رواية دخيله الشيخ زين العابدين الفصل الحادي عشر بقلم أوتار حزينه
ايهم
صفنت على الصور بذهول ردت اكتب شنوو ذني هي دزت
ااسفه بالغلط دزيتهن الك جنت اريد ادزهن لصديقتي وراحن الك اامسحهن
عفيه
جاوبتها تمام راح امسحهن
ايهم
انتبهت لصوت ليان كلت
لحظه
مسحت كل صور لارا ردت احجي دزت
مسحتهن
اي
ايهم اخذ راحتك اذا مشغول
ليان حجت وبسرعه جاوبت
لاا مو مشغول سالفه وراحت
لارا دزت ماادرت بال كملت وي ليان
هسه انتي موو زعلانه عليه يعني گلبج مو شايل عليه
گلبي مايشيل عليك ايهم
ابتسمت وجاوبت
ابد مو شايل
ابد ايهم لان
سكتت وكملت بصوت ناصي
تعرف شنو بي
بي اني وشكبر حظي بهل المكان
ماكو جواب منها لارا لحت بالرسايل وكامت تتصل ضوجتني ليان حجت
اروح ايهم لان بابا صاحني
اخابرج بعد ساعه اوكي
اي
يله مع السلامه حبي
مع السلامه
سدت الخط فتحت الرسايل قريت
ايهم الله عليك مسحتهن
مااريد يظل يمك تعرف صور خاصه بيه
ومو اي احد لازم يشوفهن
ايهم جاوب ظل بالي
كتبت
لارا مسحتهن واني مو اي احد اني رجل اختج
يعني اخاف عليج مثل مااخاف على
ليان
قرت الرساله اتصلت جاوبت
گلبي هبط همزين راحن الك مو لغيرك
عكدت حواجبي وسالت
منو غيري
هااا تعرف يعني لو راحن لبابا لو وسيم جان اكلت رزاله محترمه منهم ويبوو لو راحن لولد خالتي
جان صارت فضيحه كشره
ابتسمت وجاوبتها
بس هيج صور غلط تخليها بجهازج
ااو ايهم انت هم مثل بابا وليان ووسيم هم
هيج معقدين ويحجون نفس الكلام
تره هذا الحجي لمصلحتج لان جاي تسمعين
وتشوفين الهكرات شكاعد يسون
بالبنات من يهكرون الحسابات
لاا مايصير شي حسابي مأمن زين هههه وبعدين
انت موجود اذا احد تحارش بيه تجيبه
من شواربه سحل موو
ضحكت وجاوبتها
اي الما يوكع الفاس بالراس
سكت جاوبت وره لحظه
تعرف صوت ضحكتك حلوو
ماجاوبت ورثت جكارة هي كملت
شوفت صورك لصديقاتي تخبلن عليك كالن
كارزما وعندك شخصيه
ههه بس
وحلو وشخصيتك تعجب اي بنيه
صفنت وي روحي اسمع كلام حلو المفروض
اسمعه من ليان الي هي زوجتي
كملت بضحك
سيادة المقدم
نعم
وين رحت
ابتسمت جاوبت
يمج وجاي اسمع
عبالي نمت
لاا وين انام بعد ساعه احجي وي ليان
سكتت وطولت حجيت
الو لارا
هياني ايهم
صوتها تغير كملت وره لحظه
ليان محظوظ بيك كلش
ماجاوبت هي كملت بتنهيده
انت فارس احلام كل بنيه واني منهم
ههه الله ينطيج واحد مثلي
ماجاوبت بعدين كالت
ااني
تنهدت سكتت وكالت
جهازي راح يطفه اترخص
الله وياج
سديت الخط وصفنت على جهازي كلامها جان
حلو وخلتني اقارن بينها وبين
ليان
مالك
لميس رادت تطلع تتعشه بره اخذتها ورحنا
لمطعم بالجادريه كعدنا وطلبنا العشه
مالك الاكل يخبل
اي هو هذا المطعم اكله درجه اولى من زمان
جااي اله
ااي جاي جثير هينه
وي منوو
رفعت راسي تباوع عليه بضوجه
جاوبت
وي منو يعني غير اصدقائي او من اعزم
جم واحد بالشغل
هااا بس ذوله
حجتها بنغزه ذبيت الخاشوكه من ايدي
سالت بغضب
خير لميس وين تريدين توصلين
ماااكوو شي مالك ااكل
هو ظلت نفس للاكل بعد الحجيتي
ماحجيت شي
سكتت خزرتها بضوجه مديت ايدي
جريت جگارة ورثتها حجت
مو هنا ادخن مو زين عليه وعلى تاليا
الله طولج ياروح
كمت وتمشيت للشباج وكفت يمه ادخن
وادحك للشارع درت وجهي عليها
مااعرف وي منو تحجي
مادرت بال فركت رگبتي انتبهت بالشباج
بنات كاعدات مسافه عني يدحكن
عليه
درت وجهي عليهن صوت كرسي انسحب بقوه
