اسكريبت عدم الثقة كامل وحصري
بيبي ما تيجي نتغدى سوا النهارده في أي مطعم بدل ما أنت قاعد مع الزفتة مراتك دي
عيوني نزلت على باقي الاسكرين وأنا مش فاهمة حاجة
كانت صورة حلة المحشي اللي كنت عملاها امبارح وتحتها مسدج
يعني بزمّتك أسيب المحشي ده وأتغدى برا؟
تلقائي بصيت على المسدج اللي بعدها
آه طبعًا وبعدين إيه المحشي ده؟ هي مش بتعرف تلف المحشي كمان! يا عيني عليك يا بيبي ده أنت عايش في مرار ما أنا قولتلك تعال اقعد لك يومين عندي تقولي خايف تكتشف هتفضل خايف كده كتير يعني؟
ابتسمت بحزن وخزي وكملت أبص على الشات
واللي كان آخر رسالة أصلًا
خلاص اسكتي اسكتي هلبس وأجيلك أهو بس هنطلب أكل ييجي لنا البيت مش هناكل في مطعم مش ناقصة هي فضايح
افتكرت لما جوزي قال لي امبارح إن واحد صاحبه تعب وهيروح له المستشفى واحتمال يبات عنده
حطيت الفون وقلت بحيرة
من الكلام واضح إنها متجوزاه
بس ليه؟! ما هو مش ناقصه أي حاجة خالص البيت نضيف وأنا مرتبة وعياله متربين
ابتسمت ابتسامة باهتة ومسكت الفون تاني
بصيت على اسمها في الشات شوية وبعدها فتحت المسدج وكتبتلها
أنا واثقة في جوزي حتى لو بعتيلي صور ليكي وليه سوا
وقبل ما ترد عملتلها بلوك
قفلت الفون وحطيته جنبي وقعدت ساكتة شوية
لا عياط ولا صريخ بس حاجة تقيلة جوا صدري
قمت دخلت المطبخ سخنت الأكل ورصيت السفرة كأن مفيش حاجة حصلت
بعد ساعات سمعت صوت المفتاح في الباب
دخل جوزي وهو باين عليه الإرهاق
أول ما شافني قال باستغراب
لسه صاحية؟
ابتسمت بهدوء وقلت
أيوه اتأخرت ليه؟
قال وهو بيحط مفاتيحه
كنت عند صاحبي في المستشفى الدنيا اتلخبطت شوية
هزيت راسي كأني مصدقاه وقلت
طيب تعال اغسل إيدك الأكل جاهز
بصلي باستغراب أكتر كأنه مستني خناقة أو سؤال بس مفيش
قعد على السفرة وأنا بحطله الأكل
المحشي اللي كان مصوره نفس الحلة
أكل شوية وقال
المحشي حلو أوي النهارده
ابتسمت ابتسامة خفيفة وقولت
بالشفا
ولما خلص دخلت المطبخ بسرعة وعملتله عصير ورجعت حطيته قدامه
هنا بقى بصلي بتركيز وقال
مالك؟
قولت بهدوء
مفيش
قال وهو لسه مستغرب
لا في انتي طول عمرك لو اتأخرت شوية بتقلب الدنيا النهارده هادية كده ليه؟
سكت شوية وبعدها قولت بهدوء
أنا شوفت شات
اتجمد مكانه وبصلي بصدمة
شات إيه؟
مديت إيدي بالفون وقلت
الشات بتاعك مع البنت
فضل باصصلي كام ثانية مش مستوعب وبعدين قال بسرعة
هات الفون خليني أشوف
من غير كلمة ادّيته الفون
مسك الفون بإيده وبدأ يقلب في الشات بسرعة
ملامحه اتغيرت ووشه بقى شاحب
بصلي وقال بذهول
إيه ده؟
قلت بهدوء
ده اللي أنا شوفته
فضل يقلب في الرسايل تاني وبعدين رفع عينه ليّ وقال بسرعة
والله العظيم أنا ما أعرف أي حاجة عن الكلام ده
سكت شوية وكملت ببساطة
بس الصورة دي أنت اللي باعتها
هز راسه وقال
أيوه بس مش ليها
مد إيده وفتح الواتساب ودور على شات تاني ووراهولي
وقال
بعت الصورة دي لأختي كانت بتسألني اتعشيت ولا لأ فصورتلها الأكل وبعته
بصيت للشات فعلًا لقيت الصورة نفسها مبعوتة لأخته
قعد يفكر لحظة وبعدين قال
استني
مسك الفون ورن على صاحبه وحط الموبايل على السماعة
أول ما صاحبه رد قال له
أيوه يا أحمد عامل إيه دلوقتي؟
جاله صوت صاحبه من الناحية التانية
الحمد لله والله يا عم متشكر جدًا إنك فضلت معايا في المستشفى لحد ما اطمنت وروحتني البيت
قال جوزي بسرعة
لا شكر على واجب يا صاحبي أهم حاجة إنك بقيت كويس
وقفل المكالمة
بصلي تاني وهو لسه مصدوم وقال
أنا كنت معاه فعلًا زي ما قلتلك
قعدت ساكتة شوية
وهو باصصلي بقلق وقال
قوليلي بقى الشات ده جه إزاي عندي وأنا ما أعرفش البنت دي أصلًا؟
كانت الحيرة مرسومة على وشه
وأنا لأول مرة حسيت إن الموضوع فيه حاجة غريبة فعلًا
فضل باصص في الفون شوية وبعدين قال فجأة
استني هكلم أختي
رن عليها وبعد رنتين ردت
قال لها
يا منة هو أنا لما بعتلك صورة المحشي امبارح عملتي بيها إيه؟
سكتت لحظة وقالت
ولا حاجة بس وريتها لبنت خالتنا سارة كنا بنتكلم سوا وقلت لها بصي مرات أخويا عاملة محشي تحفة
جوزي اتعدل في قعدته وقال بسرعة
بعتي لها الصورة؟
قالت باستغراب
أيوه هو في إيه؟
أنا وهو بصينا لبعض في نفس اللحظة
قال لها
طب الرقم ده تعرفيه؟
وبعتلها الرقم
ثواني وردت وقالت
أيوه ده رقم سارة أصلًا
سكتنا إحنا الاتنين
كملت أخته
هو في حاجة؟
قال لها وهو بيحاول يسيطر على صوته
لا مفيش بعدين أبقى أكلمك
وقفل المكالمة ببطء
بصلي وأنا بصاله
الاسم لف في دماغي فورًا
سارة
بنت خالته والبنت اللي كان خاطبها قبل ما نتجوز وفركشوا الخطوبة بينهم
قال بهدوء وهو بيبص للفون
يبقى هي
فهمنا في لحظة
هي كانت عارفة رقمه وعارفة إن أخته قريبة منه ولما بعت الصورة لأخته أخته بعتها لها
قامت واخدة الصورة وسجلت رقمي وبعتتلي من رقمها وعملت الشات كله كأنه بينه وبينها
حتى الاسم اللي ظاهر عندي كان متسجل باسمه
سند راسه على إيده وقال بضيق
يعني كل ده عشان تبوظ بينا
بصيت للفون لحظة وبعدها قفلته بهدوء
قلت له
الحمد لله إن الحقيقة ظهرت
بصلي بامتنان واضح وقال
والحمد لله إنك صدقتيني
ابتسمت ابتسامة خفيفة وقلت
أنا قولتلك قبل كده أنا واثقة في جوزي
ساعتها حسيت إن الثقة
مش بس كلمة
الثقة أوقات
بتنقذ بيت كامل من إنه يتهد
تمت بحمد الله
