رواية قيود العوف الفصل الحادي عشر 11 بقلم ريتا

ثُم اتخذتُكَ كحبِل نجاةٍ لِتُنقذني من ما 

أنا اغرقُ بهِ لم أكُن أعي انك مُغرِقي .

شبابات صوتوا دوسوا علىٰ النجمَة 🤏🏻

<_________________________>

بقت عيني معلگة علىٰ الجامة وين صاررر !!! 

معقولة عرفوه لزم جماعتهم وانخطف 

ايي ايي معقولة عصابات كُل شيء يطلع منهم 

بقت فكرة تاخذني ولخ تجيبني رغد يمَي تسولف واني فاصلة

عيني علىٰ الشارع واباوع علىٰ الي يجي وعلىٰ الي يروح 

-رغد: هاي عود صدگ وين صار!

-جُمان: مااا اعرف علمي علمج 

-رغد: بس طووول هوااي هاي كله علاج !! 

-جُمان: ماا اعرف رغد 

چنت اجاوبها واجاوب تساؤلاتي وأگول انخطف عرفوه وخطفوه 

رسمت الف سيناريو براسي واني افكر اذا انخطف شلون ارجع لأمي

شلون أخلص منهم بعد هو الي وعدني يرجعني ويخلصني من قيودهم

وسعت عيوني وضحكت من شفتة جاي وديمشي برهاوة ولازم بأيدة علاگة عرفتها علاگة علاجي اخذت نفسسسسس عمييييييييييييق وكُله راحة وگلت الحمدلله والشكر يارب 

دخييييييلك اريييييدة يخلصني منهم هو وعدني لتخلي يصير بيه شيء 

حسيت نفسَي صرت أنانية بس شسَوي مو بيدي المرحلة الي وصلت الها خلتني ماا افكر بأحد بس بروحي وشلون اخلص منهم ومن همهم 

فتح باب السيارة وخلة علاگة العلاج علىٰ الكشن 

-رغد: خووفتنا ليش تأخرت 

صارت عيني علىٰ المرايَة چان ديشغل بالسيارة رفع عينه واجت بعيني جاوب رغد وهو يگول 

-عَوف: چان عندي شغل بسيَط 

-رغد: اشوة عبالنا صار بيك شيء 

ما جاوبها وشغل السيَارة تچيت راسَي علىٰ الجامة ورجلي تدگ من الووجع اخذت نفسسس وغمضت عيوني وهمست بيني وبين نفسي ميخالف تحملتيي كُل انواع العنف والألم لأسابيع متتحملين هذا ؟ 

بقيت اصبر بروحي مثل كل مرة صرت اعين واعاون روحي 

واطمن روحي بروحي واطبطب عليَه هذا حال الي ماعنده احد

باوعت لرغد شَبه الي غفت ابتسَمت واني اباوعلها تعبت وياي 

اني اعيط وهي تعيط ويايَة خففت عنَي هَواية 

                                            

              

                    

وگف السيَارة ونزل بقىٰ شوية وشفته اجة وبأيدة علاليگ هواية 

تقدم الي فتح الباب وگال

-عَوف: خليهم يمچن

اخذتهم منة واجتي ريحة اكل منهم ترست السيارة واني جوعانة وميتة جوع بنفسي افتح العلاليگ واتربع بنص السيااارررة واگعد اكل والله لو مَا الخجل 

گعدت رغد شمت الريحة وگالت 

-رغد: الله ميتة جوع ميتة 

-عَوف: من نوصل اكلي وخلي جُمان تاكل وياكم عندها علاج جبت الها كبدة 

عقچت وجهي من گال كبدة لو اموت ماا اكلهااا تلعب نفسي منهااااا طعمها مااا احبه بس اكلها أتقيء بسسسرعة 

