رواية ذاري النجوم الفصل التاسع بقلم زهراء السراي
:✥━━━༺ زهراء جودة السراي ༻━━━✥
:
:
:
:
:
لا عندي بخت وأزهگ وأشور بيك
ولا سيد وأگول يسودنك جدي
:
:
:
:
:
:
:
:
:
:
عذبة
✥━━━༺✦༻━━━✥
هنا يمن چنا وچنت ما نقبل الواشي الوشه
فرگاك فطر جبدتي وگطع سبابيح الحشه
ذبيتني ببير الهوى وليش گطعت بيه الرشه
هنا يمن چنا وچنت اثنين ما ثالث نحب
فركاك مو هين علي يا صا حبي كلش صعب
ما چنت اظن بعشرتك يومين عني و تجتنب
هنا يمن چنا وچنت والگومة والگعدة سوه
اذكر ليالي الي مضت ونايم انه ببحر الگوة
حاكم علي حبك ترى وفرني بدواليب الهوى
البيت صارلي گبر والناس حواليه
ماأسمعلها روحي يمه وصورة
دفنته لهسه تفتر براسي
شلون انسى شلون يروح من بالي
وچلماته الحلوة
ومن يصيحلي عذوبة ومن اجافي
يصيحلي عذابي
اكو بشر تعاشرهم عمر وهاي انا وهاجس
من احنه جهال نتراكض بالتراب سوه
ما كسرني السوا مثل كسرتي بخزعل
صدگ مو بطول السنين بالعشششرة
وااااااخ ياعشرته الحلوة مثل عسل
يمر عالجرح يداوي
هاي شهر ونص مرن وأنا مثل العايفله
ديرة وراه
شال وشيل البيت ويا لا راحة ولا نوم
اخواتي حواليه ونعمة خلت بنيتها الچبيرة
سهامة وأبنها علاوي
يمي يداروني وهي وسنية كل ليلة يجن
خالتي وبناتها الصغار يروحن ويردن علية
جاراتي وصاحباتي بس مابعيني بس
هوووو اريده ومحد يهجس
كسرة روحي غير وحدة
أعاين ومااشوفها بين الوجوه
وماكو بين النسوان
مزززززنة اخيتي وصاحبتي
لفاهة الموت مثل مالفاه هو
الاثنين الگلبي يمهم راحو
عيني تفتر على غراضه هدومه حتى نعاله
بباب الحجرة ماحركته من مچانه
الدنيا مفترة بيه ومابيه حيل اشيل حتى
هدومي
طبيت بحبالتي الشهر السابع ماصار چم
يوم أعاين لبطني بيها وماتكبر
كبر الحمل وكثرت الحسرات ريحانة
اليروح واليجي تصيحله ببا ومتنحسة
وتفتر تطلع غراضه من الكنتور معلمها
يطيها ورق وقلم وتشخبط اعاينلها تشخبط
عالورق وصوت علاوي ابن نعمة ارتفع
-خاااااااالة تعاي
گمتلة بهداي بطني توجعني
-ها علاوي شبيييك ولك سرعتني
-خااااالة عمال جايين ووياهم غراض
مال بنيان
-عماليييش ولك
-والله واگفين ووياهم بيت عمام عمي خزعل
الله يرحمه
-روووووح لأبووووك بسرعة جيييبه وتعال
-ابووووي مو هنا
-صيح عمك حسن اي واحد ارررركض
ركض هو وانا الوووب شني عمال شني
يبنون
شويه واندگ الباب ورجل سنية صاح
-ها بعد اخوووچ
-جايتك خويه بس شوفلي ذول
شيردون
شويه وردلي ينكت نكت من العصبية
-ذول جاييين يكملون بناء البيت
-بيتي الهيكل
-اي ومن اگلهم بأي حگ يگولون هذا ورث
اهلنا
ماگدرت اسكت ركضت لبست عباتي
وطلعت واگفة وره رجل سنية شفت عم
خزعل الچبير عواد صحتله بهداي
-عمي عواد شعندك هنا
دار وجهه وكشول من سمع صوتي
-شعدنا بويه جاي نكمل بيتنا بناء
نريد نرد للسلف
-يابيت هذا عمي هذا بيتي انا
بيت زلمتي
-بيتچ شني بويه هذا بيتنا والگاع گاع
اهلنا وخزعل اله بس هالبيت الگاعدة
بي وفضل من عدنا مخلينة گاعد فهمتي
بسسسس هالبيت
-هي البس شنيييييي الگاع گاع رجلي
والبيت بيته وانتم ناس ماخذين حگكم مرتين
مرة على حياة عين عمي ابو خزعل
ومرة اخذتو من خزعل عينك عينك وهو سكت
هسة تلم عمالك وتطلعون من گاعي وبيتي
-شني بويه يا گاعچ يابيتچ الگاع
بأسم اهلنا ملك وورث من اجداد الاجداد
-هذا الحچي گوله لوحدة غريبة انا مرة
فاهمة وقارية الگاع بأسم رجلي والاوراق موجودة
والبيت بيته وياله طلعو لا اسويها طلابة
عاينلي وضحك بشر
-هيييين يالرگطة هين
بووووويه امشوووووونه المرة تريد
اثبات نجيبة ونردلها
صاح عمالة ومشو وانا رجليه تتخافگ
مااهجس شي لمن رديت للبيت يلا عرفت
شگلت غميت رووووحي على عملتي هو
سودة بوجهي گاللهم الگاع گاعها
بليلتها علاوي راح لأهله يبات
وظليت انا وسهامة بت اختي
هي نامت وريحانة روحها بيها نامت
بحضنها
طلعت للمطبخ توضيت فرشت مصلايتي
بالربعة بمچانه اليصلي بي
اصلي وادعيله بالرحمة وابچي على شبابه
الراح
لهناك سمعت صوت طگطگة بالحديقة
خفت يمكن حيوان شي طاب للدجاجات اخذت
بيدي المسدس مال خزعل من الحجرة
طلعت مديت راسي
للحديقة اعاين لگنون لدجاج
وبيدي الفانوس سمعت حفيف رجلين بس
درت وجهي واحد غمتني غمت وضربني
على وجهي وسد حلگي مالحگت اصرخ
واثنين لازميني منا ومنا
واحد حچه بهداي
-امششششي ويانه
ادفع بروحي عنهم عن الحرام چيف لازميني
وعن الخوف على بنيتي وبت اختي
المسدس اخذو من ايدي وعتوني عت وياهم
واحد يحچي بصوت مامسموع
-الحجرة عاليسرة امشو بسرعة
