رواية ليتك قدري الأول ( كامله جميع الفصول) بقلم رفل الكناني

بغداد تحديدا الشعب

اني هبه من مواليد 87 اعيش مع عائلتي إلى هيه متكونه من امي واخواني ثنين عصام وحذام ماعندي خوات والدي متوفي من اني زغيره اتذكرله ملامح فقط وامي دائمه تحجيلي عليه دكولي هوه سماج هبه لان اجوي اخوتج وكل مايجي واحد منهم يكول هاي بنيه ويطلع ولد من كد ميحب البنات ال ان اجيتي وسماج هبه كال هاي هبه من رب العالمين هذا بلنسبه الاسمي اما شكلي فحلوو مراح اوصف وانفخ روحي لان اني بسيطه ال ابعد حد وبلجايات راح تتعرفون عليه

مكمله كليلة وصار سنه كاعده لاتعيين ولاوظيفه حالي حال الأف المتخرجين ويوميه جايتني وحده من المنطقه انطيني عشره خمسطعش ورقه واعينج ههه واني منيلي اني الدراسه كملته بدفرات حتى جنت ادرس العصريات طلاب المنطقه لحد مينكسر ظهري حتى لواطلع فلوس الخط لو فلوس الاقلام وهاي السوالف

اخويه حذام مثلي طالب وسوده عليه يدك عماله بلجمع والعطل حتى يشتري ملابس لو يروح بيهن كراوي وعل هل حال لاعنده تقاعد ولا كولشي ابويه رجال فقير ودعمته سياره ومات وامي مره حيل تخاف الله بوكته حلفت ولمت كرايبه وكالتلهم مناخذ فصل الفصل فلوسه منفوسه وراهن فاينه واني عندي ولد اخاف عليهم هو هذا يومه والله كتبله

هيج يموت.

هاي حجيتلكم عني وعن امي وابويه واخويه حذام نرجع هسه عل عصام عصام وماادراك ماعصام عبالك مواخو

عبالك عدو ابد ماعنده حنيه وكلبه جلد وميحب بس نفسه متزوج وعنده ثنين ولد وبنيه احمد ومحمد وريتاج وزوجته هاي حكايه ثانيه وحده ينطبق عليه المثل ليكول بلوجه امرايه وبل كفه سلايه السانه ذهب وعيني وكلبي وليشوفه يكول لوهيج الجنه لومتراد بس الحقيقه وين بس كلبي اي شي كدامي متسوي ومشايفه منه غير اللسان العسل بس من اراقبه الكاه وحده حياله ومكاره وتاذي امي اي تاذي امي خصوصا بالكلام تذب كل كلمه بكد راسها بس امي خطيه

مره فقيره من اهل الله لوتغلط عليه متنطي بيه دكول زلت اللسان هيه متكدر تنحش عصام هذا هوه منحوش وخبيث من كاعه بحيث يطب ويطلع ميكول الامي شلونج وامي ام كلب الطيب دكول خطيه طبعه هيج بينما هوه اشوفه ويه العالم ويه اهل مرته بس هوه وبس الضحكه شاكه الحلك لذالك اني جنت مبتعده عنه حتى المكان اليكعد بي اكوم منه يشتغل سايق تكسي يصرف بلبيت بمزاجه وهيه مرته تطبخ واحنه ضالين ناكل من جوه اديه محد يكدر يعترض مو ضعف ولاخوف بس منريد مشاكل وهيه لسانه المعسول اذا

تحاجيها يخجلك

جنت لازمه البيت من تنظيف وترتيب كله عليه حتى بوقات فراغي اسوي أعمال يدويه شغلات اتحصر عليه بلسوك واضل افكر بيه إلى ان اسويه بديه رغم جمالي ورغم أخلاقي مجانو يجوني خطابه حتى بلكليه جنت ماعندي اختلاط وجانت راسخه بالي فكره انهو اني جايه ادرس وبس ومنطيت مجال الواحد لايسوي وياي علاقه ولايصارحني وعمام وخوال ذوله منقطعين عنهم بس بلمناسبات نلتقي وامي غاسله اديه منهم وحتى احنا ناسيهم.