انتبه عليَه عقچت وجهي منها 

-عَوف: لازم تاكلينها وتعوضين جسمج 

جاوبتة واني جاي اسلك 

-جُمان: اي اكلها 

حچة بعدم مبالاة وهو يسَوق 

-عَوف: اي طبعاً چا جبتها لقاسم

-رغد: قاسم خلي يشم ريحتها يخلي لجُمان بس العلاليگ

-جُمان: الف عافية عليه اني ماا اكلها اصلاً ابد

-عَوف: يابة ماتاكلينها بس هلمرة زينة الج 

هزيت اله راسي وسكتت ماا اكلها لو اموت 

- وصلنا ونزلنااا اني ورغد وانطاني علاجي وصعد بالسيارة وراح 

بدون ميحچي اي شيء 

فتحنا باب البيت ورجعت ابتسمت من شفت الحديقة

مو بأيدي احب الورد والزرع عندي حب ورغبة عجيبة للزرع والورد 

دخلنا واتلگتنا الحجية 

-جميلة: يمة وين صرتوا ظليت اهم بيكم 

-رغد: بيبي أتأخرنا علىٰ ما تنظف جرحها واتعقم 

دخلت بدلت واتمددت شَوية نوب گلت عيب گاعدة هنا وحدي

هسة شيگولون خَلي اروح يمهن 

طلعت ولگيت الحجية بأيدها السبحة ودتسبَح ابتسمت الها 

طبطب بأيدها علىٰ الگاع وگالت 

-جميلة: تعاي يمي يمة 

انهضمت وتغرغرت عيَوني يمَة ؟ صار الي هوايَة مسامعتها 

ملهوفة علىٰ هايَة الكلمة بصَوت امي الي يرد روحي بس وين اوووفف

رحت گعدت يمَها واني ابتسَم بگلب محروگ وروح مكسورة 

حَطت أيدها علىٰ أيدي وگالت 

- عمت عيني عليج يمة تمرمرتي 

مسحت علىٰ ايدها وگلت 

- اسم الله عليج حجية هذا الي كاتبة عليه الله لا اعتراض علىٰ حكمه 

-جميلة: انه اعرف سالفتج سولفلي قويسم بس مو كلها 

ردت احچي قاطعتني وگالت 

- ومو كل شيء ينحچي يايمة مرات اكو سوالف ماتنحچي ومن تنذكر تلچم وانه ماريد اهيج مواجعج يايمة بس ارد احچي وياچ چم حچاية 

            

              

                    

الله من يحب عبدة يبتليه لأن العبد الصالح والمؤمن بالله ينعرف وكت شدتة ووكت الضيج اكو يسولفون بالإيمان وبالأعمال بس هو يايمة إيمانة ضعيف ومن تصير عندة شدة ويضيق بيه الوكت تلگينة لا ملتجىء لربة ولا متقرب اله 

حاط ايدة علىٰ خدة وملتهي بمصيبتة وناسي عندة رب جاي يمتحنة جاي يقويه لأن الدنيا شدة ورة شدة تضيق بيك وتفرج وراها تضيق وتفرج 

والانسان لازم يكون قوي حتىٰ يگدر يواجه الشدة ويوگف بوجهة 

الواحد شلون يكون قوي اذا ما چان إيمانة وثقتة بربة قوية 

واذا ماتقرب اله وكت همة ويدعية يشرح اله صدره ويفك ضيقتة 

سبحانة حتىٰ بقدرة الصعب اكو رحمَة يبتلي العبد حتىٰ يقترب اله

الله رحيم يمكن ينجرح الانسان بالدنيا بس يداويه بالاخرة 

أنتِ تحديتي واتحملتي الألم والتعب وصبرتي وما طاوعتيهم 

لو مطاوعتهَم ومشَيتي وياهم بالطريق الي يردون يمشَون بيه 

چا خسرتي الدنيا وخسرتي الاخرة سوة .

الله ابتلاج بس انطاج صبر وقوة وعزيمة وأنتِ عبد صالح 

عندج إيمان قوي بربج وما استسلمتي بس بنَهاية النفق اكو ضوء

والله وصلج لهذا الضوء وگدرتي تشوفينَة أكو حكمة بالي صَار وياچ 

هذي الدنيا دار شقاء ومكابدة بس الله من كثر رحمتة يقوي الأنسان ويخليه يتعلم علىٰ الصبر ويكون شجاع ويواجَه أكو اصعب من أن الانسان يتعذب ؟

وأشد وأسوأ انواع العذاب بس من رحمة الله صبرتي واتحملتي الألم وقاومتي وما استسلمتي المصائب تخلق أنسان جديد 

بالأخير الله يريد يجزي الصابر ويعاقب الساخط الله رحيم يايمة

وشوفي كضوهم يمة وحقج الله يرجعة الج منهم اضعاف وداعتج

چنت استمع الها والدموع ماتركت مكان ما بللتة بوجهي وحتىٰ ملابسَي مسحت دموعي ورحت حضنتها وهي تمسح علىٰ ظهري غمضت عيوني وگلت الها 

