رواية كحل عرب الفصل الاربعون
( ﻋﻠﻰ ﺍﻃﻼﻝ ﺍﻟﻤﺎﺿﻲ )
ﮔﺒـﻞ ﺣﺒـﻚ ..
ﺟﺒﻞ ﻣﺎ ﻻﺡ ﻃﺮﻓﻲ ﺍﻟﺴﻴﻞ
ﻫﺴﻪ ﺍﻭﻝ ﺯﺧﺎﺥ ﺍﻳﻐﻄﻦ ﺳﻔﻮﺣـﻲ !..
( ﻋﺮﻳﺎﻥ ﺍﻟﺴﻴﺪ ﺧﻠﻒ )
ﻛﺢ ﻓﻼﺡ ﻭ ﻓﺘﺢ ﻋﻴﻨﻪ ، ﺳﺮﺣﺎﻥ ﻭﺍﻛﻒ ﻓﻮﻙ ﺭﺍﺳﻪ .. ﺣﺠﻪ : ﺍﻧﺖ ﻳﺎﻟﺨﺎﻳﺚ ( ﻣﻜﺴﻮﺭﺓ ﺳﻨﻮﻧﻪ ) .. ﺍﻧﺖ ﺗﺠﺘﻠﻨﻲ .
ﺟﺎﺑﻪ ﺧﻨﺠﺮ ﺑﺪﻓﺮﻩ ﺑﺼﻔﺎﺣﻪ ﻭ ﻛﺎﻟﻪ : ﻳﺎﻫﻮ ﺍﻟﺨﺎﻳﺲ ، ﺍﻧﺖ ﻳﻮ ﻫﻮ ، ﺍﺣﺠﻲ ...
ﺿﺮﺑﻪ ﺑﺼﺪﺭﻩ ﻛﺎﻡ ﻳﻜﺤﻜﺢ ﺑﻘﻮﺓ ، ﺩﻧﺞ ﻋﻠﻴﻪ ﺳﺮﺣﺎﻥ ﻭﻛﻀﻪ ﻣﻦ ﻳﺎﺧﺘﻪ : ﻳﺎ ﻧﺬﻝ ﻳﺎ ﺧﻨﻴﺚ ، ﻳﺎ ﺧﺒﻴﺚ ، ﻭﺭﺩﺓ ﺍﻛﻄﻌﺘﻬﺎ ﻣﻦ ﻧﺺ ﻛﻠﺒﻲ ﻭ ﺍﻃﻴﺘﻬﺎ ﺍﻟﻚ .. ﻫﻴﺞ ﺗﺴﻮﻱ ﺑﻴﻬﺎ
ﺣﺠﻪ ﺻﻮﻳﺤﺐ ﺧﻨﺠﺮ : ﺳﺮﺣﺎﻥ ﻫﺎﺫ ﺷﺎﻓﻚ ﻭﺭﺍﺡ ﻳﺎﺫﻳﻨﻪ .. ﺷﺘﻜﻮﻝ ﻳﻮ ﻧﺠﺘﻠﻪ ﻭ ﻧﺨﻠﺺ ﻣﻨﻪ
ﻓﻼﺡ ﻳﻮﻥ ، ﻭ ﺳﺮﺣﺎﻥ ﻛﺎﺽ ﺑﻴﺎﺧﺘﻪ ﻭﺭﻓﻊ ﺭﺍﺳﻪ ﺍﻟﻬﻢ ، ﺟﺎﻭﺑﻪ ﺍﻟﺸﻘﺎﻭﺟﻲ ﺍﻟﻼﺥ : ﻻ ﺍﻧﺎ ﺍﻛﻮﻝ ﻧﻬﺪﻩ ﺧﻄﻴﻪ ، ﻓﻠﻴﺢ ﻭ ﺍﻥ ﺟﺎﻧﻪ ﺍﻏﻢ ﻟﺠﻦ ﻣﺎ ﺭﺍﺡ ﻳﺤﺠﻲ ، ﻣﻮﺵ ﻫﻴﺞ ﻳﺎﻷﺟﺮﺏ ؟
ﺗﻘﺪﻡ ﺍﻟﺸﻘﺎﻭﺟﻲ ﺍﻟﻼﺥ ، ﺷﺎﻝ ﺭﺟﻠﻪ ﻭ ﺧﻼﻫﺎ ﺍﻋﻠﻰ ﺻﺪﺭﻩ ، ﻣﻴﻞ ﺳﺮﺣﺎﻥ ﻭﻭﻛﻒ ﺍﻋﻠﻰ ﺣﻴﻠﻪ ﻳﻨﻜﺚ ﺑﻴﺪﻩ : ﺷﻮﻓﻮ ﺷﻐﻠﻜﻢ ﻭﻳﺎﻩ
ﺧﻨﺠﺮ -: ﺍﻧﺎ ﺍﻛﻮﻟﻦ ﻧﺨﺼﻲ ﻭﻧﻌﺪﻣﻪ ﺍﻟﻌﺎﻓﻴﺔ
ﺍﻟﺸﻘﺎﻭﺟﻲ : ﻻ ﻻ ﻳﺨﻨﺠﺮ .. ﻣﻜﺮﻭﺩ ﻋﻠﻴﺶ ﺗﻌﺪﻣﻪ ﺍﻟﻌﺎﻓﻴﺔ ، ﺍﻧﺎ ﺍﻛﻮﻟﻦ ﻧﻜﺺ ﺍﻟﺴﺎﻧﻪ ﻭ ﺧﻠﻪ ﻳﺸﺘﻐﻞ ﺳﻜﺘﺎﻭﻱ
ﺻﺮﺥ ﻓﻼﺡ : ﻻﺍﺍﺍﺍﺍﺍﺍﺍﺍﺍ
ﻭﻛﺎﻡ ﻳﻜﻀﻜﺾ ﺑﺮﺟﻠﻴﻬﻢ
ﺩﻓﺮﻩ ﺍﻟﺸﻘﺎﻭﺟﻲ ﻭ ﻛﻮﻣﻮﻩ ﺍﺛﻨﻴﻦ ﻭ ﺣﺠﻪ : ﺍﺳﻤﻊ ﻟﻚ ، ﺗﺼﻢ ﺣﻠﻚ ﻭﻣﺎ ﺗﺤﺞ ، ﻭ ﺧﻠﻬﺎ ﺍﺑﺎﻟﻚ ﻛﻞ ﻭﺍﺣﺪ ﺑﻴﻨﺎ ﺧﻠﻚ ﻋﻔﻄﻲ ﺳﺮﺳﺮﻱ ﻧﻜﺮﻱ ﺷﻼﻳﺘﻲ ﻫﺘﻠﻲ ﻭﺑﻜﻞ ﻓﺨﺮ ﺣﺎﻭﻳﻬﻦ ، ﺗﺠﺔ ﻭ ﺧﺎﺭﻃﻴﻨﻬﺎ ﻣﺎ ﻋﺪﻱ ﻛﻞ ﻣﺎﻧﻊ ﻫﺴﻪ ﻫﻨﺎ ﺍﻫﻴﻨﻨﻚ .. ﺗﺼﻢ ﺣﻠﻜﻚ ﻭ ﺗﺴﻜﺖ .. ﻧﻔﻜﺮ ﻧﻌﻔﻲ ﻋﻨﻚ ﻭ ﻧﺘﺮﻛﻚ .. ﺗﻌﻤﻲ ﺍﻋﻠﻰ ﺭﻭﺣﻚ ﻭ ﺗﺤﺠﻲ ﻧﻼﻛﻴﻚ ﻟﻮ ﺗﺨﺘﻞ ﺑﻌﺐ ﺍﻣﻚ .. ﻭﻧﺴﺤﻠﻚ ﻭ ﻧﺠﺘﻠﻚ ﻭ ﺍﻧﺖ ﺍﺧﺘﺎﺭ .
ﻛﺎﻡ ﻳﺘﻮﺳﻞ ﺑﻴﻬﻢ ﻭ ﻳﺤﺒﺤﺐ ﺑﺪﻳﻬﻢ ﺧﺎﻃﺮ ﻳﻌﻴﻔﻮﻧﻪ ، ﺳﺮﺣﺎﻥ ﺍﻧﺪﺍﺭ ﻋﻨﻬﻢ ﻭ ﻣﺸﻰ ، ﺗﺒﻌﻪ ﺧﻨﺠﺮ : ﺷﺮﺍﺡ ﻧﺴﻮﻱ .
- ﻣﺎ ﺑﻴﺪﻧﺎ ﻧﺴﻮﻱ ﺍﺯﻭﺩ ﻣﻦ ﺍﻟﺴﻮﻳﻨﺎﻩ .
- ﺟﺎ ﺑﻌﺪﻙ ﻣﻬﻤﻮﻡ
- ﺷﻨﺎﻃﺮ ﻣﻨﻲ ﺍﻓﺮﺡ ﻭ ﻫﺪﻭﺓ ﺑﻬﺎﻟﺤﺎﻝ ﻭﺭﺍﻛﺪﺓ ﺍﻟﻤﺴﺘﺸﻔﻰ ؟
- ﻏﺴﻤﺘﻬﺎ
- ﻫﺰ ﺭﺍﺳﻪ ﻭ ﺍﻧﺪﺍﺭ ﻭ ﻫﻮ ﻳﺤﺠﻲ : ﺍﻟﺴﻨﻮﻥ ﻭﻳﻨﻬﻦ
- ﺫﻥ
ﻣﺪ ﺍﻳﺪﻩ ﻭ ﻓﺘﺤﻬﻦ .
- ﺷﻮﻓﻠﻲ ﺷﻲ ﻭ ﺧﻠﻬﻦ ﺑﻴﻬﺎ ، ﺗﻜﺶ ﺭﻭﺣﻲ ﺣﺘﻰ ﻣﻦ ﺳﻨﻮﻧﻪ
ﺩﻧﺞ ﻋﻼﻛﺔ ﻭﺳﺨﺔ ﺷﺎﻟﻬﺎ ﻭﺣﻄﻬﻦ ﺑﻴﻬﺎ ﻭ ﻛﺎﻟﻪ : ﺗﺎﻣﺮ ﻳﺼﻮﻳﺤﺒﻲ ﻫﺎﻙ .
ﺍﺧﺬﻫﻦ ﻭ ﻫﻮ ﻳﺮﺑﻲ ﺍﻋﻠﻰ ﺍﻟﺪﺭﺏ ﻭ ﻳﺤﺬﺭ : ﻋﺪﻭﻳﻨﺎ ﺟﺜﺮﻭﺍ ﻳﺨﻨﺠﺮ ، ﻣﻨﺎ ﻭ ﻏﺎﺩﻱ ﺷﻴﻞ ﺍﻟﺘﻔﻜﺔ ﻭﻳﺎﻙ ﻭﻻ ﺗﻬﺪﻫﺎ
- ﺍﺫﺍ ﺍﻋﻠﻰ ﺭﻭﺣﻲ ﺍﻟﺨﻨﺠﺮ ﺑﺼﻔﺤﺘﻲ ﻧﺎﻳﻢ ﻭ ﻗﺒﻀﺔ ﺍﻟﺤﺪﻳﺪ ﺑﺠﻴﺒﻲ .. ﻭ ﺍﻥ ﺟﺎﻥ ﻋﻠﻴﻚ ﺍﻧﺎ ﺍﻓﺪﻳﻚ ﺑﺮﻭﺣﻲ
- ﺳﺎﻟﻤﺔ ﺭﻭﺣﻚ ﺧﻮﻳﻲ، ﺍﻣﺶ ﻭﻳﺎﻱ .
ﺧﺬﺍﻩ ﻭ ﻣﺸﻰ ﻟﻠﻘﺼﺮ ، ﻓﺘﺢ ﺍﻟﻤﺨﺰﻥ ﻣﺎﻟﺖ ﺍﻷﺳﻠﺤﺔ ، ﺷﺎﻟﻪ ﺗﻔﻜﻪ ﻭ ﺍﻃﺎﻫﺎ ﺍﻟﻪ : ﻫﺎﻱ ﺧﻠﻬﺎ ﻋﺪﻙ ، ﻭ ﻇﻞ ﺗﻔﻜﺪﻟﻲ ﺍﺧﺒﺎﺭ ﺑﻴﺖ ﺣﺎﻛﻢ ﻭ ﺍﻋﺮﻓﻠﻲ ﻣﻨﻬﻢ ﺷﻨﻬﻲ ﺍﻟﻴﺼﻴﺮ ﺗﺎﻣﺮ
...
ﺳﻠﻄﺎﻥ : ﻻ ﺗﻜﺒﺮﻫﺎ ﻳﺤﺎﻛﻢ ، ﺍﻟﺰﻟﻤﺔ ﺟﺎﻥ ﺳﻜﺮﺍﻥ ﻭ ﻣﺎ ﻳﺪﺭﻱ ﺑﺤﺎﻟﻪ
- ﻭﺑﺘﻲ ﻣﺎ ﺗﺤﻤﻞ ﺍﺛﺎﻣﻪ ، ﺍﻥ ﺟﺎﻥ ﺳﻜﺮﺍﻥ ﻣﻮﺵ ﺫﻧﺒﻬﺎ ﻭ ﻣﺎ ﻳﻄﻴﺢ ﻋﻨﻪ ﺍﺛﺎﻡ ﺍﻟﺴﻮﺍﻩ ﻭﻳﺎﻫﺎ
ﺳﺘﺎﺭ : ﺍﻧﺎ ﻏﻴﺮ ﻳﻮ ﺍﻛﻀﻨﻪ ﻭﻋﻠﻲ ﺍﻻ ﺍﺳﺤﻚ ﺑﻤﺼﺎﺭﻳﻨﺔ ﺑﺲ ﺷﺮﺩ ﺍﻟﺠﺒﺎﻥ .
ﻧﺎﺻﺮ : ﺍﻟﻠﻪ ﻭﺍﻛﺒﺮ ﺷﻨﻬﻲ ﺍﻭﻝ ﻣﺮﺓ ﺗﻨﻄﻚ ﻭﺑﻌﺪﻳﻦ ﺗﻜﻢ ﻫﻢ ﻣﻮﺵ ﮔﻠﻴﻠﺔ ﺫﻧﺐ ، ﻣﺎ ﺣﺠﺎﻟﻪ ﺟﻠﻤﺔ ﺍﻻ ﻭﺭﺩﺗﻪ ﺑﻌﺸﺮﺓ
ﻛﻮﺍﻏﺪ : ﺧﺎﻓﻮﺍ ﺭﺑﻜﻢ ﻳﻤﺘﻰ ﺭﺩﺗﻪ ، ﻣﻮﺵ ﻫﺎﻱ ﻭ ﺣﺠﺘﻠﻜﻢ ﻭ ﻛﺎﻟﺖ ﺩﺧﻞ ﺳﻜﺮﺍﻥ ﻭ ﺟﺘﻠﻨﻲ .. ﻛﻮﻝ ﻫﺪﻭﺓ ﺭﺩﺗﻪ ﺍﻟﻔﺮﺧﺔ ﻫﻢ ﺭﺍﺩﺩﺗﻪ ﻭ ﻃﺎﻛﻬﺎ ﻭ ﻣﺼﻮﺏ ﻛﺼﺘﻬﺎ ؟ ﻳﻮ ﻟﺰﻭﻡ ﺍﺩﻳﺮﻭﻥ ﺍﻟﺤﻚ ﺑﺎﻃﻞ ﻫﺎﻃﺮ ﺗﻌﻴﺒﻮﻧﻬﺎ ، ﺟﺎﻥ ﺍﺳﺘﺤﻴﺘﻮ ﺍﻋﻠﻰ ﺍﺭﻭﺍﺣﻜﻢ
ﺳﻠﻄﺎﻥ : ﻻ ﻫﺎﺫ ﺍﻟﺤﺠﻲ ﻣﺎ ﻧﺮﺿﻰ ﺑﻴﻪ ﻳﺤﺎﻛﻢ ، ﻛﺾ ﺣﺮﻣﺘﻚ ﺑﻮﻳﻪ
ﻛﻮﺍﻏﺪ : ﺍﻟﺮﺿﻴﺖ ﻭ ﺍﻟﺠﻔﻴﺖ ﻣﻮﺵ ﺑﻘﻴﺪﻙ ، ﺍﺑﻨﻜﻢ ﻳﺘﻬﻢ ﻣﺮﺗﻪ ﻣﻬﺮﻣﺔ ﻭﻳﺎ ﻏﻴﺮﻩ ﻭﺟﺎﺍﻳﻴﻦ ﺍﺩﺍﻓﻌﻮﻟﻪ ﺑﻴﺎ ﻋﻴﻦ ، ﻣﻦ ﻛﻮﻧﻬﺎ ﻣﻬﺮﻣﺔ ﻋﻠﻴﺶ ﺟﺎﻳﻴﻦ ﻟﻴﻬﺎ ﻟﻠﻤﺴﺘﺸﻔﻰ ﻭ ﺍﻥ ﻛﻮﻧﻬﺎ ﺑﺮﻳﺔ ﻓﺎﻧﺘﻢ ﺑﺎﻃﻠﻴﻦ ﻋﺒﻦ ﺟﺎﻳﻴﻦ ﺍﺩﺍﻓﻌﻮﻥ ﻟﻠﻤﺬﻧﺐ ﻣﻮﺵ ﻟﻠﺒﺮﻱ
ﺳﻠﻄﺎﻥ : ﺍﻓﻬﻤﻲ ﻭﻛﺼﺮﻱ ﺍﻟﺴﺎﻧﺞ ﻳﻤﺮﺓ ، ﺍﺣﻨﺎ ﻣﺎ ﺟﺎﻱ ﻧﺪﺍﻓﻊ ، ﺍﺣﻨﺎ ﺟﺎﻱ ﻧﻠﻢ ﺍﻟﻔﻀﻴﺤﺔ
- ﻭﻳﻨﻚ ﻭﻭﻳﻦ ﺍﻋﻜﺎﻟﻚ ﺳﺎﻋﺔ ﺍﻟﻜﺘﻠﻬﺎ ﻭ ﺍﺑﻦ ﺍﺧﻴﻚ ﻳﻜﻔﻜﻒ ﺍﻋﻠﻴﻪ ﻭ ﻣﺎ ﻳﺮﺿﻰ ﺍﺣﺪ ﻳﺎﺧﺬﻫﺎ ﻟﻠﺪﻛﺘﻮﺭ .. ﺟﺎ ﻳﻮ ﻣﺎﺗﺖ ﻳﺎﻫﻮ ﺍﻟﻴﻨﻔﻌﻨﻲ ﺍﻧﺖ ﻳﻮ ﻋﻜﺎﻟﻚ
ﺳﻠﻄﺎﻥ : ﺷﻨﻬﻲ ﺍﻟﻘﻀﻴﺔ ﻳﺤﺎﻛﻢ ﺗﺮﺓ ﺣﺮﻣﺘﻚ ﻳﻮ ﻻﻟﻪ
ﻛﻮﺍﻏﺪ : ﺍﻧﺎ ﻣﻮﺵ ﺑﺎﻃﻠﺔ ﺣﺘﻰ ﻳﺮﺩﻧﻲ ﻭﻻ ﺍﻧﺎ ﻣﺮﺓ ﺧﻔﻴﻔﺔ .. ﺍﻧﺎ ﺑﺖ ﺷﻤﺨﻲ ﻭ ﺣﺠﺎﻳﺔ ﺍﻟﺤﻚ ﺍﺣﺠﻴﻬﺎ ﺍﻥ ﺟﺎﻥ ﺭﺿﻴﺘﻮ ﻭ ﺍﻟﻤﺎ ﺭﺿﻴﺘﻮ ، ﺑﺘﻲ ﻳﻨﻮﺧﺬ ﺣﻜﻬﺎ ﻣﻦ ﻋﻴﻮﻧﻜﻢ ﻣﻦ ﻋﺒﻦ ﺍﻧﺖ ﺍﻟﺘﻜﻔﻠﺖ ﺭﺩﺗﻬﺎ .. ﻭ ﻫﺎﻻﺟﺘﻨﻪ ﻫﺎﺫ ﺣﺎﻟﻬﺎ
ﺣﺎﻛﻢ : ﺍﻟﻤﺮﺓ ﻣﺤﺮﻭﻙ ﻛﻠﺒﻬﺎ ﺍﻋﻠﻰ ﺑﺘﻬﺎ ، ﻣﺎ ﻋﻠﻴﻬﺎ ﻋﺘﺐ ، ﺍﻟﻌﺘﺐ ﺍﻋﻠﻰ ﺍﺧﻮﻱ ﺍﻟﻴﻐﻄﻲ ﺍﻋﻠﻰ ﻋﻤﺎﻳﻞ ﺍﺑﻨﻬﻮﻻ ﺟﻦ ﺍﻧﺎ ﺍﻣﻨﺖ ﺍﻟﺒﺖ ﻋﺪﻩ ، ﻟﺠﻦ ﺍﻧﺎ ﻣﺎ ﺍﻟﻲ ﺣﺠﻮﺓ ﻭﻳﺎﻛﻢ ، ﺍﻛﻀﻦ ﻓﻠﻴﺢ ﻭ ﺍﺣﻨﻪ ﻧﻌﺮﻑ ﺷﻨﺘﺼﺮﻑ ﻭﻳﺎﻩ .