⚘⚘⚘

نرجع ندخل بدايه القصه ......

يمه هبه هباوي كومي حبيبيه طلابج ينتضروج الساعه 4 بنيتي

اي يمه كايمه شبساع صارت بلاربعه توني نمت

لا يمه صار فتره نايمه بس سوده عليه تعيبانه من التدريس ودوخه الطلاب هل نمتني وماحسيتي

اي والله يمه تعبانه البارحه للوحده بليل واني اسويلهم الاسئله ومن الصبح كعدت دققته وهسه نمت مادري بروحي

شتسوين يبنيتي هذا هم حضج مكتوب عليج شلعان الكلب وله انتي خلصتي من الدراسه انوب رجعتي درسين من وره هاي العيشه الطايح حضه

الحمدالله عل كل حال يمه

عافتني امي وطلعت كمت غسلت وجهي ولميت شعري وشلت صبورتي ودخلت عل طلابي سلمت عليهم وبديت ادرس لحد مانسيت نفسي وعاني صوت اذان المغرب توقف كتلهم اليوم حيل اخذنه الواهس مدام هيج باجر اوووف عل عكبه ان شالله لمو كتبهم وبدو يطلعون واحد من الطلاب اسمه وائل شال 25 ألف ونطاني كال ست هاي مال بدايه الشهر تشكرت منه وطلع هذا الطالب الوحيد لمريحني وينطيني بداية الشهر اما البقيه شكلهم مثل حالي حالتهم بس من لاجاره أهلهم مخليلهم مدرس بحيث يشلعون كلبي ال ينطون فلوس الماده ويوميه عذر يوم ابويه ممستلم الراتب يوم امي دكول فد يومين وعل هل حال اني اعذرهم لان اشوف نفسي بس بنفس الوكت اني حالي مو احسن منهم وداتعب ورجليه اليل كله يونن من الوكفه بل ساعات واني ادرسهم طلعووو واني لملمت الهول ورحت للغرفه اجه ورايه حذام اخويه

هااا هباوي شلونج

هلوو حذومي حبيبي

احجي واضم بالاقلام من وره جهال عصام لتفتت شفته مبتسم ويحك بحاجبه مبين اكو حجي بحلكه بس مستحي

كول حذام اشو حاير مبين عندك سالفه

شوفي هبه ااااا لالا ماكو شي

هاي شبيك حذومي كول الله عليك لاتستحي اني هباوي

والله مااعرف شكول بس راح احجي ماعندي غيرج محتاج فلوس باجر معزوم يم جماعتي عل طلعه نصيد ونتغدا واني ماعندي ولافلس واستحي ارد العزيمه اذا عندج انطيني

باوعت الخمسه وعشرين بعدهم بيدي ابتسمت وشلتهن ونطيتهيا

باس راسي وطلع خجلان خطيه يستحي بس شيسوي منين يجيب وهوه طالب وعصام مفد يوم شال ألف دينار ونطاه كلت الحمدالله اجتي هاي الفلوس بوكته

طلعت ساعدت مرت عصام بلعشه واتعشينه ونضفت البيت داروح الغرفتي صاح عصام عليه رحتله

هااا ابو محمد

اكولج هبه انتي ددرسين ماجد ذوله الكدامنه

اي ليش

بعد لدرسي يمعوده صاير شطوله شنو طبته للبيت

عصام الولد صغير كله صف اول متوسط

ميخالف كتلج لادرسي وخلص

اخذت نفس اصبر نفسي يوميه طالعي سالفه شكل كتله

ان شالله وعفته وطلعت انقهرت حيل عل ماجد خطيه هذا امه خلته يم اكثر من مدرس دكولي ميستوعب بس يمج نجح بنص السنه يكول حيل تفهم بس بعد شسوي حكم القوي عل ضعيف لفيت راسي ونمت ثاني يوم الصبح كعدت البيت صنته