-جُمان: چانت مواساة عظيمة وچنت احتاج احد بحنيتج يطبطب عليَه ويمدني بالأمل الحمدلله اني راضية بكُل شيء الله ابتلاني بيه وبالنهاية اعرف ومؤمنة اكو نتيجة عظيمة وترضيني من كل الي مريت بيه 

شكراً الج بيبي حييتي روحي بكلامج الي متروس حنية 

-جميلة: بعد عمري يمة 

باوعت لرغد متكرفصة وتبچي ويايَة ضحكت وضحكت ويَاية مسحت دموعها وگالت 

-رغد: احنة لو ما حبوبتي وحنيتها ماعشنا 

وراحت دخلت بحضنها وهي تمسَح علىٰ راسها لحد ما گالت 

يا نسينا الاكل هسة برد راحت فتحت العلاليگ وجابتَهم يمنا 

            

              

                    

-رغد: مو تستحين ترىٰ عندج علاج ! 

-جُمان: ههههههههههههه لااا جوعانة اريد اكل 

-رغد: هاج الكبدة 

-جُمان: اوووووووع ماا اكلهة 

-جميلة: يمة هاي زينة الج كلهة عافية 

استسلمت واكلتها گواا اكل بيها واغمض بعيوني ماحابتها 

وهنة يضحكن عليييَة اخر شيء سويت الي لفة همبرگر وگعدت اكل

****** 

-عَوف: گواهم الله العزاز 

-قاسم: مبينة الامور حلوة مرتاحين 

-عَوف: چا شلون مايرتاحون شمسَوين المگاريد 

-قاسم: بس خطف وتسليب

-عَوف: وتجارة مخدرات واعضاء

-قاسم: وقتل واجرام

-عَوف: ودع**ارة 

-قاسم: هايهية 

-عَوف: ماكو يعني منا منا بعد قاسم 

-قاسم: لا هايهية چا بعد شمسوين ماتگلي 

-عَوف: فدوه لله من وجوهم تحسهم فقرة

نط واحد حچة وهو يبچي 

- والله احنة فقرة سيدي انجبرنا نشتغل هيچ

-عَوف: تؤ تؤ سودة عليه 

- والله فقرة سيدي الدنيا جبرتنا

-عَوف: اي لا بس ترىٰ مبينين فقرة قاسم

-قاسم: مبينين ذوليج همَة 

-عَوف: وانجبروا مو بيديهم 

-قاسم: اي سيدي گوة 

-عَوف: ومن اشكالهم مبينين من اهل الله 

-قاسم: من اهل الله بحت 

-عَوف: والعوز چتال صاحبة ياقاسم ويجبر

-قاسم: كلش يجبر مو شلون ما چان

اتقدم عليهم ورگع واحد راشدي وانه گلت بگلبي اقرة ع عظام وجهك السلام انتَ هذا وجهة افتر وبقىٰ مفتر ما رجعة حقة يمكن حتى اعصاب رقبتة اتشنجت نوب راشدي ومن عَوف هذا الله مارايدة 

-عَوف: ولك حيييوان هذا الحچي تحچي يم الغشمَة مو يمي ولك المثلك مرو عليه هواي قشمرر 

            

              

                    

كضة من ذاناتة لواهن اثنينهن وگال اله ..

-عَوف: ياهو المسؤول عنكم وهيج متجاسرين ؟

- محد سيدي والله محد 

-عَوف: بدة يمسلت 

-قاسم: مايدري هذن قديمات وشابعين منهن

-محد محد والله 

-عوف: احچي من هسة وفضها لا أتعبني لأن بس اتعبني ماا اشوفك گدامي وما ارحمك 

دفرة حيييل وگال ..

-منو چبيركم السافل البايعها وشادين ظهركم بيه ؟

كل هلحچي وهمة كلهم ساكتين عَوف بيه طريقة ما يتعب روحة بالحچي وياهم يحچي كم حچاية والباقي فعل والله لا يطيح واحد بأيدة لأن يزوعة العافية دود 

-عَوف: هذا التخسبگ مايعجبني قاسم جيبلي ابرة

فكيت حلگي ابرة ؟ كلهم رفعوا راسهم وباوعوا اله ورجع گال

-عَوف: ياگ*** بيكم زرف رجل البنية بالإبرة 

بقوا ساكتين ومحد حچة عاط بيَهم وگال ..

