رواية بديلة اختي الفصل الثالث عشر بقلم خاتون الكعبي
اوتار
محمد بحدة : هلة بالنسر عاش من شافك بوية
نسر ببتسامة : هلة بيك خوية نورتو الديرة
محمد وهوة يحظنة : بنورك خوية من زمان ما شايفيك
نسر : والله يا خوي ملتهي بهل دوام واليوم يلة نزلت
محمد : الله ايساعدك بوية
نسر : ويساعدك يلة بوية اترخص تصبح ع خير
محمد : اجمعين خوية
اوتار : اباوعلة انتظرة يروح ودار علية خزرني وكال
محمد بصوت حاد : شعدج طالعة بنص الليل وكاعدة اسربتين ويا
اوتار : شهل كلام مو عيب وبعدين مأجاني نوم وطلعت اني ومرسلين انشوف الشط شنو حرام يعني
محمد بعصبية : لعد وينهة مرسلين اشعدج جاية وحدج ومصبرين للصبح الة اشوفي بالليل
اوتار : معرف راحت اصيح هدى وتجي هية وياهة بس اتأخرت وكتلك مأ اجاني نوم فطلعت لا تكبر اسالفة
محمد بحدة : وشعدج كاعدة وية نسر
اوتار : معرفة بس جنت اغني وكلي صوتج حلو وراد اغنيلة مرة ثانية
محمد بصوت جهوري : يعني سمع صوتج وانتي تغنين
اوتار بستغراب : اي لش
محمد : دامشي كدامي لا ادفنج اهنا
اوتار بعصبية : لا والله مو تايهتلك
محمد بحدة : اوووتارر
اوتار برود : خيرر
محمد : امشيي
اوتار : باوعتلة صفح ومشيت كدامة وهوة وراي اسمعة يدردم ويسب وكل دقيقة يعيط علية ثولني ثول الحد مرجعنة للبيت اني اشاهد واول مدخلنة ركضت وعفتة يدردم ويستغفر وحدة الحقير وصعدت فوك و.............
____________
مرسلين
شاهين : ليش ردتي اطلكج
مرسلين : لهواي اسباب
شاهين : والي هية
مرسلين بهدؤ : اول شي جنت وما زلت اعتبرك بمثابت اخوية الجبير ثاني شي والأهم انك جنت مرتبط بأختي وتحبهة وايضاً فارق العمر بينة جبير انتة بالثلاثين واني بعدني اصلاً مداخلة العشرين واكيد طريقة تفكير كل واحد بينة تختلف عن الثاني جذرين اتوقع هذي الأسباب كفاية حتة تخليني اريد اطلك منك
شاهين برود : يعني تردين واحد بعدة مراهق وصايع بعمرج صح
مرسلين : يعني انتة عفت الموضوع كولة وركزت علة هل نقطة ولا خوية بس قصدي اريد واحد قريب علة عمري يفتهم علية وافتهم علي وطريقة تفكيرة قريبة علة تفكيري او مشابهة وصلت الفكرة
شاهين : نفس الشي
مرسلين : اشون نفس الشي
شاهين : هيج وهسة يلة خل نرجع
مرسلين : لاا فدوة خل انضل بعد اشوية
شاهين : يلة فضيني
مرسلين : ابتسمت ورجعت التفتت علة الشط وغمضت عيوني وتنفست براحة وكلت
مرسلين : زين عادي بعد سؤال
شاهين : لا
مرسلين بترجي : فددوة بس هذة السؤال والله اخر سؤال ونرجع
شاهين برود : اسئلي
مرسلين بتوتر : احمم المره الي شسمة ءا..