ﺳﻠﻄﺎﻥ : ﺟﺎ ﺷﻠﻮﻥ ﻧﻈﻞ ﻫﻴﺞ ﺑﺲ ﻧﻬﺎﺩﺩ
ﻛﻮﺍﻏﺪ : ﺍﻧﺎ ﺍﻛﻮﻟﻦ ﻳﻮ ﺗﺠﻔﻮﻧﺎ ﺷﺮﻛﻢ ﻣﻦ ﻛﻮﻥ ﺍﻟﻜﻠﻮﺏ ﻣﻮﺵ ﺣﻤﻞ ﺗﺸﻮﻓﻜﻢ .
ﺳﻠﻄﺎﻥ : ﻭﻟﺞ ﺷﻨﻬﻲ ﺍﻧﺖ ﻣﻦ ﻣﺮﺓ ﻣﺎ ﺗﺤﺸﻤﻴﻦ ﺍﺣﺪ ، ﺍﺣﺘﺮﻣﻲ ﺭﻭﺣﺞ ﻻ ﺍﻋﺮﻑ ﺷﻐﻠﻲ ﻭﻳﺎﺝ ، ﺍﻥ ﺟﺎﻥ ﻣﺎﻟﺞ ﺭﺩﺍﺩ ﺍﻧﺎ ﺍﺭﺩﻧﺞ
ﺣﺎﻛﻢ : ﺣﺪﻙ ﻳﺒﻮ ﻧﻌﻤﺔ ﻣﻮﺵ ﻣﺮﺗﻲ ﺍﻟﻴﻨﻜﺎﻝ ﺍﻟﻬﺎ ﻫﺎﻟﺤﺠﻲ ، ﺍﻭﺟﺐ ﻋﻨﺪﻙ ﻭﻻ ﺗﺘﻌﺪﻯ ﺍﻋﻠﻴﻬﺎ .
- ﻣﺮﺗﻚ ﺳﻠﻴﻄﺔ ﺍﻟﺴﺎﻥ ﻭﻣﻮﺵ ﺍﺻﻴﻠﻪ
- ﺧﺎﻳﺐ ﻛﻼﺏ ﺍﻟﺪﻧﻴﺎ ﺍﻥ ﺟﻨﺖ ﻣﻮﺵ ﺍﺻﻴﻠﻪ ، ﻫﺪﻳﻨﺎ ﺍﻻﺻﻮﻝ ﺍﻟﻜﻢ ﻳﺒﻮ ﺍﻻﺻﻮﻝ .
ﻣﺎ ﺗﺤﻤﻠﻬﺎ ﺳﻠﻄﺎﻥ ﻭ ﻃﻠﻊ ﻭ ﻫﻮ ﻳﻜﻠﻪ : ﺍﺣﻤﺪ ﺭﺑﻚ ﻛﻀﻴﺖ ﺍﻋﺼﺎﺑﻲ ﻋﻨﻬﺎ ، ﻭﺍﻻ ﻓﺪ ..... ﺍﺥ ﻣﻨﻚ ﻳﻠﺴﺎﻧﻲ
ﺣﺎﻛﻢ : ﺍﻟﻴﺘﺒﻊ ﺍﻟﺒﺎﻃﻞ ﺧﻞ ﻳﺘﺤﻤﻞ ﺣﺠﺎﻳﺔ ﺍﻟﺤﻚ ، ﻭ ﺍﻧﺖ ﺗﺎﺑﻌﻬﻢ ﺍﻋﻠﻰ ﺍﻟﺒﺎﻃﻠﻪ ﻳﺒﻮ ﻧﻌﻤﺔ ، ﺷﻨﺎﻃﺮ ﻣﻨﻬﺎ ﻭ ﺍﻧﺖ ﺟﺎﻱ ﺍﺩﺍﻓﻊ ﺑﺎﻟﺠﺎﻥ ﺍﻟﺴﺒﺐ ﺑﺮﻛﺪﺕ ﺑﺘﻬﺎ ﺑﻬﺎﻟﻤﺴﺘﺸﻔﻰ ، ﺗﻼﻛﻴﻚ ﺑﺎﻟﻬﻼ ، ﺍﻣﺸﻮﺍ ﻭ ﻻ ﺗﺮﺩﻭﻥ ، ﺩﺍﻡ ﻧﺎﺻﺮ ﺗﺒﺮﻯ ﻣﻦ ﻓﻌﺎﻳﻞ ﺍﺑﻨﻪ ، ﺍﻧﺎ ﺍﻋﺮﻑ ﺷﺘﺼﺮﻑ ﻭﻱ ﻓﻼﺡ
ﻃﻠﻊ ﺳﻠﻄﺎﻥ ﻭ ﻫﻮ ﻣﺸﺘﻌﻞ ﻏﻴﺾ ﻣﻦ ﺣﺠﺎﻳﺎﺕ ﻛﻮﺍﻏﺪ ، ﺭﺩ ﺣﺎﻛﻢ ﻭ ﻛﺎﻝ ﺍﻟﻬﺎ : ﺟﺎ ﺗﻮﺍﺯﻳﺘﻲ ﺯﻓﻴﺘﻲ ﺍﻟﺰﻟﻤﺔ
- ﻭﺍﻟﻠﻪ ﺍﻧﻌﻞ ﺳﺎﺳﻬﻢ
- ﺳﻠﻄﺎﻥ ﻣﺎ ﻳﻨﺤﺰ ﻭ ﺍﻋﻠﻰ ﺣﺠﺎﻳﺎﺗﺞ ﻳﻜﻠﺒﻬﺎ ﺑﺎﻃﻞ
- ﺟﺎ ﻫﻢ ﺟﺎﻳﻴﻦ ﺑﺤﻚ ﺧﺎﻃﺮ ﻳﻜﻠﺒﻮﻧﻪ ﺑﺎﻃﻞ ، ﻣﺎ ﺗﺸﻮﻓﻪ ﺷﻠﻮﻥ ﺟﺎﻱ ﻳﺪﺍﻓﻊ ﻟﻬﺎﻻﺟﺮﺏ ، ﻫﻴﺞ ﻫﻴﺞ ﺍﻟﺤﻚ ﺍﻋﻠﻴﻨﻪ ﻣﻦ ﻛﻮﻧﻬﻢ ﺑﺎﻃﻠﻴﻦ ، ﻫﺪﻧﻲ ﺍﻓﻮﺥ ﻛﻠﺒﻲ ﺑﻴﻬﻢ ﻫﺎﻟﺨﺮﻧﻜﻌﻴﺔ .
ﻛﺮﺏ ﺣﺎﻛﻢ ﻟﻬﺪﻭﺓ ﻭ ﺣﺒﻬﺎ ﺑﺮﺍﺳﻬﺎ : ﻫﺎ ﺑﻮﻳﺔ ﺷﻠﻮﻥ ﺻﺮﺗﻲ ؟
ﺭﺩﺕ ﺑﺘﻌﺐ -: ﻛﻮﺍﻛﺔ ﺑﻮﻳﻪ
ﺳﺘﺎﺭ : ﻫﺴﻪ ﺷﻨﻬﻲ ؟ ﻧﺎﺧﺬﻫﺎ ﻳﻮ ﻧﺨﻠﻴﻬﺎ
- ﻣﺎ ﻧﻌﺮﻑ ﺧﻞ ﻧﻨﺸﺪ ﺍﻟﺪﻛﺘﻮﺭ ﻭ ﻧﻌﺮﻑ ﻣﻨﻪ
ﺳﺄﻟﻮ ﺍﻟﺪﻛﺘﻮﺭ ﻛﺎﻝ ﺍﻟﻬﻢ ، ﻣﺎ ﺗﻄﻠﻪ ﺍﻻ ﺑﻌﺪ ﻣﺎ ﻧﻄﻤﻦ ﻋﻠﻰ ﺣﺎﻟﺘﻬﺎ .. ﻧﺨﺎﻑ ﻻ ﺗﺮﺟﻊ ﻟﻠﻨﺰﻳﻒ ﻭﺍﺫﺍ ﺭﺟﻌﺖ ﻣﻌﻨﺎﻫﺎ ﺧﻄﺮ ﻋﻠﻴﻬﺎ ﻭ ﺗﻔﻘﺪ ﺭﺣﻤﻬﺎ ﺍﻭ ﺣﻴﺎﺗﻬﺎ ﺑﺎﻟﻜﺎﻣﻞ .
ﻧﺎﻣﺖ ﻭﻳﺎﻫﺎ ﻛﻮﺍﻏﺪ ﻭ ﺣﺎﻛﻢ ﻇﻞ ﺑﺎﻻﺳﺘﻌﻼﻣﺎﺕ ﻛﺎﻋﺪ ، ﻭﺳﺘﺎﺭ ﺭﺩ ﻟﻠﺒﻴﺖ ﻟﻜﻪ ﻳﺴﺮﻯ ﻣﺎﻣﺶ ، ﺭﺍﻳﺤﺔ ﻻﻫﻠﻬﺎ ﻛﺒﻞ ﻻ ﻳﺮﺩ ﻟﻴﻬﺎ ﻭ ﻳﻄﻠﻊ ﺍﺛﺎﻡ ﺍﺧﻮﻫﺎ ﺑﻴﻬﺎ ..
ﻇﺎﻝ ﺍﺑﻴﺖ ﺍﺑﻮﻩ ، ﺟﻠﺞ ﻝ ﺭﺍﺣﺖ ﻳﻢ ﺍﻳﻤﺎﻥ ﺗﺒﺎﺕ ، ﻋﺒﻦ ﺍﻳﻤﺎﻥ ﺗﺨﺎﻑ ﺗﺒﺎﺕ ﻭﻟﺤﻴﺪﻫﺎ ﺗﻜﻮﻡ ﺗﺘﺨﻴﻞ ﻭﺗﺒﺠﻲ .
ﺛﺎﻧﻲ ﻳﻮﻡ ﻣﻦ ﻏﺒﺸﺔ ﺳﺮﺣﺎﻥ ﺍﺟﺎ ﻟﻠﻤﺴﺘﺸﻔﻰ ، ﻟﻜﺎ ﺣﺎﻛﻢ ﻛﺎﻋﺪ ﺑﺎﻻﺳﺘﻌﻼﻣﺎﺕ : ﻫﺎ ﺍﺑﻮ ﺳﺘﺎﺭ ﺷﻨﻬﻲ ﻣﺎ ﺷﻨﻬﻲ
- ﻫﻼ ﺳﺮﺣﺎﻥ ﺷﻠﻮﻧﻚ ﻳﺎﺑﻪ
- ﺟﻴﺖ ﺍﻧﺸﺪ ﻋﻨﻜﻢ ، ﺍﻣﺲ ﺷﻔﺖ ﺳﻠﻄﺎﻥ ﻭﺍﻧﺎ ﻃﺎﻟﻊ ، ﺷﻨﻬﻲ ﺣﺠﻴﻪ ؟
- ﻳﺪﺍﻓﻌﻠﻬﻢ
- ﻣﻦ ﻳﻮﻣﻪ ﺑﺎﻃﻞ ﺷﻨﺎﻃﺮ ﻣﻨﻪ
- ﻳﻮ ﺑﺲ ﺍﻛﻀﻦ ﻓﻠﻴﺢ ﺟﺎ ﻋﻠﻤﻴﺘﻪ ﺍﻟﻠﻪ ﺣﻚ .. ﺑﺲ ﺷﺎﺭﺩ ﻫﺎﻟﺠﺒﺎﻥ
- ﺍﻟﻠﻪ ﻛﺮﻳﻢ ﺍﻟﻠﻪ ﻛﺮﻳﻢ ، ﺷﻜﺎﻟﻮﻟﻜﻢ ﻋﻠﻰ ﺣﺎﻟﺘﻬﺎ
- ﻣﺎ ﺭﺿﻮﺍ ﻧﻄﻠﻌﻬﺎ ﺍﻣﺲ، ﻋﻠﺒﺖ ﺍﻟﻴﻮﻡ ﻳﻜﺘﺒﻮﻟﻨﺎ ﻃﻠﻌﺔ ، ﺗﻮﻫﺪﻧﺎ ﻭﻋﻠﻲ .
- ﺍﻥ ﺷﺎﻟﻠﻪ ﺍﻟﻠﻪ ﻛﺮﻳﻢ
ﻇﻞ ﻭﺍﻛﻒ ﻭﻳﺎﻩ، ﻟﻴﻨﺎ ﺍﺟﺎ ﺍﻟﺪﻛﺘﻮﺭ ، ﺣﺠﻪ ﻭﻳﺎ ﺳﺮﺣﺎﻥ : ﻳﺤﺘﺎﺝ ﻧﻨﻜﻠﻬﺎ ﻟﻠﻮﻻﻳﺔ ؟
- ﻻ ﻣﺎ ﻳﺤﺘﺎﺝ ، ﻭﺗﻜﺪﺭﻭﻥ ﺍﻃﻠﻌﻮﻧﻬﺎ ﺑﺲ ﺍﻱ ﺣﺮﻛﺔ ﻣﻤﻨﻮﻋﺔ ﻣﻨﺎ ﻟﺨﻤﺴﺔ ﺍﻳﺎﻡ ﺧﺎﻃﺮ ﻳﺴﺘﻘﺮ ﺍﻟﺮﺣﻢ ﻣﺎﻟﻬﺎ ، ﺍﻧﺎ ﻛﺘﺒﺖ ﺍﻟﻬﺎ ﺑﻄﻠﻴﻦ ﺩﻡ ، ﺗﺎﺧﺬﻫﻦ ﻭ ﻃﻠﻌﻮﻫﺎ .
- ﺩﺍﻡ ﻓﻀﻠﻚ ﺩﻛﺘﻮﺭ
ﺍﻧﺪﺍﺭ ﻟﺤﺎﻛﻢ ﻭ ﻛﺎﻝ : ﻳﻠﻪ ﺩﺍﻡ ﻛﺘﺐ ﺍﻟﻬﺎ ﺍﻟﻄﻠﻌﻪ ، ﺻﻴﺢ ﻣﻀﻤﺪ ﺧﻠﻪ ﻳﻌﻠﻚ ﺍﻟﻬﺎ ﺍﻟﺪﻡ ﺧﺎﻃﺮ ﺍﻭﺻﻠﻨﻜﻢ ﺑﺪﺭﺑﻲ
- ﺧﺎﻑ ﺍﻛﻠﻔﻨﻚ ﺍﺑﻮ ﻣﺄﻣﻮﻥ
- ﺻﺪﻙ ﺟﺬﺏ ، ﺍﺑﻮ ﺳﺘﺎﺭ ﺍﻧﺖ ﺍﺧﻮﻱ ﺍﻟﺠﺒﻴﺮ ، ﻻ ﺗﺤﺠﻴﻬﺎ
- ﻭ ﺍﻟﻨﻌﻢ ﻣﻨﻚ .
ﺣﻄﻮﻟﻬﺎ ﺍﻟﺪﻡ ﻭ ﻟﻤﻮ ﻏﺮﻳﻀﺎﺗﻬﺎ ﻭ ﻃﻠﻌﻬﺎ ﺣﺎﻛﻢ ﻭ ﺳﺮﺣﺎﻥ ، ﺟﺎﻱ ﻳﻤﺸﻮﻥ ﺑﻴﻬﺎ ﻭ ﺣﺠﻪ ﺣﺎﻛﻢ : ﺍﻟﻔﺎﻳﻞ ﻣﺎﻟﺘﻬﺎ ﺟﺒﺘﻲ ﻳﻮ ﻻﻟﻪ
- ﺟﺎ ﺷﻨﺴﻮﻱ ﺑﻴﻪ ، ﻏﻴﺮ ﺍﻟﻬﻢ
- ﺷﻠﻮﻥ ﺍﻟﻬﻢ ، ﻏﻴﺮ ﻧﺎﺧﺬﻩ ﻭﻳﺎﻧﺎ ، ﻃﺎﺣﺖ ﺍﻋﻠﻴﻨﺎ ، ﻧﻌﻴﺪ ﻣﻦ ﺟﺪﻳﺪ ﻏﻴﺮ ﺍﻋﻠﻰ ﻓﺎﻳﻠﻬﺎ ﻳﻌﺮﻓﻮﻥ ﺍﻟﺤﺎﻟﺔ ﻋﺎﻓﻬﻢ ﻭ ﺭﺩ ﺣﺎﻛﻢ ﻣﺴﺮﻉ ..
ﺍﻧﺪﺍﺭ ﺳﺮﺣﺎﻥ ﻟﻜﻮﺍﻏﺪ : ﺍﻡ ﺳﺘﺎﺭ ﺍﻧﺎ ﻣﺎ ﺭﺩﺕ ﺍﺣﺠﻲ ﻭﻳﺎ ﺣﺎﻛﻢ ، ﺧﺎﻃﺮ ﻣﺎ ﻳﺘﺤﺴﺲ ﻣﻦ ﺍﻟﻤﻮﺿﻮﻉ
ﺍﻧﺪﺍﺭﺕ ﻟﻴﻪ : ﻋﻠﻴﺶ
ﻓﺘﺢ ﺍﻟﻬﺎ ﺑﺎﺏ ﺍﻟﺴﻴﺎﺭﺓ ﻛﻮﺍﻏﺪ ﺷﺎﻟﺖ ﺍﻟﻔﺮﺥ ، ﻭ ﺳﺮﺣﺎﻥ ﺗﻨﺎﻭﺷﻪ ﻋﻨﻬﺎ ﻭ ﻫﻲ ﺳﺎﻋﺪﺕ ﻫﺪﻭﺓ ﺑﻜﻌﺪﺗﻬﺎ ، ﻭﺩﺕ ﺍﺧﺬﺕ ﺍﻟﻔﺮﺧﺔ ﻭ ﺧﻠﺘﻬﺎ ﺑﺤﻀﻨﻬﺎ ، ﺳﺮﺣﺎﻥ ﻃﻠﻊ ﺍﻟﻌﻼﻛﺔ ﻣﻦ ﺟﻴﺒﻪ ﻭ ﻛﺪﻣﻪ ﻟﻜﻮﺍﻏﺪ
- ﺷﻨﻲ ﻫﺎﻱ ؟
- ﻛﻀﻴﻨﺎ ﻓﻠﻴﺢ ﺍﻣﺲ ، ﻭ ﺩﺳﻨﺎ ﺑﻴﻪ ﻭ ﺧﺬﺕ ﺣﻚ ﻫﺪﻭﺓ ﻣﻨﻪ ﻭ ﺯﺍﻳﺪ ﻭ ﻳﻮ ﻣﺎ ﺧﻮﻓﻲ ﻣﻦ ﺍﻟﻠﻪ ﺟﺎ ﻧﻬﻴﺖ ﻋﻤﺮﻩ ، ﺑﺲ ﻫﺪﻳﻨﺎﻩ ... ﻭ ﻫﺎﻱ ﺳﻨﻮﻧﻪ ﺑﺤﻚ ﺳﻨﻮﻥ ﻫﺪﻭﻩ ﺍﻟﻜﺴﺮﻫﻦ
- ﻛﻮﻧﻪ ﺷﺎﻓﻚ ؟
- ﻻ ﺗﺸﻴﻠﻴﻦ ﻫﻢ .. ﻣﺎ ﺭﺍﺡ ﻳﻜﺪﺭ ﻳﻔﻚ ﺣﻠﻜﻪ
ﺿﺤﻜﺖ : ﻭﺍﻟﻠﻪ ﻳﺎ ﻋﻤﻪ ﻣﺎ ﺍﻋﺮﻑ ﺷﻠﻮﻥ ﺍﺷﻜﺮﻧﻚ
ﺧﺬﺕ ﺳﻨﻮﻥ ﻓﻠﻴﺢ ﻓﻜﺘﻬﻦ ﻭ ﻋﺎﻳﻨﺖ ﺑﻴﻬﻦ ، ﺍﺑﺘﺴﻤﺖ ﻭ ﻫﻲ ﺗﻜﻠﻠﻬﺎ : ﻫﺎﺫ ﺣﻜﺞ ﻳﻴﻤﻪ ، ﺭﺩ ﻭ ﺯﺍﻳﺪ
ﺳﺮﺣﺎﻥ - ﻣﺎ ﺍﻋﺘﺎﺯ ﺷﻜﺮ ﺍﻡ ﺳﺘﺎﺭ ، ﻫﺪﻭﺓ ﻏﺎﻟﻴﺔ ، ﻭ ﺍﻟﺠﺎﺳﻬﺎ ﺟﺎﺱ ﺍﻓﺎﺩﻱ .
