رواية لأني عاقر الفصل التاسع والثلاثون بقلم مريم خفاجة
لا اكدر أوصل الك
ولا أكدر أحجيلك
وما تدري شگد الوجع
من أكعد ادعيلك
وشگد صعب تندم
وچفوفي مو يمك
وما اخذك بـ الحُضن
من يحترك دمَك
يلحاسبينك هَوا
ومانكدر نشمك
ولا نگدر من الألم بـ أرواحنا نضمك
#لأني_عاقر
#البارت_التاسع_والثلاثون
#حسنين_الجبل
صوتوا للبارت+تعليق بين الفقرات+متابعة
لحسابي
ــــــــــــــــــــــــــــــــــــــــ
...
كمت متألمة ورجعت نفسي
لورا الم العملية يذبح ذبح
بيدي تلفوني واراسلة وكلها
نايمة بس اني وحدي بالصالة
امير:-ها خو ما توجعتي؟
وردة:-هسة اصير زينة الألم يروح ويرجع
امير:-هسة مو گتلج ضلي هنا يمي
رحتي يم مرت اخوج شون مرة عاد
وردة:-كم يوم اضل ارتاح وارجع شبيك
يا عيني كمل سولفلي شصار
احاول اسد موضوع اهلي
شنو اگلة ستوني جايبة واكرف البيت
كرف؟
لان حضرة جناب الخانم
ماتگدر واني هم ماگدر اعوف امي
وأمنها يمها
ضليت مدنگة اسولف وياه
وعيني ؏ التوائم آيات وآدم خاف يفزون
سمعت صوت الباب
انفتح ؏ كيفة ورجع انسد
دخل كمال بزي العسكري باوعلي
وگال:-ليش هنا نايمة بالبرد
وردة:-احسن الحمام قريب علية
وهاي صوبة مو باردة كلش
كمال:-خاف ذولة يتمرضون
وردة:-لا ما عليهم شي
كمال:-شلونج زينة؟
تقدم باس راسي ابتسمتلة وبستة بخدة
وردة:-الحمدلله اسويلك عشة؟
كمال:-لا اني اجي اسوي
وينها هاي الزغيرونة
وردة:-هههه هاي وياها
كمال:-شو يتشابهون كلش اني الأدري
بي ميطلعون يشابهون اذا ولد وبنية
وردة:-لا عادي اكو توأم متماثل واكو لا
هز راسة وبوسهم ثنينهم وصعد
باوعت لورا مشيتة الثگيلة
وصوت طگطگة ركب رجلية من السوفان
جان يأذي روحة بالشغل
وانتوا تعرفون ليش
بعد ما انسحبت وضيفتة منة
بالواسطات والفلوس يلا رجع
ذب فلوس الدنيا كلها وخوالي من جهه
لان بالدولة فـ گدر يرجع
بس مو مثل شغلة القديم رجعوا ؏ السيطرات
ويتعب تعب مو طبيعي
وجنت اتمنى من يرجع من دوامة
تلاگي مرتة بأبتسامتها وحُبها ألة
بس ماكو هيج شي اصلاً
ولا راح يتحقق بيوم
نزل وهو مبدل وسابح وراح
للمطبخ سمعتة طلع اكل بارد واجة
جاب صينيتة وگعد
يمي گتلة:-ماخليتني اكوم احميها
كمال:-لا مالة داعي عليمن
وردة:-وجهك صاير اسمر من الشمس
كمال:-من التعب مو من الشمس
وردة:-الله يساعدك
ابتسملي وهو يشرب باللبن وضل
مدنك ياكل لحد ما خلص
واجة يمي ابتسمت وفتحت ايدي
ضحك وخلة راسة ؏ رجلية وباس ادية
كمال:-يالله شگد حنينة انتي
وردة:-اممم دعترف حتى امي مو حنونة
مثلي مو؟
ذب حسرة:-امي مشاعرها معدومة منيلها مشاعر
ضحكت:-هي من زغرنة هيج تعاملنة
كمال:-تؤ احسها تنتقم بس بطريقة غير مباشرة
وردة:-شلون يعني؟
كمال:-تنتقم من داير مدايرها بينة
هي جانت تحب علاء ومن كد ما تكرهه ايمان
اذتها ببتها بس هي ماتدري اذتني اني
وردة:-تريد الصراحه لاتزعل مني
