رواية جنون البرزخ كامله جميع الفصول بقلم فاطم الروح
مع بداية شهراً جديد بدأ الشتاء يفرض حضوره بهدوء واضح
تكاثفت الغيوم في السماء حتى بدت وكأنها تعانق الأفق من كل الجهات
وتتابعت زخات المطر لترسم على الطرقات لمعاناً خفيفاً ورائحة تراب مبتل تبعث على السكينة
الهواء أصبح أبرد قليلاً يحمل معه إحساساً ببداية فصلاً مختلف تتغير فيه التفاصيل الصغيرة قبل الكبيرة
ومع ارتفع صوت أذان المغرب واضحاً في الأجواء
يتردد بين المباني وتحت الغيوم الكثيفة فيمنح اللحظة طابعاً روحانياً دافئاً
وكأن الطبيعة كُلها تنصت لذلك النداء مع آخر خيوط الضوء قبل حلول المساء.
الله أكبر الله أكبر.. الله أكبر
أشهد أن لا إله إلا الله،
أشهد أن لا إله إلا الله،
أشهد أن محمدًا رسول الله،
أشهد أن محمدًا رسول الله،
حي على الصلاة، حي على الصلاة،
حي على الفلاح،
حي على الفلاح،
الله أكبر، الله أكبر،
لا إله إلا الله.
:-ولج سميه نزلي الملابس المغسوله من فوك السطح لا تنگع
:-شبيج يوم ترا بس نقطت لو زاخه شلون
:-امشي لج ادبسزز يلا لمي الملابس وصيحي لاختج ميلدا تجي تدخل الغراض البطرمه
- قبل لا اجاوبها تقدمت أختي ميلدا بهدوء جميلة الملامح بشعر أسود مثل اليل الصافي وعيونها الوساع ومكحلات
وجمالها مو بس شكلها حتى بگلبها ما ترد لأمي وأبوي طلب وتحرص دائما على رضاهم بمحبة صادگه
ميلدا:-أجيت يا أمي نزلت الملابس الي بالسطح
:-يا عيون أمج تعلمي ولج سميه راح ابتلي بيج امشي سوي عشه
- ضحكت سمية وأشرت على عيونها.
سميه:- ياروحي العصبي ولو من عيوني
ميلدا:-سميه سوي بحت (رز بحليب)
سميه:- من اعيوني ياروحي
ميلدا:-فديتج أنا
- صاحت امي ضايجة من غزلنا لبعض واحنه نضحك.
:-ولجن راح نغرك جليبات وكت غزل اذا ما أزوجج ماطلع بتول
سميه:-بتول لو بالعرض
ميلدا:-عزا ولج
بتول:-تعاي أنا اعلمج منو بالعرض تحششين بت الكلب حيوانه
- حجتها بلحظة عصبية لكن لسوء الحظ دخل بابا ووكف وراها
ميلدا:-ماما
بتول:-شتردين أنتَ الثانيه
ميلدا:-شوفي وراج
سميه:-صخامم يمه راح تطلگين وحق محمد
بتول:-حيوانات شبيجن
- سرعان ما رد أبوي بصوت شكل وجهَ يوحي بأنَ كاتم ضحكته بس يمثل العصبيه
:-وياج الكلب
- لطمت على خدها وحجت علينا
بتول:- صخام الصخم وجوهجن
ميلدا:- عزا واحنه شعلينا
سميه:-اي والله ما گنالج احجي
بتول:-ترا شلعتن گلبي كافي عاد
- رد ابوي يراضي بيها ويحضنها من ورا.
فيصل:-ولا يهمج حبيبتي خل يولن شني ذني المايفتهمن
-ضحكنا ثنينه ورديت انا
ميلدا:-شوفوا شوفوا صار وي حبيبته جا احنه شبينه وين اخوانه
- ووي حجايتي سمعنا صوت عزيز روحنا اخونا احمد
احمد:-روح اخوج أمريني
- أندارينه بلهفه لمصدر الصوت حتى نتأكد منه
شهگت فرحانة
ميلدا:-يمههه من اندارلك فدوه ياروح اختك
-ركضنا عليه ثنينه حضناه، ضحك يبوس بروسنا
احمد:-ههه حبيباتي شلونجن
سميه:-الحمدلله ياعمري أنتَ شلونك شون جان شغلك
احمد:-الحمدلله....شلونج يوم
-ردت امي عليه بشوي نتر
بتول:-حبيبي الحمدلله أنتَ شلونك
احمد:-بخير دام شفتكم
- حجه ابوي يشاقة وياه
فيصل:-شاف امه وخواته بعد مو بحالي
احمد:-دوله وعلم حبيبي شعدنا غيرك
فيصل:-هههه بعد روحي روحك... يلا شمسويات عشه
احمد:-وين منتظر
فيصل:-جاي يعزل بالمحل على جيه هسه
احمد:-تمام اروح ارتاح بين ما يحضر العشه اكيد سميتي مسويته
سميه:-ياعيني الي يعرفني اطلب شتريد هسه اسويلك
احمد:-تذكرون من جنه نلتم يم الصوبه وناكل بحت هسه سويلنا بحت وخل نلتم همينه
ميلدا:-توني كلتلها تسويه
احمد:-ههه بعد روحي
بتول:-روح ارتاح بين ما يجي اخوك ويحضر العشه
احمد:-تمام من رخصتكم
-بلشنا أنا وسميه نحضر العشه بهدوء بين ما أحمد يرتاح ومنتظر بعده ما واصل صوت الأخبار يجي من يم أبوي عالي، وأمي تشر الملابس على الباب تريد تلحق تنشفهن قبل لا يبرد الجو أكثر.
البيت كله هدوء وبساطه كلشي ماشي مثل كل يوم ضحكات خفيفه وحچي عادي.
إحنا ناس على گد حالنا أنا وسميه تاركات الدراسه، وهي أكبر مني بسنه وأحمد ومنتظر كل واحد بحياته احمد يشتغل بره المحافظه ومنتظر ويه أبوي بالمحل كلشي جان واضح أو يمكن إحنا متعودين عليه فحسبناه طبيعي.
كل واحد بمكانه، وكل لحظه تمشي عادية ومتشابها
لحد ما دك نقال أبوي ماعرف منين كدر يحصله لان بهذا وقتنا صعب اكو هيج نقال يادوب بس شجم واحد جايب تلفون ارضي.
جانت دگة عاديه مثل اي شخص يخابره من گبل بس حسيته مو مثل كل مره
فيصل:-هلا اي تفضل، تمام يمته، يعني لازم، تمام لازم احافظ على عائلتي، رتبلنا مكان اهناك، مشكور ماقصرت، تدلل يوصلك كلشي، مع السلامه
- سكتنا ثنينا وأشرت الها تروح بحكم هيَ الجبيرة وشوية قريبه من ابوي
سميه:-بابا منو الي اتصل ليش لازم تحافظ علينه وليش ضجت
-رد ضايج خلگة ويحجي من ورا خشمة.
فيصل:-ماكو شي حبيبتي بابا روحي كملي شغل
سميه:-صار
- اجتني تلگيتها اريد اعرف شكو
ميلدا:-شكو
سميه:-ماعرف ما قبل يحجي
- هزت راسها بـ اي خلصنا العشه وصبينه وفعلاً التمينه وكعدنه حولين الصوبه مثل ايام قبل وبين كل حجاية ولگمة ناكل ونشاقه قاطعنه أبوي وصدمنه بكلامه
فيصل:-حضرو نفسكم باجر نسافر
- حجت سمية بفرح
سميه:-الله راح نسافر سفره حلوه
-ضربها منتظر على رأسها بخفه وحجه.