-سمعتونيييييي لولااا حواويييين ؟ يا زمال بيكم استخدم الإبرة وياها ؟

-اني اني سيدي

ضحك بخفة بوجهة واندار عليه اشرلي براسة طلعت أدور علىٰ ابرة ادري وين اللگي ابرة بالمركز نخيط هدومنة هنا فتت للغرف سألتهم واحد واحد علىٰ ابرة بس مالگيت ..

-عماد: شتسوي بالإبرة 

-اخيط بيها حلگك 

-زمااااااال 

سديت الباب وطلعت صارت گدامي بنية موجودة بالمركز ويمها رجال جبير .. أجت عيني علىٰ حجابها  اتذكرت رغد تحط ابرة بيها راس بالشيلة بسرعة تقدمت الها وحچيت ..

- خوية اريد ابرة من شالج 

عقدت حاجبها وگالت مستغربة 

-نعم ؟ 

خوية ابرة ابرة هاي التحطنها بالشيلة 

ضحكت مصدومة حقها شهلفشلة لخاطر طليان يعقوب اخ عوف ..

-قصدك دبوس ؟ 

والله ياخوية دبوس حبوس اي شيء المهم مثل الإبرة 

ضحكت وهزت راسها مدت ايدها علىٰ حجابها وطلعت منه دبوس علىٰ گولتها اخذته منها واتشكرتها ورجعت فتت للغرفة حطيته بأيدة .. باوعت اله ضحك واتقدم علىٰ هذا الي نطق شيريد يسوي بيه عود..

            

              

                    

-عوف: ارفع رجلك 

-لا سيدي فدوه ارجوك لا تسويها مااا اعيدها بعد 

-عَوف: شتعيدها مطي وين تعيدها بعد شحدك مد رجلك

صار يرافس چنة طلي ..

-سيدي لا أرجوك والله توجع سيدي أبعده عني 

-عَوف: توجع ؟ توجع يازندددديق من خليته برجلها وگعدت تستلذ بألمها ماترددت أشوف ؟ 

-سيدي ارجوك 

سحب رجلة بقوة وثبتها وهو مقيد ايديهم كلهم ومايگدرون يتحركون حتىٰ جاب الدبوس ودخلة كله برجلة وهذا يصرخ صريخ صار المركز صالة ولادة من وراه 

-سيدييييييييي لاااااااااااااا

وعَوف مستمر يدخل الدبوس كله يتعمد برجلة ويگلة

-عَوف: اي اتوجععع زمااااللل توجع 

- سيدي ابوس ايدك لا ابوس ايدك عوفنيييييي

باوعت اله طلع الدبوس من رجلة معووج ورجلة صارت تنزف دم نزف وهو مستمر يصرخ ويجالع مو يصرخ هم انطاني اياه وگال اله..

-عَوف: شوفوا واحد واحد راح افتر عليكم خلگي طويل هلمرة وياكم اذا حيوان منكم چذب لو بحرف واحد نهايتكم تصير سودة علىٰ ايدي. 

- محد وراناااا محدددد 

نطق الثاني وگال..

-كل الافعال الي سويناهم اتفقنا عليها ثلاثتنا واشتغلناها بعد محد ورانا ولا ساندين ظهرنا علىٰ احد لو تحقق لمية سنة ماراح تسمع غير هذا الجواب

كتف ايديَه وضحك وگال 

-عَوف: خطارنا يراد الة شيء .. وراح رفسة بالضبط بمكان قلبة بحذائة القوي وشغل الجگارة بجداحتة 

ورثها واول ماحطها علىٰ شفتة وگال 

-عَوف: هذا الحلگ اريدة مايحچي غير بالشيء الاريدة راح يبقىٰ مسدود لحد ما تفتحة وتحچي وحلگك مطگك 

مشىٰ الجگارة علىٰ شفتة من الطول للطول وهذا يون ويصرخ اخر شيء رفعها من شفتة وحطها بنص گصتة وگال اله ..

-عَوف: علمود تعرف تسَولف عدل وتعرف ويامن جاي تحچي

مو غرفة تحقيق صارت صالة ولادة هذا يصرخ وهذاك يصرخ شهروناا وخزونااا الحواوين..  

-عَوف: حسَوا بيها و بوجعها .... بعدني مطول خلگي وياكم وبعده الحبل علىٰ الجرار هذن عندي مثل النفخة من انفخ عليكم

الفصل الثاني عشر من هنا