بس الصوج صوجك منين اكو رجال يمشي
ورا عناد مرة؟ اساساً ماكو شي اسمة جبر
تكدر ترفض بكل اريحية هاي
اذا جنت تحبها
كمال:-جنت ومازلت
وردة:-حياتك كلها غلط بغلط والنبي
كمال:-اعرف هي الصحيحة بحياتي
يمكن بوسط هاي الهوسة كلها لو ترجع احس
الدنيا كلها تستعدل حتى العراق
يصير براسة خير
وردة:-دسكت خوية اسكت
يلعب بشعرة وعيونة
؏ السگف ويحجي وياي:-تدرين شنو
وردة:-شنو
كمال:-ما جاي تطلع من دماغي شگد احاول انساها
وردة:-اشششش حرام عليك
كمال:-خلي احجي ترة تعبان وداعتج
وردة:-حرام والله ميصير
كمال:-اسكتي عني
وردة:-سولف يلا
كمال:-لا تحجين من ورا خشمج لا
الوي راسج لوي
وردة:-فوكاها تتمنن علية ادبسز
كرص فخذي ردت اصيح
خليت ايدي ؏ حلكي خاف تفز
الجهال:-مو كووووة ناموووو
كمال:-اي خلي اسولف
وردة:-اي عمي سولف اسمعك
كمال:-عيونها تحبة هواي
وردة:-ياهوَ؟
كمال:-غيث
وردة:-تموت عليّ اصلاً وهو كذلك
كمال:-بس لو اعرف شلون گدرت تزوج
وردة:-مثل ما انتَ گدرت
كمال:-وردة لا تشكين كلبي شك ماتدرين
بية شنو جنت اعاني
وردة:-كمل
كمال:-سمعتها تحجي ويا تدرين ماضجت
ضحكت گتلة:-ليش؟
كمال:-ما ادري احسها الية وبس
يعني احس جانت توجه هذا الكلام الي
بحيث كلتلة حبيبي وكأنما گالتها الي وحتى من
حجيت وياها شگد ضوجتني بس ما عصبت
منها
وردة:-ليش
كمال:-جانت هي الوحيدة التفتهمني
بعز انفعالاتي تضحكني
جان يحجي وهو صافن بالسگف
وكلامة كلة ممربوط ماكدر اربط جملة وجملة
كمال:-عيونها جنت افز واباوعلهن
هسة افز وادورهن
سكتت ماردت اضوجة اكثر
عيونة تلالي دموع
ضليت اباوع لمدى عشقة الها
رجع ابتسم وگال:-احبها من تضحك تغمض
وتصير الوجنة شذرية
سحب نفس قوي وغمض
عيونة
وگال:-وردة ما تتصورين فكرة هي متزوجة
غيري يغازلها يحبها وتحبة يحضنها
وهي وياه جوة سگف واحد هاي الفكرة بذات
تذبني من سابع سما
غيث يحبها ويموت عليها و ودي
سجينة بكلبة اخليها وانهي هاي المهزلة
هي الية وبس منو سمح لأي احد ياخذها مني؟
اني ليش رضيت اطلگها
لج اللحظة الي گلت بيها الها انتي طالك
من عسى لساني انگص
حجاها واني مسحت دمعتة
الخاطفة ؏ وجناتة:-تدرين من نزلت من السيارة
وتخربطت نزلت اول واحد الها
بس تراجعت من شفتة ركض هوَ وشبكها
واعتنى بيها حرارة الشمس الجانت فوگاي
كمت احسها حرارة عادية ولج نار گلبي
ماتطفى
وردة:-يحبها كلش هوَ
متعلق بيها لان تشبه أمة
كمال:-ملاكي ماتشبهه احد ماشفت مثلها
لو اتزوج عشر نسوان غيرها
وردة:-اي اشوفك يومية مرتك بطنها لگدام
ضحك وگال:-ولج البـ*** مدري شلون
تحبل شگد اخذ احتياطاتي وماتقربلها
ومالي نفس بيها زط بط ثاني يوم تطلع حامل
مو بشر جنها بزون
وردة:-يعني هسة من توصللها
تحبها يعني تحسسها بشعورك؟
كمال:-لا تدرين نص ساعة واگوم عنها تلعب
روحي منها ولا هيّ تريدني ولاتبادلني
وردة:-شگد شلعت گلب ملاك بيها
