رواية علي الهامش الفصل الثاني عشر بقلم جمانه السعيدي
اسامه..بقت امي اليله كله بس تحجي بعلاوي لان مامفاركته من يوم صار لليوم
اما احسان نفس كل يوم اتعشى وبدل وطلع
ابد ما مهتم الزعل زوجته
من رجعت بليل امي منتظرني
اسامه....هااا يمه خير
امي...منتظرنك
اسامه...شكوووو
امي...نروح نصالح عبير
اسامه...اصالح عبير اني شكووو زعلت هيه وزوجها هو يروح يصالحها اني مالي علاقه
اني حتى مااعرف ليش هما تعاركو وليش هيه زعلانه
امي.. توسلت .بااحسان طلع و ماقبل يروح وياي نصالحها يكول هاي زايحه نعملها بايدها خليها تتادب
اسامه...اول مره احسان يحجي حجي معقول
امي...بس اني مااكدر افارك علاوي
اسامه...يمه قابل علاوي شعلي هسه تشوفيها باجر راجعه
وين تتحمل بيت اهلها الفكر
امي...هاا ثنيينكم ماترحون وياي باجر من الصبح اروح وارجعها
اسامه...بكيفج انتي حره بس اني مااروح واكعد ويا هيج شكول واخليهم يتشرطون عليه
امي...باجر اروح عليهم وارجعها
اسامه...صعدت الغرفتي ارتاح
دزيت رساله الوجدان
اسامه.....فارغه
وجدان...اي فارغه اكو شي
اسامه ...لا ماكو شي بس ضايج شويه
وجدان...ليش ضايج منو مضوجك
اسامه...حياتي مخربطه اريد استقر اريد اعيش النفسي مو علمود اي احد
وجدان...من حقك انت مو زغير صح انت ليش
بهذا العمر وبعدك ما مرتبط
اسامه...بسبب امي امي تاخذ تعبي وتنطي الاخوي
اني المسؤل عن اخوي وزوجته وابنه وعن البيت كله
امي بس تفكر بااحسان واني باقي على الهامش
تعرفين دخلت ٣٨ وامي ولا مره كالت اريد ازوجك واشوف جهالك كل تفكيرها باخوي بس
من اسئلها تكول انت جبير وفاهم وتتحمل كلشي مو مثله طايش اتوقعي اليوم احسان متعارك هو وزوجته
ورايحه زعلانه هسه تريد اني اروح اصلحها علي
وجدان...ونت شنو علاقتك بالموضوع رجال وزوجته
انت شكووو
وسام...هاي الكلمه ما موجوده بقانون امي
اني مسؤل عن اخوي وزوجته وابنه اخذت تعبي وشغلي وزوجته وهو الزغير
بعدين اني تحملت مصاريف زوجته وولادتها
وهسه اني شايل مسؤلية ابنه
وجدان...ماكو هيج ليش هلضلم
اسامه....تعبت ولله تعبت واني شايل هم غيري
واشوف عمري يضيع مني واني واكف اتفرج
وجدان...انت اختار وازوج يعني فاجئها
اسامه...غير شايل البيت بكل مصاريفه مجاي اكدر اجمع
العروس ماتريد مهر
ماتريد مصرف شلون واحسان وزوجته مسوين البيت جحيم
وجدان...وليش تتحملهن ترا المشكله منك
اسامه...وامي شلون تزعل عليه
وجدان...تزعل فتره وترضى يعني هيه مازعلانه على عمرك الي جاي يركض
ترا هاي مو عداله ابد
اسامه....لازم اخلي حد الكل هذا
وجدان....اكيد الحل عندك مو عد اي واحد
صدك اذكرت امي تسلم عليك
اسامه...الله يسلمج
وجدان...اني حجيتلها كلشي عنك وعن وكفتك وياي
وخاصه اليوم من رحنا سحبنا الدعوه
وأخذت تعهد على مازن كدام كادر المدرسه
ينقل الغير مدرسه وبعد ما نشوف وجها
امي تكول هذا ابن حلال الله يرزقه ويبارك بي
اسامه...سلميلي عليها وعلى ابوج
وجدان...يوصل انشاء الله
جمانه السعيدي
اسامه ...من رجعت من الدوام ثاني يوم
شفت اكو حجي بعيون امي
اسامه...كعدنا نتغده اني وياها
بدت تحجي وتمتمت بحجيها عرفت اكو مصيبه ورا هذا الكلام
امي...اليوم رحت ارجع عبير
اسامه....اي وليش مارجعت
امي.... عدها شروط
