رواية عشكت جنوبية الفصل الخامس بقلم نسرين الاسدي
ليث: اليوم صارلي اسبوع من اجيت وقررت ارجع لبغداد بعد خمس تيام لأن خلصت شغلي تقريبآ
دخلت للمكتب وگعدنا اني ومروان نسولف بأمور الشغل وشلون راح يمشي ورا رجعتنا
شوية واندگ الباب
گلت: ادخل
دخل هيثم جايب الگهوة والماي ودخل وياه حازم المدير المالي للشركة
حازم: استاذ اليوم عندي ألك خبر مو حلو
گلت: خير حازم صاير شيء؟ !
حازم: اجتني معلومات تگول احتمال اكو اشخاص يعرفون رمز الخزنة وحاطين كاميرات مراقبة هنا استاذ لازم تتأكد من فلوسك
اني بدون ما افكر گمت بسرعة ورحت دخلت الأرقام وفتحت الخزنة بس الحمدلله طلعن الفلوس كاملات وما ناقصات شيء
ألتفتت اله وگلت: لا تخاف حازم المكتب أمأمن وماكو اي كاميرات هاي المعلومات غلط
حازم: الحمدلله استاذ وهذا الي اريده اني
**
هنادي: خلصت شغلي وطلعت للحديقة مثل يومية وجان وقت رجعت هيثم من الشغل گلت اليوم اتلگاه أول ما يوصل هاليام جاي يتعب خطية
ويه ما انا گاعدة سمعت صوت سيارة ..گمت عالسريع وشفتها نفس سيارة ذاك الرجال ..معقولة لو تشبها؟ !
وگفت وانا ضليت اباوع عليها مصدومة هاي جنها هي كلش
شوية ونزل اخوي هيثم منها وضل واگف يم السيارة ويحجي ويه السايق يمكن جاي يتشكره لو ينطي الكروة
نزل الجامة وشفته اي هذا هو نفسه ..
نزع النضارة وابتسم لهيثم وبعدين شال فلوس وخله بيده
هيثم ما قبل ياخذهن بس هو لح عليه شوية بعد نضراته واجت عيونه بعيوني وابتسملي ابتسامة صغيرة
انا اتجمدت بمكاني وضليت واكفه لا عرفت ادخل ولا اضل اول مرة يصير وياي هالموقف
بس لمن ألتفت هيثم وراد يدخل شافني واگفه وهو صاح عليه بسرعة: هنادي ..دخلي للبيت عالسريع
وانا بدون تفكير ركضت لي جوة وگلبي يدگ كل حيله وضليت ارجف ..هيثم اكيد شافني وانا اباوع لذاك الرجال ..شلون بيه اليوم اكيد يرزلني
شوية ودخل هو
اجيت انا وگلت: الله يساعدك خوية
صرخ علية: انتي شعندج برة؟ !
گلت: جنت اجيب خضرة والله
هيثم: زين ومن شفتي السيارة وگفت وبيها رجال غريب ليش ضليتي واكفه ليش ما دخلتي عالسريع ها؟ !
انا دمعن عيوني لأن ما متعودة عليه يصرخ عليه وگلت: اسفة اخوي والله ما عيدها ..سامحني فدوة
هو نفخ وگال: استغفر الله ..يلا ميخالف هالمرة سماح بس اذا عدتيها ما تلومين الا نفسج واضح؟ !