ذب نفس قوية احس
گلبة راح يطلع ويا النفس
كمال:-اتمنى لو اعيد الزمن امنيتي الوحيدة
هاي
وردة:-ماتگدر بعد الراح راح لاتفكر بي
كمال:-اذا چان الراح ميستاهل نندم عليّ
مانفكر بي
رفع عيونة ببطئ علية وهمس:-بس الراحت ملاكي؟ وترديني مافكر؟
سكتت اباوع لعيونة
همست:-كمال لا تأذيها
كمال:-اني أذيها؟
وردة:-اقصد تگول لزوجها انتَ طليقها
خليها مادام ارتاحت بحياتها فدوة
لاتوصل يمها بعد
ضحك وگال:-لا بابا مو لهل درجة واصل
وردة:-لعد ليش تقربت من غيث
والله حتى اني خفت
كمال:-لا يمعودة بس اخوفها
وردة:-يا ليش تخوفها
كمال:-احسن عاد اكو شعور بداخلها
من تشوفني ماريد ذاك البرود بعيونها
وردة:-والله تفكيرك شاخط
كمال:-انا واصل مرحلة ارفع ادية بصلاتي
وادعيلها ترتاح وياه
وردة:-احسن عذبتها هواي
كمال:-بس اريدها
غمضت عيوني بصبر وسكتت
وضليت العب بشعرة لحد ما غفة تعبان
واشوف بشرتة السمرة
واثار التعب بيها
اتذكر من تخربطت واجاها
يركض اول واحد فتح الباب ودنك يريد
يشيلها دفعة غيث وشالها وركض
بيها
ضل صافن يباوع واني احاول احاجي
بقة ساكت
وردة:-كمممال شبيك
عافني ونزل ركضت وراه
طلع لبرة اشرت لأمير
راح ورا گعد ؏ كرسي مغمض عيونة
وغرس اصابعة
بشعرة وضل يهز رجلة سريع
واني اباوعلة من الشباك واتگرض
فجأة
گام والكراسي المسطرة كلها
شمرها ضل يشيل ويرگع كرسي كرسي
برجلة وايدة
ويصرخ بصوت عالي وامير ومحمد
يحاولون يلزموا بس ماگدروا
بحيث ؏ الصوت كلها طلعت
وهو يصيح:-ليييييييييش اخذذذذذذذها ليييييييييش
بجيت واني حاطة ايدي
؏ حلگي والبنات والعالم كلها التمت
جرو عمامي
ولزگو بالحايط يحاولون يسيطرون
عليّ مثل الوحش انگلب
بعد حتى ماينلزم
عصام:-وووووولك عممممماممممة هناااااا
لاتفضحححححنة
عثمان:-شون مصيبة هاي ادددخل جووووة
اددددخل
دخلو يدفعون بي وهو وجهه
احمر لزمت ايدة نترها بسرعة وبقيت ابجي
دخل جوة
وعمتي وجدان گالت:-يمة انفضحنة بين
العالم ياربي
ملك:-شبي هذا
وردة:-مابي شي
رندة:-من ورا اخيتج غير
ملك:-متحلفة بيج من زمان احجي بعد
حجاية واسوي فاتحة ثانية هنا
وردة:-اسكككتتتن كاااافي تردن تتمالخن
ملك:-انلصمن لعد واخوج خلي يستجن
ستوة طلع محبتة شو دوخرو شلون عائلة
دفعتني وراحت واني دموعي تجري
رحت يمة گعدت ولزمت ايدة
وهو يدخن بعصبية وايدة
ترجف حيل
وردة:-كاااافي راح تموت روحك ذب الجگارة
ذبهااا
ماسمع مني وضل يدخن
ساعات وهو هيج يگلولة روح ارجع لبيتك
مايقبل واني ادري بي منتضرها
وفعلاً ساعتين بالتمام
دخل شايلها وجاسر وراه شايل المغذي
بقت عيوني تراقبة شلون يباوعلهم
بعتب بقهر عيونة انملت دموع
عافنة وكام طلع
ضليت لازمة بطني وافتر من الخوف
وغيث گاعد
برة كل ساعة وصاح واحد
يروح يشوفها وياخذ تقرير كامل عنها
واني اتذكر كمال حتى نومتها
حافضها ويعرف اذا هيّ گاعدة او نايمة
...
