رواية سداد وبنت العرب الفصل الواحد والثلاثون 31 بقلم الزهيريه

لم اعلم ان فراقك 

سيتحكم بطعم الحياة 

ويجعلها مريره 

ألق/ طبعًا الصدف إلي صير بحياتنه تخلينه نعرف هواي اشياء چانت مضمومه علينه والصدفه آني بنظري احسن من المراقبه لإن بيوم آلي أريا صعدت تنظف غرفة سداد آني ظليت الوب وكل شويه أصعد أشوفها شلون تنظف وشلون ترتب بالسرير وتعطر بالغرفه اني تخبلت منها بس ما باليد حيله لازم أسكت واني نزلت وشفت دولفين تلعب يبرق 

نزلت دخلت للغرفة وآني منهاره واناجي ربي واسأله ليش هيچ دى يصير بيه لا رزقني بأهل طبيعيين وتربيت تربيه صحيحه ولا إني هسه عندي ام من يصير بيه شي اشكيلها همي قهري حالي حال أي بنيه ما عندي احد احچيله وظليت أراقب باب المطبخ شوكت يجي سداد بس تعبت من المراقبه رحت أكلت ورجعت للغرفه وبعدي دخلت أريا 

وهاي يمكن بيها انفصام كل شويه تگوم تعدل بمكياجها وترجع تنام على السرير واني بس أراقب أدق تحركاتها بعدها من كثرة المراقبه نمت وما حسيت غير الساعه مقاربه ال 4 الفجر ونوب عايفه الضوه مفتوح اما هي وينها ما أعرف گمت رحت للمطبخ ما لگيتها رحت للصاله بس دولفين ويبرق نايمات ساعتها ونار وشبت بصدري عرفتها بغرفة سداد وعبالك رب العالمين لطف بحالي وما يريد يبقيني هيچ آكل بنفسي 

سمعت صوت سداد يصيح طبعًا صرت كنغر على السريع طفرت للدرج واجيت وگفت يم الباب وسمعته شلون يغلط عليها وفهمت أخيراً شبي سداد وياها ومن سمعته يگلها طلعي بره وهي تتوسل بي عرفته راح يفتح الباب وبالفعل ما خاب ظني فتح الباب وشافني ودفعها وسد الباب گلت بنفسي حمدلله شگد راقبت بس هسه هاي الصدفه إلي خلتني أعرف كل شي أحسن ما متعبه نفسي بالمراقبة 

واريا نزلت دردم على سداد واني نزلت وراها بس چانت راحه نفسيه عندي ومن سمعت شمسويه هي فرحت فرحه لا توصف يعني فهمت انه سداد قافل عليها وما يريدها يعني بعد عندي امل 

وعلى ثاني يوم اني چنت انظف من نزل سداد ويبرق راحت تركض عليه ظل يبوس بيها وبعدين گاللها روحي يم نانا واجى يمي 

سداد/ تعالي ورده أريد احچي وياچ بالگراج 

الق/ حچى وهو طلع قبلي واني طلعت ورا أشر براسه بمعنى سدي الباب 

واني هم سديتها وتقربت منه وبدأ كلامه 

سداد/ ورده أنتي شنو چنتي سوين قريبه على غرفتي الفجر 

الق/ أستاذ سمعت اصواتكم عاليه وصعدت 

سداد/ شوفي ورده عيب تصنطين على رجال ومرته 

الق/ اني ما اصنطت هو صوتكم عالي 

سداد/ شوفي ورده ما أريد تحچين بسمعتي لأي احد وخصوصًا گدام يبرق هاي بعدها طفله هسه إي شي سمعه يتخزن بدماغها ومن تكبر راح تذكره وتتعب نفسيتها 

الق/ اطمئن استاذ من هاي الناحية اني ما عندي أحد احچي ويا ومن جهة يبرق هاي طفله واني ما احچي اي شي يخص آحد گدامها  

وبعده ما مجاوبني صاحت عليه دولفين وصوتها اجاني من الصاله طلع واني جاوبتها نعم وبنفس الوقت غميتها 

وسداد فتح عيونه عليه وگال / هاي شنو هاي عليمن تغمين 

الق/ لا العفو اني متعوده على هذا التصرف واگول عنه كارت ابو الخمسة 

وهو لزم اصابيعي قوي وهو يگلي / شوفي لچ اكسرها لايدچ فهمتي إذا تعيدي هذا التصرف ساعتها راح أكسر ايدچ اثنينهن يعني كارت أبو العشرة 

وبعدها ترك أيدي ودخل واني دخلت ورا وانتبهت چانت اريا واگفه يعني الظاهر چانت تراقبنه ومن دخلت 

