رواية لأني عاقر الفصل التاسع والأربعون بقلم مريم خفاجة
عيونك كبار شگد عمرهن؟
اسم الله عليهن خاف اضرهن
صابني؟
بس صوابهن خير
كون الله لايچفيني شرهن..
لـ أحمد المُرشدي
...
ابتسمت:-احس مو مال نرجع من البداية
غيث:-لا نرجع ومن اول لحظة
ضحكت:-شيرجعنة
غيث:-ارجع لو قرن كامل لورا ارجع واني الممنون
ضليت مبتسمة
حط گصتة ؏ گصتي وايدة
؏ خصري:-احبج والله
تلمست ازرار القميص
وهو رجع گال بهمس:-ارجعيلي ملاك ارجعي عيون أمي القديمة مشتاقلها احس بعيونج برود مثل برودة الماي وجاي تأذيني
ملاك:-الصار بية مو قليل
غيث:-عاتبيني وطلعي احزانج كلها وخلي
ننهي هاي المهزلة
ملاك:-وهي بالعتاب؟
غيث:-شنو تردين اسويلج
ملاك:-ماكو شي تگدر تسوي
غيث:-راح تموتيني
ضحكت:-ماتموت لاتخاف
طلع عبودي مد راسة:-ماااااماااا
ابتعدت عنة ورحت لعبودي
وشلتة وباوعت لغيث يباوعلنة ويستغفر
صحت:-تعال يلا
طب وهو يهز براسة
دخلنة لجوة واحنة نضحك
وبالليل عبودي طنگر:-خلي نطلللللع بالسيياارة
الخضرررة
ملاك:-ماما تعبانين الساعة بالعشرة
عبدالله:-ما خلي نسوي سباااق يلاا
غيث:-يا سباق انجب
راح لغرفتة يبجي رحت وراه ماقبل
يرضى رجعت لغيث اضحك:-گوم يلا راح يفضحنة
غيث:-خلي يولي شيريد لازم نگلة اي
ملاك:-خطية يبجي يمعود ماگدر اشوفة يبجي
غيث:-ام الگلب الرقيق
ملاك:-اذا ماتگوم احنة نفتر وحدنة
غيث:-هلووووو تاه العراق
ضحكت وگتلة:-يلا
گام وهو يهز بايدة وعبودي مشى
گدامنة وهو مطنگر وميتحاچة عود زعلان
صعدت اني بسيارتي
وهو بسيارتة فتح باب الگراج
واني ردت اطلع بالأول ضايقني
صحت:-غييييث لاتخبببببث
غيث:-فنج اذا طلعتي يلا
ملاك:-وخر بس ارجع شوية لورا
غيث:-طلعيها ترة تگدرين
ملاك:-ماگدر شلوووون
غيث:-تگدرين فكري عدل يلا
ضليت اجيبها منا احطها منا
گتلة:-والله اذا انشخطت اشخط عمرك كلة
غيث:-يا ادبسز
ملاك:-بس شووووووية اررررجع
عبدالله:-ماما رجعي ورا
رجعت لورا شوية وفريت السيارة
وصار مجال ضحكت وطلعت وهو طلع وراي
نزل من سيارتة سد الباب وصاح:-احنة
شلون بالزعاطيط بتوالي الليل
ملاك:-يلا يلاااا
وگفنة ثنينة نفس المستوى وعبودي
مكيف يضحك ويگول:-ماااما انتي فوزي
ملاك:-ولك اخاف
عبدالله:-لا ماااااماااا
ملاك:-اسكت
فتحنة اتصال وهو گال:-ها بيكم حظ عود صايرين
ملاك:-ديلا والله هسة نغلبك
غيث:-خلي نشوف
عبدالله:-يلا ون توووو ثررررري
وهو مشى سريع واني بعدني
افتح بالسيارة وصحت:-غيييييث والله غشااااش
عبدالله:-يلاااااا
مشيت گوة وهو طاير غيث
ويضحك علينة يخفف شوية ومن نريد
نوصل يمة يمشي سريع
واني اخاف امشي بسرعة والدنيا ليل
ملاك:-حباب ارجع بس شوية
غيث:-ها يلا فوزوا
عبدالله:-انت غشاش
غيث:-دنجب هي امك فاهية
ملاك:-والله مو فاهية انت ماگتلي افتحي السيارة
غيث:-يعني يا خوثة هو انتي طلعتيها
مشتغلة تطفيها ليش هاي هيج الثول واصل مرحلة
ملاك:-من وراكم الزلم الله لاينطيكم
غيث:-هم گالت الزلم
ملاك:-الله ياخذكم ان شاءلله ونخلص منكم يلا نرجع
عبدالله:-مااا
ملاك:-اسكت لو اذبك بالشارع
غيث:-دمشوا فهاوة يلا هاي اخر فرصة
راح اوگف
اجاني الحماس گتلة:-يلا
مشيت عبرتة وهو بثانية
وحدة عبرنة دگيت ؏ الستيرن حيل
گتلة:-اللللله ينتققققم مننننك
وهو يشهك بالضحك
كال:-لوفي ورجعوا يلا وانجبوا
ملاك:-نذل والله
غيث:-اني اعلمج
ملاك:-عبودي بابا راح يضربني
عبدالله:-انتي خسرتي لازم نضربج
ملاك:-ايا ادبسز امداك جا وين زماطك الي
عبدالله:-ماما انتي خسرانة غيرررر
ملاك:-ويعني عادي يضربني؟
ضم شفايفة وضحك ضربتة ؏ راسة
ورجعنة واني گالبة گصتي دخلنة لجوة
