رواية في ذمة الغريب الفصل الرابع عشر 14 بقلم كنوز

الإنسان أله حوبة 

━━━━━━━━━ ⚖ ━━━━━━━━━

صوت رحمة فزز حتى الطيور الملمومة ع شجرة

موش صوت عادي جان ابد تصرخ من غمج روحها

عبالك والدة واگفة ع النهر و تنده ابنها الغرگان 

وجهة شاحب عبالك ميت.. عيونها جاحظة بفزع ومن كد ما صرخت شفايفها تفطرت و طلع دمها منها

ركض الها غفار أول واحد و بحركة سريعة نزع شماغه و ذباه ع وجهه يغطي عيونها من المنظر

رمشت عيوني.. لحظة... جزء من الثانية..

دقيقة احاول استوعب... عيوني تشوف بس عگلي يرفض

رحااب امددة جثة بلا حياة... الدم صاير بقعة يمها و الأرض من اهد لعنة النبي آدم عليها وهي ترفض تشرب من دم البشرية

عمار طلع يدگ ع راسه يفتر فوگ جثتها يخاف يتگرب الها و تالي گعد يم راسها 

عمار :: يمه شبيج شنهي يوجعج ليش نايمة ع تراب .. يمه حاجيني ليش ما تردين عليَّه 

كزار مگابلة من الجهة الثانية لف الشماغ ع وجهه يدگ بيده ع راسه و الثانية رافعها ينعى موتها 

كزار :: شلون تعوفيني هيج و تمشين رحاب.. شريجة حياتي انتِ والله ما اعرف اعيش من دومج شكثر اخذت عليج نسوان مثلج مره ما حلت بعيوني 

گالت اله وحدة من النسوان الواگفة 

:: سد عيونها حجي ما يصلح تبقى هيج مفتوحة 

عاين للمره و رد نظره ع عيون رحاب شلون شابحة ع وسعها فز وكع ليورا و بصوت يرجع گال 

كزار :: لا اخافن انا لا تروح تاخذني وياها 

هزت المره ايدها بسخرية و عون واگف يمه گاله بشماته 

عون :: هاي شبيك عمي مو ع اساس تحبها و شريجة حياتك وما تعيش من دونها دسدهن هلبت الله و تجرك من ياختك وياها 

گطع كلامهم جدي تگرب سد عيونها و صاح ع عمار 

هاشم :: جيب بطانية غطيها شنهي ما تعرفون حرمة للميت انتم 

گام يتعثر دخل للبيت و جدي خزر عون و طرده من المجان 

اعصابي من الداخل ترتجف لوحدها اعاين رجليه تهتز

فجأة اختفى كلشي من جدامي وصار اسود أدين قوية شابگتني و صوت قسيم يصبح

قسيم :: لحد تطلع.. لا تطلعن.. شجاي احجي انا فوتن جوه لحد تطلعن

يحجي و يصيح ع البنات حتى لا يطلعن و شابگني دخلني للبيت كعدني ع دجة

:: عمة جيبلها ماي بساااع وينجن تحركن

يطبطب بيده ع خدي وانا بس صورة رحاب تتراوه جدامي اسمع صوت غفار اباب الحوش

درت بعيوني الباب شوية مفتوح كاعد جدام رحمة يحجي وياها فزيت من انرش ماي بوجهي

قسيم :: براءة لا تخوفيني احجي وياي خوية 

افتح حلگي اريدن احجي لساني ثگيل سجدة طلعت تتوجه ع الحايط تنشد شكو و  عنبر مثل عادتها رغم كل التحذيرات طبغا غلب و فضولها جرها من وراها قسيم و طلعت تتسحب وياه ما عبرت عتبة الباب ايده جراح دفعتها و نتر بيها 