أشرت: اي واضح خوية فهمت
گال: يلا هسة حضريلي الغدة لأن جوعان
گلت: صار من عيوني
**
ليث: ماعرف ليش بس اليوم صار عندي شعور قوي يحسسني لازم اشوفها
لهلسبب عرضت على هيثم اوصله وياي ومو بس هو انصدم حتى مروان تعجب بس اني ما بينت اله شيء وتحججت بموضوع نريد نمر على وائل وهو قريب على بيتهم
وصلنا واني كل تفكيري كون اشوفها وتحقق هالشيء وطلعت واگفه يم الحديقة نفس أول مرة شفتها بس هالمرة لابسة دشداشة وردية شكد حلو عليها اللون الوردي
ضل هيثم يتشكرني عالتوصيلة وحجه هواي كلام بس اني جنت مركز عليها وشلون تباوع الي بنضرات مستغربة كأنها انصدمت بشوفتي او ما جانت متوقعتها #ڪــڔٰا̍ڕ
انطيت هيثم مصرف اله هو رفض بس،اني اصريت عليه وگتله يحاول يشتري شنو ناقصة هو واهله
ولمن رجعت نضري الها شفتها تباوع عليه وتلاگت عيوني ويه عيونها الحلوة ضوا الشمس يخليهن عسل خالص
ابتسمت الها بدون ما انتبه لنفسي بس هي دخلت عالسريع بسبب اخوها
ضحكت وگلت لمروان: يلا امشينا
**
هنادي: جنه كاعدين عالعشاء وهيثم بدئ يحجي لأبوي عن مديرة الي وصله اليوم وهو شكد طيب ولي گال اسمه ليث
معناها هذا هو مدير هيثم واسمه ليث يلا بعد ماراح اسميه ابو السيارة...بس اسمه حلو
فزيت على كلام بابا يگول :الحمدلله والشكر ابني انا دايمآ ادعيلك ربي يوفقك بكل خطوة تخطيها وهذا مديرك امبين عليه خوش رجال وابن ناس مو متكبر نفس باقي اصحاب الشركات
هيثم: اي بابا الحمدلله والشكر ..وانا راح احاول دايمآ اشتغل زين وما ازعله مني
بعدين التفتت لأمي وگال: يمة انتي بعد ماراح تخبزين مرة ثانية
گالت امي: وليش يمة هيثم
هيثم: لأن أنا صار عندي شغل و راتب والحمدلله بعد انتي المن مشتغله انا وعدتج بس تصير عندي شغله زينة واجيب منها فلوس راح ادللج انتي وخواتي وماخليجن تحتاجن شيء
گالت: ميخالف يمة عود اضل انا اشتغل لحد ما انته تستقر ويصير عندك دخل زين واشوف بساعتها صدك انا بعد ما احتاج هالشغلة واعوفها من عيوني
ابتسم بابا وگال: ان شاء الله يجي هيج يوم وتتغير احوالنا ونعدل البيت ونسوي كلشي جنه نحلم بيه
گلنا كل احنه: ان شاء الله
**
ليث: تعشينا اني ومروان وگعدنا شوية هو گال راح يطلع يشرب بس اني ما جان الي نفس للطلعة دخلت لغرفتي خذت حمام دافي وتمددت على الجرباية اريد انام بس اجت على بالي عيونها
ماعرف ليش هيج مسيطرة على تفكيري معقولة اني معجب بيها ؟!
لا ما معقولة ..شنو هاي الأفكار التافه خل احاول انام وانساها
ضليت اتگلب بفراشي لحد ما غفيت بدون ما احس على نفسي
گعدت الصبح على صوت المبايل
جاوبت واني نص نايم: الو
مروان بصوت عالي ومهزوز: ليث الحگ الخزنة كلها مبيوگة ..ولك اني راح اتخبل
طفرت من مكاني واني ما مصدگ الي جاي اسمعه: مروان انته شجاي تگول؟ !..ياخزنة؟ !