شاهين بنفاذ صبر : تحجين لو شلون
مرسلين : لا خلص ححجي المرة التصلت بية وكالت انو هية زوجتك
شاهين : اي شبيهة
مرسلين : صدوك طلكتهة
شاهين : اي
مرسلين : زين جنت تحبهة
شاهين بسخرية : هه لا
مرسلين بتسائل : لعد ليش ازوجتهة
شاهين : اكضي حاجتي وياهة وطلكهة
مرسلين : قصدك زواج متعة صح
شاهين برود: بالضبط
مرسلين : زين مو حرام الدسوي
شاهين : وليش حرام لا جابر احد ولا زاني كلة ابرأدتهة
مرسلين : والشرب هم مو حرام
شاهين :اذا حرام فعلية مو علة احد
مرسلين : بس انتة مو هيج هذة مو انتة وين شاهين الجان يخاف من ربة ومن الحرام والعيب الي مبيوم عاصي ربه هل كد انتة ضعيف حتة من اول مطب بحياتك طلعت عن الطريق الصح وكمت متفرق بين الحلال والحرام
شاهين برود : خلصتي
مرسلين ابتسمت بسخرية وكلت : اي
شاهين : يلة لعد خل نرجع
مرسلين : هزيت راسي وكمت مشيت وراه وصلنة للبيت وعافني ودخل للمضيف مال زلم تنهدت بتعب ودخلت جوة وصعدت كبل فوك واول مدخلت للغرفة شفت اوتار اكبالي شافتني وعاطت بوجهي بعصبية
اوتار : حقيررة وينج خليتيني اروح وانتي اختفيتي اشكد انتظرتج وماكو مبينتي
مرسلين بتعب : اول شي انجبي خل احجي وثاني شي اني رحت وملكيتج فكعدت اشوية كدام الشط ورجعت
اوتار : شنو ملكيتيني صارلي فوك الربع ساعة كاعدة كدام الشط منتظرتج
مرسلين : اندري رحت دورتج ماكو
اوتار : شنو ماكو غير انتي كلتي روحي للبستان وانتظريني وانتطرتج بس اتأخرتي فكلت اروح اكعد كدام الشط بين ما تجين
مرسلين : خررب دخلتي من جهة البستان مو
اوتار : اي لعد منين
مرسلين : لهيج مشفتج اني رحت من جهة الدرج العلة الشط
اوتار : ثول مو تفقنة نلتقي بالبستان المهم ليش اتأخرتي
مرسلين : كتلج كعدت علة الشط اشوية وسولفت وية شاهين
اوتار : شاهين وين شفتي
مرسلين برود : لمن طلعت
اوتار : زين عادي اسئلج سؤال وذا متردين اجاوبين علي فبراحتج مراح اضغط عليج
مرسلين : لا حياتي عادي اسئلي
اوتار : ليش شاهين طلكج
مرسلين ؛ اني طلبت منة نطلك لأن ممتفاهمين وهسة عادي انسد السالفة لأن ما احب احجي بيهة
اوتار : براحتج حياتي
مرسلين : ابتسمتلهة ونزعت صايتي وشالي ورجعتهن بالجنطة وانجطلت ع الجرباية وخذت مبايلي وظليت اكلب بي الحد منعست ونمت و....
