رواية عشكت جنوبية الفصل السابع بقلم نسرين الاسدي
*
ليث: گعدت اليوم واني متحمس شفت غرفة مروان طلع ماموجود مبين ضايج من البارحة
بس معليه بي دخلت الحمام جهزت نفسي ونزلت ركبت سيارتي وطلعت للشركة
دخلت للمكتب لگيت مروان جاي يشتغل گتله: صباح الخير شنو مروان اليوم ليش ما انتضرتني مو ماعدنا شيء؟
مروان: صباح النور ..اعرف ماعدنا شيء بس ما گدرت انام بس طلعت الشمس اجيت اشتغل احسن
گعدت على مكتبي وگلت: مروان ادري بيك ضايج مني بس انته تعرفني اذا اريد شيء لازم اسويه وهاي البنية اريدها وراح احصل عليها
مروان: انته ليش متأكد هيج ليث؟ !..اهلها ماراح يوافقون ..محد يقبل ينطي بته بهاي الطريقة وبعدين انته مافكرت اهلك شراح يسوون من يدرون شلون راح تكون ردة فعلهم؟ !
ليث: مايهمني هذا كله واهلي راح ينجبرون يرضون بالأمر الواقع ..وهسة كافي حجي وروح لأهل هيثم كللهم اريد احجي وياهم واني راح انتضرك هنا
مروان: انته تخبلت؟ !..تريد روحلهم لبيتهم ليش همة الي يجولك واني مستحيل اشارك بهالموضوع
صحت بيه: مرواان ..اولآ لاتتجاوز حدودك وثانيآ همة الي يحتاجوني مواني محتاجهم حتى اروحلهم وعادي لاتروح انته بس راح ادز غيرك
رفعت التلفون وطلبت يجي واحد من الموضفين
دخل يوسف عالسريع وگال: نعم استاذ أئمرني
گلت واني اباوع لمروان: روح لبيت ابو هيثم وگله خل يجيني عالسريع راح اطلع ابنه
يوسف: حاضر استاذ وطلع
مروان عصب هز راسه وطلع
**
هنادي: چنه كاعدين الصبح وامي بس تشوف وجبة أكل تضل تبجي على هيثم
وتگول: سودة عليه يمة هسة انته جاي تاكل لا ..جوعان محتر ..بس الله يعلم بيك... وانا احاول اهديها بس شبيدي عليها وعلى اخوي
وبابا وفهد محتارين مايعرفون شيسوون حتى يطلعونه
راح يصيرلنه خمس تيام احنه على هاي الحالة وحتى حياة وليلى ماضلن يركزن بدراستهن ولا يهتملها
شوية واندگ الباب
فتحه فهد ودخل واحد ما نعرفه اول مرة نشوفا
گال: السلام عليكم ..وين ابوك؟ !
فهد: وعليكم السلام ..انته منو وشنو تريد من ابوي؟ !
گال: صيحليا وانته تعرف شريد بس انا اريده هو مو انته
گام بابا وراح يم الباب وگال: هلا عمي تفضل رايد شيء؟ !
الرجال: عمي دزاني الأستاذ ليث عليك وگال لازم تجي وياي لمكتبه هسة لأن الموضوع يخص ابنك هيثم
بابا بدون اي تأخير گله: اي عمي صار ..امشينا
لزم فهد ايد ابوي وگال: بابا انا ماراح اخليك تروح ابحدك اخذني وياك
وبابا ما اعترض خذاه وراح
وضلينا احنه بالبيت نندعي كون هو بخير ومابيه شيء
وامي وكفت بالباب وضلت تلوب
سمية: ياربي ..يارب بحق حبيبك محمد رجعلي ابني سالم ..يمة هيثم
**
ليث: وصلوا ابو هيثم واخو دگ يوسف الباب ودخلهم
گالوا: السلام عليكم
جاوبتهم: وعليكم السلام ..تفضلوا ..وأشرت ليوسف حتى يطلع
گعدوا وهمة منتضرين كلامي على نار
گلت ابرود: اتشربون شيء؟ !
ابو هيثم: لا مشكور يا استاذ ليث احنه بس،نريد نسمع اخبار هيثم وياريت تبرد گلوبنه وتگول راح اتطلعه راح نكون ممنونين منك العمر كله وما ننسى الك هذا المعروف
رجعت بضهري عالكرسي وگلت: اي عمو ابو هيثم اني راح اطلعلك ابنك
شفت عيونهم لمعت من الفرحة وگالوا سوة: الحمدلله رب العالمين
ألتفتلي ابوه وگال: يعني انته دريت ببني بريئ مو؟ !
