رواية لأني عاقر الفصل السادس والأربعون بقلم مريم خفاجة
و شكد حلوة مني ميت مخليك
و مو بس ما أحبك ما أتشرف بيك
أكدر أختفي من عيونك و أرتاح
بس يعجبني هيچ تراقب مخليك..
...
غيث:-يعني ولاء مرت الگـ*** كمال؟
هزيت راسي بـ اي
غيث:-اني اعلمهم اذا ما اخيسة بالسجون هو ومرتة اطلع نغل ابن نغل
ضحكت:-هو انت سويت مثلة قابل شنو فرقك عنة؟
سكت باوعتلة ورفعت حاجبي
وذبيت نفس:-راح اصعد اسبح دير بالك عليّ
غيث:-روحي
عفتة وگمت لفوك اخذت ملابسي
ودخلت للحمام بقيت جوة الماي احس جسمي
استراح واعضامي هدن
حطيت راسي ؏ الحايط واني افكر
بكل الأمور شنو الحل؟
مسحت المي من راسي
وگمت فززني صوت بجي!
ولأول مرة ينسمع بنص بيتي
صوت طفل؟
وهالطفل مُجبرة أربي اني
گلبي يفز ويا كل صرخة منة
واني صافنة بالفراغ
معقولة انت التمنيتك؟
بدلت بسرعة بسرعة واني
مستعجلة!
نزلت اركض وغيث لازمة
ويفتر بي همست:-شبي؟
غيث:-انة ادري يبجي
ملاك:-جايب حليب؟
غيث:-اي تعرفين تسوين؟
باوعت لعيونة وهزيت راسي بـ لا
ورحت للمطبخ بيدي تلفوني
دگيت ؏ ريم واطرافي كلها ترجف
شالتة گالت:-الو ها ملوكة
ملاك:-هلو ريم اگلج عبدالله يبجي شون اسوي الحليب؟
ريم:-يا عبدالله؟
تمتمت:-ابن زينب
ريم:-ها باعي افتحي السبيكر
فتحتة وهي تگلي شسوي وشگد
احط حليب وشلون الماي ادفي كملت وهزيتها
حيل حتى يندمج كلة سوة
رحت يمة وگلت:-هاي الحليب
غيث:-شربي انتي اني ماعرف
ملاك:-خاف يغص
غيث:-مادري تعاي اگعدي وخلي بحضنج
ملاك:-خو انت اگعد وخلي بحضنك واني اشربة
غيث:-لا اني تعبان انتي خلي
ملاك:-يوگع ماعرف
غيث:-تعرفين مايرادلها شي بس خلي بحضنج
ملاك:-باوع هو انت عادي نام بس ضل لازمة
غيث:-بابا لاتصيرين مدري شلونج حطي
وخلي الممة بحلگة ومن يكمل ويسكت
حطي بمكانة
ملاك:-يلا
گعدت واني جسمي ينكث
راد يخلي شلت رجلية:-هاي شبيج
ملاك:-يوگع خلي اگعد بالگاع
تربعت بالگاع
وهو خلاه بحضني جسمي سارت بي
رعشة غريبة راح اگدر اربيك؟
خليت الممة على كيف بحلگة
وغيث واگف فوك راسي
واني حاطة ايدي جوة راسة واشربة الحليب
وخايفة لا يغص لو ينجوي
بحيث اخليها شوية وارجع ابعدها
وهو يبجي ماعرفت شلون اسكتة
لحد ما كملت الممة ضل يرضع
بيها وهي فارغة نزلن دموعي
جوعان يبعد أمك؟
وتريد صدرها؟ بس هي ماكو منين اجيبلك
ملاك:-جوعان بعدة
غيث:-اسويلة بعد؟
ملاك:-لا تگول يتخربط خابرلي ريم
خلي تجي
خابرها وصدك شوية واجت
وهو يفتر بي بالصالة واني امشي وراه
ريم:-ها ملاك
ملاك:-مايسكت
ريم:-انطينياه
اخذتة من غيث صحت:-مو هيج لاتلزمي منا
ريم:-عادي ولج شبيك حبيبي شو باوعلي
رفعته لفوك تقيأ عليها
ركضت جبت كلنس ومسحت المكان
وهو يفرفح وحهه صار
احمر واختنك
ملاك:-والله شربتة ؏ كيفي
ريم:-جوعان هسة اني ارضعة
ملاك:-شلون يصير؟
ريم:-لا عادي حُبي
اخذتها لغرفة زينب
باوعت لأرجائها وسكتت وگعدت ؏ الجرباية
وهو بحضنها طلعت صدرها الة
وهو سحبة بسرعة وضل يرضع
ويطلع صوت برضاعتة
مسحت دمعتي الوگعت عليّ
وهي ترضع بي ضحكت وباوعتلي:-يمة شلون يرضع
ابتسمت:-جوعان صارلة 3 ايام بالمستشفى
ريم:-خطية سودة بوحهي
ملاك:-يعني هسة يسكت
ريم:-اي شوفي نام بس خلي يشبع
ملاك:-شلون يعرف هذا الحليب يختلف عن ذاك
ضحكت:-يعرف شلون مايعرف
ملاك:-هو ما ضايك حليب امة شلون يفرق
ريم:-حبيبي يحس نفسة ما شبعان
ولو تنطينة ممات الدنيا كلها مايشبع الة بصدر امة
واكو لا عادي
واكو حتى ميتقبلون صدر امهاتهم
بس يمكن هوَ يحب صدر الأم بعد ماعرف
ملاك:-لعد شلون؟
ريم:-عادي اني قريبة شنو السالفة اجي وارضعة
ملاك:-تضلين كل ساع
ريم:-عادي يمعودة حتى لو اجيبة يمي
او افرغلة بممة اترسها ورضعي انتي
ملاك:-اي هيج احسن
رفعت عيونها مبتسمة:-شلتي؟
ملاك:-بس شوية
ريم:-هسة تتعودين عليّ
ملاك:-مادري احس ماجاي اگدرلة
ريم:-تردين تربي لو تنطي لأهل أمة؟
حطيت راسي بين ادية وهمست:-مادري
مادري
ريم:-الله كريم هسة خلي تفض هالهوسة
ولك شو انت اخذك الواهس كااافي
ضحكت بحزن وهي
رجعت تدردم عليّ:-يااا يمعود ورمت صدري
خرب شبقيت لجود ولقيسس لككك
ضربت ايدها وگلت:-عوفي قيس ولج رضعي
الطفل
ضحكت:-عووف لأبني شگد خبيث
ابتسمت:-همزين ابنج بگدة جان تورطنة
ريم:-اي والنبي همزين
سكتت وهو يرضع لحد ما هي بعدت
حركة وهو ضل فاتح حلگة ونايم
ضحكت ريم ومسدت ؏ شعرة
الأشگر:-نسخة من زينب
ملاك:-اي يشبهه كلش
ريم:-خاف يفز تعاي شيلي
ملاك:-لا يمة اخاف
ريم:-صخام بوجهج
شالتة فز وضل يبجي
حطتة ؏ الجرباية وضلت تدگدگلة لحد مارجع
غفة:-يعني اذا يبجي هيج اسويلة
ريم:-اي ضلي يمة لاتعوفي
ضليت گاعدة يمة وهي راحت
حتى اخاف الزمة لو اعدل نومتة خاف يگعد
وضليت ؏ كعدتي اغفي
واتثاوب بس ماگدىت اعوفة وانام
دخل للغرفة وگال:-ها نام؟
ملاك:-اي
غيث:-نامي
ملاك:-يگعد
غيث:-اني کاعد هنا
هزيت راسي
وصرت بصفة بس ؏ كيف
وغفيت بسرعة
ماكو نص ساعة
وگام يبجي بصوت عالي گمت غيث نايم ؏ كرسي
گرت عينك
ضليت اجيبة منا واحطة منا گوة
يلا عرفت اشيلة بجيت ويا بجيتة:-اسكت
حباب ماعرفلك والله
حطيتة بحضني
واحاول اهزة بس ثگيل
مدري شلون ريم تشيلة
ملاك:-غيث اگعد هذا يبجي
فز وباوعلة ومسح وجهه
واخذة من عندي وبقة يفتر بي لحد ما سكت
راد يخلي ؏ الجرباية كام يبجي
صاح غيث:-ادرررري شبييييك
ملاك:-لاتزززمخ بوجهه انطيني
اخذتة من عندة وهو لازم ضهرة
ويفتر وياي خاف يوگع من عندي حط راسة
برگبتي كزبر جسمي وغمضت عيوني
واني احس بحلگة يتحرك برگبتي
غيث:-هذا شجاي يسوي
ملاك:-عوفة
وخرت ايد غيث وگدرت اسيطر
علي وامشي بي روحة رجعة
رجلية تگطمت بس ما مليت ولا نزلتة
وهو ساكت وحلگة برگبتي
نيمتة ؏ ايدي واهز بي
غيث:-كافي اديج راح توگع
ملاك:-عادي
غيث:-اخذة عنج؟
ملاك:-لا
بقيت افتر بي لحد ما حسيت راح اوكع
من التعب رحعتة لمكانة
ومسحت وجهي من العرك
طلعت للصالة وهو طلع وراي فتحت رمز تلفوني
وخابرت خالتي وجدان:-ها حبيبتي
ملاك:-هلو خالة شلونج رجعتوا؟
وجدان:-اي والله رجعنة الدنيا باردة يمهم
ملاك:-اگلج رقم وردة انطينياه
وجدان:-شتسوين بي
ملاك:-خالة دزيلياه ؏ واتساب بعدين اگلج
غلقت الاتصال وانتضرتها
دزتة دخلت عليّ وسجلتة بجهات الاتصال
دگيت عليها وانتضرتها ترد
المرة الاولى رفضتة والثانية هم
للثالثة يلا ردت:-الو منو
ملاك:-اني ملاك بت ايمان
سكتت شوية وگالت مستغربة:-هلو ملوكة شلونج
ملاك:-أهلاً بيج