______________
تقى
انسدت سالفة زواج ابوية والحمد لله البيت رجع الهدوئة واخت عمة وبتهة العكربة كطعو رجلهم من بيتنة بعد مجانو لاطشين بي كل يومية خري مري ورجعت العزلتي والهدؤي كمت احاول اتناسة وفات امي واعيش حياتي بشكل طبيعي اشكد ما اكدر صح صعب علية هذة الشي وماكو يوم مر علية بلة ما اذكرهة وابجي علة غيابهة الجان وما زال صدمة بنسبة الي بس شسوي لازم احاول اكون قوية علة مودهة وعلة مود بابة الصحتة داتدهور يوم بعد يوم اما مسلم فصار لغز غريب بنسبة الي اشكد ما احاول احلة اكتشف بي شغلات غريبة اكثر وخصوصن نظراتة علية هل ايام احاول ابين ما مهتمة او اجاهلهن واجاهل كلامة الي صاير باللغاز وعمتي الي بدت اسمعني بسامير علة انو اتريد ازوجة وشافتلة مرة زينة تريد تخطبلة ياهة وجذب اذا اكول مهتميت او مضجت معرف بس ضاك خليك اول مسمعت كلامهة وحاولت اشكد ما اكدر ابين انو ممهتمة بس مو بيدي واليوم الي صادف يوم احد كعدت من وكت سبحت وصليت ولبست بسرعة ملابس المدرسة واخذت جنطتي ونزلت ركض لأن متأخرة اهواي شفت الكل كاعد يتريك بصالة صبحت عليهم واول مردت اطلع صاحت علية عمتي وكالت
ام مسلم : وين رايحة مامة تريكي اول شي
تقى : لا عمة تسلمين بس متأخرة حيل وراي طريق
ابو مسلم : بوية مسلم كوم وصل بت عمك بدربك
تقى : اجيت ارد ورفض بس حصلتلي خزرة من حضرتة وكام وترخص منهم وطلع واني وراه صعد بسيارتة واني بصفة واول مبدة يسوق باوعتلة وكلت ببتسامة
تقى : صدوك نسيت اكولك مبروك مقدماً
مسلم بستغراب : علة شنو مبروك
تقى : علة الخطوبة عمة كالت شايفتلك مرة زينة وتريد تخطبلك ياهة
مسلم ؛...............
_____________
اوتار
فزيت من نومتي علة صوت الهوسة والركع مال غراض ادري شنو كاعدين من الصبح اباوع علة الساعة بنعاس بتسعة وربع فزيت من مكاني بسرعة وشفت مرسلين رايحة بسابع نومة ابتسمت ودخلت سبحت ولبست دشداشة لون بنفسجي فاتح وشال اسود وصليت ورحت كعدت مرسلين ونزلت جوة شفت الكل كاعد صبحت عليهم ورحت للمطبخ تريكت ع السريع وبديت شغل وياهن جانو جايبين كمية جبيرة من اللحم والمسواك سئلت بتهم اذا احنة الراح نطبخ كل هذة والحمد لله كالت لا جايبين طباخ واحنة بس انكصصلهم وكعدنة كلنة بالمطبخ انكصص والحقيرات ذبن تقطيع البصل علية بحيت اكصص ودموعي ينزلاً عشرة عشرة وياريت كيلو او اثنين لا صندوك كامل وكفت علة النص وكمت افرك اعيوني بطرف ايدي بقوة احس حرارة قوية صارت بيهن مدنكة افرك وما اشوفلك غير خيال ضخم دخل للمطبخ فتحت اعيوني بصعوبة وشفت الزلمة الشفتة البارحة يم الشط يباوعلي ويبتسم وصاح علة ابنية وكلهة
نسر : خوية زينة شيلي البصل من يمهة وانتي كصصي راح تموع البنية شوفي عيونهة اندمرن دمار
زينة : هههه حاضر خوية