ظل نايم بحضني
واني غفيت بوسط هاي الافكار
لحد وجهه الصبح فزيت احس
واحد يعدل نومتي
فتحت عيوني وشفتة هوَ
كمال:-ليش ماگعدتيني صدك تحجين
كسرت رجليج
وردة:-لا عادي
كمال:-شو حركيهن تگدرين
ردت احركهن ماگدرت
گتلة:-لا ماگدر
كمال:-وتگول عادي
ضحكت وهو ضل يمرغ بيهن
وعدل نومتي وباس راسي
گتلة:-امي شوفها نايمة
كمال:-اي وديتها للحمام ورجعت نامت
وردة:-حباب بـ 8 گعدني انطيها علاجها
هز راسة وباسني وراح
صعد بثگل
رجعت نمت
أما أمي
فهي نفس مرض عمتي أيمان
اكو حالات تطول اكثر من سنين
واكو لا من اول جلطة يموت الانسان
واكو يطول مثل مدة عمتي
واكو واكو واكو هواي حالات
كل حالة عن حالة تختلف
وهاي أمي
من طلاگ ملاك لحد هاللحظة هي ؏
هالحال من يوم ما انسجن كمال
عضت لسانها و وگعت وماصحت
الة ورا ماطلع من السجن
بعد سنة بالضبط ولو ضال بالسجن
اكثر جان إمي ماتت
اني الوحيدة المُعتنية بيهم
و ولاء شوفة عينكم يومية حامل وتضل عد
اهلها وتخرب ذاك ؏ ذاك
وهي ورندة مو مثل قبل
من الروس يتكافشن
تروح تخبث ؏ اخوها وهاي تجي وتصير
ممالخ
وترجع رندة تخبث ؏ ولاء
وتروح تحشي براس كمال وينكتلن ثنينهن
كمال صارت ايدة والضربة ياهوَ
اليحاجي ينضرب حتى ولدة
فزيت ؏ صوت صياحهم
تأفأفت وگمت اتمنى لو بيت اهلي يرجع
هادئ مثل قبل
عركة ولاء وكمال كل صبحية
وجهالهم اليطاردون ومايسكتون اني ادري
اليلعب هو وساكت مو هو ويصيح
والتوائم يبجون
گمت كوة فاتحة عيني
شلت آيات ارضعها وآدم يبجي
شلتة بصعوبة وخليتة ؏ رجلية حتى اوازن
عاد تخلص آيات ارضع آدم
ضليت اغفي وهذا يبجي
وردة:-ولك ماما اسكت شبيك ماتگلي
نزل كمال يصيح
ويفشر:-وووووولج لااااا ترااااااددددددييييينيييي
لااااا ترااااااددددددييييين ببببببت الكلللللب
ولاء:-اي ديلا يلا جفيني شرك
كمال:-والله لو ما الطفل اللي ببطنج
جا خلقتج من جديد بس اصبريلي اذا ما ارويج
النبي عربي والملائكة شهود فـ لا اتسمى كمال اوكفيلي
ولاء:-تهديداتك بطلهن
شال السندانة وشمرها بالكاع
صارت الكزاز بكل مكان صرخ آدم و وياه
آيات وجهالة خنسوا
ورجع فوك يضرب بيها
يارب تعبت والنبي ماكو هيج عائلة
وخرت بنتي عن صدري
وانطيت لآدم ممة عاد يلهي روحة
وگمت ؏ كيف جسمي متكسر
جبت الغراض وشلت الكزاز وهمه صياحهم
مالة والي عادي متعودين
وجهالة يضحكون ؏ عركهم
هزيت ايدي ورحت للمطبخ غسلت
ورحت لأمي شفتها
تباوع للسگف فتحت الضوة رأساً
غمضت:-ها أُمي صباح الخير
ما جاوبتني واساساً نطقها ضعيف
تقربت منها وكتلها:-گومي اخذج للحمام؟
هزت راسها بـ اي
گومتها بثگل وعمليتي تريد تطك
بس احاول ما ابين اني متألمة
وهذا اكبر غلط
امي ثگيلة وماتگدر تساند روحها