اريا/ ما تعجبت من شفتكم سوه هو هذا مستوى سداد خدامه 

الق/ آني ما اهتميت إلها لان هاي حرگت الگلب چانت نفسها بيه قبل يوم ومر يومين وسداد أبد ما طلع من البيت الى ما اجتي قوه مشتركه يريدون ياخذون سداد وخطيه ضربوا على راسه بحيث ظهره نترس دم وشگد حاولت إنه بس يعالجوا بس ما قبلوا أبد وأخذوا وطلعوا 

من راحوا فرفحت روحي عليه لان خطيه من دى يطلعوا رجعوا أيده وره ظهره وخلوا كلابچات وطلعوا واريا من شافتهم صعدوا بسيارة گامت تهلهل وجيرانهم خطيه إجى على السياره الي صعدوا بيها سداد وسأله 

اخ سداد تأمرني بشي بس سداد جاوبه انه ما محتاج شي 

ومن آريا گامت تهلهل جاوبها الرجال نفسه لو بنت حلال چان طينتي راسچ بس الظاهر إنتي بنت حرام وهي بدون خجل ومستحى اجتي رگعت الباب قوي ودخلت وآني دخلت بعدها شو هاي رجعت عليه 

اريا/ يله بسرعه جمعي أغراضچ وتركي البيت احنه ما محتاجين خدم 

الق/ إني لو أموت ما اطلع منا الى ما يجي سداد ومثل ما هو جابني هنا هو يطلعني فهمتي 

بوقتها هجمت عليه آريا وضربتني واني من حلاة روحي هم هجمت عليها وضربتها وصارت وحده تضرب الثانيه الى ما تعبنه وحده عافت الثانيه وهي بعدها مصره إنه أطلع من البيت واني ما اقبل أطلع 

وبعد ما مر على اعتقال سداد ساعتين إجى سردار ودولفين ودخلوا شلون المخروعين ودولفين تولول على سداد وتبچي 

و سردار سألني على موضوع كله وشلون اخذوا سداد وأني حچيتله أدق تفاصيل ودولفين من سمعت سداد ضربوا على راسه تخبلت ظلت تعيط وتبچي واجتي آريا گالت / حيل بي ويستاهل عسى بالزايد وكون ياخذ إعدام 

وسردار تخبل جاوبها / الاعدام الچ يا ساقطه ولابوچ ولعشيرتچ كلها اذا جيبين سيرة سداد على لسانچ أكسر سنونچ بحلگچ يا ساقطه يا دايحه 

وبوقتها گبت لستار بين أريا وسردار وهي گالت لسردار 

اريا/ هاي الخدامه ما أريدها تطلع من البيت 

سردار/ روحي ببيت الخلفچ شرطي عليه مو هنا الله يرحم ايام اهلچ الي كاتلهم الفگر وينطي الصحة والعافية لسداد ألي شبع بطنچ من جوع وشفتي فلوس وذهب وملابس ورده سداد هو شغلها هنا وهو ينهي خدماتها موشگلچ الزفر 

وهي تخبلت آريا/ شوف اذا ما خليتك تندم على كلامك هذا آني مو آريا إلا اخلي عتبة هذا البيت محرمه عليك 

سردار/ وشلون بله شنو بيت ابوچ وراح تبيعي وأني ما أدري 

آريا/ روح بلغ ابن خالتك إنه راح احجز على أمواله المنقوله والغير منقوله 

سردار/ واحد اذا يريد يعتب فيكون العتب على الشريفه إما الساقطه بشنو ينعتب عليها انتي ينطبق عليچ المثل ان لم تستحي فأصنع ما شئت 

الق/ وعافنه سردار وصعد فوگ بغرفة سداد ورجع نزل وبيده موبايل سداد واخذه وطلع 

أما احنه بقينه نترقب شنو ممكن يصير وسردار يروح ويجي علينه إما آريا أنتبهت عليها هواي تتختل وتحچي بالموبايل ويه منو الله اليعلم ومن تريد تحچي بالموبايل كله تصعد بغرفة سداد 

وحتى يبرق كله لو تاركتها يمي لو يم دولفين وبعدها أطور الموضوع صارت تطلع وين تروح ما نعرف ومر 3 ايام على سداد من أخذوا إجى سردار گال انه راح يتم ترحيل سداد لأربيل لان تهمة قتل اوزجان بحكومة كردستان 