ﺣﺠﺎﻫﺎ ﻭ ﺍﻧﺪﺍﺭ ﻳﺼﻌﺪ ﺑﺎﻟﺼﺪﺭ ﻭ ﻛﻮﺍﻏﺪ ﺗﻌﺎﻳﻦ ﺑﺎﻟﺴﻨﻮﻥ ﻭ ﺗﻜﻮﻝ : ﻋﺎﺑﺖ ﻫﺎﻟﺴﻨﻮﻥ ﺍﻟﺨﺎﻳﺴﺔ .. ﻫﺴﺔ ﺗﻜﺤﻠﺖ ﻋﻴﻨﻲ ﻭﻋﻠﻲ ﻣﻦ ﺷﻔﺖ ﺳﻨﻮﻧﻪ ﺑﻴﺪﻱ ، ﺍﺍﺍﺍﺍﺍﺥ ﻳﻮ ﻛﺎﺿﺘﻪ ﺍﻧﺎ ﺑﻴﺪﻱ ﺟﺎ ﻣﺎ ﺧﻠﻴﺖ ﺑﻴﻪ ﻋﻈﻢ ﺻﺎﺣﻲ ﻭ ﺍﻟﻌﺒﺎﺱ .
ﻫﺪﻭﺓ : ﺍﻋﺎﻳﻦ ﻟﻤﻲ ﺗﺘﻨﻮﻉ ﻟﺴﻨﻮﻥ ﻓﻠﻴﺢ ﻭ ﺗﻀﺤﻚ ﻭ ﺳﺮﺣﺎﻥ ﺻﻌﺪ ﺍﻟﺴﻴﺎﺭﺓ ﻭ ﺩﻧﻚ ﻳﺤﺮﻙ ﺑﺎﻟﺴﻮﻳﺞ .. ﻧﻄﺮﺕ ﺍﻣﻲ ﺩﺍﺭﺕ ﻭﺟﻬﻪ ، ﺣﺠﻴﺖ ﺑﺼﻮﺕ ﻧﺎﺻﻲ : ﺷﻌﺪﻙ ﺟﺎﻱ ﻟﻴﻪ ، ﻭﻳﺎﻫﻮ ﺍﻟﻜﺎﻟﻚ ﺍﺧﺬ ﺑﺤﻜﻲ
ﺷﺎﻝ ﺭﺍﺳﻪ ﺍﻟﻬﺎ .. ﻣﺎ ﺣﺠﻪ
ﺭﺩﻓﺖ ﻛﻼﻣﻬﺎ : ﻣﻮﺵ ﺍﻧﺎ ﺍﺧﺘﻚ ، ﻭ ﺍﻳﺎﻡ ﺍﻟﻬﻮﻯ ﺫﻧﻴﺞ ﺍﻳﺎﻡ ﻏﻮﻯ ، ﺷﺠﺎﺑﻚ .
ﺗﻨﻬﺪ ﻭ ﻫﻮ ﻳﻌﺎﻳﻦ ﻟﺪﺭﺏ ﺍﻟﻤﺴﺘﺸﻔﻰ . ﺍﺑﻮﻱ ﺍﺟﺎ ﻭ ﺍﻣﻲ ﺍﻧﺪﺍﺭﺕ ﺻﻌﺪﺕ ، ﻭﺍﺑﻮﻱ ﺻﻌﺪ ﻛﺪﺍﻡ .. ﻇﻠﻮ ﻳﺤﺠﻮﻥ ﻟﺠﻦ ﺍﻧﺎ ﺍﻗﺮﺍ ﻋﻴﻮﻧﻪ ﺷﻴﺤﺠﻦ ﻭ ﺷﻴﺴﻮﻟﻔﻦ .. ﻣﺎ ﻛﺪﺭ ﻳﻨﻄﻚ ﺑﺲ ﻋﻴﻮﻧﻪ ﺣﺠﻦ ﻛﻠﺸﻲ ..
ﺍﻧﺪﺍﺭ ﺍﺑﻮﻱ ﺑﻀﺤﻜﺔ ﻭ ﻫﻮ ﻳﺴﺄﻟﻨﻲ ، ﺑﺲ ﻣﺎ ﻋﺮﻓﺖ ﺷﻨﻬﻮ ﺳﺆﺍﻟﻪ ﺟﺎﻥ ﻣﻦ ﻛﻮﻥ ﺑﺎﻟﻲ ﻣﻮﺵ ﻳﻤﻪ ، ﻋﺎﻳﻨﺖ ﻻﺑﻮﻱ ﻭ ﺍﺑﺘﺴﻤﺖ .. ﺣﺠﻪ ﺳﺮﺣﺎﻥ : ﻣﻮ ﺑﺎﻟﻔﺎﻳﻞ ﺳﺠﻠﺘﻬﺎ ﺍﻣﻨﻴﺔ
ﺣﺎﻛﻢ : ﺍﻧﺎ ﺳﻤﻴﺘﻬﺎ ﺍﺯﻫﺎﺭ
- ﺑﻌﺪ ﺍﻧﺘﻢ ﺑﻜﻴﻔﻜﻢ ﺳﻤﻮﻫﺎ ، ﺍﻧﺎ ﺳﻤﻴﺘﻬﺎ ﻣﻦ ﻋﺪﻱ ﻣﻦ ﻛﻮﻥ ﻫﻢ ﺭﺍﺩﻭﺍ ﺍﺳﻤﻪ ﻭ ﻃﻠﻊ ﻫﺎﻻﺳﻢ ﻭﻳﺎﻱ .
ﺣﺎﻛﻢ : ﺑﻌﺪ ﺑﻜﻴﻒ ﻫﺪﻭﺓ ﺷﺘﺴﻤﻴﻬﺎ ﺑﻜﻴﻔﻬﺎ، ﺳﺘﺎﺭ ﻣﺸﺘﺮﻱ ﻛﺎﺭﻭﻙ ﻟﻠﺒﺖ ، ﻭﻳﻜﻮﻝ ﺟﻤﻴﺮﺓ ﻣﺰﻫﺒﺘﻠﻬﺎ ﺍﻟﺤﺠﺮﺓ ﻭ ﺗﺼﻴﺢ : ﻫﺎﻱ ﺑﺘﻲ ﻣﻮﺵ ﺑﺖ ﻫﺪﻭﺓ
ﻛﻮﺍﻏﺪ : ﺟﺎ ﺟﻤﻴﺮﺓ ﻣﺘﻮﻟﻬﻪ ﺍﻋﻠﻰ ﺍﻟﺒﺖ ﺍﺯﻭﺩ ﻣﻦ ﻫﺪﻭﺓ .
ﺣﺎﻛﻢ : ﺟﺎ ﻏﻴﺮ ﺑﻨﻴﺘﻨﺎ ... ﺍﻧﻌﻞ ﺍﺑﻴﻬﻢ ﺗﻌﻴﺶ ﻋﺪﻧﺎ ﻫﻲ ﻭ ﺍﻣﻬﺎ .. ﺧﻞ ﺗﺼﻴﺮ ﺯﻳﻨﻪ ﺍﻻ ﺍﺧﺬﻫﺎ ﻫﻲ ﻭﺑﺘﻬﺎ ﻭﻧﻤﺶ ﻟﻜﺮﺑﻠﺔ ﻧﺰﻭﺭ ﺍﻟﺤﺴﻴﻦ ﻭ ﺍﻟﻌﺒﺎﺱ ﺳﻼﻡ ﺍﻟﻠﻪ ﺍﻋﻠﻴﻬﻢ ﻭ ﻧﺰﻭﺭ ﺍﻟﺒﺖ ... ﻭ ﻧﺨﻠﻲ ﺍﻟﻜﻠﻮﺏ ﺗﺮﺗﻊ ﻏﺎﺩ .. ﻻ ﻧﺮﻳﺪ ﻓﻠﻴﺢ ﻭﻻ ﻣﻠﺘﻪ .
ﻫﺪﻭﺓ : ﺍﻱ ﻭﺍﻟﻠﻪ ﺑﻮﻳﻪ ، ﻳﺎﺭﻳﺖ ﺗﺎﺧﺬﻧﻲ ﻟﻠﻌﺒﺎﺱ .. ﻋﺪﻱ ﻋﺘﺎﺑﺔ ﻏﺎﺩ ﻭ ﻛﻠﺒﻲ ﻣﺤﻤﻞ ﻫﻤﻮﻡ ﺭﺍﻳﺪﻩ ﺍﻛﻌﺪ ﻛﺒﺎﻝ ﺍﺑﻮ ﻓﺎﺿﻞ ﻭﺍﻓﺮﺷﻠﻪ ﻫﻤﻮﻣﻲ .. ﻭ ﺍﻋﺎﺗﺐ ﺯﻣﺎﻧﻲ
ﻭﺍﻛﻠﻠﻪ ﺣﻠﻔﻮﺍ ﺑﺮﺍﺳﻚ ﺩﻏﺶ ﻭﺭﺍﻳﺪﻩ ﺍﻟﺤﻮﺑﺔ ﺣﺠﻴﺘﻬﺎ ﻭ ﺍﻧﺎ ﺍﺗﺬﻛﺮ ﺣﻠﻔﺘﻪ ﺳﺎﻋﺔ ﺍﻟﻴﻜﻠﻲ ( ﻭ ﺍﻟﻌﺒﺎﺱ ﺍﺣﺒﻨﺞ ، ﺗﺎﻟﻲ ﻳﻜﻠﻲ ﻋﺸﻜﺞ ﺍﻳﺎﻡ ﻏﻮﻯ ﺍﻧﺴﻴﻬﻦ )
ﻫﻮ ﺗﻮﺗﺮ ﻭ ﻣﺎ ﺭﺩ ﺑﺄﻱ ﺟﻠﻤﺔ ، ﻇﻞ ﺑﺲ ﻳﻮﺟﺪ ﺑﺪﺭﺑﻪ ﻭ ﻣﺎ ﺭﺩ ﺑﺤﺠﺎﻳﻪ ، ﻭﺻﻼﻧﺎ ﻟﻠﺒﻴﺖ ، ﺍﻣﻲ ﺗﻌﺎﻭﻧﻲ ﻭﺗﺸﻴﻞ ﺍﻟﻔﺮﺧﺔ ﻋﻨﻲ ، ﺗﻨﻬﺪ ﻫﻮ ﻭﻳﻌﺎﻳﻨﻠﻲ ﺑﺎﻟﻤﺸﻮﺍﻓﻪ .. ﻭﺗﻨﻬﻴﺪﺗﻪ ﺑﻴﻬﺎ ﺭﺟﻔﻪ
ﻧﺰﻟﺖ ﻣﻦ ﺳﻴﺎﺭﺗﻪ ﻭ ﺩﺷﻴﺖ ﻟﻠﺒﻴﺖ ﺗﻠﻜﻨﻲ ﺣﺒﻮﺑﺘﻲ ﻭ ﻻﻟﻪ ﻭ ﺍﻳﻤﺎﻥ ﻭ ﺟﻤﺎﺭﺓ .. ﻻﻟﻪ ﺣﺒﺘﻨﻲ ﻭ ﺧﺬﺕ ﺍﻟﻔﺮﺧﺔ ﻣﻦ ﺍﻳﺪ ﺍﻧﻲ ﻭ ﺍﻳﻤﺎﻥ ﺣﺒﺘﻨﻲ ، ﻭﺭﺍﺣﺖ ﻻﻣﻲ ﻭ ﺟﻤﺎﺭﺓ ﻻ ﺍﺟﺖ ﻭﻻ ﻛﺒﻠﺘﻨﻲ ، ﺗﻌﺎﺭﻙ ﺑﻴﻬﻦ ﻭ ﺗﻜﻠﻠﻬﻦ : ﺑﺘﻲ ﻫﺎﻱ ﻣﻴﻠﻮ ﻋﻨﻬﺎ ، ﻫﻲ ﺑﺖ ﺍﺧﺘﻲ ﻣﻮﺵ ﺑﺖ ﺍﺧﺘﻜﻢ ﻣﻴﻠﻮﻭﻭﻭﻭﻭ
ﻛﺮﺑﺖ ﻣﻨﻲ ﺯﻣﻦ ﺑﺖ ﺳﺘﺎﺭ ، ﻫﺎﺩﺗﻬﺎ ﻳﺴﺮﻯ ﻭﺭﺍﻳﺤﺔ ، ﺍﻟﺒﺖ ﺣﻮﻟﺔ ﻭ ﻛﻮﺓ ﺗﻤﺸﻲ ، ﻛﻀﻴﺘﻬﺎ ﻭ ﺣﺒﻴﺘﻬﺎ ، ﺻﺎﺣﺖ ﺍﻣﻲ : ﻻ ﺗﺸﻴﻠﻴﻨﻬﺎ ﺩﻳﺮﻱ ﺑﺎﻟﺞ
- ﻣﺎ ﺷﺎﻳﻠﺘﻬﺎ ﺑﺲ ﺣﺒﻴﺘﻬﺎ
ﺧﺬﺗﻨﻲ ﺍﻣﻲ ، ﻭ ﺍﻟﺒﻨﺎﺕ ﻣﻠﺘﻤﺎﺕ ﻉ ﺍﻟﻔﺮﺧﺔ ..
ﻭﻳﺎ ﻫﻮﺳﺘﻨﺎ ﻓﺰ ﺍﺧﻮﻱ ﻣﺆﻳﺪ ، ﻭ ﻛﺎﻡ ﻳﺒﺠﻲ ﻧﻮﻣﺘﻨﻲ ﺍﻣﻲ ﺑﻔﺮﺍﺷﻲ ﻭ ﺍﻳﻤﺎﻥ ﺍﺟﺖ ﺷﺎﻟﺘﻪ ﻭ ﻗﺮﺑﺘﻪ ﻣﻦ ﺑﺘﻲ .. ﻛﺎﻡ ﻳﻌﺎﻳﻨﻠﻬﺎ ﻭﻳﻤﺸﻲ ﺍﻳﺪﻩ ﺍﻋﻠﻰ ﺧﺪﻫﺎ ..
ﺿﺤﻜﺖ ﺍﻳﻤﺎﻥ : ﺑﺎﻭﻉ ﺣﺎﻛﻢ ﺍﺷﻮﻥ ﺍﻧﻌﺠﺐ ﺑﻴﻬﺎ ، ﺣﺒﺎﻫﺎ ، ﻫﺎﻱ ﻣﻦ ﺗﻜﺒﺮ ﺍﺧﺬﻫﺎ ﻷﺑﻨﻲ ﺣﻠﻮﺓ ﺣﻠﻮﺓ
ﺣﺎﻛﻢ : ﺧﺎﻳﺒﺔ ﻫﻲ ﺷﻨﻲ ﺍﻟﺤﻠﻮﺓ ، ﺍﻧﺖ ﺷﻤﺎﻟﺞ ﺑﻮﻳﻪ ﺟﺎ ﻏﻴﺮ ﻳﺼﻴﺮ ﺧﺎﻟﻬﺎ
- ﻳﺎﺍﺍ ﺻﺪﻙ ﻫﻮ ﻳﺼﻴﺮ ﺧﺎﻟﻬﺎ ﻧﺴﻴﺖ
- ﻻ ﻭ ﺍﻟﻘﺴﻤﺔ ﺍﻱ ﻭﺍﻟﻠﻪ
ﻛﻠﻨﺎ ﺿﺤﻜﻨﺎ ﺍﻋﻠﻰ ﺗﺼﻨﻴﻒ ﺍﺑﻮﻱ ﻭ ﺍﻳﻤﺎﻥ ، ﺍﺟﺎ ﺍﺑﻮﻱ ﺷﺎﻝ ﺍﻟﺒﺖ ﻭ ﻛﺎﻡ ﻳﻬﻮﺱ ﺑﻴﻬﺎ : ﻳﻞ ﻛﺎﻳﻞ ﻣﻔﺮﺩ ﺫﻭﻟﻪ ﺍﻋﻀﺎ .. ﻳﻞ ﻛﺎﻳﻞ ﻣﻔﺮﺩ
ﻭﺟﻤﻴﺮﺓ ﺗﺪﺑﺞ ﻭﻳﺎﻫﺎ
ﻭﺍﻧﺎ ﻣﺘﻤﺪﺩﻩ ﺑﻔﺮﺍﺷﻲ ﻭ ﻣﺘﻐﻄﺎﻳﺔ ﻭ ﻣﺘﺒﺴﻤﺔ ﺑﻔﺮﺣﺔ ﺍﻫﻠﻲ ، ﻭ ﺍﻣﻲ ﺗﺼﻴﺢ : ﻫﺎ ﻫﺎ ﺣﺎﻛﻢ ﻻ ﺗﻄﻴﺢ ﻣﻦ ﺍﻳﺪﻙ ، ﺑﺖ ﺍﻧﻔﺎﺱ ﺷﻨﻬﻲ ﺗﻬﻮﺱ ﺑﻴﻬﺎ .
- ﺟﺎ ﺷﻤﺎﻟﻨﻲ ﺍﻳﺪﻱ ﻋﻮﺟﻪ ﻭ ﺍﻃﻴﺢ ، ﻣﺎﻟﺞ ﻏﺮﺽ
ﺷﺎﻟﻬﺎ ﻭ ﻫﻮ ﻳﺤﺒﺤﺐ ﺑﻴﻬﺎ ﻭ ﻳﺮﺩ ﻳﻬﻮﺱ ( ﺭﻛﺒﺘﻬﺎ ﺷﻴﺸﺔ ﻻ ﺍﻃﻴﺢ ﻭ ﺗﻨﻜﺴﺮ )
ﻣﺆﻳﺪ ﻛﺎﻡ ﻳﺒﺠﻲ ﻭ ﻣﺠﻠﺐ ﺑﺮﺟﻠﻴﻦ ﺍﺑﻮﻱ ﺍﻻ ﻳﺸﻴﻠﻪ ، ﺣﺠﻪ : ﺍﻧﺎ ﺍﻏﻼﻡ ﺍﺑﻮﻱ ، ﺍﺷﺘﻐﻠﺖ ﺍﻟﻐﻴﺮﺓ ... ﻭﻟﻲ ﻭﻟﻲ ﻣﺎ ﺍﺭﻳﺪﻧﻬﺎ ، ﺍﻧﺎ ﻋﺰﻳﺰﻱ ﺍﻣﻴﺪﻱ ..