شلتها واني مغمضة عيوني من الالم
وخليتها ؏ كرسي المتحرك و وديتها للحمام
ضليت لازمة عمليتي من جوة بطني
احس مصاريني تشگگت
خلصت غسلتلها ورجعتها بالصالة
ورحت اسوي ريوك
و ولد كمال واحد يشمر ؏ الثاني
بالطين
صحت من الشباك:-احححححممممممد
تعااااال طبوووووا جووووة
اياد:-شعلللليييييج
وردة:-اوگفلي جايتك
عافني وطلع يركض بالشارع
ولحگوا اخوتة ضليت استغفر وتالي وياهم
نزل كمال من فوك
وصاح:-ووووينننننهم ذوووولة
بلعت ريكي بخوف:-طلعوا بالشارع
كمال:-منننننييييين اتلگااااااها منننننييييين
عافني وطلعلهم واني ادري راح يبسطهم
بالشارع وفعلاً اجو مكطعين تكطع
والعودة بيدة انقهرت عليهم
و احاول اوخرة عنهم
وطاح الضرب كلة بية شردتهم
دخلوا لغرفة امي وقفلوا الباب وهمه يتصارخون
وامهم تصرخ من فوك وكمال
يرگع ويغلط ويفشر بعلو صوتة
برايكم هذا حال بيت؟
وردة:-كاااافي والنبي تعبتوني
كمال:-العصر يجي رجلج ياااخذج يلاااا
وردة:-هي هاي تاليتها مو صوجك
سكت وضل يفتر ويباوعلي
واني طنگرت وضليت دايرة وجهي
؏ الطباخ واطبخ بدون ما باوعلة
اجة من وراي شبگني وباسني
وضحك:-يلا لاتطنگرين
وردة:-وخرر هاي عود اني ستوني جايبة
والنبي عمليتي راح تطك علية
اركض وراكم مثل المخبلة دكافي بس امي
موفية ومكفية بالتعب هاي عوفها طبها
طوب شكو تتعارك وياها والله لعبت روحي
كمال:-بت الكلب تغلط وترادد
وردة:-عمي غراضك نزلهن بغرفة أمي
وضل جوة وهي خليها فوك
كمال:-اي حتى يصير فوك ملهى حتى زلم
تطبب للبيت ماعوفها والله لحد ما اكتلها
؏ ايدي
وردة:-صدك تحجي شهالكلام هذا
كمال:-ولج بت الكلب ناشرة صورها
؏ النعل هذا الانستكرام بت الساقط وبدون حجاب
وهاي الزلم تعلقلها انعل ابوها لابو منين ماطلعت
وردة:-وانتَ من كتلتها تتوب مثلاً؟
كمال:-والله افصم رگبتها فصم
وردة:-روح افرش السفرة وامي خليلها الطبلة
مالتها
اخذ السفرة واني كملت ريوك
هو كام يشيل ويحط واني وامي ؏ الطبلة
ناكل
نزلت ولاء تتمخطر بمشيتها
خزرتها وهي كالت بتنعوص:-صباح الخيررر
محد رد عليها
بس اياد ابنها:-الغسل مو صوجكم
ضربها كمال بالخاشوگة ضحكت
ونزلت راسي وهي كعدت تتريك عادي ولا
كأنما ستوها انكتلت كتلة تسوة عمرها
هاي لو اني بعد ما اطلع
من الباب سنة
اكلنة وهي تسولف وحدة
ومحد يرد لو يحاجيها من توجهلي كلام
اكضيها بـ اي لو اممم
ماسولف وياها ابد
وهي ما سكتت ضلت تسولف تسولف
لحد ما گمنة
رادت تصعد سحبها من ورا
من شعرها وگللها تشيل الاماعين ضلت
بطني ورجلية يوجعني صفكها
راشدي احس ملامح وجهها تخربطت
ضلت ترادد وتشيل وتركع بالأماعين
واباوعلها من تغسلهن بس تمد ايدها بالماي
