اسكريبت عدلي وزوجاته الاربعة كامل وحصري
في قصر كبير
في حديقة القصر
كانوا قاعدين تلات ستات ، اتنين يعملوا كحك العيد و واحدة قاعدة بعيد تعمل ضوافرها ،و العيال حواليهم تعمل بومب و صاورخ
سالي بكبرياء: على فكرة في اختراع اسمه اننا نشتري جاهز بدل العك ده
بصت رحمة عليها باستغراب وقالت: هو فين العك يا بنت الباشا
سالي: لو سمحتي يا رحمة بلاش اسلوب الكلام ده
رحمة: مالوا اسلوب الكلام يا ياختي
سالي: مش هضيع وقتي في الكلام معاكي،براحتك انتي بتحبي التعب و الممرطة
رحمة: احسن برضو اسكتي خالص.
كانت جهاد تسمع كلامهم و تضحك بصوت عالي
رحمة: ربنا يفرحك يا جوجو
جهاد: تسلمي يا رحمة
سالي: عايزة اتكلم معاكم في موضوع مهم.
ضحكت رحمة و قالت: كان غيرك اشطر يا سوسو
نفخت سالي و قالت: بلاش احباط خلينا نحاول
رحمة: اسالني انا حاولت قبلك ابوظ الموضوع مرتين
جهاد: و النتيجة كانت ايه.
شاورت رحمة على سالي و جهاد، و ردت عليها::النتيجة قدمك اهي، جوزي اتجوز عليا و أنا لسه الحنة في أيدي
سالي بغرور: غبية اوي يا جهاد، تسالي على النتيجة و انا و انتي موجودين.
جهاد بعصبية: احترمي نفسك يا سالي
سالي: وطي صوتك ،الصوت العالي دليل على الضعف
علت جهاد صوتها اكتر و هي بتقول: جرا ايه يا سالي ،هي مين اللي ضعيفة، لمي نفسك يا اختي احسن لك
سالي ببرود: ارفعي صوتك اكتر و اكتر ،انا كده كده عارفة انك ضعيفة
رحمة كانت بتعمل الكحك و هي بتفرج عليهم كأنهم مسلسل كوميدي.
جهاد بتهديد: عارفة لو فضلتي تتكلمي كده، هقوم اجيبك من شعرك
رجعت سالي شعرها لورا و قالت::اياك تقربي من شعري ده مصروف عليه كتير
لمعت عين جهاد بشر، و تبص على أيدها اللي مليانة عجين و سمن و قامت من مكانها و هي بتقول بطريقة كوميدية: أكلك منين يا بطة، أكلك منين ،تعالي يا سوسو.
قامت سالي من مكانها بخوف و قالت: بلاش يا جهاد لو سمحتي بلاش.
جهاد: ما شاء الله الادب ظهر عليكي دلوقتي ،مودبة اوي.
خلصت جهاد جملتها و جريت ناحية سالي، و سالي جريت بخوف و هي تقول: خليها تسكت يا رحمة
رحمة: و أنا مالي ،انا بتفرج بس.
سالي تجري و هي تصرخ و جهاد وراءها بتضحك عليها..
أما رحمة ابتسمت بحزن و هي بتفكر في عدلي.
قربت بنتها منها و بتقول: ماما
رحمة: نعم يا يارا
يارا: عايزة اعمل معاكي يا ماما
رحمة: انا مبحبش حد يلعب في العجين
يارا: يا ماما أنا كبيرة و عندي ١٥ سنة ، يعني مش صغيرة.
رحمة: مين دي اللي صغيرة ،انتي ما شاء الله عليكي عروسة قمر.
يارا: طيب أساعدك بقي
رحمة: ماشي
يارا: مش هتفصلي بين طنط سالي و جهاد
رحمة: هما كده في الأربعة و عشرين ساعة مش بيبطلوا خناق
يارا: عايزة أسألك سؤال يا ماما.
رحمة: قولي يا قلبي
يارا: هو أنا لو جالي عريس متجوز قبل كده، ممكن توفقي
انصدمت رحمة من الكلام و ملقتش رد على بنتها ،بس ردت على نفسها: انا لا مش هقبل بنتي تعيش نفس اللي عشيته اكيد هرفض.
//////////
أما جهاد كانت وقعت سالي على الأرض و ماسكها من شعرها بغل، و هي بتقول: أنا قولتك بلاش انا يا سالي، ابعدي عني يا بنت الباشا .
سالي بصرخة: سيبي شعري يا مجنونة
جهاد: بطلي قلة اداب علشان اسيبك أو اقطع شعرك في أيدي.
زقتها سالي و قامت من على الأرض و هي بتقول: انتي غبية و مجنونة و متخلفة، شايفة عملتي في شعري ايه.
جهاد: تصدقي لسانك عايز يتقطع
سالي : بنتكلم في موضوع مهم و في المصيبة الجديدة و انتي ماسكة فيا انا.
جهاد بحزن: على رأي رحمة مهما عملنا أو فكرنا مش هيحصل حاجة، رحمة حاولت تمنع عدلي يتجوزني ، و أنا و هي حاولنا نمنع عدلي يتجوزك، و برضو مفيش فايدة ،يبقي ريحي نفسك يا سالي
نزلت دموع سالي و قالت: انا مش قادرة اتحمل يا جهاد،مقدرش اشوف واحدة تانية جنبه.
طبطت جهاد علي كتفها و قالت: معلش هي علشان أول مرة .
سالي: انا اطلع اخد حمام و لما انزل لازم نتكلم
جهاد : و أنا هروح اساعد رحمة، و الكلام مفيش منه فايدة.
طلعت سالي اوضتها و رجعت جهاد عند رحمة
جهاد بغناء: الليلة عيد، الليلة عيد
اتلم الأولاد عليها و بدوا يغنوا وويرقصوا
////////////
على اذان المغرب
قعد عدلي و حواليه زوجاته التلاتة رحمة و جهاد و سالي، و ولاده، يارا ١٥ سنة و عمر ١٢ سنة ولاد رحمة
و شهد و شادي ولاد جهاد( تؤام ١٠ سنين)
و كنزي بنت سالي ٥ سنين.
عدلي: كل سنة و أنتم طبيبين
رحمة: و انت طيب و بخير يا اخويا.
جهاد بسخرية:أن شاء الله السنة الجاية تكون العروسة الجديدة معانا.
عدلي: مش هنستنا للسنة الجاية، العيد الكبير هتكون وسطكم
سالي بعصبية و غيرة: انا مش موافقة على الجوزة دي.
عدلي: اتكلمي بهدوء يا سالي، العيال قاعدين
سالي: و أنت فارق معاك حاجة
خبط عدلي على الترابيزة و قال بصوت عالي: بلاش الطريقة دي و لاول و اخر مرة أحذرك ،اقفلي بوقك يا سالي
رحمة::خالص يا سالي خلينا نفطر بهدوء
سالي قامت من السفرة و طلعت على اوضتها
جهاد: تعالي افطري يا سالي
عدلي: سيبك منها ،اللي ياكل على ضرسه ينفع نفسه.
رحمة: معلش يا اخويا أصلها مخدتش مانعة
عدلي: اتكلمي معها يا رحمة انتي العاقلة اللي فيهم.
رحمة: لازم اكون عاقلة يا عدلي، مش بنت حتتك و انت اللي مربيني.
عدلي: علشان كده قلبي متعلق بيكي
جهاد بغيرة: و انا ايه يا عدلي
عدلي: انتي اول نظرة علقت قلبي بيكي.
رحمة: ما شاء الله عليك تعرف ترضي كل الأطراف
عدلي: علشان دي الحقيقة أنا بحبكم كلكم
رحمة برجاء: طيب علشان خاطري طيب خاطر سالي هي بتحبك و مش عايزك تتجوز بعدها ،اتكلم معها براحة.
عدلي: علشان خاطرك بس يا رحمة
رحمة: تسلمل يا عدلي.
جهاد: نحن هنا
رحمة: غيورة اوي يا جهاد
جهاد: اومال مش لازم اغير على جوزي حبيبي
رحمى: بلاش تنسي انا اول بخت
جهاد : و انا التانية
عدلي: انا قولت ايه
رحمة : بتحبنا كلنا
جهاد : ما شاء الله قلبك كبير يسعي من الحبايب مليون..
ضحكوا كلهم و سالي سمعت ضحكاتهم و انفجرت من الغضب
//////////
في اوضة سالي
كانت قاعدة بتعيط ،دخل عدلي عليها ،قعد جنبها و قال بهدوء: بتعملي في نفسك كده ليه سالي
عيطت بصوت عالي و قالت: عندك حق يا عدلي الموضوع مش مستاهل ،انك تكسر قلبي و تتجوز عليا.
عدلي : انا بحبك يا سالي و حبك في قلبي كبير محدش يقدر ياخد مكانك ، انتي مميزة عن الكل، عيلتك كلها ناس مهمة و عقلك كبيرة و مثقفة و كله كوم و جمالك و حلاوتك كوم تاني
سالي: اضحك عليا بكلامك المعسول
عدلي: دي الحقيقة مش مجرد كلام،
سالي: و طالما انا زي ما بتقول، تجوز عليا ليه
عدلي: الشرع محلل أربعة، و انا معملتش حاجة حرام و لا عيب
سالي: على فكرة انك تكسر قلبي دهوحرام ،و قول انك حبيتها صح
عدلي: مش مهم هي أو اي حد تاني المهم تتاكدي اني بحبك يا سالي
سالي: لو خيرتك بيني و بينها تختار مين
قام عدلي من مكانه و قال: كده انتي عاوزة تلوعي دراعي و انا بمشي من دماغي و محدش يفرض رأيه عليا.
سالي: يعني هتجوز برضو
عدلي: أيوة فرحي تاني يوم العيد
و خرج من الاوضة و هي قعدت تعيط و قالت :
انا اللي غلطانة لما قبلت اتجوز واحدة متجوز قبلي اتنين ،ما طبيعي اللي يتجوز تلاتة ،يتجوز الرابعة، زي ما أنا كسرت قلب رحمة و جهاد، جتلي واحدة تكسر قلبي ، الدنيا سلف و دين ، و ده اختيارك يا سالي و لازم تتحملي العواقب.
///////
تحت كانت قعدة رحمة مع جهاد و يشكوا همهم لبعض.
جهاد: عارفة يا رحمة أنا عرفت احساسك كان عامل ازي، لما عدلي اتجوزني عليكي، ما هو أكيد نفس احساسي لما عدلي اتجوز سالي، و دلوقتي سالي بتدوق من نفس الكاس و لفي بينا يا دنيا
رحمة: ما هي حلقة و كلنا بلنف فيها، يوم لك و يوم عليك.
خدت جهاد نفس و قالت: انا قلبي وجعني اوي يا رحمة، مش عارفة ليه عملت كده، كنت عايشة في بيت اهلي معززة مكرمة و يا ما نصحوني و قالوا بلاش دي متجوز قبلك قولت بس هو ده اللي بحبه.
رحمة: انتي ندمانة يا جهاد.
جهاد: مقدرش اقول ندمانة أو لا ،انا بحب عدلي و في نفس الوقت بغيار عليه من الهوا الطاير و مش يسكت و يرحم قلوبنا لا هو رايح يتجوز الرابعة كمان، اخس عليك يا عدلي ، كنا عملنا ايه لكل ده علشان يحصل فينا كده
رحمة: طيب انتي و سالي كان القرار بايدكم ، أما أنا عدلي وعدني اعيش معه حياة كلها سعادة و حب، هو كان صادق ربنا كرمه و وسع رزقه ، و قبل ما اطلب الطلب يكون عندي، و قصاد كل ده اتفاجا،انه عايز يتجوز عليا، و ياريت ياخد راي ده كان بيلغني ،بس انا غلطت لما وافقت كان ممكن امشي بس مقدرتش ابعد، فانا كمان غلطانة و قبلت أنه يتجوز..
نزلت سالي ،قعدت معهم و قالت: كلنا غلطانين، بلاش نجيب اللوم على عدلي محدش غضبنا على حاجة.
رحمة: بقولكم ايه احنا في أيام مفترجة ،بطلوا نكد و ندب،خلينا نفرح العيد على الابواب.
جهاد: عندك حق، لازم نفرفش ،و بلاش هم ،اصل الهم يقصر العمر، و انتي يا سالي أي حاجة تعمليها ملهاش لازمة ،ريحي دماغك.
سالي بحزن : انا عرفت كده هو مصمم على الجواز.
رحمة: احنا لازم نقبل بالأمر الواقع ،و الحمد لله الرابعة و خالص.
سالي: انتي قوية اوي يا رحمة
رحمة: ياختي انا لا قوية و لا نيلة ،أنا بس قبلت بالواقع المر، علشان انا زيكم بحب عدلي..
جهاد: احنا قولنا ايه بلاش نكد.
سالي: بقولكم ايه انا هكلم مركز التجميل اللي اتعامل معه، و اطلب منه بنت تجي تعملي شعري وبادكير و مانيكير.
جهاد بحماس: اعملي حسابي معاكي
سالي: تمام ،و انتي يا رحمة
رحمة: و ماله خلي الواحد يفك عن نفسه.
/////////
يوم العيد
صوت التكبيرات يسعد القلب ، و العيال فرحانة باللبس الجديد ، و البالونات طايرة في الهوا..
و الناس صفوف منظم واقفين لصلاة العيد
في بيت عدلي
واقفة رحمة و جنبها جهاد و سالي جنبها و الولاد واقفين من الكبير للصغير و عدلي يعيد عليهم بالترتيب.
على السفرة
يارا::هو فرحك بكرة يا بابا
سالي بسخرية: أيوة يا يارا ابوكي هيبقي عريس بكرة
عدلي بعصبية: سالي اقفلي بوقك
رحمة: جرا ايه يا جماعة ،عايزين ناكل اللقمة بنفس،ما بلاش نكد زي العادة .
عدلي بعصبية: و ده تيجي طول ما منبع النكد موجود
سالي بعتاب: اخص عليك يا عدلي انا منبع نكد، ليه بتقول كده علشان غيرانه عليك
عدلي بتحذير: مش عايز اسمع صوتك فاهمة
سالي بقلة حيلة : حاضر و حقك عليا اني غيرانة عليك، و لو تحب بكرة ارقص في فرحك على واحدة و نص مفيش مانع
عدلي بصوت عالي: احترامي نفسك يا سالي
مردتش سالي عليه
و كملوا اكل بصمت تام بسبب خوفهم من عدلي.
بعد الاكل
عدلي: علشان انا قلبي طيب بس، تعالوا نخرج برابطة المعلم كده
رحمة: هنروح فين
عدلي: الملاهي
يارا: ها ها، العيد فرحة و اجمل فرحة، بحبك يا بابا
عدلي : و انا بحبك يا قلب ابوكي، يلا الكل يجهزوا
و خرجوا مع بعض و كان يوم جميل و تم بسعادة.، و الحقيقة عدلي كان بيعمل كل حاجه علشان يخليهم مبسوطين.
/////////////
تاني يوم
في قاعة كبيرة على النيل كان فرح عدلي على مراته الجديدة راندا .
كانوا زوجات عدلي قاعدين على ترابيزة و كل واحدة فيهم ،زي اللي قلبها مغروز فيه سكينة و هي شايفة جوزها قاعد جنب واحدة تانية.
طبعا كله كوم و كلام الناس كوم تاني
سامح( صاحب عدلي): انا بقيت أشوف عدلي سوبر مان، رجل و لا كل الرجال.
عمر( صاحب عدلي): ده عدى سوبر مان بمراحل ،مش بس بيتجوز ده كمان مخليهم يحضروا الفرح
سامح: انا عايز اعمل زيه
عمر: لا مش هتقدر، عدلي استاذ و رئيس قسم.
سامح: كفاية كلام عن عدلي احسن نحسده.
عمر: يا اخويا دي محصن.
رن تلفيون سالي ، و قالت: ده بابا
رحمة: بلاش تردي احسن تسمعي كلمتين
سالي : ما هو أكيد عرف، انا هخرج أكلمه برة.
قامت سالي ،و خرجت برة القاعة، فتحت الخط و قالت: ازيك يا بابا،عامل ايه.
اتكلم ابو سالي بصوت عالي: و ليكي نفس تقولي ازيك يا بابا و تسالي عامل ايه؟
سالي توقعت انه عرف ايه اللي حصل، بس حبتت تتكلم كأنها مش فاهمة الموضوع ، سالت بنبرة متوترة : في ايه بابا ,حصل حاجة.
ابو سالي: بلاش تلفي و تدوري عليا، الف مبروك لجوزك الجوزة الجديدة ،و عقبال ما تشوفي عياله من مراته الجديدة، أنا كل اللي مزعلني انتي ليه تعملي كده، واحدة زيك خريجة جامعة أمريكية و طول عمرك عايشة هانم ، ليه تقبلي بكده، كلنا قولنا بلاش و انتي قولتي لا بحبه..
نزلت دموع سالي و قالت بحزن : براحة يا بابا لو سمحت.
زعق بصوت عالي اكتر و قال: انا و اخواتك و امك مبقاش في راحة حياتنا بسبب أفعالك، ليه عملتي كده يا سالي، ردي عليا ليه.
سالي بحزن: انا اسفة يا بابا، و بتسال ليه انا عملت كده، علشان أنا بحبه و فكرت كتير قبل ما اقبل اتجوز عدلي و عارفة أنه مختلفة عني في كل حاجه ،بس قلبي هو السبب
ابو سالي: كلامك ملوش لازمة
و قفل الخط و هي قعدت تعيط و هي ندمانة أنها وافقت تجوز عدلي و تخالف كلام أهلها.د، علشان هي على أرض الواقع مش عارفة تتأقلم على الحياة مع عدلي...
////////
في الفرح
كانت عين رحمة معلقة على مكان عدلي و عروسته.
و كلمت رحمة نفسها بحزن: لو تعرف الموضوع صعب عليا ازاي يا عدلي يمكن كنت اكتفيت بيا بس، انا بموت و انا شايفك بتجيب واحدة علشان تشاركك فيا، و انت عملت كده تلات مرة مش مرة واحدة، الله يسامحك يا عدلي على كسرة نفسي.
طبطت جهاد على أيد رحمة و قالت: هوني على نفسك يا رحمة
ضحكت رحمة زي العادة، هي ديما تبيان أنها قوية و مش فارق معها حاجة ، ردت رحمة على جهاد: أنا كويسة يا جهاد ،المهم انتي تكوني كويسة
جهاد: اومال انا كويسة اوي ،حتي جوزي يتجوز عليا النهاردة، و علشان كده فرحان اوي، و علي رأس سالي عايزة اقوم ارقص.
ضحكت رحمة و قالت : ربنا يهون علينا كلنا.
جهاد؛ يارب
///////////
في مكان العروسين
قالت رندا: انا مستغربة من حاجة يا عدلي
عدلي::ايه هي
رندا: انت ازاي قادر تعمل كده
عدلي: قصدك ايه يا راندا
رندا: خليت زوجاتك التلاتة يحضروا فرحك
عدلي: هما عاقلين و يحبوني، و كل اللي يهم اي وحدة فيهم اني اتعامل معها كأنها الأولي و الأخيرة اللي في حياتي.
راندا ::لا و أنت الصادق ده دليل انك مسيطر اوي
عدلي بابتسامة: انا غلبان اوي و مفيش اطيب مني في الدنيا
راندا: واضح اوي
و كلمت نفسها: شكلي هشوف ايام سودة ، ربنا يسامحك قلبي بقي هو اللي وقع في غرم عدلي من اول نظرة
//////////
تم الفرح و عدلي و راندا سافروا الغردقة،والباقي رجع البيت
/////////
بعد اسبوع
سالي كانت عاملة اجتماع مع البنات
رحمة:مالك يا سالي في مصيبة جديدة
سالي: ما اكيد في ،المصيبة الجديدة هي العروسة ، و انا جمعتكم النهاردة علشان عايزة اقول كلام مهم نمشي عليها في المرحلة الجاية
جهاد: خير ،ناوية على مصيبة ايه.
سالي: مفيش مصايب، و ركزوا معي منك ليها و بلاش هزار.
رحمة بطريقة كوميدية: قول يا كبير، الكلام على مين
جهاد بغناء: على ابو قلب كبير
زعقت سالي و قالت : مش عايزة هزار ، خلينا نتكلم جد، احنا لازم نسود عيشية العروسة الجديدة
رحمة: و هي ذنبها ايه
سالي: ذنبها أنها اتجوزت واحد متجوز
هنا انفجرت رحمة من الضحك و قالت: انتي سامعة نفسك بتقولي ايه، طيب انتي و جهاد اتجوزتوا واحد متجوز، يبقي انتوا كمان غلطانين زيها صح
سالي بعصبية: أنا حسيت دلوقتي احساسك انتي و جهاد ، الموضوع معي مختلفة عنكم ،علشان يعتبر اللي جاية دي هتكون ضرتي انا، دي جاية بعدي ،عارفين ده معناه ايه
جهاد: معناه ايه يا بنت الباشا
سالي: معناه اني مقصرة مع جوزي، و مش ملئ عينه علشان كده بص على غيري
رحمة: اسمعني يا سالي، بلاش تتعبي نفسك ،عدلي اتجوز و الشرع محلل ل الراجل أربعة
جهاد: و عدلي نفذ الشرع، يبقي خلاص يا سالي بلاش توجعي دماغك، و تقلبي علينا المواجع كل شوية.
سالي: انتوا ايه مفيش دم خالص
و قامت سالي طلعت اوضتها بعصبية
رحمة: ربنا يهديكي لنفسك يا سالي
جهاد: هي مش مجنونة هي موجوعة.
رحمة: ده حالنا كلنا، بس مفيش في أيدينا حل تاني.
///////////
تاني يوم
رجع عدلي و راندا من السفر
كان قاعد عدلي و حواليه زوجاته الأربعة
عدلي بجدية : احنا قاعدين النهاردة
علشان نحط القواعد اللي نمشي عليها.
ضحكت سالي باستهزاء و قالت::قواعد مرة واحدة مالك مكبر الموضوع كده.
عدلي كتم غيظه و قال: استغفر الله العظيم ،سالي بلاش كلامك اللي ملوش لازمة زي العادة، اسمعي الكلام بهدوء
نفخت بضيق و قالت: حاضر يا سي عدلي، مبسوط كده.
عدلي: من غير تريقة، و اسكتي بقي و الكلام اللي أقوله يتنفذ
رحمة: طبعا يا اخويا كلمتك سيف على رقبتنا.
جهاد: بلاش تعكر مزاجك يا عدلي انت عريس جديد
بدأ عدلي يقول نظام البيت و الكل يسمع بانتباه و راندا قاعدة ساكتة خالص و مفتحتش بوقها با و لا كلمة
////////
بعد يومين ،كان يوم راندا في تحضير الاكل ،كانت بتعمل الاكل بكل تركيز و بعد ما خلصت خرجت.
كانت سالي تراقبها من بعيد، مجرد ما راندا خرجت سالي دخلت المطبخ، وقفت قدم الاكل و قالت: أما وريتك يا راندا مبقاش اسمي سالي، لازم اكرهك في عشتك زي ما سرقتي جوزي مني.
حطت سالي ملح كتير في الاكل و خرجت بسرعة قبل ما حد يشوفها
//////////
أما عند عدلي كان في شركته و قاعد في مكتبه دخلت السكرتيرة و قالت: عدلي باشا استاذ سامح عايزك.
عدلي: خليه يدخل على طول .
دخل سامح و هو بيغني: اهلا بالعريس اللي رافع رأسنا ،كل الرجالة راضية عليك، و انا بالأخص قلبي راضي عنك و افتخر انك صاحبي .
ضحك عدلي و قال: اقعد يا ابني و ابعد عينك عني، هي مش ناقصة.
سامح: ليه بس يا كبير فضض لاخوك
عدلي: انت فاكر أنها سهلة كده يكون في بيتك أربعة ستات كل واحدة فيهم عندها دماغ مختلفة عن التانية
سامح باستغراب: و لما هي مش سهلة ليه عملت كده انت غاوي وجع دماغك.
عدلي: انا كل مرة اتجوزت فيها بكون حبيبت بجد
سامح: ما شاء الله قلبك كبير اوي، طيب قولي لو حبيبت الخمسة تعمل ايه
عدلي: لا خلاص بقي نستعين بالصبر و الصلاة ،. و ربنا يستر
سامح: اوعدني يارب بزوجة واحدة مش أربعة زيك
عدلي: ابعد عينك عني الله يكرمكم.
غمض سامح عينه و قال: انا هغمص عيني خالص.
عدلي: عملت خير و امشي بقي علشان عندي شغل
سامح: انا حاسس انك تطردني
عدلي : انا بطردك فعلا طريقك اخضر
قام سامح و قال: ماشي يا صاحبي انا ماشي
و مشي سامح و عدلي كمل شغل
///////(//////((((
بليل في بيت عدلي
كانت العيلة متجمعة على الاكل و سالي مستنية تشوف اللي هيحصل.
أما راندا كانت متحمسة تشوف ردة فعل عدلي على اكلها
مع اول معلقة من الاكل، زعق عدلي و قال: استغفر الله العظيم يارب ،ايه الاكل ده
راندا بتوتر: ماله الاكل يا عدلي
عدلي بعصبية : دوقي بنفسك
دقت راندا الاكل و انصدمت و قالت: أنا متأكدة أن الملح في الاكل مظبوط
عدلي بعصبية اكتر: هو انتي اللي عاملة الاكل
نزلت دموع راندا و قالت::أيوة أنا و صدقني ملح الاكل مظبوط.
ضحكت سالي و قالت: و تفتكري ايه اللي حصل يا راندا.
رحمة: حصل خير ،انا هقوم احضر الاكل بسرعة
جهاد: الله يسامحك يا راندا هنفضل جعانين احنا و العيال.
سالي: ياريتك ما عملتي الاكل النهاردة ،طالما مش بتعرفي كنتي قولي.
بصت راندا عليهم بحزن و قامت على اوضتها.
قام عدلي بص على زوجاته،اللي عيونهم بتطلع نار من فكرة أنه ريح وراها، و قال: احم،احم، انا تعصبت اوي برضو
و مشي عدلي وراء راندا
سالي فجأة لقت رحمة و جهاد يبصوا عليها، قالت بتوتر:خير منك ليها
رحمة: ما تجيبي من الآخر
سالي: مش فاهمة قصدك.
جهاد: بلاش لف و دوران يا بنت الباشا ، و اعترفي ليكي علاقة بالاكل البايظ
شاورت سالي على نفسها و قالت: انا معملتش حاجة، انا بريئه من كل ده
رحمة: بذمتك يا سالي مش انتي اللي بوظتي الاكل
سالي: لا مش انا، انا هقوم اجهز ل الولاد سندوتشات
و دخلت سالي المطبخ
جهاد: أنا متأكدة أن سالي وراء كل اللي حصل
رحمة: و انا كمان واثقة من كده
جهاد: سيبك من سالي، شوفتي عدلي مش متحمل أنها تكون زعلانة
ضحكت رحمة و قالت: ما هو عدلي كده طول عمره قلبه طيب
جهاد: بتحبي عدلي اوي
لمعت عين رحمة بحب و قالت: انا اتجوزت و انا بنت ١٨ كبرت على أيده ،انا بحب عدلي اكتر ما هو يتخيل
جهاد:لا واضح حبك ليا، بسبب انك قبلتي أنه يتجوز عليكي
رحمة: كل اللي يهمني هي سعادة عدلي
جهاد: و هو
رحمة: ماله
جهاد: هو كمان كله اللي يهمه سعادتك.
رحمة من غير تفكير: طبعا كل اللي يهم عدلي سعادتي أنا متأكدة من كده.
جت سالي و معها سناوشات و قالت: هي سعادتك أنه يتجوز عليكي
سكتت رحمة من غير رد، حطت سالي الاكل و قالت: يلا كلوا يا ولاد
و كملت سالي كلامها : ساكتة ليه يا رحمة
رحمة بحزن: علشان معنديش رد يا سالي، و لو سمحتي اسكتي انا اللي فيا مكفيني.
و طلعت رحمة اوضتها
جهاد: حرام عليكي يا سالي هي مش متحملة كلام، ما اكيد قلبها محروق زينا و أكتر مننا..
/////////////
في اوضة راندا
كانت بتعيط و عدلي قاعد جنبها، طبطب عليها و قال : كفاية عياط يا حبيبتي ، حقك عليا لو اتعصبت شوية
راندا بدموع: انت اتكلمت معي بطريقة وحشة اوي، و انا قولتلك اني متأكدة أن الملح مظبوط في الاكل
عدلي: خالص اللي حصل حصل
راندا: بقولك الاكل كان كويس أنا متأكدة أن واحدة من العقارب اللي تحت هي اللي عملت كده.
عدلي: اتكلمي بطريقة كويسة
راندا: أنت مش مصدق كلامي صح
عدلي: أيوة مش مصدق هما هيعملوا كده ليه
راندا: الغيرة يا حبيبي تعمل اكتر من كده
عدلي: اقفلي كلام في الموضوع ده
و خرج عدلي من الاوضة.
///////
و بعد شوية نزلت راندا من اوضتها و كانت جهاد و سالي قاعدين في الجنينة قربت منهم علشان تسمع كلامهم.
جهاد: قولي الصراحة يا سالي انتي اللي عملتي كده.
سالي: أيوة أنا
جهاد: ليه كده حرام عليكي
سالي بغضب : علشان مضايقة من وجودها هنا،و نفسي تغور من هنا النهاردة قبل بكرة
جهاد: برضو يا سالي نفس الكلام.
سالي بعصبية : أيوة يا جهاد نفس الكلام انا مش طايقة وجود البنت دي في البيت
جهاد: ربنا يهديكي يا سالي.
راندا لنفسها :كنت متأكدة أن واحدة منكم اللي عملت كده، و انتي بقي فاكرة اني هبلة و طيبة، بس لازم تشوفي الوش التاني.
طلعت راندا على اوضتها و هي تفكر أنها لازم تبقي قوية علشان تعرف تعيش معاهم.
/////////(
تاني يوم
دخلت راندا اوضة سالي بحذر، بصت على الحمام كان صوت المياة شاغل ،مشيت راندا ناحية السرير و رشت حاجة على هدوم سالي و خرجت بسرعة.
/////((//((((((
كانوا قاعدين في الجنينة و سالي عاملة تهرش في جسمها
رحمة: مالك يا سالي
راندا : شكلك جربانة
صرخت سالي و هي بتقول: انتي مجنونة ،ازاي تتكلمي معي كده
ضحكت راندا و هي شايفة سالي عاملة تهرش في جسمها و قالت: شكلك حلوة و انتي كده، و بشكلك ده الكل يقول انتي اللي مجنونة مش انا يا ضرتي
جهاد: عيب كده يا راندا
راندا: و مقولتيش لها الكلمة دي ليه لما قالتك أنها اللي بوظت الاكل
رحمة: هو في حاجة أنا مش فاهمها
راندا: في أن العقربة سالي حطت ملح زيادة على الاكل و طلعت شكلي وحش قدامكم.
رحمة: انتي فعلا عملتي كده
سالي: هو ده وقتها ،اعملي حاجة يا رحمة.
رحمة: ادخلي خدي حمام و غيري هدومك
سالي: أنا متأكدة أنك انتي اللي عملتي كده.
راندا: أيوة أنا اللي عملت كده، برد عليكي علشان تعرفوا اني مش سهلة
بصت سالي عليها بغيظ و مسكت راندا من شعرها و راندا مسكت رقبتها
سالي: انا هعرفك ازاي تعملي فيا كده
راندا: و انا هموتك لو فكرتي تقربي مني تاني
رحمة و جهاد يحاولوا يفصلوا بينهم و جاه صوت عدلي اللي قال: في ايه هنا.
بعدت سالي عن راندا و قالت بعصبية: شوف الهانم مراتك عملت فيا ايه
راندا: و قبل ما تعرف انا عملت فيها ايه لازم تعرف هي عملت فيا ايه
عدلي: انا مستنية اعرف ايه اللي حصل
راندا: سالي هي اللي بوظت الاكل امبارح
عدلي: عرفت الكلام ده منين
راندا: سمعته و هي بتكلم مع جهاد
بص عدلي على جهاد اللي حركت رأسها بالموافقة
سالي بعصبية: و هي جبت بوردة رشته على هدومي خلتني عاملة اهرش زي العبيطة
عدلي: انتي اللي غلطانة يا سالي، البداية كانت من عندك و البادي اظلم،يبقي اتحملي غلطك
نزلت دموع سالي و قالت: هو ده رايك
عدلي: ده راي اي حد عاقل
مسحت سالي دموعها و قالت: تمام اوي كده، و راي اي حد عاقل اني غبية لاني قبلت بالجوزة دي ،اقل مني في كل حاجه و كمان متجوز غيري تلاتة ، انا كنت فاكرة نفسي أتحمل بس للاسف أنا معنديش قوة تحملت كفاية لحد كده، طلقني يا عدلي
و جريت سالي على اوضتها
الكل كان واقف مصدوم و عدلي أتحرك علشان يخرج من البيت
رحمة: استنا يا عدلي لو سمحت
وقف مكانه و قال: عايزة ايه يا رحمة
رحمة: عايزك تتطلع تصالح سالي علشان تشيل فكرة الطلاق من دماغها
عدلي بجمود: مش هي عايزة كده يبقي براحتها
جهاد: قالت كده من زعلها منك
عدلي: انا قولت حاجة غلط مش هي دي الحقيقة
و خرج عدلي من البيت
////////((
و بعد شوية نزلت سالي مع بنتها و شنطة هدومها.
جريوا البنات عليها و قالت جهاد: انتي راحة فين يا سالي
سالي بدموع: ماشية مش هو عاوز كده
رحمة: هو مطلبش منك تمشي، انتي اللي قولتي كده
سالي: قولت لما وقف مع راندا ضدي
رحمة: هو قال كلمة الحق
سالي: انتوا كمان معها ضدي
جهاد: لا يا حبيبتي مفيش الكلام ده ،احنا بنحبك و منقدرش نستغني عنك.
راندا بندم: انا اسفة يا سالي، حقك عليا سامحني اني السبب في كل اللي حصل ده
مردتش سالي عليها و خرجت من البيت مع بنتها رغم أن البنات حاولت تمنعها تمشي،بس هي مصممة تخرج من البيت.
//////////
أما عدلي كان وصل الشركة و قاعد حزين أنه زعل سالي و طلع صورتها على الموبايل و ابتسم و قال: انا بحبك اوي يا سالي من أول نظرة لون عينك الجميل خطفني و فضلت ماشي وراكي علشان اعرف انتي مين و عايشة فين، كنت خايف انك ترفضي الجواز مني علشان متجوز قبلك و الحمد لله قدرت اقنعك بالجواز مني، و كان يوم السعد لما وافقتي ،بس انتي غلطتي يا سالي ، مرة لما بوظتي الاكل و تأتي مرة لما اتكلمتي على الطلاق.
رن التلفيون و كانت رحمة، فتح الخط: أيوة يا رحمة
رحمة: سالي مشيت يا عدلي
خد نفس و قال بهدوء،زي ما تكون سالي مش فارقة معه: براحتها
و قفل السكة و اتغير حاله و بأن عليه الحزن و الهم و الضعف لما قال: ليه يا سالي ،انتي عارفة اني بحبك و مقدرش اعيش من غيرك ليه تعملي فيا كده و تسيبي البيت و تمشي
//////(/(
في قصر أهل سالي
كانت سالي بتعيط في حضن امها
اتكلم اخوها بعصبية ( شاهر) صحيح انتي اللي عملتي في نفسك كده ،لما قررتي تتجوزي واحد زي ده ، بس لا عاش و لا كان اللي يزعل بنت عبدالعزيز الباشا
ام سالي( نرجس) مش وقت كلام يا شاهر مش شايف حالة اختك
سالي تبص على ابوها بحزن و ندم و قالت : انا اسفة يا بابا، ياريتني سمعت كلامك
عبدالعزيز: اللي حصل حصل ، لازم دلوقتي تفكري صح و بدون اي ضغط ناوية على ايه يا سالي.
سكتت سالي علشان معندهش رد
نرجس: اطلعي يا سالي ارتاحي فوق و سيبي القمورة دي معي
طلعت سالي علشان تفكر بهدوء
////(((
مر يومين و سالي قاعدة عند اهلها و عدلي و لا مرة رن عليها.
و لسه محتارة مش عارفة هتعمل ايه
////////(((
في قصر عدلي
كانوا قاعدين على الاكل بس الحزن بيان عليهم حتي راندا اللي ملحقتش تعرف سالي بس احساسها بالذنب أنها السبب يقتلها من جوة
رحمة بتتكلم و عدلي مش مركز في حاجة ، قالت بصوت عالي: عدلي، يا عدلي
رد عليها بعدم تركيز: عايزة حاجة يا رحمة
رحمة: بقولك الاكل برد.
عدلي: مليش نفس كلوا انتوا.
و قام عدلي من على السفرة، اتكلمت جهاد: روح هات سالي يا عدلي ،البيت ضلمة من غيرها
راندا بندم: لو عايزني اروح لحد عندها و اعتذر أنا موافقة
خرج عدلي من غير ما يرد على حد
بصت رحمة على راندا و قالت : طبيعي أننا نبقي متعلقين ب سالي و غيابها مآثر فينا،احنا بقالنا سنين عايشين تحت سقف واحد،بس انتي لسه مش بقالك كتير معانا.
راندا: انا حاسة بالذنب اوي، خايفة سالي تتطلق و اكون انا السبب
جهاد: بيان عليكي طيبة اوي
راندا: انا غلبانة و كل اللي عايزاه اعيش في هدوء
جهاد: هو انتي قبلتي تتجوزي واحد متجوز ليه
راندا: علشان الحب، انا كنت موظفة في شركة عدلي و حبيته قبل ما اعرف عنه حاجة و اذا كان هو متجوزة أو لا ،،،،و اللي عرفته بعد كده منه أن هو كمان معجب بيا ،و لما طلب أيدي وافقت من غير ما افكر و بعدين قاللي إنه هو متجوز تلات مقدرتش ارفض علشان حبيته.
جهاد بحزن: انا بقي عدلي صاحب اخويا و كنت عارفة عنه كل حاجه و مع ذلك وقعت في حبه و ادي النتيجة لما طلب أيدي ،اخويا رافض بس انا قبلت
رحمة: احنا هنفضل قاعدين كده ،،نعيط على اللي فات و نلطم على اللي الجاي، المهم دلوقتي سالي ترجع البيت.
راندا: أيدي على كفتك
جهاد: ما تيجي نروح لها
رحمة : انا بقول كده يلا نغير و نروح
/////////
بعد شوية في بيت أهل سالي
رحمة: و بعدين يا سالي مش ناوية ترجعي بيتك
سالي: مبقاش بيتي
جهاد: اخس عليكي يا سالي،هان عليكي العشرة اللي بينا
سالي: يعلم ربنا أني زعلانة علشان بعيدة عنكم.
راندا: سالي حقك عليا لو انا السبب في كل ده، أنا بس اتغظت منك و حبيبت ارد عليكي
سالي: انا غلطت و الكلام ملوش لازمة انا مش زعلانة من حد
رحمة: ارجعي بيتك يا سالي، البيت ملوش طعم من غيرك
سالي: و لما يكون صاحب البيت اللي هو جوزي لحد دلوقتي مسألش عليا
في الوقت ده دخل عدلي اللي قال: صاحب البيت اللي هو جوزك مش عارف يتنفس من غيرك ، الدنيا بقت ضلمة من غيرك يا سالي، انا حياتي واقفت من بعدك ،ارجعي بيتك يا سالي.
سالي بحزن: لسه فاكر يا عدلي
عدلي بندم : انا اسف اني اتاخرت عليكي بس انتي السبب راسك ناشفة و تحبي العند
سالي بحزن: كلامك زعلني اوي يا عدلي
عدلي: اسف يا حبيبتي.
///////////
رجعت سالي البيت و عدت عليهم الايام و بقوا يتقبلوا الوضع و السبب ببساطة أن كان اختيارهم مش اختيار حد ليهم
////////
العيد الكبير
في الجنينة
كانت الستات و الاطفال يبصوا من الشباك و عدلي وقف مع الجزار اللي يبدبح العجول علشان يوزع على الناس الغلابة
///////////
و اتجمعوا على الغداء
عدلي: أنا ديما بفكر و خايف اني اكون بظلم حد فيكم ،لو واحدة فيكم شايفة اني مقصر معها في حاجة ،ياريت تقول على طول علشان خايف اكون ظالم .
رحمة: يا اخويا و لا تفكر و لا تحمل هم، انت عامل اللي عليك و زيادة ،ربنا يبارك فيك و يحفظ
بص عدلي على رحمة و قال: أنتي ديما مطمن قلبي و بشوفك رمانة ميزان البيت اللي من غيرها البيت ملوش لازمة
جهاد: عندك حق في كلامك، اول ما أتجوزت كنت خائفة منها بس لقيتها طيبة، قلب ملهاش مثيل
رحمة: تسلمي يا جوجو
عدلي: كل واحدة فيكم لها مكانة كبيرة عندي و في البيت ده، جهاد دم خفيف و روح حلوة تنسي اي حد الهم، و سالي بنت الباشا المثقفة الجميلة
و راندا اخر عنقود سكر معقود، يمكن مش بعرف اعبر عن حبي ليكم بس انتوا حاجة مهمة عندي
جهاد: ربنا يديم المحبة علينا
سالي: يمكن الموضوع غريب لاي حد بس فعلا احنا بقينا عيلة حلوة
راندا: انا مطمئنة و انا في وسطكم
عدلي: الحمد لله على نعمة الستر ،يلا كلوا و كل سنة و انتم طيبين.
تمت بحمد الله