منتظر:-نجبي غبيه اكو واحد يسافر بهالوضع
-سكتت ضايجة وحجه احمد يسأل ابوي
احمد:-ليش يابه خوماكو شي تعرف الوضع متكهرب والي يطلع شيصير بي؟
-هز راسه ابوي بـ اي وكمل كلامة
فيصل:- ادري ادري كلها ادربي بيها بس الجيش يدور عليه
-شهكنه خايفات وكالت أمي بنبرة اشبه بالشماته
بتول:-كتلك توب توب بس ما توب هاي اخرتها راح نشرد كلنا
- رفع احمد ايده ينبهنه ما نحجي وهو حجه.
احمد:-شكو صاير؟
فيصل:-محد منكم يدخل بالموضوع
- حجه منتظر مستغرب او متعود على تصرف ابوي.
منتظر:-بويه شنو محد يدخل فهمنه احنه مو ولدك الكبار شنو هاي؟
فيصل:-كلامي ما يصير ثنين سمعتو
- حجيت خايفة لازمة ايد مليدا
سميه:-بس بابا..
- قاطعني احمد مانعني اكمل حجي
احمد:-سكتي ماطول كال محد يدخل ماكو احد يدخل وين راح تشردنا
فيصل:-باجر طيارتنا بـ5الصبح نروح للمغرب اهناك نستقر ونكمل حياتنه
احمد:-شغل بيت اكل؟؟
فيصل:-كلشي جاهز ماكو داعي تفكرون
منتظر:-سفره دايمه تصبحون على خير
-بقينه ساكتين كل شخص كام لغرفته جلفنا النوم أنا وسميه وبقينه نفكر شنو راح يصير بحياتنه الجديده
سميه:-تتوقعين ليش الجيش يدور على ابوي
ميلدا:-ماعرف علمي علمج بس اكيد امي تعرف
سميه:-طبعاً تعرف حبيبته
ميلدا:-ههههه اكلج عود إذا استقرينا اهناك خل نكمل دراسه
سميه:-دبرتي على الدراسه بالعراق؟
ميلدا:-لا
سميه:-عراقي ما دبرنا ندبر مغربي شو نجبي
ميلدا:-اوففف شنو هاي
سميه:-دكومي اذن خل نصلي ونجهز جنطنه وملابسنه
ميلدا:-تمام يلا
طلعنا توضينا ورجعنا صلينا الصبح قرينا دعاء العهد سميه كامت وأنا بقيت اقرا قرأن سوره النور من خلصت سألتني سميه بأرتباك خايفة.
سميه:-ميمي اسألج سؤال بس مو زعلين مني لو عبالج اغار منج بس بنفسي
ميلدا:-ههه ليش هيج افكر أنتِ اختي واكبر مني سألي براحتج
سميه:-ياروحي فدوه ليش هيج أنتِ حلوه وجهج ابيض كأن بي ضوه جمالج خيالي مرات شسمة يعني ماعرف شون اوصفج كلشي قليل بحق وصفج
- ضحكت فرحانة لكلامها وهي كملت.
سميه:-والله اشو أنا وياج نفس الشي بكلشي بس أنتِ كلش حلوه
ميلدا:-باعي مو أنا اقرا سوره النور هيج صار وجهي
سميه:-صدك؟
ميلدا:-والله جربي شهر وشوفي
سميه:-خوش جا
- ضحكت عليها فرحانة
ميلدا:-ههههههه خبله والله مو من اول ما كتلج خل نقراها سوه ما قبلتي وتعاجزتي
سميه:-شمدريني هيج يصير
ميلدا:-بس باعي مو تقرينها علمود بس صيرين حلوه مراح يفيدج
سميه:-شرحيلي عليها
ميلدا:-لعد خل نلم غراضنه ونحجي بـ فضائلها
سميه:-تمام
حجيتها بحماس وكمنه خلصنا كلشي سوينه ريوك بـ4:30 كلها طلعت من غرفها تريكنا وطلعنا للمطار الوضع مرتبك خوف وقلق
وصلنا وي الموعد بالضبط توجهنه لطياره الي ماعرف شلون راح يسمحلوها طير
صارت مقاعدنا ورا بعض أمي وأبوي أنا وميلدا ورانا احمد ومنتظر الي متنرفزين من وتصرف أبوي ودهم يشربون من دمه
اقلعت الطياره والخوف الف اول مره نركب طياره استقرت بالجو وناده احمد علينه يخفف خوفنا
احمد:-بناتي نامو احسن بين ما نوصل
ميلدا:-يمته نوصل
احمد:-بليل أن شاءلله
ميلدا:-تمام
- نامو أبوي وامي وسميه همينه بيقت كاعده ماعرف شنو اسوي اخذتني الافكار بالحياة الجديده بينما سمعت احمد ومنتظر يحجون بينهم
منتظر:-وهسه شنسوي يعني نقبل بالي جاي يصير؟
احمد:-اصبر عليه افهم الموضوع اذا جان كلش خطير نتقبل ليش لا بالاخص سميه وميلدا بعدهن صغار شلون رايك؟
منتظر:-وشنو يعني؟ترا ابوي ابد مو معقول رجع نفس دربه العوج
احمد:-احترم ترا ابوك
منتظر:-ادري صخام ابوي بس ليش ما فكر بينه عوفنه احنه نكدر نتحمل بس مافكر بـ سميه وميلدا بعدهن صغار وشراح يصير بيهن مجمع يختلف ولهجة تختلف شني معناهااا؟؟؟
احمد:-ماعرف بس انتظر اذا صدك اضطر الموضوع ننسى العراق ونستقر بالمغرب راح اخلي سميه وميلدا يدرسن حتى يكدرن يتصرفن ويتأقلمن وي البلد والناس
منتظر:-لهجتهن بالمغرب مو قويه شلون
احمد:-نعلمهن هنه ذكيات وشاطرات يكدرن بسرعه يتعلمن
منتظر:-ماعرف شنو ضامتلنا الدنيا برجعتنا للمغرب بس واثق بربي واثق بيك راح تعرف تصرف وترشدنا
احمد:-هههههه ابتليت صرت الجبير
منتظر:-هم زين صرت الجبير والله لو أنا فلا اعرف اصرف
احمد:-تعرف تعرف لا تخاف وبعدين ليش ضايج راح ترجع لنفس البلد الي نولدت بي ولنفس البلد الي يحتوي حبيبت روحك
منتظر:-ههههه ماعرف شلون راح تكون ردت فعلها
احمد:-حب الطفولة رجع اكيد فرح
منتظر:-هههه ان شاءلله
احمد:-اكعد يا بخت بقيت بس أنا
منتظر:-تجي وين تروح قابل
احمد:-دانهمد يلا
منتظر:-بعد روحي
-ابتسمت ابتسامه لطمأنينه جفلني النوم وبقيت كاعد حسيت على ميلدا كاعده حاحيتها بهدوء
أحمد:- ميلدي كاعده ابويه
ميلدا:- اممم ما كدرت انام
-فرت راسها تناضرني عيونها الكبار المكحله وجمال وجهه البريء والي يبعث الراحه لشخص اليناظرها
أحمد:-ليش ياروحي
-حركت اكتافي بـ معنى ماعرف ابتسم وسألني
احمد:-ميمي تردين ترجعين تدرسين؟
ميلدا:-كلت لـ سميه وكالت العراقي ما دبرنا ندبر مغربي