صباح الخير يمه

صباح النور بنيتي

لعد وين الجهال أساور وين

يم اهله غير غبشت من الصبح

يمه هاي متشبع من اهلها

شنسويله يمه شكد نصحته ميفيد

طبعن هاي راح تخبلني يوم يمنه وعشره يم اهلها شكد اسمع امي دكوله يمه ميصير المره تعوف رجله لا يوم ولا يومين رجلج خليج كدام عينه وكتنته موخوش وكت تره الاهل ميفيدون ماكولج لاترحين لهلج لا روحي بس موهيج ترحين بالشهر مرتين تلاثه وتباتين لايوم ولا يومين ماكو تسمع منا وطلع منا وعصام عبالك مكيف هيه تروح لهله ميلفي بلبيت غير بس بليل وكت النوم ومنكدر نكوله اخاف تصير مشاكل ومن تنصحه امي عباله نغار منه وهيه مترهيه تجي من اهله محمله أشكال طبعن النفسها موالنه شنريد منها بلعافيه عليها

كمت نظفت وطبخت الغدا ماكو أحد غير اني وامي تفرجت تلفزيون داتابع فلم وندكت الباب كمت فتحته طلع ماجد

شلونج ست هبه

هلووو مجودي شلونك

الحمدالله زين ست درسيني ادري اليوم اووف بس عندي امتحان

ستغفرالله شراح اكوله والله خطيه

اكلك ماجد اعذرني ماكدر ادرسك والله اليوم حيل تعبانه يمكن بعد مادرس

لاست ليش والله اني افتهم شرحج حبابه

والله ماكدر سلملي عل امك وخل تعذرني وان شالله تلكه معلمه احسن مني

خطيه دنك وراح اووف شدعيلك عصام شلك عل هذا الجاهل لهناك واجه حذام كعد يسولف عل سفره وشوفنه الصور خطيه حتى ناشر صوره سوده عليه ليشوف كشخته بصوره وضحكته يكول هذا طاك ماكسرت خاطره كمت أضحك واسولف وياه ونطلقنه بعدها كام سبح كال راح انام كاعد

من الصبح راح واني كمت للطرمه شغلت الماطور وبديت اغسل بلطرمه وارش باحديقه ندكت الباب جنت مدنكه وضاغطه الصونه موجهته عل رجلي

منووو

اني يابه عصام موجود

لا والله طالع

زين اذا اجه كلوله سلام اجه عليك

ان شالله كلته ورفعت راسي لكيته رافع راسه ويباوع من شافني دنك ومشى عزززه هذا شكد ميستحي شلون يباوع انوب جنه زرافه شطوله تنرفزت هذا التصرف حيل ضوجني طفيت الماطور ولفيت الصونده نشفت الطرمه ودخلت للبيت والموقف بالي يعني شكد عينه صلفه جاي عل صديقه شلون يباوع عل أهل بيته امي كالت شبيج يمه اشو مو عل بعضج كتله ماكو شي خلص اليوم وعصام ماجه نمت وهوه ماكو ثاني يوم نسيت اكوله وراح الموضوع من بالي للعصر دادرس اجه عصام كال اطلعي من الهول بسرعه اجاني خطار صرفت الطلاب ولملمت عل سريع وطلعت سويتلهم جاي واجه حذام سئلته شكد اصب جاي كال هوه بس واحد صبيتلهم وأخذه شويه وطلعوو خلص اليوم عادي والأيام البعده نفس القبله مستمره ادرس واساور معافتني بحالي

هبه تره ميصير لامه الطلاب بلهول اجه أحد عل غفله بعدين والله دخنه من الهوسه والصوت

أساور صدك تحجين لعد وين ادرسهم البيت كله غرفتين والهول وحده انتي ماخذته وحده احنه وين بعد اكعدهم بلمطبخ بعدين وين الدوخه بلموضوع اني شكد مااكدر

داحاول ادرسهم بهدوا

حبيبتي ليش تضوجين والله اني علمود عمتي خطيه مره جبيره وتعبانه والصوت موزين عليه

لاتخافين عل امي بعدين اذا مادرست منين اجيب فلوس علاجها مال السكر والضغط

يبووو عليج هبه ال اكولج داشاقه وياج

عفتها ورحت للغرفه حقيره عكرب تلدغ وتضم راسه سممتني وبعدين كلبتها شقه بس هم مكدرت لازم تطلع نفسها ملاك اجتي حتى تضيع السالفه