عكدت حواجبي من شفت لميس كامت واجتي
عليه حجت بغضب
خلي نروح
خير شبيج
شبي مالك مااتعرف مسوي نفسك غشيم
مااتعرف شسويت
حسسج ولج فضحتينا من الله ياخذج
يااخذك اانت
صاحت بيه لميت ايدي بااعصاب وجزيت
على سنوني من شفت العيون
صارت علينا
اامشي جدامي
رااايحه مالك وشوف شراح ااسوي بس
نوصل للبيت
مشت من يمي وهي تخربط بالحجي
اخذت الجكاير والسويج ذبيت فلوس ماادري
شكد طلعت صاير نار كابتن الصاله وكفني
صحت بي
هناااك الخرة
ااخي
وولي من وجهي تراه راح اگبرك
اثنين وخرو مني من اشر الهم واحد
مشيت باعصاب مشدودة وادحك لذيج
الادبسسز الكعدت تخزر بيه
صعدت رادت تحجي صحت
ااااش ولا كلمه هسه اوديج لبيت اهلج
وخلي هم يتصرفون وياج
ووديني مالك لان انت مااتصيرلك جااره
اعوج وراح تظل اعوج ومايملي عينك
غير بس التراب
رفعت ايدي عليها صاحت ورجعت ليوره
ضربت الگشن بوكس اكثر من مرة
صحت بحنون
ااعلمج لميس ااعلمج شراح اسوي بيج
كعدت تبجي وتشهك سقت بخبال من
خبالي دعمت واحد جدامي نزل يسب ويغلط
نزلت علي وصحت
دتعال اجيت والله جابك
جريته من هدومه ووكعتله دك بوكسات دوريه
اجتي بسرعه وي ناس وفكوة مني
بالگوة
الشرطه جرتني تريد تاخذني
باوعت لميس ماكو بالسيارة تخبلت هديت
وتعاركت وياهم لان ماخلوني اشوفها وين راحت كلبجوني واخذوني للمركز
هيله
ابويه عگب سمع بالصار بيني وبين الشيخ صگبان
وجهه تگدر ودحك لامي الحجت بقهر
كتلك ماراح يعوفها خلاها براسو هالشايب
العايب شفتو شلون تكلم معها ويهدد
بها حتى تقبل به
مااتصير له وانا ابوها،،،،،وخله شيريد
يعمل خله يعمل بنتي لابن عمها
وماتصير غير الو
راح يطردنا من هينه ووين نلفي ياحميد
كاع الله واسعه والرزگ بايدو هوو
اشر لفوك وكمل
مااايموت العبد من الجوع مادامه متوگل على
الحي القيوم
سكت وكمل
خوفي من الله واتگالي على الله
لاخايفين هذا ولا راجين ذاك
ياخالقي لك الامر كله
المد مدك والعطايا
عطاياك
تكدر حالنا من وره جيه الشيخ صگبان
والنهار كلو ظلينا نهوجس منه خاف يكول لابويه
اطلع من الگاع انا ماجنت شايل هم
روحي شلت هم اهلي
اذا صار الخايفين منه وين راح
نلفي ونروح
اعرف ابويه اله عزة نفس شديده وماينزل
نفسو لا لگريب ولا لغريب ظليت
افكر به ودخت من التفكير ظليت اسمع
امي تحجي على خاله زينب وعم
عايد لان ماقبلو يعقدون لشهم
عليه
محد كلو بالصار لا من اهلو ولا من عدنا
سكتنا ،،،،،،كلنا راح يجوز مني لان يعرف
بيه مخطوبه لابن عمي
وماجااز مني هالشايب وظل يلح
ويهدد
العصر طلعت من يم اهلي وانا مخنوگه رجلي اخذتني للمحصر طبيت دحكت لمهرة شافتني
كامت ترفع براسها
لفوك
تريد تسري بالبريه صارلي مده ماطلعت
بها من وره الكاعد يصير بيه
منا برق الشر وسوايتو
الرديه
ومنا شيخ صگبان والي رايدو
وشغل الكاع الي كلما جالو يكبر براسنا انا
وابويه وعم عزام لان هو بخيل وماايصخي
يجيب فلح ويانا
تسرين يامهرة
ضربت برجلها بالگاع
نطلع لجن مااتحدرين على حصان الهامل
سرجتها وانا اتكلم معها واشكيلها همي
من زمان انا هيج اسري بها بالبريه احجي
معها الي بگلبي
طلعت بها من وگت دحكت للشمس حاره
مااهتميت مشيت بها حد الشاخه صهلت وهي تريد
تسري لگاع الشيخ شعلان تكلمت
بغضب
هااا يامهره وش كلنا قبل شويه عوفج من حصان
الهامل الردي وامشي معي
جريت رسنها بقوه سريت احجي معها
اااسري يامهره تره خلگي ضايج وبالي تعبان
