رواية عشكت جنوبية الخاتمه بقلم نسرين الاسدي

هلو ياحلوين ..طبعآ وعدتكم بالبارت من مدة بس اتأخرت بسبب الضروف وهسة نزلته    

                      

ان شاء الله يعجبكم     

                      

*

*

*    

                      

هنادي : نايمة وفزيت على صياح مهيمن وليث نفس يومية هو يريد يروح يلعب ويه جهال الجيران وليث ميقبل يكول مو خوش جهال ويخربون عقل ابني مو هو نسى شلون جان استاذ ليث    

                      

كمت دخلت الحمام غسلت وغيرت ملابسي ونزلت الهم 

: صباح الخير    

                      

ألتفتلي ليث وكال : حبيبي ليش نزلتي مو انتي تعبانة لازم تبقين بالفراش    

                      

ضحكت وكلت : ليش الي عنده مثلك ومثل ابنك يكدر يرتاح     

                      

اجه مهيمن عليه وكال : ماما كوليله لبابا يخليني اطلع وياهم ..حبابة ماما     

                      

صاح ليث عليه : مهيمن اني كلت لا     

                      

مهيمن : لعد اخذني لخوالو على الأقل ألعب ويه نرجس هي بت عمة هماتين متقبل ؟!    

                      

كتله : حبيبي خليه يطلع هو مو صغير عمره ٦ سنين     

                      

كعد عالقنفة وكال : لا هنودة ..اني كلت لا يعني لا    

                      

زعل مهيمن وعنفص وجه كعدت يمه وهمستله : لا تزعل بس خل يروح للشركة واني اخليك تطلع    

                      

هو التفتلنه وكال : لا عبالج معرفت شنو تكوليله ..لا حبيبتي ..اني اخذت اجازة اليوم وخليت مروان هو الي يكعد بالمكتب    

                      

زعل مهيمن وكال : لو بيبي وجدو هنا جان خلوني اطلع ..بس راحوا للعمرة ماخذوك وياهم ..وركض لغرفته    

                      

صاح عليه : لك بس انتضر دقيقة وحدة الا ابسطك بسطة تعلمك شلون تحجي ..    

                      

خليت اديه على خاصرتي وكتله : شنو استاذ ليث ارحم خطيب اختي شوية ليش هيج اتهلكه بالشغل صارلهم ٣ سنين منتضرين على ما تتخرج وهسة من تخرجت انته استلمت مروان شغل وواجبات خليه يرتاح لأن حيصير عريس     

                      

ضحك وتقرب الي حضني من خصري خليت ايديه على صدره ومستغربة ليش ضحك هو كلامي مايضحك

كال : شنو هاي حبيبتي هنودة صايرة منحرفة    

                      

رفعت حاجبي وكلت : ليش هو اني شكلت ؟!    

                      

كال : انتي تخافين على مروان اذا تعب هسة ميرضي اختج بالعرس خطية ..هاا    

                      

ضربته على صدره وكلت : انته الي منحرف ..شوكت اني كلت هيج ..اتركني    

                      

خله راسه على ركبتي وهمسلي : لتخافين هنودة اني حنطي حباية واخلي اختج تشرد من ليلة العرس    

                      

ضليت اضرب بيه واصيح : ابعد ..انته متستحي ..    

                      

لزمني حيل وكال : اشش حبيبي ..وراج عرس لتعبين نفسج...وضل يضحك     

                      

من هديت شوية رفع وجهي اله وكال : اكول حبيبتي مهيمن يلعب والبيت هدوء ..ليش متجين نلعب احنه شوية

دفعته وكلت : لا حبيبي اني بعدني مريضة والطفلة نازلة ..الدكتورة كالت ممنوع اسبوع كامل     

                                  

              

                    

تركني ورجع كعد على القنفة كال : ميصير هيج بداية الحمل اسبوع اسبوعين نص الحمل اسبوع شنو هالكلام     

ضحكت وكتله : انته تريد اطفال اتحمل ..    