ماتجلفهن عدل واني اباوع ساكتة
لان اصلاً ماكدر اگوم
بقيت يم امي امرغ بأديها وهي
ساكتة تباوع لجهالي
خلصت اماعين ورجعوا تعاركوا
وخلاها تنضف البيت كلة من فوك لجوة
هاي بس من كمال يضل هنا
شوية ارتاح
من يروح تخنس بغرفتها
وحتى من يجي لمن تنكتل يلا تگوم
ما شايفة هيج بشر
يحب الأهاين
شكد ماتنضف البيت احسة وصخ
الله يرحم ايام ملاك شوكت
ما طب ريحة العطر واصلة لاخر الشارع
والبيت احسة متروس
حنية صح امي جانت عصبيتها وهوستها
بس جان حنان ملاك طاغي ؏ كلشي
وحب كمال كذلك ودلالهم
لحد هاللحظة اني مستحيل تدخل
فكرة ببالي انُ هُمة انفصلوا؟
حبهم ودلالهم ذاك جنت اكول من سابع
المستحيلات ملاك تزعل
زعل من كمال مو هسة منفصلين
جانوا فعلاً لايكين لبعض
واتذكر عيونها التشع حب لكمال
وهسة صارت لغير واحد...
گمت حتى من احجي وياها
احس روحي غريبة
ولا هي تسولف مثل قبل
وتحسسني بعدها مكانتي بگلبها صار كلامنة
ولقائنة محدود وكأنما تطلگت مني اني
هم
من اشوفها تسولف
وتضحك ويا رغد اموت من القهر
انشال وانرگع حتى بجي ابجي
لعد شحال كمال وهو يشوفها بحضن غيرة؟
ماگول غير الله يعينة
گاعدين عود مسوين عصرونية
الجاي محترك ومُر ضليت اكل بس بسكت
هاي من مهارات ولاء خاف
ماتعرفوها
وهي كاعدة رجل ؏ رجل
ودشداشتها الحمرة وبطنها طالعة لگدام
وهي اصلاً بعدها ببداية الأشهر
ومكياجها صاروخ وشعرها كفشة
ومحترك من الصبغ
ولاء:-اگووول صدك شتتوقعون بية بنية لو ولد
ماردينة عليها وكمال
نايم بحضني ويلعب بالموبايل
ولاء:-هاي شبيكم ماتردون
وردة:-هو انتي خلفتج بس ولد
فـ اكيد ولد يجي
ولاء:-وانتَ كمال شتتوقع
كمال:-يجي نعال ؏ اساس ابن
الأميرة ديانا
ولاء:-تروحلي فدوة
كمال:-الجهال نايمة جا اعرف شلون اجرة الزيج
ضحكت وضربت گصتة:-شكد ايع ومقرف
وردة:-والله تكتليني من تسوين روحج
مايعة وتتماوعين بحجيج حبيبتي ريلاكس
؏ كيفج
ولاء:-ترة احنة البغدادين هيج نحجي
لعد مثلكم معدان
كمال:-بشعرج هذا المحترك
ولاء:-من ورا ضيمك غيررر
كمال:-سودة بوجهي
واني اضحك فحطانة وهي
گامت تصيح
لعبتة الاستفزاز مايباوعلها من يحجي وياها
يباوع للموبايل ويبتسم
وهي تشيل روحها وترگعها بالگاع
كمال:-وردة صدك راح اجيب لهنا مُساعدة
لامي
ولاء:-شنووووو يمممممة شنووووو
كمال:-قزرقطوا
ولاء:-دجيبها وشوف شسوي
كمال:-ليش هي بكيفج بت النعل
ولاء:-اي بككككييييفي بييييتتتتي وانييي حررررة
ببببي وردة شككككووو بالنص
وردة:-هي هم صدك
كمال:-ليش تخليني اكوم اخلي النعال
عرض وطول افرج بي حلگج بيتها ام ***
ضربتة ؏ كصتة:-ولك عييييب شنو
لساااانك ماينلزم
ولاء:-والعباس ما تجيبها
ذب تلفونة ورفع ايدة