وهو ورانة يضحك
ملاك:-لاتضحك ترة هي مو فد شي
غيث:-جا ليش راح تبجين
ملاك:-عليمن ابجي اوي والله تعال عبودي ماما
خلي ننام
غيث:-دنامي يم عبود وشوفي شسوي بيج
ملاك:-شتسوي مثلاً؟
غيث:-اليعجبج والمايعجبج
هزيت ايدي ودخلت
نزعت جبتي وشالي وگعدت ؏ القنفة
وگتلة:-اكو حلويات رتبهن بأماعين وجيبهن
غيث:-لا بالله؟
ملاك:-والله جا بس احنة نخدمكم
غيث:-اسويلج اضافرج بعد واحط الطشت
واغسل رجليج ها؟
ملاك:-اي والله تعبانة
غيث:-اخذني الله ان شاءلله
ملاك:-آمين انت وكل رجال وياك
اجة علية صحت
خنگني من رگبتي ؏ كيف واني ادفع
بي واضحك عافني وراح وعبودي وياه راحوا
يرتبون الحلويات
اجو وعبودي لازم بطل الببسي اللي
اطول منة ويمشي بثگل ضحكت واخذتة
منة وگعدوا بصفي
و واحد يتناگر ويا الثاني
اذا غيث لزمني عبودي يتعارك وياه
واذا عبودي لزمني لو باسني غيث يضل يصيح
واني بالنص اضحك عليهم
ملاك:-جيبولنة هنا بطانيات وخلي ننام
غيث:-ويييين هنا گومي نصعد فوك
ملاك:-سوالفك بطلهن وگوم عبودي جيب بطانيات ثنين ومخاديد
عبدالله:-ننام هنا؟
ملاك:-اي حبيبي
عبدالله:-يسسس
غيث:-شو انتي تتصرفين بكيفج
ملاك:-هاي شبيك يا حَبيبي هنا حلوة النومة
غيث:-باردة عمي الدنيا تصل
ملاك:-نتغطة وانت اشبگنة اني وعبودي ونتدفة
غيث:-واني منو يدفيني يمة؟
ملاك:-ادفى وحدك
غيث:-والله نذلة
ضحكت وبست خدة وهو يباوعلي
تك عين وعبودي ينگل بالغراض يجيب ويحط
لحد ما خلاهن مسطرات وبطانيات
مرتبة
ابتسمت وفتحنة الصوبة وبعدناها
ونمت اني بنصهم دايرة نفسي عن غيث وهو
حاضني من ورا ولازم ايدة وحاضنة
عبودي بقوة
ونمنة بحنان...
وثاني يوم الصبح مگدرت اگوم
من الم بطني وضهري احتار غيث شيحط
علاجات:-من گتلج مانام هنا بس تعاندين
عمي مو نسوان
ملاك:-لاتححححجي ويااااي
غيث:-اشش هاج كومي شو اخذي بونستان هسة تصيرين زينة
گمت حطها بحلگي وشربني ماي
رجع نيمني ؏ جهه وخلة الصوبة قريبة
مني وغطاني وضل واگف
فوك راسي:-روح لدوامك هسة اصير زينة
غيث:-خابريني اذا تخربطتي
هزيت راسي ورجعت حضنت عبدالله
وهو لف ايدة ؏ رگبتي
وسمعت غيث راح رجعت غفيت والالم
يذبح
والغدة مدري شلون سويتة
ورجعت لمكاني نمت متلفلفة وعبودي
يمسح ؏ خدي
لحد ما اجة غيث:-السلام عليكم
عبدالله:-وعليكم السلام
ابتسمت ؏ سلام عبودي
حسيت ايد غيث تتلمس بشرتي:-ليش مسوية
اكل اني مو گتلج لاتسوين
ملاك:-جا شناكل
غيث:-اني جبت من برة شون بعنادج شلون
صرتي
ملاك:-مو زينة رجلية ماتن
غيث:-شربتي مي حار؟
ملاك:-اي
غيث:-شوية وتصيرين زينة بلكت ضلي نايمة
ملاك:-خلي اگوم اصب
غيث:-اني اصب نامي بس خلي اغسل
رجعت نفسي
وتلفلفت وهو راح صلى وغسل
واجة عبودي فرش السفرة وغيث يصب
ويحطون ؏ السفرة
اجة گومني ؏ كيفة وگعدت
ملفلفة روحي تلفلف وآكل ؏ كيف
غيث:-اوكلج
ضحكت:-شسالفة
غيث:-متأذية غير
ملاك:-حتى لو مو لهل درجة اگدر اكل
ضحك بهدوء وعبودي ياكل بترتيب
ويمسح حلگة كل ثانية
لحد ما خلصوا بقيت گاعدة ومتجية
روحي ؏ قنفة شالوا الاماعين
وعبودي جر كرسي وخلاه يم السنگي
وضل يغسل ويا ابو ويتناگرون
واني اضحك بخفوت عليهم
لحد ما اجوني وعبودي يصيح ؏ غيث:-اننني
ماحببببك
غيث:-؏ اساس اني احبك
ركضلي اول واحدة وصار فوگي
غيث:-لككك امك مريييضة
عبدالله:-ماما تحبيني؟
ملاك:-اموت عليك
باوعلة وضيك عيونة:-اني عندي ام وانت ماعندك
رفعت عيوني ؏ غيث
ضحك وگعد ورانة درت وجهي عليّ
صافن ؏ التلفيزون
خزرت عبودي:-ليش هيج حجيت؟
عبدالله:-شنو؟
ملاك:-ام بابا ميتة خطية ليش هيج گتلة
عبدالله:-هو مايحبني
ملاك:-لا يحبك شون مايحبك هو ابوك