**    

حياة : من يوم عرس هيثم وانه حاسة بأعجاب قوي لمروان بس مكلت لحد بس ليلى لأن مكدر اضم عليها شيء وهنادي اكتشفت صدفة

بس مجنت مصورة بيوم من الأيام يطلع هالأعجاب متبادل بيناتنه وضليت كل ما يمر الوقت احس نفسي اتعلق بي وصار عندي شعور اقوى من الأعجاب وضليت احسب الأيام لجيت هنادي لأن مرات هو الي يجيبها 

بس هو جان حاس روحه جبير بالنسبة الي وهو الي كلي هالشيء

وتوقعت خلص كلشي ولازم انساه بس هو فاجأني لمن اجه خطبني من صار عمري ١٨ واهلي معترضوا لأن عرفوا خوش ولد وليث وهنادي هماتين مدحوا

وجان شرطي اهلي الوحيد ينتضرني لمن اتخرج وهو معترض 

وهسة تخرجت وراح يجون بعد اسبوع ونزوج شكد فرحانة راح نزوج بعد كل هالأنتضار    

وتضل بس ليلى بلا زواج لأن فهد هم ازوج وحدة بت جيرانة وخوش بنية اخلاقها تجنن 

لبنى غارت منها بأول أشهر لأن حبيناها وهتمينه بيها لأن هي صارت حامل من بداية العرس وبعدها صغيرة خفنه عليها

بس ابوي وامي ما حبوا تصير بيناتهن مشاكل نسوان الحمة وما خلو لبنى تحس بهيج شيء

وهسة صار بيتنه بيه ثلث جهال نرجس و مصطفى جهال هيثم وروان بت فهد 

وامي وابوي طايرين بيهم ولأن احنة اشترينه بيت ثاني جبير النهار كله يلعبون بالحديقة واحنة نكعد العصاري نشرب جاي ونباوع الهم     

جنت كاعدة اكتب مذكراتي وسمعت صوت نرجس تصرخ

كمت بسرعة واجيت عليهم كلت : شبيك عمة شصاير ؟    

نرجس : عمة صوفي ورونة ياخذون ملاعيبي ويضعوهن    

لزمت مصطفى وروان وكلت : وين خليتوا ملاعيبها احجوا يلا     

روان حجت بس كلشي ما فهمت منها ..لأن بعدها اربع ثلث سنوات

عود مصطفى حجيه شوية مفهوم كال : أمة رونة حطية ..ندس حبيسة ما تحليها تلأب

(عمة روان خطية نرجس خبيثة متخليها تلعب )    

ألتفت لنرجس وكلت : صدك هذا الحجي نرجس ؟ اخوج اعترف عليج    

نرجس : لا عمة هو جذاب ..اني حقتله ..وهجمت عليه وهو لزمها من شعرها وهي لزمته من قميصه وروان اجت ادافعله عود وانه كعدت افاكك بيهم ماكو     

اخر شيء صحت بصوت عالي : بسسسس     

كلهم وكفوا وضلوا يباوعون عليه واجن امهاتهم يركضن من البيت 

لبنى : خير حياة ليش هيج تعيطين مو وكعتي لكلبي     

سحر : خية حياة شصار ..    

صحت عليهن : ولجن انتن ما تسمعن جهالجن مو راح يخبلوني واحد مجلب بالثاني ومتكامشين وانه صايرة بيناتهم شنو ابتليت من صرت عمة انه    

لزمت لبنى جهالها وسحر شالت روان وسألنهم شبيهم     

نرجس : ماما اني ماحب رونة لأن اخذت اخوية مني وهو يلعب وياها وتاركني     

            

              

                    

باوعتلها وكلت : لج نرجس شنو هالكلام شلون تحجين هيج كلام اكبر منج ..منو علمج ولج     

هي لبدت بحضن امها ومجاوبتني ..ردت احجي وصاحتلي ليلى كالت : حياة ..مروان جاي يتصل بيج يلا تعاي    

عفتهم ورحت ركض شلون نسيته ..كلي اخابرله من نص ساعة ..بس شكول على هذول الشياطين نسوني     

**    

ليث : مر الأسبوع وجهزنه كولشي ومخليت مروان يجي للشركة طول الأسبوع حتى يجهز نفسه وبابا وماما رجعوا من العمرة لأن احنة انتضرناهم حتى نسوي العرس 

وهسة احنة بالطريق رايحن الهم ومروان فرحان كولش الدنيا مشايلته ..واني كولش فرحان اله بالنهاية هو اخوي مو بس صديقي 

