقبني راح اموت
ضلت تلزم بدية وتغلط علية
وعلي بهالحضات نقذني جاسر اتصل
؏ ملك وگاللها:-ملك غيث هسة شوية
ويجي للمستشفى مالتكم ياخذ ملاك يعقدون
بالمحكمة گليلها تخلي التلفون بيدها يدك عليها
حجتلة السالفة وهو كام يسب
ويغلط وگال راح اتصل ؏ خالي عصام يطيح
حضة
بقيت كاعدة واتنفس وهي تفرك
بصدري راحت جابتلي ماي واجت واني
اتلفت خايفة الگاه بأي مكان
دك تلفوني گمزت وهي وياي
وصلتني للباب
اجة غيث مبتسم:-تعاي
مدلي ايدة جلبت بيها
استغرب:-شبيج؟؟
ملاك:-مابية يلا خلي نروح
صعدت للسيارة وهو كل ساع
يسألني شبيج
لحد ما بالغلط نترت: وغيث گلتلك مابية شي
سكت واني
انقهرت ليش نترت بي؟ شعلي هوَ
بس رعب كمال راح يبقة ملازمني
كل حياتي ليش خايفة
منة ليش؟
بعد ما جان هو الأمان صار
الخوف؟
من الله لايوفقك وشعوري ان شاءلله تضوگة
وتتحسس مُرة
مشة الطريق ساكت
بعدها همسلي:-اني مو كتلج ماكو مكياج طوخ
ملاك:-مامخلية بس حمرة
غيث:-والحمرة هاي شنو لونها؟
سكتت
رجع كرر الجملة:-شنو لونها؟
همست:-حَمرة
غيث:-والحمرة مو طوخ لو اني اتوهم؟
ملاك:-لأن حفلة
استغفر بصوت ناصي
وگال:-بابا وياهم زلم زلم يباوعون لشفتج
انتي ماتعرفين تفكيرهم شنو
ضليت مدنگة وهو
باوع لأضافيري وكال:-هلاووو والاضافر حمر
البس حجاب واكعد بالبيت احسلي
ضميت ضحكتي ودرت وجهي
للشباك وهو سمعت ضحكتة الخفيفة
غيث:-طالعة حلوة بت الـ....
سكت ماكملها واني رفعتلة حاجبي
باوعلي وضحك:-لج ادبسز
رجعت درت وجهي للطريق
وگف گبال بيت عگدت حاجبي:-هاي وين
غيث:-بيتج شوفي
ملاك:-غير گلت للمحكمة
غيث:-اي هسة دشوفي بيتج اول ونوب نروح نعقد
نزلت رجل تتقدم لورا والثانية لگدام
واتلفت
وكل دراجة تمر انتبهلها
دخلت جان باب الشارع زغير
جانت صبة جبيرة باوعت لأرجائها حديقة
وبوسطها نافورة بس مو نضيفة
مبين محد معتني بيها
حمامات برة واكو باب ثانية
گال:-هذاك الباب حديقة لجوة هم
تردين تخليها حديقة او مخزن بكيفج بس هي مفتوحة وجبيرة هم
دخلنة اكثر فتح باب جان
مطبخ البيت مأثث بس مو كامل گال الباقي
نختارة اني وياج
الألوان عبارة عن اسود رصاصي أبيض
دخلت للصالة جبيرة البيت راح
نعيش بي بس اني وياه ليش هالكبر؟
سألتة گال:-هذا البيت اشتريتة قبل
كم سنة عايش بي وحدي اشتريتة لأن كبال رغد
ماشفت بيت ازغر
هزيت راسي وجانت الأرضية
عبارة عن كاشية بيضة وكاشية سودة
بترتيب
والوان الحايص رصاصي
ودوائر كبار هم بالون الأبيض والاسود
الترتيب حلو كلش
وتخم بسيط مرتب داير مداير الصالة
دخلت للاستقبال جان ديوان
ونفس الوان الصالة بضبط
جانت اكو غرفة جوة
ردت افتحها مقفولة گالي:-غرفتنة فوك
هاي فارغة
ملاك:-ليش؟ خو هنا احسن
غيث:-لا فوك اكبر هاي زغيرة تعاي نصعد
صعدت وياه
وهو واگف يفتح بالباب التفت علية