عبدالله:-لا مايحبني
ملاك:-والله يحبك ودائماً يبوسك انتَ ونايم
واليوم هو قبل لا يطلع باسك وراح
ويشتريلك ويجيبلك واشترالنة سيارة
وامس ماخلاك تبجي هواي وطلعنة ليش هيج تحجي عليّ
عبدالله:-صدك؟
ملاك:-والله گوم صالحة يلا
هز راسة وگام يبوس بأبو
هو اني ادري الغلط بغيث وادري بي مو كلش
ويا عبود ودائماً اگلة لاتحسسة انتَ
بعيد عنة حتى لو مجاملة بس مجاي
يقتنع يوم يصير زين وايام يضل يصيح
بي ويتعارك وياه
مُمكن السبب هو ماحس بحنان الأب
فلذلك ميگدر ينطي
ومَرت أيام ودخلنة بـ2023
وأيام حلوة مرت غيرت آثاث بيتي كلة
وجنة نقسم الفلوس بيني وبينة
كلشي بالنص ومرات هوَ الأكثر ميرضى
اصرف هواي
كلشي غيرت واحس صار كلشي جديد
وگعدنة بالبيت اللي هوَ مسجل بأسمي فترة
وعبودي يفتر
ضايج:-هنا نضل؟
ملاك:-ليش شبي مو حلو؟
عبدالله:-ماريد اريد غرفتي بيتنة ذاك جبييير
ملاك:-اي بس هذا حلو
هز راسة بـ لا:-ماكو غرفة
ملاك:-انت مو تحب تنام يمي؟ لعد ليش
تريد غرفة هسة
عبدالله:-ما اريد غرفتي
ضحكت:-كم شهر ماما ؏ مايكمل كلشي
وراح يصير البيت حلو ونشتري اشياء جديدة وحلوة
عبدالله:-صدك؟
ملاك:-والله
هز راسة وسكت
وراح يلعب واني وغيث نروح نشتري
اثاث جديدة ردت اغير كلشي
ماريد اضل ؏ القديم خلص كلشي يروح
ويا وكتة نحاول نتخطى
ونخلي كلشي جديد حتى الأماكن
الگاعدين بيها
بيت اهل زينب دائماً يجون ؏ عبودي
وهو يحبهم لان بيبيتة تجيبلة العاب دائماً وهو يتونس عليهن
وهمة يحبوا
واني اموت من الغيرة من وراهن
يضلن يبوسن بي ويشمشن بي
لحد ما رجعنة للبيت
وكلشي متغير تغيرت نفسيتي
وضليت افتر بي واضحك كلشي غيرنة بي حرفياً
اتمنى اللي بالداخل هم يتغير...
اما غيث
فـ هو يحاول يصحح كل غلط أذاني
وكل دمعة نزلت مني يحاول قدر الأمكان
ولو جزء زغير
اما عبودي
فـ اكيد محد يجي بمكانة
وحُبي الة مستحيل احد يوصفة
ومشت ايام واجت ايام
وبيوم اجتني رغد بيدها تلفونها
وهي ماتجي الا بالمصايب بس هالمرة
تختلف
ملاك:-غردي خية ادري بيج تجيبلي خبر وتجين تركضين
ضحكت:-الغسل الج تعاي اگعدي
ملاك:-اوكفي خلي الچاي يتهدر
انتضرت لحد ما تهدر
وصبيتة
وجبتة وهي تطكطك بالتلفون
گعدت يمها وهي بدت
تسولف واني استعملها
ملاك:-وين سوت؟
رغد:-بأيران وهاج اسمعي بصماتها
وطبعاً صارلها 7 سنين ماعندها اطفال ونسبتها
مثلج ثنين
فتحت البصمات
وبقيت استمع وگلبي يدك
وماعرف شون اوصف الشعور
ملاك:-اخاف
رغد:-لج ماتخوف هي بسيطة
حتى مو عملية كُبرى وتدرين صنفوها احسن
من الحمل الطبيعي والله امس سهرانة
؏ گوگل الليل كلة ابحوش وشفتها بسيطة
وادخلي ؏ يوتيوب وشوفي
هو بس يخصبون البويضات بالحيوان المنوي
نوب يزرعون البويضة هاي المخصبة
بالرحم ها اها فضت راحت
ملاك:-واذا مانجحت اموت
دمغتني:-عليمن تموتين هي هاي الحياة
اذا ماتجربين بيها كلشي شعندج عايشة
ملاك:-مو بهالشي اجرب اخاف والله
رغد:-ولج الغباء الشايلتة موهبة
ماتأذيج نفسيتج تتأذى مو مشكلة اني اجيج
كل ساعة اصفگج راشديات وتصحين
بس هي بصحتج ماتأذيج والله مُجرد
تنضيف للرحم يسوولج مادري اني
جبت الحجي من گوگل انتوا بعد شوفوا
وبحثوا اكثر اخاف غلط
ملاك:-مايرضى غيث
رغد:-نقنعة اني وياج
ضحكت:-ليش مصرة
ابتسمت بحزن:-هواي تعذبتي ؏ اقل
هالشيء يعوضج
هزيت راسي:-الله كريم
وهي بقت تسولفلي ؏ بت عمتها
وتزيد الشغف بداخلي
وادري بغيث مراح يرضى
سويت غدة وانتضرتة ؏ نار حد ما طب
اني اشتعلت سلمت عليّ وراح
صلى واجة
گاعدين نتغدة تحمحمت:-من استقبالج
اليوم ما مطمن
ملاك:-ياااا واني مو يومية استقبلك
هو هاي مايغزر بيكم...