سرت بهداه عكس كل مرة عفتها براحتها
ادحك للبعيد وبالي مشغول واهوجس للمستقبل
زين العابدين
الولد طلبو نطلع نخيم بالبريه ونتصيد
ماكلت لاااا حضرنا روحنا وطلعنا العصر بسيارتي
دست بها وحمد يمي وصعب ليوره
هذه هيله
صعب تكلم دحكت للبعيد تسري بمهره بهداوه
فتنا من يمها حمد تبعها بعيونو
الا دار راسو
تكلمت بضوجه
وش بك اول مرة تشوفها
عكدت حواجبي من شفتو
ماجاوب وظل يدحك لها بالمرايه الجانبيه
صعب تكلم بضحك
اليشوفك ياحمد تلاحكها بعيونك يكول
عاشگها لهل البنت
هالبنت تنعشك
ركزت بعيوني على الطريق درت وجهي علي
صافن ومبتسم صعب رد
منهي التنعشك هيله بنت العرب
اي تنعشك البنت مابها اي عله اخلاق وجمال
وگويه وماتهاب احد
ااسكت
صحت بغضب صفن عليه تكلم
وش بك
لاااتجيب طاريها جدامي ااسكت وغيرو
هالسالفه التغث
صعب دغو بجتفو وسكتو
دحكت لها بالجامه بعيده لجن خيالها
اشوفه جدام عيوني
جرحي نغزني لزمتو وحسيت بروحي
اختنگت دست بالسياره اريد ابتعد عن الورايه
وصلنا مجان احنا متلعمين نخيم بها
نصبنا الخيمه وعلكنا نار كعدت اشب بها وصافن
باجر الفجر نكعد نتصيد
هزيت راسي لصعب حمد صب كهوة
انطاها اليه عگاب يمي رف
بجناحو
صعب تكلم
اظن حس بشي
حمد تكلم بضحك
هههه ذيب لفه وراح ياكلك
هاي فينه الحظ اذا صدك
هههههه جبان شجيب الذيب والنار شابه
اسمع كلامهم وساكت
خليت حطب بالنار اخذت سلاحي وكمت
حجيت
راح افتر داير المخيم واشوف اذا اكو شي
اي بس لاتبعد
حمد جاوب سريت انا وصياد وجرو ورثت
جگارة اخذت نفس الچلاب عوت
وهم يدحكون لبعيد تكلمت
هذا واوي ماايگرب خوفكم من ابو سرحان
وغدروو
سكتت من تذكرت هيله شلون جتلتو بگاعنا
اخذت نفس طويل وزتيتو
بغضب
من الله ياخذج ويخلصني منج
وين مااروح اشوفج جدامي والكه شي يذكرني
بيج
مردت الجگارة بايدي وزتيتها عگبت صحت
بغضب بصياد وجرو
عگبو خلنا نرد
رجعت يم الولد كعدت لاف روحي بالفروه
صعب تكلم
الجو بليل تغير
اي نهارنا حار وليلنا كام يبرد
جاوبتو وتمددت
راح تنام ياازين
اي خل النار موجرة وعينكم لاتغفل عن ابو سرحان
هههههه
حمد خرب ضحك ابتسمت صعب تكلم
ماراح انام اظل سهران للفجر
جابوتو بضوجه
اسهر وتعلل وي صياد وجرو وعگاب
عكاب لف راسو ونام يمك
مااجابتو لفيت الغتره على وجهي وغمضت عيوني
غفيت بسرعه كعدت وجهه الفجر
دحگت للنار طافيه وحمد
لاف روحو ونايم صعب مدحوس به
ابتسمت فريت ايدي وكمت شعلتها زدت الحطب
شبت النار صياد كاعد يحور يمنا وجرو ماهو
وين خويك
سالتو عوو ذاك جاوبو
نفضت التراب من ايدي وجبت گهوة
حتئ احضر جديده
حمد كعد يثاوب شاف صعب نايم حدو
دفرو وصاح
ااكعد يامال الصكعه شنو مرتك انا
ونايم جنبي
ضحكت صعب كعد يفرگ بوجهو جاوبو
صگعه التصگعك انا وين وانت وين
حمد دحك اليه جاوبت
بعد شويه وتنم على صدرو
كووم ولك من لا كام الك اسم
حمد انهد به كام ينفض برحوو صعب كام
ويا ينفض الفروه وهو يثاوب
تكلمت
يله فگو ريگم بشويه كهوة وتمر خلنا نتطلع
نتصيد
حمد جاوبني بضحك
ههه مااظنتي نصيد شي هرج جرو
ماخله شي يلفي
يمنا
خلنا نسري ونشوف
جاوبت وكمت شلت سلاحي رگبت السياره
وهم وياي
ليان
ثاني اني بالمشتل ايهم اجه العصر
وجاب ويا باقه ورد ابتسمت من طلعها من ورة
ظهره وحجه
اعرفج تحبين الورد وجبتلج احلى
ورد لگيته
جان جوري احمر يجنن ريحته تخبل
اشتميته كمل بضحك
ماعندج منه موو