لفوك وشهك:-اخذج العبااااس بجاه هو العباس
ولاء:-خو انتَ ياخذك
كمال:-صح العارات ماتموت
ولاء:-ما تطبب ولا نعال بهذا البيت فاهم لو لا
كمال:-جا كومي طلعي برة
ولاء:-شنو
كمال:-غير كلتي ماتطبب نعال هنا يلا برة
ولاء:-انعلللل الساااااااععععة السوووودة
التزوجتك بيها يا نذل
شمرها بالمخدة اليمة وهو لسة
راسة ؏ رجلية عافتني وصعدت تصيح
وتغلط لسانها فالت كلش
ضلينة نضحك
اني وكمال وامي تبتسم
فقط
تتخيلون؟
فعلاً كُل قوي للزمان يلين
واحد اقوال الامام علي "عليه السلام"
لا تكن ليناً فتُعصَر ولا تكن صلباً فتُكسَر
وأمي وذيج قوتها الجانت
وحالياً الحرف كوة تلفظة گوة تصيح
بأسمي
وتجي ايام واشهر ماتحجي ابداً
بعد ما طلع كمال من السجن
تحسنت وصارت احسن
بس فترة مرت بعد ما أمنتها بيد ست ولاء
گامت تخربط بعلاجاتها واصلاً
تجي ايام ماتنطيها علاجها رجعت امي
انتكست حالتها للاسوء وصارلي
سنين احاول ارجع صحتها بس شوية ماگدرت
والدكتور كال يوم واحد اذا تخربط العلاج
معناها كلشي يخرب
واكيد الحالة النفسية الها
دور جبير اذا هيّ يومية تفز ؏ صياح عائلة كمال
منين تتحسن بعد
فـ ضليت اني يمها ماكدرت أأمن بعد
وكمال بالاساس محتار بضيمة وينة وين أمي
ومهما كانت أمي وعصبيتها
وعدم اهتمامها بينة من احنة وزغار
تبقة أم ومستحيل اكدر اعوفها بهذا الوضع
مرة صارت عركة بيني وبين ولاء شفتها
ضربت علاوي
لعبت بيها لعب وصلت اريد
اكتلها بس خفت لان جنت حامل وبعدني
بالبداية
طيحت حظ حضها اخذت علاوي
ورجعت لبيت جدي ابجي
تلگتني عمتي سولفتلها
رادت تروح تكتلها ماقبلت
لمياء:-وووووولج لليييييبش مخللللييييها
؏ حححححل شعرررررها
وردة:-خلي تولي والله بعد ما اوصل لبيت
اهلي لو اموت عمة شسويلها اكتلها
تحطني وتكتلني والنبي اموت جوة اديها انتي
شايفة شكبرها خو ذاك اليوم ضربت مصطفى
راشدي وعلي الولد كام يفتر بمكانة
ضحكت وغمتني
واني صدك ضجت بوكتها وضليت
ببيت عيالي وامير كال بعد ما توصلين
اجاني كمال مستغرب لان عفتهم
هو متعود لحد 10 بليل يلا ارجع للبيت
سولفتلة ضل يعتذرلي وباس
علاوي وگال اني اربيها
ماكو ورا ايام امي دخلت مستشفى
و 3 اشهر نامت بالمستشفى
وتبهذلت بالزايد
يعني اذا اعوف امي بالبيت يوم
اضل مكابلتها اشهر بالمستشفيات
ومحد يساعدني ولا اگدر
اطلب من اخوات امير يساعدني لو يعنني
اعوف جهالي يمهن واروح لأهلي
واني هناك اعينهم
رندة بعد ماتوصل لبيتنة
من انكتلت اجة رجلها وصاروا دك
هو وكمال لحد ما هدتهم الناس
اخذ رندة وراح
وهي صفت ويا رجلها
وعافتنة ماتجينة بعد
و ورا ايام رحت للدكتورة مالتي
من شافت الخياط
لعبت بية لعب
الدكتورة:-صدك تحجين انتي هاي شلاعبة
