رواية قيود العوف الفصل الثالث عشر 13 بقلم ريتا

أنة وياك 

چَنت الرُوح بالرُوح

و أنة بلياك 

ويَن روُيحتي تروح ؟

"منار"

گاعدة علىٰ الكرسي وسَاندة راسَي علىٰ أيدي والهوىٰ البارد يلفَح وجهَي خشَمي احمر وأيدي باردة رجفة تسَري بجسمي أثر برودة الجو 

صافنَة وعيوني دتتنقل بيَن الناس الدتمَشي شيء لازمة ايَد حبيبَها 

وشيء لازمَة أيد زوجَها وشَيء لازمة أيد صديقتها 

تركزت عيَوني علىٰ هَذي المسَكة بالذات غمضت عيوني 

واخذت نفس شايل حسرة وقهرة وهم كبير علىٰ صدري 

دمعت عيوني ورجفت شفتي وهمست اووووف يااا جُمان اوووووف وينج أنتِ رجعت راسَي ليورا ورجعَت ذاكرتي لهَذاك اليوم المشؤوم 

*عودة لـ برهة من الزمن* 

لازمة الجهاز بأيدي وافتر بيَه وكُل شوي اتصل وماكو ومتصَلت عليه 

گالت بس اوصل أتصل عليج وينها لعد مَرت ساعَات واني بيَن القلق والتفكير 

- صَرت اللوب بمكاني مو من عوايَدها شنو زعلانة مني ....! احد محاچيها شكو ....... اجت بَراسي الف فكرة وفكرة رجعت خابرتها وهم ماكو مديتصل ابدددد جهازها مغلق

اخذت نفس وگعدت اضرب رجلية بالگاع ومتوترة

اجانِي احسَاس مو حلو وماگدرت اتغاضىٰ عنة 

كُل شوية افتح الموبايل وماكو اي رسالة ماكو اي خبر منها

مگدرت اصبر اكثر رحت بسَرعة لأمي 

-منَار: جُمان ماكو داتصل عليها مُغلق من راحت لهسَة !

جاوبتني بعدم اهتمام وگالت..

-يجوز مخلص شحنها 

-منَار: ماما شحن ساعات داگول ساعات من المغرب !!! 

- احتمال شبكة متتوفر عندهم بالبيت شبيج هيج خايفة منار 

خليَت ايدي علىٰ راسي اتوترت انرعبت جسَمي رجف حسيت جُمان بيها شيء ماا ارتاحيت وماگدرت ارتاح اخذت نفس وگلت الهم

                                            

              

                    

-منَار: اخذوني هسَة لبيت خالة امل 

- وين ناخذج ماما الدنيا ليل 

-منَار: اخذينيييي ماما اخذيينييييييي 

دخل علي وسأل شبيكم رحتلة اركض وارجف وعيوني مغورگة 

لزمت ايدة وحچيتلة واني اشهگ گـلبي والله مامرتاح مدري شبيه...

-منَار: فدوة علي اخذني والله صار هواية ماكو ممعقولة علي 

ممعقولة راحت وحدها الدنيا مغرب والله گلبي حيوگع

هز راسَة واشر الي امشي وراه اخذت نفس مرتاحة ركضت جريت حذائي توني اللبسة واندگ بابنا رفعت راسي من دخلت خالة امل لوحدهة..

ماگدرت افكر اي تفكير صحي وسليم بهلحظة ردت اوگع من طولي عيوني ذبلت واني بنفس النظرة اباوعلها داخلة وتباوع عليَه 

ليش جاية وحدها وجُمان ماكو وياها ! 

 صرت ارمش بسَرعة وشكو خوف ورعب اندب بداخَلي 

مشَيت الها واني خطوة اتقدم بيها وخطوة ارجع 

اجتني هَي بسرعة وضحكت وگالت 

-امل: خالاتي يوم الالج وافرح بيج مُبارك عليَكم الفرحة

راحَت سلمت علىٰ امي وتبَاركت الها 

عيوني بقت تتنقل بيَنها وبيَن علىٰ امي الصافنَة التفتت عليه وگالت..

-امل: جُمانة وين خالة حبيبتي طولت شنو حلا الها الجو والهوسة هههههههههههههه عااد هيَة ماتحب الهوسَة وهاي الاجواء شعجب 

دمعت عيَوني رجَفت شفتي واني كُل علامات الخيَبة والحزن علىٰ وجهي 

گلت الها واني الكلمة تطلع منَي بالويَل .. 

-منَار: خا ... خالة شنو جمان وين مو راحت الكم من المغرب !