اسامه...اي وشنو شروطها ست عبير هانم
امي...تكول ماارجع اله بيت وحدي
اسامه...حقها زوجها يااجرلها بيت ويطلعون اني هم افكر ازوج ومااريد ازوج واحسان وعبير بلبيت
امي...يااا تطرد اخوك
اسامه....يمه ترا اخوي مو زغير مزوج وعنده طفل
هو كال بس ازوج اشتغل
خل يشتغل ويأجر بيت ويطلع
إلى متى اني راح اتحمل مسؤليته
امي...منيله يأجر بيت اذا دفع الراتب ايجار منين يعيش
اسامه...مشكلته مثل ما صمم على الزواج
يتحمل مسؤلية قراره
امي...اني اكول اكو حل ثاني
اسامه...اي شنو هذا الحل اسمع
امي...بس لاتزعل عليه
اسامه.... اي شنو الحل اسمع
امي....نعوفله هذا البيت يعيش هو وزوجته بي
والراتب يصرفونه على العيشه
واني وياك نروح اناجر بيت نكعد بي
انت راتبك خير من الله تكدر تدفع ايجار والعيشه سهله
نبقى بس نفرين اني وياك
هذا الحل انسب حل حتى علاوي لا يضيع
بلبيوت ويشبع ضيم
اسامه....اللكمه وكفت بلعومي لا اكدر ابلعها ولا اكدر ارجعها
الحجي الي سمعته صحيح
اسامه... شربت ماي حسيت عيوني يحركني
انتي ترديني اعوف بيتي الي بنيته طابوكه طابوكه بتعبي
جنت مااهون على نفسي اشتري قميص
لفه مااكل حتى يكمل البيت اعوفه واطلع الإحسان ومرته
امي...اي انت شاطر تكدر تجمع وتبني بيت جديد
بس هو فاهي مايكدر يطلع ويصرف على زوجته وابنه
اني ماخايفه علي خايفه علاوي يضيع
اني اروح وياك نأجر حتلو مشتمل منا لمن تكدر تشتري بيت غير هذا هذا البيت يبقى باسمك
يعني ما تسجله باسم احسان بس يسكن بي
اسامه...يمه انتي تحجين صدك لو تتشاقين
امي...عدك غير حل مرته تكول ماارجع اله بيت وحدي
شلون تبقى تتجهول هيه وابنها بلبيوت
تقبل علاوي يضيع منا علمود بيت
اسامه...مااصدك ولله مااصدك ليش يمه ليش
طول عمري تاخذين تعبي وتنطي الإحسان
واني ساكت بس تردين تاخذين بيتي وتنطي اله
تذكرين بلبناء شلون اتوسل بي يطلع ويا العمال
وانتي تكولين مدلل تريده عامل بيتك
وهسه تردين انطي بيتي على الجاهز
ليش هيج الله اكبر ماكو ام مثلج ابد
عبالي تكولين اريد اشوف زوجتك اريد اشوف جهالك
كبرت خاف اموت وبعدني ماشايفه عائلتك
تردين تجهوليني بلايجار بهذا عمري
علمود ابنج يرتاح
خوش عبير لكت ورقة ضغط تضغط علينا بعلاوي
جمانه السعيدي
اسمعي كلامي لا والف لا اني من بيتي مااطلع
هذا البيت بنيته بدم كلبي
مااعوفه واطلع علمود احسان ولا علمود علاوي
لو كلشي يصير
روحي وصلي هذا الكلام العبير واحسان
وخلي يكون بعلمج راح اخطب وازوج بااقرب فرصه
حتى احسان مااريده بيتي
امي...خوب اطردني بعد عليمن يطلع احسان كول مااريدج بيتي احسن
اسامه....بكيفج اذا مايعجبج تعيشين هنا وياي
روحي الاي مكان تردي
لهنا وكافي خلص صبري
اني ماقصرت وياج ولا ويا احسان اعتقد لهنا وخلص
كلشي انتهى
عفت امي وطلعت للشغل
ماكدرت اسيطر على دموعي معقوله اني لهلدرجه رخيص عد امي اضحي بيه علمود احسان
تريد تاخذ البيت الي تعبت بي خمس سنوات وتنطي الإحسان على الجاهز
ماكدرت اصعد بسياره رحت منا لمن وصلت للشغل واني دموعي تجري اربعه اربعه
الناس كلها تباوع عليه
مااكدر اسيطر على مشاعري
وصلت للشغل ماكدرت ادخل جوه مااكدر احجي ويا اي واحد
درت وجهي ورجعت امشي بس مااعرف وين اروح
ليش الدنيا هلكد قاسيه عليه
ليش امي ما تحبني