قاطعني وهو يصيح:-ايييي الززززلم الززززلم افتهمت ومحمد افتهمت من ساعة السودة الصرت بيها رجال
شعلتن ابهاتنة
ملاك:-شو تصيح علية
غيث:-اسف واعتذر وحقج ؏ راسي ابوية
وهسة اكوم ابوسج من فوك لجوة
بس لاتنكدين
ملاك:-يلا اعبرها هالمرة عندي سالفة
غيث:-يلا اطربيني
ملاك:-اريد طفل
غيث:-عبودي شو احجيلي انگليزي
شون نگول صباح الخير
ملاك:-يووو غيث اسمعني لاتسوي هيج
غيث:-اطفال انابيب؟ لو تموتين
ملاك:-ليييييششش انتتتت ليييييششش هيييج تسسسسوي بيييية
غيث:-مامسوي بيج شي بس اذا مانجحت
مو يطيح حضج
ملاك:-لا والله عادي شبيك
غيث:-اي عادي وتجين تطلعين حرگتج بية ماكو اني اخاف عليج
ملاك:-حباب والله رغد سولفتلي مابيها اضرار
غيث:-سدي الموضوع هاي عبودي يمج وهذا هو
شتسوين بعد تجيبين جريذي ثاني
ملاك:-عبودي مو مني
رفع راسة علية عبدالله وگال:-ليش ماما
دنگت مسحت وجهي:-خلصت حبيبي؟
عبدالله:-اي غير نگوم سوة؟
ملاك:-لا اريد اسولف ويا بابا شوية روح للغرفة
عبدالله:-اوكي اني احبج
ملاك:-واني هم احبك
عافني وراح
واني مشابكة ادية ومخليتهن
جوة حنجي وهو ياكل:-ليش هيج متجاهلني؟
غيث:-ما متجاهلج يا حَبيبي جاي اگلج
ماگدر اخاطر بيج وترجعين متأذية
ترة هاي هم تأذي الصحة
ملاك:-شلون والله گالتلي رغد مايأذي
غيث:-اي هاي جايبتها من اليوتيوب باعي خلي اسولفلج
بدة يسولفلي شون
تصير العملية والخطوات
وصل لآخر شي گال:-يدخلون نوب انبوب رفيع يحتوي ؏ الأجنة يوصلوا للرحم في حالة
اي خطأ راح يصير نزف واكيد انتي
حضج مفول ورح تطلعين سالمة مو؟
وليش اخاطر بيج عندي ثنين منج مثلاً؟
ضحكت:-بس خلي نجرب
غيث:-ومن تموتين تفيدني تجربتج هاي
ملاك:-لا والله ماموت
غيث:-وانتي تعرفين الراح يصير؟
ملاك:-گلبي مرتاح والله
شرب ماي وگال:-تؤ اني مامطمن لهاي الشغلة شلع قلع هواي فكرت بيها ومارهمت وخاصةً من شفت خطورتها تراجعت قابل شنو ماريدج تفرحين
سكتت بعد شريد اجاوبة
خلصت اكل وغسلت اماعين وصعدت
فوك بوسني وهمس:-لاتضوجين ترة لو رب العالمين يريد نسوي هالشي ماخلة هالرفض بداخلي
ذبيت نفس وهمستلة:-مادري احس فرحت
من جابتلي الخبر رغد ومن حجتلي ماعبالي هيج
غيث:-صح مو خطرة كلش بس انا من خوفي عليج
هزيت راسي وهو جرني
الة واني تفكيري ضل بهالسالفة
مشكلة مشكلة اذا ضلينة نفكر بشيء ردناه والمقابل رافض
من گعدنة العصر شفتة ضايج
حيل بحيث عافنة وطلع گعد ؏ المرجوحة
برة ويدخن شلت الجاي
والغراض الباقية خليتهن بالحديقة
واجة عبودي بيدة كوب الحليب گعد بصفي
گتلة:-شبيك ماتجي
ذب نفس وداس الجگارة
وگعد گبالي يشرب ويصفن بأماكن ثانية
ملاك:-شبيك غيث سولفلي
غيث:-مادري
ملاك:-احجي عادي لو شي خاص؟
ابتسم:-ولو شي خاص شيصير مثلاً مراح اگلج؟
ملاك:-خاف يعني شي يخصك ضايج عليّ
غيث:-حلمت حلم
شربت الجاي وگتلة:-اي؟
غيث:-امج وأمي يگمطن طفل بس هو ابني يعني ماعرف شلون اوصلج الفكرة
بس هو ابني عود هوَ ويگمطن بي وانتي
صورتج بعقلي تضحكين
ضحكت ودموعي هلت
بعيوني:-صدك والله؟
غيث:-والله
مسحت عيوني وهمستلة:-حتى تذكر الحلم
من اجة عبودي للدنيا وگتلك خلتة بحضني
وگالت ديري بالج على عبدالله الرضيع؟
غيث:-اي؟
ملاك:-وانت جنت تحرث بالگاع ويطلع شي
اخضر وهذا حلمك معناها راح يجون
اطفال غير عبودي والله متاكدة
غيث گلبي والله مرتاح احس راح تنجح
حباب لاتخيب احساسي
ذب نفس وگال:-مادري
ملاك:-يعني شنو ماتدري انطيني جواب مقنع
غيث:-هي منية من بنات عماتي مسوية اطفال انابيب؟
