رواية سداد وبنت العرب كامله جميع الفصول بقلم الزهيريه
يا خالق الراحة
أرح قلوبنا من كل ضيق
السلام عليكم
أسمي الق مواليد 2002 طبعًا قصتي من راح أطرحها أمام حضراتكم أني بهذا الوقت الندم ملء گلبي ونفسي على كل شي مر بحياتي ما أعرف ألي صار ويايه من أيدي واليجي من ايده الله يزيده لو البيئه والظروف چان الها دور بحياتي هذا انتوا أحكموا بي بعد ما تسمعون قصتي
أني الق من اب وام غريبين راح تسألون شنو الغريب بيهم قابل امچ وابوچ جايين من الفضاء اگللكم لا أمي وأبويه غريبين لإن همه من نوع المتلازمه الداون يعني بين (منغوليين) راح تگولون هذا شي ما موجود بس هذا آلي صار وهذا واقعي وما نگدر نغير واقعنه وقدرنه
طبعًا أبويه أصغر واحد بإخوانه عنده أثنين أخوات وأثنين اخوان عمي الچبير زهير ويجي ورا عمي نزار وبعدين عمتي مريم وبعدها عمتي منى وأبويه آخر العنقود وأسمه رياض وچان مشهور بالمنطقة وبين اقاربنه ب رياض المنغولي
عمي زهير چان كلش فقير وحتى زوجته مثله يعني لا يهشون ولا ينشون عكس عمي نزار هذا چان الله ما يجرعه يعني اذا اگول عليه مجرم قليل بحقه حتى بيبي إلي هي أمه ما چانت صيحه باسمه نزار كله صيحله شارون ومرته بعد أتعس من عنده وچانت صيح لنضال زوجة عمي نزار گولده ماهير اما
عماتي مريم ومنى مزوجات وسبحان الله عمامي زهير ونزار اثنينهم ما عدهم أولاد وشگد مراجعين وما مبقين دكاتره وساده وعلويات ما رايحين إلهم وين ما الناس توصف إلهم دكتور او سيد او علوية يرحون وتبقى إرادة الله فوگ كل شي وهي أنه الله ما وهبهم ذرية لعمامي
عكس عماتي الي اثنيناتهن خلفتهن أكثرهم ولد وبوقتها عمتي منى عارضه على عمامي أنه تنجب طفل وتنطي آلهم يربوا بس عمي نزار متعارك ويه عمه منى ويگول منى طمعانه بينه
وتريد تنطينه طفل حتى هذا الطفل يورث كل املاكنه بعد ما نموت لأن راح يصير كل شي لمنى وأبنها وگابه بينهم للستار وطارد عمه منى من البيت
وطبعًا هذا عرض عمه منى خرب الأول والتالي لان خلت عمي نزار ومرته يحرضون جدو وبيبي على منى مخليه عينها على املاكنه ويروح تعبنه للنسابه وقنعوا جدو انه يكتب وصيه بالشهر العقاري انه بعد وفاته كل شي مسجل بسم جدو يروح لاولاده زهير ونزار ورياض وبهيچ ضمن عمي نزار أنه عماتي ما راح ياخذن شي
وبقى الموضوع آلمهم آنه شلون راح تبقى العائلة بدون ذرية ومن راح يورثهم لأن حمدلله جدو عنده بيتين بيت ساكنين بي وبيت مأجري وعنده محلات بالسوگ هم مأجرهن وعنده تقاعد وعنده بستان ضامنها لفلاح وسنويًا يدخله من البستان خير من الله لهذا أمور بيت جدو الماليه زينه وجدو چان حلم حياته إنه يصير عنده حفيد من واحد من أولاده
وطبعًا جدو يصلي والعجيب شلون يصلي وشلون حرم بناته انه ما يورثنه ما أعرف المهم بيوم راجع للبيت بعد ما چان يصلي بالجامع
وگايل لبيبي / اگلچ ام زهير اني من چنت أصلي بالجامع وبعد ما خلصت صلاة أكو واحد أسمه آبو وهاب هم يصلي ويانه بالجامع وأني ما أعرفه معرفه دقيقه وبيني وبينه مرات حچي على الخفايف اليوم بعد ما صليت گعدت ابچي وادعي من رب العالمين آنه اشوف حفيد الي وابو وهاب إجى گعد يمي وظل يواسي بيه على كل مشكله والها حل
جاوبته بيبي / هذا بطران كل شي اله حل آلا العمر من يمشي بالبشر ما اله حل يعني فدوه للخالق أحنه ما طلبنه بس طفل يشيل كبرت ولدنه بس بعد عيني عين رب العالمين ما رزقهم