بسرعة اتلاشت ضحكتها واتغيرت تعابير وجهة مصدومة مخروعة صاحت بصوت..

-امل: وين راحَت من المغرب ولچ منااااااااارر !! 

-منَار: خالة دخيلج شنو ما اجتج راحت خالة والله راحت

زلغت وجهة وصرخت بصوت شايطة متخبلة..

-امل: ولچ ماا اجت للبيت اني شَلت روحي واجيت عليَها لأن تاخرت گلت اللتهت متونسَة وي البنات بالحفلة ولچ بنتييييي وييييين راحتتتت 

            

              

                    

صاعقة وگعت علينا الصدمة الي دخلنا بيها خلت الكل صافن محد يعرف شنو يحجي كل الموجودين جمدوا ، جسمي باد مـن الخوف صرت اهمس بيني وبين روحـي مصدومة جُمان وين جُمان وين..

مافكرنا حتىٰ انوا ممكن رايحة لجيران رايحة لصديقة ماتطلع من جُمان ماتطلع وماتعرف احد وعلاقتها مو قوية بأحد غيري سنَوات بهلمنطقة بس حتىـ الجيران ميعرفونهم من نوع الهادئيَن وميحبون الاختلاط بالنَاس 

ابداً ..... بس احنة نعرفَهم وكم شخص معدودين..

بين الصدمة والرعب الي اندب بداخلنا والحچي الي صار وهذا يگول هيَج وهَاي تگول هيَچ مگدرت خَالة امل توگف علىٰ رجليَها بعد 

وگعَت خالة بالگاع ركضَت بسَرعة عليَها 

انخبصنا العياط والصريخ والخوف كلهن اللتمن علينا ركضوا اخواني گعدوا گبال خالتي امل يطمنون بيَها يحاولون يهدون بيها 

-هسة نلگاها اكيد موجودة ، خاف بنية احتاجتها وراحت الها 

طلعوا من البيت يركضون ، يدورونها ردت اطلع وياهم لزمتني امي مانعتني وسدت الباب عافتني بصدمتي وراحت لخالتي امل الي بس وجهة يهتز وعيونها مفتوحة مصدومة .

بس فجأة نهضت سريع فاتت للبيت غمضت عيوني نزلت دموعي بقهر امشي وراها اني وامي تفتح بالبيبان ..

-امل: خاف هنا گاعدة ، هنا ما جاي تقشمروني 

هزيت راسي نافية دموعي غوشت نظري راحت للغرفة الثانية تفتح بيها تصيح بصوت واهن..

-جُمان طلعي يمه لا توجعين گـلبي لا تتشاقين وياي هيج يبعد أُميمتج . 

لزمت ايدها نترتها مني وراحت لكل غرف البيت لكل مكان تدور وتندب بصوتها امي تفتر وراها تحاول تهديها بس خالتي فقدت فقدت..

-امل: وينج يايمه لا تكسريني بيج لا تكسريني مابقالي غيرج عايشة علمودج ..

تريد تطلع تدورها امي ماقبلت تلزم بيها متيسطر عليها خالتي متخبلة تريد بس تفتح الباب..

-ام منار: والله هسة يجون الولد هسة يجون لا تطلعين اخاف عليج انتِ هم 

            

              

                    

-امل: عوفيني ادور بنتي عوفيني گـلبي غادي نار ماگدر اگعد 

لزمتها توسلت بيها بينا خوفة گعدت بالگاع مهدود حيلها وجهة شحب التفتنا علىٰ فتحة الباب نهضت بسرعة من دخلوا خالتي طفرت سريع بس خابت امالنا من نظراتهم و وجوهم الي الخيبة باين عليها..

- افترينا المنطقة بيت بيت رحنا الهم وما اكو الها اي أثر 

ومحد عندة معرفة بيها عبرنا علىٰ غير منطقة حتى الشوارع نزلنا ندور بيها نطينا اسمها مواصفاتها ماكو محد شايفها .. 

- چان هذا الكلام كفيل بأنوا يخلي خالة امل تطلع من وضع الصدمة 

الي چانت بيه وتدخل بوضع أصعب 

انهارت صارت تدگ علىٰ صدرها ووجها وتبچي وتصرخ نريد بس نسيطر عليها بس نلزمها ..

-يمه بنتي..

مشت سريع ناحية الباب تريد تطلع..

-وين خالة ويننن ترحين والله العظيم مابقى مكان مادورناها بيه

-عوفنييي عوفوني اني ادورها اني اللگاها 

-ام منار: ميخالف نروح وياج اوكفي نروح وياج لا تطلعين وحدج..