ﻭﺷﺎﻟﻪ ﻭ ﻳﺤﺒﺤﺐ ﺑﻴﻪ ﻭ ﺻﻮﺕ ﺍﻟﺘﺤﺒﺤﺐ ﻣﺎﻟﻪ ﻭﺍﺻﻞ ﻟﻴﻐﺎﺩ .
ﺍﻳﻤﺎﻥ : ﺣﺎﻛﻢ ﺷﻨﻮ ﺍﻣﻴﺪﻱ ، ﻣﻴﻤﻮﻭﻭﻭﻭ
- ﺍﻃﻜﺞ ﺑﺠﻴﻠﺔ ﺑﺲ ﺗﻌﻴﺪﻳﻦ ﻫﺎﻻﺳﻢ ، ﺍﻣﻴﺪﻱ ﺍﺳﻤﻪ .. ﺍﻟﻘﺎﺑﺞ ﻫﺎﻱ ﺍﻧﺎ ﻣﺎ ﺍﻫﻮﺍﻫﺎ .
ﺟﺴﻮﻣﺔ : ﻫﺪﻭﺍ ﺍﻟﻮﻟﺪ ﺍﻋﻠﻰ ﺍﺳﻤﻪ ﺷﻠﻌﺒﺘﻮ ﺑﺤﺎﻟﻪ
ﺧﺬﺕ ﺍﻟﻔﺮﺧﺔ ﻭ ﺟﺎﺑﺘﻬﺎ ﺍﻟﻴﻪ ﺧﺎﻃﺮ ﺗﺴﺎﻋﺪﻧﻲ ، ﺗﻮﻧﻲ ﺟﺎﻱ ﺍﺭﺿﻌﻨﻬﺎ ﻭ ﺍﻧﺪﻛﺖ ﺍﻟﺒﺎﺏ ﻭﻟﻨﻬﻢ ﺧﻮﺍﻟﻲ ﺑﺨﻮﻳﻄﻬﻢ .. ﺍﻟﺒﻴﺖ ﺟﻦ ﺿﺮﺑﻪ ﺍﺣﺘﻼﻝ .. ﻧﺪﺳﺘﻨﻲ ﺍﻣﻲ ( ﺑﺘﺞ ﺧﻠﻴﻬﺎ ﺑﺤﻀﻨﺞ )
ﻟﻔﻠﻔﻴﺖ ﺭﻭﺣﻲ ﻭ ﺑﺘﻲ ، ﻭﺗﻜﺮﺑﻮ ﺧﻮﺍﻟﻲ ،ﺣﺒﻮﻧﻲ ﻣﻦ ﺭﺍﺳﻲ ﺑﺲ ﻛﻞ ﺍﻟﻴﺘﻜﺮﺑﻠﻲ ﺍﺷﻮﻑ ﻋﻼﻣﺎﺕ ﺍﻻﺳﺘﻐﺮﺍﺏ ﺑﻮﺟﻪ ﻟﻮ ﻳﻨﺸﻎ ﺳﺎﻋﺔ ﺍﻟﻴﺸﻮﻓﻨﻲ ، ﺍﻻ ﻣﺎ ﻛﺮﺏ ﺧﺎﻟﻲ ﺟﺒﺎﺭ ﺷﺎﻓﻨﻲ ﻫﻴﺞ ، ﺻﺮﺥ : ﺍﺍﺍﺍﺍﺍﺍﺥ .. ﻫﺎﻱ ﺷﻌﺎﻣﻞ ﺑﺤﺎﻟﻬﺎ ﺍﻟﻜﻮ ﺻﻼﺡ : ﺩﺍﻣﻬﺎ ﻓﻀﺖ ﺍﻋﻠﻰ ﺧﻴﺮ ﺻﻜﻮ ﺍﻟﺒﺎﺏ ﻭ ﺣﻄﻮ ﺑﻨﻴﺘﻜﻢ ﻋﺪﻛﻢ ﻭ ﺳﻠﻤﻮ ﺑﻴﺪ ﺍﻟﻠﻪ
- ﻻ ﻭﺍﻟﻠﻪ ﺷﻨﻬﻲ ﻧﺴﻠﻤﺔ ﺑﻴﺪ ﺍﻟﻠﻪ ، ﺷﻨﻬﻲ ﻃﺎﻟﻌﺔ ﻣﻦ ﻓﻄﺮ ﺍﻟﻜﺎﻉ ، ﺣﺎﻛﻢ ﻭﻋﻠﻲ ﻳﻜﺮﻡ ﻃﺎﺭﻱ ﻋﻠﻲ ، ﺍﺗﻔﻞ ﺑﻜﺼﺘﻚ ﻳﻮ ﺳﻜﺘﺖ
ﺿﺤﻚ ﺣﺎﻛﻢ : ﺟﺎ ﺍﻧﺎ ﻏﻴﺮ ﻳﻮ ﺍﺣﻈﻰ ﺑﻴﻪ ، ﻳﺤﻤﺪ ﺭﺑﻪ ﻳﻮ ﺧﻠﻴﺘﻪ ﻋﺎﻳﺶ ﻟﺠﻦ ﻣﻦ ﺍﻣﺲ ﻭﻟﻴﺠﺎﻱ ﺍﻧﺎ ﻭﻳﺎﻫﻢ ﺑﺎﻟﻤﺴﺘﺸﻔﻰ
ﺟﺒﺎﺭ : ﺟﺎ ﺳﺘﺎﺭ ﻣﺎ ﺩﻭﺭﺍﻩ ؟
ﺻﻼﺡ : ﺩﻛﻌﺪ ﻳﺎ ﺟﺒﺎﺭ ﻻ ﺗﺘﻮﻫﺪﻥ ﻭﻳﺎﻫﻢ
- ﻻ ﻭﻋﻠﻲ ﻣﺎ ﻧﻬﺪﻧﻬﺎ ، ﺧﺎﻳﺐ ﻫﺎﻱ ﻫﺪﻳﻮﺓ
ﻧﺸﻤﻴﺔ : ﻭﺍﻟﻠﻪ ﻳﻤﻪ ﻛﻀﻮ ﻭﺍﺷﻌﻠﻮ ﺍﺑﻴﻪ .
ﻛﻮﺍﻏﺪ : ﻣﺎ ﻳﻌﺘﺎﺯ ﻳﺨﻮﺗﻲ ﺭﻳﺘﻜﻢ ﺳﺎﻟﻤﻴﻦ ، ﻃﻠﻌﺖ ﻣﻦ ﺟﻴﺒﻬﺎ ، ﻛﺴﺮ ﺍﻟﻬﺎ ٣ ﺳﻨﻮﻥ ، ﻭ ﻛﺴﺮﻭﻟﻪ ٩ .. ﻭﺧﺬﻭ ﺣﻜﻬﺎ ﻭ ﺯﺍﻳﺪ
ﺣﺎﻛﻢ : ﻳﺎﻫﻮ ﺍﻻﺧﺬ ﺣﻜﻬﺎ ؟
- ﻳﺎﻫﻮ ﻣﺎ ﻳﺎﻫﻮ ، ﺍﻧﻮﺧﺬ ﺑﺲ ﻣﺎ ﺍﺭﻳﺪﻥ ﺍﻛﻮﻟﻦ ﺍﻻﺳﻢ ﺧﺎﻃﺮ ﻻ ﻳﺘﻮﻫﺪﻥ ﻭﻳﺎ ﺍﻝ ﺑﻌﻴﺮ .
ﺻﻼﺡ : ﻻ ﺧﻮﻳﺔ ﺣﺮﺍﻡ ، ﺛﺠﻴﻞ ﺍﻟﻠﻪ ﻳﺮﺣﻤﻪ ﺯﻟﻤﺔ ﻧﺸﻤﻲ ﻟﺠﻦ ﺧﻠﻔﺘﻪ ﻣﺎ ﻣﻨﻬﺎ ﺧﻴﺮ
- ﻭﺍﻟﻠﻪ ﻳﺎ ﺧﻮﻳﺔ ﻛﺮﻫﺖ ﺍﺳﻢ ﺛﺠﻴﻞ ﻭ ﺑﻴﻮﻡ ﺍﻟﺼﺎﺭ ﺑﻴﻪ ﺛﺠﻴﻞ ﺍﻋﻠﻰ ﺍﻟﻮﺟﻮﻩ ﺍﻟﺰﻓﺮﺓ ﺍﻟﺨﻠﻔﻬﺎ ، ﺻﻔﻠﻪ ٢٠ ﻣﺪﺭﻱ ﺛﻼﺛﻴﻦ ﻣﺮﺓ ﻣﺤﺪ ﻳﻌﺮﻑ ﺳﺎﺳﻬﻦ ﻣﻨﻴﻦ ﻭ ﺧﻠﻒ ﻫﺎﻟﺒﺰﺭﻳﺔ ﺍﻟﻄﺎﻳﺢ ﺣﻈﻬﺎ .. ﻭﺑﻠﻰ ﺍﻟﻮﺍﺩﻡ ﺑﻴﻬﻢ .
ﺣﺎﻛﻢ ﻇﻞ ﻣﻮﭼﺪ ﺑﻜﻮﺍﻏﺪ ﻭ ﻳﺤﺎﻭﻝ ﻳﻌﺮﻑ ﻳﺎﻫﻮ ﻫﺎﺫ ﺍﻻﺧﺬ ﺑﺜﺎﺭ ﺑﺘﻬﻢ ﺑﻬﺎﻟﺴﺮﻋﺔ ، ﻣﻦ ﺍﻣﺲ ﻭ ﻫﻢ ﻳﺪﻭﺭﻭﻥ ﺍﻋﻠﻰ ﻓﻼﺡ ﻭ ﻣﺎ ﻻﻛﻴﻨﻪ ، ﺷﻠﻮﻥ ﻛﻀﻮﻩ ﺷﻠﻮﻥ ﺟﺘﻠﻮﻩ .. ﻭﻳﺎﻫﻮ ﻫﺎﺫ ﻟﺠﻦ ﻣﺎ ﺍﺟﺎ ﺍﺑﺎﻟﻪ ﻏﻴﺮ ﺍﺳﻢ ﻭﺍﺣﺪ .
.... ﺑﺲ ﻣﺎ ﺳﻜﺘﻮ
ﻛﻀﻮ ﻓﻼﺡ ﺑﻨﻔﺲ ﺍﻟﻴﻮﻡ ﻭ ﻛﺮﻣﻮ ﺍﺩﻳﻪ ﻭ ﺭﺟﻠﻴﻪ ﺍﻋﻠﻰ ﻓﻌﻠﺘﻪ ﻫﺎﻱ ﻭﻳﺎ ﻫﺪﻭﺓ ..
ﻧﺎﺻﺮ ﻭ ﺛﺠﻴﻞ ﺍﻏﺘﺎﺿﻮﺍ .. ﺷﻠﻮﻥ ﺟﺎﺗﻠﻴﻨﻪ ﻫﻴﺞ
ﻭ ﺣﺎﻛﻢ ﺻﻚ ﺍﻟﺒﺎﺏ ، ﻻ ﺩﺍﺭﻟﻬﻢ ﺑﺎﻝ ﻭﻻ ﻋﺎﻳﻦ ﺍﻟﻬﻢ ..
ﻫﺪﻳﺔ : ﻇﻠﻴﺖ ﻋﺪ ﺍﻫﻠﻲ .. ﺍﻟﻜﻞ ﻣﻬﺘﻢ ﺑﻴﻪ ، ﺍﺧﻮﻱ ﺳﺘﺎﺭ ﻣﺎ ﺩﺵ ﻻ ﻣﺎ ﺟﺎﻳﺒﻠﻲ ﺷﻲ ﺑﺠﻴﺒﺔ ، ﻳﺎ ﺟﺮﺯﺍﺕ ﻳﺎ ﻣﺴﻘﻮﻝ .. ﻳﺎ ﻟﻮﺯﻳﻨﻪ .. ﻭ ﺧﻄﻴﺔ ﻳﺮﻭﺡ ﻭ ﻳﺮﺩ ﻭ ﻳﻜﻠﻲ : ﻫﺎ ﺧﻮﻳﺔ ﻣﻌﺘﺎﺯﺓ ﺷﻲ ، ﻣﺘﻀﺎﻳﻜﺔ
ﻭﺍﻧﺎ ﺍﺭﺩﻧﻪ : ﻋﺴﺎﻙ ﺳﺎﻟﻢ .
ﻭﺍﺑﻮﻱ ﻳﻮﻣﻴﺔ ﻳﺮﺩ ﻣﻦ ﺷﻐﻠﻪ ﺑﺎﻟﻤﻌﻤﻞ ﻳﻜﺎﺑﻠﻨﻲ ، ﻭ ﻳﺎﺧﺬ ﺍﻟﺒﺖ ﺑﺤﻈﻨﻪ ﻭ ﻳﻜﻮﻡ ﻳﻬﻮﺳﻠﻬﺎ ﻭ ﻳﺼﻔﻚ ﺧﺎﻃﺮ ﺍﺗﺮﻓﻪ ﺍﻧﺎ ﻭ ﺍﺗﺒﺴﻢ ..
ﺍﻟﺒﻨﻴﺔ ﺧﻠﻴﺖ ﺍﺳﻤﻬﺎ ( ﺍﻣﻨﻴﺔ ) ﻭ ﻣﺎ ﻏﻴﺮﻳﺘﻬﺎ
ﻣﻦ ﻛﻮﻥ ﺩﻛﺎﺗﻪ ﺭﺩﻳﻪ ﻟﺠﻦ ﺟﺎﻧﺖ ﺍﻣﻨﻴﺘﻲ ﻋﺎﻟﺒﺖ ﻫﺎﻱ ﺗﺼﻴﺮ ﻣﻨﻪ ﻣﻮﺵ ﻣﻦ ﻓﻠﻴﺢ ﺍﻻﺟﺮﺏ .
ﺍﻣﺎ ﺟﻠﺠﻮﻝ ... ﻓﻬﺎﻱ ﻣﺎﺧﺬﺓ ﺣﻜﺮ ﺍﻋﻠﻰ ﺍﻟﻔﺮﺧﺔ
ﻣﺎ ﺗﻜﺮﺏ ﺍﻟﻬﺎ ﺍﺣﺪ ﺍﻻ ﻭ ﺗﻜﺎﻭﻣﺖ ﻭﻳﺎﻩ ﺅ ﻭ ﺷﺤﺪﻩ ﺍﻟﻴﻜﺮﺑﻬﺎ ، ﺣﺘﻰ ﻭ ﻫﻲ ﺗﺪﺭﺱ ﺣﺎﻃﺘﻬﺎ ﺑﺤﻈﻨﻬﺎ ، ﻭ ﻳﻮ ﻛﺮﺑﺘﻬﺎ ﺯﻣﻦ ﺑﺖ ﺳﺘﺎﺭ ﺗﺒﺘﻠﺶ ﺑﻴﻬﺎ ، ﻭ ﻛﻞ ﺳﺎﻉ ﺟﺎﺗﻠﻪ ﻣﺆﻳﺪ ﺟﺘﻠﻪ .. ﻣﻦ ﻣﻮﻥ ﻫﺎﺫ ﻳﻐﺎﺭ ﻋﺒﻦ ﺍﻟﻜﻞ ﻣﻬﺘﻢ ﺑﺎﻣﻨﻴﺔ ﻭ ﻫﺎﺩﻳﻨﻪ ﻭ ﻳﺠﻲ ﻳﺨﺮﻣﺸﻬﺎ ﻳﻮ ﻳﺠﺮﻫﺎ .. ﺗﻜﻀﻪ ﺟﻤﺎﺭﺓ ﺷﺘﻌﻤﻞ ﺑﺤﺎﻟﻪ .
ﻭﺗﻈﻞ ﺍﻣﻲ ﺗﺼﻜﻊ ﺑﺮﺍﺳﻬﺎ ﻭ ﺍﻃﻚ .. ﻭ ﺍﺧﺬ ﻣﺸﺎﻛﻞ ﻣﻦ ﻭﺭﻩ ﺟﻤﻴﺮﺓ ﻭ ﺍﻣﻨﻴﺔ .. ﻣﺤﺪ ﻳﻜﻀﻬﺎ
ﻻﻟﻪ ﺗﺘﻤﻨﻰ ﺗﻜﺮﺑﻬﺎ ﺑﺲ ﺗﺨﺎﻑ ﻣﻦ ﺟﻤﻴﺮﺓ ﺑﻬﺎﻟﻔﺘﺮﺓ ﺻﺎﺭﺕ ﻋﺪﻧﺎ ﺟﺜﻴﺮ ﻓﺮﻭﺥ .. ﺳﺘﺎﺭ ﺍﺛﻨﻴﻦ ﺑﻨﺎﺕ ﻭ ﺍﻳﻤﺎﻥ ﻭﺍﺣﺪ .. ﻟﺠﻦ ﺑﻮﻻﺩﺓ ﺍﻣﻨﻴﺔ ﺟﻦ ﺍﻭﻝ ﻓﺮﺥ ﻳﺼﻴﺮ ﺑﻬﺎﻟﺒﻴﺖ ﺍﻟﻜﻞ ﻣﻮﻫﺪﻥ ﺑﻴﻬﺎ ﻭ ﻫﻨﻴﺎﻝ ﺍﻟﻴﻜﻀﻬﺎ ..
ﻏﻴﺮ ﺣﺒﺎﻳﺐ ﺍﻣﻲ ﺍﻟﺘﻘﺮﺍﻟﻬﻦ ، ﻫﺎﻱ ﺍﻟﺘﺠﻴﺐ ﺍﻟﻬﺎ ﺑﻄﺎﻧﻴﺔ ﻭ ﻫﺎﻱ ﺍﻟﺘﺠﻴﺒﻠﻬﺎ ﻛﻤﺎﻁ ﻣﻄﺮﺯ .. ﻭ ﻫﺎﻱ ﺍﻟﺘﺨﻴﻂ ﺍﻟﻬﺎ ﺛﻴﺎﺏ ﻭ ﻫﺎﻱ ﺍﻟﺘﻮﺩﻳﻠﻬﺎ ﺧﺮﺯ ﻣﻦ ﺍﻟﻌﻴﻦ ﻭ ﻫﺎﻱ ﺍﻟﺘﺠﻴﺒﻠﻬﺎ ﺷﺒﺎﺣﻴﺎﺕ .. ﻭ ﻫﺎﻱ ﺍﻟﺘﺴﻮﻳﻠﻬﺎ ﻣﻌﺎﺿﺪ ﻣﺨﺮﺯﺓ ﻳﺴﻤﻮﻧﻬﺎ ( ﺷﺤﻢ ﻭ ﻟﺤﻢ ) ﻳﻜﻮﻟﻮﻥ ﻫﺎﻱ ﻣﻦ ﻳﻠﺒﺴﻬﺎ ﺍﻟﺠﺎﻫﻞ ﻳﺴﻤﻦ .
ﺷﻮﻳﺔ ﺷﻮﻳﺔ .. ﺍﺟﺮﻭﺡ ﻭﺟﻬﻲ ﻛﺎﻣﻦ ﻳﻄﻴﺒﻦ
ﻭﻛﻢ ﺍﻭﻛﻒ ﺍﻋﻠﻰ ﺣﻴﻠﻲ ﻭ ﺍﻋﺎﻭﻥ ﺑﺸﻐﻞ ﺍﻟﺒﻴﺖ ﻭ ﺍﺧﺴﻞ ﺣﻀﺎﻳﻦ ﺑﺘﻲ ﻭﻟﻜﺎﻓﺎﺗﻬﺎ ..
ﻭﺍﻟﺤﻤﺪ ﻭ ﺍﻟﺸﻜﺮ ﻟﻠﻪ ﺭﺩﺕ ﻋﺎﻓﻴﺘﻲ ﻟﻴﻪ ﺑﺰﻭﺩ ﺍﻫﻠﻲ ﻭﻭﻛﻔﺘﻬﻢ ﻭﻳﺎﻱ .