بروحج بابا لو ضالة اكثر جان صارت
كنگري ببطنج
وردة:-والله مادري جنت ملتهية
الدكتورة:-بيمن ملتهية ماتگليلي الانسان
اذا مايهتم بصحتة بيمن يهتم لخاطر الله
سكتت
ماتدرين حقج
وهي رجعت فتحت الخياط واني
من الالم ضليت اصرخ وهي تدردم علية
ورجعت خيطت
بطني احسها تشگگت لعبت روحي
من الدنيا كلها
من دخل امير للدكتورة لعبت
بي لعب وهو ساكت بس مبين عصبي
ومن رجعنة طيح حظ حضي
وماقبل اروح لبيت اهلي
رجعت لبيت عيالي
عاد عماتي زينات يهتمن بية
سمعت بكمال جايب مساعدة ماكو
يومين والبنية شاردة
وبيومها اجتنة ولاء تركض
حافية وكمال يركض وراها ويضربها
انفضحنة بين الدنيا كلها
فعلاً الحوبة تبطي ما تخطي
واني اعترف هاي حوبة ملاك بينة
والله يُمهل ولا يُهمل
وعذابها وحرگتها كلها طلعت بينة
نستاهل كلنة وحتى امي
تستاهل كلشي جاي يصير بينة بسببها
لحد ما جدي طردهم
وما سوالهم اي شي واي حل
لان حتى هو تعب منهم
بقيت للصبح سهرانة وايدي
؏راسي شسوي ياربي عائلتنة جاي تدمر
شنو الحل الأسوي؟
تعبت تعبت من كلشي حتى
امير وحتى جهالي اهتمامي بيهم يقل يوم
؏ يوم
ثاني يوم كعدت اقنع بامير
حتى اروح لبيت اهلي وهو زعل وراح
اخذت علاوي ورحت والزغار
خليتهم يم نور
دخلت
والبيت الله واكبر الهوسة والزعابيل
والصياح واصل للضالين
طبيت سلمت ونضفنة اني وعلاوي
هو يساعدني وذولة من شافوا هيج
اجو هم يساعدوني ابتسمتلهم
واني امشي ؏ كيفي
خابرني امير كال:-ضلي ببيت اهلج مدام كسرتي حجايتي
وردة:-امير موووو هممم انتتتت علية والله جاي اموت
امير:- ما مجبورة ترحين تخدمين
هاي الـ*** ومادام نزلتي كرامتج معناها كرامتي
اني هم صارت جوة النعال
گبال اخوج ومرتة
وردة:-والله مو هيج اميرر تعبت والله تعبت
امير:-هذا هو عود شوكت ما ترجعين رجعي
بعد مالي دخل
غلق التلفون واني بجيت بقوة
اجة علاوي حضني ضليت ابجي وهو يهديني
عفتة وصعدت لفوك
طبيت لغرفة ملاك القديمة كل ضني
محد بيها
فتحت الضوة وشفتة نايم
وحاضن شي اسود
تقربت منة هزيتة:-كمال
ماكعد وهو يحجي بصوت ناصي
تلمست گصتة حرارتة نااار
ركضت جبت طاسة وبيها
خاولي زغير واني اهز بي واحاول
اگعدة
وهو حاضن عباية ملاك
خليتلة كمادات ماكو ميفيد سمعتة يهمس
بأسمي:-وردة
مسحت دموعي واحاول اخفي
شهگاتي:-ها حبيبي كول
كمال:-أحتاج كَمادات بارِدة تحطيها عَلى گلبي
ــــــــــــــــــــــــــــــــــــــــ
يتبع...
رأيكم؟...
لاتنسوا التصويت ⭐
من گتلي احب عينك
كلت حاجو بربة بدينة
شتحبهن يطرك فلك
الشايل عيونك ولك
هم تحله عين بعينه؟
مادام سبحانة بعد
خالقنة نفس الطينة
شيصير لو نفس الوقت
من طينتك ينطينة؟
لـِ باهر الجنديل