لاا اني ماابيع باقات ورد افكر اخلي
يعني هيج كتجربه
سكت صفن بعيوني جاوب
سامحتيني ليونه
ابتسمت وخرت شعري ليوره جاوبته
سامحتك ايهم
ابتسم ووملامح وجهه تغيرت مد ايده
يريد يلزم ايدي رجعها وكال بضحك
ههه كمت اخاف الزمج
سكتت هو هم للحظه بعدين كمل
ايدج بس ومااروح زايد وداعت عيونج
تنهدت انطيته ايدي لزمها بهداوه
وبعدين بقوه رفعها باسها بشمه وهو مغمض
خلاها على خده وكال
ريحتج ورد وشكلج بستان ورود
سحبت ايدي بخجل تنهد وكال
نطلع نتغده بره
والله ماادري عندي هوايه شغل وطلبيه
راح تجي بعد شويه ولازم استلمها وتعرف
هوستها الشغل الي راح يطلع
لارا طبت تفاجات بيها وكلت
خير شجابها وهي مو متعوده تجي عليه
سالت بقلق
ها لارا خير صاير شي
سلمي بالاول
جاوبتني بضوجه باوعت لايهم الوجه
تغير كملت
هلو ايهم
هلو لارا شلونج شخبارج
الحمد لله زينه
خير لارا اشوفج جايه عليه
سالتها بقلق جاوبت بعدم اهتمام
ماكو شي جنت ضايجه وكلت خلي اجي
شويه يمج
سكتت سالته
هاي شوكت اجيت
قبل شويه عبالي اخذ ليونه نتغده بره
بس مارهمت لان عدها شغل
هاا اني ماعندي شي نتغده اني وياك سوه
عكدت حواجبي وكلت هاي شبيها شلون
تفرض نفسها علي هو صفن عليها وبعدين
عليه ماعرف شيجاوب حجه
بتردد
هاا عادي
يله لعد خلي نروح
ايهم باوع عليه تمالكت نفسي بصعوبه
وحجيت مبتسمه بجذب
عادي روحو تغدو ورجعها للبيت
سكت وهي ظلت تلح
يله ايهم خلي نروح
مشه من يمي وراح وياها
مااعرف شصار بيه ضجت كلش من وره تصرف
اختي فرضت نفسها بالقوه على ايهم
الي ماعرف شلون يتصرف
ماردت اتصرف
تصرف يوكع اختي من عينه ووافقت تروح ويا
واني مو راضيه
اعرف اختي غيرانه مني لان شافت ايهم
كامل الموصفات ويحبني كلش
وسو شي خل الكل
تحجي بي
شطلبت منه جابه اليه وكله غالي وبيت وحدي
وهو شخصيه واله جاذبيه
حلوه ومقدم بالشرطه
وابن عائله غنيه
يعني مابي اي عيب
تنهدت وكلت من ارجع احجي
وي ماما خلي تحجي
وياها لان تصرفاتها صارت
اوفر كلش وكاعده تفشل بينا كدامه تفرض نفسها بكعدتنا اني ويا بالبيت ماعده شقاها
الماصخ
كم مرة انبها عيب تحجين هيج ويا
صح هو رجلي ومن عدنا صار بس يظل غريب
عنا وينقد اذا شاف تصرف مو حلو منها
او منا
تنهدت وكمت من اجتي الطلبيه التهيت
بيها وتاخرت لليل ايهم اجه
بعد ماخابرني وكال راح اجي اوصلج
يمه بالسياره واشوفه صافن وساكت
سالته
بيك شي
هاا لاا
ابتسمت وجاوبته
مو طبعك تسكت واني يمك
ابتسم وجاوبني
كلت تعبانه ومالج خلك تحجين وياي
لاااا الي خلگ احجي وياك احجي
شلون جان غداك وي لارا
ههه اختج فلم
صفنت علي كمل بضحك
الواحد الا يعاشرها يله يعرف هي شنو
ماافتهمت قصدك
يعني هي تحب تضحك وتحب الحياه
وسوالفها حلوه
سكتت باوع عليه وكمل
بس انتي غير
رفعت حواجبي جاوبته
شلون اني غير
صفن بوجهي نظراته تغيرت وجاوب
انتي مااعرف اوصفج بس عيونج
قصه
ابتسمت رديت
بس عيوني
وكف السياره يم بيت اهلي مال
عليه ماوخرت خله عيونه بعيوني وجاوبني
بصوت متغير
كلج حلوة واحلى شي خجلج ثگلج
هذني اموت بيهن
سكتت وبالي راح يم اختي جاوبته بتردد
ايهم لاتفكر بااختي يعني تعرف
لاا يروح بالج بعيد تره اعرف طبع لارا واعرف
هي بس لسان
مصعب والسوته ويا صار كدامي تنهدت
هو كمل مبتسم
تعقل بس تكبر
هزيت راسي باي نزلت حجه
اخابرج مو تنامين
لاااا كاعده لان عندي شغل بالحاسبه
ههههه راح ابطلج ليونه
ابتسمت وجاوبته