ﺍﻧﺪﻛﺖ ﺍﻟﺒﺎﺏ .. ﻭ ﻛﻤﺖ ﺍﻧﺎ ﺍﻓﺘﺤﻨﻪ ... ﻓﻜﻴﺘﻪ ﻭ ﻟﻨﻬﺎ ﺭﺍﺩﻳﻮﻥ ﻭ ﺍﻡ ﺳﺮﺣﺎﻥ ﺭﺩﺣﺔ : ﻳﺎ ﻫﻼ ﻭﻣﺮﺣﺒﺎ ﺗﻔﻀﻠﻦ ﺗﻔﻀﻠﻦ
ﺭﺍﺩﻳﻮﻥ : ﺷﻠﻮﻧﺞ ﻳﻬﺪﺯﺓ ﺍﻋﺬﺭﻳﻨﻲ ﻣﺎ ﻛﺪﺭﺕ ﺍﺟﻴﺞ ﻳﻮﻡ ﺍﻟﻄﻠﻌﺘﻲ ﻣﻦ ﺍﻟﻤﺴﺘﺸﻔﻰ
- ﺟﻴﺘﺞ ﻛﺎﻓﻴﺔ ﻻ ﺗﺘﻌﺬﺭﻳﻦ ، ﻓﻮﺗﻲ
ﺣﺒﺤﺒﺘﻨﻲ ﺍﻣﻪ ﻭ ﺩﺷﺖ ، ﺣﺠﺖ : ﺟﺎ ﺍﻡ ﺍﻟﺤﺒﺎﻳﺐ ﻭﻳﻨﻬﺎ ؟
- ﻋﺪﻫﺎ ﻗﺮﺍﻳﺔ ﺍﺑﻴﺖ ﺍﻟﺤﺠﻲ ﻭﺭﺍﺣﺖ
- ﻳﺎ ﻭ ﺍﻧﺎ ﺟﺎﻳﺘﻬﺎ ﺍﻋﻠﻰ ﻫﺎﻻﺳﺒﺎﺏ
- ﻋﻠﻴﺶ ؟
- ﻋﻜﺐ ﺑﺎﺟﺮ ﺍﺭﺑﻌﻴﻦ ﺍﻟﺸﻴﺦ ﻭ ﺳﺮﺣﺎﻥ ﺍﺟﺮ ﻣﻨﺸﺄﺓ ﻭ ﺑﻠﻎ ﺍﻟﺴﻠﻒ ﺍﻟﺮﺍﻳﺪ ﻳﺰﻭﺭ ﻛﺒﻮﺭ ﺍﻫﻠﻪ ﻳﺼﻌﺪ ﻭ ﻳﻤﺶ ﻭﻳﺎﻧﺎ ﺑﻼ ﻋﺰﻳﻤﺔ .. ﺑﺜﻮﺍﺏ ﺍﻟﺸﻴﺦ ﻣﻄﺮ ، ﻭ ﺍﻧﺎ ﺟﺎﻳﺔ ﺍﻋﻠﻰ ﺍﻣﺞ ﺧﺎﻃﺮ ﺗﻘﺮﺍﻟﻨﺎ ﺑﺎﺟﺮ ﻋﺒﻦ ﻣﺴﻮﻳﻦ ﺛﻮﺍﺏ .
- ﻭﺍﺻﻞ ﺍﻥ ﺷﺎﺀﺍﻟﻠﻪ .. ﻣﻦ ﺗﺠﻲ ﺍﺑﻠﻐﻨﻬﺎ
ﺟﺎﻱ ﻧﺤﺠﻲ ﻭ ﺩﺷﺖ ﻻﻟﻪ ﺳﻠﻤﺖ ﻭ ﺑﻴﺪﻫﺎ ﺻﺮﺍﺣﻴﺔ ﺍﻟﻤﺎﻱ ، ﻛﺪﻣﺖ ﺍﻟﻬﻢ ... ﺩﺵ ﺍﻣﻲ ﻭ ﺗﻠﻜﺘﻬﻦ ﺑﺎﻟﻬﻼ ﻭ ﺍﻟﻤﺮﺣﺒﺎ ﻭ ﺗﺤﺒﺤﺐ ﺑﻴﻬﻦ ﻭ ﺍﻧﺪﺍﺭﺕ ﻻﻟﻪ : ﻳﺎ ﻋﻤﻪ ﺟﺎ ﺑﺲ ﺍﻟﻤﻴﻪ ، ﺧﺪﺭﻱ ﺍﻟﺠﺎﻱ
ﺭﺩﺣﺔ : ﻻ ﻭﻋﻠﻲ ﻛﺎﻳﻤﻴﻦ ﻣﺎ ﻳﻌﺘﺎﺯ
- ﺷﻨﻬﻲ ﺧﻴﺔ ﻣﺮﺕ ﺣﻀﻴﺮﻱ ، ﺑﺲ ﺍﻟﺴﻼﻡ ﻭ ﺍﻣﺶ ، ﻛﻌﺪﻱ ﺷﻮ ﻛﻌﺪﻱ .
ﻛﺮﺑﺖ ﻟﺮﺍﺩﻳﻮﻥ : ﺷﻠﻮﻧﺞ
ﺍﻧﺪﺍﺭﺗﻠﻲ ﻣﺘﺒﺴﻤﻪ ﺑﻘﻬﺮ : ﻋﻠﻰ ﺍﻟﻠﻪ
- ﺷﺎﻳﻔﺘﺞ ﻣﻮﺵ ﺫﻳﺞ ﺭﺍﺩﻳﻮﻥ ﺍﻟﺤﻠﻮﺓ ، ﺍﻻﺳﻮﺩ ﻣﻮﻫﺪﻥ ﺍﺣﻮﺍﻟﺞ ﻭﻭﺟﻬﺞ ﺗﻌﺒﺎﻥ .
- ﺟﺎ ﻓﺮﺍﻙ ﻋﻴﻦ ﻳﻬﺪﻭﺓ ، ﺍﻟﺒﺖ ﺧﻼﻑ ﺍﺑﻮﻫﺎ ﺗﻀﻴﻊ ، ﻭ ﺍﻧﺎ ﺿﻌﺖ ﺧﻼﻓﻪ .
- ﺍﻟﻠﻪ ﻳﻌﻴﻨﺞ ، ﺍﻧﺎ ﺳﻤﻌﻴﺖ ﺯﻧﻴﺪ ﻣﻄﻴﺞ ﻻﻝ ﺛﺠﻴﻞ ﻟﺠﻦ ﺳﺮﺣﺎﻥ ﻣﻮﺵ ﺭﺍﺿﻲ
- ﺑﻌﺪﻧﻲ ﻣﺎ ﺍﻋﺮﻑ ﺣﺎﻟﻲ ﻟﻴﻮﻳﻦ .. ﺯﻧﺎﺩ ﻋﻴﻮﻧﻪ ﻳﻨﻄﻦ ﺷﺮﺍﺭ ﻭﻣﺎ ﻳﺮﺿﻰ ﺍﺣﺪ ﻳﻨﺰﻝ ﺍﺣﺠﺎﻳﺘﻪ ﻭ ﺳﺮﺣﺎﻥ ﻣﺘﺠﺎﻫﻠﻪ ﻭ ﺍﻧﺎ ﺧﺎﻳﻔﺔ ﻣﻦ ﻛﻮﻥ ﺯﻧﺎﺩ ﺍﺧﻮﻱ ﺑﻌﺪ ﻓﻜﺪ ﺍﺑﻮﻱ ﻃﻐﻰ .. ﻭﻣﺎ ﺍﻟﻪ ﺭﺩﺍﺩ ﻭ ﺍﺧﺎﻓﻦ ﻻ ﻳﺘﻜﺎﻭﻣﻮﻥ ﻫﻮ ﻭ ﺳﺮﺣﺎﻥ
- ﺍﻣﺞ ﺷﻨﻬﻲ ﺭﺍﻳﻬﺎ ..
- ﻻ ﻳﺴﻤﻊ ﻻﻡ ﻭﻻ ﻋﻢ ﻭﻻ ﺍﺥ .. ﻳﻜﻮﻝ ﺍﻧﺎ ﺍﻟﺸﻴﺦ ﻭ ﺍﻻﻛﻮﻟﻦ ﺑﻴﻪ ﻳﺘﻨﻔﺬ ، ﻭ ﻧﺎﻃﺮﻳﻦ ﻳﺨﻠﺺ ﺍﺭﺑﻌﻴﻦ ﺍﺑﻮﻱ ، ﺧﺎﻃﺮ ﻳﺤﻜﻤﻮﻥ ﺑﻴﻪ .
ﺣﺠﺘﻬﺎ ﻭ ﺍﺧﺘﻨﻜﺖ،ﺳﻜﺘﺖ ﻭ ﺍﻧﺎ ﺍﻃﺒﻄﺐ ﺍﻋﻠﻰ ﺭﺟﻠﻬﺎ ﻭﺍﻭﺍﺳﻴﻬﺎ .. ﺿﺎﻙ ﺻﺪﺭﻱ ﻭﻳﺎﻫﺎ ، ﺩﻧﺠﺖ ﺗﺒﺠﻲ : ﻻ ﺗﺒﺠﻴﻦ ﻛﻮﻟﻲ ﻳﺎ ﺍﻟﻠﻪ ، ﻣﺎ ﺗﻀﻴﺞ ﺍﻝ ﻭﺗﻔﺮﺝ
- ﻭﻟﺞ ﻫﺪﻭﺓ ﺟﻨﺖ ﻣﻠﻜﺔ ﺯﻣﺎﻧﻲ ﺑﻌﻬﺪ ﺍﺑﻮﻱ .. ﻫﺴﺎﻧﻲ ﺿﻌﺖ ﻭ ﺍﻫﻴﺲ ﺑﺮﻭﺣﻲ ﻏﺮﻳﺒﺔ .. ﻻ ﺍﻧﺎ ﻟﻬﻠﻲ ﻭﻻ ﺍﻧﺎ ﻟﻮﻟﻴﻔﻲ .. ﻭﻛﻞ ﺍﻟﻜﺎﻡ ﻳﺠﺮ ﺑﻴﻪ ﻟﺼﻔﺤﺔ ، ﻭﻟﺞ ﻫﻈﻴﻤﺔ ﺍﻧﺎ ﻳﺼﻴﺮ ﺑﻴﻪ ﻫﻴﺞ ﻭ ﻳﻜﺴﺮﻭﻧﻲ
ﻛﻤﺖ ﺍﺑﺠﻲ ﻭﻳﺎﻫﺎ ، ﺍﻧﺪﺍﺭﻳﺖ ﺍﻣﻲ ﻭﺭﺩﺣﺔ ﻣﻮﺟﺪﺍﺕ ﺑﺴﻮﺍﻟﻔﻨﺎ .. ﺣﺠﺖ ﺍﻣﻲ : ﺟﺎ ﺍﺧﻴﺞ ﺍﺣﺬﺍﺝ ﻻ ﺗﺒﺠﻴﻦ ﻳﻴﻤﻪ
- ﺧﺎﻟﺔ ﺍﻧﺎ ﺍﺧﺎﻓﻦ ﺍﻋﻠﻰ ﺳﺮﺣﺎﻥ ﻣﻨﻬﻢ ، ﺯﻧﺎﺩ ﺣﺎﻁ ﺳﺮﺣﺎﻥ ﺍﺑﺎﻟﻪ .. ﻭ ﺳﺮﺣﺎﻥ ﻳﺘﻮﻋﺪﻟﻪ .. ﺍﺧﺎﻑ ﺍﻋﻠﻰ ﺳﺎﻋﺔ ﻳﺘﻜﺎﻭﻣﻮﻥ ﻭ ﺍﺧﺴﺮ ﺍﻟﻄﺮﻓﻴﻦ .
- ﻻ ﺗﺨﺎﻓﻴﻦ ﺍﻋﻠﻰ ﺳﺮﺣﺎﻥ ، ﻣﻮﺵ ﻣﻬﺮﻑ ﺯﻟﻤﺔ ﻋﺎﻛﻞ ﻭ ﺗﺼﺮﻓﺎﺗﻪ ﺑﻌﻜﻞ ﻣﺎ ﻳﻬﻮﺑﺰ ﻭ ﻳﻬﺮﺝ ﺍﻟﺪﻧﻴﺎ ﻭﻳﻮﻫﺪﻥ ﺭﻭﺣﻪ ، ﻻ ﺗﺒﺠﻴﻦ ﻳﺨﺎﻟﻪ
- ﺷﻠﻮﻧﻤﻨﺎ ﺍﺑﺠﻲ ﻭ ﺍﻧﺎ ﻫﺎﺫ ﺣﺎﻟﻲ ، ﺑﻌﺪﻧﻲ ﻣﺎ ﺷﻠﺖ ﺭﺍﺳﻲ ﻣﻦ ﻓﻜﺪ ﺍﺑﻮﻱ ، ﺻﻜﻌﻮﻧﻲ ﺑﻬﺎﻟﻌﻄﻴﺔ ، ﺣﺠﺎﻳﺔ ﻣﻀﻴﻒ ﺧﺎﻟﺔ ﻣﻮﺵ ﻫﻴﻨﺔ .
ﻇﻠﺖ ﺍﺩﺍﺭﻱ ﺑﺪﻣﻮﻋﻬﺎ ﻭ ﺍﻟﺤﺒﺎﻳﺐ ﻳﻮﺍﺳﻨﻬﺎ ...
ﺛﺎﻧﻲ ﻳﻮﻡ ﻛﻮﺍﻏﺪ ﺣﻀﺮﺕ ﺍﻟﻘﺼﺮ ﻭﻗﺮﺕ ﺍﻟﻤﺠﻠﺲ ﻭ ﺍﻟﺴﻠﻒ ﻛﻠﻪ ﺣﺎﺿﺮ ﺍﺑﻴﺖ ﺳﺮﺣﺎﻥ ، ﺣﺘﻰ ﻣﻠﻮﻙ .
ﻛﺒﻞ ﻳﻮﻡ ﺍﻻﺭﺑﻌﻴﻦ ﺑﻴﻮﻡ .. ﻫﺪﻭﺓ ﺍﺻﺮﺕ ﺍﻻ ﺗﺮﻭﺡ
ﺑﺲ ﻛﻮﺍﻏﺪ ﻣﺎ ﺗﺮﺿﻰ : ﻭﻟﺞ ﺍﻧﺖ ﻧﻔﺴﻪ ﻭﻳﻦ ﻣﻮﻟﻴﺔ
- ﻳﻤﻪ ﺻﺎﻟﻲ ﺷﻜﺜﺮ ﻣﻦ ﺟﺒﺖ .. ﻣﺎ ﻋﻠﻲ ﺷﻲ ﻭﻋﻠﻲ
- ﺑﻌﺪﺝ ﻣﺎ ﻃﺎﻟﻌﺔ ﺍﻻﺭﺑﻌﻴﻦ ﻭﺭﺣﻤﺞ ﺭﺧﻲ ، ﺍﺳﺘﺠﻨﻲ ﻭ ﺍﺭﻛﺪﻱ
- ﻻ ﻳﻤﻪ ﻋﻠﻴﺞ ﺍﻟﻌﺒﺎﺱ .. ﺧﻞ ﺍﺭﻭﺣﻦ ، ﻫﻮ ﺍﻟﺠﻮ ﻭﻃﻴﺐ ﻻﻫﻮ ﺣﺎﺭ ﻭﻻ ﻫﻮ ﺑﺎﺭﺩ .. ﺧﺎﻃﺮ ﺗﺨﺎﻓﻴﻦ ﺍﻋﻠﻰ ﺍﻟﻔﺮﺧﺔ ..
- ﻭﺭﺣﻤﺞ
- ﻣﺎ ﻋﻠﻲ ﺷﻲ ، ﺑﺲ ﺧﻞ ﺍﺭﻭﺣﻦ
ﻭ ﺍﺻﺮﺕ ﺍﻻ ﺗﺮﻭﺡ ﻭﻳﺎﻫﻢ ..
ﻛﺎﻟﺖ ﺍﻟﻬﺎ : ﺑﺲ ﻣﺎ ﺗﻨﺰﻟﻴﻦ ﺑﺎﻟﻜﺒﻮﺭ ، ﺣﺪﺝ ﻟﻠﺴﻴﺎﺭﺓ ﻭﺑﺲ ﺗﻈﻠﻴﻦ ﺑﻴﻬﺎ
- ﺭﺍﺿﻴﺔ
- ﺩﻳﺎﻟﻪ ﺣﻀﺮﻱ ﺭﻭﻳﺤﺘﺞ
ﺟﻤﺎﺭﺓ : ﺍﻧﺎ ﺍﺭﻭﺣﻦ ﺍﻛﻀﻦ ﺍﻣﻨﻴﺔ
- ﺭﻭﺣﻲ
ﺣﻀﺮﻥ ﺍﺭﻭﺍﺣﻬﻦ ﻭ ﺣﻀﺮﻥ ﺯﺍﺩﻫﻦ ..
ﻭﻣﻦ ﻏﺒﺸﺔ ﻃﻠﻌﻦ ، ﻟﺠﻦ ﺍﻟﺴﻴﺎﺭﺓ ﺻﺎﻳﺮﺓ ﺩﻭﻭﻭﺱ ، ﻛﺾ ﺍﺧﻮﺝ ﻻ ﻳﻄﻴﺢ ، ﺍﻟﺴﻠﻒ ﻛﻠﻪ ﺻﺎﻋﺪ ... ﻫﺪﻳﺔ ﻣﺎ ﻃﺎﻟﻌﺔ ﺍﻻﺭﺑﻌﻴﻦ ﻭ ﺫﻭﻟﻪ ﻛﻞ ٥ ﻛﺎﻋﺪﻳﻦ ﺑﻜﺮﺳﻴﻴﻦ
ﻛﻮﺍﻏﺪ : ﻳﻤﻪ ﺍﻟﺴﻴﺎﺭﺓ ﺻﺎﻳﺮﺓ ﻫﻮﺳﺔ ، ﺭﺩﻱ ﻳﺒﻨﻴﺘﻲ
- ﻳﻤﻪ ﺍﻧﺪﺣﺲ ﻭﻳﺎﻫﻢ
- ﺷﺘﻨﺪﺣﺴﻴﻦ ، ﺍﻣﺸﻲ ﻧﺰﻟﻲ
ﺳﺮﺣﺎﻥ : ﻫﺎ ﺍﻡ ﺳﺘﺎﺭ
- ﺧﺎﻟﺔ ﻫﺎﻱ ﺭﺍﻛﺒﺔ ﺭﺍﺳﻬﺎ ﺍﻻ ﺗﺮﻭﺡ ﻭ ﻫﻲ ﻣﻮﺵ ﻃﻮﻳﺒﺔ
- ﺍﻧﺎ ﺟﺎ ﺧﻠﻴﺘﻜﻢ ﺑﺴﻴﺎﺭﺗﻲ ﻟﺠﻦ ﺻﺎﻋﺪﻳﻦ ﺍﺯﻻﻡ ﻭﻳﺎﻱ
ﺣﻂ ﺭﺟﻠﻪ ﻭ ﺻﻌﺪ ﻟﻠﺴﻴﺎﺭﺓ ﻋﺎﻳﻦ .. ﺷﺎﻑ ﻛﺮﺳﻲ ﻟﻴﻜﺪﺍﻡ ﻛﺎﻋﺪﻳﻦ ﺑﻴﻪ ﺍﺛﻨﻴﻦ ﺷﺒﺎﺏ ﻣﻦ ﺍﻟﺴﻠﻒ .. ﺣﺠﻪ : ﺍﺯﻟﻤﻨﺎ ﺑﻮﻳﻪ ، ﻛﻮﻣﻮ ﻭ ﺧﻠﻮ ﺍﻟﻤﺮﺓ ﺗﻜﻌﺪ ﻫﻨﺎ ﻭ ﺍﻧﺘﻢ ﺍﻭﻛﻔﻮ ﻭﻛﻀﻮ ﺍﻟﺒﺎﺏ .