وصلنا ونزلنا ابيتهم سلمنه عليهم ولبنى حضنت ماما وبابا وبجت أول مرة يتأخرون هالكد عليها ممتعودة على فراقهم 

ومهيمن مصدك بس سلم على جداده وخواله ركض لنرجس وحضنها ..ههه..يحبها اكثر من اخوها     

ارتاحينه شوية وتغدينه وحياة بالصالون بعده مشايفها وهو بس ينفخ ..وحتى الأكل كال ما اشتهي مشتاقلها الملعون

تقربت عليه وهمستله : مروان شدعوة فكها شوية حتشوفها بس انتضر شوية مو حتنفجر يا اخي ..وين رايحة هسة هي ..اشو حتصير الك وكل العمر     

ابتسم هو وكال : لا مو هيج قصدي ..انته فاهم غلط     

كلت : لا اني الي فاهم غلط ..ههه..يلا ما ألومك ٣ سنين مو شوية ..وبعدك لحد الأن كولشي ممحصل حتى بوسة ماكو ..الله يساعدك..لو اني منك وتضل خطوبتي ٣ سنين غير يصير عدنه طفل والثاني بعده يرضع ..انته شتكول يا مروان    

ضربني على جتفي وكال : اسكت لك اني مو مثلك وبعدين منو كلك ممحصل بوسة ؟..ها     

ضحكت كل قوتي ..وانتبه الكل علينا وهو استحى وضل يتحمحم ..شوية واجاني اتصال من هنودة كالت خلصوا من الصالون لأن هي ولبنى لحكنهم تالي     

وطلعنا حتى نجيبها طكوا صور وطلعوا بسيارة وحدهم كلت لمروان بعد ما وصيك ..بس هو تجاهلني ولا كأنه سمعني 

وصلنا للبيت وبدت الحفلة والناس كلها منتضرة وهمة ماكو 

آخر شيء اتصلت بيه مجاوب لا مرة ولا مرتين بصراحة خفت ..والكل يباوع علي منتضرين انطيهم الجواب 

كلت خن اتصل آخر مرة اذا ماكو ..حنروح نشوفهم وين    

اتصلت ..والحمدلله رد حسيت روحي رجعتلي وعطت بيه : لك مني... وين جنت مو مرمرته لكلبي ..انته صدوك واحد كو...     

كال : هوب ليوثي شدعوه عليك حبيبي ادري خفت عليه بس احنة مبينه شيء وهل راجعين ..بس اكو شكم مكان جانت حياة حابة نروحله بملابس العرس ونسوي حركات وكذا ..ونطك شكم صورة للذكرى    

تنهدت وكتله : لك العتب مو عليك علي اني لأن مهتملك ..دروح الله ياخذك انته وياها...    

لزمت هنادي ايدي وكالت : ليييث     

ضل يضحك قفلت الموبايل بوجها وكتلهم : الكو...جاي بالطريق     

هنادي : وصلوا مروان وحياة وكملت الحفلة أجرولهم فندق بس الليلة واحنة ضلينه عد اهلي وباجر نرجع كلنه 

ورجعنه ثاني يوم بس اني بالطريق كله جنت احس موجوعة وممرتاحة ..بس كلت احتمال تقلصات نفس كل مرة ..لأن توني داخله بالتاسع ومحجيت 

جنت عبالي من نوصل واتمدد ارتاح ..وصلنا المغرب صعدت رأسآ لغرفتي وتمددت ..ضهري موتني وبطني وجعها صار اقوى 

آذن المؤذن كمت حتى اصلي بس الوجع جان يصير اقوى صليت واني كاعدة وضليت على كعدتي مكدرت اكوم 

دخل ليث ..اجه عليه وكال بخوف : هاي شبيج حبيبتي ليش هيج كاعدة ..بيج شيء ؟    

            

              

                    

لزمت ايده وكلت : لا مبيه شيء بس يمكن من الطريق تعبت 

كومني كعدني عالجرباية وكال : حبيبتي خلينا نروح للمستشفى اذا موجوعة 

كلت : لا هاي بس تقلصات وحتروح بس انام 

ليث : على الأقل نزلي تعشي 

كتله : لا ماشتهي بس خل انام شوية    

بعدها نمت ومحسيت على نفسي الا وبطني ليكول أحد ضاربها بسجين ..فزيت ولكيت الوجع عندي ماينحمل 

شفت ليث نايم ..كعدته بسرعة واني اتلوى من الوجع هو كعد مرعوب وكال : شبيج هنودة    

كلت وبالكوة احجي : ليث ..صارت عندي ولادة..اخ ..