وردة:-شعجب داگة علية
ملاك:-اريد رقم ولاء
سكتت
ورجعت ورة دقايق گالت بخوف:-ليش؟ شتردين منها
ملاك:-دزي ومعليج
وردة:-لا ما ادزة
ملاك:-تنسحلين وياها؟ ترة عادي ماعندي مانع
وردة:-كليلي شتردين والله وانطيج
ملاك:-دزي وبعدين اگلج يلا
وردة:-اكو شي صاير؟
ملاك:-اكيد ما دام الـ*** ولاء بالموضوع
وألا ليش اخذ رقمها شنو مشتاقتلها؟
وردة:-زين شكو گليلي
ملاك:-وررردددة كااافي عاد لاتماطليين دزي الرقم واسكتي
وردة:-تمام
انتضرتها شوية ودزت الرقم
صحت لغيث:-شون اسجل مكالمة؟
اخذ تلفوني ونزل برامج
وربطهن ويا الاتصال واتصلنة عليها
ماكو رنة وحدة وشالتة
واجة صوتها المُقرف:-الوووو
همست:-قزرقطو
ولاء:-الو منو
ملاك:-اني ملاك
ولاء:-اهلاً اهلاً اگول اني هذا الصوت مايروح
من عقلي
ملاك:-من عسى عقلج راح وافتكيت منج
لج انتي شنو من بشر فهميني
ولاء:-شكو ها
وملاك:-وقزرقط بگلبج ان شاءلله ضيعتي
عمر طفلة بسبب غيرتج وحسدج يا ادبسز
يا عار النسوان لا والله وعيب تنحسين انت من النسوان ورجلج من الزلم عبن مخليج
ويا الزلم تصاهلين ادبسز صلفة
ولاء:-لج احترمي نفسج لا احط النعال بحلگج
فاهمة لو لا والله ماكو غير الـ*** والـ***
يومية بحضن واحد
باوعت لغيث مدنك راسة وجهه احمر
ويعض بشفتة
رجعت گالت:-وحق محمد اذا رجعتي اتصلتي
شنو عبالج خايفة منج اكبر راس ما خايفة
منة فاهمة لو لا بس من الله اخاف
ضحكت بصوت عالي:-هم تعرفين الله عود؟
ولاء:-احسن منج يا *** عبالج مثلج اني
مخلية الزلم تتراكض وراي
ملاك:-لا بس من تصادقين زلم من ايران
وتخليهم يدزون صوري لرجلي هاي عندج عادي
ولاء:-ها هههههههههه قصدج ضامة سوالفج
عن رجلج الخيخة ترة هذا شي عادي
اگدر حتى ادخلهم عليج لعلمج
ضغطت ؏ اسناني حيل
وهمست بحدتي:-اگدر انزل لمستواج واحجي وياج حجي بس الله اليدري لأن امثالج
مايفيد وياهم احترام
ولاء:-طييييييط خليت الاحترامات الجن
امهات **** وبعدين زينب الـ****
هي اجت برجليها وگالت دزي الصور اله اني شعلية
ملاك:-اها حلو وغير الصور شسويتي؟
ولاء:-شوية خبطات نرجع زنوب لحضن رجلج الخيخة
ملاك:-سحر تقصدين؟
ولاء:-اي يعني نگول هيج بس كم يوم وفكيتة
اجتني خطية تحرمص
ملاك:-حلو والله ماكفاج كلشي ودگيتي دورب السحر
ولاء:-جا عبالج اعوفج مرتاحة؟ لا وابو راس الحار
اذا ما اخلي حياتج جحيم فـ لا اتسمى ولاء
ملاك:-مايگمعج ابو راس الحار
ولاء:-امشي لج خليتي رجلي يصير طلي وراج
للللج حتتتتتى بتي سمااااها بأسسمج
وترديني شنو اخليج عايشة ومتهنية واني
هنا مشلوع گلبي ويا الـ*** هذا
عايش بحب وعشق وياج لا وحق مكة
اذا ما ادمركم انتي وكمال اصير معتبة وگ***
ملاك:-هو انتي هيج بالأساس ليش تصيرين
وهاي حوبتي بيج انتي وهذا المگرن
وعساكم بعد وبعد بنار وجحيم
سحب التلفون
وطلع برة خليت راسي بين ادية
شلون يگدر الانسان يسوي هيج؟
سحر؟ وتدمرين حياة انسانة لا أذتج ولا سوتلج
اي شي ليش؟ شنو ذنبي اني
بس والله ما اسكتلها
طلعت ورا غيث شفتة يبحوش بالموبايل
گلت:-شدتسوي؟
غيث:-انقل صوت المكالمة عندي وباجر اروح لعشايرهم
ملاك:-تسويها عشائر يعني؟
هز راسة بـ اي
سكتت ورحت يم عبدالله ابتسمتلة
وبست خدة ونمت بصفة
لليل يلا فزيت تلمست
مكان عبدالله ماكو!
معقولة اني بحلم؟
والصار كلة حلم؟ ياريت
نزلت رجلية للگاع
ومشيت اتلمس الحيطان والدنيا
ضلمة فتحت الباب رغد گبالي وشايلتة
وتهز بي
رغد:-ها حبيبتي
ملاك:-هلو هذا هم يبجي
رغد:-يفز ويرجع ينام
ملاك:-ليش هيج يصير بي
رغد:-عادي اي طفل هيج بعدين يتعود
هزيت راسي ساكتة
وخليت ايدي ؏ خدي واباوعلة
ابتسمت رغد وگالت:-رغم كل الصار هذا
بس كلشي صار لصالحج تدرين
ملاك:-ماحس بهالشي ولا ردت فرحتي تكمل هيج
رغد:-لا گولي يالله ترة الله يرزق الانسان ويعوضة
بالوقت الي يشوفة مناسب واحنة لازم
نكون مستعدين لكلشي
ملاك:-ماعرف احس هوسة
رغد:-يصفى كلشي
گمت سويت الاكل وهو باقي
بحضن رغد وميار ودينا يباوعلة ويلعبن ويا
وهو رأساً يصرخ مايريد احد يلزمة
لو يبوسة
ومَر اسبوع ثاني
واني لسة ما متعلمة ؏ عبدالله
وغيث اخذ التسجيلات وراح لشيخ عشيرة
ولاء وراح لعشيرة كمال وجاسر ويا
بقيت انتضرهم
واني بصفة عبدالله احاول
اعرف اگمطة اجيبها منا وهو يشيل ايدة
ويخرب كلشي
طبلي جاسر للغرفة فزيت
وگمت:-ها حبيبي
تقرب باس راسي:-ها يروح اخوج
وغيث يباوعلنة من بعيد
ملاك:-شصار؟
جاسر:-رحنالهم وباجر يلتمون عشيرة ولاء السـ***
وعشيرة كمال
ملاك:-وجدي؟
جاسى:-يمعودة هذا لا يحل ولا يربط بس يزامط
ملاك:-صدك شگاللكم
جاسر:-ضل يصيح شلون تسون هيج من وراي
لعبت بي لعب گتلة مرت ابنكم تسوي سحورة
وتخرب بيوت العالم والله عادي
وابنكم صور اختي كلها عندة ولازم نبوس گصتة
معليج يجون غصباً ؏ روسهم يبوسون نعالج
ابتسمت:-خلي الكُل يبتعد عني ماريد
احد اريد ارتاح بحياتي
جاسر:-ترتاحين والله اخذيها من هذا الشارب
ملاك:-ارجع واگلك انتَ سندي الوحيد
جاسر:-اموت ؏ ربجن اني
عيوني مدمعة وگتلة:-اتمنى لو ابقى بسدك للأبد
غيث:-جاسر تعال احاجيك
دار وجهه عليّ وغيث وجهه احمر
گال:-هسة اجيك
عافنة وطلع
رجع باسني جاسر وهمس:-معليج بأي احد
اذا تردين ترجعين يمة واطلگج منة وعلي لو مو
هوَ يوگف گبالي لو الدنيا كلها توگف گبالي
اخذج منة اخذج
ابتسمت:-سمعت هواي عهود وماكو شي تحقق
باوعلي بحزن:-لو انتي مطاوعتني برأيج اعوفج؟
ملاك:-مادري
جاسر:-وسفة عليج ماتدرن بأخوجن يحرك الكون الجن؟
ضحكت:-؏ كيفك
جاسر:-انتي او ملك او ريم من تميلن لاتميلن
؏ احد اني موجود اذا تردين اخذج واسافر
والله واخفيج من الوجود
درت وجهي ؏ عبدالله وگلت:-صار بأمانتي ماگدر اعوفة
تخصر وباوعلة وهمس:-يعني يضل يمج؟
هزيت راسي بـ اي
وهو گال يباوع لعيوني بخوف:-تگدرين تربين ابنها؟ بعد كل السوتة بيج
ملاك:-اتمنى لو اغير گلبي الطيب واهجر الكُل واعيش لنفسي
جاسر:-مشكلتج مشكلة
سكتت وگلت:-الله كريم روح لغيث
هز راسة ورجع باسني وراح
مسحت وجهي ودعيت
ربي كافي ياللهي خلي حياتي تمشي عدل وياي
رجعت لعبدالله وگلت:-انت ليش ماتثبت عووود؟ خلي اگمطك لاترفع اديك حباب
فاتح عيونة ويباوعلي
ضحكت وحطيت راسي برگبتة
وبستة حيل وگمطتة بسرعة
حتى لايضل يخرب ويخبث علية
حطيت ايدي جوة راسة
والثانية جوة رجلي وشلتة ؏ السريع
وضميتة لصدري ضاغطة عليّ خاف يوگع
ومشيت حاضنتة وطلعت لبرة
شفتهم يسولفون گعدت وهو بحضني