من عرفت راح ياخذوا لاربيل تخبلت يعني شنو بعد ما أشوف سداد وبوقتها سردار گال / خالتي دلفين راح تطلع لاربيل وأني كذلك وأنتي ما معقوله تبقين هنا يم آريا لهذا لازم نتواصل ويه عمچ حتى ترجعين يمه لإن بكل الأحوال سداد نحكم او ما نحكم أنتي بالنسبة لسداد مجهولة الهوية 

سداد/ كل الصار ويايه والله يوگف العقل يعني اني منو اله مصلحه حتى يقتلني يعني إني إنسان عادي لا آني شخصيه سياسية ولا اني شخصيه بالحكومه وشگد أجهد تفكيري أريد أتوصل لشخص ممكن يكون سوه بيه هيچي بس ما توصلت لشخص أبد وآني بعد ما دخلوني بمقر تابع لقوات البيشمركة 

ومر على وجودي وقت مو هواي حتى دخل فرقد وعرفت منه أنه سردار هم جاي يريد يشوفني بس ما قابلين وسألت فرقد منين عرف انه اعتقلوني 

فرقد/ أتصل بيه المدير مالتك وطلب مني أجي أشوفك واني أحقق هنا في بغداد بقضيتك هاي شنو شبي راسك ليش لافه بشاش وشنو هذا ملابسك من ظهرك هواي بي دم 

سداد/ هااا من اجوي يعتقلوني اني صعدت ركض اريد آخذ موبايلي وأتصل على سردار ابن خالتي بس همه عبالهم دى أنهزم وضربوني 

وعافني فرقد ورجع گام يدگ بالباب بقوه بحيث الحارس الواگف گوه لحگ يفتح الباب من الدگ مال فرقد وهو فتح الباب طلب منه فرقد انه يصيح للضابط 

وظل واگف قرب الباب إلى ما اجى الضابط وبده ويا فرقد 

فرقد/ بلا زحمه هنا عدكم المتهم ضاربي على راسه وهذا يعرضكم لمسأله قانونيه وبهيچ حاله القضيه صير قضية راي عام 

الضابط/ بس هو حاول الهرب 

فرقد/ سيادة الضابط الهرب لازم يكون خارج مكان مو تابع اله يله آلك حق تستخدم سلاحك ضده مو هو بداخل بيته تضربوه هذا وضعه يتحول لطبابه ويثبتون هاي الواقعه بتقرير حتى نضمه للقضيه  

سداد/ وترك الضابط ورجع عليه وظل يحقق ويايه 

فرقد/ شوف سداد احنه هسه بواقعة قتل اوزجان اگول قتل لان البريك فگس بفعل فاعل لهذا اريد تذكرلي وبالتحديد وين چنت تروح خلال آخر يومين قبل وفاة اوزجان حتى أي كاميرا موجوده بمكان تواجدك نسحب تسجيل الكاميرا 

سداد/ والله ما أذكر بس اني چنت بالدوام وعادي چنت اطلع من الدوام وأرجع قبل المكان الي چنت اتردد عليه هو على حضرتك للمركز وللمحكمه ولدوامي 

فرقد/طبعًا بدوامك مستحيل واحد يجي ينام جوه سياره ويبحوش بيها وعليه من تجي بالمركز هم مستحيل والمحكمه هم مستحيل اكيد رايح مكان ما تذكره حاول بكل جهدك تذكر 

سداد/ احتمال بيوم مصالحتي ويه اوزجان أو بالليله نفسها 

فرقد/ مستحيل لان تقرير الطب الشرعي ثابت وهو انه متلاعبين بي قبل يوم او يومين يعني اذا ما ذكرت وين الاماكن إلي رحت بيها التهمه راح تنذب براسك 

سداد/ وعافني فرقد وراح وأني ظليت اريد أذكر وين رحت ما جاي أذكر وظليت 3 ايام بالتحقيق بين مقتل اوزجان وبين المجلس التحقيقي ومو بس اني حتى صديقي إلي نقام في بيته الصلح بيني وبين اوزجان الله يرحمه وصديقي إسمه رامان.   