تكدر
سكت مال على الكرسي مالتي
جاوب
اني يمج كلشي مااكدر اسوي
ضحكت وجاوبته
راح استغل ضعفك
استغليني كلي راضي وباصم بالعشرة
سكتت سالت
ماتنزل يم ابويه ووسيم
لااا عندي شغللل
اكد على اخر كلمه ضحكت وهو هم
اشر باي وراح
مالك
انحجزت بالمركز وصارت طلابه جبيره لان
اعتديت على الرجال والدوريه
مادرت بال لروحي ردت اعرف لميس
وين ولت وهي حامل جهازي ماانطوة اليه للصبح
خابرتها ماردت خابرت اخوتي وابويه اجوي عليه
وجابو محامي
عرفت من اخويه فهد من خابرته وكتله عليها
ابويه مخابر عمي ووعارف هي ماخذه تكسي
ورايحه لاهلها عافتني وانا بنص العرگه ولا همها
شراح يصير بيه وكلو من وراها
ومن وره مغثتها سويت
السويتو
الغضب ترس صدري ابويه واخوتي گوه
سدو السالفه بالفلوس
طلعت مااشوف دربي من الغضب والعصبيه الحجي ماحجه شي ساكت بس الغضب
تارس ملامحو
وصلنا بيت اهلي نزلت اسد وافتح بأيدي
امي تلكتني تبجي حجت
الحمد لله على السلامه يمه
على شنوو تتحمدين الو بالسلامه على شين
وجهو والسواه بمرتو وبالاوادم
شسوويت بيها لبنت اخوك ااحجي
يابه شكالت الك هاااي الادبسزز ااحجي
كلي شجذبت هالمره وشذبت تهمه
براسي
ااانجب ولك ولاتغلط عليها ااحتررم روحك
وبطل عاد سوالفك الجايفه
سكتت امي لزمته بخوف وخرها وتقدم
عليه صاح بغضب
وولك استحي على طولك انت الجبير وقدوه
اخوتك فهمني شلون تاخذ مرتك لمطعم
وترقم بنات بنفس المكان الكاعدين بي
انت وياها
فكيت عيوني صحت
ااني رقمت شلووون وهنه يمها كاعدات
واني كاعد ادخن يم الجامه
امي حجت
هاا كتلك بنت اخوك اجذب كتلك مالك بطل
هاي السوالف وكعد وسكت
يابه تره لميس زدوتها كلش يعني رجلها
متعارك وي ناس تهده وتمشي
وتروح تركب تكسي
وترجع لاهلها ولا هي ولا هم كلفو
روحهم وحجو اتصلو وكالو
يابه مالك هيج وهيج
صار بي
فهد جاوبو بضوجه رد بعصبيه
وشترريد تظل بالسياره واخوك السبع
متعارك وي الشرطه خافت وتصرفت بدون وعي
ااي خافت على روحها بس ماخافت عليه اني
ااي تعاركت جدامها واخذوني الشرطه
مكلبج
يمه مايخالف حامل وصغيره وماتعرف
تصرف
صحت بغضب
اافتهمت حامل وصغيره ماااتحجي ماادكول
الكم اني تصخمت وانذبيت بالسجن
مااتجذب وادكول اني
رقمت واني لااا مسويها ولا حاجي
وي اي وحده
لااااتصيح
ابويه انهد بيه كملت بخبال
حجييي اني بطلت ذاك الدرب بطلت اعرف
نسوان عليها بس وورروح جدي وحك
هذا الشارب الي بوجهي
مادام سوت هيج
بيه الا اكسر خشمها وارجع
لذاك الدرب
ابويه تقدم عليه فهد ومحمود لزموا
امي صاحت وهي تبجي
ولك شجاي تحجي انت تخبلت خما تخبلت
نفضت قميصي بقوه وجاوبت بخبال
والحجي وي ابويه
اااي تخبلت مااظل عقل هنااااا
اشرت على راسي وكملت
بخبال
بنت اخووك بعد مااريدها تلفي بيتي
خلهااااا بيت اهلها خلهم هم يفيدوها
لهااااي الادبسسز واااريد من الله احد يگلي
رجعها الااااا اسوي شي
مو صاير
طلعت امشي بسرعه اخوتي اجوي ورايه
لزموني بره نفضت روحي منهم محمود حجه
بهدؤ
ووين رايح يمعود ظل هينه
عووفوني
صحت باعصاب ركبت سيارتي وطلعت بيها
هيله
الحرب مال الشيخ صگبان بدت
ويانه وكام يتحجج علينا وماعاجبه الشغل وزاد من
طلع علينا بسالفه الحلال واخذ من حصه ابويه
ورچ جبير
سكت له وكال
اتجفه شرو الما ادبر النا مچان ثاني امي كالت
احجي مع الشيخ شعلان يشوفلك
شغل بگاعو ماقبل
وكال
راح يفكر انا اريدو يوفي دينو القديم