ابوس بي وانيمة
وثاني يوم اجت عشيرتين
لبيتي جنة مخبوصين اني وريم ورغد
بالتوزيعات عين ؏ التحضيرات وعين ؏ عبدالله
باوعت من الشباك غيث
واگف وبصفة قيس وجاسر وخوالي
واكفين گبالة سمعتهم يگلولة:-يابة هسة غير
نريد نشوف حل
غيث:-اعذرني كمال مايطب لبيتي
عصام:-يمعود جا هاي الوادم المن جاية
غيث:-كلهم ؏ عيني وراسي بس هالنگس هذا
مايدخل والله واذا دخل اسويها
مجزرة ومحمد
سكتوا عنة وهو سد
الباب وطبوا لجوة انيطيناهم الماي
والچاي ودخلت للصالة وهمه ماشاءلله اعدادهم
جبيرة وكلها تحجي صارت هوسة
وعبدالله يبجي گام
اخذتة ميار وطبت لغرفة زينب
وبقت تهز بي واني كل ساعة رايحتلها
بقينة كاعدين نستمعلهم شوية واجة غيث
أشرلي وگال:-روحي لبسي عبايتج وتعاي
ملاك:-ليش؟
ضحك جاسر وگال:-يعتذرون منج
ملاك:-ماريد اعتذارهم خلي يچفوني شرهم
غيث:-گومي يابة العالم تنتضر
ملاك:-شون اطب بنص الزلم
غيث:-ماكو احد بس الشيوخ ومنا طبي
ماتطلعين لبرة
ذبيت نفس وردت اصعد
قبلها باوعت لعبد يم ميار صعدت لبست
حجابي وعبايتي ونزلت
فتحوا الباب وطبوا گبالي
همست:-السلام عليكم
گاموا وكلهم شيوخ معگلة
وجدي وخوالي وياهم باوعت 3 لابسات
عبي وحدة بيهم بقت گاعدة
ركزت هاي ولاء؟ وامها والثانية مادريت منو
وگفت بنص
جاسر وغيث و واحد منهم گال:-يابة نعتذر
والله حرامات الشيب بوجهنة وبتنة هيج
تهدد وتكسر رگاب وفشايرها
حتى الزلمة ما يسوي مثلها بس لا والله
اذا ما كسرتلج رگبتها وحطيتها بأيدج واخذ
حقج منها انة مو محسن
ملاك:-رحمة الله والديك
وشيخ عشيرة كمال
گال:-واحنة هم يابوية نعتذر منج وابنة الي
هوَ المفروض يصونج وانتي بت عمتة
من دمة ولحمة مايعرف يضب الغريبة عنج
ويأدبها و والله لو ادري من زمان كمال
اعتدى وسواه سوايتة بيج يابوية جا حفرت گبرة وطميتة جوة الگاع ولاتخافين احنة وياج
شيصير بس دزيلنة طارش واحنة نگطم
رگاب اليوصلج
ابتسمت:-مشكورين ماتقصرون
شيخ عشيرة "ولاء":-تعاي اعتذري منها
ولاء:-اعتذر وهي هم لازم تعتذر مني
_ووووولللللللللج علليييبييييمن تعتتتتتذذذذر
لزمها ابوها من رگبتها وجرها
وصلها يمي وهي گاعدة ؏ ركبها
وهي أم لأربع جهال؟
شنو موقفها؟
وابوها يصيح:-بووووسسسسي رجللييييين تااااااج راااااااااسسسسسج ولللللج نزززززززلتتتتي راسسسيي سااااااقطةةةةة
مدنك راسها يم رجلية
حسيت شفتها القذرة لامست رجلي
بعدتها وهي وخرت ولطمت
؏ وجهها:-ااااااني مضلوووووومة ااااااني المممممضضضلللللووووومة كاااااافي
أم ولاء:-اني هاي بتي وهاي كدام الشيوخ
اتبرى منها وماعندي بنية هيج واعتذر منكم كلكم
راد تطلع ورجعت باست راسي
وجرت ايدي باستها:-احنة ضلمناج من البداية
وانتي اشرف واطهر من هالنماذج الي هي يتي
وغيرها وغيرها شتردين اطلبي من عندي
عسى ما ولدها وبنتها ترديهم هم ننطيهم الج
بدون رفة جفن
ابتسمت:-اخذ من رس هاي؟
نزلن دموعها:-ماربيت بناتي هيج ماربيتهن والله
ولاء:-كلللللة بسببببببكمممم انطيتوووووني
اااااااله كلللللة من ورررررااااكم اللله لايوفقكم
صدك لو گالو
العاهرة من تحاچيها تذب البيك ما بيها
وهي فعلاً ذبت الصوج بأهلها وعافت
عمايلها
رگعها ابوها برجلة انكسر سنها
وضلت تجري دم من كل الجهات لف
عبايتها عليها وسحلها لبرة
وتخيلوا هاي گدام شيوخ وزلم مشوربة
من بينهم كلهم هيج صار بيها؟
العتب عليمن؟
واني واكفة بنص غيث وجاسر
ونباوعلها بدون اي ردة فعل
احة ابوها يبوس بجاسر وغيث ويعتذر منهم
ويبجي وطلع اخذ مرتة وبنتة وراحوا
رفعت عيوني ؏ جدي تقدملي
وباس راسي وسحب
ايدي راد يبوسها دنيتها:-لا جدو لا
جدي:-مادري وين انطي وجهي گبال امج
اذا لاگتني بالآخرة وشلون اصارحها
انة ماگدرت احافظ ؏ بنيتها من ماتت اعذريني
يابوية والله
ملاك:-لا انتَ ماعليك جدو السبب بيهم
رجع باس راسي
وابتعد واني طلعت فتحت الباب
وطلعت ضحكت لريم ورغد
ضحكت ريم وگالت:-الله شكد حلو عشاير تجي تعتذر مني
ملاك:-شگد حلوة الفضيحة
رغد:-انجبي لا ليش فضيحة غصباً
؏ روسهم اجو واعتذروا منج
هزيت راسي ومسحت وجهي
دخلت لعبودي لگيتة نايم تقربت بستة
بخدة
يمكن انتَ وجهك خير علية؟
ومَرت أيام والبُعد
بيني وبين غيث يزود كل يوم
وكل ثانية كأنما اني ببلد وهو ببلد
لا عاتبتة ولا اجة عاتبني
ولا رجعنة حجينة بأي موضوع
وكلامنة صار اشبهه بالقليل
ومن عدها وعرفت لا حُب يطول
ولا زلم توفي...
وغلطة الشاطر بألف
واني اكتفيت
وراح اضل كل عمري
نادم عـ الجره..
اما حُبي الحقيقي بين ويا عبود
الصار مو روحي لا!
هو كلشي بية
كلشي بدون استثناء هو فعلاً علاج
لكل جرح صارلي بالماضي
اضل مساهرة الليل كلة بدون تعب
ولا كلل علمودة رغم يبجي هواي
ومايسكت وابقة افتر بي
وقلة نومي وأكلي مع هذا ابتسم من يبجي
اخاف عليّ من الهوى اذا مر فوگاه
وابقة اباوعلة واطمئن
انت علاج لروحي المجروحة؟
وبيوم جنت نايمة بصفة وهو گعد
ركضت للممة الي هي حليب من صدر ريم
وانطيتيها بقة گاعد مانام
بدلتلة ورتبتة والساعة بـ 3 بليل
شلتة ورحنة للصالة واني اضحك وياه
حطيتة بالگاع ورحت اجيب ماي
صرخ وگام يبجي
ملاك:-اجيت يروحي اجيت اوگفلي
جبت ماي واجيتة شلتة وادگدك ؏ ضهرة
وهو يصرخ نزل غيث من فوك
گال:-شبي
ملاك:-يبجي مابي شي متنحس
غيث:-عبالي شو شكو انعل اهلك
سكتت واني اسولف وياه
واحاول اخلي يسكت من احجي
مايبجي واذا سكتت يبجي ضحكت:-هاي هيج تحب صوتي يلا حبيبي كافي
امشي بي اصعد وانزل
واطب للغرف وللمطبخ وللصالة
واسولف اسولف وهو ساكت اخاف اسكت
خاف يبجي رجع غفة ؏ چتفي
حطيتة بالگاع وضليت بصفة
ابتسم وامسد ؏ راسة
همس غيث:-شبيج تضحكين
مسحت عيوني:-احساس غريب بداخلي
تدري شكد جنت اتمنى افز ؏ صراخ ابني وابقه سهرانة وارضعة واناغي وينام بين
ادية احس بشعور حلو من ينام الطفل بحضن
أمة وهي تعبانة تحس خلص تعبها
كلة انتهى بنومتة
وهسة اني ما تعبانة لا بالعكس
اريدة يبجي أكثر اريد اذني تنترس بصوت
البجي مالتة اريدة مايسكت بحضني
وابقة اهز بي للصبح وما امل ابداً
غيث:-وهاي انتي فرحانه لأن يبجي؟
النسوان يردن جهالهن تنام كوة وهاي فرحان تريده يبجي
ملاك:-تؤ تؤ ما يحسن بالنعمه
اله لمن يفقدنها اكو احلى من
صراخ الطفل بليل؟
اكو احلى من تفز الأم وتخلي ؏ صدرها؟
شعور الامومه محد يحس بي والله
صح الله رزقني بعبدالله
بس محتاجه للطفل الينزرع ببطني واعرفة يتحرك واصرخ حتى اولده واضحك من يضحك اريد احس برضاعته من صدري اريدة يشبع