-امل: ولكم بنيتييييي وين راحتتتت يمة الله ياااخذني ضيَعت بنتي اني ضيعتهاا 

لزمها علي يريد يهديها تضرب بالباب حيل تصيح..

-علي: خالة وحق الله العظيم وحق الحسين الشهيد افتريناا لمنطقة بيَت 

بيت علمودهاا وسألنا الكل محد يدري بيَها بعد وين تدورين حتى الشوارع نزلنا بيها 

هزت راسها نافية رفعت ايديها تمسح بوجهة..

-ماتعرفون تدورون رايحة اني ادورها اني اللگاها وين تروح مني ماتعوف امها 

طلعت تمشي مخروعة تتلفت وتصيح واني دموعي تجَري واحچي بالگوة واشهگ 

-منَار: خالة فدوة ليصير بيج بس اهدي 

-امل: يابعد امج وگلبَها وين مكانج يمة اااااااه 

            

              

                    

-شسوي اني شسوي وين انطي وجهي وين ادورها 

ولچ خالة منوره شلون تعوفينها ترجع وحدها شلون 

حچيت رايحة روحـي الكلمة تطلع مني متقطعة نفسي صعب عليه والله.

-منَار: خا.. خالة والله ماقبلت والله گلتلها انتظري ابن عمي يجي وياااخذج خالة لحت وماقبلت اله تروح واني گلتلها اروح وياچ لحيت عليَها خالة بس ولا قبلت ولا چنَها تسمعنيي  

اجة علي يركض وصل الها وگال

-نروح للمركز خالة بس هو بقىٰ امشينا 

هزت راسها سريع التفتت لزمت ايدها ساندتها عليه مابيها حيل حيلها باد وصلتهة للسيارة وصعدنا .. 

-امل: راح حيلي يمة جمونة مايبقالي حيل بطاريج.. 

- غمضت عيوني وعصرتهن دعيت من كُل گلبي نعرف مكانهة ونشوفها وترجع وصلنة للمركز ونزلت واخذتها لازمتها بأيدي بالگوة تمَشي وترجف 

- خالة امل بَعدهي صغيرة وشابة وقَوية بس خالة امل يَم جُمان 

يروح حيلَها وتروح قوتها هَي نقطة ضعفها ..

- دخلنة وبلغناهم بالقضية وخالة امل تتوسل بيَهم وتگُلهم 

-امل: اللگولي بنتيي اريييدها 

-مايصير الإبلاغ وهي صارلها ساعات 

-ولكمممم بنتييييي اكلكم ماكوووو بنتيييييي مختفية تكلولييي ميصير الإبلاغ لعد وين انطييي وجهيي وينن

-هذا القانون ست هذي القضايا نشتغل عليها بعد مرور ٢٤ ساعة من الاختفاء ..

چان اسلوبهم جاف وبارد ولا مهتمَين للنار الي تسعر بگلوبناا ولا لشهگات خالة الي تاخذ گـلبي بكل مرة تطلع منها شهگة..

-الضابط: عندكم اقرباء معارف ممكن تروحلهم 

جاوبتَة خالة امل وگالت

-امل: لا والله ماعندنا احد ابد ماكو 

-الضابط: جيران صديقات ؟ 

-امل:ابد ماكووو محد عندنا محد چانت يم صديقتها بس منَار 

صديقتها ماعندها احد بنيتي 

            

              

                    

توجهت عيَون الضابط عليَة واني وجَهي صاير خريطة ومورم من الدموع والقهر وگعدني يحقق ويَاي واني روحي رايحة وجسمي نمل وحيلي باد وافكر بيها وين وشصار بيها وهذا يسألني لعد وين راحت !! 

جاوبَتة بدهشَة وگلتلة 

-مَنار: وين راحت شنو احنة جايينكم حَتىٰ نعرف ! 

-الضابط: امممم اذا اخر مرة يمج لعد وين راحت ؟

حسَيتة دايتهمَني نظَراتة ونبَرتة بالكلام توضَح هذا الشيء جاوبتة وگلت

-منَار: هذا شغلكم انتم الي المفروض تعرفون احنة ليش جايين الكم حتىٰ تحققون بالقضية وبالموضوع لعد لو نعرف وينهااا نجيكم ؟ 

-الضابط: لتحچين زيادة هذا شغلنا دانحقق وياچ انتِ هم 

كونج اخر شخص كانت يمة .

-منَار: اي واني داجاوبك داگول احنة اجينة حتىٰ نعرف 

اني ماعندي اي معلومة كل الاعرفة گلتة الك 

گعد علىٰ الكرسي وگال 

-الضابط: خلصت من الحچي وياچ ..