مسحت عيوني:-سارة بت عمتك ام نور
غيث:-خلي اخابر رجلها واشوف
بس ما اوعدج اتحرى عن الموضوع كلة يلا
ذبيت نفس وعيوني مغوشة
من الدموع همست:-يارب يارب
لليل واني افتر وراه وخو خابر رجل
سارة وگعد يحجيلة عن العملية وشون تصير
وغيث وجهه يتكلب خوف
هو مادري ليش هيج خايف اكثر من اللازم
لحد ما سدة گلت:-ها
ضحك:-كافي اكعدي رجليج ماتن
ملاك:-دحجي غيث راح اموت
غيث:-باجر راح اروح لدكتورة لمياء
اعرفها واسأل اكثر هي مختصة بهاي الموضوع
بس لاتثقين زايد علمود لا تتأذين تمام؟
ماريد نفسيتج تتعب وصحتج هم
ملاك:-لا لا عندي امل برب العالمين
غيث:-ان شاءلله خير گومي ننام
لزم خصري وگومني وياه
وبقيت الليل كلة سهرانة وافكر
لحد ما أذن الفجر گمت
صليت گعدت ؏ السجادة
وهمست:-يارب لاتخيب ضني انطيتني هواي
اختبارات ؏ مدار حياتي كلها لاتختبرني
بهالشيء يارب
مسحت دموعي النزلن ؏ ادية
وگمت لميت سجادتي وباوعت لغيث
يباوعلي فتحلي ايدة دخلت بأحضانة واهتز
جسمي بالبُكاء مسح شعري
وگال:-ابوية اني وياج شيصير خلي يصير
واريدج لو يحطون ميت طفل گبالي
مايرف گلبي لا والله لا اريد طفل ولا احب
أأذيج علمودة ولو ما صايرة ذيج السالفة ويا زينب
لا چان بقيت هيج وياج للأبد ومافكر
ولا لحظة ولا يوم بهالشي صيري قوية
وتأكدي مراح اعوفج للنهاية
ملاك:-ادعيلي هواي
غيث:-انتي الراحة اللي بين صلواتي
شتحجين؟
ابتسمت وضميت راسي
اكثر بحضنة ونمت وجر هذا الوضع
اسبوع كامل غيث يفتر ويسأل وماخلة بشر
؏ الكرة الأرضية ما سألة
واني مقدرة خوفة علية
لحد ما اجة وهمس:-الاسبوع الجاي نروح لأيران
بجيت بحرگة واني احضن وابوس بي
وهو يمسح دموعي ويهمسلي بكلام يطمني بي
وخرت عنة وگلت:-عبودي ممسويلة جواز
غيث:-مناخذة ويانة
بعدتة عني وهمست:-ليش؟
غيث:-ابوية الجواز رايدلة اقل شي اشهر ونضل ننتضر واذا تطول السالفة ابطل
ملاك:-وين نعوفة غيث تخبلت
غيث:-حبيبي حتى لو سوينالة جواز
نضل محتارين بي بيج انتي هم لازم ترتاحين
ملاك:-لا لا ماگدر بدون مستحيل يوم واحد
ماگدر واحنة اكيد راح نطول هناك غيث
لاتشلع گلبي عبودي يروح
اخذ وجهي بين راحة كفوف
ايدة وهمسلي:-اذا ناخذة بس يشوفج متأذية
يبقى يبجي واني احتار بي لو بيج؟ ويبقى
يم رغد عادي ترة وهو ناخذلنة يمكن شهر
ونرجع
ملاك:-مايرضى والله مايرضى اني ادري بي
ويبقى يبجي وراي غيث مستحيل اتحمل
عبودي يبقة يبجي واعوفة واروح اموت هناك والله
غيث:-جا منروح يلا
ملاك:-غييييث مووووو هييييح ترررررة هيييي
ناخذ رغد ويانة وهذا هو
غيث:-ليش رغد ماعدها شغل وعمل
رجلها وبتها ثالث متوسط وزاري تعوفها وتجي
علمود عبدالله
ملاك:-نفسسس الشي اذا خليناه يمها هم يلهيا
غيث:-لا مو نفس الشي هو يضل يمها
وهي يم عائلتها بعد شنو وريم يمها هم تاخذة ترة مو صعبة
ملاك:-انت تحسها مو صعبة بس اني ماگدر افارگة غيث
غيث:-حبيبي لمصلحتج والله اضل محتار بي
وهو عندة فرط حركة ماگدر اضل اركض وراه اني وراج
ملاك:-يعني بس اني وياك نروح؟
غيث:-وبت عمتي المترجمة
ملاك:-اييي نخليها عدها
غيث:-وشنو جايبيها خدامة البنية تترجملنة
وتجي وتفتر ويانة للدكاترة هم تشيل
عبود وهم تتعب وتفتر
ملاك:-ياربييي
غيث:-فكري عدل ملاك
سكتت اهز رجلية سريع
رحت لبيت رغد وهي تقنعني
رغد:-لج يابة عندي شنو غير عمتة اني
عليمن خايفة ترة ماكو داعي
ملاك:-ويضل يبجي وراي؟
رغد:-ساعة ويسكت شنو قابل هاي اكو امهات تذب بزرتها وتروح تتونس انتي مارايحة تتونسين رايحة تعالجين واكيد راح تتعبين وماتهتميلة ويصير بي شي