ميزته الصوت وعرفته لخضير ابن عناد عم
خزعل بس مااگدر احچي
اخذوني عت عت منا لمن طبينه
الحجرة والفانوس ناصي
شاله واحد منهم البنات نايمات عالقريولة
مايدرن بشي وهم يحچون بفحيح ماينسمع
فكو الكنتور سووو طشار واحد
منهم يگله خضير
-چا مو گلت اعرف اقررررره وينهن
-اطني مجال هووواي ورق
اللازمني أذاني اريد افل حلگي من ايده
ماكو الوكت صار شطولة من الخوف
عاينت بيده جنطة خزعل الصغيرة بيها
فلوسي الباقية وبيها ورق الگاع
فتحها وضحك
-زيادة الخير خيرين يالله امشونه
ردو عتوني وياهم وطلعوني للحديقة
ولازميني لزم گبل لا يطفرون
واحد منهم لزمني حيل لوه ايدي لوي عن لا اتحرك
طگت بيده سمعتها
ومن ذولاك طفرو السياج
هو گوم وادفرني حيل بكل حيلك طحت
عالعلوة مال حوض الماي مال الدجاج
مالحگت اصرخ گوه حركت روحي
ايدي تتلولح وبطني مغصتني حيل
وصلت لسهامة اسحل بروحي
گعدتها گوة حچيت الصار
وهي طلعت للحوش بفانوسها وصرخت
-هناااااااه لحگوووووووونه
ردت صرخت وماكو شويه والتمت الناس
واولهم زلام اخواتي
صارت الركضة للحجرة نعمة وسنية
شافني ايدي ملولحة مااگدر اشيلها
وصوتي رايييح من الوجع حچيتلها
وانا ابچي صاحت نعمة
-ابو علي الحگلي فدوة لعيونك
غطتني وطب علينه استغفر
-هااااااا نعمة
-مبيووووووگ البيت وكاسرين
ايدها
-شلووووون وين ناخذها
-امش للمركز ازلام المركز بسيارتهم
ياخذوووونه امششش بسرعة
ركض رجل نعمة وهي مفرفحة
-شخذوووو بس گليلي
-جنطة خزعل بيها اوراق وفلوس
-يبوووووووو
فزت ريحانة وبچت وهي خلتها
بيد سهامة تسكتها
لهناك وصاح ابو علي
-جيبي ام ريحانة ناخذها ياله مادام طر الفجر
لبستني هدومي وانا اهوجس من الوجع
-لثميني فدوووة
-ولچ انتِ بيا حال
-مااگدر لثميني
لثمتني ومشت بيه وصلت الباب
وسمعت صوت هاجس ينشد ابو علي
-يدوووووسون بيتها وانا موجود
-ردييييني للبيت مااروح خليني اموت هنا
نعمة مااروح ويا هاجس
-ولچ بطنچ نزلت من الخوفة وعايني ايدچ
تلولحت وورمت
عتيت روحي منها حتى ارد للبيت
لزمتني لوية قوية وشي دافي نزل عليه
بلعت ريگي من الخوف وصرخت
-نعمممممممة
على الحس اندفع الباب هاجس وابو علي
ونعمة ركضتلي شاورتها
-يمكن انزف رديني للبيت
مشت بيه للحجرة تعاين ولطمت على وجهه
-ولچ هذا مااااااي الراس
لفتني لف ولمتني وردتني بره وطلعو بينع هاجس
وابو علي للولاية منا لمن وصلنه اهجس
بطني انشلعت شلع حيل طببوني
حارو بيه صاح بيهم هاجس
-شوووووفو ايدها
دكتور شافها وصاح
-مخلوع المفصل لازم نرجعه لمكانه
التفتت خايفة لنعمة وصاحلهم
-واحد يلزمها ضروري
لزمتني نعمة مارضى الدكتور
-واحد من الزلم يلزمها ضروري
رجل نعمة استحرم وهاجس بدون
حچي اجاني كض متوني حيل وانا مغمضة
من الوجع هو الطبيب حركها وانا عتيت ايدي وهاجس
لچني لچ بمچاني حتى مااتحرك وطگت وردت ايدي لمچانها وروحي غابت طحت ماادري شكو
شوي وهجست الماي على وجهي تغسلي نعمة
گعدتني والمغص اخذني والمايات تارسة
هدومي
ومحد يمنا بس احنع الاثنين
-رااااح تجيچ الطبيبة
-فدووووة بطني موتتني
واحنه نحچي اجت طبيبة شافتني
اشرت لنعمة
-خل نفحصها
مددتني هي شافتني وصاحت
-متوجه الطفل للولادة شگد عليچ
-ماصارلي ايام بالسابع فدووووة
شلون اوووولد
-لازم اولدچ هاي طالع الطفل ماما ضروري
صارت هوسة يمي ودكتورة ووياها بنات
يحچن وكل واحد يگول شكل المغصات صارت
وحدة براس الأخرى صرخت وهي صاحت
-ادفعي ماما لازم تدفعييين
ابچي وعيني عالباب يتخايلي
خزعل واگف وزعلان
صرخت حيل
-يااااااااعلي
وصاحت الطبيبة
-هااااااي هي اجاچ ولد
ماگدرت احچي روحي تغورف كل ساع
اغيب وارد واسمع الهوسة
الجاهل مالة حس ونعمة صوتها يرجف
-لييييش مايبچي فدوة اروحلچن
وانا الچنت ميتة روحي حضرت وفتحت عيوني
واذاني عليهن صارت الدنيا صافية والصوت
الگطة حتى لو دبيب نملة اهجس وحدة
تنظفني بس بالي يم صوته
وحدة وگفت على راسي تمسح شعري
وتعدله وتمسح وجهي من العرگ عاينتلها
-وييييينه الجاهل
-هسة يرجعونه الچ بس يشوفونه
لا تخافين مبينة انتِ سبعة
ردتلي نعمة بعد شويه وجها مخرط واحمر
ماظنيت الصار عبالي من جابوني ودرت بيه
مبيوگة
-وييينه الوليد
-سبيعي گالو لازم مدري شيحطوله من سوالف
الطببة وعود يردونه
ايدي معلگة برگبتي ملفوفة وروحي
بيها مثل نار من القهر والتعب
خلصن ولمني ونظفني وبلاية شعور غفيت
ووحدة منهن مدري شتحط بيدي
بارد سرة بدمي وهداني وغفيت
لهناك وايد نعمة گعدتني بهداي
-عذوبة گعدي