باوع النة واحد واحد وگال 

-ان شاء الله نشوف حاليًا عندنا شغل هَواي بس راح نبحث عليَها ومن نوصل لنتيجة او معلومة راح نبلغكم تگدرون ترحون هسة ..

اعصابنا تالفة روحنا رايحة روسنا تأذينا متخبلييين !!! 

فكرة تاخذنة وفكرة تجيبنة قلق توتر خوف كل شيء اجة براسنا 

وهو يحجي بگلب بارد وممنطينا اي اهتمام ماخذ الموضوع بشكل 

عادي وما اهتم واتفاعل وياها حتىٰ !

- مجرد اخذ المعلومَات وسأل كم سؤال وگال اتفضلوا ميصير تنفتح القضية هسة ولا يصير الإبلاغ حالياً محد ساعدنا ولا اهتم..

صفنت ورمشت بسَرعة خالة امل انتهت بأيدي بعد ما شافت ردة فعلة وشلون يحچي بگلب بارد ولا كأن الي يمَة ام قطعة من روحها مفقودة وجاي تتوسل بيهم حتىٰ يساعدونها او يگولون شَيء يبرد الها گلبَها ويخلي عندها امل علىٰ الاقل وهَذا واجبَهم ..! 

عَاطت بيَه وگالتلة

-امل: انتَ شنووووو !!! بنتي مختفية وجاية دابلغكم وتگلي عندنا شغل هسَة بس نشَوف لعد وين نروح ويييين انطي وجهي إذا القانون مديهتم داكلك بنتي مو عنددد أحد بنتي مختفية انوخذتتت ماعندناا احد ترروحلة ليش متصدگوني

بسَرعة گام واتقدم وخالة امل بقت بمكانها ماا اتحركت خطوة 

وگف كدامها وگال وعيَونة بگصَتة وگال

            

              

                    

-الضابط: مو انتِ جاية تعلميني شغلي گلتلج راح نبلش نبحث عنها ومن نعرف معلومة راح نبلغكم لا تلحين علينا عندنا شغل فوگ روسنا تفضلي طلعي برة بدون حچي زايد تعمَين علىٰ نفسج بعد اذا سمَعت حچاية زايدة منج ! 

باوعت خالة امل لرتبتة الي علىٰ كتفة ورفعت عينها وحطتها بعينه وخزرتة وگالت بحرگة گلب وصوتهَا مبحوح 

-امل: ما تلوگلك هاي الرتبة ..

وهو فتح عيونه علىٰ وسعهن رفع اصبعة وگال الها

-الضابط: شوفي اعفنج بالسجن والله واخليج تخيسين وتعفنين تتمنين تطلعين وتشمَين الهوىٰ بسبب هذا التجاوز افتهمتيييي يا **** 

-امل: ما انصدم واتوقعها من اي شخص ماعندة اخلاق وعديم احساس وضمير مثلك يطلع الازيد منة 

انَواع المسَبة والفشَار سمعَناها بهلحظة والتهديدَات واحد ورة الثانَي

تدخل علي بسَرعة وحچة وي خالة امل وطلب مني اسحبها واطلع بَرة رحت لزمتها من ايدها وطلعنا وهَذا يصيَح بصوت عالي ويهدد وخالة امل فاصلة مو يمة تمشَي وصافنة بالگاع

بقَة يمَة علي واسَمعة يحچي وياه ويگًله اعذرها سيَدي موقفها صعَب لتاخذ بكلامَها هسَة اتفهمها ..... وهذاك باقي يسَب ويفشر ويهدد 

اتنهدت واخذتها صعدتها للسيارة واجة علي سَاق وكُل شوي يزفر 

... قربنا نوصل لمنطقتنَا گالت خَالة امل 

-امل: نزلني هنا اگعد اني انتظر بنتي

فتحت عيوني علىٰ وسعهن وگلت الها بصوت يرجف

-منَار: خالة وين تگعدين بالشارع

-امل: لعد جُمانة وين هسة وين يمة شحالها انتظرها اني تجيني

- باوعلها علي بالجامَة غمض عيونة وگال الها 

- خالة الدنيا ليل والشارع فارغ وين تگعدين فدوة لعمرج

- لعد تريدوني ارجع لبيتي وجُمانة طالعة منة انتظرها اني تجيني يمة تجينييي 

غمضت عيوني وبچيت بَصوت عالي وحطيت ايديَة علىٰ وجهي

-منَار: كله مني اني الخليتها تجي للحفلة مارادت تجي ماقبلت اني لحيتتت لحيتتت الله ياخذني..