هزيت راسي وگلت: لا...بس اني فكرت اقترح عليكم اقتراح وانتم بكيفكم اذا ترضون لو لا بس هذا القرار راح يفيدكم بالتأكيد ويرجعلكم هيثم بدون ما ترجع الفلوس
گال وهو مستغرب: شلون يعني مافهمت؟ شنو هو هذا الأقتراح؟ !
گلت: بنتك هنادي ..راح اخذها ابدال الفلوس واطلع ابنك
انصدم هو وضل ساكت بس ابنه گام عالسريع وصاح: شجاي تگول انته ..مستحيل انطيك اختي لو على گص ركبتي وفلوسك راح نجيبهن الك بس خل نجمعهن
ضحكت بكل قوتي وگتله: اسمعني حبيبي انتم لو ضليتم تشتغلون ليل نهار وبكل الشغل الي تگدرون عليه ماراح ترجعولي ربعهن واخوك راح يضل مسجون كل هالفترة على ما تجيبونهن ..لهلسبب اني اقترحت عليكم هذا الأقتراح لأن حسيته راح يفيدكم
گام ابوه وگال: والي فهمته من كلامك انته تريدنه نبيعلك بتي بمكان الفلوس ؟!..ليش انته وين تعرفها؟ !
طلعت ورقة وگلت: تفضل ابو هيثم هاي الورقة بيها كل شيء عنكم درستها كلها قبل لا اوافق على شغل ابنك عندي والصراحة من شغلته حبيت اساعدكم بس ما حسبالي ابنك راح يغدر بيه هيج وهسة ضلت يمكم يا امة توافقون على الكلام الي گلته وابنك راح يطلع من باجر يا امه تدبرولي الفلوس وطبعآ ما عدكم وقت غير يومين بس لأن اريد ارجع لبغداد واذا رجعت راح يضل هو مسجون ويمكن توصل المدة خمس سنوات اكثر
هنا فهد فقد اعصابه واطفر عليه من المكتب راد يضربني بس اني بعدت عنه بسرعة
لزمني من سترتي وضل يهدد ويگول: اسمعني ولك اختي طلعها من راسك لأن مستحيل تاخذها واخوي راح اطلعه وغصبآ عليك لأن اتحملناك هواي
لزمت اديه اثنيناتهن ونزلتهن عني بسرعة ودخلوا الحراس عالصوت
ورادوا يلزمونه راح هو ضربهم وهمة ما قصروا وياه
ضل ابوه يصيحله ويردد: فهد ..كافي ..عوفهم ..فهد اسمعني
صحت اني عليهم: اتصلوا عالشرطة هذا هم يحتاج ينسجن حتى يتأدب
ألتفتلي هو وعيونه مشتعله نار وصاح: انا مأدب اكثر منك يا حقيررر
هنا صاح ابوه بصوت اعلى: فهددد ..كافي يلا تعال خل نطلع
ألتفتلي وگال: استاذ ليث الله يخليك عوفه هو بعده جاهل ومتسرع لا تسجنه انا اعتذر بالنيابة عنه بس سامحه
فهد: بابا انته شجاي تكول لا تعتذر لهذا الحقير هذا واحد سافل ويحتاج يتربى من جديد شنو حسباله احنه نخاف منه هسة اكسره تكسر هو وشركته هاي
هنا سطرا ابوه راشدي وصاح: انا مو اكلك اسكت كافي يلا
صحت: لا انته صدك تستاهل تنسجن وتتعلم شلون تحجي
گال ابوه: اسمعني عمي يا استاذ انا اعتذرتلك بمكانه ووعد ماراح تنعاد بس خل اكسر خاطرك شوية وعوفلي ولدي الله لا ينطني الي جان السبب ولا يوفقه
گلت: يلا ماشي اني راح اعديها اله هاي المرة بس مثل ما گتلك عندك يومين بس يا امه الفلوس يا امه بنتك وثالث يوم راح اطلع وابنك يضل بالسجن عسى ما عشر سنين بعد ما يهمني
أشر الي براسه بگلب مكسور وخذه ابنه وطلع
جان مروان بهذا الوقت واكف بالباب
طلع وراه وگال: عمو اني اعتذر عن تصرف مديري واتمنى لو اگدر اساعدك بشيء بس مابيدي ..