فزيت وماببالي بس وليدي
-هااااااا نعمة وين ابني
-اسم الله يابعد روووحي
موجود بس الطبيبة گالت يبات
-خوش وديني الن
-مايصير مارضو گالو ضعيف
-چا شلون ارضعن
-مايرضون رضاعة يحطوله دوة مدري شني
يلا حبيبة المچ ونطلعچ
-لا ابات يمه انتِ ردي علمود ريحانة
-لا مايرضون كالو زينة نردها للبيت والجاهل
يومين ونطلعه
نزلتني نعمة من القريولة گوة أمشي
-لثميني نعمة
-عدتچ سقطت بعد مادام جبتي
عدلت چفيتي وضمت شعري ولفتني بالعبا ومشينا
واهجس روحي مامصدگة التگوله بطني خاوية
شلون الفاگدة شي وصلت وياها للباب
هاجس واگف ورجل نعمة حاچاني
-الحمد لله عالسلامة خويه
حاچتة نعمة
-هاااه راح تظل
هز راسه ورد للمستشفى
صعدتني وگعدتني حطيت راسي
على متنها وگبل لا يحرك هاجس گلتلها
-نعمة خل يسمي الجاهل سالم
استغفر هاجس ودار وجهه علي
درت وجهي عنه وغمضت عيوني
تحرك بينه شويه ودرت وجهي
مدري شبيه للمستشفى
شفت رجل نعمة واگف ويا رجال وبيده
صندوگ
رديت درت وجهي تعبانة ونعمة تأمني
-لا تخافين ابو علي يمه وباچر ترتاحين
واجيبه الچ
غفيت على متنها رغم وجع ايدي وبطني
تخايلي خزعل يحچي يم اذاني على كيف
-لا تخافين علي اخذته وياي
وعيوني تخايللها وصارت شوفتي لرجل نعمة
وبيده الصندوگ گدامي هي فزة وهي
صرخة
-يمااااااااااااا وليدي
چنة نمشي عالنهر داخلين السلف
وگف هاجس ودار ونعمة حضنتني
-وليييييدي نعمة شفت ابو علي بيييده
صندوگ ولچ هذاااااااااااا وليدي موووووووووو
اعت بروحي عنها وهي تنحب وهاجس
يمسح بوجهه خايف
-ابنييييييي مااااااااات ولچ نعمة مات مووووو
طلعت فارغة ايدي من كل شي
-استغفري الله سودة بوجهييييييي ولچ خيه
-بس ريحيني
بهتت روحي وطحت بحضنها وهاجس يگلها
-لا تموت گليلها
حطت راسها على راسي ونحبت
-سودة عليه يابعد اختچ امر الله نفذ
من طاح من بطنچ مات
ماگدرت احچي ولا ابچي چفيت وجهي
بحضنها وغمضت صدك خزعل اخذته وياك
وصلنا البيت نزلتني مااگدر اخطي خطوة
وهاجس يلح
-نعمة اخذيها يمچ بالبيت
-ماااريد خلوني ببببيتي
زمخت بيهم وانا ماادري شريد
حطتني بحجرتي نعمة وراحت شويه وردت
وياها سنية النعت وبچت وبچتني وياها
روحي ذايبه ماادري ابچي على خزعل
على وليدي عالبوگة المااعرفها ليييييش
ونيت وبچيت ونعمة صاحت
-سنييية لا تموت اختچ كاااااااافي
نمت بلايا شعور وتالي الليل نعمة تنده
بيه توكلني شلكين ودهن حر ودبس
روحي رادة مااگدر اكل شي
وبالي يم بنيتي
-مابيها شي ريحانة نايمة بحضن سهامة
والله ولا باچية
للصبح بعد مانمت وصدري انترس
حليب وصخنت گامت نعمة تسويلي
وصل بماي وتبرد عليه من بعد هالليلة
جمدت صرت بلايا شعور لا أبچي
ولا احچي بس ساكتة ماااااريد اسمع
بشر ومر الاسبوع والاسبوعين والثلاثة
وانا مثل الصابة خرس على كبر
انطفت شمعة عيوني راح خزعل
وراح الولد الچان يتحلم بي
وظليت انا وبنيتي وحيدات
لا بچي فات ولا لطم صحيت على زماني
والتفتت للبوگة واخذت حسين رجل نعمة
ورحت للمركز دخلت هاجس گاعد بس
شافنا گام
-ابو علي ليش جايبها هنا
-انت مو الحكومة هنا بالسلف جيب حگي
بيت عناد باگوني فلوس وورق الگاع
كلة اريد حگي وحگ بنيتي انا گادرة
اخلي ابو علي يروحلهم بس موش زلام
وچلاب يغدرونا ويسووله شي
انا اجيت للحكومة خوووووش الگه
جواب لو اروح برجلي
دگ على صدره گال
-يمممممي خليها علي انا اجيبهم حدر رجلچ
رديت وانا مامرتاحة وهاي رجفة عظامي
الأرجفها من يصير شي تسري بنص
دمي
اسبوع زمان اتاني ووگفت سيارة هاجس
بالباب طلعت وهو سلم
-شلونچ عذبة
-ام ريحانة انا والحمد لله
-الجماعة كلهم حطيتهم حبس اسبوع
واجوهم شهود حلفو چانو ببغداد
عدهم شغل بيوم البوگة
-شلوووووون وانا سمعت صوت خضير باذاني
شلووووون والباگني جاي علمود اوراق الگاع
-رحت حتى للسايق الماخذهم لبغداد
خاف يتخايلچ
-سويت العليك رحم الله روح عمي
هاي هي انا اخذ حگي بيدي
رديت الباب دفعة
-ماتضيفين عذبة هيچ صايرة
-مااااااضيف مادام راعي البيت غايب
هلا بيك
رجع ليوره وطبگت الباب ورا
مارديت للحجرة وگفت الغروب وجهت
وجهي للقبلة ودعيت من كل گلبي
يطلع حگي بلاية منية من واحد
ايام بعدها والبيت فرغ مابي فلس واحد
گمت اطيت لنعمة معضد من عندي تبيعه
اسوي مصرف النه ومارضت بس انا لوين
اظل عالة عليهم خليتها تبيعه
ومر شهر ضبط وهذا گلبي
ناااااار اتمنى افك گبر خزعل وانام بي
ويطمني التراب ولا أضل حدر الأدين
من خلص الشهر الحمد لله انا ايدي
زينة بديت اسوي مكانيس سعف