احمد:-خل تولي ماعليج بيها
ميلدا:-اريدها وياي
احمد:-ميخالف اقنعها الج ودرسن سوه
ميلدا:-بس شلون
احمد:-نوصل ونشوف اجرائات الي عدهم
ميلدا:-تمام، هم مرا اجيتوا للمغرب؟
احمد:-اي وجانت كلش حلوه
ميلدا:-يمتى؟
احمد:-من جنا صغار
ميلدا:-تمام
احمد:-ارتاحي ابويه ماعليج بشي
- اندارت عني وباقي افكر شلون يصير هيج بينما استقرينه وكدرنا نرتب حياتنه راح ترجع تتخربط مرا ثاني
كان الي عليه أن ارتب حياة اخوي وخواتي همي الوحيد كنت تجربة لتربيه بين ثنين ما رحموني بسبب عادات وتقاليد جبرتهم يتزوجون غصب عنهم كان ضحيتهم الطفل الاول والى الان يمثلون الحب والطيب كدام منتظر وسميه وميلدا بس لـ حتى يوهموهم بالحب بس أنا غيررر غيرر باقي اشوف نفس نضرات الكره والحقد الي تعودت اشوفها منهم
رجعت راسي للـ كرسي استرجع ماضي طفولتي الي ما اتمناها لأي احد ماضي عشة بي على الكراهيه والضرب بين كل الذكريات الي تألم والسواد المحتلها تذكرت محاربتي لأجل منتظر من بلغ السنه ونص من عمره
فيصل:-راح اطلگج
بتول:-يا كل الهلاااا يراد اهلهلل
فيصل:-خاب دروحي كاتل روحي عليج
بتول:-مبين كلش ما كاتل روحك عليه
فيصل:-لو كاتل روحي عليج ما ازوجت عليج ثنين
بتول:-عود تريد تقهرني لا عشت بويه
فيصل:-المهم امشي ولي لهلج باجر ورقة طلاگج يمج
بتول:-ولك وين اروح وأنتَ جايبني بلد ماعرف شكو ماكو بي
فيصل:-اهووو شلون بهاي نقنيقه هسه
بتول:-خاب دولي ميته على جهرتك
- حاجيت امي بللهجة التعودت عليها طفل صغير ما افهم شي
احمد:-ماما اخويه بيبكي
بتول:-هاد مش خويك مش خويك ولا ابني هاد ابن المغربيه الشينه
احمد:-بس يا أمي خطي
- ضربتني راجدي بكل قوتها على حجاية وحدة انداريت لـ أبوي
بتول:- شوف قسم بالله اذا مترجعني لبيت اهلي الصبح ما يصيرلك خير
فيصل:-خوش خوش الصبح احجزلج اقرب طياره للعراق ولي منا
بتول:- وهاذا ابنك خلي الك يطلع مثلك عار
فيصل:-عندي ثنين يربوهم احسن تربيه
بتول:-نشوف يـ فيصل نشوف
-كل نقاش اذكره بتفاصيله المتعبه كل يوم مشكله ما كان عمري غير ثلاث سنوات عشت بوسط المشاكل الي كانت تاخذ من حيلي اذكر بعد ما راحت أمي
أبويه خلَ نسوانه المغربيات يعيشن ويانا شفت انواع القهر والمهزله والضرب منهن كان تعلقي بـ منتظر كبير وخوفي عليه اكبر بينما كنت انضرب، انهان كان منتظر ياخذ كل الدلال والحب من ابويه ونسوانه الاثنين هم نفس الجنسيه الا أنا الغريب بنصهم
صار عمري 9سنوات صف ثالث ابتدائي سجلوا منتظر وياي بالمدرسة كان باقيله سنه ويستحق المدرسه بس أبوي ومعارفه كدر يسجله بأول يوم دوام النا
سهيله:-يزينك يفحلي يا بعد عمري وروحي
الله لا يحرمني منك ولا من ضحكتك الحلوة.
منتظر:-ماما بدي اروح مع احمد
سهيله:-من عيوني يـ أمي
- حجه ابوي يمدح بي ويشجعه
فيصل:-تحضر وليدي صار بالمدرسة
منتظر:-بابا بـ نروح
فيصل:-اي يلا
منتظر:-دقيقه انادي احمد
فيصل:-بسرعه
-اجاني يركض بصعوبه الجنطة اثگل من عنده
منتظر:-احمد يلا نروح المدرسه
احمد:-مو أبويه الي بياخدك
منتظر:-ايوا بس قلتلهُ تروح معي
احمد:-تمام يلا
- ذكريات حلوه بس شيرجعها ضلت عله بگلبنا بعد ما بدأت تصير مشاكل بين أبوي ونسوانه الاثنين ولحد ما كثرة وصل بيهم الى الطلاق طلگهن
جان منتظر يتعلم عراقي ومحير الى ان دار بينه حديث بسيط لكن عرفت قيمتي شكد عنده
منتظر:-أنا خايف
احمد:- تريد تحجي عراقي؟
منتظر:-اي بس تفهمني؟
احمد:-عسى ما تحجي صومالي هم افهمك
منتظر:-ماعرف اختار منو
احمد:-اختار الي ترتاح ويا
منتظر:-أنتَ
احمد:-أنا مصيري وي أبوي ماكدر
منتظر:-ليش مو امك هي خاله؟
احمد:-لا امي عراقيه وراحت من زمان
منتظر:-ماعرف بس اريد ابقى وياك حباب
احمد:-ماكدر اقرر بدالك لو أنا جبير جان كدرت تختارني ونبقى وحدنا
منتظر:-تمام
احمد:-صفي بالك وفكر اعتبر نفسك جبير لأن القرار جبير ولازم تقرر صح
- صفن شوية وبعدين حجه
منتظر:-اختاريت واعرف وي منو راح ابقى
احمد:-تمام نام باجر المحكمه
منتظر:-تجي ويانا
احمد:-اشوف ابوي
منتظر:-تمام
احمد:-نام لا تكعد نعسان وتجفص يم القاضي
منتظر:-ههه تمام
- نمنه وأنا مطمئن بجانبي شخص شكد ما اغلط راح يصحح غلطي بدون ما يأذيني
كعدنا الصبح جهزنا نفسنه ورحنه قبل لا ندخل احمد كال جمله لو اكبر مية سنه ابقى اذكرها
احمد:-شوف لحظه قبل لا ندخل
منتظر:-ها
احمد:-مهما كان اختيارك أنا وياك وللموت حتى لو رجعت للعراق راح اشتغل على نفسي علمود اجيك وابقى يمك تمام
منتظر:-تمام
احمد:-يلا بالتوفيق
- مرة ساعتين ونص طلع منتظر وهو يركض بأتجاهي والابتسامه مرسومه على وجه حضني اعتبرت هاذا اخر لقاء النا
أحمد:- راح اشتاقلك كلش
منتظر:- ليش تريد تعوفني مو هسه كلت ماعوفك
احمد:-ماعوفك بس راح اطول يلا اجيك
منتظر:- اهااا فهمت اختاريت الشخص الي راح يبقينه سوه
- صفنت شوية اسوعب كلامه وجان الي يقصده أبوي
أحمد:- تحجي صدك
منتظر:-اي
احمد:-أبويه!!