اوتار : ذبيت السجينة وكمت علة السنك اغسل بعيوني وافرك بيهن شوية يلة ارتاحيت وضحت عندي اروئية اباوع هذة الأسمة نسر واكف بالباب ويباوعلي ويبتسم اضايقت من نظراتة ودنكت راسي ورجعت كعدت يم البنات
بس اشو هذة ظل لا طش اريدة يروح ماكو الحد مدخل محمد باوعلة ورجع باوعلي وخزرني هسة هذة شحجي ويا بلة اني بحال خزراتة دنكت واني اسمعة يحاجي بالي اسمة نسر وشوية وطلعو من المطبخ اتنهدت براحة
ورجعت اقطع وياهن وبألف يا ويلاه يلة خلصنة من التقطيع وجتنة المواعين صفح ادري جاين خطار لو حتة يكربون علينة شو من الصبح ليجاي طاح حظي واول مخلصنة من المواعين غسلت ايدي ورحت كعدت بصف امي بعد لو مدري منو يجي هم اكو اشتغل وللثنعش ونص يلة صبونة غدة تغدينة واضطريت اكوم وياهن اغسل مواعين والة حشبع تكرص من امي غسلنة امواعين الغدة للزلم وانسوان واول مبدو يصبون جاي اطشرن البنات وراحن يبدلاً صعدت فوك وية مرسلين وسبحت من ريحة الطبخ والبصل الصايرة ابجسمي كملت سبح ولبست فستان طويل لون وردي فاتح مفتوح من ناحية الصدر والحمالات مالاتة دانتيل نازل علة الكتف جان تصميمة بسيط وحلو وحطيت ويا مكياج وردي بسيط وشسورت شعري علة طويلة وسويت بي برمات خفيفة ولبست كعب بيجي ولبست فوكة بجشت لأن رئستن حروح البيت العروس واخذت شال اسود لفيتة بسرعة واخذت تليفوني ونزلت ركض لأن اتأخرت اهواي وعفت مرسلين تلبس ابصايتة والنسوان نصهة طلعت وبدت تركب بسيارت ادري شعدنة طالعين بتلاثة ونص دخل ينتظرن للعصر هسة حتة المكياج حيسيل كلت هيج واني اطلع من البيت وادور علة السيارة البيهة امي وبيبيتي ظليت اتلفت ادور عليهن بسارت بس ماكو طارن الحد مأجة محمد وكال بحدة
محمد : اشعدج واكفة اهنا ناطورة متولين تركبين
اوتار برتباك : دا ادور علة بيبي وامي ماكو
محمد : جريتهة من ايدهة وصعدتهة بسيارتي وكلت
محمد : هسة ركبي وعود برجعة اصعدي وياهن
اوتار : اباوعلة عافني وأجة ركب بمكانة وبدة يسوق تنهدت بضوجة ودرت راسي علة الجامة وابتسمت واني اشوف الزلم تهوس وتركص اشوية وكال
محمد بعصبية مكتومة : مو جنج مزودة بالبخ
اوتار : يا لبخ اصلاً اني ابسط مكياج بيهن لعد لو شفت بناتهم شتكول
محمد ؛ معلينة بيهم
اوتار : اباوعلة سحب الكلينكس وقربة علية وكال
محمد برود : هاج خففي حمرتج
اوتار : عود صدوك تحجي
محمد : ليش شايفتني اشاقة
اوتار : زين شنو اسمي هذة غيرة لو شنو
محمد : سمي كلشي الة غيرة لأن مستحيل اغار عليج وهسة يلة اخذي
اوتار : ابتسمت بسخرية وجريتة منة وخففت الحمرة ورجعت عيني علة الجامة معرف ليش بكل مرة يتقصد يقهرني ويجرحني بكلامة ومع ذالك ابقة احبة مثل الثولة مسحت الدمعة الصارت بطرف عيني واول ما صف السيارة كدام بيت العروس نزلت وعفتة و...............