هباوي تعالى وياي دنسوي عشا اجانه خطار صديق عصام

كمت وياه بدون كلام دخلت المطبخ وبلشنه بلعشه وصبيناه واني ضليت ارتب واغسل مواعين وخليت الجاي جبت الاستكاين وداغسل بيهن والشباك كدامي ما اشوف ال الولد الاجه عل عصام ذيج المره ديغسل بلمغسله الخارجيه التفت صارت عينه بعيني راسن سديت الشباك عززززه هذا نفسه شكد صلف انوب يباوع تكررت هاي السالفه وكام كل مره يجي كمت اعرفه من سيارته جانت اخر موديل من اشوفه بابنه يعني هوه يمنه حتى حذام انتبه سئل اساور

اكولج اساور منين هذا الولد عصام لازك بي

والله حذام مادري غير صديقه

ومنيله هيج صديق طاك

شمدريني اني

ومرت الايام اكثر من شهر عدت مرات اجه وبيوم كلنه كاعدين واجه عصام كال اكو ولد يمكن تعرفو دوم يجيني هوه خوش ولد وحباب اليوم كلي اريد اناسبكم بصراحه فاجني يعني هوه مهندس شجابه علينه مهندس وشبعان

تشاف من عدنه

امي : ليش يمه شبينه الفلوس موكلشي بالدنيه السمعه الطيبه تجيب القسمه من اخر الدنيا

اي والله يمه اني كتله نتشرف بيكم كلي الجمعه ادز الاهل

خير ان شالله يمه كلشي قسمه

عافنه وكام وحذام ماخله مخده ولا كوشه ماشمره عليه ويغني الله الله الله وياج راح نخلص منج

طاح حضك كاعده عل كلبك ان شالله متصير

ليش ولج يمه لادكولين هيج اذا خوش قسمه شكو بيه

عفتهم وكمت للغرفه هذا سواها صدك يعني شافني كم مره واجه خطبني والله مادري شكول خليها على الله

بعد يومين واجتي الجمعه ساعه 3ونص كال عصام خابرني جايين كمت بدلت بكلبيه مرتبه ورهمت وياه شال ومكياج خفيف اجتنتي اساور كالت يله تعالى يردوج تمشيت وصلت الهول سميت بسم الله ودخلت كلت السلام عليكم وكعدت

يم امي

شفت مره جبيره يطلع عمره بلخمسين بس مرتبه حتى الكبر ممبين عليه والثانيه تلاثينيه كشخته فول لابسه ربطه محنكه والعبايه تلهث لهث والجنطه آخر صيحه والثالثه بنيه بعمري تلاثتهن لابست عبي اكلني بعيونهن اكل المره الجبيره بدأ تحجي

اني ام قتيبه جايه اخطب لابني سلام اكيد تعرفو هوه صديق ابنكم عصام بصراحه اني عندي بنات اختي وبنات اخويه وحمويني كومه بس هوه الله يسلمه ميريد من الكرايب يريد غريبه

جاوبته امي هلابيكم شكوه بيه اذا اكو قسمه يصير خير

اني عندي قتيبه الجبير متزوج وعازل فوك عندي عل حده بارق محامي بس ميقبل يتزوج انطه دوره لسلام سلام مهندس واخر واحد خلدون سنه أخيره كليله وهاي بنتي أحلام ام رقيه وهاي بزر الكعده هديل هم بعده طالبه تدرس