ﻛﺎﻣﻮ ﻭﻛﻌﺪ ﻫﺪﻭﺓ ﻭ ﺧﻠﻬﺎ ﻟﻴﺠﺪﺍﻡ ، ﻭﺭﺍﺩﻳﻮﻥ ﺟﺪﺍﻣﻬﺎ ﻭ ﻛﻮﺍﻏﺪ ﻛﻌﺪﺕ ﻳﻢ ﺭﺍﺩﻳﻮﻥ ..
ﺳﺮﺣﺎﻥ : ﻫﺎﺍﺍﻩ .. ﺑﻌﺪ ؟ ﻣﻌﺘﺎﺯﻳﻦ ﺷﻲ،ﻛﺎﻣﻮ ﻳﺘﺮﺣﻤﻮﻥ ﻻﺑﻮﻩ ﻭ ﻳﺸﻜﺮﻭﻧﻪ ، ﺩﻙ ﺻﺪﺭﻩ ﻭ ﻧﺰﻝ .
ﺳﻴﺎﺭﺓ ﻛﺮﻳﻢ ﻭ ﺳﻴﺎﺭﺓ ﺯﻧﺎﺩ ﻭ ﺳﻴﺎﺭﺓ ﺳﺮﺣﺎﻥ .. ﺷﺎﻳﻠﻴﻦ ﺑﻴﻬﻦ ﺍﺯﻻﻡ ﺍﻟﻌﺸﻴﺮﺓ ﺍﻟﻜﺒﺎﺭ .. ﻭ ﺍﻟﺴﻴﺎﺭﺓ ﺍﻟﺠﺒﻴﺮﺓ ﺷﺎﻟﺖ ﺍﻛﺜﺮ ﺍﻟﻨﺴﻮﺍﻥ ﻭ ﺷﻮﻳﺔ ﺯﻟﻢ .
ﻣﺸﺖ ﺍﻟﺴﻴﺎﺭﺓ ﻭ ﺻﺎﺣﺖ ﻛﻮﺍﻏﺪ : ﺍﻟﻔﺎﺗﺤﺔ ﻻﻡ ﺍﻟﺒﻨﻴﻦ ﺗﺴﺒﻜﻬﺎ ﺍﻟﺼﻼﺓ ﺍﻋﻠﻰ ﻣﺤﻤﺪ ﻭﺍﻝ ﻣﺤﻤﺪ .
ﺻﺎﺣﻮﺍ : ﺍﻟﻠﻬﻢ ﺻﻞ ﻋﻠﻰ ﻣﺤﻤﺪ ﻭﺍﻝ ﻣﺤﻤﺪ
ﻭﻗﺮﻭﺍ ﺍﻟﻔﺎﺗﺤﺔ ﻭ ﺗﺤﺮﻛﺖ ﺍﻟﺴﻴﺎﺭﺓ ﻛﻮﺓ .. ﻣﺘﺮﻭﺳﺔ ﻋﺎﻟﻢ
ﻫﺪﻳﺔ : ﺟﻮﻳﻌﺪﺓ ﻛﺠﺪﺍﻡ ﺍﻣﻲ ، ﺩﺍﻳﺮﺓ ﺭﺍﺳﻬﺎ ﻭ ﺗﺤﺠﻲ ﻭﻳﺎ ﻣﺮﺕ ﻛﺮﻳﻢ .. ﻫﻲ ﻛﺎﻭﻟﻴﺔ ﺑﺲ ﻣﺒﻮﺷﻬﺎ ﻛﺮﻳﻢ ، ﻭ ﻣﻠﺒﺴﻬﺎ ﺟﻮﺍﺭﻳﺐ ﻭ ﺟﻔﻮﻑ ﻭ ﻣﺎ ﻳﻨﺸﺎﻑ ﻣﻨﻬﺎ ﻏﻴﺮ ﻋﻴﻮﻧﻬﺎ ﻭ ﺍﻟﻤﺮﺓ ﺣﺒﻠﻰ ﺣﺠﺖ ﺍﻣﻲ : ﺍﺭﻓﻌﻲ ﺍﻟﺒﻮﺷﻴﺔ ﻳﻴﻤﻪ ﺟﺎ ﺍﺧﺘﻨﻜﺘﻲ
- ﻣﺎ ﻳﺮﺿﻰ ﻛﺮﻳﻢ
- ﻛﻠﻴﻠﻪ ﺍﻡ ﺍﻟﺤﺒﺎﻳﺐ ﻛﺎﻟﺘﻠﻲ ، ﺭﻓﻌﻴﻬﺎ ﻭ ﺟﺮﻱ ﺍﻟﻬﻮﻯ ، ﺷﻨﻬﻲ ﺟﺎ ﻣﺎ ﻛﺎﻟﻮﻫﺎ ﻫﻴﺞ ..
ﻭﺭﻓﻌﺖ ﺍﻟﺒﻮﺷﻴﻪ ﻋﻦ ﺭﺍﺳﻬﺎ .. ﻭﻃﻠﻊ ﻭﺟﻬﻪ ، ﺍﻟﺒﺖ ﺑﻴﻀﻪ ﻭ ﺍﻟﺨﺪﻭﺩ ﺣﻤﺮ ﺩﻡ ﻭ ﺣﻴﻞ ﺣﻠﻮﺓ .
ﺣﺠﺖ ﺍﻣﻲ : ﻧﺴﻴﺖ ﺍﺳﻤﺞ ؟
- ﺩﻳﻨﺎﺭ
ﺍﺳﺘﻠﻤﺘﻬﺎ ﺍﻣﻲ ﺳﻮﺍﻟﻒ .. ﺍﻟﺒﺖ ﻣﺒﻴﻨﺔ ﺧﻮﺵ ﻣﺮﺓ ﻭ ﻇﻠﺖ ﺍﻣﻲ ﺗﻨﺸﺪﻫﺎ ﺍﻋﻠﻰ ﻃﺒﺎﻳﻊ ﺍﻟﻜﺎﻭﻟﻴﺔ ﻭ ﻇﻠﺖ ﺗﺸﻜﻲ ﻣﻨﻬﻢ ﻭ ﺷﻠﻮﻥ ﻋﻤﻬﺎ ﺟﺎﻥ ﻳﻌﺬﺑﻬﻦ ﺍﺫﺍ ﻣﺎ ﺭﻛﺼﻦ ﻭﺷﻠﻮﻥ ﻣﺘﻌﺬﺑﺎﺕ .
ﻛﻞ ﺍﻟﺒﺴﻴﺎﺭﺓ ﻇﻞ ﻣﻮﺟﺪ ﻭﻳﺎﻫﺎ ﻭ ﺍﻧﻜﺴﺮ ﺧﺎﻃﺮﻫﻢ ﺍﻋﻠﻴﻬﺎ ﻭ ﻛﺎﻣﻮ ﻳﺤﻤﺪﻭﻥ ﺑﻜﺮﻳﻢ ﻳﻮﻡ ﺍﻻﺧﺬﻫﺎ ﻭﺑﻮﺷﻬﺎ ﻭ ﺳﺘﺮﻫﺎ ﻣﻦ ﻫﺎﻟﺪﺭﺏ .
ﻟﻴﻤﺎ ﻭﺻﻠﻨﺎ ﺍﻟﻨﺠﻒ ﻛﺎﻟﻮ : ﻧﺰﻭﺭ ﺍﻟﻜﺒﻮﺭ ﻧﺰﻭﺭ ﺍﻫﻠﻨﺎ ﻭ ﻧﻄﻠﻊ ﻟﻸﻣﻴﺮ ﺧﺎﻃﺮ ﻧﺰﻭﺭ ﻭ ﻧﺮﺗﻊ ﻏﺎﺩ ﺑﺤﻀﺮﺗﻪ .
ﻣﻦ ﻭﺻﻠﻨﺎ ﻭﺍﺩﻱ ﺍﻟﺴﻼﻡ .. ﺍﻟﻜﻞ ﺳﻜﺖ ﻣﻦ ﺍﻟﺴﻮﺍﻟﻒ ﻭ ﻇﻠﺖ ﺗﻌﺎﻳﻦ ﻟﻠﻜﺒﻮﺭ ، ﻫﺎﺫ ﺍﻟﻴﺒﺠﻲ ﻭ ﻫﺎﺫ ﺍﻟﺨﺎﻧﻜﺘﻪ ﺍﻟﻌﺒﺮﺓ، ﻭ ﻣﻨﻈﺮ ﻳﺮﻫﺐ ... ﻫﻴﻤﺔ ﻭ ﻛﻠﻬﺎ ﻛﺒﻮﺭ .
ﺩﻛﺖ ﺍﻣﻲ ﺍﻋﻠﻰ ﺭﺟﻠﻬﺎ : ﺍﻳﺪﺟﻦ ﻭﻳﺎﻱ ﺣﺒﺎﻳﺐ
ﻳﺎ ﺩﻓﺎﺍﺍﺍﻥ .. ﺩﺭﺏ ﺍﻟﻤﻜﺒﺮﺓ ﻣﻨﻴﻦ ..
ﻭ ﻳﺎ ﺩﻓﺎﻥ .. ﺩﺭﺏ ﺍﻟﻤﻜﺒﺮﺓ ﻣﻨﻴﻦ ..
ﻋﻨﺪﻱ ﻋﺘﺎﺏ ﻟﻠﻈﻠﻮ ﻣﻨﻮﻣﻴﻦ ﻭﻳﺎ ﺩﻓﺎﻥ ......
ﻭﻳﺎ ﺩﻓﺎﻥ ﺩﻟﻴﻨﻲ ﻋﻠﻴﻴﻴﻴﻬﻢ .. ﻭﻳﺎ ﺩﻓﺎﻥ ......
ﻳﻮﻟﻲ ﺍﻟﻴﺠﻠﻲ ﺍﻟﺨﺎﻃﺮ ﺣﺠﻴﻬﻢ ﻭﻳﺎ ﺩﻓﺎﻥ .....
ﻭﻛﻠﺒﻲ ﺍﺷﺘﺎﻙ ﻟﻠﻐﺎﺑﻮ ﺍﻋﻦ ﺍﻟﻌﻴﻦ ﻭ ﻳﺎ ﺩﻓﺎﻥ ... ﺩﺭﺏ ﺍﻟﻤﻜﺒﺮﺓ ﻣﻨﻴﻦ .
ﻧﺤﺒﺖ ﺭﺍﺩﻳﻮﻥ ﻭ ﻛﺎﻣﺖ ﺗﺒﺠﻲ ﻭ ﺗﺼﻴﺢ : ﻳﺎﺑﻮﻭﻭﻭﻭﻭﻭﻭﻳﻪ ، ﻳﺎ ﻣﺼﻴﺒﺘﻲ ﺑﻔﺮﻛﺎﻙ ﻳﺎ ﺑﻮﻳﺔ .
ﻭﺍﻣﻲ ﺍﺩﻙ ﻭ ﺗﻨﻌﻰ ، ﻇﻠﻴﺖ ﻣﺠﺎﺑﻠﺔ ﺭﺍﺩﻳﻮﻥ ﻭ ﺩﻣﻮﻋﻲ ﻫﻤﺎﻟﻪ ﻭﻳﺎﻫﺎ ، ﻟﻴﻤﺎ ﻭﻛﻔﺖ ﺍﻟﺴﻴﺎﺭﺓ ، ﻭ ﻧﺰﻟﻮ ﺍﻟﻮﺍﺩﻡ ، ﺍﻣﻲ ﺍﻧﺪﺍﺭﺗﻠﻲ : ﻣﻮﺵ ﺗﻨﺰﻟﻴﻦ ، ﻇﻠﻲ ﺍﻧﺖ ﻭ ﺍﺧﻴﺘﺞ ﻫﻨﺎ ، ﻧﺰﻭﺭ ﺍﻟﻜﺒﻮﺭ ﻭ ﻧﺮﺩ .
ﺍﻟﺴﻴﺎﺭﺓ ﻣﻮﻛﻔﻴﻨﻬﺎ ﺟﺪﺍﻡ ﻣﻜﺒﺮﺓ ﺍﻝ ﺟﻠﻮﺏ ، ﺻﻒ ﺳﻴﺎﺭﺗﻪ ﺳﺮﺣﺎﻥ ﻭ ﻧﺰﻝ ﻭ ، ﻭ ﺯﻧﺎﺩ ﻫﻢ ﻧﺰﻝ ﻣﻦ ﺳﻴﺎﺭﺗﻪ ، ﺣﺠﻪ ﺳﺮﺣﺎﻥ : ﻳﺎﺑﺎﺍﺍﺍ ﺍﻫﻠﻨﺎ ، ﺍﻟﻠﻪ ﺑﺎﻟﺨﻴﺮ ﻋﻠﻴﻜﻢ
- ﺍﻟﻠﻪ ﺑﺎﻟﺨﻴﺮ
- ﻫﺎﻱ ﻣﻜﺒﺮﺓ ﺍﻟﺸﻴﺦ ﺟﻠﻮﺏ ، ﻭ ﺟﺪﺍﻣﻜﻢ ﺳﺎﻋﺘﻴﻦ ﺍﻟﻌﺪﻩ ﻣﻴﺖ ﻳﺰﻭﺭ ﻣﻮﺗﺎﻩ ﻭ ﻳﺮﺩ ﻟﻤﻜﺒﺮﺗﻨﺎ ، ﻫﻨﺎ ﻧﻼﻛﻴﻬﻢ .
ﻣﻜﺒﺮﺓ ﺍﻟﺸﻴﻮﺥ ﻋﺒﺎﺭﺓ ﻋﻦ ﺣﺠﺮﺓ ﻭ ﻣﺴﺮﻛﺎﺓ .. ﻓﻜﺎﻫﺎ ﺯﻧﺎﺩ ﻭ ﺩﺧﻠﻦ ﺍﻟﻨﺴﻮﺍﻥ ﻳﺘﺼﺎﺭﺧﻦ ﺍﻋﻠﻰ ﻛﺒﻮﺭ ﺍﻟﺸﻴﻮﺥ .. ﻭ ﻛﺒﻮﺭ ﺍﻟﺒﺎﻛﻴﻦ ﻣﻨﺎ ﻭﻣﻨﺎ ﻣﻮﺵ ﺑﺎﻟﺤﺠﺮﺓ ، ﻫﺎﻱ ﺧﺎﺻﺔ ﺑﺸﻴﻮﺧﻬﻢ ﺍﻟﻨﺎﺱ ﻗﺮﺕ ﺍﻟﻔﺎﺗﺤﺔ ﻣﻦ ﺍﺑﻌﻴﺪ ﺍﻋﻠﻰ ﺭﻭﺡ ﺍﻟﺸﻴﺦ ﻣﻄﺮ ﺍﻫﻠﻪ ، ﻭ ﻣﺸﻮﺍ ﺗﻮﺯﻋﻮ ﺑﺎﻟﻤﻜﺒﺮﺓ ، ﻛﻠﻤﻦ ﺭﺍﺡ ﻟﻤﻮﺗﺎﻩ .
ﻇﻠﻴﺖ ﺍﻧﺎ ﺟﻮﻳﻌﺪﺓ ﺑﺎﻟﺴﻴﺎﺭﺓ ﻭ ﺍﻻﺯﻻﻡ ﻭﺍﻛﻔﻴﻦ ﺑﺮﺍ ﺍﻟﺤﺠﺮﺓ .. ﻭ ﺍﻟﻨﺴﻮﺍﻥ ﺩﺍﺧﻞ ﻳﺼﻴﺤﻦ ﻭ ﻳﺒﺠﻦ .. ﺳﺮﺣﺎﻥ ﺍﻧﺘﺠﻰ ﻋﻠﻰ ﺳﻴﺎﺭﺗﻪ ﻭﻭﻛﻒ ﻣﺪﻧﺞ .. ﺍﻧﺎ ﻋﻴﻨﻲ ﻃﺎﺣﺖ ﺍﻋﻠﻴﻪ . ﻣﺎ ﻫﻴﺴﻴﺖ ﺭﻭﺣﻲ ﺍﻻ ﻣﻮﭼﺪﺓ ﺑﻴﻪ ، ﻣﻦ ﻛﻮﻥ ﺍﻧﺎ ﺍﺭﺳﻮﻣﺔ ﺍﺗﻤﻨﺎﻫﻦ ﻭ ﺷﻮﻓﺘﻪ ﻋﺪﻱ ﺗﺴﻮﻯ ﺍﻟﺪﻧﻴﺎ ، ﻳﻮ ﻣﻮ ﺷﺎﻳﻠﻪ ﻋﻠﻴﻪ ﺑﻜﻠﺒﻲ ﻭﻻ ﺟﻦ ﻛﻞ ﻫﺎﻟﻈﺮﻭﻑ ﺻﺎﻳﺮﺓ ﺑﻴﻨﺎﺗﻨﻪ ، ﺣﻄﻴﺖ ﺭﺍﺳﻲ ﺍﻋﻠﻰ ﺍﻟﺠﺎﻣﺔ ﻭ ﻇﻠﻴﺖ ﺍﻋﺎﻳﻦ ﺍﻋﻠﻴﻪ .. ﺍﻋﻠﻰ ﻭﻛﻔﺘﻪ ..
ﻣﺪﻧﺞ ﻭ ﻫﻮ ﻳﺴﻤﻊ ﺣﺲ ﻭ ﺻﺮﻳﺦ ﺭﺍﺩﻳﻮﻥ ﻭ ﻫﻲ ﺗﺼﺮﺥ ﻭ ﺗﺒﺠﻲ ﺍﻋﻠﻰ ﻛﺒﺮ ﺍﺑﻮﻫﺎ ﻭ ﺗﺸﻜﻴﻠﻪ ﻣﻦ ﺿﻴﻢ ﺍﻟﺼﺎﺭﻟﻬﺎ ﻋﻜﺒﻪ .. ﻭ ﺗﺼﻴﺢ : ﺍﻃﻠﻊ ﺑﻮﻳﻪ ﻋﻠﻴﺶ ﺭﺍﺿﻲ ﺗﻨﺎﻡ ﻭ ﺑﻨﻴﺘﻚ ﻭﻟﻮﻫﺎ ﺍﻃﻠﻪ ﻭ ﻟﻤﻨﻲ ﺑﻌﺒﺎﺗﻚ ﺑﻮﻭﻭﻭﻳﻪ .
ﻋﺎﻳﻨﺖ ﺍﻟﻘﻬﺮ ﺑﻌﻴﻮﻧﻪ ، ﻛﺎﻡ ﻳﻔﺮﻙ ﺑﻮﺟﻬﻪ ، ﺷﺎﻝ ﺭﺍﺳﻪ ، ﺻﺪﺕ ﻋﻴﻨﻲ ﺑﻌﻴﻨﻪ ، ﺗﺒﺴﻢ ﺍﺑﺘﺴﺎﻣﺔ ﺧﻔﻴﻔﺔ ، ﻭﺗﻜﺮﺏ ، ﺟﻤﺎﺭﺓ ﻛﺎﻋﺪﺓ ﺍﻋﻠﻰ ﺍﻟﺪﺟﺔ ﻣﺎﻝ ﺍﻟﺒﺎﺏ
- ﺷﻮ ﻫﻨﺎ ﻋﻠﻴﺶ ﻣﺎ ﺗﻨﺰﻟﻮﻥ ؟
ﺟﻤﺎﺭﺓ : ﺍﻣﻲ ﻣﻮﺵ ﺭﺍﺿﻴﺔ ﻧﻨﺰﻝ ﻋﺒﻦ ﻫﺪﻳﻮﺓ ﻣﺎ ﺗﺘﺤﻤﻞ
ﺍﻧﺪﺍﺭ ﻟﻴﻪ ﻋﺎﻳﻦ ﻭﺭﺩ ﺣﺠﻪ ﻭﻳﺎﻫﺎ : ﺟﻮﻋﺎﻧﻴﻦ ﻋﻄﺸﺎﻧﻴﻦ
ﺟﻤﺎﺭﺓ : ﺟﺎﻳﺒﻴﻦ ﺍﻟﺰﺍﺩ ﻭﻳﺎﻧﻪ
- ﺑﺎﻟﻌﺎﻓﻴﺔ
ﺍﻧﺪﺍﺭ ﻭ ﻫﻮ ﻳﻨﺸﺪﻧﻲ : ﻣﻌﺘﺎﺯﺓ ﺷﻲ
- ﻫﺰﻳﺖ ﺭﺍﺳﻲ ﻭﺩﺭﺕ ﻋﻨﻪ .. ﻣﺎ ﺗﺤﻤﻠﺖ ﺍﺷﻮﻓﻨﻪ ﺟﺮﻳﺐ ﻣﻨﻲ ، ﻋﻴﻮﻧﻲ ﻛﺎﻣﻦ ﻳﺘﻼﻣﻌﻦ ، ﻭ ﻋﻤﺖ ﻋﻴﻦ ﻛﻠﺒﻲ ﺍﻟﻜﻞ ﻣﺎ ﻳﺸﻮﻓﻪ ﻳﻔﺰ ﻭ ﻳﻬﻠﻬﻞ ﺑﺸﻮﻓﺘﻪ .