______________
مرسلين
كعدتني اوتار من الصبح كمت واني احس النعس بعيوني يعني جاين خطار اشعدنة كاعدين من الصبح كلت هيج واني افرك عيوني بنعاس وكمت سبحت وصليت ولبست دشداشة سمائية وشال بيجي ونزلت جوة صبحت علة جيش النسوان ورحت للمطبخ شفت اوتار كاعدة هية والبنات يكصصن ابتسمت وصبحت عليهن ورحت صبيتلي جاي شربتة وكعدت اقطع وياهن راحت ايدي من ورة التقطيع وكل مرفع راسي اشوف السحلوة رهام واختهة يباوعلي ويتبسبسن فعلاً نرفزني اخر شي شمرت المكشارة وكمت غسلت وشلت بت اختي نونة وكعدت يم انسوان اسمع حشهن ولا اشوف جهرت السحلوة وللظهر يلة صبونة غدة لا استحيت ولا هاي جوعانة وممتريكة طحت دوسة ونص بيحث اكل ومامة تخوز بية عود عيب بس غلست وكملت الماعون الكدامي يلة كمت غسلت وشلت المواعين اني والبنات غسلناهن وصعدنة اني واوتار حتة نبدل دخلت اوتار تسبح واني طلعت فستاني وحذاتي من الجنطة ودخلت سبحت ورة اوتار ونشفت شعري وسرحتة ولبست فستان طويل لون ذهبي وجاكة علة طول الرجل ومن فوك شغل بسيط ولبست ويا حذاء كعب قريب علة لون الفستان ومكيجت مكياج خفيف وحلو ولبست صايتي علة السريع ولفيت شالي ونزلت ركض اول موصلت الباب البيت اذكرت تليفوني غميت كصتي علة هل ثول ورجعت اخذتة وطلعت شفت تقريبن نص السيارت رايحة رحت الكية البيهة النسوان وما شألله متروسة اتأففت ابملل وشفت شاهين صاعد بسيارتة وحدة ابتسمت ورحت فتحت باب السيارة وصعدت ويا باوعلي بستغراب وقبل لا يحجي اي شي كلت
مرسلين : خل اروح وياك فددوة كلت هيج ورمشت بعيوني برائة
شاهين برود : وليش مترحين وية النسوان
مرسلين : يا اخي خنكة وهوسة واصلاً السيارة منترسة يعني مبقالي مكان
شاهين : فهمت
مرسلين : اباوعلة هز راسة برود وشغل السيارة وبدة ايسوق درت علة الجامة وشفت الناس تركص وتغني واحنة كاعدين جنة بعزة ضجت ودرت علي وكلت
مرسلين : اكول ليش مشغل اغنية
شاهين : باوعتلهة صفح ورجعت عيني ع الطريق
مرسلين بعصبية مكتومة : تعرف شغلة
شاهين برود : شنو
مرسلين : يا اخي برودك مستفز
شاهين : اعرف
مرسلين : ومدام تعرف ليش متغير هل طبع ترة محلو وحتخلي اناس تكرهك
شاهين برود : انتي كلتيهة طبعي وراضي بي ومكايل الأحد يحبني
مرسلين : كلبت اعيوني بملل ورجعت كلت
مرسلين بفضول: زين تعرف رهام
شاهين : اي شبيهة
مرسلين : مبينة تحبك
شاهين : اعرف
مرسلين بطفولية : اووي شنو هاي كولشي اعرف اعرف يا اخي غير ترة اكو اهواي كلمات غير كولي واعرف واي
شاهين بحدة : كافي دوختيني وعيب تكولين هل كلمة
مرسلين بستفهام : يا كلمة
شاهين برود : الاوي مالتج عيب
مرسلين : ليش شبيهة
شاهين : عيب وخلص مفهوم
مرسلين : هزيت راسي بستغراب وسكتت الحد موصلنة البيت العروسة وشاهين صف السيارة كبال البيت وكال
شاهين : دنكي راسج ودخلي الزلم تارسة الشارع