وانا مااريد هذا الشي يصير
امي سكتت وظلت تدحك اليه
تكلم مبتسم
تهون ياام هيله الدنيا مهود سهود
اعرف الدنيا ماتضيج الا وتفرج لجن هوو
مدري وش بلاها تخبل هالشايب
وشال الخجل فد مرة
ابويه سكت امي كملت
يعگب شهم وانا اتكلم معو
يااحرمه وش بلاج الولد داخل انذار من وره
الوضع ماجاي تسمعين شصاير
بالديره ووش بلاها وبعدين
مو انا ااي اذب بنتي
على ابن اخويه واكولو تعال اگطع مهر
عيب بحگي وحك بنتي
هي موو بايرة حتى اظل الح بهل
السالفه
ذبيت حسرة الوضع جان مخربط والدنيا مگلوبه
والكل يحجي ويكول راح تصير
حرب بس العدو من ماعرفنا
اسمع سوالفهم انا وخواتي ريمه سالتني
بصوت ناصي
شراح يصير ياهيله
ماجاوبت كمت من يمهم وانا شايله همنا
وهم شهم االي صارلو فتره طويله
ما نزل باجازه
يخابر شويه يحجي جم كلمه
ويروح ردت اكعد معه اشكيلو همي اكلو شكاعد
يصير بيه لجن ماكدرت احجي
شي خفت عليه يجي ويتصرف تصرف مع
الشيخ صگبان ويضيع
من وراه
وهم ماردت اسمع حجايه من خالتي وعمي
المدري وش بلاهم الخوف جتلهم
من شافو الشيخ صگبان
لح عليه
حجايه توديهم وحجايه تجيبهم
ماحسيتهم سند ولا وكفو وي امي وابويه
بهل السالفه حجايتهم وحده
ماعندنا فلوس والولد بيا حال حتى يزوج
خلي يجهز حالو وبعدين نگطع
مهر
بهل الفتره النوم جافاني
اكعد من وكت الفجر ابويه
حدر للجامع وانا طلعت احلب الهايشه
كملت وعكبت للدارنا امي
خذتو مني وكالت
يمه روحي حوشي النا طماطه وبيتنجان
اي يمه هسه
غسلت وسريت للزرع ادحك للشمس
طلعت وضوها بين ولاح بالسما
حشت الي رادتو امي ووكفت جانت بارده لان
گرب الشتا دحكت للجهه الثانيه
ماطورهم مشتغل ويدير
مي
ياااهيله
گلبي فز من سمعت صوت شهم دحكت الو
جاي من بعيد يسري بگاع الشيخ شعلان كلت
السيارة ذابتو هناك
سريت بسرعه الو وانا فرحانه
بشوفتو عبرت الگنطرة حدر يضحك وفرحان
بشوفتي گرب فاتح ايدو وكفت
مسافه عنو سمعت بنفس
اللحظه صهيل
هايل
دحكت من جهه الشاخه فارس
ملثم جاي علينا عرفتو برق الشر رحت
وكفت يم ابن عمي وانا عاكده
الحواجب
زين العابدين
تعلمت الفجر والمغرب اسري بهايل بالبريه
اروح من جهه المزرعه الثانيه
حتى مااشوف هيله
ولا هايل يدور على مهره
عگبت به وانا ساهي وافكر بالي سمعتو
من ابويه باخر جم يوم ظل يلح عليه
هو وامي وجدتي بسالفه الزواج
وبده يهدد بيه اذا ماسويت الي يريدو
يشيل ايدو مني ويسحب مني شكو رصيد عندي
بالبنك انتبهت هايل ماخذني
حد الشاخه
سريت به اريد اعگب لدارنا عكدت
حواجبي من بعيد شفت هيله حدرت على الگنطرة
ولاح لي واحد يمشي بسرعه
عرفتو شهم لابس زي عسكري
سرت الو بفرح مشيت بهداوه وانا صافن
عليهم شلون تلاكو فتح ايدو
وكفت به صهل هايل
دارت وجهها عليه شافتني والوجه
تغير بلحظه خزرتني سرت وعيونها بعيوني
تگربت عليهم
شهم تگلم
كوة الله عزمك ياشيخ
وعزمك ياشهم
جابوتو وحدرت من هايل مشيت لازم
رسنو وخرت اللثام دحگت لهيله
دارت وجهها مني
شلونك ياشهم وش اخبارك عساك مرتاح
دحك لها ابتسم جاوبني
مرتاح ياشيخ عكب مارجعت للديره وشفت
اهلها
وجهها تغير من سمعتو شحجه
ابتسمت له ومااعرف شصار بگلبي ولا ليش اختنگت
درت وجهي منهم سريت بهايل
ماقبل يمشي وكفت به
هم سرو من يمي ظليت ادحك لهم
يمشون وواحد عيونو بعيون
اللخ
صفنت عليهم عاكد الحواجب ونار
شبت بصدري من شفتها تضحك له والملامح
تغيرت تكلمت بغضب
وحقد