گاللها جدو/ يا مره اسمعي الحچي للأخير وبعدين گعدي ندبي حظچ ابو وهاب من سولفتله سالفة ولدنه وشلون اثنينهم ما عدهم بزر گلي شي دوخني
جاوبته بيبي /وشنو گلك ودوخك
گال جدو / گلي أبو وهاب اذا ولدك الكبار ما عدهم خلفه وعقيمين ليش ما زوج المنغولي وخلي يجيبلكم طفل
بيبي باقيه تضحك وتگول لجدو / هم الما بيهم شي ما يخلفون أنوب المعوق يخلف گول غيرها حجي هذا صديقك ابو وهاب مخرف
وجدو باقي يحچي على بيبي وبعد ساكت لما عمامي راجعين من شغلهم راجع جدو فاتح الموضوع ويه عمامي بيومها عمي نزار متخبل على احنه منغولي واحد ما متحملي انوب يجيب بعد مثله وين نوديهم شنو نفتح بيهم مركز مال معاقين
راجع جدو على عمي نزار دگ رزايل وغلط ويگله/ اني ما يهمني الحفيد من مخبل من عاقل المهم يجي حفيد يشيل اسمنه ويورث مالنه على هذا حچيك اسمنه راح يختفي بموتنه لإن ما عدنه احد انت ما تفكر أنه باچر عگبه انت او اخوك زهير اذا الله اخذكم منو يشيل جنايزكم
جاوبه عمي نزار انه شلون يزوج رياض وهو حتى عقل ما عنده وحتى بالعلاقه الحميمه بين الزوجين ما يفهم بيها
جدو گايل لعمي نزار انت تعلمه وانه الغريزه موجوده بالإنسان سواء عنده عقل او ما عنده
وراجع عمي نزار يگول لجدو / ومنو يگول رياض يخلف خاف عقيم مثلنه وبعدين شلون اعلمه على العلاقه الحميمة شنو اني اشتغل اله فلم سك ...ي
جدو گال / هذا خوش حچي ناخذه للمختبر ونحلله ونشوف اذا طلع التحليل يخلف نزوجه واذا طلع التحليل ما يخلف ما نزوجه
وعمي نزار باقي يضحك ويگول لجدو / يعني هو مخبل احنه شبينه من ناخذه للمختبر شلون ياخذون منه سائل منوي ابو المختبر شلون يحلل اله قابل يقره كف ايده ويعرف
هنا جدو فجر المفاجاة بوجه عمي نزار ويگله / انت ادخل ويا للحمام وساعده
وبعد مجادلات ومشحنات بين جدو وعمي وصل الحال بجدو انه يهدد عمي نزار انه يحرمه من الورث ويطرده من البيت هو وزوجته اذا ما نفذ كلامه
لهذا ما وافق عمي نزار على كلام جدو وعايفهم وطالع زعلان من البيت وباقي لليل يله راجع والظاهر الغرف المغلقة الها الدور الأكبر بحياتنه بشهاده زوجة عمي زهير تگول / نزار من طلع من البيت بعد العركه ويه جدو باقيه زوجته تلوب وتريده بس يرجع من راجع سامعتهم زوجة عمو زهير شلون زوجة عمو نزار تقنع زوجها وتگله نزار لا تگول لأبوك لا ابد خاف يحرمنه من فلوسه وروح ويه رياض للمختبر من يگول هذا المنغولي يخلف يله روح على أبوك وأرضي وبوس ايده
وقنعته زوجته نضال ونزل هو وياها ورايح على جدو وبايس راس وايد جدو ومعتذر ومبلغ جدو انه على ثاني يوم يروح للمختبر وياهم
بس يبقى إرادة الله فوگ كل شي وعلى ثاني يوم اخذو أبويه وراحوا للمختبر ومفهمين ابو المختبر شنو غايتهم
وأبو المختبر گايلهم إلهم انه تحليل المنوي لازم الرجل يكون ما مارس لا عادة سريه واذا مزوج ما متقرب على زوجته مدة ثلاثة ايام بس بوضع أبويه أكيد ما عنده عقل لهذا ما يفهم بهذا الشي وسمحلهم انه يسوون أله تحليل بنفس الوقت وعمي نزار داخل ويه أبويه للحمام وهو قام بالمهمه كلها وماخذ السائل المنوي منه وماخذه لدكتور التحليل وبعد نصف ساعه طالع التحليل والنتيجه إيجابية وإنه أبويه قادر على الإنجاب وهو هذا الي فرح جدو وبنفس الوقت الي خبل عمي نزار
ومن راجعين للبيت ومبلغين بيبي والبقيه طبعًا أكيد إلي تخبلت من الموضوع أكثر وحده هي عمه نضال گولده ماهير بس ما تگدر تعترض لان جدو موجود وكل شي موجود من أملاك بسم جدو بس غصبن عليها سكتت