اخذ هو محفضته وسويج السيارة واجالي كال : يلا

كلت : العباية 

صاح : لج تركي العباية هسة امشي محد يشوفج 

كتله : جيب عبايتي ليث ..اخ ..ترى ..ماروح ..اخ    

صاح : لج شكد ينفرزني اعنادج ..بس أمري لله جيبي ويصير خير ...سحبها بسرعة من الكنتور وخلها على راسي ونزلنا ..

كعدوا خالة وعمو على الصوت وكال عمو : اني أضل ويه مهيمن وانتو روحوا 

لبست عمة بسرعة وطلعنه     

من وصلنا المستشفى الدكتورة كالت ولادتي واصلة وبسرعة حولتني لغرفة الولادة والحمدلله جبت بالسلامة بنوتة سميناها ميس

وصارت هي دلعوة البيت آخذت مكان مهيمن لأن بالمدرسة بس مجنة نريده يحس بالغيرة منها وعمو وخالة ميلعبونها اذا هو موجود     

ورا سنة ..اتصلت ليلى بيه بليل ..باوعت للساعة جانت ب١٢ خفت ..كلت بس لاصاير شيء بهلي

شغلت الأضويه واندعي ياربي ماكو شيء ورفعت التلفون وكلت : الو    

جاوبتني وهي تبجي : لج هنادي الحكي ..هذوله عمامنه وخوالنه عرفوا مكانه واجوا ..بجت ..ونوب كملت ..خالي ..خالي صوب امي ..وهيثم ..وفهد ..

راحوا هجموا عليهم     

شهكت : شنووو..ليلى ..فهميني وحدة وحدة شنو الي صار ..ليلى الله عليج شرحيلي عدل ..امي وين ..    

فز ليث وكال : خير هنادي ..شصاير ؟!    

كتله ودموعي ينزلن : امي ..امي بالمستشفى ..ليث ..    

كالت ليلى : هسة احنة وحدنه بالبيت وخايفات ..وامي مادري عنها ..هنادي ..الحكيلي ..    

كلت : اني جايتج ليلى ..جاية ..سديت الموبايل وركضت للكنتور طلعت ملابسي وبدلت     

وليث اجه وراي يكول : هنودة بس فهميني شصار ؟    

كلت : ليث هسة توديني للبصرة ..يلا ليث بسرعة    

كال : هنادي شبيج تخبلتي ..شلون نطلع بهالوقت الصبح اوديج ..بس فهميني شصاير ؟!    

كتله واني ابجي : ليث والله اذا ما اخذتني اروح اخذ تكسي واطلع ..    

صاح عليه : شبيج هنادي ..شنو تاخذيني تكسي خو ماكو شيء ..    

كتله : لعد اخذني انته ..يلا بسرعة ..    

كال : بس خن ننتضر شوية يمكن يتصلون ويكولون زينة     

صرخت عليه : ولك مصوبة وهي بين الحياة والموت وانته تكلي تصير زينة ..انته ما تفهم     

صاح عليه صوت رجعني لعقلي ورجف كلبي : هنااادي

هاي شبيج ..انتي نسيتي روحج شنو شلون هيج تصيحين عليه ..بس ماشي هالمرة حعبرها واخذج لأمج عاذرج ..بس والله اذا عدتيها ..ماتلومين الا نفسج     

كعدت ميس وضلت تبجي ..شلتها هو غير ملابسه بسرعة اخذ السويج ونزل بدون ما يكول شيء واني نزلت وراه اركاض ..

كلت : ليث ..ومهيمن ..    

مباوعلي كال وهو يفتح الباب : اني اتصل بأبوي واحجيله بعدين ..وحجيبه وراج ..    