مرسلين : ان شألله كلت هيج ونزلت بسرعة من السيارة ودخلت ورة النسوان البيت العرس اباوع علة البنات كولهن جايات قبلي شكلي اني اخير وحدة راحت عيني علة العروس وابتسمت لمن شفتهة شكلهة حلو بالبدلة والخجل طاغي علة وجهة رحت نزعت جبتي وشالي وعدلت شعري وكعدت بصف اوتار وعمتي البنات ايركصن واني وياهة ضالت انصفن الحد ما ملت عليهة وهمست
مرسلين : اكولج منكوم نركص
اوتار بنفس الهمس : ليش تعرفين تركصين
مرسلين : لا
اوتار : لعد انجبي وكعدي لا تفشلينة كدامهن
مرسلين : ضحكت وهزيت راسي وسكتت واول مكالو حيفوت العريس ايحنيهة طفرنة اني واوتار لبسنة جببنة وشالاتنة ورجعنة شفنا داخل والهلاهل كابة اباوع علة العروس صارت طماطة من الخجل ابتسمت علة شكلهم مبين كيوت عسى الله يوفقهم ويسعدهم ورة محناهة بقينة اشوية يمهة وراهة كالو حنرجع رجعت لبست صايتي وشالي وطلعت ورة البنات اباوع علة اختي هدى ذبت علية نور وراحت السيارت شاهين ابتسمت بسخرية واول مردت اركب وية النسوان صاحت السعلوة رهام بصوت اشوية عالي
رهام : يا جا تخلين اختج تصعد وية رجلج وانتي اهنا
مرسلين برود : عفواً حياتي بس اشدخلج
ام مالك : يا جده فوك ما تنبهج علة رجلج هيج تحاجينة
مرسلين : باوعت علة امي بمعنة انتي احجي وياهن ورجعت نزلت من السيارة رحت عيني علة سيارة شاهين شفتة طالع من السيارة وصاير اعصاب واختي داخلهة باوعلي بخزرة وقرب علية وكال
شاهين : شمنتظرة متركبين
مرسلين بنرفزة : مدخلك
شاهين بحدة : الزمي السانج لا ادفنج واحجي عدل شبيج
مرسلين بعيون مدمعة : الأخت تكولي تخلين اختج تصعد وية رجلج وانتي اهنا
شاهين بصوت جهوري : رهام كلتلج هيج مو
مرسلين : هزيت راسي بمعنة اي ومسحت ادموعي
شاهين بحدة : وانتي مثل الطفلة بجيتي علة حجيهة
مرسلين : باوعتلة بعصبية وشفت سيارت اخوية محسن قربت علينة وويا مرتة وعلوش باوعلي بمعنة شكو ابتسمت بوجهة ورحت ركبت ويا من غير حتة ما التفت الشاهين الحسيتة اشوية وينفجر من العصبية بس يستاهل وهاي السعلوة منسالهة ياهة وردهة اردهة الحقيرة اشون حرجتني كدام النسوان واول موصلنة اخوية للبيت شلت نور ونزلت من السيارة ودخلت جوة نزعت جبتي وشالي وكعدت بصف مامة الي اول مدخلت اختي هدى بدت ترزلهة ما سكتت الحد مأشرتلهة ع النسوان الكامن يباوعلنة وما شألله خوات العريس ونسوان اخو استلمن العروس كص معافو شي معيبو علي مبينين قبل لا تجي انو يكرهوهة اباوع علة اوتار فاتحة حلكهة ومصدومة من كلامهن قربت عليهة وكلت
مرسلين : سدي حلكج لا تدخل بي ذبانة
اوتار بصدمة : لج شفتيهن اشون يحجن
مرسلين : هههه عوفيهن خل ايولاً
اوتار : هزيتلهة راسي وسكتت