گال: الله كريم ابني وطلع
دخل عليه جنت منتجي عالميز وجاي ادخن
مروان: ليث ماكافي هذا الموضوع ..انته ليش جاي تعذبهم هيج ..هيثم مو طلع بريئ بعد ليش بعدك مصر ..حرام ليث مايصير هيج
گلت: مروان اسمعني ترى اني مزاجي زفت وكولش مالي خلك يامه تسكت ياامه تطلع
مروان: صدگ اني هم طالع المن ضال انته بعد قفلت وحجيي لا راح يقدم ولا يأخر ..بس لازم تنتبه مثل ما ضلمتهم اليوم راح يجي شخص ويضوكك نفس الكاس
درت عليه وگلت: ماشي عود اذا اجه ذاك اليوم لا تجي ولا تساعدني ..تفضل برة
**
هنادي :انتضرناهم هواي وهمة ماكو صارت صلاة الضهر
يلا رجعوا بابا وفهد وامي ركضتلهم عالسريع وگالت: ها قاسم بشرني
دخل ابوي مباشرتآ وگعد بالطارمة بدون ما يگول اي كلمة
باوعت امي لفهد وگالت: فهد شنو صار؟ !..ابوك ليش مايحاجيني ..احجي
صاح فهد: يمة ترى مابيه حيل احجي عوفيني رحمة للحُسين
بجت امي وصاحت: شجاي تگول انته فهد شلون اعوفك وانتم رادين هيج وجوهكم مگلوبة گلولي شصار ليش ما تحاجوني هيثم صار بيه شيء؟ ..جابوني دخيل الله مو راح اتخبل
گال ابوي بصوت مكسور: ابنج زين بس تدرين شنو يريد مديره حتى يطلعه؟ !
گعدت امي يمه وگالت: شنو قاسم احجي ريحلي گلبي
گال: انطاناه بس يومين حتى نرجعله الفلوس كاملات ويطلعه لأن ثالث يوم راح يرجع لبغداد ويخليه مسجون سنوات ماندري شكد راح اتطول لو .. وسكت
گالت امي بخوف: لو شنو؟ !!
نزل بابا رأسه وضل ساكت احنه خفنه
گال فهد: لو نبيعله هنادي بمكانهن
هنا انا انصدمت وما صدگت الي سمعته شلون يعني يبيعوني؟ !..وليش انا بالذات؟ !.
صاحت امي: شنووو ..انته شجاي تگول فهد؟ !لا اكيد تشاقه..قاسم احجي انته صدك حجي فهد؟ !
گال ابوي: اي سمية حجيه صدك ...وانطانه بس اليوم وباجر حتى نردله الخبر ..وانا ايست قبل لا ارجع رحت حاولت اداين من كل الي اعرفهم حتى انطيه فلوسه بس ماحصلت واحد يدايني ..ولا لگيت شغله تگدر تساعدني ..حاس البيبان كلها اسددت بوجهي
دگت امي على خدودها وضلت تبجي وتصيح: الله لا ينطيك ولا يوفقك ياظالم..سجنت الولد ظلم وهو بريئ وهسة تساومنه على بنيتنه حسبي الله ونعم الوكيل بيك ..ان شاء الله اشوف بيك يوم
ركضنا انا وخواتي وگعدنا يمها نريد نهديها بس ضلينا نبجي وياها
جان هذا اصعب يوم علينا ضلينا لا غدة ولا عشى كل احنه نفسنا مسدودة بس بوقت الصلاة امي وابوي شدوا حيلهم وكاموا يصلون وشفتهم شلون يبجون ويندعون ويمكن يدعون على ذاك الظالم ليث
احنه هم سوينه مثلهم هلبت الله سبحانه وتعالى يستجيب دعانا ويدبر بابا الفلوس ويخلصنا منه
**
ليث: جنت اتگلب بفراشي ما گدرت انام كمت وطلعت من الغرفة اسويلي حليب دافي حتى يساعدني انام ...ماعرف ليش بالي هيج مشوش يمكن مكسور خاطري على اهلها بس اكيد اني مو ندمان
دخلت للمطبخ جاي احضر الحليب وسمعت صوت باب مروان ينفتح
باوعت وشفته يمشي لباب الشقة يريد يطلع وشايل بيده جنطة صغيرة
استغربت اتقربتله وگلت: مروان وين رايح بهالوقت من الليل؟ !
ضل يمتمت بالحجي گال: ها..ليوثي حبيبي ..اني ..