ملاك:-يالله
سكتت عني وبقيت افكر
وماكو بس هذا القرار الأصح فعلاً نتبهذل
وبقيت طول هالفترة
ابوس بي واشم بي يگول راح افارفة
طول عمري
وماجبتلة طاري خاف يبقة يبجي
لحد آخر يوم تجهزت للسفرة
جانت نهاية الشهر الثالث
خايفة و واگعة بين أمرين عبودي شلون اعوفة
والعملية تنجح او لا حيل خايفة حيل
گعدتة الفجر واني دموعي
بعيوني اول مافتح عيونة بجيت وبوستة
بأنحاء وجهها شافني مبدلة
گال:-وين رايحة ماما
گعدت بصفة وبوست أيدة
وگتلة:-اني راح اسافر ويا بابا
عبدالله:-اني هم؟
هزيت راسي بـ لا واني ابجي
وهو مسح دموعي:-ليش تبجين ماما اني اروح وياكم
مسحت وجهي وجريتة
لحضني وكعدت اسولفلة:-شوف حبيبي
اني ميصير عندي طفل ببطني تمام؟
عبدالله:-اي
ملاك:-وانت اجيت من ماما زينب تتذكرها مو؟
عبدالله:-اي
ملاك:-لازم كل مرة تصير عدها اطفال
وتلعب وياهم وتنيمهم شون هسة اني وانت
عبدالله:-اي
ملاك:-انت اني ربيتك بس اني ماصار عندي طفل هنا
وأشرت ؏ بطني ورجعت
گتلة:-ميصير عندي اطفال فـ شنو لازم اروح
اسافر حتى يخلون طفل ببطني ويجي ويلعب وياك
عبدالله:-واني ترجعيني لماما زينب؟
هزيت راسي بـ لا سريع:-لا حبيبي انت تضل يمي
بس هاي الفترة من اسافر انت تضل يم عمة رغد
واني اروح اجيب الطفل اخلي ببطني
وارجعلك ونضل عايشين بهذا البيت
عبدالله:-لا اني ماريد طفل اني اريدج ماما
شهگت وگتلة:-اني اريد حبيبي اني تعذبت هواي
خليني اروح واحس بالفرح تعبت من الحزن
عبدالله:-ماما ماررريد
شبگني وگام يبجي واني ابجي
وياه طب غيث وگال:-هلووو عود گالولها لاتأذين نفسيتج صدك جذب شو عبود
عبدالله:-ماااااارييييييد اررررريد ماااااماااااا
شالة عني وهو يدفر برجلي وادي
واني اشهك واگلة:-عوفة غيث
شالة واخذة لبرة طلعت وراه وهو
يفرفح ويبجي وجهه صار احمر
وعيونة دم واني مفرفحة وراه انطاه لأزهر
وهو يشهك گام من البجي ويصيح
اريد ماما انمرد گلبي مرد
طبت رغد وريم يبوسن بية ويحضنن
ريم لزمتني وشبعت بجي ورغد تدعي طب
جاسر عيونة دم اكيد تشوفوها
مُبالغة بس هالشيء ينبع بالفطرة
وبسبب الحنان المُفرط
حضني وهو مكسر ضلوعي
تكسير:-بنياتي ابوية اني ابوجن واخوجن وكلشي تردن اصيرلجن ابقى ادعيلج حد ما تجيبين وتطلعين بخير وسلامة لاتضوجين ولاتنقهرين عبودي احنة يمة تمام؟ اهمشي نفسيتج وصحتج لاتخافين ابوية حبيبي انتي واني ابقة اخابركم كل يومية واجيكم لاتخافون كل ما صارتلي فرصة اجيكم
ريم:-اي والله حتى احنة نجيج
ملاك:-ادعولي هواي
رغد:-يابعد عُمري الله ومحمد وعلي وياكم
لزم الجنط غيث ومشينة واني افتر
كل ثانية واباوعلهم وصوت صراخ عبودي
يلچم بروحي لچم اطحن بنفسي طحن
في سبيل ماتنازل وارجعلة
سلموا علية ازهر وقيس
وصعدنة للسيارة وجاسر يسوق
وريم ويانة صعدت مشت السيارة وذبت
ورانة رغد ماي
مشاعري وخوفي ولا حرف يگدر يوصفة
تفكيري وقلقي وتوتري مستحيل اگدر
او اعرف اشرحة الكُم
وصلنة للمطار وازداد خوفي
وبُكائي اكثر واني احضن بأخواني وابوس
بيهم وملك فاتحة كامرة وتبجي ويانة
سحبني غيث وضم راسي جوة ايدة
وگال:-كافي يابة ترة تعبتوها
جاسر:-يلا دير بالك عليها واحنة نجيكم ماتضلون وحدكم
غيث:-مشكورين حبيبي تعبتكم
مشيت واني اتلفت الهم
بقينة ننتضر بصالة الانتضار وافتح
تلفوني خلفيتي صورة عبودي وهو يضحك
وتضل عيوني تدمع
اجت البنية بت عم غيث
المُترجمة سلمت عليها وشوية وصعدنة
بالطيارة بقت ايدي لازمة ايد
غيث حد ما وصلنة لأيران
اجرنة تكسي و رحنة لفندق غيث