**    

ليلى : كلشي صار بسرعة جنه كاعدين نسولف ونضحك مثل عادتنه لأن يوميه نسهر ل١٢ يلا انام انوم الجهال ونضل 

بس اندك الباب اتعجبنه منو يجي بهاليل فتحه هيثم وطلعت مرة ..كالتله اريد امك ..عندي موضوع وياها 

واحنة مشكينه بشيء لأن دايمآ تجي نسوان لأمي مرات ياخذنها تخطب وياهن لأن الجيران يعرفونه ومرات يطلبن منها مساعدات لو يعرفن شخص يحتاج مساعدة لأن احنة من يوم الي تحسنت احوالنه بيه 

ابوي وامي دايمآ ينطون والي ابيدهم مو الهم ..المهم هي طلعتلها 

وما حسينه بعدها الا على صوت طلقة ..نخمشت كلوبنه وركضنه كلنا وشفنه امي طايحة ودمها يصب ولكينه ورقة كاتبين بيها : هسة غسلنا عارنه    

هيثم وفهد ركضوا للشارع بسرعة وشافوا واحد ملثم بجفية ركب سيارته وساق بسرعة وهمة ركبوا السيارة ووراه 

وابوي حاول ويه امي .. بس مجانت تكدر تحجي وآخر شيء كالته : اخوي ..

انه ولبنى وسحر ضلينا بس نصرخ ونلطم مانعرف شنسوي وابوي بسرعة طلع لجيرانه وطلب سيارتهم اجه ابنهم ركض وخذوا امي للمستشفى     

جنت خايفة وماعرف شسوي لا اعرف خبر امي ولا اخواني ومالكيت غير اخابر هنادي وحياة     

وهنة ما اتأخرن للفجر وصلن ..طلعوا ليث وهنادي ملاكين مروان وحياة بالطريق لأن جايين عليهم يتأكدون واجوا سوة 

هنة بس دخلن صرخن ..وضلن يسألن شلون انه حضنتهن وضليت ابجي ولبنى حضنت اخوها وتكله الحك هيثم ..

حجينالهم كلشي وليث اخذ حياة وهنادي للمستشفى لأن ماقبلن ينتضرن ومروان ضل ويانه 

اتصلنا على فهد وهيثم واثنينهم طلعن تلفوناتهم بالبيت 

بس كلنه للبنات من يوصلن خل يطمننا 

    

نهاية البارت    

حبايب اسفة لأن ما كملت البارت ..بس ماحصلت وقت 

وان شاء الله اكمله باجر او عكبه     

مادري ليش حسيت بالحماس وانا اكتب بيها 😁    

انتم هم مثلي 🤔    

            

#تكملة البارت الأضافي 

       

هلو ياعمري ...اسفة عالتأخير بس جانت ايدي محتركة وماكدرت اكتب ..🥺    

                      

وملاحضة صغيرة : مروا بطريقكم على رواية الظابط الغيور والعنيدة لأن قصتها حلوة ومختلفة راح تعجبكم     

                      

متابعة ممتعة 😘😘    

                      

*

*

مو اعمىٰ وگمت ما اشوف بس يمكن طفت روحي ... ! 🖤    

                      

*

*    

                      

هنادي : طولت عملية أمي اكثر من ساعتين حسيت روحي راحت مني ..ضليت بس ادعي وابجي ياربي سلمها النا ولا تفجعنا بيها 

جان ليث واكف وكل ساع يتصل على مروان يسأله عن فهد وهيثم وهو يسأل عن حالة امي 

سمعت صوت ليلى تكول : ليث الله يخليك طمنا كل دقيقة وبابا خلوا عينكم عليه لأن هو عنده سكر تونه عرفنا قبل فترة     

                      

ألتفتت لبابا بسرعة ولكيته عيونه حمر وملابسه كلها دم وحالته حالة جان جنة بعالم ثاني لا يمنة ولا ويانه    

                      

تقربت عليه خليت ايدي على جتفة وكلت: بابا شبيك انته زين ؟!...ليش هيج حالتك ؟!