جراح ::  طبي جوه شجاي نحجي احنه انگليزي 

عنبر :: ما اخافن شبيك هاي براءة و رحمة گلوبهن رجيجات انا گوية ميل خل اشوفن 

جراح :: عنبر و روحها لامي اذا ما طبيتي جوه هسه احطج هنا و ادكج 

عنبر :: بس اعاين شوية منا من الباب والله ما اروحن هيج شوية هلكدوتها بس 

تحجي و تاشر اله جامعة اصابعها الابهام و السبابة بمعنى شوية صغيرة بس 

هز راسه اي و بيدها ياشر بمعنى تقربي 

جراح :: اي تعاي يله 

ما جانت متوقعة منه القبول شمرت عبايتها منا ومنا و ركضت وياه ما وصلت يمه كضاها من اذانها حيل 

جراح :: خل اكولن حجاية بعد وما تسمعينها اذناتج املصهن وعلي يله فوتي جووووه 

زمخ بيها و دفعها وهي خازرته 

جراح :: خل اشوفنج تعتبين هاي الباب رجليج اكسرهن 

عنبر :: تهدالي جراح أفندي اذا ما گلت لأبوي و خليته يـط

سكتت زامة شفايفها وهو فاتحة عيونها منتظر منها حجاية حتى ينقض عليها 

صارت هوسة بره و غفار ما يهله يعوف رحمة حتى لو جانت بينه وبين البيت خطوتين من مجانه صاح و القلق ينهش بصدره

:: عمه.. سجدة.. وينجن وحدة منجن تجي تشوفها احجي وياها ما ترد بس ترجف

طلعت اله سجدة بعد ما غطوا رحاب و عمة إصالة ركضت بيدها كلاص الماي.. ويا ما زاحت سجدة الشماغ عن عنها  فزت البت و شهگت تدور بوجهه 

و مثل الملهوف شبگت سجدة لدرجة من كد ما ضغطت ع عباية سجدة  اصابعها صارن بيض

رحمة :: ذبحتها.. شفتها ذبحتها... والله ذبحتها

سكوت واحد يعاين لوجه الاخر... گتال رحاب... حرمة...

جراح :: ياهي ذبحتها ما شفتي وجهه خوية 

نتر بيه غفار و دفعه ليغاد 

غفار ::  هي وگتها هسه ما تشوف حالها 

عمة إصالة تحاول تشربها ماي بس هي مصككة ع اسنانها و يطلع صوت اصطكاك شلون واحد بردان رغم جان الجو دافي حلو بس البرد دك بروحها

دفعت سجدة عنها بساع تتقئي و تبجي و عمة تغسل الها جدي جان يم كزار و اجانه 

هاشم :: كومنها بويه فوتنها للبيت منا الوادم التمت تعاين 

سجدة عدلت العباية ع راسها و عمة إصالة سندتها وهي رجليها ميتات تنهض و تطيح بساع كال الهن غفار يعرف بحالها 

غفار :: من تخاف بعد ما تكدر توكف ع طولها.. ترفة ركضي علاجها وين لكيتي هذيج المرة جيبي بساااعج

ركضت ترفة الحجرة و غفار يروح هيج ويجي هيج يعاين لحالها عبالك يلوب عبالج الوجع بيه هو

جراح :: لخاطر العباس اركد مو افتر راسي من وراك 

غفار :: جراح واصلة وياي حدها اذا ما تسكت هسه انيم الطابوگ هاي براسك واسوي الك فشگتين 

عاين جراح صوب رحاب و رد يعاين لغفار گال گوه كاتم ضحكته 

جراح :: وحگ ربك عرفت گرفتها فگر و تريد تجر وراها شوف هاي روحها گامت توز بيك حتى تگتلني خل أفلت بروحي العزيزة 

دنگ غفار شال طابوگة ثلثية من الكاع و جراح شرد من جدامه 

رحمة :: عيوني ما دا اشوف بيهن 

فززتنه من كامت تتلفت براسها يمنى يسرى تهمش وتتخبط بثنين اديها تريد بس تكض شي.. او شخص من خوفها،،،سجدة بساع مدت ايدها الها كضتها و كرفصت جدامها و لوحت بيدها الثانية جدام وجهه 

سجدة :: شنهي ما تشوفين رحمة عايني هاي أيدي جدامج جاي تشوفينها ؟

انهارت تصرخ وتصيح عيون ما اشوفن بيها عمة إصالة تحجي وياها تحاول تهدأها ماكو

غفار عيونه عليها منتظر منها جواب لسجدة انها تشوف من شافها

بهل حالة..