يعرفة حجزلنة غرفة النة وغرفة للبنية
طبيت احس همومي تراكمت صورة عبودي
وهو يبجي بقت ببالي
خابرت رغد گالتلي نام بقة گلبي
مقبوض عليّ
اجاني غيث حضن راسي وباسني
وگال:-جاي يصير التردي شوية شوية
ملاك:-آمين يارب آمين
غيث:-نامي يلا تعبانة انتي
ملاك:-نبقة هنا؟
غيث:-لا أبوية باجر اروح أأجرلي شقة قريبة
؏ عيادة الدكتورة علمود نصير قريبين ماتعبين من الدرب
ابتسمت ونمت بحضنة
وهو يتلمس شعري ويقرالي آيات
وثاني يوم فعلاً أجرنة شقة
وانتقلنة بيها والبنية غرفتها وحد جانت
هادئة وتسولف وتحجي وياي
جان اسمها رؤى
والعصر اخذني ورحنة للدكتورة وبقت
تنطيني نصائح ومدري شنو
وراها رحنة حتى يفحصون مخزن البيض
واخذ هذا وقت طبعاً
وكذلك تحليلي للسائل المنوي
وراها ثاني يوم رحت
حتى يكشفون علينة اذا كان اكو ڤايروس
او عدوى او وراثة وهيج اشياء
وراها اجروا فحصوات كاملة للرحم
حتى يعرفون اذا بي اي خلل كذلك
انطوني ادوية لفترة مُعينة وهي
"ادوية الخصوبة للمرأة" تزيد من
عدد المَبيضات حتى اكون جاهزة أكثر
وبتاريخ 2023/4/8
رحنة نجهز لأول عملية وهي سحب
المبيضات وحانت هي العملية المسببة توتر
كارثي بعقل غيث
قبل العملية يبوس بية
وماخلة مكان بوجهي ما باسة ورؤى تضحك
وتصورنة
نزلت دمعتة فجأة
ومسحها بسرعة همسلي:-اني احبج
ومو اي حب والله ماتتصورين الحب اللي بداخلي
روحي تضل يمج ملاك عيون أمي حبيبة روحي
طلعيلي سالمة ماتحمل بدونج والله
همستلة:-احبك هواي
شبگني وضم راسة برگبتة
وهو گام يشهك بخفة واني ابجي وياه
أجن المُمرضات وهنه يستعجلني بالعملية
دخلت واني اباوعلة
وابتسم وقبل المُخدر آخر
شي مر بذاكرتي صورة عبودي وصوتة
وهو يگول أهبج ماما
...
غيث
لحظات قلق وتوتر وخوف
وهي العملية تكول عشر دقايق فقط
لكن احسها عشر ساعات وكل دقيقة
تاخذ نص الحيل
گعدت ؏ احد الكراسي وتلفوني
؏ صفحة وجاسر وريم وملك ورغد فاتحين
كامرة بگروب واحد ومنتضرين
رؤى تفتر ولسانها يلهج
بالدُعاء لازمة تلفونها وفاتحة ايدها
وتدعي وتروح وترجع
واني حتى دُعاء مگدرت ادعي من گد
ما القلق اخذ كلشي بية خلصن العشر دقايق
وعيني ؏ الساعة طلعت الدكتورة
حجت ايراني ورؤى ترجمتلي
تضحك:-نجحت العملية الحمدلله
غيث:-شگد يلا تصحى؟
رؤى:-30 دقيقة تگول
هزيت راسي وهمة سمحولنة ندخل
دخلتلها واني منتضرها تگعد حتى احس الدنيا
ترجع تستقيم
وبعد مرور 20 دقيقة
همست:-اريد ماي
حاجت رؤى احد المُمرضين
وگالوا عادي شربتها ؏ كيفي فتحت عيونها
وگالت:-نجحت العملية
غيث:-اي حبيبي نجحت حمدلله ؏ سلامتج
سمعت اصوات جاسر واخواتي
ابتسمت وقدم التلفون بقيت ابتسم
وهُمة يبجون ويتحمدولي بالسلامة
لليل يلا طلعت والألم
يذبح ذبح مثل آلام الدورة الشهرية بالضبط
وهاي أكثر
بقيت مرتاحة يوم
كامل وعبودي فاتحة كامرة ويا وهو
يلعب ويحجي وياي واني اجاوبة ماحسستة اني
متخربطة
ومرت فترة واخذوا الحيوانات
المنوية اللي اخذوها من غيث كذلك
بعملية تسمى "التلقيح" داخل المختبر الخاص
بهالشئ
عملية الاخصاب جانت منخفضة
فـ دخلو حيوان منوي اصطناعي داخل البويضة
وراها بفترة وطبعاً
طول هالفترات القلق ماخذ حيلنة
اخذ ماكو شي صعب بيها وكل العمليات بسيطة
وسهلة بس القلق والخوف جان
اصعب شي عملية حرفياً
غيث كل يوم يروح
ويراجع ويسأل صار انقسام بالبويضة
المخبصة حتى تصير جنين ويرجعو لبطني
اذا كانت راح تفشل العملية او لا هذا اليحدد
قبلها صار فحص كامل
لهذا الجنين اذا كانت اكو خطر آخر ؏ حياتة
او وراثة مرض وهيج اشياء