وابتسم فتحها
شفت جرباية ام نفرين واحس گلبي انقبض
اشاركك بهاي يا غيث؟
جان السرير أرضي
يعني مو عالي مثل اي جريابة لا
وكذلك نفس الألوان
تخم معزول ؏ صفحة مبين من
التخم الجوة زايد
وكنتور جبير وميز وهواي اشياء حلوة
هزيت راسي وانتبهت لصورة مرسومة:-ذيج
اللوحة حلوة
غيث:-هاي امي
ملاك:-صدك؟
غيث:-والله تعاي شوفيها اقرب
فتح اضوية اكثر
ومشيت للصورة
جانت بصف السرير بضبط
باوعتلها وهو گال:-تشبهج
ملاك:-لا ماتشبهني
تلمس عيونها وگال:-تشبهين عيون أمي
ملاك:-يعني عيونها زرك لو بالرسم هذا؟
غيث:-لا هي عيونها نفس عيونج
ملاك:-اها
ضل يباوعلها وكأنما يتأمل فد شي
باوعلي وابتسم وگال:-يلا نروح؟
ملاك:-بس اني وياك؟
واحنة نمشي متجهين لجوة گال:-لا
امج هناك وجاسر ورغد وعمي ابو عبدالله
ويمكن عمتي وياه جاية
هزيت راسي وركبت السيارة
وضلينة ساكتين طول الطريق لحد ما
وصلنة محكمة بغداد
المحكمة هاي تطلگت بيها؟
نفسها
واحنة واكفين بباب المحكمة مدلي
ايدة وابتسم:-انطيني ايدج
خليت ايدي بأيدة ودخلنة سوة
جانت بيها هواي ممرات التفتت نفس الممر
اتذكرة!
همسلي:-لاتباوعين لوراج مستقبلج لگدام
عگدت حاجبي وهو ابتسم:-بيوم طلاقج
اني موجود
ملاك:-صدك؟
غيث:-والله
ملاك:-مافتهمت شون عرفتني
غيث:-بعدين سالفة طويلة
مشيت واني عاگدة حاجبي وصلنة
ولگيت امي وجاسر ومثل ماگال
عمة ابو عبدالله وعمتة ورغد هم وبتها الجبيرة
انتضرنة شوية واجة واحد اقاربهم
خلانة ندخل
جاسر وابو عبدالله بقو برة ودخلنة احنة
گبالي الاوراق ولازم اوقعهن
هاي اوراق
زواجي؟
مو طلاقي؟
هاي اوراق
ارتبط بأنسان ثاني؟
شنو مصيري ويا؟
وقعت وهو وقع وابتسم وهلهلهن
امي ورغد وام عبدالله
واني دنگت
وهو جر راسي وباس گصتي
دخلنا المحكمة هالمرة أيد بأيد
وخليت المسلسل ينتهي بحلقة
وشفتهم مارضوا من بست وادنيت
وسمعت القاضي گل للحرس من حقة
بعد لا من هلي
ولا من هلك يتدخلون
خذو بصماتنة وحطوهن بورقة...
واباوع الكُل مُبتسم
طلعنة وباركولي جاسر وعمة
واني بروحي غصة بس الله اليعلم
بيها
احاول احس بالفرح بس ماجاي اگدر
جاي احاول اتأقلم ماگدر
كمال من اول ماگلت نعم
تأقلمت
ليش انتَ؟
راح اعذبك اسفة...
واني اشوف فرحتة مامتسعها الكون
وهو لازم ايدي قوي ويباوع لگدام
التفت جاسر علينة
وگال:-هو المفروض الي تعقد
محكمة تلبس ابيض؟
هزيت راسي بـ اي:-ماجنت اعرف
راح نعقد
غيث:-عادي هي بياضها كافي
جاسر:-عود يريد يتغزل
غيث:-معليك انتَ دور وجهك
دار وجهه وهو يضحك
همسلي غيث:-احنة اخيتنة حاطة حُمرة تَبرج
ومصبغة اضافرها
ابتسمت بتعب ورجعنة للبيت
هلهلتي ملك وهي ترگص
وتسألني شوكت العرس.
عفتها وصعدت فوك
ضميت راسي بالمخدة
وعصرتها
ماريد ابجي
ماريد
ضليت اغمض بعيوني حيل
لحد مانمت بملابسي
غيث...