منتظر:-اييي ماكدر بدونك
-حضنته بكل قوتي واريد ادخله بنص ضلوعي صاح وهو يضحك
منتظر:-ولك كسرتني
احمد:-تمام بس راح تتحمل تبقى بعيد عن امك
منتظر:-هي بالسانها كالت ماريدك بس علمود النفقه احمد أنتَ أمي وأبوي ماريد غيرك
احمد:-ياروح اخوك اصيرلك الدنيا ولا يهمك
-قطع حديثنا ابوي وهو يكول
فيصل:-يلا امشو نرجع لاهلنا
احمد:-للعراق؟
فيصل:-اي ومناك ارجع امك مابيه حيل الكم
منتظر:-ودراستنه
فيصل:-نقلت كلشي لهناك لا تلحون
احمد:-تمام
- من هالحظه بدأة حياة جديده وصلنا للعراق وما جنا نعرف شنو راح تضملنا الدنيا بالجيه لهنا جانُ بأستقبالنا عمامي الي اول مره اشوفهم
منتظر لازم ايدي بقوه خلصوا ترحيب ورحنه للبيت دخلنا والاطفال موجودين كلهم من اشكالهم يبين اكبر واحد بيهم عمره15سنه او اصغر
تقدموا تجاهنه ثنين كبار بالعمر رحبوا بينه وبوسونه ابوي كال هذول جدي وجدتي ما اهتمينه لاحد أبداً اتفقنه ما نختلط بيهم ونحاول نبقى بعيدين عنهم قدر المستطاع
ومر اسبوع واحنه بيت العائله وابوي ما موجود والكل يضحكون علينه من جبيرهم لحد صغيرهم
منتظر:-احمد وينو أبويه ليش لسه مرجع
احمد:-ماعرفش بس يرجع لا تخاف
منتظر:-شبيهم هدول
احمد:-ما عليك بيهم
- حجوا بينهم يضحكون كالعادة
مؤمل:-خطيه ابوهم وامهم عافوهم اهنا وراحوا
لطيفه:-هههه عدنا اب وام وانتم ماعدكم
مؤمل:-مبين ما يردوهم ذبوهم اهنا خدم النا
سيف:-هههه ها ولد الغربه كاعدين بحديقتنه ومكانه هم
منتظر:-مش مكانك وهاد بيت جدي مش بيتك
سيف:-اهوووو كام يحجي مدري شسمه احجي عدل لا اعدل حلكك بيدي فهمت ولد الفگر
احمد:-جرب مد ايدك عليه وشوف شيصير بيك
سيف:-حلووو تحجي مثلنا
مجد:-اييي هاذا امه عراقيه بس هاذا امه مغربيه وبابا كال عمو طلقها لان تطلع وي شباب
سيف:-اي طبه طوب ماعليكم بأبن الزنا
احمد:-تحجون عدل لا اكوم امسح بيكم الحوش كله
مؤمل:-شوف احمد عندك فرصه صير ويانا وعوف هاذا الغريب ما يفيدك بشي اكيد جانت امه مدللته وعايفتك ردله الدين
احمد:-خاب دروحو اعوف اخوي لخاطر شله طايحت الحظ ما صارلي سبوع اعرفهم خاب براسكم عقل انتو لو حاطيلكم قنادر؟
سيف:-شله طايحت الحظ موو
- تقدم علينا وانا كمت، لزمني منتظر
منتظر:-لا احمدد
سيف:-مؤمل الزم هاذا الثاني
احمد:-ايدك اكسرها وحق الخلقك
سيف:-ماتوب موو دتعال
-جرني بقى يضرب مستسلم اله لأن اعرف بس اضربه راح تصير مشاكل بس من صار مؤمل يضرب منتظر أهنا وصلت حدها وياي
ضربت سيف ولزمت مؤمل.
أحمد:- كتلك ايدك اكسرهااا
مؤمل:-عوفنيي حيواننن
احمد:-بهاي الايد ضربك مو هاي لو ثانيه
منتظر:-احمد لا فدوه اروحلك لااا
احمد:-منتظر وخرر
منتظر:-ماريد اخسرك أنتَ هم
-حجه هالـ جمله وتراجع لورا تركت مؤمل وسحبت منتظر غسلتله ودخلنا للغرفه بقينى بيها لحد اذان المغرب ساكتين واحد ما يحجي ويا الثاني.
منتظر:-احمد
احمد:-ها
منتظر:-لا تتركني
احمد:-ما اعوفك روحي من الدنيا أنتَ بس واحد حاجي وياك شي سولفلي
- نكر وارتبك.
منتظر:-لا ولا حدا تكلم معي
احمد:-نظر عيني اعرفك احجيلي
منتظر:-شو بدك احكي
احمد:-بكيفك احجيلي كلشي
منتظر:-تمام شوف من رحت تشتريلنا شافني سيف وكالي ابوي بعد ما يرجع وراح نصير خدم وذا ما اسمع كلامهم راح يقتلونك
- ضحكت عليه وعلى عقلة،ضربته على راسة بخفه وحجيت.
احمد:- تحجي صدك ولك
منتظر:-والله شبيك
احمد:-لك بابا جذابين فد شله نافخه روحها على الفارغ وأنتَ لا تصدك بشي فهمت اذا صار كلام كولي وأنا اتأكد وصير قوي باجر عكبه اطلع واعوفك بالبيت شلون ضل خاتل وما تاخذ حقك
منتظر:-وين تطلع ولك ليش تعوفني
احمد:-ولك غبي قصدي اطلع اشوف شغل اشتغل تبقى وحدك بالبيت
منتظر:-اطلع اشتغل وياك
احمد:-نجب يمعود خل يرجع ابوي علمود يرجعك لدوام
منتظر:-وأنتَ
احمد:-ماعرف
منتظر:-خاب انجب تدرس وياي وتاكل تتن
احمد:-هههه ولك طولان لسانك الخواف
منتظر:-مو خواف بس معتمد عليك
احمد:-ههههه لا تعتمد عليه ما دوملك
منتظر:-خاب دروح
احمد:-صاير تحجي عراقي وبجداره منين
منتظر:-اتسنط عليهم واسمع حجيهم تعود
احمد:-ههه سبع اخوي
- ضحكنا نشاقة دخلت بنت عمتي.
لطيفه:-نزلو ابوكم اجه
منتظر:-شعجب
لطيفه:-رجع زوجته الاولى خاله بتول وراح ترحون ويا لبيتكم خاله منتظرتكم
- رد عليها ورجع سحبني.
منتظر:-تمام هسه نجي، احمد كوم يلا
-بدون وعي طلعت مني حجاية تقتصر كل هاي السنين
احمد:-طفت روحي بروحتها وهسه ردت
منتظر:-لخاطري
- نزلنا وشفنه ابوي كاعد كال
فيصل:-هلا اولادي تعالو
منتظر:-هلا بيك
فيصل:-يلا جا نترخص نروح امكم بالبيت تنتظركم
:-هزينه بروسنا بـ أي وطلعنا من البيت ورحنه لبيت ثاني كان فخم من الخارج دخلنا واستقبلتنا أمي ايي شفتها بعد كل هالسنين بعد 10سنوات شفتها ما رفلي جفن ولا تحركت مشاعر الاشتياق تجاه بينما هي حاولت تبين قبولها لـاخوي منتظر كالت بأشمأزاز
بتول:-هو هذا ابن المغربيه
فيصل:-اي هو
بتول:-اممم زين
فيصل:-لا تفرقين بتول لا تعرفين شيصير
بتول:-يصير خير
:-حجيت بنبره حاده وجاده وأنا الزم ايد منتظر الي تعز بخاطره كلمه ابن المغربيه اخلي حد الها لان اذا نسكت راح تطين عيشتنا أمي واعرفها.