وواودي بيد رجل نعمة وخليت علاوي
يحصدلي من الخضورات الچنت زارعتها بوصلة من الگاع ماانكر گلبي بعدة مفطور وامنيتي
چانت اشوف وليدي بس
ماطاح بيدي خافت علي نعمة وخلتهم دفنو
وبيوم من نهاية هالشهر گاعدة وعله
صوت علاوي دفع الباب ودش للحوش
وجهة مصبوغ دم ركضتله وهو مابلسانة
-اليووووم اكتل خضير
-ولك ياااااهو
-خالة اطيني المگووووار والخنجر
-يممممممممه شبيك
-خضير ابن عناد شلع المخضر والخضرة
ورشهن نفط وحرگهن يگول الگاع گاعنا
جايبلة حواريث يحرثونها
انا منا گلبي محروگ من هاجس گاله
لا نشدت چانو ببغداد
وانسدت السالفة اجه هسه والله جابه
لبست عباتي وطلعت اركض اعاين نار هامدة
بالگاع اكو مسحاة داچها الحاروث بالگاع
شلتها وركضت صحت
-هذااااااا ياحرامي جاي يزرع گاعي
التفت وعينه النگسة صدت علي
-هلاااااا بأم ريحانة شني شجابچ
لوحت بالمسحاة علي
-اسمع النگري الحرررررامي تاخذ زلامك من
گاع خزززززعل لا وعلي ابن ابي طالب
اليوم افج راسك فج
خاص عينه صفح من الشمس وضحك ابو
سنون الخايسة
-ردي حبابة ردي لمچانچ
الگاع گاعنا وحتى البيت الانتِ گاعدة بي
بس احنه ساكتيييييييين لخاطر المرحوم
-تنچببببببببب انت واكبر شااااارب عندك
وتخسى والله الگاع گاع عمي وبسم خزعل
-احلفي واحنة نحلف
-حچي يفيدك تريدني احلف على حلالي
-يا حلالچ يالمگطمة
-تفففففففف على شاربك
بس تفلت اجاني يركض شلت
المسحاة بسرعة ضربته وارتد ليوره
گصته انشگت وصاح
-تلگي وعدچ ياااااااعاهر
-تفوووووووووو عليك يا باااااطل
مشيت للبيت اهف تلاگيت بالباب ويه
رجل نعمة
-هااااااه وينچ سمعت عليوي
مضروووووب
وجهي نار وابچي
-خضيييير يگول الگاع گاعنا
-ياگاع
-گاع خززززززززززعل عود
وفوگاها يريد يحلفني
-لااااااا ذول دواهم عندي
ركض للگاع وعلاوي ركض يحشم ازلام
من السلف شويه وگبت الهوسة
وصوت العسكر صاح وصوت سيارة هاجس
ومسدسه رمى چيلتين
ومنا ومنهم صاحت الزلام السالفة
تروح لمضيف الشيخ
والينوب عني هاجس وزلام خواتي
ويومين واخذوني رحت عناد وولده
وزناد وولده وانا يم الشيخة
گاعدة صاحلي رجل نعمة ولفيت روحي
وبباب المضيف صرت وره رجل نعمة وحچيت
-شيخنا طالبني
-طبي بويه مستورة أن شاء الله
وگفت بكتر رجل نعمة وصاح عناد
-هاااااي اوراقنا شيخ الگاع
بسمي انا عناد اشتريتها من المرحوم خزعل
گبل لا يمووووت
-ماصار عمي الگاع زلمتي وبأسمه
والورق الانباگ ويه الفلوس من بيتي
يگول گاع خزعل وعمي ابو خزعل
اشتراها منهم ودفع حگها
-ههههههه وتجي فرخة جاهل صلفة عاتية مثلچ تچذبني
وگف هاجس
-ابوووووو خضير خليني جدام عينك
لا تغلط الحرمة تخصني
-اسمع جنابك انا وانت وحتى هي نروح
للطابو وتشوف بعينك الگاع مالتمن
-الگاع مال زلمتي وبأسمه
بين صد ورد الشيخ صاحلهم
-نروح باچر ونشوف وهم لا تنسون
ام ريحانة بنيتكم وريحانة رادتلكم انتم
اهلها لاتكثرون الزعل بيناتكم لمو
بنيتكم
انا واگفة رديت ورة باب المضيف اجاني
ابو علاوي وهاجس
-انا باچر اخذكم بيدي للطابو
-سالم ماانريد نتعبك ياخذني
ابو علي
-وياي انت ويا وكافي روحي يم الحريم
عفته ورحت وراها رديت لبيتي
الليل كله ادعي ربي يردلي حگي
ومايكسر بخاطري للصبح مانمت
گعدت ورجل نعمة بالباب صعدت وياه
ويه هاجس ومشى بينه للولاية
لحد ماوصلنا لگينه الشيخ هناك
وويا عناد وزناد وخضير
طب هاجس وبرتبته انخبصت العالم
گعدونا بغرفة صغيرة
وبيها مكتب وطب موظف چبير بالعمر
بيدة سجل شكبره واوراق
هاجس والشيخ سولفو ويا
وعناد اطاه الاوراق العندة شويه
طول وبده يحچي وانا گلبي ويه
كل حچاية يتفسر وصلة وصلة
وينهدم
-اسم المالك للأرض عناد ميذاب عيدان ال……
رقم الارض والحدود واسماء اراضي
الناس التحددها وللمالك عناد ميذاب
عيدان ال…… حق تصرف خاص بالأرض
گوة بلعت ريگي وسألت ابو علي
-شلوووون والله گاع خزعل
نشدهم ابو علي وصوته يرجف من القهر
رد علي عناد
-هذا بالطابو شوووووف مكتوب كل شي
هو البايع وانا المشتررررري وهذا توقيعه وختمه
وختمي انا
صد علي عناد و ضحك
-انتِ مو تعرفين تفكين الخط اقرررري
جابولي الطابو وشفت الختم مال خزعل
صدگ والتوقيع ماشايفه توقيعه انا
وبايع ومشتري والتاريخ لمن طلگني
وكفت وطاحت من ايدي الورقة
گلتلهم
-حاطة وياكم سبع الگنطرة ان چان
بهذلتوني واخذتو حگي
وگف خضير
-ماتظلين بگاعنا موووو گاعدة بيها
وتتفلين بالماعوووووون
صاحله هاجس
-اسكتتتتتتتتتتت لااترس حلگك رصاص
وكف عناد
-جنابك مامچذب ابني تطلع من گاعنا