تحسر حسرة جبيرة وكال : هنودة ..امج هي كل حيلي وهسة من طاحت راح حيلي ..وروحي مو عندي وياها بالعمليات ..جنت دايمآ ادعي ربي يسلمها الي وما يشوفني بيها هيج يوم ابد ..وهسة ..هي بين الحياة والموت وانه ما اكدر اسويلها شيء     

                      

اجت حياة حضنت بابا وكالت : لا تخاف بابا ان شاء الله امي راح تكوم بالسلامة ..اندعيلها انت مؤمن ليش هيج يائس     

                      

كال والدمعة بطرف عينه : لأن شفتها بعيني جانت الرصاصة بصدرها ..ومكدرت تكلي اي شيء اتمنى يكدرون يينقذونها ..ويرجعونها الي    

                      

ضلينه منتضرين وكلوبنه راح توكف من الخوف شوية انفتح الباب وطلع الطبيب ..بس شكله ما يطمن كلش 

اجينه عليه اني وحياة رأسآ     

                      

هو نزل راسه وكال : البقية بحياتكم ..

صدمنه ما كدرنه نكول اي شيء ..ودموعنه هي الي حجت عنه

كمل هو : اني كولش اعتذر بس ما كدرنه ننقذها لأن الرصاصة داخله قلبها مباشرتآ وواضح جانت من مكان قريب 

بابا كام رأسآ ورجع كعد بمكانه ااحنه عفنه الدكتور ورحنه لأمي ركض 

شفناها نايمة ومغمضة عيونها وشايلن منها كل الأجهزة 

ركضنا عليها وكعدنه كل وحدة بجهة 

ضلينا نبجي ونصيح : يمة ..يمة فدوة لا ترحين رجعيلنا يمة ..

بجينة لطمنه وصرخنه بس كلشي ماجان يخفف عنه معقولة هيج امنه تروح منه بهاي السرعة معقولة بعد ما نشوفها ولا نسمع صوتها وضحكتها ..معقولة بعد ما نحس بحنانها ولا نسمع كلمة يمة ..ومن ندخل للبيت ما نسمع كلمة هلا يمة ..ولا نحضنها ومن نضوج لو يوجعنه شيء نجيلها وتخلينه على رجليها وتهدينه 

يعني امي راحت وبعد ما تكعد يم راسي وكت ولادتي ونفاسي ؟!    

                      

فقدت وضليت ادك على وجهي ..واصرخ : اخ يمة    

                      

بجينه لحد ما يبست دموعنه والمستشفى كلها ألتمت على صوتنه وحياة فقدت وعيها خذوها فحصوها وطلعت حامل 

بابا بعد ماكدر يسيطر على دموعة وكعد يمها يعاتبها ويبجي كللها : انتي مو وعدتيني نضل للموت سوة ليش عفتيني ورحتي سمية ..ليش ما تانيتيني ولج هديتي حيل يم هيثم ..    

                                  

              

                    

**    

ليث : حالة ابو هيثم كولش كسرت خاطري ولمن اتصلت بمروان وكتله البنات ما قبلن يضلن وكلهن اجن للمستشفى 

كولش اتأذن عليها وحتى اختي لبنى حالها حالهن ليكول هي أمها مثلهن مبين حبتها هواي رجعوا هيثم وفهد بعدها 

وودعوا أمهم قبل لا ياخذونها للمغيسل لأن كملنا اني ومروان كل الأوراق لأن كلهم جانوا مخبوصين وابوهم  ولا جنه هو عمو قاسم المؤمن بقضاء الله وقدره ولا ذاك الرجال القوي والي يواجه كولشي     

كملنا كولشي وخذوها ولدها وعمو للمغيسل واحنه مخلينه البنات يتبعنهم لأن حيطلعون للنجف رأسآ والناس جوارينهم كلها منتضرة يم بيتهم     

رجعناهن وهنة حالتهن حالة على صرخة وحدة وبجية وحدة ..مروان حاول ويه حياة حتى تهدئ شوية لخاطر الطفل بس ما سمعتله 

اتصلت بعدها بماما وبابا وجابوا مهيمن واجوي جهزنه للفاتحة على ما يرجعون همة من الدفن 

بس من رجعوا هيثم وفهد ما قبلوا علينا ورادوا يسوون مشكلة يردون ياخذون حقهم من خالهم أول بعدين يسوون الفاتحة 

بس ابوهم ما قبل وكف بوجههم وهمة لأن خافوا عليه وحالته جانت كولش تعبانة ما عاندوا     

**    

ليلى : خلصت الفاتحة وكلمن راحله وطشت الناس والبنات ضلن بعدها بربع تيام وخذوهن رجالهن مارادوا يبقن اكثر