مرسلين : ظلن البنات يركصن الحد مصار المغرب طفو الديجي لأن أذن وراهة صاحو البنات الولد حيركصون چوبي وركضن كلهن علة السطح صعدنة اني واوتار وهدى وياهن وباوعنة من الستارة ازلم تارسة الشارع وكولهة دشاديش وجراوية لو عكال ابوع علة الولد اجمعو وسو مثل الدائرة وترئسهة العريس ومن الجهة الثانية شاهين جان شكلهم ايجنن اباوع علة البنات اكلن شاهين بعيونهن واوتار تباوع علة محمد وتبتسم التفتت علة هدى ولكيهة هم مرتكزة عيونهة علة شاهين وربي حصرتني اضحكة علة شكلهن الحمدلله والشكر اشو امعطب كلت هيج واني انزل من البلوكة ورجع جوة يم انسوان اشوية ونزلن البنات وصاحت بيبيتهم عزلاً البيت صار هوسة زفرت انفاسي بتعب وبدينة انظف وية البنات وفوك الساعة يلة خلصنة احس ظهري حينكسر من كثرل تعب اخر
شي شمرت المكناسة ورحت للمطبخ حتة اشرب مي واول مدخلت شفت شاهين بوجهي كاعد ع الطاولة ويفرك راسة بوجع والسحلوة واكفة علة الطباخ اسوي كهوة عقدت حاجبي بستغراب وكلت
مرسلين : بيك شي
شاهين : دخت من الهوسة
مرسلين : اباوع علة هل سحلوة حطت كدامة الكهوة وكالت
رهام : تفضل هاي الكهوة
شاهين برود : تسلمين تعبناج
رهام : تعبك راحة ابن عمي
مرسلين بسخرية: ومنين اجاج ابن عمج اشو ابن ابن عمة الأبوج اباوع علة شاهين ابتسم بس خفة ابتسامتة وحل محلهة البرود وهاية السحلوة نطت اعيونهة من العصبية وكالت
رهام: حتة لو يبقة بيناتنة قرابت دم وعمام مو هيج ابن عمي
شاهين برود : اي يلة هسة اترخص
رهام : وين بعدك حتة مكملت كهوتك
شاهين : لا خوية مشكور دايمة
مرسلين : اباوعلة كال هيج وطلع والسحلوة شالت الفنجان وراحت تغسلة رحت طلعت بطل مي من الثلاجة وكعدت علة الكرسي اشربة وكول
مرسلين بستفزاز: رهام
رهام : خير
مرسلين : حسئلج سؤال واريدج اجاوبيني علي بصراحة
رهام : اسئلي
مرسلين : انتي تحبين شاهين جاوبي بأي لو لا
رهام بثقة : اي احبهة
مرسلين : زين اشوكت حبيتي اذا هوة اصلاً ميجي للبصرة اهواي
رهام : من اول يوم شفتة بي حبيتة وعشكتة بس للأسف كالولي خاطب اختج ويحبهة حاولت اشكد ما اكدر انو اشيلة من كلبي وما افكر بي بس ما اكدريت ورجعلي الأمل بي بيوم عرفتة طلك اختج بس رجع وتحطم بشكل اقوة من كبل لمن عرفتة خطبج وعقد عليج
مرسلين : طيب مشوفينهة جرئة او وقاحة منج تحجين هذة الحجي الخطيبتة
رهام : لا ورجع وكولهة كدامج احبهة وراح اخذة منج وخلي ايطلكج مثل ما طلك اختج
مرسلين برود : لعد انكول مبروك عليج من هسة
رهام : ليش
مرسلين بيتسامة : لأن هوة اصلاً طلكني
رهام بصدمة :.........
______________
محمد
كاعد بالمضيف وراسي مسطور من هل هسوة ولليل يلة ازلم خفت وبدت تروح بس بقة اشكم واحد من كرايبهم وبدو يسولفون همة وجدي عن امور الفصول والطلايب شوية وانتبهت علة نسر مدري شيهمس بأذن جده اباوعلة هزلة راسة وكال
ابو مالك : الله بالخير بوية
الكل : الله بالخير والعافية
ابو مالك : خوية انه اليوم جايك بطلب واتمنة متردني خايب
الجد شاهين : أمر خوية وما يردك الة الساني
ابو مالك : ما يأمر عليك عدو يخوي و انه اليوم اريد اطلب ايد المحروسة حفيدتك اوتار لوليدي نسر علة سنة الله ورسوله
الجد : والله يا خوي ما نلكة احسن منكم ونسر زلمة ونعم منة والف من تتمناه بس اعذرني بوية البنية محجوزة لحفيدي محمد من صغرهة
محمد :............