أحمد:- الي ما يرحب بي ما اعتبره موجود مهما كانت مكانته بحياتي اخوي اولى من الكل هنا
- صفنوا على كلامي سحبته ورحنه للغرفه
منتظر:-وش اتكلم
احمد:-تكلم الي تبي مش مهم
منتظر:-احس العراقي مرتب
احمد:-اي مثلا مانكول تكلم وخلصنا نكول احجي وفضها
منتظر:-ههههه شنو يعني فضها
احمد:-يعني خلص بسرعه
منتظر:-زين والله كلمتين
احمد:-هههه شفت
- هيج بدأءة حياتنا مرا ثانيه أمي ما تقبلت وجودنا الا بعد ما ولدت سميه وسماها أبوي هيج على اسم جدتي الي توفت قبل ولادتها بـ45يوم وبعد سميه نورت ميلدا وكان سبب تسميتها على اسم أم منتظر بعد ولادتهن قدرنا نتحكم ونسيطر على كلشي بالعراق منتظر صار اقوه ويكدر يدافع عن نفسه اكثر بالمشاكل صار مسؤول عن نفسه اكثر كملنا دراسه وما حصلنا تعيين حصلت شغل خارج المحافظه وهو وي أبوي بالاسواق
فزيت من افكاري وذكرياتي من منتظر عاد على مسامعي الكلمه الي يكره
منتظر:-ابن المغربيه
ا-افتريت عليه فاز وفاتح عيوني على وسعهن
أحمد:- شذكرك بيها هسه
منتظر:-تتوقع ارجع اشوفها احس ماعرف
احمد:-بكيفك اذا تريد ادورلك عليها وتشوفها
منتظر:-اصلي ما تغير ابقى ابن المغربيه
احمد:-ماتغير بس أنتَ تغيرت تذكر بيوم المحكمه شكتلي عليها
منتظر:-اذكر وذكر ضربتها الي ما نكسر خاطرها وكالت هاذا ابني
احمد:-لحضه لحضه يمته ضاربتك ليش ماكتلي
- غرگن عيونه بالدموع مسحهن بسرعه وكال
منتظر:-هيج مو مهم يخوي عادي تبقى أم
-سحبته لحضني احس روحي احتركت عمري ماخليت احد يلمسه يطلع مضروب من وراي وين جنت انا وشجنت اسوي!
اندارت ميلدا علينا.
ميلدا:-اوييي شنو هاي لعد أنا وين
- ضحك منتظر رد عليها
منتظر:-بروحنا انتن
ميلدا:-ياروحي
- اندارت سميه همينه
سميه:-اكللكم شبابات
احمد:-طيح الله حظج كولي
سميه:-عود هاي مغرب حلوه تنكول تنشرب
- ضحك منتظر عليها يحب يضوجها
منتظر:-بربك هي هاي خلقة وحده تروح للمغرب
سميه:-اوي دادا شبيكم
منتظر:-سلامتج بويه
ميلدا:-اشو ضجت يمته نوصل
احمد:-بعد 5ساعات
- هفهفت بتذمر وتعب ، حجت
ميلدا:-هفففف تعبت عبالي الطيارة فد شي حلو طلعت ملل بملل
سميه:- اي والله لو ضالة على رزايل امي ببيتنا ولا جايه
-ضحكنا عليهن وحجه منتظر يغير من جوهن
منتظر:-نلعب
ميلدا:-يلا بس لعبه حلوه
سميه:-صراحه وتحدي
منتظر:-وين نكدر نسوي تحديات اهنا
سميه:-لعد بس صراحه
منتظر:-يلا هم خوش
احمد:-جهال انتو
منتظر:-اخذنا على كد عقلنا وتعال ويانا
احمد:-هههه يلا
ميلدا:-حلو يلا
منتظر:-سؤالي لـ ميمي
ميلدا:-يمهه شبيك وياي
منتظر:-هيج اخبث
ميلدا:-عابت يلا
منتظر:-منو اكثر شخص تحبينه بينا وليش وشرط جاوبين بصراحه الي ميجاوب بصراحه الله يذبه بالنار
ميلدا:-هههه ذنوبي قليله
منتظر:-علويتنا يلا
ميلدا:-حبيت هاذا القب صدك احنه ساده لو عاميه
احمد:-ساده محد كالج
ميلدا:-عزااا والله مادري
منتظر:-أنا الغريب بينكم
احمد:-منتظر بلا تمسلت
- حجت سميه بأستغراب من المواقف
سميه:-لحضه ليش هيج كلت شتقصد وليش أنتَ سكته شنو شكو صاير من ورانا؟
احمد:-ماكو شي ابويه ابدوا لعبو يلا
منتظر:-اي يلا عليوتنا جاوبي
ميلدا:-ماعرف كلكم احبكم بس كل واحد اله حب خاص
منتظر:-تمام ليش
ميلدا:-بس الحجي بينه ما يوصل لامي وابوي
احمد:-افا عليج اشكين بينه
ميلدا:-لا والله مو شك بس هيج
منتظر:-من عيونه ياروحنه
ميلدا:-فدوه اروحلكم باعو احمد احبه كلش هواي احسه ابوي والله اكو اشياء المفروض ولازم على ابوي الي يسويها بس لا ولا حتى كلمه حلوه منه مرات صح بس احس مصلحه ورا هالكلمه اما أنتَ أنتَ صديقي واخوي وما تفرق عن احمد بشي بس شويونه وهم كلش هواي احبك وسمسم هي اختي فرق قليل بينه بس كانت الي أم كدرت افضفضلها واحجيلها مشاكلي بدون خوف
-ابتسم أحمد لكلامها.
احمد:-حبيبت روحي ليش تخافين تحجيلنا وتفضفضيلنا
ميلدا:-لاا مو خوف تدري أن مرات اخاف اكون وي امي وابوي بينما من اكون وياكم كل الامان بس انتم شغل وترجعون تعبانين ماحب اضوجكم بسوالفي
-ضحك منتظر عليها ورد
منتظر:-خبله أنتِ فدوه يروحلجن كل التعب
-مدة سميه ايدها كرصة خد منتظر تشاقي
سميه:-اوييي ترا ماتحمل أنا
احمد:-ولج سمسم بويه اعقلي شوية
سميه:-ياروحها لسمسم أنتَ ياخي والله حلوه منكم كلمة بويه وابويه وبابا احس دكولونها من خاطركم صدك
ميلدا:-اي والله لو من يحضنونه بحنان دوم
احمد:-هههه حبيباتي شعدنا غيرجن
ميلدا:-نكمل لعب
منتظر:-هالمره سميه خل تسأل
سميه:-هسه حبيبي عفيه
منتظر:-ههه يلا
سميه:-سؤال الكم اكثر كلمه تضوجون منها وتكرهونها
احمد:-ماكو كلمه معينه بس اضوج من الجذب والي يحجي شكلين
منتظر:-ابن المغربيه و مامنك فائده لو شماتسوي تبقى جبان
احمد:-عفواً منو كلك هيج امسحه بالكاع
منتظر:-مو مهم
احمد:-ابويه احجي منو وليش
منتظر:-اكو غيره مثلا
احمد:-ابوي؟
منتظر:-اي ابوي
احمد:-ليش بلا؟
منتظر:-يوميه هيج يحجي لأن صارت مشكله كدام المحل وكال روح شوفهم وفكهم كتله ناس تتعارك شعلينا بيهم وضل يحجي هيج
ميلدا:-معليك حبيبي أنتَ عدنا بطل شعليك بأبويه بعد
منتظر:-اي شعليه
سميه:-زين هي عرفنه سالفتها شنو ابن المغربيه
احمد:-ماكو شي بناتي ديرو وجهكم ارتاحو بعد شوي نوصل
ميلدا:-ليش ضمون علينا سوالفكم
منتظر:-ماكو شي من نوصل ونرتاح نسولفلكم ليش هيج يسموني ولليوم
سميه:-اسفه والله ماعبالي هالكد ضوج من ذكرتهن
-تقدم شوية باسني براسي
منتظر:- لا يروح اخوج ماسويت شي ولا ضجت اضوج من احجايه شكو شايفتني خبل مثل ميميه
ميلدا:-اي كلش گبل گلبتو السالفه علمود ما تبينون شي شكد لوتيه
احمد:-شكد احبكم
سميه:-غصباً عليك
احمد:-دخل نوصل وأنا اعلمج
ميلدا:-اتفق صدك
- ضحكنه درنا وجهنه عنهم كأنو نريد نشرد من الحچي أو يمكن من المعنى اللي وراه.