مروان بصوت اعلى :ولك الخزنة مالتك مخلينها فارغة مابيها ولا فلس ..تعال عالسريع
سديت التلفون وگمت عالسريع غيرت ملابسي ولبست شلون ما كان طلعت وسقت السيارة على اقصى سرعة
ربع ساعة واني بالمكتب ركضت عالسريع ودخلت لگيت مروان وحازم واكفين ووجوهم صفر والخزنة مفتوحة وفارغة
شلون هيج ومنو هذا الي ياخذ مبلغ 25 مليون بدون ما يترك دليل
گعدت عالكرسي وبعدني ما مصدگ الي صار المكتب مقفول والخزنة محد يعرف ارقامها شلون هيج ماجاي تدخل براسي
شوية ودخل هيثم جايب المي وگال: انا كلش انقهرت عليك استاذ ..بس لا تضوج ان شاء الله تعرف الحرامي واذا ما لگيته الله يعوضك انته ما تستاهل والله
هزيتله براسي وانا جاي افور من الداخل منو هذا الي اتجرء لازم الزمه واراويه الويل ..شلون هيج اني ليث يلعبون عليه ..بسيطة بس خل اعرف منو وماراح يمر عليه الليل
**
هيثم :خلص اليوم والأستاذ ليث بعده ماعارف الحرامي ولا لگه شيء واحد عليه انا ودعتهم ورجعت للبيت مشي
البيت صح بعيد شوية بس اني احب المشيء احسه يفيدني ومتعود عليه
شكد اتمنى اعرف منو هذا الحرامي واساعد الأستاذ ليث خطية ما يستاهل
مريت بالسوگ وخذيت شوية مخضر وفواكه للبيت وصلت للبيت وهالمرة ماشفت هنادي برة
احسن تعلمت الدرس انا ماحب احد يشوفها ويسمعها كلمة مو زينة
دخلت سلمت لگيت الكل واصل
گالت امي: يلا هثومي غسل وتعال تغدة
گلت: اي يمة صار ..انطيت العلاليك لهنادي ودخلت اغسل وناوي اسولف لهلي عن الي صار ويه مديري اليوم
**
ليث: صار الليل واني بعدني افكر شلون جنت غبي وما خليت كاميرات جان عرفت منو داخل المكتب بغيابي انا هسة شكيت بالكل بس شلون اخليهم يعترفون؟ !
لازم اهددهم بالسجن اي ماكو حل ثاني
باوعت للموضفين ومروان وحازم من ضمنهم وصحت: اسمعوني زين ..اني شاك بالكل لهلسبب القرار الكم ..يا اما يعترف الحرامي ويطلعون البقية واحتمال ما اعاقبة واسامحه
او تبقون ساكتين وراح اجيب الشرطة واسجن الكل
انصدموا كلهم
گلت امئكد كلامي: ولكم فرصة نص ساعة بس يطلع الحرامي الي بينكم لو هسة تدخل الشرطة وتنحبسون
ضل الكل يبرر ويدافع عن نفسه ويحلفون ان همة ابرياء
بس باوعت لحازم ومروان ساكتين ..مروان انا أوثق بيه اكثر من نفسي بس شنو سبب سكتت حازم الغريبة
گلت: خلصت النص ساعة
شوية وگال حازم: استاذ اني شاك بشخص ممكن يكون هو الي ماخذ الفلوس
باوعتله وگلت :ومنو هو يا حازم؟ !
حازم: منو الوحيد الي ما موجود ويانه هسة
الكل ضلوا يباوعون ويحاولون يعددون الي موجودين
حازم: هيثم الجايجي ..هو الوحيد الي ما موجود ويانه واليوم بالذات جان بارد ومامهتم عكسنا كلنا الي جنه مخبلين ونحاول نلگه الحرامي
گتله: وشنو الي يخليك تشك بيه؟ !
ابتسم صفح وگال: لأن انته يا استاذ فتحت الخزنة گدامة امس ومحد جان موجود بالمكتب غيرنا احنه الثلاثة ومروان انته تعرفة من سنين واني طبعآ ماراح أبوكك لأن خدامك الوفي
هو الوحيد الغريب بيناتنا وشاف حضرتك شلون دخلت الأرقام ..اكيد حفضهن وباگ الخزنة والمكتب مو صعبة عليه يفتحه لأن دايمآ يدخله بحجة تنضيفه فأكيد ماخذ نسخة من المفتاح
باوعتله بدون اقتناع ودارت مية شغله ابالي معقولة هيثم هذا الولد الي سمعته زينة والفقير يسوي هيج معقولة؟ !
گال مروان: بس هو خوش ولد مستحيل يسويها وبعدين هو فقير مو مال هاي السوالف
حازم: اي وهاي وحدة من الأسباب گال احنه حالتنا ضعيفة وهاي فلوس گدامي خل اخذها وتصرف بيها اكيد محد راح يشك بيه
شتعلت اعصابي نار وصحت لمروان: مرواان روح جيبه الي