ﻃﻠﻌﺖ ﺑﺸﺮﻯ ﻣﻦ ﻣﻜﺒﺮﺓ ﺍﻟﺸﻴﻮﺥ ، ﻋﺎﻳﻨﺖ ﺳﺮﺣﺎﻥ ﻭﺍﻛﻒ ﺟﺮﻳﺐ ﻣﻦ ﻋﺪﻧﺎ ، ﺍﺟﺖ ﻟﻴﻨﻪ ، ﻫﻴﺴﻴﺘﻬﺎ ﺍﺗﻀﺎﻳﻜﺖ ، ﺩﺭﺕ ﻋﻨﻬﻢ ، ﺧﻠﺖ ﻣﺄﻣﻮﻥ ﺑﻴﺪﻩ ﻭ ﺻﻌﺪﺕ ﺍﻟﺴﻴﺎﺭﺓ ، ﻛﻌﺪﺕ ﻏﺎﺩ ﻋﻨﻲ .. ﺍﻧﺎ ﺻﺪﻳﺖ ﺑﺎﻟﻤﻜﺒﺮﺓ ﻭ ﺍﺳﻤﻊ ﺑﺠﻴﻬﻦ ﻭ ﻧﻌﻴﻬﻦ .
ﺭﺩﺕ ﻋﻴﻨﻲ ﺻﺪﺕ ﺑﺴﺮﺣﺎﻥ ﻭ ﻫﻮ ﻛﺎﺽ ﺑﻮﻟﻴﺪﺓ ﻭ ﻳﺤﺒﺤﺐ ﺑﻴﻪ ﻭ ﺷﺎﻳﻠﻪ ﺍﻋﻠﻰ ﺍﻓﺎﺩﻩ ... ﻇﻠﻴﺖ ﺍﻋﺎﻳﻦ ﺑﻴﻪ
ﺷﻜﺜﺮ ﺟﻨﺖ ﺍﺳﻬﺮ ﺍﻟﻴﺎﻟﻲ ﻭ ﺍﺗﺨﺎﻳﻞ ﻧﻌﺮﺱ ﻭ ﻧﻨﻔﺮﺩ ﺍﺑﻴﺖ ﻭ ﻧﺨﻠﻒ ﻭ ﻳﺼﻴﺮ ﻋﺪﻧﺎ ﺟﻬﺎﻝ ﻭ ﻧﻜﻌﺪﻫﻢ ﺑﻴﻨﺎﺗﻨﺎ ﻭ ﻧﺪﺍﺭﻳﻬﻢ .. ﺗﺎﻟﻲ ﺍﺣﻼﻣﻨﺎ ﺍﺟﺖ ﺍﻋﻠﻯﺮﻭﺳﻨﺎ ﺑﺎﻟﻌﻜﺲ ، ﻭ ﻛﻞ ﻭﺍﺣﺪ ﻣﻨﺎ ﺍﻟﺘﻬﻰ ﺑﻌﺎﻳﻠﺘﻪ ﻭ ﺻﺎﺭ ﻋﺪﻩ ﺑﺰﺭﻳﺔ ﻣﻦ ﻏﻴﺮﻩ .
ﺻﻌﺐ ﺍﻟﺠﺎﻥ ﻣﻠﻜﻚ .. ﺗﻌﺎﻳﻨﻠﻪ ﻭ ﻫﻮ ﻣﻮﺵ ﺍﻟﻚ ، ﻭﻻ ﺍﻟﻚ ﺣﻚ ﺑﻴﻪ ، ﺣﺘﻰ ﻳﻮ ﻛﻠﺒﻚ ﻳﺮﻑ ، ﻣﺠﺒﻮﺭ ﺗﺼﻜﻊ ﺍﻋﻠﻰ ﺍﻟﻜﻠﺐ ﻭ ﺗﺴﻜﺘﻪ ﻭ ﺗﺮﺿﻰ ﺑﺎﻟﻜﺎﺗﺒﻪ ﺍﻟﻨﺼﻴﺐ .
ﺍﺗﻨﻬﺪﻳﺖ ﻭ ﺍﻧﺎ ﺍﺩﻳﺮ ﻋﻨﻪ ، ﺻﺪﻳﺖ ﺑﻤﺮﺗﻪ .. ﻭ ﻫﻲ ﺗﻌﺎﻳﻨﻠﻲ .. ﺩﺭﺕ ﻋﻨﻬﺎ ﻭ ﺍﻧﺎ ﺍﺩﻧﺞ ﻟﺒﺘﻲ ﻭ ﺍﻋﺎﻳﻦ ﺍﻟﻬﺎ .. ﺗﺒﺴﻤﺖ ﺑﻤﻨﻈﺮ ﻭﺟﻴﻬﺎ ﻭ ﻫﻲ ﻧﺎﻳﻤﺔ
ﺷﻠﺖ ﺭﺍﺳﻲ ﻟﺠﻤﺮﺓ ﻭ ﻫﻲ ﺗﺮﺍﺩﺩ ﺑﺴﺮﺣﺎﻥ ﻭ ﺗﻜﻠﻪ : ﺑﺘﻨﺎ ﺍﺣﻠﻰ ﻣﻦ ﺍﺑﻨﻚ ، ﺍﻣﻲ ﺗﻜﻮﻝ ﺗﺸﺒﻬﻨﻲ
ﺳﺮﺣﺎﻥ : ﺷﺴﻤﻴﺘﻮﻫﺎ ؟
- ﺍﺑﻮﻱ ﺳﻤﺎﻫﺎ ﺍﺯﻫﺎﺭ ، ﻟﺠﻦ ﻫﺪﻳﺔ ﺭﺍﺩﺕ ﺍﻣﻨﻴﺔ .. ﺑﺲ ﺍﻧﺎ ﺳﻤﻴﺘﻬﺎ ﻧﻨﻮﺷﺔ
ﺗﺒﺴﻢ ﻭ ﻫﻮ ﻳﻌﺎﻳﻨﻠﻲ .. ، ﺩﺭﺕ ﻣﻨﻪ ﻣﺮﺗﻪ ﺻﺎﺩﻩ ﺑﻴﻪ .. ﺗﻜﺮﺏ ﻫﻮ ﻭﻭﻛﻒ ﺍﻟﻮﻟﺪ ﺑﺎﻟﺴﻴﺎﺭﺓ ﻭ ﻛﺎﻝ ﺍﻟﻬﺎ : ﻫﺎﺝ
ﺗﻨﻬﺪﺕ ﻫﻲ ﻭ ﺷﺎﻟﺖ ﺍﺑﻨﻬﺎ ﻭ ﺩﺍﺭﺕ ﻭﺟﻬﺎ .. ﻭ ﻫﻮ ﺍﻧﺪﺍﺭ ﻭ ﺣﺠﻪ
ﻳﺎﺑﺎ ﻧﺴﻮﺍﻳﻨﻪ ﻣﻦ ﺭﺧﺼﺘﺠﻦ ، ﺑﺴﺠﻦ ﻧﺤﻴﺐ .. ﺳﻮﻥ ﻣﺠﺎﻝ ﻟﺰﻻﻣﻨﺎ ﺧﺎﻃﺮ ﻳﻘﺮﻭﻥ ﺍﻟﻔﺎﺗﺤﺔ ﻭ ﻧﻐﺴﻞ ﻛﺒﻮﺭ ﺍﻫﻠﻨﺎ .
ﻃﻠﻌﻦ ﻣﻦ ﺍﻟﻤﻜﺒﺮﺓ ﻭ ﺩﺧﻠﻮ ﺍﻟﺰﻻﻡ ﻟﻠﻤﻜﺒﺮﺓ .. ﺻﻌﺪﻥ ﻟﻠﺴﻴﺎﺭﺓ .. ﻭﻛﻌﺪﻥ .. ﻛﻌﺪﺕ ﺍﻣﻲ ﺟﺪﺍﻣﻲ : ﻛﻮﻥ ﺗﺤﺮﻛﺘﻲ ؟
- ﻣﺎ ﺗﺤﺮﻛﻴﺖ
- ﻋﻔﻴﺔ ﺑﺘﻲ
ﺯﺍﺭﻭﺍ .. ﻭ ﻛﻤﻠﻮ ﻭﻃﻠﻌﻨﺎ ﻟﻼﻣﺎﻡ ﻋﻠﻲ ..
ﺍﻧﺎ ﻧﺠﺴﺔ ﻣﺎ ﻃﺎﻟﻌﺔ ﺍﻻﺭﺑﻌﻴﻦ ﻓﻤﺎ ﻳﺼﻴﺮ ﺍﺩﺷﻦ ﺍﻟﺤﻀﺮﺓ ﻣﺎﻟﺖ ﺍﻻﻣﺎﻡ، ﻓﺮﺷﻨﺎ ﻓﺮﺍﺵ ﻭﻛﻌﺪﻧﺎ ، ﺧﻠﻮ ﻏﺮﻳﻀﺎﺗﻬﻢ ﻳﻤﻲ ﻭ ﻣﺸﻮ ..
ﻇﻠﺖ ﺑﺲ ﺟﻤﺎﺭﺓ ﻛﺎﺿﺔ ﺍﻟﺒﺖ ﻭ ﺗﻤﺸﻲ ﺑﻴﻬﺎ ﻣﻨﺎ ﻭ ﺗﺠﻲ ﻣﻨﺎ .. ﺍﻧﺪﺍﺭﻳﺖ ﺳﺮﺣﺎﻥ ﻛﺎﻋﺪ ﻟﻴﻐﺎﺩ ﻋﻨﻲ .. ﻭﺧﻨﺠﺮ ﻭ ﺍﺧﻮﻩ ﻛﺮﻳﻢ ﻭﺍﻛﻔﻴﻦ ﻋﺪ ﺭﺍﺳﻪ .
ﺣﺠﻪ : ﻋﻠﻴﺶ ﻣﺎ ﺍﺩﺷﻮﻥ ؟
ﻛﺮﻳﻢ : ﺍﻧﺎ ﺷﺎﺭﺏ ﻛﺒﻞ ﻳﻮﻣﻴﻦ ﺍﺧﺎﻓﻦ ﺍﺩﺧﻞ ﺣﻀﺮﺗﻪ .
ﺍﻧﺪﺍﺭ ﻟﺨﻨﺠﺮ .. ﻭﺍﻧﺖ
ﺧﻨﺠﺮ ﺩﺍﻳﺮ ﻭﺟﻬﻪ ﻣﺴﻮﻱ ﺭﻭﺣﻪ ﻣﺎ ﻣﺮﻛﺰ ﻭﻳﺎﻫﻢ ، ﺻﺎﺡ ﺳﺮﺣﺎﻥ : ﺧﺎﻳﺐ ﻫﻮﻭﻭ
- ﻫﺎﺍﺍﺍ ﻭﻳﺎﻱ
- ﻻ ﻭﻳﺎ ﺧﻴﺎﻟﻚ ، ﻣﺎ ﺗﻔﻮﺕ ﺗﺰﻭﺭ
- ﺍﻧﺎ .. ﺍﺍﺍﺍﺍ ﺍﻱ ﺍﻱ ﺍﺯﻭﺭ ﺍﻥ ﺷﺎﺀﺍﻟﻠﻪ .
- ﺍﻋﺘﺮﻑ ﺍﻣﺰﻣﺰ ؟
- ﻋﻠﻲ ﻃﺎﻫﺮ ﺑﻄﻬﺮ ﺍﻟﺼﻼﺓ .. ﻭﺍﻧﺎ ﺍﺧﺎﻓﻦ ﺍﺩﺷﻦ ﺣﻀﺮﺗﻪ ﻭﺍﺗﻜﺮﺏ ﻣﻨﻪ .
- ﻛﻮﻝ ﺷﻤﺴﻮﻱ ﻭ ﺧﺎﻳﻒ ﻣﻦ ﺩﺷﺖ ﺍﻟﺤﻀﺮﺓ
- ﺍﺍﺍﺍﺍﺍﺍ ﺍﺧﻮﻙ ﺍﻧﺎ ، ﺷﻤﺴﻮﻱ
- ﻫﻮ ﻣﻦ ﻛﻮﻧﻚ ﺍﺧﻮﻱ ﺍﻋﺮﻓﻨﻚ
- ﺟﺎ ﻏﻠﺲ ﻋﻠﻲ ﺭﺣﻤﺔ ﻟﻮﺍﻟﺪﻳﻚ
ﺍﻧﺪﺍﺭ ﻭﻫﻮ ﻳﺤﺎﻭﻝ ﻳﺨﻔﻲ ﺑﺴﻤﺘﻪ .. ﺣﺠﻪ ﻛﺮﻳﻢ : ﺟﺎ ﺍﻧﺖ ﻋﻠﻴﺶ ﻣﺎ ﺍﺩﺵ ، ﻻ ﻳﻜﻮﻥ ﺍﻧﺖ ﻫﻢ ﻣﺘﻮﺭﻁ
ﺧﻨﺠﺮ : ﺍﻱ ﺍﻱ ﻣﺘﻮﺭﻁ ، ﻟﺠﻦ ﻣﻮﺵ ﻣﺜﻞ ﻭﺭﻃﺘﻨﺎ
.. ﻭ ﻳﺄﺷﺮﻟﻪ ﺑﺮﺍﺳﻪ ﻭ ﻋﻴﻮﻧﻪ ، ﺣﺠﻪ ﻛﺮﻳﻢ : ﻫﺎﺍﺍﺍﺍﺍﺍﺍﺍ ﻃﺨﺖ .
ﺳﺮﺣﺎﻥ : ﻣﻴﻠﻮ ﻋﻨﻲ ﻻ ﺍﻃﺦ ﺭﻭﺳﻜﻢ ﺑﺎﻟﺤﺎﻳﻂ .. ﻭﻟﻮ
ﺍﻧﺪﺍﺭﻭﺍ ﻭﻛﻞ ﻭﺍﺣﺪ ﺑﻴﻬﻢ ﻳﺤﺎﻭﻝ ﻳﺨﻔﻲ ﺿﺤﻜﺘﻪ ، ﺧﺎﻓﻦ ﻳﺸﻮﻓﻮﻧﻬﻢ ﺍﻟﻨﺎﺱ ﻭﻳﺴﺘﻘﺪﻭﻧﻬﻢ .. ﺍﻧﺪﺍﺭ ﺳﺮﺣﺎﻥ ﻭ ﺍﻧﺎ ﺧﺎﻃﺔ ﺍﻳﺪﻱ ﻋﻠﻰ ﺍﻟﺠﻨﻄﺔ ﻭ ﺍﻋﺎﻳﻦ ﻟﻴﻬﻢ ﻭ ﻟﺠﻤﺎﺭﺓ ﺷﺎﻳﻠﺔ ﺑﺘﻲ
- ﺷﻠﻮﻧﺞ ﻳﻬﺪﻭﺓ
- ﻛﻮﺍﻛﺔ
- ﺍﻫﻴﺴﻨﺞ ﻣﺘﻀﺎﻳﻜﺔ ، ﻫﻜﻮ ﺷﻲ
- ﻻ ﺑﺎﻟﻌﻜﺲ ﺑﺤﻀﺮﺓ ﺍﻻﻣﻴﺮ ﺍﻟﻨﻔﻮﺱ ﺗﺮﺗﻊ ﻣﺎ ﺑﻴﺎﺵ ﺷﻲ .
- ﻣﺎ ﺍﺷﻮﻓﻦ ﺍﺭﺳﻮﻣﺞ ﺫﻳﺞ ﻭﻻ ﻟﻤﻌﺔ ﻋﻴﻮﻧﺞ ﻭﻟﻬﻴﺒﻬﻦ .
- ﺗﺒﺴﻤﺖ ﺑﺄﺳﺘﻬﺰﺍﺀ .... ﻟﻬﻔﺘﻲ ﻭ ﺿﺤﻜﺘﻲ ﻭﻟﻮﻧﻲ ﻛﻠﻬﻦ ﺫﺑﻴﺘﻬﻦ ﻭﻳﺎ ﺷﻌﺮﻱ ﺍﻟﻜﺼﻴﺘﻪ ﻭ ﺍﻇﻨﻨﻪ ﻭﺻﻞ ﻟﻴﻚ .
ﻫﺰ ﺭﺍﺳﻪ ﻭ ﺩﻧﻚ .. ، ﺭﺩ ﺭﻓﻊ ﺭﺍﺳﻪ ﻭ ﻫﻮ ﻳﻌﺎﻳﻦ ﻟﻠﻜﺒﺔ : ﺑﻨﻔﺲ ﺫﺍﻙ ﺍﻟﻴﻮﻡ ﺍﻟﺬﺑﻴﺘﻲ ﺍﻟﻜﺼﺎﻳﺐ ﺑﻴﻬﻦ ، ﺗﻌﻨﻴﺖ ﻣﻬﻀﻮﻡ ﻭﺟﻴﺖ ﻟﻴﺠﺎﻱ ﺷﭽﺎﻱ
- ﻋﻠﻴﺶ ﺗﺸﻜﻲ ﻭﺍﻧﺖ ﺍﻟﺠﻨﺎﻱ ؟
- ﺣﻜﺞ ﺑﺎﻟﺘﻜﻮﻟﻴﻨﻪ، ﻟﺠﻦ ﺍﻟﻠﻪ ﻭﺣﺪﻩ ﻳﻌﻠﻢ ﺑﺎﻟﺤﺎﻝ ﻭﻛﻞ ﻫﺎﻟﺤﺠﻲ ﻣﺎ ﻳﻨﻔﻊ ، ﺍﻳﺎﻣﻨﺎ ﺫﻳﺞ ﺍﻳﺎﻡ ﻏﻮﻯ ﻭ ﻛﻞ ﻭﺣﻴﺪ ﺑﻴﻨﺎ ﺷﺎﻑ ﺍﻟﻴﻨﺎﺳﺒﻪ ﺍﻋﻠﻰ ﻛﻮﻟﺘﻚ ﻭﺍﻧﺎ ﻣﺎ ﻧﺎﺳﺒﻨﻲ ﻏﻴﺮ ﺍﻟﻬﻢ ﻭ ﺍﻟﻘﻬﺮ .. ﻭ ﺑﺎﻟﻌﺎﻓﻴﺔ ﺍﻋﻠﻴﻚ ﻗﺼﺮﻙ ﻭ ﻋﺎﻳﻠﺘﻚ ﻭ ﺍﺑﻨﻚ ، ﺟﺎ ﻭﻟﻮﻥ ﺣﻠﻔﻴﺖ ﺑﺎﻟﻌﺒﺎﺱ .. ﺍﻟﻌﺸﺮﺓ ﻣﺎ ﺍﻟﻬﺎ ﺣﻮﺑﺔ
ﻇﻞ ﺳﺎﻛﺖ ﻣﺎ ﺭﺩ .. ﻫﻴﺴﻴﺘﻪ ﻛﻠﺶ ﺍﻏﺘﺎﺽ ، ﻛﺎﻡ ﻣﺠﺎﻧﻪ
ﻭﺍﻧﺎ ﺩﺭﺕ ﻭﺟﻬﻲ .. ﺭﺍﺡ ﺩﺧﻞ ﺟﻮﺍ ﻳﺰﻭﺭ ، ﺍﺟﺖ ﺍﻣﻲ ، ﻭ ﻃﻠﻌﺖ ﺍﻟﻨﺎ ﺍﻻﻛﻞ ﺍﻟﻤﺴﻮﻳﺘﻪ ، ﻭﻛﻞ ﻋﺎﻳﻠﺔ ﻃﻠﻌﺖ ﺍﻟﺠﺎﻳﺒﻴﻨﻪ ﻭ ﻟﻤﻴﻨﺎ ﺍﻻﻛﻞ ﻭ ﻛﻌﺪﻧﺎ ﻧﺎﻛﻞ .