            

              

                    

-علي: كاافي لطم وانتِ خالة امل وين تبقين بالشارع صدگ جذب 

علي يحچي وهي مو يمة صافنة عيونها تتلفت علىٰ الطريق فتحت الباب ونزلت سريع نزلت وراها ركضت .

-منَار: خالة فدوة دخيلج 

-امل: ماا ارجع للبيت اني انتظر جمانة تجي

-شنو نستفاد من الگعدة هنا بس فهميني 

-امل: لعد ارجع وبنتي ماكوو تعقلونهااا ولكم محد يحس بناري مادري بيها عايشة ميتة وينها وينن 

التفتت عليه شهكت بصوت..

-امل: بس كليلي محاجيكم احد بالجامعة صاير وياكم شيء احد متعرض الكم حاجيني ياخالة گـلبي راح يطلع من صدري اتذكري اتذكري لو شوية لو برهان واحد يريحني راح اتخببل..

هزيت راسي نافية وعلي يلح نفس كلامها..

-منار: ماصاير والله ماصاير احنة وين والمشاكل وين مالنا بأحد خالة نروح بطريقنا ونجي وخصوصًا جُمان حجاية متحجي ويه احد والله لو اشك بشيء احجي بس ماكووو اني هذا المخبلني..

سكتت فترة واسمع صوتها تحجي ويه نفسها صارت تهلوس وتحجي بس تريد تبرد گلبها بشيء..

-امل: وين صارت معقولة راحت تشتري شيء 

خاف راحت تجيب اجباس تحب تاكلهن بالليل

مسحت على صدري دموعي تنزل بصمت..

-امل: جمونة يمة چااااان گلتيلي اروح وياج يمة ليش رحتي وحدج

تقدم علي وگال..

-تحچون صدگ وين گاعدين خالة فدوه اروحلج گعدتج هنا شنو . 

-امل: اني اروح للبيت وبنتي ماهي بيه عمت عيني 

-منَار: واني ماا اعوف خالة امل ابقى يمها

فرك وجهة وگالي 

يعني هي ماعندها احد يدور وراها او يريد يأذيها منار انتِ مو وياها بالجامعة صايرة مشكلة ويااااچن شي ماقنعتني سالفة ماكووو شيء ماقنعتني اتذكري . 

هزيت راسي بسرعة واني ابچي واشهگ

-منَار: ابد ابد اني وجمان نروح بطريقنا ونرجع بطريقنا حتىٰ صديقات هناك ماعندنا والله أسأل وشوووف روح اتاكد بنفسك . 

سكتت ونهضت خالتي بنص الليل تدگ بالبيبان وتسأل واني وعلي وياها منگدر نعوفها رغم كل تصرفاتها محد گدر يلومها ، تضرب بالباب ضرب لدرجة يطلعون الناس مصدومين وخايفين بس من يشوفون حالتها ويعرفون بالوضع يسكتون مقهورين.. 

وهيج مر الليل كله خالتي ماگعدت دقيقة تفتر تسأل تلطم تصرخ تبچي كل شيء عاشت بهاليوم فقدت لحد ما بدة يصير الفجر..

            

              

                    

صافنَة علىٰ الشارع الفارغ ودموعي تنَزل وسَمعت صَوتهَا وهَي تگول

- نادِ عليَّاً مُظهِر العجائب تجدْه عوناً لكَ في النوائب

كلُّ همٍّ وغمٍّ سينجلي بولايتك يا عليٌّ يا عليٌّ يا علي 

ياعلي دخيَلك عند الله اريد تحفظلي بنيتي من كل شر يصيبها

ياعظيم يارب العالمين ياقادر ياجابر يارحيم ارحم بنتي وارحمني 

بدت الدنيا تكشف واحنة نفتر بعدنا ونسأل گلوبنا راحت .. كتلنا البرد الجو بارد بشكل ومالابسين حتىٰ ملابس ثخينة بس وضعنة چانت مايسمحلنا حتىٰ نفكر بروحنة چانت جُمان براسنا وكل تفكيرنا بيها نرجف من البرد بس نريد الها اثر بس اثر . 