مني
الف الحمدلله والشكر عوض رب العالمين
اكبر من اللي نريدة
غيث:-ليش تحجيها بغصة؟
ضحكت:-الصار كلة هذا وتريدني احجيها
طبيعي؟
غيث:-أذيتج هواي
ابتسمت واني ما اباوعلة
اباوع لعبود:-ستوك انتبهت؟
غيث:-تؤ
رفعت عيوني:-ما اصدك
غيث:-مستحيل بيوم انساج
ملاك:-ومستحيل بيوم ارجع ثقتي بيك
غيث:-خلي نفتح صفحة جديدة
ملاك:-دفتري خلص من الصفحات كل
غدرة من كل شخص افتحلة صفحة
وآخر ورقة طويتها قبل اشهر وبعد ماكو
اي صفحة فارغة لأي بشر
يجوز نضل سوة بس لاتثق
اني نفسي الأولية
هز راسة وگام:-تصبحين ؏ خير
ملاك:-وأنت بخير
عافني وصعد
باوعت لورا وميلت شفتي بأسف
وگمت جبت غطا من الغرفة
وحضنت عبودي وغطيتة
وهمست لأذنة:-انتَ لاتغدرني هم
بست المكان مابين اذنة ورگبتة
طلع اربعينة ويا اربعين زينب وماگدرت اروح
لهناك واعوفة
و ورا اسبوع من الأربعين
جنت گاعدة اگمطة وادردم:-انت ليش خبيث
ادبسز خليني اگمطك عدل وللللكككك
لاااا تخرررربة حباااااب
صوت وهو يناغي يخلي گلبي
يدك سريع:-حباب عبود شو نزل رجلك يلا
يلا عفيييية
رجع رفعها ذبيت الگماط
من ايدي وردت ابجي:-شبييييك ويييااااااي
اندك الباب وسمعت
صوت مرة:-يهل الدار موجودين
هاي ام عبدالله؟
صحت:-اي عمة تعالي اني هنا
گمت وهي طبت و وراها بتها رقية
والثانية العايشة برة العراق روان
سلمت عليهن وهنه يبوسن بية
نزلن گعدن بصف عبودي واني ابتسمت
وهنه يبجن تلاثتهن وام عبدالله تشم
بي وتهمس:-يمة من ريحة أمك يمة
بلعت ريگي ودرت وجهي
لغير جهه باوعتلي وكالت:-ليش ما مگمط خاف ينمتن
ابتسمت:-صارلي ساعة احاول بس هو يحرك رجلي واني ماكدر اضغط عليّ
ضحكت وگالت:-اكعدي خلي اعلمج
گعدت ؏ ركبي وهي تضغط ؏ رجلي
وهو يبجي
ملاك:-يمة وترديني هيج اسوي؟
شالتة وبوستة وگالتلي:-اي هو هيج جا شلون
ملاك:-يتأذى لا ما اگدر
روان:-هو انتي بس گمطي نوب يبجي شوية
ويسكت
ملاك:-لا أذا بجة بعد مايسكت
رقية:-ليش سميتي عبدالله؟
ملاك:-بيوم الرجعت لهنا حلمت بأمي
خلتة بحضني وگالت ديري بالج على عبدالله الرضيع
سكتن كلهن و وحدة تباوع للثانية
ام عبدالله:-غيوثي موجود عمة برة منتضرة
ملاك:-اي نايم هسة اصيحلة
صعدت ؏ كيفي واني الغرفة الفوك
ما اصعدلها غير بس من اخذ ملابسي
ونصهن نزلتهن لجوة حتى اضل يمة
فتحت الباب غيث بدون ملابس بس بالشورت
ونايم ؏ بطنة حتى ما تقربلي من اجة عبودي
لهنا
مرة وحدة وحتى ما بادلتلة وجنت نايمة
هلگد جان البعد بيناتنة
رحت من الجهه مالتة ودغيتة
بأيدي:-غيث
فتح عيونة وباوعلي:-ها
ملاك:-عمك وعمتك جوة
غيث:-يا همه؟
ملاك:-عمك ابو عبدالله
هز راسة وگام واني
نزلت لجوة وهو شوية ونزل
سلم ؏ عمتة وبناتها وطبوا لجوة وهي ماخذة
عبودي وياها
لبست جبتي وحميت الجاي
وگلاصات المي خليتهن بالصينية وطبيت
سلمت و وزعتلهم
گعدت بصفها ولازمة رجلين عبودي
صاح ابو عبدالله گال:-شو انطوني حفيدي
ابتسمت واخذت منها وحطيتة
بيده وهو شم رگبتة وگال:-يابوية ياريحة بنيتي
انتَ البقيت منها حبيب جدك انتَ
سكتت وبلعت ريگي وذبيت نفس
ورجعت اخذتة وخليتة بحضني
تحمحم ابو عبدالله وگال:-اني حاب اگللكم شغلة
غيث:-اي تفضل
ابو عبدالله:-عبودي نريدة
بهت وجهي واني اباوعلة:-شنوَ؟
ام عبدالله:-نريدة ابن بتنة وحفيدنة ومانگدر نعوفة بعد ماراحت ماضل شي من ريحتها اله هوَ
دنگت عليّ
انتَ العوض شون اعوفك؟
هزيت راسي وباوعت لغيث ساكت؟
دموعي نزلت وهمست:-لا مستحيل
ابو عبدالله:-تردين تربي؟
ملاك:-بعد كلشي صارلي وبعد انتضار هاي السنوات كلها وتحملت الضيم كلة حتى اشم ريحة الطفل وهسة تردون تاخذونة مني؟
زينب أمنتة بيدي گالتلي اعتبري ابنج لاتعتبري
ابني مستحيل انطي لاي احد عبودي يضل يمي
ام عبدالله:-يعني هي گالتلج يضل يمج؟
هزيت راسي بـ اي ومسحت
عيوني
رجع ابو عبدالله گال:-عبالنة متكدربن او متتقبلي
هزيت راسي بـ لا وگلت:-اريدة اني اربي
وهو ابني مستحيل اتركة
ابو عبدالله:-بارك الله بيج بنيتي تكسبين اجر تربين طفل يتيم الأُم واحنة نعتذر منج
همست:-لا عادي
واني مدنگة راسي ؏ عبدالله
انطيك؟ انطي روحي ومانطيك لأحد..
ومَرت أيام وغيث اخذة حتى يلقحة
ومن أجة فحطان وشفت ايدة مورمة تخبلت
متت بجي واني مارحت لان ماردت
اشوفهم يضربوا
ضليت حاضنتة وهو يصرخ لحد ماغفة
وحتى ما گمطتة خفت لاتتأذى أيدة
غسلت وجهي وعيوني مورمة و وجهي اصفر
رحت لغيث متمدد ؏ القنفة
گتلة:-گام يبجي هواي
غيث:-اي عادي لأن تأذي كم يوم ويصير زين
هزيت راسي والأوراق مالتة كلها ؏
الطبلة اخذتهن وضليت اترجم بالموبايل واشوف
وحدة بيهن عنوانها DNA عكدت حاجبي
وباوعت لغيث وهمست:-هاي شنو؟
غيث:-شنو!
ملاك:-ليش مسوي دي ان أي؟
سكت ورجع كال:-اتأكد
ملاك: تتأكد من ابنك؟
غيث:-الدگت دروب السحر ما أمن
ما داگة غير دروب
ضليت اباوعلة مصدومة ليش ماثاق بيها
لهالكد؟ اخذت تلفوني وترجمت كل حرف موجود
بي
وطلع أبنة رجعت باوعتلة
وگلت:-وهسة هو ابنك اتطمنت؟
غيث:-لا
ملاك:-ليش
غيث:-رس أمة مزروع بيّ مستحيل أأمن بي
ملاك:-معليها أمة اني الراح اربي واتعب عليّ
جاسر نجلاء جابتة وامي الربتة ماصار
مثل أمة
رجع عيونة للموبايل وگال:-اهم شي هسة اتطمنت هو ابني مو ابن غيري
ملاك:-انتم الزلم عجيبيبن والله تصفنون
غيث:-مانثق بأي وحدة تجي
ضحكت:-لعد ليش رجعتها اذا ما ثق؟
او ماريد افتح شي من القديم هذا هو
عفتة وگمت
ورحت شفت عبودي ؏ نومتة باقي
ومَرت أيام وشهور وسنة كاملة مَرت
واني وغيث ؏ هالحال اللي بينة هو عبودي
فقط مو اكثر
وحتى من اصعد انام عبودي بنصنة
وبعلاقتنة الشرعية اللي صارت ماتطول اكثر
من نص ساعة ينطيني الأريدة وياخذ اليريدة
وخلص ادور وجهي عنة وانام
حَاول هواي احاجي او اعاتب او حتى ابجي!
بس اني ماگدرت
مشاعري تلبدت وسكنت ضلوعي
مالي خلك لأي شي عُمري الراح هو مو شي
عادي!
الراح كسران روح
روحي كسروها كسر شون ارجعها
وانطيها الهم!
شعور التجاهُل
هو أصعب شعور الأنسان يمُر بي
شعور التخطي وانتَ تحط عينك بعين
الشخص اللي دمرك شعور غريب
اني ، أمي ، زينب رغم السوتة بية بس بعدني
احسها انضلمت؟
كلنة عشنة بضلم جنس آدم
اللي مايهمه المرأة أذا غلطت غلط واحد
يدمروها تدمير
حب أكو نعم مُستحيل ماكو حُب بهالوجود
بس لو غلطنة ويا هذا الحب برأيكم
نتسامح؟
ان كان غلط جبير او زغير
اكو رجال توفي
واكو لا!
انتَ وحظك بالدنيا
وحظي معروف..