درت وجهي وطلعت ولحگوني هاجس
وابو علي ماگدرت احچي طول الدرب
يسولفون والاوراق صحيحة وانا
مامصدگه هذا ملعوووووب وملعوب
چبير
وصلت البيت طبيت وقفلت البيبان عليه
وعلى بتي بزناجيل العصر وصوت
عناد وولده وصياح نسوان
دگو لمن ملو ماطلعت حتى نعمة خطية خايفة عليه هييييچ بساعة اتشرد وانا چنت مدللة بجال خزعل
لليل وصارت نار بالحديقة بسرعة مشت
لأن الحديقة متروسة حطب طب الدخان للبيت
وانا صرخت اخذت بتي وشردت بره
اصرخ گوة فتحت الباب والناس التمت على صريخي
هم ماكو بس ادري هم الحرگوني
الناس فزعت طفت النار ونعمة حلفت يمين
بعد مااظل يمهم
-امششششي الليلة اطلع غراضچ منا ولچ
شنهي ظالة يحرگونچ وتموتين
-ولچ خيييييه بيتي وگاعي اخذوها غصببببب
عني
-ولچ روووووحچ أهم امشيييييييي
عتنتني وياها للبيت حوشها
صغير بس حجرة الها وحجرة
لجهالها البنات ينامن بيها والولد بالربعة
گعدت وياي هي وسنية وانا مفرفحة
-ولچن لازماتني وبييييتي يتفرهد
-يااااابيت ولچ شفتي طابوووو الحكومة الهم
الگاع والبيت
-بااااااطل والله باطل مدري شلون
سووو
-مو باطل مسجل عدهم رجلچ بايعلهم
-تظنين خزعل يسووويها
-خليني ساكتة ياخيه هو الطلگچ
وماگاللنا تردينه يگلچ ………
ماخليتها كملت
-لاتجيبين سيرته نعمة
-اسكتي كاااااافي ما اگصد شي
-بيتي رادتله
شلت بتي ومشييييت اهف وهي تركض
وراي
-ولچ مسووووودنة
-مسوووووودنة ايييي بيتي انت تفتهمين
يردون يطلعوني منه وياخذونه
وصلنا الباب واگفة سيارة هاجس
وابو علي ووياهم خضير بس شفته
حطيت ريحانة بيد نعمة وركضت
شافني هاجس صار جدامي
-الحرررررامي جاي هناااااا تحرگني
-عمي توني اجيت چنت يم جنابه
هاجس هز راسه وهو كمل
-جنابك شفت بعينك احنه مشردين
وهي متنعمة بگاعنا وخليناها ولدت يلا اجينه
لخاطر المرحوم
-ماتطلع من بيتها
-جنابك شلوووون ماتطلع اجيب امر من الحكووووومة
عاينلة هاجس ولزم مسدسه
-تووووكل عود من تجيب امر الحكومة تعال اشلع
البيت من عيونه
راح يمشي وانا فتحت باب بيتي ودشيت صاح رجل
نعمة
-فتحي الربعة بعد اخوج
فتحتها وهو ونعمة وهاجس طبو
-تعاي ام ريحانة
گعدت وجثتي تتراجف
حتى لساني انربط
-تلمين غراضج عذبة
عاينت لهاجس ومارديت
-مااطلع من بييييتي مااطلع
عاينلي هاجس ومسح شواربه
-بوووووية شفتي بعينج الورق بالطابو
الزلمة الله يرحمه بايع وهم مشترين
-چذب مامشترررررين كله غششش وبوگ
-الحكومة ماتقبل غلط
عاينتله وحطيت عيني بنص عينه
-الحكومة وعسكرها التاخذ الناس ظلم
وتحرمهم من عوايلهم هي هاي الحكومة نفسها
الاطت الحگ لعناد وولده واخوته
وگف واشرلي
-تطلعين منا مااريدچ يطلع صوتچ بين الزلام
انا اكفلچ مكان وين تردين
-محد يمن عليه وانا مرت خزعل
محد يمن عليييييه وانا عذبة
هز راسة ومشى وابو علي مارضى على
حچيي
ظلت نعمة يمي وانا گلبي شايل من حچايتها
على خزعل
ظلت يمي شويه وگتلها
-رووووحي لبيتچ خية انا احمي
روحي ماعلي شي
-تسووودتني ولچ
-اييييي تسودنت من صار الحگ باطل
والباطل حگ
طلعت وردت عاينتلي
-راح اطرشلچ علاوي يبات يمچ
اجة علاوي خطيه سودة عليه ابتلى بيه
نام وانا افتر عالبيت ويا مچان وگف بي
خزعل بچيت بي
للصبح واندگ الباب حيل طلع علاوي
وردلي
-خااااالة عسكر ووياهم عناد وولده
-اركض للمركز شوف خالك هاجس موجود
صيحة ابوك ماكوووو هسه
-لا خالة بالولاية
ركض ورد بسرعة ويا بالسيارة
وحس هاجس عالي ينشدهم
-شصاير
رد عناد بصوت مترهي
-جنابك ردت امر من الحكومة وهذا امر
الحكومة
انا وره الباب وهم يحچون
دگ هاجس الباب
-ام ريحانة هذا انا فتحي
فتحت الباب وطب للحوش
هز راسه ماراضي
-بعد لزمونه بأمر الحكومة
طاحت دموعي وسألته
-الله يرضاها يطلعوني من بيتي
-وروح ابووووي لو بيدي احرگ
بيوتهم حرگ بس لزم الامر بعد
-اطلع
گوة حچيت وشهگت
-لازم
طلعلهم
-اطونا چم يوم
-اسبوع زمان ونرد نلگه البيت فااااارغ
رديت للبيت اعاينله
بيتي هذا چان خزعل يتمنى يسوي مثل اهل
الولاية ويجيب ويحط بي غراض
اجن خواتي ونعمة تگول احط غراضچ بالمحصار
مال عيالي فارغ مابي هوش
وسنية تگول احط باقي الغراض بربعتي واسدها
وانا راسي مفتر بيوتهن اثنينهن مفتوحة على
بيت عيالهن وعمتهن وحمواتهن والحموين كلها شي
تطب على شي
بديت الم بغراضي واحط بغراض خزعل
بصندوگ خشب كل حاجة تمر ايدي عليها ابوسها
يابعد روحي ماتهنيت بيه ولا تهنيت بيك
طلعت الذهبات مالتي حتطيتهن بچيس علگته
برگبتي بقيطان
وبيومين لميت غراضي وفرغ البيت