بعد ما مرت اسابيع
؏ عقد محكمتي
لا اقصد عقد گلبي بگلبها
اعرفها متأثرة بالماضي بس انا اعرف
شلون انسيها كلشي مرت بي
انا مو مامهتم لمشاعرها
بس انا اريدها تطاوعني حتى اگدر
اخلصها من كلشي تمر بي
مقلل اتصالاتي منها
ولو بيدي اسكن ببيتهم
بس ماگدر بسبب انشغالاتي وخجلي
من امها واخوها
خليني هيج بعيد عن العين
قريب من القلب
وحُبها لو يزود بالأتصالات والمُراسلات
جان ماعوفها لحظة
اعرف بحُبها كل ما ارمش يزود
كل دگة بگلبي يزداد حبها اكثر
وادري بيها ماتگدر تبادلني الي أحسة
رغم اتمنى ابتسامتها تطلع
من گلبها
وانا حافضها حفظ
وادري من تبتسم مُجاملة لا اقل ولا اكثر
سولفتلها القصة عسى ولعل
يتغير شي بداخلها
بس انقهرت ؏ ابطال الرواية
ونست البطل الي بعالمها الوحيد
وبيوم ستوني راجع من دوامي
دزيتلها رسالة وطبيت سبحت
وطلعت لگيت تليفوني يضوي
معقولة؟ ملاك تدك؟
بس جانت ترمش اول ما افتحة
تغلق الخط كلت يمكن تستحي
فتحت رسالتها كاتبة:-تجي اليوم؟
ملاك هاي لو انا اتخيل؟
گعدت احاول استوعب الكاتبتة
كتبت:-تردين اجي؟
ردت:-اي تعال مشتاقتلك
ضحكت بصوت عالي هاي ناصبة
علية:-ملاك متأكدة؟
_شبيك غيث؟ تعال للبيت مسوية كيك
وحلويات تگدر لو تعبان؟
_لا يابة لا اجي هسة ثواني وانشتل بباب بيتكم
_هلا بيك منتضرتك
و وياهن گلب احمر؟
معقولة؟
هي متأكد هي
بلكي الله وگلبها حن علية
من قرت قصتك يا كافكا
غير اسويلك ثواب كل خميس
اذا صدك
صعدت بدلت
فتحت كنتوري وانا مجهزلها هدية
بسيطة ورد وبداخلة حلويات
وموبايل جديد
يمكن تقوى علاقتها بية اكثر؟
صعدت بالسيارة وگلبي ماسيطر
؏ دگاتة وكل ساعة ارجع لرسائلها
الگلب الأحمر خلة أمل بداخلي
وصلت لنص الطريق
وانا فاتح نت ؏ الرصيد رجعت
دزت:-وينك حبيبي تأخرت
ياعلي شيوصلني للبيت
كتبتلها:-عيوني انتي جاي
طرت طيور
والدرب صار شبعدة
ربع ساعة
لو احسها عشر ساعات
وگفت گبال بيتهم وحاط ايدي
؏ گلبي
رجعت دزتلي:-منتضرتك بالباب
عيوني گمت احس بيهن جمر
وگلبي اخ يا گلبي
ولك انتَ شلون بيك
بس حلوة دگاتك الها
استمر
دگيت الباب وبيدي
الورد والحلويات والموبايل
انفتح الباب واني متلهف لعيونها
يگول صارلي قرن ماشايفها
وجان جاسر!
استغربت بس طبيت عادي
كلت يمكن منتضرتني جوة
والرسالة؟
جاسر طبيعي گلت اكيد
هي گايلتلهم ؏ جيتي
طبيت للمطبخ
عمتي واكفة ؏ الطباخ
شافتني وابتسمت:-هلا هلا بسورها ونورها
تعال يمة تعال
تقدمت مبتسم وعيني ؏ باب
المطبخ هسة تطلع!
