رواية قبر مريم كامله جميع الفصول بقلم محمود الأمين
الجو في البلد برد اوي عن القاهره.. الريح شديد اوي والمطره مغرقه الشوارع.. ورغم كده ده الجو المناسب بالنسبالي
وعشان كده خرجت من بيت جدي وقولت اتمشى شويه.. وانا ماشي شوفت بيت صغير او تقدروا تقولوا اوضه صغيره كانت مبنيه من الطوب الابيض، وفي لمبه كده منوره قدام الاوضة دي، هو مع الريح اللي شغال كانت بتطفي وتنور، كل ده عادي
لكن الباب كان موارب معرفش ايه اللي خلاني اقرب، حاجه جوايا بتقولى قرب.. قربت وزقيت الباب بالراحه واتجمدت مكاني من الصدمه
...
#قبر_مريم
#الجزءالأول
انا الصحفي سيف نبيل الصواف اظن انكم فاكرينى.. فاكرين مستشفى الريف وحكايه عزت.. ومن حظي الحلو ان دايما حياتي مليانه مغامرات وحكايات غريبه تتناسب مع كوني صحفي
قومت من نومي وفتحت الشباك، الجو برد وده طبيعي لاننا في ديسمبر
دخلت الحمام اخدت دش سخن، ولبست واكلت لقمه على السريع ونزلت ركبت عربيتي الصغيره اللي اشتريتها من كام يوم
عربيه كده استعمال جبتها عشان اقضي بها مشاويري، في الوقت ده تليفوني رن واللي كان بيتصل بيا كان ادهم صديقي
رديت عليه وقولتله
_ ايه يا معلم مش من عوايدك الصحيان بدري كده؟!
= انا كنت نايم والله، بس بابا صحاني عشان جدي تعبان وطلب مني اروح هناك.. فكنت عايزك تيجي معايا وهو بالمره تزور جدك انت كمان
_ ياااه البلد، بقالى كتير مرحتش هناك والله، بس انا النهارده عندي شغل مش هعرف اروح
= حاول تاخد اجازه النهارده.. انا تعبان ومش قادر اسوق وبصراحه كده معتمد عليك انك هتوصلني
_ اه قول كده بقى انت عاوزني اروح معاك عشان العربيه، مصلحه يعني ماشي يا سيدي هكلم مديري في الشغل وربنا يسهل
...
قفلت مع ادهم واتصلت بمديري في الشغل.. وبلغته ان جدي انا اللي تعبان وبطلب اجازه عشان اروح اشوفه
وبصراحه الراجل متاخرش وقالى مفيش مشكله
اتصلت بادهم وبلغته اني هعدي عليه.. وفعلا مفيش 10 دقائق وكنت واقف قدام بيته بالعربيه.. واحنا في الطريق ادهم شغل الراديو قال نسمع اي حاجه على ما نوصل.. وفعلا اشتغلت اغنيه على قد الشوق للفنان الراحل عبد الحليم حافظ.. وبصراحه انا من عشاق الفن الجميل بتاع زمان كنت مستمتع جداً والاغنيه شغاله.. لكن قطع صوت الاغنيه صرخه، صرخه كانت هتخلي العربيه تتقلب بينا
ركنت على جنب عشان اخد نفسي واهدى.. لكن ادهم بصلي وقالى مالك في ايه؟
= هو انت مسمعتش اللي انا سمعته؟
_ سمعت ايه يا عم الاغنيه شغاله اهو زي الفل!
= في صوت صرخه طلع في الاغنيه فجأة
_ صرخه.. صرخه ايه لا انا مسمعتش حاجه
...
تمام جايز يكون بيتهيألى.. بس اكيد لا
واللي هقوله ده البعض هيشوفه خيال وجنون، انا واحد مؤمن بالاشارات بمعنى ان لو في حاجه هتحصل بتحصل قبلها اشاره، والصرخه دي بتقولي ان داخل على مغامره جديده.. في حاجه مستنياني في زيارتي دي، بس هي ايه لسه معرفش
لما وصلنا البلد.. لقينا البلد كلها في الترب او في المقابر بمعنى اصح
اكيد في حد توفى.. ادهم افتكر انه جدو اللي توفى وعشان كده نزل بسرعه على بيت جدو لكن الحمد لله جد ادهم كان عايش
فسبته مع اهله ورحت انا على بيت جدي.. جدي وجدتي استقبلوني بالاحضان وكانوا زعلانين مني اني مش بزورهم كثير زي الاول لكني قولتلهم الدنيا تلاهي وان ده غصب عني عشان طبيعه شغلي
وبعد شويه كلام وعتاب.. سألت جدي هو مين اللي توفى يا جدى؟
سكت جدي شويه وسرح وبعدين بصلي وقال
_ دي مريم بنت عمك مرقص.. اتوفت من شويه
= تمام.. بس انا حاسس انه في حاجه غلط يا جدي، شكلك متغير انت كويس؟
_ الحمد لله يا ابني انا كويس.. ادخل انت ارتاح كده ونبقى نتكلم لما تصحى
...