بابا تعب بعد فاتحة امي كلش وضل نايم بالفراش بالكوة يكوم للحمام لو للصلاة 

والأكل احنة نجيبه اله للغرفة ..فهد وهيثم ما هدوا ابد وكل يوم يدورون ويسألون حتى يطيحون بخوالي وكدام بابا يكولون نسينه السالفة     

بليل كلمن يروح لغرفته وانه اضل افتر بالبيت بكل صفحة وكل جهة اشوفها لو اسمع صوتها تحاجيني وتصيح عليه ..يومية اتخيلها بمكان وابجي لأن خيال موصدك 

بس اسوي روحي قوية لخاطر ابوي حتى ما يتعب اكثر      

**    

حياة : مرت سنة على موتت امي وابوي ما طول وراها بس ثلث تشهر وخسرناهم اثنينهم 

بس رغم كلشي نكول الله يساعد ليلى لأن انه وهنادي مزوجات وحسينه باليتم والضياع من وراهم حسينه خسرنا كلشي بروحتهم بس ليث ومروان ما قصروا ودايمآ يشجعونه وكالوا كلنا على هاي الطريق واحنه لازم ندعيلهم بالرحمة ونسويلهم ثوابات     

من جبت بتي شكد بجيت وتمنيتهم موجودين ويشوفونها وكلت لمروان اريدها على اسم امي وهو ما عترض وامه هم ماقصرت وياي وابد ما خلتني احس امي ميتة 

فهد وهيثم ما كدروا يلكون اي آثر لخوالي بس بعد موت بابا سمعنه بخالي الي كتل أمي صار بيه مرض خبيث ومات 

الناس جانت تعرف عنوانهم بس محد يقبل يحجي حتى ما تستمر حرب الدم بيناتنه

وهمة دايمآ يحاولون ما يخلون ليلى تحس هي وحدها وصارولها كلشي همة ونسوانهم      

**    

هنادي : جنت كاعدة يم الشباك وصافنه على الحديقة مهيمن وميس يلعبون وعمو وخالة كاعدين يمهم 

ومخلين الجاي على صفحة عالميز 

شمر مهيمن الطوبة واجت يم الميز كامت ميس واجت حتى تاخذها 

بس قبل لا توصل رفعت خالة الصينيه بسرعة حتى مينكلب عليها ونلط على ايدها 

خذت ميس الطوبة وضحكت الهم بسنونها الأربعة ومشت لمهيمن 

خلت خالة الصينية وضلت تحرك ايدها ..ردت انزل 

وشفت عمو لزمها بسرعة وصب الها شوية مي وبعدين دخل للبيت بسرعة 

شوية وجابلها المرهم خلالها على ايدها وينفخ عليها 

ابتسمت بس ما اعرف ليش ذكروني بماما وبابا ودمعن عيوني لوحدهن 

رجعت البردة خليت ايدي على عيوني وبجيت 

شوية وحسيت بليث دخل ..اجه عليه كعد يمي وبعد ايدي عن وجهي وكال : هنودة هاي ليش تبجين حبيبتي ؟!

كلت : لا ..بس اتذكرت اهلي ..مشتاقتلهم ليث..عافوني سوة لا ام ولا اب

حضني حيل خليت راسي على صدرة وبجيت اقوى 

باسني براسي وضل يربت على ضهري    

            

              

                    

كال : كافي حبيبتي ..ما اتحمل اشوفج تبجين ..ادري صعبة تنسين بس هم لازم ترحمين نفسج شوي يعني هسة صار سنة ونص وانتي على بجية وحدة مايصير هيج يا هنودة ادعيلهم ..همة هسة اكيد يشوفونكم كلكم ويعرفون اخباركم ليش تخلنهم انتي وخواتج يضوجون ..يمكن همة هسة هناك مرتاحين اكثر وفرحانين برحمة رب العالمين 

وبعدين تعاي اكولج ..اذا انتي تكولين مالج لا ام ولا اب لعد اني شنو هنودة ..اني مو كتلج اعتبريني كولشي مثل ما اني هسة معتبرج كولشي بحياتي احبج حتى اكثر من هيموني وميوسة

مسحت دموعي بضهر ايدي وكلت : منو كال ؟!    