بوست عمتي ودخلت للصالة
وهي ماكو؟
ادري وين وليتي مو گلبي اشتعل
گعدت ؏ التخم اهز برجلي
سريع
اجة جاسر بيدة دولكة وكلاص
صبلي وهو يبتسم
دخلت عمتي وراه گعدت
كبالي وهي تسألني عن احوالي
تحمحمت وگتلها:-جا ملاك وين
ايمان:-تؤ نسيتها روح يمة گعد اختك
غيث:-شنوة؟؟؟
ايمان:-شبيك؟
غيث:-شنو گعد اختك؟
ضلت صافنة تباوعلي
بأستغراب
فتحت موبايلي بعدني اريد
ادخل ؏ الرسائل
سمعت صوت ضحكة قوية
وعرفتة النذل شمسوي من الله لاينطيك
شمرتة بالورد گبال امة
وصحت علي:-انعل ابوك لابو حتى عشايرك يانذل
وهو يضحك بصوت عالي
يشهك واني امسح بوجهي واهز برجلية
گمت عليّ وانطيتة بوكسي بوجهه
وهو بسرعة طاح صرت فوگاه
وخنگتة:-ولكككك اختننننگت
گمت عنة ودست ببطنة وعمتي
تضحك وتكول:-ولكم شكو
شمرت الموبايل عليها وهي تقرة
بالرسائل وتضحك
واني كل ضني ملاك؟
شدعي عليك ولك
گلبي احسة صار بمعدتي من التوتر
غمضت عيوني وافرك
بوجهي وايدي ترجف
جاسر:-هاي هيج الگلب الأحمر غير احوالك
امداك زلمة جيس حب
غيث:-اگوم اخبزك خبز العباس ومحمد اذا ماسكتت
هي هاي سواية تسويها بية
جاسر:-وجع شسوينالك
غيث:-هو انتَ حقك رجليك بالتبريد
شيهمك
جاسر:-دگوم گوم اصعدلها يلا راضي روحك ببوسة بشبگة
رجعت ضربتة ببطنة
ورفعت رجلية وانطيتة جلاق
ايمان:-ولكم كافي يا يلا بلا
تعال امشي نصعد
غيث:-شيصعدني صدك تحجين
ايمان:-امشي يمة امشي شكو جا غير مرتك
غيث:-شني عمي اجانب احنة وين كاعدين
جاسر:-وشتريد يمة اختي تنزلك امشي يلا اصعدلها امشي
غيث:-وحق محمد ضاملك ضمة اني اعلمك
بيها اذا ماخليك تنسى اسمك فـ لا اتسمى غيث
اني وياك والزمن طويل
جاسر:-اي ديلا يلا
رجعت ردت اضربة بعدتني عنة
عمتي وتضحك علينة
صعدتلها وجمر بگلبي
الله ياخذك بجاه الحسين وهاي اني
اعلمها ملوعة گلبي
صعدت للطابق الأخير
وفتحت باب الغرفة وهي متلفلفة
بالبطانية ونايمة
ابتسمتلها وكلشي راح من بالي
ولج مو كافي احبج؟
هسة حتى هاي الكلمة گمت احس من
احجيها اجذب ؏ روحي
تقدمت
واني ماهمني شي وحتى الصار
قبل شوية نسيتة
هي تخلي عقل بالراس؟
لا بالله...
ملاك...
احس احد يتلمس بخدي
ويهمس واصوات ثانية
بعدت الايد ودرت وجهي ونمت
صوتة صار بأذني:-ملاك
فتحت عيوني ببطئ وافركهن
حيل من النعاس وهذا غيث شجابة؟
فزيت واني اسحب الغطا اكثر
واباوع واكفة تسولف وياه
ملاك:-هاي شكو
ايمان:-گومي يمة هذا غيث
فركت عيوني حيل ومسحت وجهي
هو والله گاعد بصفي ؏ الجرباية
مبتسم
گرص خشمي واني اباوع بأستغراب
گمت بهدوء وخرت البطانية
وخزرت أمي
ورحت للحمام وگفت ؏
مغسلة واغسل ؏ كيف شصعدك؟
اكره هاي الحالة
طلعت من الحمام امي جانت
بيدها كوبين جاي وحلويات بماعون
وكيك
ملاك:-انتي صدك تحجين؟؟؟
ايمان:-شكو؟
ملاك:-شعندج مصعدتة لهنا
ايمان:-وقزرقط غير رجلج
ملاك:- استغفرالله يالله
طبت واني وراها وهو مدنك مدري
شيسوي
تقربت وهمست:-شلونك
ابتسم واخذ ايدي
وجرني بخفة گعدت بصفة وامي
عافتنة وطلعت وهي
تسد الباب وراها هاي صدك تحجي عود؟
وهو يتلمس أيدي گال:-انتي شلونج؟
ملاك:-زينة
غيث:-الحمدلله
ضل يسولف وياي
وحجالي شسوة بي جاسر
واني متحلفة بيهم ثنينهم
ضل يسولف ويفتح نقاشات
وميريدني اسكت ابد يسولف هواية
بحيث شرب گلاصي وگلاصة
تقرب شال شعري عن