وصلنة لآخر خطوة وهي خطوة
نقل الأجنة الى الرحم وهاي اصعب منهن
كلهن
كذلك العملية بسيطة
قبلها اجرو فحوصات الموجات فوق الصوتية
حتى يتأكدون اذا كان الرحم
الة سمك مُناسب حتى يتحمل الجنين داخلة
وبعدها خضعت لعملية بسيطة
وحتى مابيها تخدير وكذلك دخل انبوب
"قسطرة رفيعة ومرنة" وبالتوجيه
من الموجات فوق الصوتية حتى يتم كلشي
بحذر
وانطتني مُهدئات
حتى ماحس بأي شي وبدت
تدخل هاي القسطرة من عنق الرحم الى الرحم
وبعدها اطلقت هذا سائل الأجنة
بدقة داخل الرحم
وبعد ماتم كلشي ؏ اتم الوجهه
طمنتني الدكتورة ودعائها ولطافتها تطمن
لزمتني رؤى وطلعنة
لغيث اتقرب مني وگال:-ها ابوية زينة انتي؟
بلعت ريگي وگتلة:-اي
غيث:-رؤى لزمي العلاجات ولو اتعبج
رؤى:-لا عادي انطيني جنطتج
اخذت من عدنة الغراض وهو يمشيني
؏ كيف وصلني للسيارة
ورغم الشقة نگدر نمشيلها مشي
بس ماقبل
دخلت للبيت وبوجهي للحمام
سبحت وبقيت جوة الماي اتأمل المُستقبل
معقولة؟
ويصير طفل بين ادية؟
واحس بشعورة من يرضع مني؟
انيمة واسهر لخاطرة
شعور وهو طلع من داخلي اتخيلة
وجسمي اباوعلة تطلع حُبيبات من كد ما يقشعر
نفسي يتسارع واني اسمع صوت
طفلي الخيالي باذاني واحس
روحي تركضلة
شعور الأمومة
مستحيل احد يگدر يوصفة
ومن ينفقد راح تتمنى بس كلمة
ماما بس...
حروف واقلام الكُتاب وكُل انسان
؏ هالكُرة الأرضية مستحيل احد يوصف
شعور الأُم من ترضع ابنها
من تشوف ابنها يكبر ويكبر
الحُب!
حُب الأُم لأبناءها
منو يوصف هالشعور؟ منو يگدر؟
واني انسانة انحرمت من شعور الأم
من سنوات طويلة
وغيري وغيري وغيري عاشن العشتة
والأتعس مني مُمكن اني لاشيء امام مُعاناتهن
المُجتمع وهو يحارب
"العاقر" بالتحديد
يأذي ، يجرح ، يموت
يدمر المرأة تدمير بطيء مثل
الموت الحي بالضبط
من انتَ حي بس ميت بالحياة!
حطيت ايدي ؏ بطني
انتَ موجود هنا!
لو ترجع تخذلني؟
الفترة حتى اعرف اني حامل
او لا
هو من 12 الى 14 يوم
حتى تبين آثار الحمل
بقيت انتضر بقلق وخوف وهسترة
حرفياً مافسر الشعور
لو حروف الدنيا كلها ماتوصف ربع القلق
والتوتر الأحس بي حالياً
ومرت 14 يوم
ورحنة للعيادة من التوتر بقة راسي
يفتر وروحي تلعب
ومن سحبوا دم مني
روحي طلعت بس اني داخلي
فرحانة معقولة ذني اعراض حمل؟
تقيأت
وگلبي يدح سريع
غيث گال لرؤى:-روحن ارجعن للشقة اني هنا اضل
حجيت بتلكئ:-لا لا اضل
غيث:-تتخربطين بابا والعالم هنا كومة
يصير عندج غثيان والتحليل يتأخر كومي رؤى
مشيها ؏ كيفج تعرفين تسوقين؟
رؤى:-لا يمعود
غيث:-يلا لعد ؏ كيف حتى لو تگعدن هنا
بالحدايق وترتاحن واني اجي
ملاك:-لا رجعوني للبيت
شالتني ونمشي ؏ كيف
وهي تسولفلي وتقرة ادعية واني
ارد وراها
وصلت للشقة
نزعتني عبايتي وشالي ضحكتلها:-تعبناج
رؤى:-ان شاءلله ورا هذا التعب شي زين
حتى صدُك احس بتعبي
ابتسمت:-حبيبي مشكورة
بقيت انتضر انتضر ورغد تدك
علية وتسولف وياي وفعلاً تأخر غيث
ومن الهوسة وافكاري
وقلقي وتوتري احس الدنيا صارت سودة بعيني
وكل ثانية تغيب روحي
لحد ما حسيت بصوت الباب
انفتح
فزيت ورؤى وياي لازمة ايدي
دخل وبيدة الورقة يباوعلها رفع
عيونة الي صارت بيها خطوط حمرة وبرز
لون عيونة الزيتونيات وترني
شفتة الترجف والبيضة وادية وهي تختض
واسمع صوت الورقات وهي وحدة تطك
بالثانية من اهتزاز ايدة
همست:-غيث لاتگول شي يموتني احجي
حجة واحس
بين حروفة فرحتي
بين حروفة الشي الأتمنا
حجة برجفة گلبي وايدة وشفايفة
اجتمعن كلهن وطلعت
من الكلمة بالگوة..
غيث:-حامل...