بس شهم يقهرج يااهيله هو الي يگسر
ظهرج اذا صارولو شي
درت وجهي اريد اعگب وكفت
وصفنت على الحجيتو
انداريت ودحكت
لهم طولت بالنظر وافكار تدور براسي
تكلمت
اااي ياهيله اذا اريد
اريد احرگ كلبج ااقهرج بشهم لجن شلون اقهرج به شلون يازين تقهرها لهل العايقه
ام عيون گويه
سالفه الزواج طرت براسي سريت وهي
ادك بقوه به
عكبت وره جم يوم لبيت اهلي خواتي لفن
يمنا حتى يشوفني كعدنا نتعلل
الهنوف سالت امي
يمه شسويتو بسالفه زين
دحكت لها وانا اشرب الجاي ردت
مااسويت شي غير هو يكول اي
حتى اتحرك
ابويه تكلم وهو عاكد الحواجب
انت مانااوي تزوج وتعگل
هيله اجتي بين عيوني عكدت حواجبي
وجاوبت بروده واني مصمم
اسوي الي براسي
اي يابه نويت اتزوج بس مو اي وحده
انا رايد بنت انت تعرفها كلش
زين من هي
صفن عليه سالني
من هي
امي دحكت عليه هي وجدتي جاوبت
هيله بنت عم حميد
منوو ولك الفلاحه بنت الفگر
امي صاحت بي ابويه خزرها وسكتت
جدتي جاوبت
يول ااحجي عدل انت تعرف البنت مخطوبه
لابن عمها شلون تريدها لك
لو هي لو مااتزوج
زززين
ابويه صاح بي وكمل بغضب
البنت مخطوبه لابنها عمها يعني ماتجوز
لك
تجوز يابه لا هي اخر وحده ولا اول وحده
انفصخت خطوبتها من ابن عمها
بعدين هي تطول تصيرلي
حرمه
ابويه ضرب ايد بايد وضحك
جاوبني
حتى لو هي موو مخطوبه ماراح ترضى بك
عكدت حواجبي امي ردت بضوجه
عش ماااترضى به عشتو هي تحلم ابني
يتكلم بها ويريدها حرمه له
والله مااتحلم ولا تريدو وابنج يعرف
عن شنو اتكلم
خله عيونه بعيوني كمل بغضب
انت تعرف زين انا على شنو اتكلم
وتعرف هيله ماتطيق تسمع جلمه منك مو عاد تصير
لك حرمة
سكتت جدتي ردت بغضب
وش بك انت تضحك على من تعرف البنت
مخطوبه لابن عمها وتريدها وهي
ماتطيقك
العندي كتلو لو هي لو مااتزوج
عشكتها يبن فضه
امي صاحت وكملت بغضب
كعدت هناك بالمزرعه وعشكتها من صارت
جدام عيونك
سكتت ابويه صفن عليه سال بهدؤ
جاوب
جنت اريدها بااي شكل ردت اكسر خشمها
واحرگ گلبها على شهم ردتها لي اذلها كل يوم وابرد نار گلبي جذبت
وكلت
اي عشكتها
الكل سكت كملت وي ابويه
يابه لو هي لو ماازوج طول العمر
هيله
شهم جان جاي اجازه اسبوع سمعت منو الوضع ماهو بزين وراح ينقلو لغير
وحده عگب السمعتو منو ماحجيت شي له
ماردتو يشيل هم فوك همو
وره، ،،،، يومين شفت الشيخ
شعلان حدر من يم
كاعوا ابويه جان كاعد يم الكنطرة
وجن عدهم سالفه
كلت راح يگلو عن سالفه الشيخ صگبان مارحت
يمهم عگبت والتهيت انظف بالمحصر
انا وريمه
ياهيله
ها ياهاله
شوفي البيض
دحكت لهاله شايله بثوبها بيضا جثير
سالت
هذا وين لگيتي
هههه حد الشاخه بالگصب
واحنا نكول وين ديروح البيض
ابتسمت من شفت ساريه وريهام هم
اجني شايلات البيض بهدومهن
خلنا بالساجيه خل نشوف الماذر به
اي هو هم هيج
جاوبتني وعگبت هي وياهن
ههههه الدجاجات سلمن من امي تحلفت بهن
تذبحهن اذا ظلن مايبيضن
ابتسمت بوجه ريمه رديت
اندلينا مچانهن بعد وهساع نلمو كل يوم
اي
كملنا وطلعنا انا واختي غسلنا صلينا الفرض
وابويه ماهو عكب وره ساعه سلم
وكعد يتغده انتظرته يبشرنا بسالفه
زينه من الشيخ شعلان لجن
ماحجه شي
اكل شويه وكام امي تتبعتو بنظرها كامت وراه
ولحگتو ريمه حجت
صاير شي ياهيله
كمت وراهم سريت وكفت وترددت اسال
من خجلي انداريت اريد اعكب
وكفت من سمعت ابويه
تكلم
الظاهر زين ولد الشيخ شعلان هم خال عيونو