بقيت أفكر بكل كلمة انحچت، بكل نظرة وبسؤال واحد يدور براسي.
ليش يحچون بهالشكل؟ وليش حاسه أكو شي ضامينه علينا؟
مر الوقت ببطء ثگيل، ممل، وكل دقيقة أطول من اللي قبلها
لحد ما وصلنا.
الساعة جانت تقريباً بالـ7 بالليل بتوقيت العراق.
نزلنا والجو بارد شويه، والشارع شبه هادي.
چان أكو سائق منتظرنا واگف يم سيارة شكله يعرفهم زين.
ما حچينا هواي، بس صعدنا الجنط وسكتنا
حتى الطريق، ساكتين بدون اي سؤال.
السيارة مشت نص ساعة تقريباً
لا صوت غير صوت الماطور وأنفاسنا الثگيلة.
لحد ما وكفنا، نزلنا، وگدامنا كان بيت
كبير فخم مو فخامة عادية لا فخامة غريبة كأنما مو من هالمكان أصلًا.
أكبر بيت بالمنطقة تقريباً بس الغريب مو حجمه الغريب الإحساس اللي يطلع منه.
أنا وسميه تبادلنا نظرات دهشة، تعجب، وخوف ما نكدر نفسره.
بينما أحمد ومنتظر وأمي كانوا طبيعيين جداً
طبيعيين زيادة عن اللزوم.
هنا فضولي بدا يكبر
وحسيت إنو أكو شي مو طبيعي والي زاد فضولي سؤال منتظر لـ ابوي
منتظر:-نفسه ما غيرته؟
فيصل:-اي نفسه وين اغيره مثلا بيت مناسب ومنطقه كل الخدمات متوفره بيها
- ضحك أحمد على كلامه وسأل.
احمد:-ههههه عاد غيرت الغرف لا؟
فيصل:-لا ماغيرت شي بي نفس ماهو
-حجت أمي بطريقة غريبة.
بتول:-البيت المشئوم والمغربيه الشينه
- حجه أحمد يدارك الموضوع كدامنا
احمد:-ديلا افتحه البنات كلش تعبانات خل يرتاحن
فيصل:-همك البنات لو تريد تسترجع ذكرياتك أنتَ واخوك
منتظر:-جنه صغار ماكو ذكريات مهمه البنات منا لضلون تحجون
- شمر المفاتيح على أحمد واندار علينا
فيصل:-يلا حبيباتي دخلن ارتاحن وراح اجيب عشه من المطعم
سميه:-بس كون اكل طيب
فيصل:-من عيوني طيب طيب
- حجه أحمد بحزم وملامحة أبداً مو طبيعيه غضب على قهر ملامح ابد ما تتفسر
احمد:-دخلن ارتاحن كافي
ميلدا:-تمام
- دخلنا نتمشى بالبيت ونستكشفه من جوه وكل خطوة نخطيها كانت تبين أكثر شكد المكان مرتب ومرتب بطريقة غريبة حلو بس مو بس حلو كأنو محسوب بكل تفصيلة.
البيت مكون من طابقين
الطابق الأول بيه صالتين، وحدة اكبر من الثانية وغرفة نوم للضيوف وديوان مرتب بشكل رسمي وغرفتين نوم وحمامات موزعة ومطبخ چبير حار وبارد وياه مكان مخصص للأكل كلشي جاهز من زمان وينتظر أحد يرجعله.
أما الطابق الثاني جان هادء بكل تفاصيلة بس جان بي إحساسه أثگل يكبد على الروح.
مكون من أربع غرف نوم وصالة بوسطهن وحمامات ومطبخ صغير وباب يودي للسطح
والسطح بيه گعدة مرتبة بشكل ملفت كأنما مسوية حتى تنعاش مو بس ينگعد بيها.
كلشي كان مثالي زيادة عن اللزوم وهذا الشي بحد ذاته جان مريب ويخوف.
قررنا نفتح وحدة من الغرف نشوفهن.
الباب فتح بسهولة، بس اللي جوه خلانا نوگف لحظة صافنين بيها
غرفة ولادية ألوانها ولادية فاتحة مليانة ألعاب وشخصيات كارتونية بكل مكان تخص الاولاد
كلشي بيها يدل إنو اكووطفل جان عايش هنا.
أنا وسميه تبادلنا نظرة سريعة وحدة صفنت بوجه الثانية ونفس السؤال بالنا
منو جان هنا؟ وليش ماكو أحد بعد؟
سرعان ما اجا أحمد وبسرعة سد باب الغرفة
احمد:-هاي سدنها لا تفتحنها وهاي غرفه سميه وهاي غرفه ميلدا
- استغربنه من تصرفهم وارتباكهم والغرف الي اشرلنا عليهن كانً عاديات جداً وما بيهن شي مميز ونفس التصميم وبيهن اسره لنفرين
حجت سميه بتوتر.
سميه:-اريد انا وميمي سوه
احمد:-خوش حا اختارن غرفه براحجن
- اشر منتظر على وحدة من الغرف بابها مسدود
منتظر:-اخذن هاي جبيره وترتاحن بيها حتى اثاثها جبير وكنتورها جبير ياخذ ملابسجن كلها
- ما حجينا شي بس رحنا على الغرفة دخلنا نرتبها النا.
ميلدا:- شنو ديصير وياهم
سميه:-ماعرف بس مبين شي جبير لازم نعرف همه مو اخوانه لازم نعرف ونساعدهم
ميلدا:-اتفق بس شلون
سميه:-معرف
- سمعنا صوت منتظر وهو يصيحنا.
منتظر:-حبيباتي تعالن تعشن
ميلدا:-امشي خل نسايرهم لمن الله يفرجها
- هزت سميه راسها، ونزلنا نتعشه
الساعة جانت تقريباً 8:30
والجو كله هدوء مو مريح جن زيادة عن اللزوم وراح يصير شي.
أكلنا بهدوء حتى الحچي جان قليل كل واحد مشغول بفكره.
خلصنا العشه وگمنا نغسل المواعين، وصوت الماي جان الوحيد اللي ينسمع بالمطبخ.