دخلت الاوضه اللي دايما برتاح فيها، ولقيتها نضيفه ومنظمه، حتى وانا مش بزورهم زي الاول مهتمين بالاوضه بتاعتي.. رميت جسمي على السرير ونمت شويه
فتحت عيني بس مكنتش في السرير.. انا كنت في اوضه شكلها وحش جداً حيطانها سودا ريحتها مقرفه
وشفت واحده شكلها وحش لابسه اسود.. قاعده وقدامها شموع كتير وماسكه صوره في ايدها وابره وكانت بتخرم في الصوره، وبعدها بدات تقول كلام كتير
الاوضه بدات تتهز بيها.. وكأن ضربها زلزال وبعدها المشهد اتبدل ولقيت نفسي واقف قدام بيت الاستاذ مرقص.. كان طالع منه صوت صراخ واهل البلد كلها بتجري على البيت
واللي خارج بيقول بنت الاستاذ مرقص ماتت.. مريم ماتت
...
صحيت من النوم وانا بستغفر ربنا.. وقومت من مكاني غسلت وشي وقولت هخرج اتمشى شويه الجو في البلد بارد اوي عن القاهره.. الريح شديد اوي والمطره مغرقه الشوارع.. ورغم كده ده الجو المناسب بالنسبالي
وعشان كده خرجت من بيت جدي وقولت اتمشى شويه.. وانا ماشي شوفت بيت صغير او تقدروا تقولوا اوضه صغيره كانت مبنيه من الطوب الابيض، وفي لمبه كده منوره قدام الاوضة دي، هو مع الريح اللي شغال كانت بتطفي وتنور، كل ده عادي
لكن الباب كان موارب معرفش ايه اللي خلاني اقرب، حاجه جوايا بتقولى قرب.. قربت وزقيت الباب بالراحه واتجمدت مكاني من الصدمه
في راجل وست مشنوقين في سقف الاوضه.. انا عارفهم كويس الراجل ده يبقى الاستاذ مرقص والست دي مراته
جيت اخرج الباب اترزع واتقفل ورايا.. وهدوء رهيب حل على المكان
دخلت لجوه.. واللي اكتشفت انه بيت مش مجرد اوضه، في اوضه تاني جوه.. لما دخلت شوفت نفس الاوضه اللي شفتها في الحلم
بس مفيش حد.. لكن على الترابيزه الخشبيه المدوره كانت صورة مريم ومتخرمه زي ما شوفتها في الحلم
كنت حاسس اني مش لوحدي.. سامع اصوات همس غريبه جايه من كل حته.. عشان كده خرجت من الاوضه وهنا اتجمدت مكاني من الصدمه لتاني مره الجثث اختفت ومالهاش اثر.. خرجت بره البيت والباب اتفتح معايا المره دي بمنتهى السهوله ومشيت.. لكن وانا ماشي شوفت نفس الست اللي انا شوفتها في الحلم كانت جايه من طريق المقابر وشايله على كتفها شوال، استخبيت عشان اشوفها هتعمل ايه؟
لكن وانا مستخبي في ايد اتحطيت على كتفي واتلفت كانت هي وابتسمت بخبث وقالت
انت فاكر انك هتقدر تعمل حاجه يا سيف؟.. ارجع من مطرح ما جيت ارجع والا هأذيك
مكنتش عارف ارد.. لكن فجاه لقيت قلم نزل على وشي فوقت لقيت جدي واقف في وشي وبيقول
_ انت ايه اللي خرجك يا سيف.. حد يخرج في جو زي ده؟
= هو ايه اللي بيحصل يا جدي في البلد.. فهمني ايه اللي بيحصل بالظبط؟
_ مش هقدر افهمك حاجه.. انا عارفك مجنون وطايش وممكن تضيع نفسك
= لا يا جدي انا لازم افهم.. انا دخلت البيت ده ومفهمتش حاجه
...
جدي بصلي وبرق وقال
_ دخلت بيت مين؟... الله يخرببيتك انت دخلت بيتها
= بيت مين يا جدي فهمني انا مش فاهم حاجه؟
..
في اللحظه دي سمعنا صوت صرخه جايه من بعيد.. لكن.