على هيله حالو حال شيخ
صگبان
الشيخ شعلان
جنت اعرف هيله يريدها بن عمها
وبحسبه المخطوبه له وشفت ابني عشگها
ورادها له حرت ودخت وش اسوي
احجي مع صاحبي ورفيجي
اكول عيب منو اخطب
لابني على خطبه
ابن اخو وهم
مايجوز
لجن كلت احجي وي بدون مااطلبها منو
اجس نبضو من بعيد خابرتو من
لفيت بالمزرعه وحدرت
صوب الكنطرة كعدنا سوه سالتو عن
احاولو تحمد الله وكال بخير
شخبار هيله مااعقدت
لااا ياشيخ الولد مو جاهزه امورو
هاا الله يوفقو ويكملها
اللهم امين
سكتت وكملت
تعرف ياحميد انا جنت اريدها لزين
لجن ماصارت القسمه
صفن عليه وجاوبني
قسمه بعد ياشيخ
اسالك
كول ياشيخ
لو بنتك ماخاطبها ابن اخوك تنطيها لي
سكت طول تكلمت
تكلم يبو هيله انت اخويه وماازعل منك
اذا حجيت الي بگلبك
ياشيخ ابنك سبع وزلمه گوي لجن حالو
مايعجب سلك درب ماهو بدربنا
وانت تعرف شجاي احجي
تحسرت وجاوبتو بقهر
اااي اعرف شجاي تحجي وكلت مالو غير هيله
تعدل حالو لان اعرفها شنو هي وشلون
تعرف تصرف معو
زين مايعدل حالو غير هو من يفطن لنفسو
ويعرف بحالو شكاعد يسوي
سكتت صفنت لكاعهم رد تكلم
لاتزعل مني ياشيخ انت تعرف انا احبك
واحب ابنك لجن هاي بنتي وهي
امانه برگبتي لازم
انطيها لواحد
سكت
كملت
لواحد مو مثل ابني
مارد كمت لحيلي وكملت
حگك يابو هيله اني لو بمچانك هم ماانطي بنتي
لواحد مثل ابني
وكفت ادحك للبعيد وهو وكف يمي
سكتنا حجيت وره لحظه
الاخبار ماهي بطيبه يابو هيله
اي عرفت من شهم الجاي مايسر
ااي
سكتت درت روحي علي صفنت بوجهو
متكدر وبالو شي سالت
وش بك ياحميد احسك مهموم
وضايج
تنهد دحك للدارو طول بالسكوت
سالت
احجي ياخوي انا عندك
دحك عليه وجاوب
ماتقصر ياشيخ كدها گول وفعل لجن
سكت وبلع السالفه حلفتو
عز الله لا تحجي وادكول وش بلاك
يااشيخ دايخ من ورة الشيخ صگبان
وسالفتو الرديه
عكدت حواجبي وجابتو
خير يااحميد وش بلاها هذا معك
يريد هيله ياابو زين
فكيت عيوني وتفاجات بكلامو سالت
تحجي صدك انت
اي ياشيخ ولح بهاي السالفه وكدر حالي
من وراها
يااحميد كاعي لك الفي بها انت واهلك
ولاتشيل هم عيوني لك
ماتقصر ياشيخ لجن انا مااريدها تطلع مني
خل اطول خلك معه واشوف تاليها
ويا
لحيت علي ماقبل تكلمت
شوف ياخويه داري دارك وكاعي كاعك
وعيوني غطه وفراش لك انت
واهلك من تشوفو
عمل ردي معك
اترك كلشي وحدر لگاعي
الله كريم شيخ ان شاء الله مايصير
الي بالي
تهون يااخويه تهون وانا عندك حزام ظهر
وسلاح حدك
بارك الله بيك وماتقصر ياشيخ
زين العابدين
ابويه عگب وگلي شيل هيله من راسك
هي لابن عمها تريدو ويردها وحتى لو هي مو الو
ماراح ترضى بك وانت تعرف
السبب
عگب وانا ظليت اريد اسوي الي براسي
ردتها اليه بالگوة والغصب ردت اكسر خشمها
واعلم عليها مثل ماعلمت عليه وتركت
اثر جبير بيه الحقد ترس گلبي وعمى عيوني
والشيطان خلاني افكر بالف فكرة مو زينة
مرة اكول اخطفها واكسرها وذيج
الساعه تقبل بيه مغصوبه
مرة اردد اچتل شهم واحرگ گلبها واخليها
تموت بحسرتو
هايم على وجهي بهل الليل جزيت الزرع بدون
وعي دحگت لدارهم نار مشتعله
بصدري والجرح ينغز بيه
كلما تذكرتها وتذكرت
السوتو بيه
لزمتو بايدي وحجيت بصوت مخنوك
هينه ياهيله اگضبج وين ترحين
من ايدي
نفضت ايدي بقوه وانا غادي نار
گوة الله عزمك ياشيخ
سمعت صوت درت روحي ابتسمت والشر صار بين عيوني من شفت شهم واكف جدامي