ازلام السلف تعاونت وشالت غراضي
ومحد راضي بعملة بيت عناد عم خزعل
والكل عيرهم وعاب عليهم
خلص وطلعت من الباب بتي بيد خالتها
سنية وانا مابيدي غير قاط العرس
مال خزعل وويا ثوب عرسي بصندوگ
عاينت للحوش فارغ
يا بويه الموت هين والگبر هين
بس حيف الزلم الزينة توسدت الگاع وصال بيها خضير العار ابن العار
ما كفاهم خزعل اندفن شباب محروم
خذو گاعه ظلم وگفت على عتبة الهيكل
الدار الچان خزعل يريد يبنيها طابوگة طابوگة
شفتهم يطالبون بالحيطان وچنهم ما يدرون
الحيطان بلا أهلها صبخة وسراب
شلت الصندوگ على گلبي وطلعت أجر بذيالي
التفتت وراي
شفت بابنا الچان مشرع للمحتاج
ومايدگه واحد على خزعل يرده
حتى النخلة بنص الحوش
حنيت عليها وودعتها چنها توميلي
بسعفها
ظلموني وحرموني و ركضوا على الورث قبل ما ييبس تراب گبرة
ما احترموا موته ولا صار بعينهم انا وحيدة وارملة
طلعت من البيت بس ما طلعت للشارع
طلعت للتعب والتوهه
المرة بلا بيتها وبلا رجلها تصبح مثل السعفة الهب عليها ريح السموم لا في يلمها ولا گاع تلزمها
مشيت وتلاگيت ويه خضير واخو
عاينتله وتفلت بصفي وهو رفع شاربه يضحك
-يا حيف على الشارب الما غار على عرض ابن عمه عفتلكم الحيطان وعفتلكم الطين وخذت وياي بس ريحة خزعل ودعوتي صبح ومسية عليكم
والله موجود ماينام عالباطل
وصلت لبيت نعمة طبيت للحوش
خلت غراضي بحجرة البنات
سهامة ونجاح الكبار والصغيرة
زينب
اعاين الحجرة صغيرة وضاگت اكثر
من حطيت غراضي
عندي چم فلس مايكفني شهر
وعيب اذب حملي على خواتي
حرت بزماني استحي اكل استحي
أشرب وروحي طاگة ومالي خلگ
حتى النفس چم يوم واندگ الباب عليهم
وطبلهم هاجس واستقبله رجل نعمة
بالربعة وبين سوالف وضيافة صاح لعلاوي
وانا اسمعه
-روح للسيارة تلگه المسواگ جيبه
كله جبته من الولاية وطبب لخالتك
عذبة العلاليگ المشددة
ردت اطلع عتت ايدي نعمة
-عييييب من ابو علي لا تردين
ابن عمچ
-مااردة گدام رجلچ لا تخافين ومو انا
الاحتاج صدقة ولا بنيتي معتازة احد
-شووويه لازم تطخين الدنيا مو كلها
زماط عذبة
-اططططخ والله يلفاني الموووت
ولا اطخ راسي ولچ شنسسسى
كسرة خزززعل بسبب حچاياته المثل السم
طب علاوي للحجرة وبيده علاليگ
اخذتهن نعمة حلتهن
هدوم صغار لريحانة وحذاء وغراض مبينة
غالية وبين الغراض مخلي فلوس
جرت ريحانة تگدر الثوب وانا عتيته
-احرگ بتي وعلي اذا لبستي الها
-ولچ وراچ دنيا طويلة وتحتاجين
البشر لا تظلين على كل شي تعاركين
-جيييييبيهن وسفة عليچ ولچ شنسى من سوايات
هاجس
بس سمعته طلع عاينتلها
-روحي لرجلچ خل اطلع لهاجس
-ولچ عييييييب
-العيب عليه انا معليچ
راحت صاحت رجلها وانا طلعت ورا
صحت
-هاجس
دار وجهه وعيونه ضحكت
-بعد عيوني
-انا مو بعد عيون احد غير زلمتي
وهذا راح يم رب كريم
اسمعني ابو كمال المسواگ ونگول صوغة
اللبس الملون والريحة والمشاط اليه
ولبتي شني معنى تشوووفني فرحانة
رجلي انكتل وابني مات وگاعي انسلبت
-عذبببببة لا تكبرينها وهي صغيرة
صوغة لريحانة وانت مصيرچ تنزعين الاسود
-للموت ماانزعه انا لابسة على زلمة
يستاهل
تنفس حيل وگرب صوبي وانا رديت للباب
-الغرااااااض ماترد وعود حرگيهن
تعلمي بعد كل اسبوع مسواگ
وكل شهر غراااااااض
-احرگهن والله
-حرگيهن چا انا شگلت
وردي للبيت هذا ابن عناد مگابلچ ويعاين
-عيوووووونه افگسها شني ماله رداد
طبيت وعفته وراي ونعمة واگفتلي
-بعد ماتعيدينها عيييييب
-عيبيش ولچ تردينه يركبني فضل ويريد
يرد الچان والله لو يحط وينط ……
-ابن عمچ ومالچ غييييره
لطمت على وجهي وهي كضتني
-ولچ اعرررررس وانا فاگدة زينة الزلم
-بعدچ صغيرة وبنيتچ تعتاز رجال فوگ راسها
-ان چان ثگلت عليكم انا اطلع منا خية
لا تدللين بيه علمود اعرررس خوش
-من امداني اذا عبالچ هذا گصدي
ولچ بعدچ شباب وين وشلون تعيشين
-اليه الله وانتم هم تحملوني بس الگالي
مچان يلمني
-هيچ تقهريني عذبة
تعذرت منها وطلعت بره
الايام البعدها كل اسبوع
يجي هاجس يلاشي ريحانة ويلعبها
ويشرب چاي يم رجل نعمة ويروح
ويعوف المسواگ وانا حلفت اكل لو
بس خبزة ومسواگة مايطب بطني
شهر زمان صار والبنات تضايگن خطيه
ريحانة بس تبچي بالليل رغم تحب
البنات وخصوص سهامة
عيالهن يبسمرن وانا ابلع الحچي
وأسكت منا لمن گمت اشوف غراضي البمحصار
يم سنية يطلعن شي وره شي
هدوم الوان وطلبتهن لحماتها اطيتهن
الها
الفرش طلعن نصه لحد ما بمرة شفت
بيد جاهل منهم صورة خزعل الچبيرة
مكسر اطارها الگزاز ومشگگه وانا ركضت