الأعراف.. العادات... تقاليد المجتمع... الدين كلها نمحت من راسه بخطوات قلقة تگرب كرفص جدامها اول مرة يحجي وياها بهل الگرب 

:: رحمة انا يمج لا تخافين..وهي بالعكس ما هدأت زاد خوفها تتحرك بهلع و تصرخ حجه بصوت أعلى من صوت خوفها حتى تنتبه اله..... موش احجي وياج اهدئي ع كيفج وياه نفسج 

كامت تشهك من الرعب حگها فجأة و ينطفي نور عيونك ويقابلك بس الظلام 

:: جري نفس مو راح تموتين 

صاح بيها من شافها اختنكت وهي تنتفض ويا صوته كضاها من اديها من فوك ثوبها و اول من يلفظ اسمها ع لسانة

:: رحمة انا يمج و دم المظلوم ما اعوفنج لا تخافين بس اخذي نفس.. تنفسي ع كيف لا تشهگين 

يسحب نفس بصوت مسموع و يزفره حتى هي تسمعه و تقلده 

ثبت حركتها وهي كامت تاخذ نفس و تزفر شوية و رجع تنفسها طبيعي تنهد بقوة عبالك هو الجان الما يتنفس.. يثني عليها حتى تبقى هادئة ما تفزع 

غفار :: اي عفية سباعية  استمري هيج اخذي نفس قوي و طلعي 

أشر لعمتي طلعت حباية من علاجها حطتها بحلكها تشربها ماي من شاف الناس واكفة تعاين صاح بيهم 

غفار :: شكو شعندي مسرحية كلمن لمهجومة يللللله

جراح :: صوتك ابن الدوام البت راح تنجلط من وراك 

صاح بيه جراح يلومه البت توها هدات وهو بصوت فززها خلى الخوف يرجع يتملكها وسجدة أيدت جراح هم 

سجدة :: ع كيفك غفار احنه كوه سكتناها النوبة تصيح يمها

عون بعد ما طگة جدي بالعوجية و طرده اجه يمنه اخذ  علاجها من ايد عمتي قرا ونشدها

:: شنهي مرضج تصلب عندج 

دارت راسها صوب صوته هزت راسها اي

عون :: جا هسه بس ترتاحين و تهدأين ترجع الرؤيا بالتدريج لا تخافين

رحمة :: ما.. ما صايرة وياي قبل.. جانت تصير بقعة عمية بعين وحدة و من اخذ العلاج تروح 

عون :: متأكدة كلشي ما تشوفين 

عاين لغفار رفع غفار ايده يمشيها جدامها وجهه 

غفار :: جاي تشوفين لا 

:: اشوف ضباب قوي و ظل اسود خفيف يروح و يجي  گدام عيوني

هز عون راسه لغفار يطمنه واتضح انها ما فگدت النظر بالكامل جانت الرؤية ضباب كلش ومن رعبها عبالها عمت

عمتي إصالة واكفة و طالت النظر وين رحاب موسدة التراب و مشت صوبها 

وكفت بنص البستان تدير وجهه بكل صوب وصاحت بصوت چن ام تعابت جثمان ابنها هيج جانت الحرگة والوجع بنبرة صوتها 

إصالة :: يا سامعين الصوت هذا حگ دم اختي رده العباس 

الوادم حتى اللي چان ابيته طلعوا من سمعوا صوتها..حتى البعيد تگرب يسمع 

إصالة :: أول امس عاتبته وبجيت گتله جا هيج يا ابو فاضل جتال اختي يتنومس بهدر دمها جا موش هي علوية و محسوبة عليك تقبلها يظل دمها ع الگاع  