خالتي اخ وضعها شأوصفَة ؟ كل الحچي مايوصف وضعها چان مثل الطفل الي متعود علىٰ حضن امه وانوخذ منها الونين والشهگات الچانت تشهگهن يفطرن گلبي فطر 

-امل: ماا اجتنييي جُمااان مااا اجت ماارجعت لحضن امها 

ايديها من التعب ماتكدر ترفعهن خفت گلت راح تموت بين ايدي حلفتها بالف امام وبغلاة جُمان بس تنهض وياي بالويل يله قبلت..اخذناها للبيت وفتت اني وياها ماعفتها دقيقة وامي كل شوي تخابرني تگلي ابقي يمها ديري بالج عليها لتعوفينها غمضت عيوني ورجعت ظهري علىٰ الحايط .

-منار: وينج هديتي حيلنا وينج . 

- طلعت خالة امل من غرفة جُمان بأيدها ملابسها وتشَم بيهم ط

غرغرت عيوني لميت نفسي بتعب ومادري شلون غمضت عيوني وغفيت ما گعدت أله علىٰ صوت صريخ خالة امي بسرعة ركضت برة شفت ولد گدام الباب وهَي تعيط عليَهم اسمعَهم يگلولها

شنو مرة گاعدة بالباب عيب احنة منطقة محافظة ومحترمة منريد تصير حجاية علىٰ هلمنطقة ادخلي جوة لتگعدين هنا 

-امل: هذااا بيتي وهذا بابي ويخسىٰ اليحچي علينا ويجيبنة بطاري 

وانتم متتحكمون بينة كل واحد عليه بيَتة وبنفسَة 

 وسدت الباب بوجهم اندارت عليَه وهَي تبچي وانصَدمت من شفت وجهة كلهة جروح ومشخط ركضت الها 

-منَار: خالة شبي وجهج !!

ردت عليَه وعيونها ذبلانة وجهة شاحب واصفر ودموعها تنزل علىٰ خدها

-امل: مابيه شي خالة مابيه

-امل: بنتي مخطوفة بنتي مارايحة مكان انوخذت انوخذت جُمانة تعدي ليلة وهَي مانايمة يم امها ..... دگت علىٰ صدرها وگالت من امس ماشايفتها يمة ماشايفتها ما شايفة وجهة ولا سَامعة صوتَها 

            

              

                    

گعدت يمها شبيدي ياربي شبيدي شنو الاكدر اسويه وابرد گلبها ماجاي ينفع اذا گـلبي ماجاي يبرد شلون بگلب امها .. شوي واندگ الباب ضحكت ونهضت سريع بسرعة

-امل: يمة هاي جُمان 

ركضت للباب بابتسامة فتحتة سريع بس سرعان ما تلاشَت ضحكتها من شافتة علي گدام الباب مشيت يمهم وگال..

هذا اكل امي دزتة وتگول خلي تجي منار ابوي يريدها .. رمشت بسرعة وين اروح وخالة امل اعوفها وحدَها ! شلون ماا اگدر اتنهدت واخذت الاكل من ايدة واخذت خالة امل 

-منَار: خالة فدوة اكلي لتتمرضين 

اكتفت تهز براسَها بالرفض ودموعها تنزل 

-منَار: لعد شلون خالة تبقين هيچي بدون اكل حتتمرضين والله حرام اكلي لخاطر جمان 

-امل: ماا اريد اكل اني ما اكل لگمة غير وية جُمان شلون اكل وبنيتي مادري وينها يمة اااااااخ ياجمُان 

اكتفيت بالسكوت لأن مداگدر اواسيها حتىٰ اني الي احس روحي بدت تنتهي من التعب مچنت اشتهي اباوع للأكل اصلاً ... ابجي بيني وبين نفسي مداگدر ابچي گدامها بس ابچي گدامها تخرمش بوجهة وتخرط بخدودها وتدگ علىٰ صدرها 

اتنهدت بحيرة وحزن باوعتلها واني گلبي ممرود توسلتها تروح وياية للبيت بست حتىٰ أيديها بس چان قرارها الرفض بكُل مرة تگول ماا اعوف المكان البي ريحة بنتي وين تروح اكيد ترجع جُمانة متعوف امها وحيدتها 

خزرني علي واتحركت انقهرت شَلون اعوفها وحدها يا اللهي دخيلك شلون ..... بس اتذكرت بابا اذا ماا اروح راح يسويها عليَه يوم القيامة راح يدمرني رجفت شفتي ورجعت توسلتها وهم رفضت 

صاح عليَه علي يلا طلعت واني اباوعلها گاعدة ولامة روحها وبأيدها ملابس جُمان وتشم بيهم انهضمت ومتت ردت ارجع وماا اعوفها وجرني علي وگال 

كفينا شر ابوج واتحركي اذا مترحين يجيج لهنا ويسحلج فكينا من مشاكلة لخاطر ربج منَار اتحركي 