لبيت سنية لاگتني عمتها
-شلونچ خالة
ردت السلام گوه درت
للمحصار وشلگيت الغراض طشار وفراشي
مسحول صحت لسنية
-ليييش هيچ سنية مو دگيتي
صدر وگلتي انا احافظ عليهن
اطيت الهدوم والمواعين وگلت بثواب
خزعل چا حتى الصورة مشگگها
ابنچ
بعدني احچي وطبت عمتها
-خالة شنهي ابتلينه شو ترستي الغرف
محصاري وربعة سنية وغرفة بنات
نعمة ماخذة البيت حاصل فاصل وماراضية
مو المرحوم معلم چا ماعنده مضمام فلوس
وابنيلچ غرفة وارتاحي وريحي العالم
بلعت الحچاية وعاينتلها سنية
لونها انخطف
وانا رديت عليها
-ما مچذبة خالة ماقصرتي انت والولد واخواتي
تحملتوني شهرين كثر خيركم
-اي ياخالة لروحچ انا احچي مابيها زعل
-لا لا
عفتها ومشيت ركض سنية لحگتني
وتگابلن هي ونعمة يتعذرن وانا
اكل بروحي
-انا مازعلانة منچن ترى
ولا من عمتچن بس صدگ
يرادلي مچان
-وعلي بس يسمع ابو علي يطگ ويموت
-لا تگليله شي عييييب ماقصر وگف وياي
وگفة اخو
-وانتِ مصدگة اخليچ تطلعين منا
هزيت راسي حتى مايزعلن خواتي
الظهرية وگلتلهن
-نعمة راح اروح شويه عالشط يم
السدرة شو صدري ضايگ بس حطي
عينچ على ريحانة
طلعت وانا ملفلفة ومغطاية ووجهي بس عيوني
طالعة ومشيت براگ الشط لما وصلت المركز
طبيت العسكر واگف بس گتله طببني للمكتب
شوية وطب هاجس يلهث عاينلي چنة مامصدگ
-عذبة شبييييچ
-اجيتك بطلبة ووعد
-رگبتي سدادة
- هاجس الدنيا دارت بيه والبيت الچان يسترني صار لغيري وشفت بعينك
خذو مني باطل
اجيتك وأنا أدري بيك ابن عمي رغم الصار
أريدن منك وصلة من گاعنا
ابنيلي بيها حجرتين و أگعد بيها
تسترني من كلام الناس اليگطع بيه
كل ساعة ومن منية الغربة
عاينلي وگعد مرتاح وانا گاعدة على سكملي
گبالة
-عذبة الگاع موجودة
بس اسمعيني ليش تبنين حجرة وتعيشين بضيم
وضنكة حال
بسسسس ارضي بالاگوله الچ
واخذج لبغداد لو للولاية
صيري حلالي وأفرشلچ الگاع ذهب وورد والله
وگفت لطمت على صدري
- خزعل بعده ترابه ما نشف
وأنت تساومني على عرضي شنهي العرس التحچي عنه وانا مرررررة حزنانة على زلمتي
وگف وگفة ضرب ايده حيل عالمكتب
- الحزن ما يلوگلچ يخلي عيونچ الخضر يظلمن
ليش تضيعين هالطول الحلو بتراب الحزن والماكوو
تردين گاع عذبة وانا صدري وحضني مفتوحااات الچ
گبل وهسسسسه
-ووووسفة عالزلم ولك اجيتك وگلت يظل ابن
عمي وانشده بالمروة العندة
تظنني صيدة سهلة لأن مالي والي
والله يا هاجس لو أموت بوسط الچول
ولا يلزم طرف ثوبي واحد مثلك يساوم عرضه على سترها الگاع التطلب ثمنها عرضي عساني مااخذتها
خززززعل مات بكرامة وأنا أعيش بكرامتي
ضحك وتبوسم وواجه ناحيتي
-گلتيها مات وانتِ عدلة وانا عدل
وگفت والهوه من الشباك لفح وجهي حار
اعاينله عينه مني مو عيون ابن
عم لا عيون ذيب جاع وصادف صيدة كسيرة
وگف يمي وانا وخرت رد صار گبالي
-الحزن لوعچ ذبل خدودچ وخلاهن مثل ورد ذبلان
خااااايبة ليش هذا الطول يذبل بالحزن والويلات
وليش هالصدر يضيگ بآهات الوجع بدل اهات
عصرة ضلوعچ بحضني
خزعل راح وشبع موت
وصار تراب الله يرحمه
والحي أبگى من الميت
-تخسسسى والله هالبدن مايمره واحد بعد
زلمتي شنييييي ماعندك شرف ولك اكببببر
اكببببر وعيببببب عليك اسمع هاجس
انا ماجايه اترجاك الگاع الطالبتك بيها
انت تكفلت تردها الي حصتي من اهلي
وحلفت لعمي
ضحك وارتفعت شواربه
-وابوي هم مات الله يرحمه وگاع مالچ يمي
اررررضي والله والله ابنيلچ عالگاع الترديها قصر
واحطه بسمچ
-مساومة ولك تساوممممني مساوم بدل ماتعيني
-مااااااساوام بس انتِ تخصيني من احنه جهال
انتِ اليييييي لوما غلطت أنا واعترف كدامچ غلطت من عرررررست ولچ ريحتچ بخشمي طول هلمدة
ماتغيبين عن بالي حتى من چنتي على ذمة خزعل
-وسسسسفة وعييييييييب عليك
درت وجهي اريد اطلع ومشى بسرعة گبلي
قفل الباب
- عذبة صدگ نسيتي ذيچ الأيام
نسيتي من چنة صغار وتلبدين ورا السدرة
وأنا ألاحگ طرف ضفيرتچ
نسيتي الرسايل الچنت أوديها بيد السايق
مال الشيخ
أنا هويتچ گبل لا خزعل يعرف اسمچ
وچنت أحلم بذيج الليلة الأفك بيها ضفايرچ بإيدي واحلها على صدري هسه دارت الدنيا ورديتيلي
-ذاك چان خبال عشاگ هاجس وفات وكته من خنت العهد وهسه اتقي الله بيه أنا أرملة وبت عمك
ضحك وتقرب جر طرف چفيتي
عتيتها من ايده رد لزمها وعصر چفي عصر
-سمعي اخر كلامي شوفي عذبة
الحچي خلص إذا رضيتي
أخليچ سلطانة بهالسلف وشيخية
أشبعچ دلال
بس رديلي خليني اروي عطش سنيني
بيييييچ