الله يحفضهم الج ويخليهم

اشكرج إم عصام

باوعت عليه وكالت : شسمج

هبه

شكد مواليدج

87

شمخلصه

كليه تربيه

ابني سلام مواليد 83 مهندس وكلنا عايشين بيت واحد ماعندي واحد يتزوج ويطلع وووووو

وضلت تحجي وتنفخ وعنده هيج واملاكنه هيج وامي

تجاوبها الله يزيدكم عاد عفتهم وكمت عرفت من نضراتهم

انو مراح نتراهم لحكتني اساور

هااا ولج هبه شفتي شلون قسمه والله العظيم اذا صارت يرادلنا نذر

اساور انتي شتحجين ليش اوزع انذوره حتى أتزوج شايفتني دخلت بلعمرين لو فاتني القطار

لاموهيج بس ماشالله ماتوقع تجيج هيج قسمه بعد

ليش شبيه اشو جمال وأخلاق ودارسه شناقصني

بعدنه دنسولف دخلت امي عافتني وصدت على امي

هااا عمه بشري شكالو

مكالو اخذت رقمي وكالت اني اردلج خبر

والله مر أسبوع وماكو خبر صنطه امي خطيه كالت يمه لاتضوجين يجيج الاحسن منه

لا يمه عليمن اضوج كلشي قسمه بعدين اني عرفتهم راح يرحون بعد ميجون بعد احسن لا همه من ثوبنه ولا احنا

من ثوبهم

اي والله اني هم بس كلت كلشي يصير يجوز ربج يسويها

الله كريم يمه لاتخلين بالج هذا الموضوع انسي لاتعبين نفسج بتفكير اجاني حمودي كال عمه اجوي الطلاب اي حبيبي جايه كمت لطلابي وبديت ادرس لحد ما خلص الوكت وطلعووو واني هم رحت لغرفه امي ماده السجاده ودتسبح شافتني بتسمت براحه

هااااا حجيه اشوو توزعين بتساممات

تعاي تعاي اكعدي داسولفلج

وهاي كعده كولي

مدنكه مبتسمه وتسبح كالت

خابرتني ام سلام قبل شويه وكالت الولد يريد يشوفها راح نجي حتى يكعدون سوه كتلها هلابيكم

اي وتالي

ان شالله باجر وره صلاه العصر همه جايين

ان شالله خير كمت غسلت وجهي واجيت مددت وأفكر معقوله قبلوو بيه بس شكلهم جانو مقانعين زين ليش هلكد تاخروو ال ردو خبر اووو هبه شكد دققين باجر يجون وكلشي يبين

خلص اليوم واني احاول أتذكر شكله ماكو الله مسحه من ذاكرتي صدك اني شفته لمح بس حتى ألمح ماتذكره

لثاني يوم عصام هم ماطلع وحذام موجود حضرت نفسي مثل اي بنيه يجوه خطابه وتحضر لحد مكالو اجوي وضيفوهم عاد صاحولي دخلت جان جاي بس هوه واخته

إم رقيه امهم ماكوو تلكتني بوستني وكعدت بعد ماسلمت صرت بصف امي وبصف ام رقيه همستلي هذا اخويه شوفي مارفعت راسي مكدرت استحي هاي اول مره أكون بهيج

موقف أسمعه يسولف ويا عصام بس ممركزه بشنو بالي مشوش عاد عصام كال شوفها وانتي هم شوفيه

رفعت راسي ياااالله هوه نفسه راسن تذكرت من باوع من فوك الباب شكله كلش عادي اصلا ممبين عليه حتى مهندس ولابي قطره من الكشخة اهله هوه هيج مدري النسوان كشختهن عل الفاضي جان لابس بنطرون اسود وقميص رصاصي وتسريحت شعره صفح هوه هم باوع عليه

دنكت إم رقيه كالت امي اليوم مريضه مكدرت تجي ان شالله عل جايات جاوبته امي انتي الخير والبركة

اني كمت وستلمتني اساور هااا وشلونه وشفني كتله عادي مبين انسان بسيط عاد راحو كالو احنه موافقين بقت يمكم اذا انتو موافقين ردونه خبر

عصام كالي بعد شفتي وعرفتي كلشي عنهم ضلت يمج وامي ضلت تنصحني كالت يمه لايغرج الحجي والفلوس هذا زواج عشرت عمر فكرى زين وعلى مهلج

يمه حبيبتي انتي تعرفيني تهمني هاي السوالف

والله اعرفج وادري عينج مليانه الحمدالله بس اعرف اساور متكعد راحه وداشوفها شلون تفتر وراج

ماعليج منه يمه اني بنتج اذا ممقتنعه مستحيل اوافق

ضليت افكر وافكر يومين وعصام دز اساور بليل عليه كالت عصام يكول الناس منتضرين الجواب الولد خابرني ....