اخذني بالگوة صعدت واني اباوع لبابهم هزيت راسي ودموعي تنزل 

وين راحت اي وين منو ماعندها شيء جُمان اني اعرفها ماعندهااا دخيلك يارب خليهم يساعدونة ونلگاها لين قلوبهم علينة من وشفت أسلوبهم ما اعرف ليش حسيت مراح يساعدونة 

وحتى حسيتهم ممهتمين بالوضع ! ولا مهتمين لوضع خالتي امل من راحت الهم وگالت بنتي انخطفت مموجودة چانت ردة فعلهم أكثر من عادية محد أتأثر ومحد أهتم

            

              

                    

اتنهدت وبعدت هذي الافكار عن راسي ... شلون عفت خالتي امل لوحدها اووف بابا اوف 

نزلنا وتوني دخلت للبيت وما احس اله جرني من أيدي وگال 

-بنت الكلببببب دايحة عند الجيران محد وراج انتِ ؟؟

رديت بصوت مبحوح ودموعي تنزل علىٰ خدي

-منَار: بابا ملگينا جُمان 

عاط وگال .. لگيتوهاا مالگيتوهاا بنت الكلب ترجعين للبيت مو تباتين برة بعد اذا عدتيها اكسر رجليج ..

هزيت اله راسَي ومشَيت اسمعة يگول 

بنات دايحات مخلصاتها طلعة نعرف بيچن وين ترحن ماوين 

تضحكن علينة بالدراسة بنت الكلب 

وين راحت يعني هاي يعني اكيد ملفية الها واحد وشردت وياه منيلچن امان 

غمضت عيَوني واتنهدت بتعب ... هذا طبع بابا وميتغير ابداً شكاك ويضوج البنية تكمل دراستها ميقبل ميثق ويگول تجيبن العار بس ماما رفضت وچانت بكُل مرة توگف بوجهَة وترفض الي يگولة وخلتنا نكمل دراستنا 

چانت تتحمل الضرب والاهانة والمسبة من بابا 

كُله علمود تخلينا نكمل ونوصل لمرحلة منعتمد بيَها علىٰ احد 

چانت كُل مرة تگول كملوا دراستكم 

وحاربوا علمودها لتخلون احد يحرمكم منها ماما

دخلت للمطبخ يم امي گعدت وگعدت يمَي وهي تضرب علىٰ رجليَها 

- وين راحت البنية بعمر الورد يمة ياهو الاخذها ولج منَار خاف متعاركة وي احد خاف عندها شيء .

هزيت راسي وجاوبتها بسرعة 

-منَار: ليش مداتفهمون والله العظيم لااا جمُان متفارگني ومااا متعاركة وي احد ومعندهاااااااا شيء وي احد افهمووووا كااافي 

- فقدت وصرت اضرب علىٰ وجهي واصررخ بعلوا صَوتي انهاريت ،كُل ماا اتذكر كلام خالة امل ووضعها يزيد بچيي وتزيد شهگتي وامي احتارت ساعة تحاول تسكتني وساعة تبچي وياي وتگول 

-هو هذا الماله احد كلها تتگاون عليَه شافوها مالها احَد .

گمَت وطلعت من المطبخ رحت لغرفتي عيوني تحرگني منايمَة وبس دموع لزمنَي راسي بدلت ملابسي ودفنت راسي بالمخدة 

مرت الايام والليالي والاسابيع الاخذن كل حيل بينا افترينا المناطق والشوارع والمطاعم وكل مكان وخلينا صورة جُمان واسَمها ويمه رقمنا بكُل شارع الي شايفها او يعرفها يتصل علينا بَس ماااكووو اييي إتصال محد عرفها ومحد شايفها .

            

              

                    

حتى محافظات خالتي امل طلعت تدورها مراكز بغداد كلها راحت الها ماكو ماظل مكان ماظل شارع مابقى شخص ما سألناه محد يعرف شيء.. 

چنت داغسَل وجهَي واسمَع صوت جاي من الصالة قصيدة

- العُمرة ما شايَل جروح 

لا يَلوم الذي ينَوح .

واسمَع بچي ويَاها دخلت للصالة لگيت خالة امَل مشغلتها 

ودتبچي وتعصر بعيَونها وي كُل كلمة يگولها تون ونة تاخذ روحـي . 

دخلت للمطبخ حطيت أيدية علىٰ راسي وگعدت ابچي يا الله گلوبنا انتهت علىٰ منو ابچي اني علىٰ منو علىٰ ياوضع ويا ضيم ، شابة رايحة النا شابة بعمر الورد ماكو احلىٰ منها ومالها احد غيرك ياربي شلون بگلوبنا . 