ﻃﻠﻊ ﺳﺮﺣﺎﻥ ﻣﻦ ﺍﻻﻣﺎﻡ ﺑﺲ ﺣﻴﻞ ﻣﺘﻀﺎﻳﻚ ، ﻣﺮﺗﻪ ﻋﻴﻨﻬﺎ ﻋﻠﻴﻪ ، ﻫﻮ ﻳﺪﻳﺮ ﻋﻴﻨﻪ ﻋﻠﻲ ﻭ ﻳﺪﻳﺮﻫﺎ ﻳﺘﻨﻬﺪ ﻭﺑﻴﻨﺖ ﻣﻼﻣﺢ ﺍﻟﻌﺼﺒﻴﻪ ﺍﻋﻠﻰ ﺍﺭﺳﻮﻣﻪ .
ﺣﺠﺖ ﻣﺮﺗﻪ ﻭ ﺣﻄﺖ ﺍﺑﻨﻬﺎ ﻭ ﻛﺎﻟﺘﻠﻪ : ﺷﻴﻠﻪ ﻋﻨﻲ ﺷﻮﺍﻱ
ﺍﻧﺪﺍﺭ ﺍﻟﻬﺎ ﻳﻌﺎﻳﻦ ، ﺭﺩﺕ ﺣﺠﺖ : ﺍﺧﺘﻨﻜﺖ ﻭ ﻫﻮ ﻛﺎﻋﺪ ﺑﺤﻀﻨﻲ ، ﺑﻄﻨﻲ ﺍﺫﺗﻨﻲ .. ﺍﺣﺠﻲ ﻭﻳﺎﻙ ﺷﻴﻠﻪ ﻋﻨﻲ ﺷﻮﺍﻱ
ﻇﻞ ﻣﺮﻛﺰ ﺑﻴﻬﺎ ﺑﻌﺼﺒﻴﻪ ، ﺍﻧﺪﺍﺭﺕ ﻫﻲ ﺑﺲ ﺍﻏﺘﺎﺿﺖ ﻭ ﺧﻠﺖ ﺍﺑﻨﻬﺎ ﺑﺤﻀﻨﻬﺎ ﻭ ﺩﻓﻌﺖ ﺍﻟﺰﺍﺩ ﻋﻨﻬﺎ ، ﺣﺠﺖ ﺍﻣﻲ : ﺟﻴﺒﻲ ﻋﻨﺞ ﻳﻤﻪ ﻭ ﺍﻛﻠﻲ
- ﻻ ﻋﻤﻪ ﺑﺎﻟﻌﺎﻓﻴﺔ ﺟﺎﻱ ﺍﻫﻮﺩﻟﻪ ﻫﻠﺒﺖ ﻳﻨﺎﻡ
- ﺍﻧﺎ ﺍﻫﻮﺩ ﺍﻋﻠﻴﻪ ، ﺍﻛﻠﻲ
ﺟﺮﺗﻪ ﻣﻨﻬﺎ ﺗﻬﻮﺩ ﺍﻋﻠﻴﻪ ، ﺍﻧﺎ ﺩﺭﺕ ﻇﻬﺮﻱ ﻋﻨﻬﻢ ﻭ ﺧﻠﻴﺖ ﺑﺘﻲ ﺑﺤﻀﻨﻲ ﻭ ﻧﺰﻟﻴﺖ ﻋﺒﺎﺗﻲ ﻭ ﻛﻌﺪﺕ ﺍﺭﺿﻌﻨﻬﺎ .
ﺍﻟﺘﻔﺘﺖ ﻟﺮﺍﺩﻳﻮﻥ ﺟﻮﻳﻌﺪﺓ ، ﻭﺧﺸﻤﻬﺎ ﺍﺣﻤﺮ ﻭ ﻋﻴﻮﻧﻬﺎ ﻣﻮﺭﻣﺎﺕ ﻣﻦ ﺍﻟﺒﺠﻲ .. ﻭﻛﻮﻩ ﻣﻔﺘﺤﺘﻬﻦ ﻭ ﺗﻌﺎﻳﻦ ﻟﺨﻨﺠﺮ ﻭﻫﻮ ﻭﺍﻛﻒ ﻟﻴﻐﺎﺩ ، ﻛﻞ ﺳﺎﻉ ﻳﺪﻳﺮ ﺍﻟﻌﻴﻦ ﻭ ﻳﻌﺎﻳﻦ ﺍﻟﻬﺎ .
- ﺧﻠﻲ ﺍﻣﻠﺞ ﺑﺎﻟﻠﻪ ﺟﺒﻴﺮ
ﺍﻧﺪﺍﺭﺗﻠﻲ ، ﻭ ﻫﺰﺕ ﺭﺍﺳﻬﺎ : ﺍﻟﻠﻪ ﻛﺮﻳﻢ
- ﺍﺗﻐﺪﻱ
- ﻣﺎ ﺍﺷﺘﻬﻲ ﺍﻟﺰﺍﺩ
- ﻫﻢ ﺣﺠﻴﺘﻲ ﻭﻳﺎﻩ
- ﺟﻠﻤﺘﻴﻦ ﻉ ﺍﻟﻤﺎﺷﻲ .. ﻛﺎﻟﻲ ﻣﺸﺘﺎﻛﻠﺢ ﻭ ﻛﺴﺮ ﻛﻠﺒﻲ ﺻﻴﺎﺣﺞ .. ﻭ ﺍﻧﺎ ﺷﻜﻴﺘﻠﻪ ﺣﺎﻟﻲ .. ﻭﺩﺭﺕ ﻋﻨﻪ
- ﻻ ﺗﺨﺎﻓﻴﻦ ﺩﺍﻡ ﺳﺮﺣﺎﻥ ﻭﺍﻛﻔﻠﺞ ﺗﻄﻤﻨﻲ .
ﺗﻨﻬﺪﺕ ﻭﺭﺩﺕ ﺗﻌﺎﻳﻦ ﻟﺒﺘﻲ : ﺳﻤﺎﻫﺎ ﺳﺮﺣﺎﻥ ﺍﻣﻨﻴﺔ ﻣﻮﺵ ﻳﻮ ﻻﻟﻪ
- ﺍﻱ
- ﻭ ﻇﻠﻴﺘﻲ ﺍﻋﻠﻰ ﺍﻷﺳﻢ
- ﺑﺘﺞ ﻣﺤﺖ ﺍﻟﺒﻜﻠﺒﺞ ﻟﻮ ﺍﻟﻜﻠﺐ ﻫﻮ ﻫﻮ
- ﺍﻟﻴﻨﻜﺖ ﺍﻋﻠﻰ ﺍﻟﺤﺠﺮ ﺻﻌﺐ ﻳﻨﻤﺤﻲ ﻳﺮﺍﺩﻳﻮﻥ
- ﺍﻟﻠﻪ ﻳﻌﻴﻦ ﻛﻠﺒﺞ .
- ﺍﻧﺸﺪﻧﺞ ﺷﺤﺎﻟﻪ ﻭﻱ ﻣﺮﺗﻪ ، ﻛﺴﺮﺕ ﺧﺎﻃﺮﻱ ﻫﻴﺴﻴﺘﻬﺎ ﺗﻐﺎﺭ ﻋﻠﻴﻪ ﻭ ﻫﻮ ﺑﺎﺭﺩ ﻭﻳﺎﻫﺎ .
- ﻣﻮﺵ ﺑﺎﺭﺩ .. ﻛﻮﻟﻲ ﺛﻠﺞ
- ﻋﻠﻴﺶ
- ﻫﻮ ﺍﻧﺠﺒﺮ ﺑﻴﻬﺎ .. ﻭ ﺍﺑﻮﻱ ﺑﻤﺮﺿﻪ ﺣﻠﻔﻪ ﻳﺘﻤﻢ ﺯﻭﺍﺟﻪ ﻭﻳﺎﻫﺎ ﻭ ﻳﻤﺸﻲ ﺣﻴﺎﺗﻪ ﻭ ﺑﺲ ﻟﺨﺎﻃﺮ ﺍﺑﻮﻱ ﻋﺎﺷﺮﻫﺎ ، ﺑﺲ ﺗﺤﺴﻴﻨﻬﻢ ﻣﻮﺵ ﺍﺛﻨﻴﻦ ﻣﺘﺰﻭﺟﻴﻦ .. ﺟﻠﻤﺘﻪ ﻭﻳﺎﻫﺎ ﻉ ﺍﻟﻤﺎﺷﻲ .. ﻣﺎ ﻓﺪ ﻳﻮﻡ ﺷﻔﺘﻪ ﻛﻌﺪ ﻭﻳﺎﻫﺎ ﻳﻮ ﺿﺤﻚ .. ﺣﺎﺳﺒﻬﺎ ﺟﻦ ﺑﺖ ﻣﻦ ﺍﻟﻘﺼﺮ ﻣﻮﺵ ﻣﺮﺗﻪ ، ﺑﺲ ﻫﻲ ﺗﺤﺒﻪ ، ﻭﻣﻮﺵ ﺷﻮﻳﻪ ، ﺣﻴﻞ ﺗﺤﺒﻪ .
- ﻫﻢ ﺗﻮﻫﺪﻧﺖ ﺑﻴﻪ
- ﻋﻴﺸﺔ ﺍﻫﻠﻬﺎ ﺍﺻﻌﺐ ﻣﻦ ﻋﻴﺸﺘﻬﺎ ﻭﻳﺎﻩ ، ﺧﻮﺍﺗﻬﺎ ﺑﺎﻟﻀﻴﻢ ﻳﺎ ﺣﺎﻟﻬﻦ .. ﺑﺎﻟﻨﺴﺒﺔ ﺍﻟﻬﻦ ﻫﻲ ﻋﺎﻳﺸﺔ ﺑﺎﻟﺠﻨﺔ ﺑﺲ ﻳﺎ ﺟﻨﻪ ﻫﺎﻱ ﺍﻟﻤﺎ ﺑﻴﻬﺎ ﻣﺸﺎﻋﺮ ﻭ ﺍﻻﺭﻭﺍﺡ ﻣﻴﺘﻪ .
- ﺍﻟﻠﻪ ﻳﻌﻴﻨﻬﺎ ، ﻋﻔﻴﺔ ﺩﻧﻴﺎ ﻣﺎﻣﺶ ﺍﺣﺪ ﺑﻴﻬﺎ ﻣﺮﺗﺎﺡ .
- ﺍﻟﺤﻤﺪ ﻟﻠﻪ ﻭ ﺍﻟﺸﻜﺮ ﺍﻋﻠﻰ ﻛﻞ ﺣﺎﻝ .
- ﻭﺍﻟﺨﺎﺗﻮﻥ
- ﻛﻠﺶ ﻣﺮﻳﻀﺔ ، ﺑﺲ ﺭﻭﺡ ﻇﻠﺖ ﻋﻤﺘﻲ ﺻﺒﻴﺤﺔ ﻭ ﺑﺘﻬﺎ ﻭﻳﺎﻫﺎ
- ﺍﺣﺒﻨﻬﺎ ﻣﻜﺮﻭﺩﺓ
- ﺷﺘﺴﻮﻱ .
ﻛﻤﺖ ﺍﻋﺎﻳﻦ ﺍﻋﻠﻴﻬﻢ ﻭ ﺍﻋﻠﻰ ﺳﻮﺍﻟﻔﻬﻢ ، ﻭ ﻋﻴﻨﻲ ﺗﺮﺩ ﺗﺼﺪ ﺑﺴﺮﺣﺎﻥ ﻭﺍﻛﻒ ﻭﺣﺬﺍﻩ ﺭﺣﻴﻢ ﻭ ﺣﻤﻴﺪ ﻭ ﺧﻨﺠﺮ ﻭ ﻛﺮﻳﻢ ﻭﻭﺍﻛﻔﻴﻦ ﻳﺤﺠﻮﻥ .
ﺻﺪ ﺍﻋﻠﻴﻪ ، ﺩﺭﺕ ﻋﻨﻪ .. ﻣﺎ ﺍﺭﻳﺪﻥ ﺍﺿﺎﻳﻚ ﻣﺮﺗﻪ ﻣﻜﺮﻭﺩﺓ .
........
ﺳﻠﻄﺎﻥ : ﺷﻨﻬﻲ ﺍﻟﺮﺍﻱ ؟
ﻧﻌﻤﺔ : ﻫﻢ ﻭﺍﻋﺪﻭﻧﺎ ﺗﺨﻠﺺ ﺍﻷﺭﺑﻌﻴﻦ ﻭ ﻳﻨﻄﻮﻧﺎ ﺍﻟﺒﺖ ﻟﺠﻦ ﺳﺮﺣﺎﻥ ﻋﺎﺻﻲ ﺑﻴﻬﺎ ﻭ ﺧﺎﻟﻬﺎ ﺍﺑﻴﺘﻪ .
- ﻭ ﻳﻮ ﻣﺎ ﺭﺿﻰ ﻳﻨﻄﻴﻬﺎ ؟
- ﻳﺘﻜﺎﻭﻡ ﻫﻮ ﻭﺯﻧﺎﺩ .. ﺯﻧﺎﺩ ﻧﺎﻃﺮﻫﺎ ﻧﻄﺮﻩ ﻳﺘﻜﺎﻭﻡ ﻭﻳﺎﻩ ﻣﻦ ﻛﻮﻥ ﺷﻴﺦ ﺍﻝ ﻣﻨﻌﻢ ﻭ ﺷﻴﺦ ﺍﻝ ﻣﻄﺸﺮ ﻭﺻﻠﺘﻬﻢ ﻭﻳﺎ ﺳﺮﺣﺎﻥ .. ﻭﻭﺟﻮﺩﻩ ﺑﺎﻟﻤﻀﻴﻒ ﻣﻀﺎﻳﻚ ﺳﺮﺣﺎﻥ ، ﻭ ﺍﻇﻨﻦ ﻳﺘﻜﺎﻭﻣﻮﻥ ﻭ ﻳﻄﺮﺩﻩ ﻣﻦ ﺍﻟﻌﺸﻴﺮﺓ
- ﻧﻨﻄﺮ ﻭﻧﺸﻮﻑ ﻭﻳﻦ ﺗﺼﻞ .. ﻭ ﻳﻮ ﺯﻧﺎﺩ ﺭﺩ ﺑﺠﻠﻤﺘﻪ ﺫﻳﺞ ﺍﻟﺴﺎﻋﺔ ﻧﺪﺧﻞ ، ﻫﺴﺎﻋﻬﻢ ﺧﻞ ﻧﺎﺭﻫﻢ ﺑﻴﻨﻬﻢ ﻭ ﺍﺣﻨﺎ ﻣﻦ ﺍﺑﻌﻴﻦ ﻧﺪﻓﻰ ﺍﻋﻠﻰ ﺍﻟﻬﻴﺒﻬﺎ .
ﺩﺵ ﺟﺴﺎﻡ ، ﺻﺎﺡ ﺳﻠﻄﺎﻥ : ﻳﺎ ﻫﻼ ﻭﻣﺮﺣﺒﺎﺍﺍﺍﺍﺍ ... ﻭﻳﻨﻚ ﺑﻮﻳﻪ
- ﻣﻮﺟﻮﺩ
- ﺍﻧﺎ ﻗﺮﺭﻳﺖ ﺍﺯﻭﺟﻨﻚ
- ﺑﻮﻳﻪ ﺍﻧﺖ ﺗﻌﺮﻓﻨﻲ ﺍﻧﺎ ﺍﻟﻌﺮﺱ ﻣﺎ ﺍﻫﻮﺍﻩ .. ﺧﻠﻨﻲ ﺧﺎﻟﻲ ﻣﺨﺘﻠﻲ .
- ﺍﻟﺒﺖ ﺍﻟﺮﺍﻳﺪﻫﺎ ﺍﻟﻚ ﻣﻮﺵ ﻛﻞ ﺑﺖ
- ﻳﺎﻫﻲ ؟
- ﺑﺖ ﺍﻟﺸﻴﺦ ﻣﻄﺮ
- ﺍﻻﻋﺮﻓﻨﻪ ﻋﻨﻬﺎ ﺧﺎﻃﺒﻬﺎ ﻭﺍﺣﺪ ﺍﺳﻤﻪ ﺧﻨﺠﺮ ﻭ ﺍﻟﺸﻴﺦ ﺍﻋﻠﻰ ﻋﻬﺪﻩ ﻣﻨﻄﻴﻬﺎ .
- ﻭ ﺍﻧﺖ ﺷﻌﺮﻓﻚ ﺑﻬﺎﻻﻣﻮﺭ ؟
- ﻫﻴﺞ ﺳﻤﻌﺖ
- ﻫﻴﺞ ﺧﺒﺮ ﻣﺎ ﻣﻄﺸﻮﺵ ﺑﺎﻟﺪﻳﺮﺓ ﻭﻻ ﺍﻟﻮﺍﺩﻡ ﺗﻌﻠﻢ ﺑﻴﻪ ﻭ ﻣﺎ ﻳﻌﺮﻓﻪ ﺍﻻ ﺍﻟﻤﺪﻭﺭ ﻋﻨﻪ .
ﺗﻨﻬﺪ ﺟﺴﺎﻡ : ﺑﻜﻞ ﺍﻻﺣﻮﺍﻝ ﺍﻟﺒﺖ ﻣﺨﻄﻮﺑﺔ
- ﻋﺎﺷﻜﻬﺎ ﻳﺒﻦ ﺍﻝ ﺛﺠﻴﻞ ؟
ﺍﻧﺪﺍﺭ ﻻﺑﻮﻩ ﻭ ﻫﻮ ﻳﻤﺲ ﺍﻋﻠﻰ ﻟﺤﻴﺘﻪ ، ﺿﺤﻚ ﺳﻠﻄﺎﻥ ﺑﺼﻮﺕ ﻋﺎﻟﻲ : ﻭﺍﻟﻠﻪ ﻭ ﺍﺑﻨﻲ ﻋﺎﺷﻚ ﺑﺖ ﻣﻄﺮ ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ، ﻣﻦ ﻳﻤﺘﻰ ﻭﻟﻚ ﻋﺎﺷﻜﻬﺎ ؟
- ﻫﺎﻻﻣﺮ ﻣﺎ ﻳﻔﺮﻙ ﺑﺸﻲ ، ﺍﻟﺒﺖ ﻣﺨﻄﻮﺑﺔ
ﻛﺮﺏ ﻣﻨﻪ ﻭ ﻛﺾ ﺭﺍﺱ ﺍﺑﻨﻪ ﻭ ﻛﺮﺑﻪ ﻟﻴﻪ -: ﺍﺑﻦ ﺳﻠﻄﺎﻥ ﻳﺄﻣﺮ ﻭ ﺍﻛﺒﺮ ﺑﺖ ﺑﺎﻟﻌﺸﻴﺮﺓ ﺗﺼﻴﺮ ﺣﺪﺭ ﺍﺟﺪﺍﻣﻪ ... ﻓﻬﻤﺖ ﻳﻮﻟﻴﺪﻱ؟ ......