مارايح لمكان ..وخله الجنطة ورى ضهرا
گلت: شلون مارايح لمكان وانته مبدل وجنطتك بيدك هاي شنو بيها؟ !
گال: لا ولا شيء ..اني اريد اروح اشرب ..اي اريد اشرب ويمكن اروحلي لوحدة وضحك
بس ما مشت عليه چذبته ومبين من توتره هو ضام عني شيء
لمعت براسي فكرة وگلت: زين حبيبي اني ما اگدر انام تگدر تكملي الحليب وبعدها روح وين ماتريد
گال: اي طبعآ ليوثي ...راد ياخذ الجنطة وياه
گلت: شنو هاي مروان خايف عليها
هو ضحك وگال: لا دخت شوية ..دقايق واجيبلك الحليب تتدلل
خليته فات للمطبخ واجيت گبل للجنطة فتحتها حتى اعرف شنو بيها وانصدمت
لگيتها متروسة فلوس ومبينات اكثر من مليون مامعقولة كل هذا المبلغ ياخذه وياه وهو يريد يشرب
وكتشفت الموضوع بسرعة هذا مروان ما جان راضي علي من البداية وواضح ماخذ هاي الفلوس الهم كدين حتى ينطوني اياهن ..ايا خاين يامروان
جاب الحليب واجه
صحت: مروان هيج تسوي بيه انته واني الي حاسبك اكثر من صديق ..لك ليييش ..
گال: ليث اسمعني بس انته شفهمت حتى هيج تگول؟
گلت بعصبية: ما يحتاج افهم لأن عرفت كل شيء التفسير الوحيد لأخذك كل هاي الفلوس وياك ونفس المبلغ بالضبط معناه انته تريد ادزهن الهم ..لييييش جاوب
گال: اي صحيح اني اريد ادزهن الهم لأن مايصير الي جاي تسويه بيهم حرام عليك
ضحكت وگلت: وبس بهاي انته عرفت الحرام مروان خليني ساكت..وبعدين اسمعني اذا فكرت تروحلهم وتنطيهم الفلوس اعتبر صحبتنه انتهت ولا تعرفني ولا اعرفك
گال: مشكور يا صاحبي جاي تعيرني هم ماشي بس مو غلطتك غلطتي اني لأن حسبالي صدك معتبرني صديقك واخوك وراح تسمع كلامي ..ومادام هالشيء مو صحيح اني راح ارجع لبغداد وماراح انتضرك ..اذا غيرت رأيك تلگاني بالمطار
مع السلامة ليث
وعافني وطلع
ماتوقعت مروان راح يسويها بس هو سواها وراح
**
هنادي :صار الصبح واحنه ما نايمين ولا مرتاحين وابوي مبين عليه كلش تعبان وامي اكثر
تقربتلهم وگلت: بابا يمة ..فدوة اروحلكم اكلوا شيء شوفوا شصاير بحالكم ..
اجن حياة وليلى وهم گعدن يمهم وتوسل بيهم حتى ياكلون شيء
بس ماردوا علينا وحتى فهد حالته كلش ما گال اي شيء من امس لليوم
شوية واندگ الباب شكد كرهنه دگته لأن ما تجيبلنه غير المشاكل
فتحه فهد وطلع نفس الرجال الي اجه امس گال:السلام عليكم
فهد: وعليكم السلام
گال: دزني الأستاذ ليث حتى اگللكم عدكم بس اليوم لأن بليل هو طالع لبغداد وراح يعوف اخوك مسجون وبعدها حتى لو رجعتم الفلوس ماراح يطلعه
گام ابوي وامي
لزمت انا ايد بابا وگلت :بابا وافق عفية خل يطلع هيثم والله انا مستعدة اموت عالمودة خطية راح يصرله اسبوع بالسجن
حضني بابا وگال: سم الله عليج من الموت بوية ..حسبي الله ونعم الوكيل بكل ضالم
اتقرب فهد وگال: بابا شجاوبه؟ !
گالت امي: احنة شلون نأمن ننطيه بتنه واحنه مانعرف عنه شيء ولا اصله ولا فصله ولا منين هو
شلون فهموني؟ !
خله ابوي ايده على جتفها وگال: لا تخافين سمية انا مستحيل اذب بتي هيج بس لازم نطلع هيثم
راح وگف يم الرجال وگال: گل لمديرك احنة موافقين ننطي بتنه بس بشرط ....