دفعته حيل ولزم چفوفي اثنينهن ربطني ربط
ويرجف
- راح أعوضچ عن كل ليلة نمتي بيها بردانه
وأنسيچ حتى اسم خزعل
عاينتله وعيوني صارت جمر العبرة خنگتني
-ولك وسفة اجيتك بطلبة
بس ماشفت ابن عمي
اعاينلك واشوفك ذيب كاسر ينهش بستري
بسوالف قديمة چنت ناسيتها ونسيييتها
ومسحتها من راسي بحب خزعل الي
ودلاله وطيبته وعشرته الحلوة
اشتعلت نار الغيرة والحقد بعيونه
ومن شافني أصد عنه
بلمحة بصر مد إيده الخشنة ولزم زنودي
لحد ما غرزت أصابعه بلحمها
وجرني جر يريد يحضني وانا ادفع بي
مااگدر اصرخ لا انفضح
حط وجهه يم اذني ونفسه العالي لعبت رووووحي
- تظنيني مثل خزعل فاااااهي
ولچ غلطانة انا زلمة آخذ حگي بإيدي
هالطول الچنت أحلم بي وهالنفس
الفگدته صار هسه تحت رحمة إيدي
والله ما تطلعين من هالمكان إلا وأنتِ
راااااضية بالگتلچ علي
-رااااااح اصييييح وروح عمي مييييل عني
نذل
- تصيحين صيحي منهو اليسمع ويگدر
يطب هنا
ومنهو اليصدگ وحدة اجت برجليها هنا هاااااا
رديلي والله والله اعوضچ ايام الفراگ
كلها
-هدني يا نذل هدني يا فاقد الغيرة
والله لو تگطعني وصل ما تلوح مني شي
إيدك الزمتني بيها عساها بمرض ما يشفى
وسفة يالماعندك مرجلة تساومني ولك
هي المرجلة اندفنت ويه خزعل
هدني لا أدعي عليك دعوة يتيمة مكسورة خاطر تهدم بيتك فوگ راسك
ماسمعني وعصرني بين ادي عصر
يحضن بيه ويرجف
اهجس حياية تلتف عليه
مو ايدي مرت بعيوني ايامي ويه خزعل برمشة
عين وهسه هذا النذل ينهش بيه
صحت بأذانه من قهرتي
-ياااااااابويه ياسالم شووووف ابنك
شسوووووه
ايدي رخت عني وطاحت وانا مثل
الغرگان وطلع من الماي لميت عباتي الطيحها
وعدلت چفيتي
رحت للباب وگفت وهو يفتح بي
راد يحچي وانا سبگته
-والله يا هاجس لو ميتة انا وبتي ومدفونة
ويه جنازة خزعل ولا أشوف يوم يمد بي واحد مثلك إيده على عباتي اطلع من الديرة كلها ولا أعيش تحت رحمتك يا نذل
عدلت لثامي وركضت وبساعتها عرفت
الوجوه تتبدل والناس تتبدل والاخلاق
والغيرة والمروة تتبدل حلفت على روحي
من ساعتها ماادگ باب أحد ولا
اسأل احد على حاجتي ومن اليوم انا
چبيرة روحي وبتي ماتكبر بمنية بشر
كلام عجوز اخواتي كل ساع يتردد براسي
وردت حچايتها طنت براسي
رجلچ معلم شني ماعندة مضمام
وتذكرت وحچايته واني امشي
وطاحت دموعي وصوته رد لبالي
وهو يگلي من نشدته على فلوسه وين ضامهن
-الدنيا مو امان وعمامي وولدهم چلاب
مخليهن عد صاحبي أستاذ بشير
سووودة بووووجهي هسه ذكرتهن
اناااااا اذكرهن وارووووح للعاررررر اليساومني
امداني
وصلت حوش اخواتي ولاگتني عمتهن
عاينتلي صفح وانا رووووحي نفرررت
من المچان كله بعد
ليلتين مررررن وانا گلبي
ماامرتاح ويوجعني من الاسمعه
لحد ماطگتها عجوز اخواتي
واجتني لحجرة البنات
-اگلچ خالة بلايه زعل
احنه راح نطيح بيتنا مادام صيف
ونرد بنبني وراح نگعد بحجرة
بنات ابني ……
گبل لا تكمل رديتها
-ادري خالة بس هالاسبوع نطريني
-لا يخالة چا انا شعندي وياچ
ادري بيها تريد اطلع من بيتها وحگها
ثاني يوم صبحية وصحت لنعمة
-ها خية
-اريد سهامة بشغلة اخذها نروح
-وين رايحات
-للولاية عندي ذهبات ابيعهن وابنيلي
حجرة يمچن شگلتي
-يمممممه للولاية وحدچ
-يا شبيچ هاي شمرة عصا ومو بس
الي حجرة ابني لويلادتج هم شگلتي
عاينت ماراضية بس ماتريد تقهرني
وانا ردت سهامة لأن حبيبة وسرانية
مشينه للولاية بسيارة چبيرة مارة
نزلنا انا الگطها وهي طايرة واندل
مكان مدرسته حتى لو عطلة هم
بيها حارس شي وانشد عنه
سولفت السهامة كل شي وخطيه
حلفت ماتحچي شي
عاينت للمدرسة مسدودة انقهرت بس شفت
گبالها دكان معلگ فرارات
ونواعير ومصاييد وگفت اشتري فرارة
حطيتها بيد ريحانة ونشدت
-اگلك عمي تعرف المعلمين بالمدرسة
-چا شلون غير انا الحارس بيها
هو گال هيچ وانا ربي ذب على گلبي
ثلج بارد
-اگلك عمي تعرف استاذ بشير
-چا شلووون مااعرفه غير معاون المدير
مرحوم خزعل الله يرحمه ووووسفة والله
راح لرحمة ربه وماتهنى بوظيفته
-الله يرحمه عمي وين بيته استاذ بشير
-هذاك عايني اكو ببابه سدرة چبيرة
-الله يكثر خيرك
-تتدللين بويه
مشيت سميت بسم الله ودگيت الباب
شوي واجاني صوت خشن
-منووو
-انا خووووويه
بس طلع انا شايفته عرفته
-استاذ بشير
-نعم اختي تأمريني بشي
-أنا مرت استاذ خزعل
بس گلت هيچ عيونه حومرت وهزلي
راسه ومد ايده لريحانة واخذها وباسها
-ريحانة ابووووچ
هلا بيييچ بويه
رد عاينلي وهو يحط ايده على صدره
-تفضلي مررررت الغالي
چنت انتظر جيتچ