ابتسم وكال : اني اكول.. شنو متصدكين ..لعد شنو تريد هنودة حتى تصدك ..لو ما الوشم حرام جان وشمت اسمج على صدري مثل الأفلام وساعتها اكيد حتصدكيني 

رفعت راسي وباوعت عليه 

ابتسم وكال : لعد اني عندي حل ..انتي مو تردين تعرفين شكد احبج بسيطة موتي وشوفيني الا ما ازوج بعد فاتحتج بيومين ..تعرفين ليش لأن اكول تعودت على هنودة ومحتاج وحدة تاخذ مكانها     

ضربته على صدره وكلت : ليثثث..    

ليث : شبيج حبيبتي غير الصدوك     

كلت : لا عيني اني ما اسمحلك تزوج حتى لو اموت لأن ما اقبل تاخذ وحدة مكاني     

خله ايده على خدي وكال : لعد شلون هنودة اني رجال متعود ما اكدر اضل بدون زواج ..عاد انتي هماتين متقبليها اخلصها بالحرام     

ضربته وكتله : انته صدك واحد لوتي ..جا وينه الحب اذا تزوج من ثاني يوم     

لزم اديه اثنينهن وكال : اهدي حبيبي مو كسرتيه لصدري بعد وين تنامين انتي     

ضحكت وهو ضحك وياي باسني بكصتي وكال : اي هيج حبيبتي خليني اشوف ضحكتج الحلوة من اروح فدوة للضحكة اني 

بسته بوسة سريعة وحضنته هو شالني وكال : ادري بيج انتي متعرفين تردين عالكلام الحلو ..بس عادي حبي ولايهمج ..بوسة كولش كافيه ..بس مو بوستج هاي بوستي اني ..

بعدني عنه وباسني حيل واني بادلته     

ليث هو احلى شيء صارلي بحياتي ما جنت اتوقع يجي يوم واكول هالشيء بس اني هواي احمد ربي عليه وعلى حبه الي 

جنت دايمآ من أسأل ماما وبابا الله يرحمهم عن سبب سعادتهم يكلولي الحب والتفاهم بعد توفيق الله عزوجل وهذا الي صار وياي وهسة حبي اله ما ينقاس بأي شيء واتمنى نهاية هذا الحب موتي قبله لأن ما اكدر اتخيليه يروح ويخليني     

**    

ليلى : بأول سنة من موت امي وابوي جنت كلش متأذيه وحتى دراستي هملتها وصحتي 

بس هسة بالسنة الثانية الحمدلله وبفضل خواني وزوجاتهم كدرت ارجع قوية واقرر احقق احلامي واحلام اهلي الي جانوا يتمنونها بيه وجهال خواني طبعآ جان الهم دور يطلعوني من كأابتي ويضحكوني     

ودعتهم الصبح وطلعت على دوامي وكفوا كلهم بالباب وضلوا يسوولي بيباي 

وانه مندمجة وياهم وامشي وعيوني عليهم لحد ما اصتطدمت بشيء على كد قوته حسبالي حايط وردت اطيح على ضهري بس كبل حسيت ايد لزمت ايدي ووكفتني 

رفعت عيني جان شاب طويل ومعضل لابس تيشيرت والتيشيرت يريد ينفجر من عضلاته ولحيته وشواربه خفاف بس لونهن جوزي وعيوني كبار وسود يخلسن 

ابتسم وكال : اني كولش اعتذر منتبهت     

انتبهت لنفسي سحبت ايدي منه وكلت : احم ..لا ولا يهمك ..هاي غلطتي انه ..منتبهت     

مد ايدة وكال : اني غيث ابن جاركم الأستاذ لؤي بس جنت ادرس بالخارج انتي اخت هيثم صحيح    

لزمت جنطتي حيل لأن توترت وكلت : اي صح ..بس ما مديت ايدي اله     

هو فهم وكال : اوه آسف متعود ..المهم تشرفت بمعرفتج ياا..اسم حضرتك     

كلت : ليلى ..اسمي ليلى     

ابتسم وكال : عاشت الأسامي ليلى ..فرصة سعيد محب آخرج عن شغلج ..عن آذنج    

مشى وانه خليت ايدي على كلبي ..هاي شبيه كلبي ضل هيج يدك بكل سرعته .. يمكن بسبب هذا غيث 

تنفست بعمق وكملت طريقي ..    

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم