 |
رواية في قبضة العاصم الخاتمة بقلم سيليا البحيري
بعد كام يوم في القاهرة — فيلا آدم — الحديقة الخلفية
الليل هادئ.
المدينة بعيدة بأصواتها.
الهواء بارد قليلًا.
آدم يقف أمام البركة الصغيرة في الحديقة، يحدق في انعكاسه على الماء.
خطوات خلفه.
نادين.
ليست متكبرة الآن.
ولا شرسة.
ولا باردة.
امرأة متعبة.
توقفت على مسافة خطوات.
— كنت عارفة إنك هتكون هنا.
لم يلتفت.
— البيت ده كنتِ عايشة فيه…
وأنا فاكر إنك ضحية.
طلعتي بتلعبي لعبة أخطر من لعبة مراد.
صمت.
ثم استدار أخيرًا.
نظرته ليست كرهًا…
بل خليط من ألم وغضب وحب قديم.
— اشتغلتي مع المافيا يا نادين.
إنتِ ظاهريًا ضابطة تخدم بلدها…
وخفيًا بتدخلّي مخدرات وسلاح لمصر.
كلماته خرجت حادة.
نادين لم تدافع فورًا.
— عارفة.
اقترب خطوة.
— عارفة؟
دي كلمة سهلة.
صوته ارتفع:
— إنتِ كنتِ بتخوني كل اللي أقسمتي تحميهم!
دمعة هربت من عينها لكنها لم تمسحها.
— كنت بدور على طريق أوصل له.
مراد كان محمي… أقوى مني ومنك.
— فقررتِ تبقي أقذر منه؟
الضربة كانت موجعة.
تنفست ببطء.
— دخلت عالمهم عشان أهدّه من جوّه.
عشان أعرف تحركاته… فلوسه… رجاله.
ضحك بسخرية.
— وكم شحنة سم عدّت؟
وكم شاب ضاع؟
صمتت.
هذا السؤال كان سكينًا.
همست:
— ما كنتش شايفة غير أبويا وهو واقع قدامي.
ولا كنت شايفة غيرك وانت بتبصلي بنظرة شك.
صوته انخفض… لكنه لم يهدأ.
— أنا غلطت لما صدّقت.
بس إنتِ اخترتي طريق تاني… بعيد عني.
رفعت عينيها إليه.
— لو قلتلك وقتها… كنت هتسمعني؟
كنت هتصدق إني مش خاينة؟
لم يجب فورًا.
لأنه يعرف…
أنه ربما لم يكن ليصدق.
لكن هذا لا يمحو ما فعلته.
اقترب منها حتى صار بينهما خطوات قليلة.
— إنتِ مش بس انتقمتي من مراد.
إنتِ اتلوثتي.
شهقت بخفوت.
— كنت مستعدة أضيع نفسي… بس أوقعه.
ثم خرج صوتها بقهر دفين:
— كل ليلة كنت أرجع هنا… أبص على أوضة زين… وأقول لنفسي: لازم أحميه من شر مراد و غيره
آدم اشتعلت عيناه.
— ما تجيبيش سيرته.
ثم بغيرة مفاجئة، قبض على ذراعها برفق لكن بحزم.
— ولا تنطقي اسم راجل تاني قدامي.
مفهوم؟
نظرت إليه بدهشة.
— آدم…
— مش عايز أسمع اسم مراد على لسانك تاني.
ولا أي حد من العالم القذر ده.
كانت غيرته واضحة…
رجل لم يتوقف عن حبها رغم كل شيء.
ابتسمت بحزن.
— غيران بعد كل ده؟
— أنا مش ملاك يا نادين.
أنا راجل شاف مراته تمشي في طريق تاني…
حتى لو كانت بتقول إنها بتحاربه.
تراجعت خطوة، صوتها أهدأ:
— أنا عمري ما خنتك.
لا جسد… ولا قلب.
نظر في عينيها مباشرة.
— بس خنتِ البلد.
الصمت كان ثقيلًا.
ثم قالت بصراحة موجعة:
— أيوه.
خنت القانون عشان أنتقم.
نظره إليها طال.
— ولو رجع بيكي الزمن؟
ترددت…
ثم قالت بصدق:
— كنت هطلب مساعدتك… بدل ما أختار الحرب لوحدي.
هذه الجملة كسرت شيئًا داخله.
اقترب أكثر… حتى صار قريبًا جدًا.
— أنا كنت مستعد أحارب العالم كله عشانك.
بس كنت محتاجك تقوليلي.
عيناه لمعتا بألم.
— خمس عشرة سنة… يا نادين.
همست:
— عارفة.
مد يده… لمس وجنتها بحذر… كأنه يخشى أن تختفي.
— أنا مش قادر أسامح بسهولة.
ومش قادر أكرهك.
تنفست ببطء.
— مش بطلب تسامح دلوقتي.
بطلب فرصة.
صمت طويل.
ثم قال بصدق موجع:
— لو رجعنا… مفيش أسرار تاني.
ولا عالم خفي.
ولا بطولات فردية.
أومأت.
— موافقة.
ثم أضاف بصوت أخفض:
— وهتدفعي تمن اللي عملتيه.
قدامي… وقدام نفسك.
ابتسمت ابتسامة صغيرة متعبة.
— أنا مستعدة.
ظل ينظر إليها…
طويلًا.
ثم جذبها إليه ببطء.
ليس عناق انتصار.
ولا عناق شغف.
بل عناق شخصين أنهكتهما الحرب.
في الخلفية…
ضوء غرفة زين مضاء.
والليلة…
لأول مرة منذ سنوات…
البيت لا يشعر بالعداوة.
المواجهة لم تنتهِ كل شيء.
لكنها بدأت طريقًا جديدًا.
*******************
عناق آدم ونادين لم يدم طويلًا.
صوت باب الفيلا يُفتح بعنف.
التفتا معًا.
زين.
يقف عند مدخل الحديقة.
وجهه شاحب… عيناه ممتلئتان بصدمة لم تخرج بعد.
كان واضحًا أنه سمع جزءًا من الحوار.
نظر إلى أمه…
نظرة لم تعرفها من قبل.
— يعني… كله كان حقيقي؟
نادين انفصلت عن آدم ببطء.
— زين… اسمعني—
صرخ فجأة:
— كنتِ بتدخلي مخدرات للبلد؟!
سلاح؟!
إنتِ؟!
صوته ارتجف بين الغضب والانكسار.
— كل السنين دي… كنتِ بطلة قدامي!
اقترب خطوة، وملامحه تقسو.
— طلعتِ… أسوأ منه.
الكلمة كانت كصفعة.
نادين شهقت.
— ما تقولش كده…
— ليه؟
مش إنتِ اللي اخترتي تبقي زيهم؟!
آدم قال بحدة:
— زين… احترم نفسك.
لكن زين لم ينظر إليه حتى.
كل غضبه كان موجهًا نحو أمه.
— أنا بقيت ابن ست ****
هذه المرة…
صفعة آدم كانت سريعة وقوية.
الصوت شقّ الهواء.
تجمد زين للحظة.
نظر إلى أبيه غير مصدق.
— بتضربني عشانها؟!
آدم اقترب منه بغضب صريح.
— دي أمك!
حتى لو غلطت… ما تسمحش لنفسك تهينها!
زين ضحك بسخرية موجوعة.
— أم؟
الأم بتحمي… مش تبيع!
نادين انهارت أخيرًا.
— أنا كنت بحميك!
صرخ فيها:
— لا!
كنتِ بتحاربي حربك لوحدك!
صمت ثقيل.
ثم قال بمرارة:
— ارحلي من هنا.
روحي أي مكان… بس مش قدامي.
الكلمة خرجت كسكين.
نادين شعرت بها في صدرها.
— زين…
لكنه استدار بعنف.
— مش عايز أشوفك!
ركض نحو الجراج.
بعد ثوانٍ—
صوت دراجته النارية يزمجر بقوة.
نادين التفتت إلى آدم بقلق حقيقي.
— الحقّه!
هو مش في حالته!
آدم ظل واقفًا مكانه.
وجهه متجمد.
— سيبيه.
نظرت إليه بذهول.
— إزاي سيبه؟!
هو ابننا!
— وهو لازم يتعلم حدوده.
صوت الدراجة يبتعد بسرعة مخيفة.
نادين اقتربت منه، أمسكت بذراعه.
— آدم!
هو مكسور!
هو مش شايف غير الخيانة!
صرخ فيها لأول مرة:
— وأنا كنت شايف إيه؟!
صمتت.
هو يلهث الآن.
— أنا شُفت مراتي بتعيش حياة تانية.
وشُفت ابني بيكبر من غيري نص عمره.
صوته انخفض قليلًا.
— زين مش طفل.
لو سمحنا له يغلط فيكي بالشكل ده… بكرة يغلط في أي حد.
نادين همست بقلق:
— بس هو سايق بسرعة…
آدم نظر في اتجاه الشارع…
عيناه قاسيتان… لكن داخله قلق واضح.
— هيرجع.
ثم أضاف بحدة متعمدة:
— ولما يرجع… هيعتذر.
وقفت نادين مكانها…
تحدق في الطريق الذي اختفى فيه ابنها.
الليل عاد هادئًا…
لكن القلق كان يخنق الهواء.
آدم لم يتحرك.
لكنه…
لأول مرة منذ سنوات…
كان خائفًا حقًا.
********************
في فيلا القاسمي بعد منتصف الليل
الهواء بارد…
والصمت أثقل من أي مواجهة.
عاصم يقف عند حافة السور، قبضتاه مشدودتان.
صدره يعلو ويهبط بسرعة.
خطوات خلفه.
رائد.
توقف على بعد مترين.
التوتر واضح في وقفته.
— كنت عارف إنك هتطلع هنا.
عاصم لم يلتفت.
— عارف؟
أنت بقيت تعرف كل حاجة فجأة؟
صوته كان حادًا… مكسورًا.
رائد تنفس ببطء.
— عاصم…
استدار فجأة، عينيه مشتعلة.
— ثلاث سنين!
ثلاث سنين يا رائد!
اقترب منه بسرعة.
— كنت مختفي فين؟
مستني إيه؟
تتفرج علينا وإحنا بننهار؟
رائد شد فكه.
— ما كنتش—
قاطعه بصراخ:
— خطفت ليل!
سببت لها رعب سبع شهور!
خليت زياد وحور يعيشوا في جحيم!
كل ده… عشان إنت "ميت"!
الكلمة خرجت بسخرية مريرة.
— وأنا كنت فاكر نفسي بانتقم لموتك!
صوته انكسر.
— كنت فاكر زياد السبب…
كرهته…
كرهت نفسي…
اقترب خطوة أخرى.
— وأنت؟
قاعد في سويسرا مستمتع؟
هذه المرة رائد انفجر.
— مستمتع؟!
صوته ارتفع بقوة.
— كنت في غيبوبة ل3 سنين!
عاصم تجمد لحظة.
— إيه؟
رائد اقترب منه، الغضب في عينيه حقيقي.
— لما صحيت… ما كنتش فاكر اسمي!
ولا فاكر شغلي!
ولا فاكر إنت مين!
الصمت هبط فجأة.
— فقدت ذاكرتي .
عاصم نظر إليه بارتباك… لكنه ما زال غاضبًا.
— وليه ما رجعتش بعدها؟!
— لأن التحقيق ما كانش خلص!
لأن لو ظهرت… مراد كان هيهرب!
اقترب أكثر.
— كنت برجع نفسي من الصفر.
بتعلم أمشي تاني.
بتعلم أفتكر.
صوته أصبح أهدأ… لكنه مؤلم.
— ما كنتش بضحك عليكم.
كنت بحاول أعيش.
عاصم هز رأسه بعنف.
— كنت تقدر تبعت رسالة!
إشارة!
أي حاجة!
في تلك اللحظة، ظهر رامي عند باب السطح.
— ما كانش ينفع.
استدار عاصم نحوه بعينين مشتعلة.
— إنت!
اقترب منه بسرعة.
— كنت عارف؟!
رامي وقف ثابتًا.
— أيوه.
الاعتراف كان صريحًا.
قبل أن يكمل…
لكمة قوية سقطت على وجهه.
تراجع رامي خطوة، الدم سال من شفتيه.
— كنت عارف أخويا حي!
وسايبني أتحرق!
ضربة ثانية.
— خليتني أعيش بإحساس الذنب!
ضربة ثالثة.
— خليتني أخطف ليل!
رامي لم يرفع يده ليرد.
لم يدافع.
استقبل الضربات بصمت.
— اضرب.
قالها بهدوء.
— أنا استاهل غضبك.
لكمة جديدة أسقطته أرضًا.
— ليه؟!
ليه عملت فينا كده؟!
رامي بصعوبة جلس على الأرض، ينظر إليه بثبات.
— لأن المهمة كانت أكبر من مشاعرنا.
عاصم صرخ بجنون:
— مشاعرنا؟!
ده أخويا!
اقترب ليضربه مرة أخرى—
لكن يدًا قوية أمسكته من الخلف.
رائد.
سحبه بعيدًا بقوة.
— كفاية!
عاصم حاول الإفلات.
— سيبني!
رائد دفعه للخلف بعنف خفيف.
— هو ما كانش عنده اختيار!
عاصم نظر إليه بمرارة.
— وأنت؟
كان عندك؟
رائد اقترب حتى صارت المسافة بينهما شبرًا واحدًا.
— أنا فقدت سنين من عمري.
إنت فقدت ثقتك.
كلنا خسرنا.
صوته أصبح منخفضًا… لكنه حاد.
— بس ما تحمّلنيش كل خطاياك.
الكلمة أصابت عاصم.
— إنت اللي خطفت ليل.
إنت اللي اخترت تنتقم.
ما حدش أجبرك.
الصمت.
عاصم تنفس بعنف…
عيناه تلمعان بدموع رفضت السقوط.
— كنت فاكر نفسي بحمي دمك.
رائد رد بمرارة:
— دمّي ما كانش محتاج حماية.
كنت محتاج أخويا يثق في اللي ربيته عليه.
الجملة كسرت شيئًا داخل عاصم.
نظر إلى الأرض.
رامي نهض ببطء، يمسح الدم عن فمه.
— لو الزمن رجع…
كنت هعمل نفس اللي عملته.
نظر إليه عاصم بحدة.
— حتى لو خسرتني؟
رامي أجاب بصراحة:
— حتى لو خسرتك.
الصمت تمدد.
رائد اقترب من عاصم، صوته أخف هذه المرة.
— إحنا اتوجعنا كلنا.
بس لو فضّلنا نعدّ الخساير… هنفضل في نفس المكان.
عاصم أغمض عينيه لحظة.
ثم قال بصوت مكسور:
— أنا آسف… عن ليل.
رائد هز رأسه ببطء.
— اعتذر لها.
مش لي.
الهواء مرّ بين الثلاثة ببرودة.
الجرح لم يُغلق…
لكنه لم يعد ينزف كما كان.
وفي تلك الليلة…
بدأ الثلاثة يفهمون أن العدو الحقيقي سقط بالفعل…
وأن ما تبقى… هو ترميم ما تحطم بينهم.
*********************
سطح الفيلا — بعد دقائق
الهواء أصبح أهدأ…
ورائد ورامي نزلا تاركين السطح بصمت ثقيل.
عاصم بقي واقفًا مكانه.
ينظر إلى المدينة…
لكن عينيه لم تكونا تريان شيئًا.
خطوات خفيفة خلفه.
لم يحتج أن يلتفت.
ابتسم.
— كنت عارف إنك هتيجي.
ليل اقتربت ببطء، شعرها يتمايل مع الهواء.
وقفت بجانبه، لا أمامه.
— سمعت الصوت.
نظرت إلى يده المتورمة قليلًا من الضرب.
— وسمعت قلبك وهو بيصرخ.
زفر ببطء.
— أنا كنت غلطان.
همست:
— لا… كنت موجوع.
نظر إليها أخيرًا.
الغضب اختفى.
حل محله تعب طفل ضاع طريقه.
— كنت فاكر إن رائد اختار يسيبنا.
كنت فاكر إنهم بيلعبوا بينا.
اقتربت خطوة، وضعت يدها على صدره.
— هو ما اختارش الغيبوبة.
ولا فقدان الذاكرة.
صمت.
— وأنت ما اخترتش إنك تتوجع.
ابتسم بخفة.
— بس اخترت أخطفك.
رفعت حاجبها، لكن عينيها دافئتان.
— وده كان أغبى قرار في حياتك.
ضحك لأول مرة منذ ساعات.
— فعلًا.
اقتربت أكثر، حتى صارت بينهما مسافة أنفاس.
— عاصم…
رائد عاش في ظلام ما تعرفوش.
ورامي كان بيحميه بطريقته.
— بطريقته الغبية.
— يمكن.
بس نيتهم ما كانتش يخسروك.
نظر في عينيها طويلًا.
— وأنا خسرتك سبع شهور.
همست:
— أنا كنت معاك حتى وإنت ضايع.
يده ارتفعت تلقائيًا، لامست وجنتها بحنان.
— إزاي قدرتي تسامحيني؟
ابتسمت ابتسامة صغيرة.
— لأني شفت خوفك عليّ…
مش قسوتك.
صمت لحظة.
ثم قال بصراحة نادرة:
— أنا كنت مرعوب أفقدك.
يمكن عشان فقدت رائد قبلها.
وضعت جبينها على صدره.
— وأنا كنت مرعوبة أفقدك وإنت بتتحول لشخص مش أنت.
لف ذراعيه حولها أخيرًا.
عناق حقيقي.
دافئ.
هادئ.
لا توتر فيه.
قال وهو يضمها:
— مش عايز أفضل شايل غضب على حد.
عايز أبدأ معاك صفحة نظيفة.
رفعت رأسها، عيناها تلمعان.
— إذًا سامحهم.
— بحاول.
ابتسمت بمكر خفيف:
— عشان لما نتجوز… ما ينفعش العريس يكون مكشّر كده في الصور.
ضحك بخفة.
— يعني ده تهديد؟
— لا… ده شرط.
نظر إليها بجدية مفاجئة.
— ليل…
— همم؟
— أنا محتاجك جنبي… دايمًا.
وضعت يدها على قلبه.
— أنا هنا.
حتى لو الدنيا كلها اتلخبطت.
انحنى قليلًا… قبّل جبينها ببطء.
المدينة أمامهما…
الأضواء تتلألأ.
همس:
— أول مرة أحس إن الهدوء مش مرعب.
ابتسمت.
— عشان المرة دي مش لوحدك.
شدها إليه أكثر.
والسطح الذي شهد صراخًا وغضبًا قبل دقائق…
صار شاهدًا على بداية سلام حقيقي.
وبين ذراعيه…
عرف عاصم أن الغفران أصعب من الانتقام…
لكنه أجمل بكثير.
********************
في سجن القناطر — غرفة الزيارة
الجدران رمادية…
الهواء بارد بلا روح.
نرمين تجلس خلف الزجاج السميك.
ملامحها شاحبة… لكن على شفتيها ابتسامة غريبة… غير مريحة.
الحارس يفتح الباب المقابل.
يدخل رجل خمسيني… وجهه متعب…
عيناه مليئتان بندم لا يُخفى.
مصطفى.
شقيقها الأكبر.
تتسع عينا نرمين فجأة.
— جيت… أخيرًا جيت.
ابتسامتها اتسعت… ثم انكمشت فجأة.
— ولا جاي تشوف المجرمة قبل ما تتشنق؟
صوتها كان مزيجًا بين سخرية وبكاء مكتوم.
مصطفى جلس ببطء أمامها.
وضع يده على الزجاج.
— يا نرمين…
انفجرت ضاحكة فجأة.
— متقوليش يا أختي.
الأخت دي كانت زمان.
حدق فيها بحزن.
— أنا عمري ما تبرّيت منك.
مالت برأسها قليلًا، عيناها تلمعان باضطراب.
— بس مراتك… نادية…
كانت بتبصلي كأني نجاسة.
صمت.
— كنت بدخل بيتك في الصعيد…
وأحس إني دخيلة.
مصطفى شد فكه.
— بيتنا كان مفتوح لكِ دايمًا.
— مفتوح؟
ولا كنتوا مستنيين أختفي؟
صوتها ارتفع فجأة.
— كنت سامعة همساتهم!
"دي مرات مراد… دي شريكة في جرائمه!"
ضربت بيدها على الطاولة الصغيرة أمامها.
— حتى إنت كنت بتتهرب مني!
تنفس مصطفى ببطء.
— كنت موجوع…
مش هربان منك.
— لأ.
كنت عايزني أمشي.
هز رأسه بقوة.
— ما طلبتش منك تروحي في حتة.
انحنت للأمام، نظرتها مضطربة.
— بس عيونكم قالت كده.
كنتوا بتشمئزوا مني.
صوته انخفض.
— كنا متصدمين…
مش كارهين.
سكتت لحظة.
ثم همست بصوت خافت:
— خسرتهم يا مصطفى.
— مين؟
— ريما…
وسليم.
عيناه امتلأتا دموعًا.
— ولادك لسه بيحبوكي.
ضحكت ضحكة قصيرة مجنونة.
— بيحبوا قاتلة أبوهم؟
ثم اقتربت من الزجاج.
— سليم ما بصّليش وأنا بتاخد بالأصفاد.
ريما حضنت أخوها…
بس ما جتش عندي.
سقطت دمعة أخيرًا.
— أنا خلصتهم من وحش…
بس بقيت أنا الوحش.
مصطفى مد يده على الزجاج كأنه يريد لمسها.
— كان فيه طرق تانية.
ابتسمت ابتسامة غريبة.
— أنا اخترت أسرع طريق.
صمت.
ثم سألته فجأة:
— الحكم صدر؟
أطرق رأسه.
لم يجب.
هي فهمت.
ابتسامتها اتسعت مرة أخرى… لكن عينيها اهتزتا.
— إعدام… صح؟
صوته خرج بالكاد:
— أيوه.
الهواء أصبح أثقل.
نرمين جلست مستقيمة فجأة.
— حلو.
نظر إليها بذهول.
— حلو؟
— أخلص.
ضحكت بخفة.
— يمكن ربنا يسامحني أسرع.
مصطفى همس بألم:
— ما تقوليش كده.
نظرت إليه بجدية مفاجئة.
— سامحني.
صوته انكسر:
— أنا عمري ما زعلت منك قد ما زعلت عليك.
— خليك جنب ولادي.
أومأ فورًا.
— وعد.
همست، ودموعها متعلقة برموشها:
— قول لريما… ما تسكتش على الغلط زيّي.
لو شافت حاجة مش صح… توقفها.
وما تسمحش لحد يكسّرها حتى لو كان جوزها.
وسكتت لحظة، ثم أضافت:
— وقول لسليم… ما يبقاش نسخة من أبوه.
القوة مش ظلم… والرجولة مش خوف الناس منك.
صمت طويل.
ثم قالت فجأة بصوت خافت:
— كان نفسي أرجع بيتنا القديم…
وأبقى بس نرمين…
مش مرات مراد…
مش قاتلته.
الحارس اقترب.
— الوقت خلص.
مصطفى وقف ببطء.
عيناه لم تفارقاها.
— بابي مفتوح لكِ… حتى لو متأخر.
ابتسمت له أخيرًا… ابتسامة حقيقية هذه المرة… متعبة.
— يمكن أجي لك في الحلم.
طرق الحارس على الباب.
مصطفى خرج بخطوات ثقيلة.
نرمين بقيت جالسة وحدها.
حدقت في الزجاج…
في انعكاسها.
همست لنفسها:
— خلصتي… يا نرمين.
لكن في عينيها…
لم يكن هناك انتصار.
فقط امرأة
دفعت ثمن سنوات من الصمت…
بطريقة لا عودة منها.
*********************
بعد سنة في قاعة كبيرة مطلة على النيل — مساء ربيعي دافئ
الأضواء الذهبية تنعكس على الماء…
الموسيقى تعلو… والضحكات تملأ المكان.
اليوم ليس مجرد زفاف.
اليوم إعلان انتصار الحياة.
عاصم يقف ببدلته السوداء الأنيقة، يراقب القاعة بعينين ممتلئتين بشيء لم يعرفه منذ سنوات… راحة.
الباب يُفتح.
ليل تدخل بفستانها الأبيض، بسيطة… ناعمة… لكن حضورها يسرق المكان كله.
تتلاقى أعينهما.
كل شيء حولهما يختفي للحظة.
في الجهة الأخرى…
رائد يقف بجانب زوجته إلينا، الطبيبة السويسرية الشابة التي أعادته للحياة.
تمسك بيده بفخر.
— أنا فخورة بك… يا مقدم رائد.
يبتسم بخفة.
— الفضل ليكي.
تضحك.
— لا… الفضل لقلبك اللي ما استسلمش.
ربى، شقيقة عاصم الصغرى، تجلس وهي تضع يدها على بطنها المنتفخ.
بيجاد يركع أمامها مازحًا:
— لو طلع شبه خاله عاصم… هنتعب.
تضحك ربى:
— لا… هيطلع عاقل زي أبوه.
نيروز تقف جانبًا، تبتسم للحفل… لكن عينيها حزينة قليلًا.
سليم القيصري يحتضنها برفق.
— لسه زعلانة عشان رامي؟
تهز رأسها.
— كان يستاهل نهاية أحسن.
— هو اختار طريقه.
تنظر للنيل.
— ألمانيا بعيدة…
— بس لسه أخوكي.
تبتسم بخفوت.
رؤى تقف بجانب سليم
الخاتم يلمع في يدها.
— متوتر؟
يسحب نفسًا عميقًا.
— شوية… عشان أبقى راجل مختلف عن أبويا.
تمسك يده.
— وإنت فعلًا مختلف.
زين…
يقف في المنتصف يضحك مع فتاة… ثم يلتفت لثانية… ثم ثالثة.
أدهم الصغير يهمس لمازن الصغير :
— هيكمل الحفلة كلها كده.
مازن يضحك:
— نحلة!
زين يلتفت لهم:
— سامعكم!
زياد وحور يجلسان في المقدمة.
عيونهما تلمعان فخرًا بليل.
زياد يهمس:
— مرت بكتير… بس طلعت أقوى.
حور تمسك يده.
— لأنها اختارت الصح.
آدم يقف بجانب نادين.
يدها على بطنها… الشهر الخامس.
ينظر إليها بنظرة مختلفة الآن.
هدوء بعد عاصفة طويلة.
— تعبتِ؟
تهز رأسها.
— لا… بس بنتنا بتتحرك.
يضع يده على بطنها بحذر… وكأنه يمسك المستقبل.
— هتكون أقوى منك.
تبتسم:
— يا رب تكون أهدى منك.
يضحك.
الموسيقى تهدأ قليلًا.
المأذون ينهي الكلمات.
— بارك الله لكما… وبارك عليكما…
التصفيق يعلو.
عاصم يقترب من ليل… يمسك يدها.
عيناه تلمعان.
— تصدقي؟
— إيه؟
— زمان كنت فاكر إن القوة إنك ما تبكيش.
تبتسم.
— ودلوقتي؟
— القوة إنك تختار الحب… رغم كل حاجة.
تميل نحوه قليلًا.
— أنا اخترتك من أول يوم… حتى وإنت ضايع.
يضحك بخفة.
— وأنتِ اخترتي واحد مجنون.
— لا… اخترت واحد قلبه طيب.
ينظر لها بصدق عميق.
— لو رجع بيا الزمن… كنت هختارك أسرع.
— ولو رجع بيا الزمن… كنت هضربك أسرع عشان ما تغلطش.
يضحك.
ثم يقترب، يهمس قرب أذنها:
— شكرًا إنك ما سيبتينيش.
— شكرًا إنك رجعت.
يضمها برفق.
ليس عناق عرضي.
عناق وعد.
الألعاب النارية تنطلق فوق النيل.
الجميع يضحك.
الأطفال يركضون.
ريما تحمل طفلها ياسر (5 أشهر)، كامل يقف بجانبها بفخر.
مازن وملك يراقبان ابنهما أسر وهو يركض خلف كارم الصغير.
الحياة تمشي.
عاصم يهمس:
— جاهزة لبداية جديدة؟
تنظر إليه بثقة.
— طول ما أنت معايا… أنا جاهزة لأي حاجة.
يمسك يدها ويرفعها وسط التصفيق.
في تلك اللحظة…
لم يكن أحد يفكر في مراد.
ولا في السجن.
ولا في الخيانة.
فقط…
الذين نجوا.
والذين اختاروا أن يعيشوا.
والحب…
الذي انتصر أخيرًا.
*********************
في ركن هادئ من القاعة — بعد ساعة من بدء الحفل
الموسيقى ما زالت تعلو…
لكن هنا، قرب الشرفة المطلة على النيل، الصوت أخف.
عاصم يقف ممسكًا بكأس عصير لم يلمسه.
عينيه تبحثان في الوجوه… ثم تتوقفان عند الفراغ.
رائد يقترب منه بهدوء.
— العريس سايب عروسته وواقف لوحده؟
عاصم يبتسم نصف ابتسامة.
— مستني حد.
رائد يعرف.
ينظر حوله أيضًا.
— ألمانيا بعيدة.
زفر عاصم ببطء.
— كان نفسي يكون هنا.
رامي كان لازم يبقى واقف جنبي النهارده.
صمت لحظة.
— مهما عمل… كان معايا في كل خطوة.
رائد ينظر للنيل.
— وأنا عارف قد إيه القرار كان قاسي.
التفت إليه عاصم فجأة.
— وصلت لحاجة؟
في أي أمل يرجعوه؟
رائد شد فكه قليلًا.
— حاولت.
— وبعدين؟
قبل أن يجيب، صوت هادئ تدخل من الخلف.
— القرار نهائي.
استدارا.
آدم يقف بجانبهما، ملامحه جادة.
— القيادة العليا في المخابرات المصرية أصدرت حكمًا قطعيًا.
رامي أُوقف نهائيًا.
عاصم قبض على الكأس حتى كاد ينكسر.
— بعد كل اللي عمله؟
آدم نظر إليه بثبات.
— هو أخفى مقدم في جهاز سيادي ثلاث سنوات.
ده مش خطأ إداري… ده كسر خط أحمر.
رائد قال بهدوء:
— كان شايف إنه بيحميني.
آدم رد بصرامة:
— النوايا مش دايمًا تبرر الوسيلة.
الصمت ثقيل.
عاصم صوته انخفض:
— ضحّى بكل حاجة…
وفي الآخر يترمي بره.
آدم اقترب خطوة.
— محدش اترمى.
هو اختار يتحمل النتيجة.
عاصم نظر إليه بعينين حزينتين.
— أنت ما شفتش شكله يوم القرار.
كان واقف… بس كأنه اتكسر.
رائد تنفس ببطء.
— أنا السبب.
عاصم التفت إليه فورًا.
— لا.
— لو ما كنتش اختفيت…
لو ما دخلتش العملية دي…
قاطعه عاصم:
— كفاية جلد ذات.
اللي حصل حصل.
آدم قال بنبرة أقل حدة:
— رامي ذكي.
ألمانيا بداية جديدة ليه.
عاصم هز رأسه.
— بس هو كان عايش للجهاز.
رائد نظر للأفق.
— أحيانًا… الحياة بتجبرك تعيش لنفسك.
صمتوا لحظة، يسمعون ضحكات القاعة من بعيد.
عاصم قال بهدوء مكسور:
— كنت عايزه يقف جنبي لما أقول "قبلت".
ابتسم رائد بخفة.
— هو واقف… بطريقته.
رفع عاصم حاجبه.
— إزاي؟
— لما اختار يتحمل العقوبة لوحده…
كان بيحميك.
لو فتح الملف بالكامل… كان اسمك دخل في دوامة تحقيقات.
تجمد عاصم.
— هو… ما قالش حاجة؟
آدم أجاب:
— التزم الصمت بالكامل.
سكت عاصم طويلًا.
ثم همس:
— غبي.
ابتسم رائد.
— وفي.
نظرتهم التقت.
الألم موجود…
لكن الفخر أيضًا.
آدم وضع يده على كتف عاصم.
— مش كل الأبطال بيفضلوا في الواجهة.
بعضهم بيختاروا يمشوا في الظل.
تنهد عاصم.
— هكلمه بعد الفرح.
رائد ابتسم.
— هيستناك.
من داخل القاعة، صوت ليل يناديه بضحكة:
— عاصم! فين العريس؟!
نظر إليها من بعيد.
ابتسم.
ثم قال بخفة حزينة:
— لو كان هنا… كان أول واحد يزقني عليها.
ضحك رائد.
— أكيد.
استدار عاصم، أخذ نفسًا عميقًا.
— خلاص.
اللي راح راح.
نظر إلى أخيه.
— بس عمره ما هيتنسي.
آدم قال بثبات:
— الصداقة الحقيقية… مش منصب.
ولا رتبة.
صمت قصير.
ثم ربت رائد على كتف عاصم.
— يلا يا عريس.
خلي اليوم ده يفضل ذكرى حلوة… مش ناقصة.
ابتسم عاصم أخيرًا.
ومشى نحو ليل…
لكن في قلبه مكان محفوظ لرجل
اختار أن يخسر منصبه…
ولا يخسرهم.
***********************
بعد عدة دقائق
ليل ما زالت تضحك وهي تمسك بيد عاصم، حين فجأة…
صوت رجولي مألوف يرتفع من عند المدخل.
— والله عيب عليك يا عاصم…
تبدأ الفرح من غيري؟
الصوت كان واضحًا.
ساخرًا.
ومستفزًا كما يعرفه الجميع.
تجمّد عاصم في مكانه.
استدار ببطء.
رائد التفت هو الآخر… وعيناه اتسعتا.
بيجاد همس:
— مستحيل…
نيروز وضعت يدها على فمها.
عند المدخل…
رامي.
واقف بثقة… ببدلة داكنة أنيقة… ابتسامته المعروفة على وجهه.
وبجانبه فتاة شقراء، عيناها زرقاوان، ملامحها هادئة، تمسك بذراعه بابتسامة لطيفة.
عاصم لم ينتظر ثانية.
اندفع نحوه.
— إنت مجنون؟!
ثم جذبه إلى حضنه بقوة.
عناق طويل… خالٍ من الكلمات.
رائد وصل بعده مباشرة، احتضنه بقوة.
— إنت مش طبيعي.
رامي ضحك:
— قلت أعمل دخول درامي يناسب سُمعة العيلة.
بيجاد وصل، ضربه بخفة على كتفه.
— كنا هنقفل الفرح من غيرك!
سليم القيصري صافحه بحرارة.
— ألمانيا خلّتك رسمي شوية.
رامي ابتسم:
— ده منظر بس.
نيروز لم تتحمل.
ركضت نحوه، عانقته بشدة.
— وحشتني!
شدها إليه.
— إنتِ اللي وحشتيني يا بنت.
ثم ابتعد قليلًا، مشيرًا إلى الفتاة بجانبه.
— نسيت أعرّفكم…
الفتاة ابتسمت بخجل خفيف.
— أنا هانا شولتز… عمري 28 سنة.
نطقت اسمها بالعربية المكسّرة بلطف.
— زوجة رامي.
صمت…
ثم انفجار تصفيق وضحك.
عاصم فتح عينيه بصدمة.
— زوجة؟!
رائد رفع حاجبه.
— وإحنا آخر من يعلم؟
رامي قال بمكر:
— قلت أسيب حاجة أفاجئكم بيها.
هانا مدت يدها بأدب.
— تشرفت بمعرفتكم… رامي يتكلم عنكم كثيرًا.
بيجاد همس لعاصم:
— واضح إن الراجل ما ضيعش وقت.
عاصم ضحك أخيرًا من قلبه.
— افتكرتك مكتئب في برلين.
رامي هز رأسه.
— افتتحت شركة استيراد وتكنولوجيا هناك.
والحمد لله… الشغل ماشي كويس.
آدم اقترب، يراقبه بنظرة فخر واضحة.
— سمعت عن المشروع.
صافحه بثبات.
— شغل نظيف.
رامي ابتسم باحترام.
— اتعلمت الدرس.
زياد وقف أمامه، نظر إليه مطولًا.
— كنت شاب شجاع… ولسه.
أدهم (خال ليل) ربت على كتفه.
— أهم حاجة إنك واقف على رجلك.
رامي نظر إليهم بامتنان حقيقي.
— اللي حصل… كان لازم يحصل.
يمكن لو فضلت في الجهاز… ما كنتش عرفت أعيش.
رائد اقترب منه، صوته منخفض:
— ما زلت فخور بيك.
رامي ابتسم.
— كفاية إنك رجعت بخير.
عاصم ما زال ينظر إليه وكأنه غير مصدق.
— يعني كنت ناوي تجي من غير ما تقول؟
رامي قال بمرح:
— لو قلتلك… كنت هتستقبلني بالزفة بره القاعة.
ضحكوا جميعًا.
هانا همست برقة:
— رامي كان متوتر جدًا قبل ما ندخل.
نيروز رفعت حاجبها.
— هو؟ مستحيل.
رامي رد بسرعة:
— إشاعات.
ليل اقتربت، صافحت هانا بحرارة.
— نورتي عيلتنا.
هانا ابتسمت بلطف.
— أنا سعيدة أن أكون هنا.
الموسيقى عادت تعلو.
عاصم نظر إلى رامي نظرة عميقة.
— كنت زعلان إنك مش هنا.
رامي رد بهدوء:
— حتى لو ما كنتش جيت…
كنت معاك.
عاصم شدّه في عناق آخر.
— متغيبش تاني.
رامي ابتسم.
— المرة الجاية… هعزمكم على فرحي في برلين رسميًا.
ضحك الجميع.
النيل خلفهم يلمع تحت الألعاب النارية.
الوجوه سعيدة.
القلوب تصافت فعلًا.
رامي لم يعد ضابط مخابرات.
لكنه لم يفقد مكانته بينهم.
وفي تلك اللحظة…
لم يعد أحد يتذكر العقوبات أو القرارات.
فقط…
أن كل من ضاع… وجد طريقًا جديدًا.
والليلة…
لم يكتمل الفرح إلا بحضوره.
**********************
قرب طاولة العصائر
زين واقف بكوب في يده… يراقب رامي وهو محاط بالجميع، وهانا تبتسم بأدب ألماني منظم لكل شخص يصافحها.
ينحني زين قليلًا نحو سليم ابن مراد، الذي يقف بجانب رؤى.
همس بصوت خافت ساخر:
— شايف؟
الراجل اتوقف من المخابرات… راح ألمانيا… رجع بزوجة أوروبية وشركة…
واضح إن الفصل ده اسمه "كيف تخسر وظيفتك وتربح الحياة".
رؤى التفتت إليه ببطء، رفعت حاجبها.
— وانت إيه الفصل بتاعك يا زين؟
"كيف تحضر فرح وتخرج برقم تليفونين بلا نتيجة"؟
سليم كتم ضحكته.
زين تظاهر بالصدمة.
— لا يا أختي، أنا بدرس الخيارات.
سليم شبك يديه خلف ظهره وقال بنبرة ساخرة هادئة:
— آه… زي ما بابا كان بيدرس الصفقات؟
رؤى خبطته بخفة في ذراعه.
— سليم!
لكنه ابتسم.
— بهزر.
ثم نظر إلى زين.
— على الأقل رامي استقر.
انت لسه عامل زي النحلة… بس بدون عسل.
زين وضع يده على صدره.
— أنا عندي رؤية استراتيجية طويلة المدى.
رؤى ضحكت.
— رؤية إيه؟
كل خمس دقايق مع واحدة.
زين مال برأسه نحو رامي وهانا.
— بصراحة… هانا لطيفة أوي.
واضح إن الراجل لعبها صح.
سليم رد بهدوء:
— هو ما لعبش.
هو تعب… واتعلم.
نظرت رؤى لسليم بإعجاب خفيف.
— كلام خطيبي بقى حكيم.
زين صفّق ببطء.
— ما شاء الله… الخطوبة عاملة شغلها.
سليم ابتسم بثقة هذه المرة.
— الواحد لما يلاقي حد يستاهل… بيهدى.
نظر الثلاثة نحو عاصم وليل في وسط القاعة.
الموسيقى ارتفعت، والضحكات تملأ المكان.
زين تنهد تمثيليًا.
— طيب خلاص…
واضح إن كل الرجالة استقروا.
هسيب لكم الساحة وأرجع أكمل جولتي.
رؤى قالت بمكر:
— حاول المرة دي تفتكر اسمها.
سليم أضاف:
— والأهم… تفتكر نفسك.
زين أشار لهما بإصبع تحذيري ضاحك.
— أنتم اتنين بقيتوا خطر.
ثم ابتعد بخطوات واثقة… متجهًا نحو فتاة أخرى تبتسم له.
رؤى نظرت إلى سليم، تمسك يده بخفة.
— فاكر لما كنت تايه؟
ابتسم بهدوء.
— فاكر…
بس دلوقتي أنا عارف مكاني.
في الجهة الأخرى، رامي يضحك مع عاصم ورائد…
وهانا بجانبه تنظر إليه بفخر.
ورغم السخرية والضحك…
كان واضحًا أن كل واحد منهم، بطريقته،
وجد أخيرًا مكانه الحقيقي.
*******************
بعد كام شهر…
أوضة الولادة زحمة، وكل القلوب بتدق جامد.
عاصم واقف جنب السرير، ماسك إيد ليل وهي بتتوجع، العرق مغرق جبينه، وعينه مليانة قلق.
رائد واقف وراه، حاطط إيده على كتفه:
— اهدى يا عاصم… كله هيبقى تمام.
عاصم بص له بعينين مدمعين:
— مش عارف هستحمل إزاي لو حصل لها حاجة… دي حياتي… دي كل حياتي.
زياد وحور واقفين عند راس السرير، متوترين وخايفين على بنتهم. زياد ماسك إيد حور بهدوء:
— حور… مفيش حاجة هتبوظ… إحنا عدينا بحاجات كتير سوا، وده آخر اختبار.
حور ابتسمت بتوتر:
— أيوه يا زياد… هي قوية… وقلبها أقوى.
فجأة الممرضة فتحت الباب وخرجت بابتسامة كبيرة، شايلة البيبي ملفوف في بطانية:
— مبروك… البيبي بخير وصحته زي الفل!
عاصم أخده بحذر، عينه بتلمع بالدموع، ومش مصدق نفسه. همس له:
— أهلاً يا زياد… على اسم أبويا الروحي… على اسم جدو… على اسم الحياة…
زياد ابتسم بحرارة وحط إيده على كتف عاصم:
— فخور بيك يا ابني… اختيارك للاسم أحلى اختيار… اسم ليل واسم زياد دايمًا مرتبطين بالحب والقوة.
حور دموعها نزلت، بتبص لعاصم وهو شايل حفيدها، وبعدين بصت لليل.
ليل بدأت تفوق من البنج، فتحت عينيها بالراحة، شافت عاصم شايل ابنهم.
— عاصم…؟
ابتسم لها بحنان:
— أيوه… إحنا سوا… وده ابننا… زياد… حتة مننا.
ليل ابتسمت وسط دموعها، وإيدها بترتعش وهي بتلمس وشه لأول مرة:
— زياد…؟
قالتها بصوت واطي مليان حنية.
— قمر… شبه أبوه.
عاصم ضغط على إيدها برفق وهو باصص للطفل:
— أيوه… قمر… وحياتنا من النهارده هتبقى مليانة حب… سوا… دايمًا سوا.
رائد ابتسم من بعيد:
— كده خلاص… صفحة جديدة بتتفتح… حياة جديدة.
زياد وحور واقفين يتأملوا البيبي، الدموع في عينيهم من الفرحة.
ليل حضنته بقوة، وعاصم وقف جنبها، ضمها لصدره، وكأن الدنيا كلها سكتت للحظة.
— أهلاً بيك يا زياد… نورت الدنيا…
عاصم بص لليل بعمق:
— كانت رحلة صعبة… بس عديناها… عشانك وعشان ابننا.
ليل سندت راسها على صدره، ونفست بهدوء، وهمست قبل ما المشهد يقفل:
— بحبك… بحبك أكتر من أي وقت فات…
والبيبي طلع نفس صغير خفيف…
وكأن الحياة ابتدت من جديد.
والحكاية تقفل على لحظة كاملة…
حب، وأمان، وسلام بعد كل المعارك.
•──────••✦ **النهاية** ✦••──────•