فجأة اندگ باب البيت بشكل قوي
وگفنا لحظة كلشي هدء حتى صوت الماي.
أبوي طلع بسرعة وراح يفتح ما طول
وبسرعة سمعنا صوت مرة داخل نص البيت.
صوتها غريب مو من هنا.
لهجتها من البلد هذا.
وگفت بمكانها تحچي بحرگة وتصيح
:- فين هو ولدي؟ بغيت نشوفو دابا!
-وگف ابوي كدامها يحجي بحده وصاك سنونه جن ضامله سر وخايف ينفضح
فيصل:- ميلدا خرجي من هنا ما عنديك ولد هين
- رفضت وحجت تصيح
ميلدا:- لا ما اخرجش حتى اشوف ولدي وامشي بيه معايا.
- تقدم أحمد شوية، ملامحه ما تتفسر، صاح عليها بعصبية يحجي مثلها
أحمد:-شنو بغيتي منو دابا؟ من بعد هاد السنين كاملة؟حتى نهار المحكمة ما جا فخاطرك؟ شنو كنتي تقولي عليه؟؟
- سكتت لحظة، صفنت عليه وعيونها تفتر بين أحمد ومنتظر.
ميلدا: أنتَ أحمد صح؟
أحمد: إي، أنا هو.
-رجعت عيونها على منتظر وحجت
ميلدا: يعني هادا هو؟هادا ولدي منتظر؟
-صافنين ما نعرف شديصير تراجع منتظر بخطوات ثقيله جداً ولزم ايد أحمد يرجف خايف وحجه مثلهم
منتظر:- شنو بغيتي مني دابا؟ رجعتي من بعد هاد السنين كاملين؟ لا سولتِي عليا، لا حتى تفكرتيني أنا نسيتك، خلّيني فحالي.
ميلدا:- ولدي يا فحلي، أنا مك كيفاش تبغي مني اخليك؟
- افجر يحجي بعصبية لدرجة عروگه ضهرت
منتظر: لا ماشي امي، امي ماتت من سنين
نهار المحكمة ما تفكرتيش؟
نهار هددتيني ما تفكرتيش؟
نهار ضربتيني ما تفكرتيش؟
نهار مشيتي مع داك الراجل ما تفكرتيش؟
ماشي امي خليني وخرجي!
- حجت بخبث واضح عليها.
ميلدا: ولدي غادي تندم من بعدي
- تدخل أحمد ورد عليها
أحمد: وانت ما ندمتيش؟ علاش جيتي دابا؟
علاش ما سولتِيش عليه هاد السنين؟
كيفاش بغيتيه يتقبلك، وانت خليتيه وهو صغير ومحتاجك؟ فين كنتي؟
ميلدا: كنت عارفة باللي عندو اخو غادي يهتم بيه ويوقف معاه
- هز راسه ورد ببرود
أحمد: إيوا زين دابا خليه فحالو، كيفما خليتيه قبل.
- رجع حجه منتظر يرجف وخايف اول مرا نشوفة هيج
منتظر: صافي قولي ليا، شنو بغيتي بالضبط علاش جيتي دابا؟
-ابتسمت على امل بي وبكلامة.
ميلدا:- جيت اشوفك وارجعك معايا دابا انت كبرت وتفهم وتعرف انك محتاجني
- ضحك ضحكة خفيفة وحجه
منتظر: جيتي تشوفيني ودابا شفتي تقدري تمشي ماشي ضروري تبقي هنا.
-حجه هيج وصعد يركض حجه أحمد
احمد:- بنات روحو ورا ابقوا يمه هسه اجي وراكم
-صعدنا شوية وهي صاحت ورانا
ميلدا: فينك اولدي فين مشيت؟
أحمد: صافي سيري فحالك دابا.
- مشت للباب ورجعت اندارت نظرات خبيثة حجت.
ميلدا: صافي غاد امشي ولكن غاد تندموا والله.
-رد احمد ببرود.
أحمد: إيوا سيري الله يسهلك.
- طلعت وهي متنرفزه، وخطواتها تضرب بالكاع بقوة
البيت رجع هدوء، مو مثل قبل.
ما كدرت أتحمل، صعدت فوگ كلبي يدگ بسرعة، وكأنو أعرف وين راح ألكاه.
فتحت الباب بهدوء ولكيته كاعد بغرفتنه القديمة.
نفس الغرفة نفس المكان بس مو نفس الإحساس الاول النا
جان كاعد ويبجي، بجي مكبود من سنين طالع مره وحدة هسه
والبنات واگفات بعيد ساكتات
عيونهن غرگانة دموع تايهات مثلنا ما يعرفن شيسون ولا حتى شنو صاير.
دخلت عليه
مجرد ما شافني گام بسرعة حضني بقوة وكأنو يخاف أختفي من ضهره
وزاد بالبجي أكثر وأكثر، ما گلت شي بس خليته يطلع كل اللي بداخله
بعد دقايق رفع راسه، عيونه حمر، ونفسه متقطع.
دارت عيونه على البنات نظرة وحدة جانت كافية
فتح إيديه إلهم بدون حچي وكأنما يطلبهم أو يعتذر بدون كلام.
ركضن له بسرعة حضنهن بقوة وصار يبوس روسهن وحدة وحدة
ظل هيچ لحد ما هدء شويه
والغرفة كلها صارت متروسة مشاعر
ما تنفهم، بس تنحس.
حجه مختنگ.
منتظر:-روحن نامن هسه كافي
- ردت سميه ما راضية
سميه:-ماااا، نام سوه حرام عليكم هيج تخوفونه عليكم وحرام عليكم ضمون علينا ليش احنه مو خواتكم معقوله ما تحبونه لهدرجه مو احنه نحجيلكم كلشي ليش ما تحجولنا اذا ماتثقون بينه كولوا
- صفنت عليهن وحجت ميلدا تأكد كلامها
ميلدا:-صدك والله يعني ماتثقون بينه لو ماتعتبونه شي مهم حتى تسولفولنا؟؟
احمد:-لا يا ابويه مو هيج روحنه من الدنيا بس مو مهم الموضوع هالكد
-حجه منتظر وهو يمسح وجه بحيرة وتعب
منتظر:-احجيلهن لا تضم عليهن اكثر خاف بعدين يعرفن وحدهن يكرهني
- ردت سميه عليه بدون تفكير منها رد سريع
سميه:-مع احترامي الك بس انجب شنو نكرهك غيى اخونا؟
منتظر:-تكرهني والله
ميلدا:-والله مانكرهك
منتظر:-خوش جا احجي أنتَ احسن
-زفر نفس بحسره مسح وجه وبدء يحجي.