مافقدنا الأمل برجعتها بس ذبحنا الانتظار چانت خالة امل تبچي وتگول

-امل: ليش يا الله ليش حرمتني من بنتي محد الي غيرها لا عندي اخو ولا اخت ولا احد بهلدنيا غيرها ليش تحرمني منها 

-امل: عايشة الها علمودها علمود اشوفها تكبر گدام عيني بنيتي الحنينة هيچ تروح مني وما ادري وين اراضيها اني ماا ادري بيها شبعانة جوعانة نايمة مانايمة شصاير بحالها گـلبي الي الماتبرد نارة يگلي بنتي مو زينة . 

-جُمينتي الي انومَها يلا انام اني اتطمن عليها واسهر علىٰ مرضها اذا تمرضت ماتاخذ عيني نوم عمت عيني انام وهي عينها ماغافية . 

دگت علىٰ صدرها وگالت 

- يا ضي عيوني حرمني الوكت منج الوكت مااا رحمني ولا رحمج يمَة تفارگيني يابعد امچ بعيدة عني ااااااااخ اتمنىٰ بس اشوفج يمَة بس اشوفج 

- صارت حسرة بگلبي شوفتج واشم ريحتج واشوف وجهج 

وينج يمة تعاليلي تعالي لأمج وشوفي حالها بدونج 

- رفَعت ايديها وگالت 

- هذن الايَدين الي شالنَج يمة ضيَعنج !

- يافرحتي وياسعادتي ولچ امج عايشة لخاطرج 

لخاطر تشوفج تكبرين كدامها وتوصلين للي ترديَنة وتفرح بيَج

- وينج أنتِ هسة يمة جُمانة ويييييينج

عساني لا ارتاحيت ولا نمت بدونج شلون انام وتغفىٰ عيني 

فقدت وانتَهت تصرفاتها ماتدركها تأذي روحها وماتنتبه ولا تحس بالأذية اتدمرت خالة امل حرفياً وخصوصاً من صارت الايام تمشي وماعرفنا اي شيء وهنا فقدنا الامل حرفياً انتهينا بهاي الفترة واتدمرناا تمامًا فقدنا كل ذرة امل بداخلنا . 

بدت تضعف خالة امل بشكل مو طبيعي وجهة شحَب 

وصار اصفر وجسمها يرجف وماا تقبل تأكل بس تبچي وتون ونين ميخلص واني بهاي الفترة عاندت حتىٰ بابا وگلت لو يجيني يضربني ويسحلني بالشارع ماا اعوف خالة امل هاي الفترة لو اموت 

انام يمَها واسمعها تسَولف عقدت حاجبي ودرت باوعت الَها

 چانت لازمة ملابس جُمان وتشَم بيَهم وتگول 

- ليش رحتي جمونة يمة 

بچت وگالت

- ولج يمة مشتاقتلج 

- يمتى ترجعيلي يمة كسرني المرض ونهَش جسمي

- وترجع تنام وهي حاضنة ملابسها وتفز من نومتَها وتصرخ 

يمة جُمانة چانت روحي تروح مني من اشوفها هيچ 

 - واجي احضنها وابچي وياها وتگلي ولچ منورة 

خالة ماعندي روح بعد اني ماعندي 

بقيت حاضنتها واقرة عليها ايات قرآنية واصلي علىٰ محمد وامسح علىٰ جسمها بس جسمها كُلة يرجف حتىٰ من تغفىٰ يبقى جسمها يرجف ويهتز غمضت عيوني ونمَت يمها 

فزيت الصَبح گبل باوعَت علىٰ مكانهَا فارغ بسَرعة گمت طلعت من الغرفَة 

اتصنمَت بمكاني ورجف جسمي ردت اوگع مَن طولي من شفت خالة امَل 

واگعَة من طولهَا بالگااااع وحلگها مفتَر وفااااااتحة عيونهااااا وجسَمها كُله ييههتتتززز !!!! 

- واني صرررررررختتتت بصصصصوتت عااااالليييييييي وگلتتتتت لاااااااااااا يااااررربييييييي لاااااااااا !!!!!!!

‏ الله وحدهُ يعلم أن هذا الأمر كان صعباً

 أن يغلق المرء عينهُ كل ليلة وقلبهُ لا يهدأ

فَ أنَا لستُ اقوىٰ 

‏ ‏في غيابك 

إنطفأتْ كُل قناديل روحي 

ولم يضيئُها أحد ..

الفصل الرابع عشر من هنا