ودخلنة 2019/1/15
Happy birthday Abboud ♕♕
ونزلت بفستاني الأزرك
ذيالة طويلة
ومفتوح الصدر مابي اي شي يغطي
وضيك لدرجة جسمي مبين كامل
شعري الكاري وتراچي مدورة
خلت الموجودين ينتبهولي
واولهم الچان واگف يخابر بصف الدرج
رفع عيونة والموبايل ؏ اذنة
بلع ريگة ورجع دنك ورجع مرة الثانية
رفع عيونة
تجاوزتة ومشيت
ورحت سلمت ؏ الموجودين
تقربت لجاسر ابتسم:-شطالعة مصكصكة بت الحلو
ضحكت وبوستة وهو يبوس براسي
دنك ؏ زندي وعضة
ضربتة براسة واني ابتسم
رحت لعبودي بستة بخدي:-يممة حبيبي الحلو
اللايكلة القاط
المصورة:-يلا حبيبي تعالوا خلي اطگلكم صور
شلت عبودي وهمستلة:-حباب لاتبجي حباب بداعتي
خليتة ؏ جتفي وهو مدنفش عمرة
صار سنة واني مستحيل لحد هاللحظة عندي
طفل؟ اربي؟ ومعتنية بية
وصار سنة؟ ما مصدگة لهاليوم هذا
وگفت يم الديكور الازرك
وكيكة طوابق لون ابيض وازرك وعليها
شمعة بشكل طفل
ومكتوب اسمة بالذهبي
تحاوط خصري بأيدة الخشنة
حطيت گصتي ؏ گصة عبود وهو وراي
يشم بشعري همس:-شطالعة بت الكلب
ضحكت والمصورة تطك صور
رجع همس:-لاتصيرين باردة
ملاك:-شنو؟
غيث:-برودج يحرگني
ابتسمت:-الماي اذا خليتة بالثلاجة شيصير؟
غيث:-يبرد
ملاك:-وانتَ بنفسك ذبيتني بالثلاجة بدون ماتباوعلي
غيث:-مو تشبيهه هذا
ملاك:-المهم وصلت الفكرة
غيث:-ادبسز
ضحكت وناغيت عبود
ملاك:-فدوة لليضحك اروح
وهو يشابك ادية ويضحك
بوست خدودة الحمرة بسبب بياضة
وشعرة النازل ؏ عيونة وخرة غيث
هواي حركات سوينة وصورنة ويا العائلة كلها
شزية واجت ام عبدالله وبناتها
سلمت عليها
وهي جايبة انواع واشكال من الهدايا
طبن بناتها وهنة بديهن هم هدايا لعبودي
اجيت اقدم ماي لكيت ريم
تشيل بالصواني ضحكتلي:-راح تنطگين عين
ملاك:-؏ اساس اني ما طاگتني العين
ريم:-خرب والله صاكة خرب عرضج
ضحكت:-انتي الأحلى حبي
شربت ماي واني اضحك وسمعت صوت
عبودي يبجي ذبيت الكاسة
وام عبدالله تگول:-ليش تبجي يمة اسكت حبيبي
ملاك:-انطينياه عمة
ام عبدالله:-لا خلي يسكت عندي حتى يتعود علية
ملاك:-مايسكت والله ليش تخرب الحفلة
گلبت وجهها واني اخذتة منها
سكت بسرعة خلة هالشي عيونها تدمع قهر
ماهتميت واني اضحك وياه وهو
يناغي بصوت عالي
واني احجي ويا:-حبيبيي ماماااتي اغووو
يضحك بصوت عالي ومن يضحك
يشهك واني روحي تطير تطير فوك الغيم
خلصت الحفلة الساعة 12 وكلها
راحت صعد غيث اللي احسة بعيد عن ابنة
ميت متر
شلت عبودي النايم تعبان بست حلگة
وطببتة لغرفتة اللي تلونت بلون ازرك
ورتبتها اله
لبستة وغيرت حفاضتة
ونيمتة ؏ كاروك وفتحت اضوية خافتة
وخليت المُسجل حتى ينسمع صوتة
عفتة وصعدت لفوك
غيث نايم بدلت ونمت بصفة
ونهاية 2019 بعد ما صارت الثورة
غيث وقيس وجاسر يرحون يومية لساحة
المضاهرات ومايجون الة بتوالي الليل
ريم:-ولج والله راح اموت الساعة ب2 شوكت يجون
ملاك:-هسة شوية ويجون
ريم:-ليييييش محدددد يرررررد
ملاك:-عادي يمكن صوت عالي ومايسمعون
ريم:-انتتتتتي شهالبروووووود العننننددددج لخاطررررر الله امدددداج
ضحكت:-اتمنى ميجي اليوم اللي تصيرن
بي نفس البرود
ريم:-يمة قيس خاف يروح اموت ورا والله
ملاك:-محد يموت ورا احد
ريم:-دولي انتي تحرگين بگلبي بالزايد
ضحكت واني اوكل عبودي
وجود ابنها
شوية واجو وهي عاطت بقيس:-ليييييش تأخرررررت اننننني مو گااااايلة للللل6 وترررررجع
قيس:-صارت مضاهرات قوية وضلينة حبيبي
ريم:-والعباس نوب اذا تأخررررت البسسسس عبااااتي واجييي ورااااك ترررريد تيتمنننني وتيتممم ابننننك
غيث:-عار هذا لاتخافين عليّ
ملاك:-رجلك تجري دم
غيث:-اي هاي گزاز طب برجلي شمرو بطالة
انطوني الصيدلية
ملاك:-يمج ريم
ريم:-اااااني بياااا حاااال هسة
ملاك:-حُبي شبيج هذا اجانة بطولة الفارع قابل شبي
قيس:-انتي خو حاطة عينج عليه
ملاك:-على حورك
قيس:-يمة الحية
ضحكت وخليت البسكت الممرود
بحلك عبودي وغيث ينضف برجلة
ملاك:-گوم منا غيث مدتشوف الاطفال خافت
باوعلي بتك عين واخذ غراضة
وگام للحمام وريم تتلمس بقيس خاف بي شي
جاسر:-جا شو اني محد مهتملي هلگد امدة حضي اي والله
ضحكت:-تزوج وخلي تهتم بيك هيج
جاسر:-هيييي ويننننههههههااااا
ملاك:-متروسة الشوارع بنات
جاسر:-جا اخذ بت شوارع
ضحكت بصوت عالي مسموع
وكمت بستة وهمة راحوا وغيث طلع لاف رجلة
وصعد فوك نام
و هيج حياتي ماشية ؏ هالبرود
والنمط ولا يوم مستحيل اچذب او ابينلكم
انُ رجعت الأمور طبيعية لا والف لا وجواها
الفين خط
انسانه متجمعة كُتلة البرود داخلها
عدى أبني المحتر گلبي عليّ فقط حُبي
الوحيد هو وبس!
وغيث يحاول
يرجع كلشي بس ماكو شي
يستحق نرجع نعيد لان التعب الوصلناله
مو مال نرجع نفس المحطة
والقطار قرب يوصل للأخير
يرجع علمود راكب؟
ودخلنة 2020 وعبودي عُمرة سنتين
صار يمشي بس متكسر ميعرف
كلش واني احاول اخلي بالحجلة واخلي يمشي
بس ماكو
رغم ابن ريم سنة ونص وبدة يمشي
بس عبود لا وراجعت بي دكتورة
كالت شي طبيعي اكو طفل النمو مالتة
ضعيف
وهو من اخلي بالحجلة يطير طيور
واضل افتر وراه
واجت جائحة كورونا وأول واحد
وگع هو غيث
وقبل لا نعرف هو بي
تخربط بليل خابرت قيس اجة اخذة
للمستشفى
ورجعوا بالـ6 الصبح
جنت نايمة ومن سمعت صوتهم گعدت
لبست فوك ملابسي ورحت
للمطبخ جانت الدنيا شتة تگص گص
ملاك:-ها ليش تأخرتوا
قيس:-مُصاب بكورونا
ميلت شفتي بأسف وباوعتلة
من الشباك مدنك ولابس كمامة
والكانونة بيدة
ملاك:-عرفتة
قيس:-فرغيلة مكان وخلي بيّ شلون وين نودي
ملاك:-اخذة للحجر الصحي
صفن بوجهي ودرت وجهي للشباك
رفع راسة علية
كأنما سمع
ذبيت نفس وكملت:-ماگدر رايدلة عناية
وعبودي اخاف عليّ يتمرض
قيس:-انتي صدك تحجين لو تشاقين؟
ملاك:-ليش اشاقة؟ مرض خطير
وينتشر بسرعة اني ما مستعدة امرض روحي
واكيد اذا تمرضت عبودي يتمرض وياي
وانتَ دتشوف حالات الوفاة دترتفع
تريدني اكتل ابني بأيدي؟
عاد هو يطيب ويرحع قابل شكو
قيس:-وعلي انتي واختج ملك مو بشر ماعدجن رحمة ابداً
ملاك:-هاي بعد شنسوي
قيس:-هاي لو ريم جا تمددت وياي ونامت ؏ نفس الجرباية عمي هذا الحب
ملاك:-بعدين تتندم
قيس:-انجبي لاتخلين عينج
هزيت ايدي وباوعتلة مدنك
ورجليّ تمشي ؏ الارضية
لبست كمامة وطلعت وكفت بالباب
بعيد عنة:-ان شاءلله تصير زين
هز راسة ساكت
غيث:-مشكورة ماتقصرين
ملاك:-مانگدر نتحمل المرض
گام وشال الغراض وباوعلي
عينة حمرة:-سويتيها وحدة بوحدة
ملاك:-عفتني بأصعب لحظات بحياتي
غيث:-وضميتها ورجعتيها الية
ملاك:-تگدرون انتوا تتخطون بسهولة واحنة
كذلك بس للأسف اكتشفت بعد ما مر وقت
طويل ؏ كُلاً ان شاءلله تصير زين وتتشافة وترجع
لهنا نبقة ننتضرك
ضل يباوع لعيوني
عفتة ورحت صعدت فوك
جريت جنطة جبيرة رتبت ملابسة قطعة
قطعة بترتيب وخليتلة اليحتاجة
وحطيتلة فلوس واجة قيس
اخذها وهو يدردم:-يعني والله خطية اني
من يمي راح ابجي شون تخلينة وحدة
ملاك:-عليمن ابجي؟ يعني نموت اني وابني
ليش يمة مارايدة روحي وهو يصير زين
ويرجع وين مودينة
قيس:-مو نسوان عممممممي مووووو نسوووووان
ملاك:-دروح روح ودير بالك لاتنعدي
قيس:-قابل بي جرب
ملاك:-خلي تصير بيك كورونا وتموت طبك طوب
قيس:-امداج
ملاك:-دروح عن خلقتي
اخذ الملابس وراح
باوعت من الشباك شال غيث من جتفة
وگالة:-گوم گوم هاي النسوان مدري منين الله خالقهن
دار وجهه علية غيث
وابتسم وعينة حَمرة ما گللكم ما خفت
لا اكيد طبيعي خايفة لا يتأذى من هالمرض
بس مابيدي شي
رجعت دخلت للحمام سبحت وعقمت
والبيت هم وعبودي كذلك
والكاتلني لسة ميحجي هم متت قهر
صح يحجي اشياء ممفهمومة بس مايحجي حجي طبيعي
وبيوم جاي اغسل اماعين
وهو يسوق بالبيت بسيارتة ويصيح
عننن ومن يمر يمي اذب علي ماي
وهو يسوي روحة يدعمني ويضل يلغي بالهندي
اجة بصفي وصاح:-امااا عمممم
وگع الماعون من ايدي وغسلت
وتقربت منة وگعدت ؏ ركبي يمة:-شنو عبودي؟
عبود:-عمممم
ملاك:-لا لا کول ماما
عبود:-عمممم
ملاك:-گول شو ما ما
هز راسة وهو يضحك گمت جسمي
يرجف كملت غسل الاماعين
وسويتلة اكل خفيف ألي وألة
وأكلنا واني احرمصلة يگول ماما بس مايرضى
الأدبسز
كملنة وشلتة ورحنة للغرفة مالتة
نيمتة ؏ جربايتة ونمت بصفة
ملاك:-عبودي
عبود:-ااا (ها)
ملاك:-شو گول ماما
سكت رجعت کتلة:-گول ما
عبود:-ما
ملاك:-ما
عبود:-ما
ملاك:-ماما
عبود:-ماما
ضحكت بفرح ودموعي يهلن
بعيوني وانگلبت فوگاه رجعت گتلة:-شو بعد وحدة حلوة؟
عبود:-ماما
ملاك:-روووووح اممممك انت تعرف شنو يعني روووح امك اموت عليك عبود احببببك
انت تحبني؟
هز راسة بـ اي ضحكت وبوست
خدودة وضليت اعض بي ونضحك سوة
جانت هاي الفترة اللي گضيناه
وحدنة اني وعبودي
قربتنة اكثر صار روحي من الدنيا
وكلمة ماما الوحيدة الجانت بحلگة وينطقها عدل
يفتر بالبيت
ويصيح ماما واني روحي تروح وراه
احبة ياللهي عوضني عن الدنيا كلها
بعد ما جان بيتي الساكنة الجني جنت احس
بعد ما جان كلشي صامت بهالبيت
هسة احس حتى الحيطان تحجي
روح عبودي الحلوة
صارت تنتشر بكل البيت صرت
احب الدنيا من وراه احب كلشي يحبة
جان الكُل معزول
حتى محد يجيني واني ارتاحيت
انعزلنة اني وعبودي عن الدني كلها
وبيوم اجاني جاسر
ضحك وسولف وياي وطبعاً
قبل لا يدخل خليتة يسبح بالديتول والمعقمات
وما خليتة يتدنة لعبد ابددد
جاسر:-اگلج اريد اگلج شغلة
ملاك:-شنو؟
جاسر:-يعني كلت بدل ماضالة بالبيت و وحدج
گلت عادي تتونسين وياي
ملاك:-شنو احجي؟
جاسر:-تجين تشتغلين يمي بالعيادة؟
نفس شغلج القديم هم تسحبين دم وتشدين
كانونات مغذيات هيج
ضحكت وگتلة:-خاف انصاب
جاسر:-لا اكو تعفير كامل للمرضى
ملاك:-مادري والله
جاسر:-ادري خايفة بس لاتخافين لان شغلج
اساساً مو كلش قوي ولا بي ملامسة
وبس 3 ايام بالاسبوع
لان الولد المتعين انصاب بكورونا
ملاك:-لااااا باللله وتريدني اشتغل
جاسر:-ولج شبيج عوبة
من اهلة منعدي معلينة احنة
هسة مو ذولة الوياي ما انصابوا
ملاك:-اخاف
جاسر:-لاتخافين والله ماكو شي وكتلج تعقيمات
وكلشي اكو
ميلت شفتي وگتلة:-مادري افكر واردلك خبر
جاسر:-يلا لعد اني اروح
ملاك:-ليش ماتضل يمي ؏ عشة
جاسر:-لا وعلي تعبان
ملاك:-براحتك حبيبي
عافني وراح بقيت افكر افكر
وبليل خابرتة وگتلة ماشي باجر اجي
دزيت رسالة وحدة لغيث
كتبت "راح اشتغل ويا جاسر بالعيادة"
شافها ودز اوك
وسكت واني هم مارديت بعد
وثاني يوم لبست كوت بيجي
وجوة بلوز وبنطرون جوزي وعبودي نفسي
بس هو عكس
لزمت ايدة وتمشينة واني لابسة كمامة
وبيدي المعقم وهم عبودي لبستة كمامة زغيرونة
حتى لا يختنك
وصلنة للعيادة ابتسمت
وجاسر واكف بالباب يخابر ضحك
من شافنة وگال:-عمي شطالعين اليوم الدكاترة
راح تكسرون سوگنة
ضحكت:-انت اجيتنة برجليك
ضحك وگال:-ادخلو خلي يعقموكم
دخلت وفعلاً اكو غرفة خاصة خلتني
ارتاح واتطمن عقموني البنات
وعبودي يضحكون وياه ويسولفون
وهو مكيف يضحك
اخذت من ايدة وجاسر
قدملي اللابكوت نزعت الكوت ولبستة
وخليت عبود ينعزل بصفحة
وبيدة الآيباد يتعلم اصوات الحروف الأنكليزية
واني بديت اشتغل
والبنات يباوعولي منصدمات
كل ثانية تعقيم وتعفير
وحتى هم الموجودين بالعيادة يجون يعقموني
الشغل سهل اسحب دم واني متعودة
وكانوة اشد بس اذا الوريد صعب
ماگدر اصيح احد يجي يسوي
وتعودت يومية اني وعبودي نجي نتمشى
واحنة نلبس يومية شكل ويومية
لون نخلي الموجودين يباوعولنة بحُب
ومرة من المرات بنية تشتغل
ويانة:-عززة انتي شگد كيوت انتي وابنج
ضحكت واني اشخط بأسماء
اللي دخلوا:-انتي الاكيت
فرح:-يمة ابني اذا ماسويتلة هيج انتحر
ضحكت:-عليمن يمعودة كفختين وخلي يلبس
مثلج
فرح:-متعلق بيج هواية شنو ابو ميت؟
هزيت راسي بـ لا:-بالحجر
فرح:-اها خطية الله يشافي
ملاك:-حبيبي تسلمين
انطوني ورقة تحليل
مُراجعة دخلتة بالترجمة واني اقرة الموجودة
وهي فوك راسي و رجال يمها
_ها شطلع؟
باوعتلها:-سلبي حبيبتي مو حامل
نزلن عيونها بقهر ودمعت والرجال
اللي هو زوجها عافها
وطلع عصبي وهي دموعها نزلت واخذت
الورقة وهمست بخوف:-مشكورة حبيبتي
ملاك:-صارلج شكم سنة ماعندج اطفال؟
_عندي ثنين بنات ونريد ولد
نزلن عيوني بحزن وهي راحت
اذاً مو بس اني المتعذبة؟
كلها مثلي!
ليش العالم مهوس بالزواج
والأطفال؟ ليش منعيش ؏ الحب والوفاء؟
ليش ميريدون البنات؟
ليش الولد مثلاً شنو فرقة عن البنية؟
ليش العاقر لازم تتأذى بهالبلد؟
ماهوَ رب العالمين اللي خلة هالمرض بيها
ليش هي تتعير؟
شنو ذنبنة احنة المايصير عدنة اطفال
وشنو ذنبها المايصير عدها ولد؟
ليش بكلشي مذنبة المرأة؟
لو كان الرجل هو العقيم
راح يوجهون توجيه للمرة اتحملي؟
زين ليش هو مايتحمل مرتة اذا جانت عاقر؟
وطبعاً
مراح يگولون انُ هو عقيم
لا هو رجال عيب!
زين ليش؟
المرأة شنو أذيتها بالمجتمع
حتى تتحارب بهالطريقة؟
ليش يفضحوها والعالم كلها تعرف
انُ هي عاقر
بس هو لا؟ لازم ينستر؟
وهو مو لازم العكس لو اني غلطانة؟
مُجتمع عقيم بأفكارة وعاداتة
وتقاليدة ومانگدر نغير لان هالشيء من
زمن قديييم ابهاتنة وامهاتنة تربوا ؏ شي
شون نغيرة؟
وراحت البنية تركض ورا رجلها
ليش احنة النركض وراهم؟
لاتصيرن مثلي
تتدمرن مدى الحياة..
وخلص شغلي
و وكفت انتضر جاسر دخلت
لغرفتة وهو يحجي ويا مُحللة ثانية
اسمها فاطمة
هي البنية لطيفة
اني احبها وهمة نازعين كمامتهم ويحجون
ويسولفون ما منتبهين لأي احد
ملاك:-جاسر
مارد علية رجعت كررت اسمة
مرتين تلاثة ماكو
ملاك:-يمعود ابو الغيرة
وهو ولا يمة يسولف مندمج
ويمكن جاسر لگة حُبة وأخيراً!
ضحكت وهزيت ايدي ولزمت
ايدي عبودي وتعقمنة وطلعنة للبيت
مريت ؏ السوبر ماركت واخذنة غراض
واني اگلة شنو تريد وهو يستحي
ورجعنة للبيت ناكل متونسين بكل شغلة
نسويها علمتة يلفظ الحروف الأنكليزية
والألوان نص ونص مكسر بس يكدر
يحجي وصار يمشي واني وياه بكل خطوة
نلبس نفس الشي
ونطك صور وانزلهن حالة ؏ واتساب
او ؏ انستگرام وغيث يشوفها مرات مايخلي
گلب ومرات لا يخلي
يغار حيل من عبدالله
ومرة جانت عندي عطلة
نايمة بصف عبود ؏ جربايتة وراسي
برگبتة وسمعتة يسولف
فتحت عيوني ؏ كيف
شفتة فاتح كامرة ويا ابو ابتسمت
وضميت راسي اكثر برگبة عبود
وهمست:-صباح الخير
دار وجهه علية
وباسني بخشمي:-ثباح اللور
ضحكت:-النور حبيبي مو اللور
غيث:-عيني نحن هنا
ابتسمت:-هلو شلونك
غيث:-هلو بيج شلونكم
ملاك:-الحمدلله شلون صرت
غيث:-؏ الله
ملاك:-شوكت تطلع من الحجز؟
غيث:-الاسبوع الجاي يمكن
هزيت راسي وهمهمت بخفة
باسني عبودي بحلگي حيل ضحكت
وعضيت خدة
دخل ايدة بصدري وهو متعود ؏ هالحالة
وباسني بكل جهه بوجهي
وغيث يستغفر
غيث:-وخري هذا خلي اسولف
شلت الكامرة وجهتها علية
واني نص صدري طالع وعبودي يبوس
برگبتي
غيث:-استغفر الله عود شنو تخبثين علية انتي وابنج
ضحكت:-ليش نخبث
غيث:-عبدالله وخر عن ماما عيب
عبدالله:-ما
غيث:-اذا اجي اكتلك ترة؟
عبدالله:-ما
غيث:-عبود وخر حرام الله يذبك بالنار عيب
حبيبي وخر ايدك
باوعلي وعيونه البريئة
تاكلني اكل:-ثدك؟
ضحكت وجسمي يهتز:-لا حبيبي معليك بـ بابا عادي
غيث:-استغفر الله ياربي سدي الكامرة ملاك
سديت الكامرة وسولفت ويا سوالف
عادية هو يگلي شلونة الشغل ويستفسر اكثر
ومَرت كم يوم واجاني جاسر
تخصرتلة:-ها هم جايني بمشروع جديد
ضحك بخجل وگال:-شسمة اريد اخطب
دمعت عيوني واني ابتسم:-فاطمه مو؟
دار راسة وحك حاجبة
وهو يضحك:-شمدريج
ملاك:-عيونكم واحد ياكل الثاني شنو عبالكم ما انتبهه
ضحك اكثر وگال:-البنية حبابة
واهلها خوش ناس واخوها اعرفة وهي صديقة
ملك من ايام الجامعة فـ شفتها مُناسبة
ملاك:-اذا خوش توكل ؏ الله
جاسر:-لازم ننتضر غيث
ملاك:-ليش تنتضرة عادي عُمري
اخطب وبس وهاي فترة كورونا واكيد راح
يطول غيث حتى لو يطلع من الحجر
هز راسة واتفقنة نروح احنة النسوان
خطوبة بعز كورونا
لبسنة كمامتنة ورحنة اني ورغد
وريم وعمة غيث زهرة
رحنة للناس ؏ طبيعتهم ناس حبابة ولطيفين
مثل بتهم وهي من گد ما بيضة صارت
خدودها حمرر
اتفقنة ؏ مهر والخطوبة
وهي من نحجي تعوفنة وتروح
ونضل نضحك عليها
ورا ايام راحوا مشية وهم مو زلم
هواي قليلين وهمه مصورين نشرتهم ؏ الستورري
ثواني وغيث شافة
ودزلي:-منو خطب؟
ملاك:-جاسر
غيث:-ها؟ المن؟
ملاك:-وحدة وياه اسمها فاطمه
غيث:-فاطمه احمد؟
ملاك:-اي هي
غيث:-اها اي حبابة البنية صارلها ويانة هواي
ملاك:-يستاهل جاسر تلوگلة
دزلي گلب عفتة ورحت
واني وجاسر وملك نخطط للخطوبة
ومَرت أيام حلوة ماكو بيها مُر
ورجعنة اني والدكتور الصغيروني عبود
للبيت نضحك وهو ضحكتة عالية
صوتة يشبه صوت بنية مرات من يحجي وياهم
يضلون صافنين من گد ما صوتة يشبهه
البنية
دخلت لجوة للصالة وشفت غيث
نايم ؏ التخم
اشرت لعبودي:-اششش بابا نايم
عبدالله:-اششش
واحنة نمشي ؏ اطراف اصابعنة ودخلنة
للغرفة بدلتلة واني ردت
ابدل ضيگت عيوني لعبد:-راح ابدل دور وجهك
عبدالله:-ايييب(عيب)
ضحكت وگتلة:-غمض عيونك لعد
غمض وخلى ايدة ؏ وجهه
واني بدلت وخلصت وطلعت لازمة ايدناتة
الزغار
وگفت ؏ الكاونتر وعبدالله يتمرجح برجلي
؏ الميز وياكل خيارة
واني افتر واطبخ وماطلع صوت
دايرة وجهي اخبط بالمكونات وسمعت صوت
عبدالله صاح:-بااااباااا
بقيت دايرة نفسي
واسمعة يبوس بي ويهمسلة
بصوت تعبان:-شلونك؟
عبدالله:-ذين
غيث:-روح هناك راح يطلع افلام كارتون
سمعت ركضة عبود
وحاوط خصري من ورا ويشم برگبتي
؏ طولها:-شلونج
بعدتة عني وبوستة مثل
اي بشر نسلم علي وگتلة:-الحمدلله ؏ سلامتك
ان شاءلله ماتشوف شر
خلة گصتة ؏ گصتي
وباس شفني بعدتة بسرعة:-لا يجي عبدالله
غيث:-مشتاقلج ملاك مشتعل شعل
هزيت راسي وهمست:-اممم وخر عني غيث
يشوفنة عبودي
غيث:-تؤ عوفي عبدالله مايجي
ملاك:-لا هسة يجي هو يفتر ويلعب وخر
غمض عيونة بصبر
وابتعد وهو يتأفاف واني رجعت اطبخ
لحد ما خلصت وغيث يفتر وراي
واني ابعدة عني
صبيت الغدة والتمينة
؏ الطبلة وناكل وغيث يگول
لعبودي:-شسويت ويا ماما
عبدالله:-دكتول
غيث:-صرت دكتور
ملاك:-عبودي احسب من ون للتين يلا
تحمحم وهو مستحي:-ون ، تو ، فلي ، فول ، فايف ، ثكث ، ثڤن ، ناين ، تين
ملاك:-لا بعد وحدة
هز راسة:-لا ناين تين
ملاك:-بعد أيت
هز راسة يضحك
ملاك:-زين بابا يالون لابس؟
غمض عين وفتح عين:-بلو
ملاك:-يالون بالعربي؟
عبدالله:-اذلق
غيث:-اذلق اسكت يابة فشلتنة وفضحتنة
ملاك:-هو شوية شوية ويتعلم
غيث:-زين معلمتة هيج
ملاك:-جانت فترة حلوة علمتة هواي اشياء وتونسنة سوة
غيث:-ارتاحيتوا مني يعني؟
ضحكت:-تريد الصدك لو ابن عمة؟
غيث:-لا حبي احجي الصدك
ملاك:-اي والله ارتاحينة وتونسنة وطلعنة
والله ونسة
غيث:-اي هيلگة واستهتار زايد
ملاك:-لا عيني وياي رجال قابل شنو اطلع وحدي
غيث:-اي باع الرجال من الاذلق مالتة
ملاك:-ما اسمحلك تحجي ؏ ابني
باوعلي وضيك عيوني وهز راسة
لحد ما خلصنة اكل
شلت الاماعين وغسلتهن وغبث
همسلي:-نيمي عبدالله ولحگيني
هزيت راسي وعبود هالمرة قفل
يمعود دنام يريد يلعب
ملاك:-عبودي راح اصعد فوك شوية واجي مو تروح بعيد؟
هز راسة وهو يگول:-عنننن
بستة بخدة وصعدت
غيث ستوة طلع من الحمام جرني
من خصري واني بملابسي حتى ما بدلت
او رتبت نفسي اساساً من 3 سنين هذا
اليصير بالعلاقة مالتنة ماكو شعور ولاتبادل
مرت نص ساعة وسمعنة صوت
الباب تندك وعبودي يصيح:-ماااااماااااااا
همست:-هذا شلون صعد
غيث:-ابن الكلب گام يخبث شصعدك ابن
الزمال
ملاك:-تؤ تؤ
غيث:-عبودي ماما مريضة روح انزل
ملاك:-شنو ينزل يمعود وخر عني
رجع يدك بالباب:-ماااااماااااااا الععععاااااب
ركع غيث گصتة بگصتي
وهمس:-يالعباس اخذ عمري
ملاك:-وخر غيث لايوگع من الدرج شو
گام عني وهو گالب گصتة
نتر:-البسي ملابسج
جريت ملابسي واني تعبانة
من الدوام ولسه بدون نوم واني متعودة
انام اول ما ارجع
فتح الباب غيث الة
وتخصر گبالة:-شعندك شتريد؟
عبدالله:-ماما
غيث:-انعل ابوك لابو حتى امك طبب يلااا
طب وهو يزحف
ضحكت و وصل يمي وجريتة صار فوگاي
حط ايده بصدري وراسة
؏ وجهي ويباوع لأبو ويضحك:-انت منين متوارث
هاي الخباثة؟؟؟
ملاك:-معليك بي لاتحجي عليّ
غيث:-انعل ابو لابو الخلفة لابو حتى الجابة يمي
اخذ ملابسة ورگع الباب حيل
وراه باوعت لعبودي وضحكت:-انت تخبث عمداً؟
ضحك واني ابوس واشبك بي
ملاك:-اموووت اني بالخبييث امووووت
ضلينة نضحك سوة وطب غيث
انخلسنة سكتنة ثنينة
تمدد وجر تلفونة وهو وجهه مايگصة الطبر
وحواجبة عاگدهن عگد
همست لعبودي:-روح صالح بابا گول اسف
عبدالله:-اثف
ملاك:-لا ولك روح لبابا وگلة اسف بابا
هز راسة وگام عني
وهو يصعد ؏ جسم ابو باسة
بصدرة وگال:-آثف بابا
غيث:-روح
ملاك:-لاتعامل الطفل هيج
غيث:-اسكتي لاتنكتلين
ملاك:-اضرب وشوف شيسوي بيك
غيث:-صلفة انتي وابنج
ملاك:-سندي هذا محد يندك بية
غيث:-دنجبي
عبدالله:-بابا انا اثف
باسة براسة ببرود واني
اخذتة لحضني وضامة راسة
لصدري:-اني احبك اموت عليك تحبني عبود؟
عبدالله:-اواية(هواية)
بوستة بگصتة وغيث يبلع بريگة
بحرگة وعروك ايدة بينت
عفتة ونمت واني مرتاحة عبودي بحضني
ومَرت سنة رابعة
ودخلنة 2021 وماكو شي تغير
عدى حُبي لعبود يزداد يوم عن يوم اشكر
ربي على كلشي وعلى النعمة اللي
انطاها ألي
واتذكر آية بالقُرآن
"وَعَسَىٰٓ أَن تَكۡرَهُواْ شَيۡـٔٗا وَهُوَ خَيۡرٞ لَّكُمۡۖ وَعَسَىٰٓ أَن تُحِبُّواْ شَيۡـٔٗا وَهُوَ شَرّٞ لَّكُمۡۚ وَٱللَّهُ يَعۡلَمُ وَأَنتُمۡ لَا تَعۡلَمُونَ "
اتطمأن بهاي الآية
رغم كل الصار بية كرهتة وتعقدت
ويمكن ماگدرت اتجاوز بعض الاشياء
بس ثقتي برب العالمين ما نقصت
ابداً خلو عدكم ثقة شما تأخر الشئ وشما
اتطاكم رب العالمين صدگوني هو هذا اللي
احسن الكم هو هذا المكتوب ؏ كصتكم
من يوم ولادتكم ان كان نجاح او
كلشي رب العالمين ميضيع تعب احد
ابداً مهما طولت السنين والدهور..
ملاك:-غيث باجر نروح للنجف مو؟
غيث:-اني اذا انطيج حجاية تضلين تنگين فوك راسي
ملاك:-مو ادري بيكم الزلم
حجايتين وتتغيرون
غيث:-بابا گتلج اي آخذج والعباس آخذج
ملاك:-عبالي
باوعلي بتك عين وسكت
وبهالأثناء جنت انطي احداث قصتي للكاتبة
مُعاناتي اشوفها واتندم ؏ كُل لحظة من عمري
راحت
كلشي ولا الندم
الندم ينحر الرگبة شوية شوية ؏ طول الحياة
جربوا كلشي
بس لاتجربون تندمون طول عمركم
حسبوا حساب لكل خطوة تخطوها
حتى بالخطوة الثانية مراح تتندمون وتتمنون
ترجعون للخطوة الاولى حتى تصححوها
وتكملون لان البداية اذا غلط معناها كلشي
يخرب..
وثاني يوم رحنة واني ملبسة عبودي
ملابس ثخينة حتى لا يتمرض
واحنة نمر ؏ گبور واتخيل
نفسي من بينهم؟ لازم نستعجل بحسناتنة
لازم نحاول منصير هنا واحنة متروسين
ذنوب وهنا راح يكون اعضم ندم
ونفس الشي
ونرجع ونگول ياليت قدمت لحياتي؟
نگدر نرجع بعد؟
لا!
بوست صورة أمي
واني احاجيها واسولفلها ؏ عبودي
وسوالفة وابتسم ودموعي تجري وابوس
كل شبر بصورتها
لحد ما حسيت كافي
تعبتها وتعبت روحي گمت لغيث
مسح دموعي وباس راسي
وعبدي لزم اصبعي وباسة دنگت بستة
وشلتة ومشينة
همست لغيث:-اخذني لقبر زينب
عگد حاجبة وگال:-شتسوين
ملاك:-ازورها اخذني الها
هز راسة ساكت ومشينة بالسيارة
وصلنة يم مقبرتهم وعبودي يسألني وين
رايحين واني ساكتة وبالع ريكي بحرگة
وصلنة للسرداب جان ننزل لجوة
غيث گال:-شون ندخل عبود ملاك مايصير طفل
ملاك:-ماعلي شي نزلة
نزلة وراي وقابلتني صورتها بالعباية
مبتسمة غمضت عيوني وذبيت
نفس واخذت ايد عبودي وگعدت وگتلة:-عبودي
عبدالله:-ها
ابتسمت عيوني مدمعة:-هاي ماما
عبدالله:-وين؟
ملاك:-هاي ماما جابتك من بطنها
ضل يباوع للصورة ورجع باوعلي:-ماما تو؟
ضحكت وگتلة:-اي ماما تو
عبدالله:-ابوثها؟
هزيت راسي سريع وهو باس
الصورة وضحك گتلة:-اسمها ماما زينب
رجع هز راسة مفتهم
بست خدة وخليت غيث يطلعة
تلمست صورتها وهمست:-حافضت ؏ امانة
العفتيها يمي رغم كلشي سويتي
بس اشكرج عفتيلي ثمرة تعبي هاي السنين
كُلها
قريتلها الفاتحة وسور
وصعدت لفوك مقبط صدري كلة
عبودي ينكث بعبايتي ويگلي:-ماما تُلاب
ملاك:-اي حبيبي هسة اغسل
جانت مقبرتها قريبة ؏ امام
تمشينة غيث لازم ايدي وعبودي لازمتة
ونمشي ؏ كيف ويا
وصلنة للامام دخلت للمغاسل توضيت
ورتبت روحي وطلعت
دخلوا همه لضريح واني دخلت وحدي
صليت وبقيت اذب تعبي يم
الأمام علي واحاول استعيد طاقتي من جديد
اكثر من نص ساعه شلت غراضي
وطلعت لگيتهم منتضريني ومغمضين من الشمس
رحتلهم ورحنة اخذنة مكان
وگعدنة بي بقيت انتضر شوية
ودك تلفوني "مريم"
ملاك:-ها وينج؟
_وين انتي؟
ملاك:-گاعدين بالنص دوري علينة
_شلابسة؟
ملاك:-شال ماروني
_هاي شفتج
ابتسمت وعيني تدور عليها
اي هي كاتبتكم
گمت سلمت عليها
وهي باوعت لغيث وهمست:-شونك عمو
غيث:-اهلاً وسهلاً
گعدت تبلع بريگها مستحية:-شلوونج
_زينة انتي شخبارج يمة جسمي يرجف
ضحكت:-ليش
_استحي جيبي ابنج خلي التهي بي
سحبت عبدالله
وغيث همسلي:-منو هاي
ملاك:-هاي الكاتبة التكتب القصة
هز راسة متفهم وهو يباوعلها
مضيك عيونة
رجعت باوعتلها وگلت:-غيث يباوعلج
_التهي سولفي وياي شونج شكو ماكو
ضحكت:-ماكو شي انتي شلونج
_زينة يمعودة طايح حضي
غيث:-شگد عمرج انتي؟
بلعت ريگها وانطتة عمرها
عکد حاجبة وگال:-متأكدة لو تضحكين علينة؟
عرفتة علمود نعومتها گتلة:-لا هو عمرها هذا
غيث:-شنو مريضة
_لا
غيث:-لعد ليش هيج ضعيفة
خزرتة حرج البنية رجع کال:-بس اريد
اتأكد اريد اعرف السبب؟
_هو اني راجعت دكاترة وعادي ضعف
طبيعي يعني كالو
ملاك:-ترة مابيها شي بس هي ناعمة كلش
غيث:-يگول وحدة بالرابع ابتدائي
همست:-زين بالرابع ابتداىي ابوية
يگول طفل نفاس
ضحكت بصوت ناصي واني اخلي
ايد ؏حلگي رجع غيث كالها:-اكو دكتوره هنا
اسمها *** تكدرين ترحيلها هي احسن دكتورة تغذية تقريباً
انطتة اسم الدكتورة
الكامل كاللها:-اي هي
_اي رايحتلها
غيث:-وراثة عدكم؟
_اي
هز راسة ساكت
واني همستلها:-معليج والله حلوة نعومتج
_ادري ترة حتى اني معجبة بروحي بس ماكدر
احجي وياه
ضحكت:-حلوة والله وخاصةً بهيج عمر
ضعف لطيف مو كلش
هزت راسها وسكتت
اخذت ايد عبودي وخليتها بصف
ايدها:-اسمن من ايدج
كرصتني كرصة طفرت بيها
وطلعت صوت ضحكتي:-انتتوا جايبيني هنا تتنمرون علية هو مو صوجج
ملاك:-انجبي اتشاقة والله
ضحكت وكالت:-اني اعلمج اذا ماخلي
قصتج اسوء قصة فـ لا اتسمى مريم
واخليها كلها تغلط عليج واخلي كمال هو الحباب
ملاك:-دسويها وشوفي غيث شلون يطيح حضج
_والله اسويها خايفة منكم
ضليت اضحك وياها واتنمر عليها
وهي تهدد بية لحد ما راحت
غيث:-والله ما توقعت هيج
ملاك:-عادي ترة هم جيل هالوكت ماياكلون
هواي
ضحك واشرلي اجي يمة
تقربت گعدت بصفة رفعت راسي
لقبة أمير المؤمنين عليه السلام
واني ابتسم همس بصوت ناصي:-وحق
داحي باب خيبر احبج
ابتسمت بهدوء بدون اي ردة فعل
رجع همسلي:-ليش ما تبادليني؟ صار 4 سنين مو كافي؟ تعبتيني
ضحكت:-4سنين بس؟ وتعبت؟ اني
من عمري يوم وماشكيت
غمض عيونة وذب نفس وباس ايدي
سحبتها رجع كال:-وابقة احبج للابد
لو بس اباوع لعيونج راضي
ما جاوبتة وبقيت دايرة وجهي
ابتسامتي اتسعت اكثر
لمن شفت روحي ودنيتي
سمع ابو ودار وجهه علية وضحك
وطلعن سنونة اللي بالبداية
وگال بصوت لطيف خلاني
اطير مثل الطير فوك القبة
عبدالله:-اهبج ماما...