أحمد: ابوي جان مزوج ثلاث نسوان امي بتول الي اصلها من العراق وميلدا وسهيله هذول جانن مغربيات تزوجهن بعد زواجه من امي بسنتين جان عمري سنتين تقريباً بعد ثلاث سنوات ولدت ميلدا منتظر وجان اكو مشكله بين امي وابوي أدت الى ان امي عافتنا ورجعت العراق وعافتني وحدي وي ابوي ونسوانه جان الدلال والسعاده لـ منتظر بينما جانت حصتي الضرب والهانه والسب جان الشي الوحيد الي ردته ان منتظر يعيش حياته بكل سعاده
ودام هالشي الى يوم صارت مشكله بين ابوي ونسوانه وكذالك أدت الى انفصل ابوي ونسوانه وبحكم منتظر جان عمره يسمح يختار احد الطرفين امه هددته حتى لا يختارها وضربته واختار ابوي حتى يبقى وياي وجان معتمد عليه بكلشي خلصت الإجراءات ورجعنا مباشرةً للعراق ليم عمامي بقينى اسبوع واحنه على مذله بين ولد عمامي وجانو يتقصدون يصيحوله منتظر بـ أبن المغربيه حتى يحسسونه بالغربه والتفرقه وبعد هالسبوع اجه ابوي واخذنه وجان مرجع امي بتول الي الى الان ما تطيقني ودائماً ما تعيد على مسامعي جملة "أنتَ غلطه لو ما أنتَ جان هسه أنا بمكان احسن" وبدأة تبين قبولها لـ منتظر من نولدت سميه واسمها على اسم جدتي الي توفت قبل ولادتها بـ45 يوم وبعدها ميلدا واسمها على اسم امه الي دخلت علينا مساع وهاي هي السالفه ورا جمله ابن المغربيه والمرا الي دخلتلنا وخوف منتظر كل هالسنين
ميلدا:-ليش سميتوني على اسمها
احمد:-منتظر الي سماج ومجان يعرف أنُ اسم امه
ميلدا:-يصير اغيره هسه
منتظر:-نجبي
- حجت سميه بأريحيه وطمأنينه لمنتظر
سميه:-والله يا حبيبي مدري شنكول بس نكول تبقى اخونه مهما يصير ولا هيج مواضيع تافه تغيرنه عليك وتكرهنه بيك عبالي مسويلك سواية قوية تستاهل نكرهك هنياليي اي والله
-ابتسم منتظر راضي ومرتاح
منتظر:-روحي انتن
احمد:-وأنا طرطور
منتظر:-ههههه لا أنتَ عمري
ميلدا:-اكللكم
:-كولي
ميلدا:-والله بيها سهرة تنمر
سميه:-استحيت اكللكم والله
احمد:-طيح الله حظجن
سميه:-اوي دادا عود ردنا نرفه عنكم دروحو مو صوجكم
منتظر:-مو صوجنه مو دتعالي
سميه:-يمههههه لا فدوه
-كامت سميه تركض ومنتظر يركض وراها وأنا اصيح عليه
ميلدا:- اي الزمها وكتلها حيل اخذت ملابسيي الجديدة
احمد:-ههههههه مصلحه مصلحه
ميلدا:-دخل يكتلهاا
-صاحت سميه عليه من بعيد وهي تركض تشرد منه
سميه:-يا حسافه بيج الحذاء الاخذتيها تعوفيني انكتل
-وكف منتظر يلهث ويحجي مبتسم
منتظر:-ياو ياو شبيجن تتعاركن على حذاء باجر نروح ونجيبلجن
ميلدا:-صدك تعرفون اماكن حلوه اهنا
احمد:-اندل كم مكان بس اتأكد منهن لا نضيع
سميه:-اي هم صج
منتظر:-واييي شفيج
سميه:-شلون يكولون أنا مغربيه
احمد:-هههه لا ياثوله هي نفسها
منتظر:-خيولن مايعرفن
ميلدا:-علمونه انتو فدوه
منتظر:-والله أنا يرادلي تعليم من جديد ناسيها على كد ماجنت الغث عراقي
احمد:-عشتووو شعلم هسه أنا
سميه:-اي علمنا كلنا
احمد:-دكومو عني خل انطمر احسن
ميلدا:-دنطمر منو لازمك نظوري حبيبي يعلمنه
منتظر:-بت الحباب أنا ناسي شلون احجي بيها
سميه:-اهوو شلون هسه
ميلدا:-دكومي نتعلم من الناس احسن
سميه:-اي يلا
احمد:-ههههه يلا طفن الضوء وياجن
ميلدا:-صارر
طلعنا من يمهم جانت الساعه بـ11 بليل جنه تعبانين كلش بسرعه نمنه
فزينه على صوت طرق على شباك غرفتنه بقوه وجانت الاضويه طافيه فتحنه الاضويه وجانت الساعه بـ3الفجر ارتبكنا وخفنه حيل بدون تفكير رحنا لـ احمد ومنتظر رحنه ركض جانو نايمين كعدناهم وكعدو يفركون بعيونهم نعسانين كلش
احمد:-شبيجن
سميه:-اكو ضرب قوي على شباك غرفتنه
منتظر:-جا مو احنه اهناا وين اكو صوت
سميه:-والله والله كلش قوي الضرب
احمد:-خوش خوش هسه نشوف تعالن
- حجت صوتي يرجف من الخوف
ميلدا:-ما والله اخاف
منتظر:-ميمي ابويه احنه وياج
-اكتفيت بهز راسي ورحنه اربعتنه للغرفه فتحوا الشباك وما لكوا اي شي بس جان هوى عالي
احمد:-ماكو شي حبيباتي هاذا من الهوى العالي
سميه:-والله جان اكو ضرب والله مو هوى والله
منتظر:-خوش ياروحي ولا يهمجن الصبح نشوف شكو تعالن يمنه نامن
احمد:-لا تخافن ياعيون احنه يمجن
- هزينا راسنا وما جذبنه خبر رحنا نمنه يمهم فزينه على صوت الاذان بجهاز ميلدا الساعه بـ5:15الفجر كمنه توضينه وصلينا جماعه وكعدنا نقرا دعاء العهد زيارة عاشوراء وسوره النور خلصنا وكعدنا نسبح
حجت ميلدا بحسره وعيونها كلها دموع
ميلدا:-طلعنا من العراق وانا ما زايره الامام علي واولاده عليهم السلام
-سحب احمد ايدها باسها ورد عليها
احمد:-ان شاءلله خير ياروحي ولا يهمج انتظري فتره وأنا ارتب الوضع ونروح نزور ونبات يمهم
ميلدا:-صدك
احمد:-والله يهونلكم كلشي بروحي تدللون
منتظر:-شكد احبك
احمد:-حبيبي شعدي غيركم
-لمينه المصلايات وكعدنا سوه نسولف.
سميه:-لو ما جان اسمي سميه شنو حيكون
احمد:-جان بالي اسميج ملك وكلت اذا تجي بعد بنيه نسميها ملاك
سميه:-والله يا جدتي ما لحكت عليج ماكدر احجي
منتظر:-ههههه طاحضج والله لو ملحكه عليج دللج
ميلدا:-يعني هيه دللتكم؟
احمد:-لا بس نشوفه تدلل ولد وبنات عمامنه
ميلدا:-اذا ما دللتكم دللنا شو دسكتوا
منتظر:-ههههه
-ضحكنه براحة، ضحكة خلتنا للحظة ننسى كلشي مرينا بينا، وكأن الدنيا رجعت بسيطة مثل قبل
جنه متجمعين بشكل حلو والگعدة دافيه واللي زادها حلا وأمان النا وجود أحمد بينا هذاك اللي صار سند إلنا وشال فوگ عمره هواي وكبر قبل وكته وهو بعده ببداية شبابه.
بهاللحظة ما جان يهمنا شي لا خوف، ولا تعب، ولا حتى الأسئلة اللي ظلت تدور براسنا بس نضحك ونحاول نعيش هدوء يمكن جان غريب شوية بس محد انتبه له
يمكن لأنو جنه محتاجين هالراحة محتاجين نصدگ إنو كلشي بخير
بس ما كنا نعرف إنو هالضحكة
جانت ضامتلنا وراها شي أكبر وشي راح يغير كلشي بين ليلة وضحاها...🦂