وهو من دخل وشافني ظل متعجب ومن عرف التهم مالتي 

رامان/ كله من لا يوفقه كوجر هو چان يريد يصالحكم يعني ما لگى الا بيتي هاي اني تورطت 

سداد/ ظلينه واحد يهدئ بالثاني وبعدها آني بالليل اجوي بلغوني انه راح يتم نقلي لأربيل حتى اتحاكم هناك حسيت گلبي نعصر وظل بالي يم يبرق شلون راح تبقى يم أمها بس ما بيدي شي وظليت بس أدعي من رب العالمين يخلصني على اهون سبب 

وبالليل اجى سردار وگلي انه ورده راح يرجعها على عمها وأمي راح ترجع لأربيل على مود محاكمتي بس انقهرت على ورده خطيه هاي شلون راح ترجع على عمها الاغم بس الظاهر هذا قدرها 

ولليل اجتي قوه من قوات البيشمركة واخذتنه آني ورامان وطلعوا بينه لأربيل حتى نتحاكم هناك وبهيچ موقف تحس الطريق صار قصير لان بسرعه وصلنه لاربيل ودخلونه زنزانات وبقينه هناك ومر على وجودنه بالسجن 3 أسابيع وبس تحقيقات ما تخلص وأمي وسردار موجودين ويايه بأربيل 

إلى ما بيوم وطلبني الضابط ورحت وبالبداية ما حچى شي ظل يگلب بموبايله وبعدها 

گال الضابط / طبعًا أنت تهمة قتل اوزجان حمدلله طلعت منها برائه وبصراحة الفضل راجع لضابط في بغداد كل الفضل اله يعني شگد ما اگول سبع وابن ابو قليل بحقه 

سداد/ شلون برائه  

والظابط گام وخله موبايله موصل لشاشه عن طريق البلوتوث. عرض عليه لقطه وهاي اللقطه هي اكو واحد يمشي ويتلفت آخرها نام جوه سيارتي. وبعدها شويه وطلع من جواها وبيده كتر 

بعدها الضابط. سألني تعرفه اباوع عليه ركزت ما عرفته نهائي جاوبته انه ما أعرفه نهائي ولا شايفه بحياتي ظليت منتبه على المكان الي چانت بي سيارتي چان قريب على بيت مومه  

الضابط/ أنت حاليًا تعتبر برائه بس عليك مجلس تحقيقي وهاي بقت يم مديرك اما هذا الشخص راح اسلمه النه حكومة بغداد 

سداد/طبعًا اذا احچي بفرحتي ما تنوصف أبد احس گلبي راح يوگف من الفرحه واجى سردار وبعد وقت طلعت واما المجلس التحقيقي هذا مجلس عسكري من أداوم يحققون ويايه وطلعت أخيراً 

بعد عناء وبس وصلت لبيت أهلي ظليت أبوس امي وحتى لگيت جيهان أختي 

وبقيت أستفسر من سردار وهو منين جابوا هذا الفديو 

سردار/ هاااا فرقد ظل يسألني على الاماكن الي تردد عليها أكثر شي گتله دوامه ويمي يجي لهذا انطى امر بسحب تسجيل 3 كاميرات مآل 3 بيوت وهاي اللقطه أخذناها من تسجيل كاميرا جيرانه وسحبها طبعًا هذا بعد عناء ولازم تتبع الكاميرات وشلون خطر على باله بيتي والله عفيه عليه صدگ ذكي ويستحق الرتبه إلي مخليها على كتفه 

سداد/ انت عوفك من هذا كله بس اني ما شايفه ولا اعرفه لهذا الشخص ليش يريد يموتني 

سردار/ انت تحچي صدگ ما عرفته ابد 

سداد/ لا أبد ما شايفه غير واحد من يريد يقتل واحد اكو دافع للقتل اني اذا ما شايفه ولا أعرفه شنو الدافع مال القتل 

سردار/ هاي شبيك سداد هذا عم البنيه الي تهمتك إلي جبتها وياك من أربيل 

سداد/ ولهذا ليش يريد يقتلني واني ما مسوي شي اله 

وانتوا گلتوا احنه انطينا فلوس وسد الشغله كلها بعد شنو راح يحصل اذا موتني 

سردار/ شوف سداد اكو موضوع مهم لازم تعرفه وهو انه زوجتك رفعت عليك قضية أملاك المنقولة والغير منقوله 

سداد/ هسه خلي تمسح أيدها بالحايط اني طلعت بعد على شنو تحجز أملاكي لو تموت وربك فلس ما انطيها 

سردار/ بصراحة هي تفاوضت ويايه گالت ما اقدم دعوه ضد سداد إذا انطاني الفلوس الي أريدهن

سداد/ عيني خلي تروح تشتكي عليه أريد اشوف شلون تاخذ فلس احمر 

سردار/ بصراحة سداد لازم اگلك الموضوع بعد ما يتحمل آريا قدمت شكوه ضدك انه انت تتعاطى مخدرات وانه انه جيب نسوان للبيت 

سداد/ اي وشنو دليلها انه اني اجيب نسوان للبيت 

سردار/ دليلها لكون ورده حامل

الفصل الثاني والثلاثون من هنا