أذني وهمس:-ملاك خلي نتفق ؏ عرس
باوعتلة وگلت:-بعد وكت
غيث:-محترك حرك والله اني اريدج ببيتي
تعبت
ملاك:-بعد هواي اشياء ما مجهزتها يعني
غيث:-عادي اني وياج نطلع وجهزي بسرعة
ملاك:-مادري
تقرب أكثر وگلبي ازدادت دگاتة
واني مدنگة العب باضافري وانفاسي تستمع
حط راسة برگبتي
صعدت متني حتى امنعة
جر ايدي وماهتم
وباسني بخفة دفعتة عني
وهمست بسرعة:-خلي ننزل
ذب نفس وگال:-يلا
شلت الصينية ونزلنة سوة
وامي جوة جانت بالصالة شافتنة وابتسمت
وجاسر هم
عفتهم ورحت اخلي الصينية
بالمطبخ
تلمست رگبتي
گمت احس بقرف غمضت عيوني
حيل وابعد ذيج الصورة المُقرفة اللي ببالي
رجعت يم غيث انطاني الهداية
اخذتهن بروح طافية
وهو شوية وراح متحلف بجاسر
كل ساعة وضربة بشي
كتلة حيل تستاهل
مَرت كم يوم وانطاني
غيث موعد العرس بدون ما اناقش
كتلة تمام
واني ادري بالعرس ماراح يتغير شي
لو اضل بعد كم سنة شيتغير
احبة؟
لا
طلعنة اني وأمي
للسوك نفتر ونشتري ملابس
وهو منطي لأمي الفلوس
رغم ماحتاجيت هواية ملابس ابد لان عندي كلشي
جاي نفتر وشفنة من بعيد
جاسر وغيث يمشون
جرتني امي من ايدي وهمه باوعولنة
واجو بأتجاهنة
جاسر:-تفترن انتن بالسواگة يومية
ضحكت امي
واني اباوع لغيث منزل عيونة لرجلية
جنت لابسة حذاء فلات واضافر رجلي
مصبغتهن
ماهتميتلة
درت وجهي لجاسر حتى لينتبهه
صار يمشي بصفي
وجاسر بصفي أمي ويسولف وياها
همسلي:-خلصتوا؟ لو بعدكم؟
ملاك:-بعد نريد نروح لمحل البدلات
غيث:-خوش
تعالوا خلي نطب لهذا المحل اريد اشتري حذاء
دخلت اني وامي وهو وجاسر بقة برة
ضل يفتر يگلب بالأحذية ويكلي
انطيني ذوقج واني اگلة بكيفك
جنت دايرة وجهي
همس من وراي:-تعالي
باوعتلة بيدة حذاء نسائية
غيث:-تعاي گدري هاي
ملاك:-مايحتاج عندي
غيث:-معليج تعاي لبسيها
جانت حذاء رياضية بيضة
گعدت ؏ الطبلة ولبستها
غيث:-ها؟ زينة؟
ملاك:-اي
غيث:-اتمشي بيها شوفيها زينة لو ضيگة
مشيت گتلة مابيها شي
ملاك:-ماريدها والله عندي مثلها
غيث:-هسة ماتكيفين اشتري وسكتي
دفع فلوسها وردت انزعها گال:-لا ضلي
لابستها
وعرفتة لأن لابسة حذاء مفتوحة
ماراد يبين هوَ غيران
بحيث طلع وماشترة حذاء
استغفرت ربي ومشيت وياه
وهو لازم ايدي
وصلنة لمحل البدلات دخلنة
واني احس الدنيا سودة
هم راح ارجع البسك؟
بقيت صافنة شختار كلشي حلو
غيث:-اختارلج ؏ ذوقي؟
ايمان:-اي ترة هو عندة ذوق حلو بالملابس
هزيت راسي مو اريدة فعلاً يختارلي
لا
لأن مالي خلك اصلاً وماطايقة
الدنيا بكبرها
اشر ؏ بدلة وگال الرجال:-هاي مو أيجار مشترة
غيث:-عادي
ملاك:-غيث شصخم بالمشترة وين اخليها
أجر اي وحدة منا
غيث:-معليج انتي
واباوعلها صدك تخبل وسعرها بالخيال
دفع الفلوس واني مامقتنعة
وگال باجر اجي اخذها
ملاك:-غيث صدك جذب شون اشتريتها
وين اوديها حتى ماتصير بالكنتور
غيث:-عادي نبيعها للصالونات
اهم شي اشوفها عليج
غمضت عيوني بصبر
وامي هم ماقابلة عليّ وهو مامهتم
يمشي گبالنة
ومر كم يوم
وأجة يوم العرس...
يجي يوم أهمس بأذنك
همسة العرسان
ذيج المدري
شيگولون بيها المُهم تَضحك
يجي يوم بفرد ماعون نتعشة
يجي يوم وتغفة فوك ضلوع صدري
واحسب بنمشات وجهك نمشة نمشة
انه ناذرلك اجيب الزفة ممشى
وموش بالليل ألصبح نغبش عليك
الرايد يجيب رزقة يغبشلة غبشة