بقيت امشي وامسح بدموعي ما منتبه للطريق
ومااعرف وين رايح
لمن تعبت من المشي كعدت على الرصيف
اتصلو عليه من الشغل
اعتذرت كتلهم مريض مااكدر اجي
بقيت كاعد بلشارع على الرصيف
مااعرف شلون اتصرف وشلون اخذ حقي من هاي الدنيا
ليش لانسان الطيب المتسامح
الناس تاكله ادوس علي وأولهم امي اول وحده داست عليه وعلى مشاعري
الخاطر احسان هيه الي خلته يطلع فاشل وحملتني مسؤلية فشله
جمانه السعيدي
بليل رجعت للبيت لكيت امي نايمه وغرفتها ضلمه
عود تحسسني بلذنب
بس هلمره لا والف لا مراح اعوف بيتي واطلع منه
ماكو عشى كلشي ما طابخه
عود زعلانه عليه
صعدت الغرفتي تمددت بدون مااغير ملابسي
اجتني رساله من وجدان
...هلو فارغ نحجي شويه
اسامه....كلبي راح يطك من الحزن
وجدان..اسم الله عليك ليش
اسامه....امي تريدني اعوف البيت الإحسان وزوجته
واطلع ااجر بيت وأسكن بي
انتي ماتعرفين اني شكد تعبت بهذا البيت خمس سنوآت
واني حارم نفسي من كلشي
حتى يصير عدنا بيت ملك ونخلص من الايجار
وجدان...وشقررت
اسامه...مستحيل اعوف بيتي حتلو امي تعوفني
مااعوف بيتي
وجدان....يامسكين ليش هيج امك قاسيه عليك
ليش تريدك تعوف بيتك
اسامه...هاي خطه من عبير
وجدان...شلون عبير شنو علاقتها بلموضوع
اسامه...المؤجر يريد يطلع اهلها من البيت اتفقت هيه وامها تسوي مشكله وتطلع وتشرط علينا بيت وحدها يله ترجع
علمود تضمن يصير عدها بيت تسكن بي هيه واهلها
وجدان...وليش اخوك ماايأجر بيت ويطلع هو زوجته
اسامه...لا شغل ولا عمل ويشرب ويدخن وكل السوالف التعبانه بعبه
اصلا هو لا يصرف على البيت ولا على زوجته
اني شايل كل المسؤليه
اني ماقهرتي غير امي ماتفكر بيه عمري ٣٨
وماتفكر بيه ولا تريدني ازوج
حتى ابقى اصرف على احسان وعائلته
وجدان...الله يساعدك الله يساعدك جنت متوقعه مشكلتي اكبر مشكله بس طلعت مصيبتك اكبر من مصيبتي
وجدان....لا تحرك دمك اتمسك برائيك ولا تخليها تأثر عليك
اخوك مسؤل يحل مشكلته بنفسه
اسامه...كلبي يوجعني من كد القهر
وجدان...اسم الله على كلبك اطلع من البيت اتمشى
اطلع الاي مكان لا تبقى بلبيت
اسامه...توني رجعت من برا حتى للشغل ماكدرت اروح
هلكد ما مقهور
وجدان...شغل قرآن سورة النور راح تهدء
واذا اكو عندك مغنيسيوم اخذ وحده راح تخفف التوتر عليك
اسامه...انشاء الله شكرا لان جاي تسمعيتي
وجدان.. انت الي ياما سمعتني وخففت عني
جمانه السعيدي
اسامه...الصبح ماكعدت امي تحضر ريوك عود زعلانه عليه
والضهر بس دخلت للبيت دخلت غرفتها وقفلتها عليها
بليل من رجعت مالكيتها بلبيت
بقيت انتظرها كلت ايجوز طالعه
اتصل عليه ابن خالتي
اسامه...هلو حمودي
حمودي...هلو بيك شلونك
اسامه.. تمام الحمدلله
حمودي...خالتي عدنا تكول اسامه زعلني وبعد مارجع للبيت
اسامه...براحتها يمتى مايطيب خاطرها ترجع البيت بيتها
حمودي...ليش ازعل خالتي
اسامه...مامزعلها هيه زعلت وحدها
شغله بسيطه لاتخاف كم يوم وترضى
اسامه ..كعدت ويا نفسي اني ليش متعب نفسي علمود ناس ما تحبني وماتريدلي الخير
هاي احسن فرصه اتخلص من كل واحد استغلالي
بحياتي وانتبه النفسي
مادام الوجوه انكشفت كدامي على حقيقتها
هاي احسن فرصه اثبت نفسي واعوف كل واحد اذاني
هذا بيتي ومراح يسكن بي أحد غيري