وبعدها جدو على ثاني يوم راجع على المستشار الرسمي مالته أبو وهاب ومبلغه بنتيجة تحليل بابا وطالب منه اذا يعرف ناس عدهم بنيه ينطوها لبابا نظراً لحالته الخاصة وابو وهاب وعد جدو انه يدور على عروسة لبابا وجدو ما مضيع وقته ما مخلي آحد من أقاربه انه يريد بنيه يخطبوها لرياض وكل اقاربنه يضحكون على جدو على ابو زهير تخبل هي وين أكو بنيه تقبل بواحد (منغولي ) او اهلها يقبلون ينطون بنتهم لواحد منغولي وعمي نزار شارون هم يعيد نفس الكلام يگوله لجدو نفس كلام الاقارب الى ما اليأس ملأ نفس جدو وصرف نظر
وبعد ما جدو نسى الموضوع ب6اشهر المتعهد الرسمي والمستشار القانوني مال جدو ابو وهاب مبلغ جدو انه لاگي بنيه لبابا
ابو وهاب/ ابو زهير البنيه بنت ناس فقره اللگمه حسره عليهم وابوها مديون وعنده بنيه منغوليه اني گتله عليها واتفقت ويا غير حاضرها وغايبها تنطي مبلغ محترم وهو وافق وانت بعد بكيفك تروحون على البنيه لو لا اخذ شور بيتك وردلي خبر
وعلى هذا الإتفاق ويه ابو وهاب جدو راجع للبيت ومن مبلغهم عمي نزار شارون متخبل لإن موضوع زواج بابا رجع للساحه وعمي نزار يگول لجدو / بس گلي شلون يزوج ومعاشرته جنسياً للزوجه من يعرفها
وجدو يجاوب عمي نزار/ انت علمه هو الغريزه موجوده عنده بس علمه
وبين معارضة عمي نزار وبين موقف جدو الحاسم نحسم الموضوع لصالح بابا وبالفعل على ثاني يوم جدو مبلغ ابو وهاب ومتفقين يروحون على آهل البنيه الي فيما بعد صارت أمي وأهل امي يعني اكو ناس نسبة الفقر عدهم صفر همه تحت الصفر يعني امي متلازمه داون وأخوته أثنين متخلفين عقليًا وضعهم المادي كلش تعبان إضافة الى عايشين بالمناطق العشوائية يعني بالمختصر المفيد حال الضيم حالهم لهذا جدو ابو أمي كلش فرحان من عرف راح ينطوا مبلغ محترم من يزوج بنته او بالمعنى الاصح يبيعها لان هي وضعها مو مال زواج وحتى بيبيتي الي هي أمها لامي من معترضه على زواج بنتها ولكون هي حاله خاصة
جدو موتها لبيبي كتل ويگلها / مو زين إجى أحد يزوجها وياخذها وهي معوقه ومنغوليه أحسن ما باقيه يمي اعلف عليها
وبالفعل كلها أيام وازوج بابا من ماما وبالبداية چانوا من يدخلون الغرفة ماما تبقى تعيط وتبچي بس چانوا ينطوها ألعاب وتسكت وبهذا الوقت كله عمي نزار يدرب بابا على العلاقة الزوجية وقبل ماكو موبايلات لهذا چان اكو فيديو ويجيبله كاسيتات الجنسيه وعلموه وبعد زواجهم ب 8 أشهر بابا دخل بماما وحكمة رب العالمين انه من بابا دخل بماما بعدها بشهرين ماما صارت حامل بيه وهذا چان ما متوقع لعمي نزار شارون وزوجته نضال گولده لان همه متأكدين انه بابا يخلف لان سووا اله تحليل بس كانوا مراهنين على ماما لكونها متلازمه داون مثل بابا يعني في تفكيرهم انه ما معقوله اثنينهم يخلفون لكن إرادة الله فوگ كل شي وقدر الله وما شاء فعل
طبعًا زوجة عمي زهير تحلف وتگول / عمتچ نضال ما خلت شي ما سوته بأمچ بس في سبيل سقط حملها بس ربچ ما يريد واجيت اني للدنيا وطبعًا جدو ما سايعته الدنيا من الفرحه من نولدت بحيث زوجة عمو زهير تگول جدچ ركع بالمستشفى وظل يشكر الله وحتى ذبح 7 ذبايح وموزعهن للناس الفقره وبعدي اجى أخويه بس سبحان الله أجى هم متلازمه داون مثل بابا وماما وهنا اجتي الفرصه لعمي نزار حتى يخلي حد انه بعد بابا اي طفل ما يخلف وبهذا قرار عمي خوفًا لا يجون اطفال متلازمه داون رجعوا ماما لبيت أهلها واني وأخويه نشأنه يم آهل أبويه وهنا كانت مأساتي وعذابي