تگربت بصوب رحاب شالت البطانية عنها وخذت من دم نحرها لطخت جفوف اديها  تحجي لناس و تاشر ع جثمان رحاب 

:: نفس هل طيحة طاحت أخيتي و خلوها بنتها مثل فرخ الحمامة تتمرغل بدمها 

::  أمس رفعت القضية للكافل و هو تكفل بيها منا وغاد انا اتكتر وهو يرد الثأر.... شلون تفض وتخلص عرگة وقائدها العباس 

شالت طرف عباتها تدبج و تهوس للعباس تتشكر منه..وچن كل المشاعر اجتمع بداخلها.... حزن.. فرح... جرح قديم انفتح ... حوبة ... مرأة ... جنين ابطن امه انذبح 

تگربت عليها حجية سلوى تحزمت بعبايتها وگابلتها تهوس وياها 

حجية سلوى :: ولكم هذا العباس ابن علي الكرار وابن ام البنين ظهر حسين وكافل ام عون ياهو يگدر يوگف بوجهه 

ردت عليها عمتي إصالة بنفس كلماتها 

إصالة :: ولكم هذا العباس ابن علي الكرار وابن ام البنين ظهر حسين وكافل ام عون وهو تكفل بثار العلوية 

تگربت نسوان يمها يحجن كرامات الامام العباس ع وياهن هاي اللي تگول انطاني وليد و سكت الشمات وهذيج اللي تگول نخيته ع حجرة و انطاني بيت... 

هم وسيلة هل الناس لله تعالى و ع فطرة ينخونه من حجاتك يم شخص موش تودي عليه ناس يحبهم حتى ما يرفض الهم طلب واحنه ويا اهل البيت هيج...

ندارت عمتي صوب كزار و صاحت بصوت متشحرج 

إصالة :: اليوم طلعت شمس اخيتي و غابت شمسكم كزار 

چن طير وهو مصوب بجيلة الصياد باقي يرگص هيج تهوس  الا عمي ابو طالب شبگها و ردها للبيت 

عنبر :: ما اعرف ليش رحمة و براءة خافن انا لو شايفة رحاب وهي ميتة فد افرح جي الخبر يطش مني 

طلعت اعاين سيارات الشرطة كومة و شرطة و رتب مخلين قطع صفر صغار عليهن ارقم ع كلشي موجود يمها و بعد تحقيق و نشدوا الوادم ع مدري شني خذوا الجثة لطب العدلي و مشوا 

ترفة مقلصة عيونها و تعاين لعمي كزار من شافتني دغتني إصبعها بخاصرتي 

عنبر :: ااااخ موش اصبع تكول دريل مال تفليش احسن كليتي طلعت من الصوب الاخر 

ترفة :: الطمي ولا تبالغين اصلاً انا ما أأذي عبالك گطن.. اسفنج ما تشوفين سموني ترفة 

هزين أيدي مستهزءة 

عنبر :: من الترافة البيج عمار يطكج طگ لو يطگونه للحيوان يموت وانتِ بعدج عايشة 

ضمت حلكها بجف ايدها تتصنع الصدمة و شهگت متأثرة عود و كامت تكرض باظافرها باسنانها 

ترفة :: ولج صدك جان مفروض من يطگوني اسوي نفسي مغمى عليَّه و اتخوع شيلوني منا اميل منا موش يطگوني و اگوم هسه شيگولون عليه موش أنثى مو 

عنبر :: اي حتى سمعت عون يگول ع اخوها خشنة تلطعها و تكوم 

ترفة :: هسه افرح لو احزن 

:: انا ما اعرف بس مرة سمعت سجدة تگول لزوم وحدة تصير گوية وياه اللي يأذونها و تصير ناعمة جدام اللي يحبونها 

:: يعني انا صح و بعدني أنثى رقيقة ما صرت خشنة همزين طمنتيني الله يطمنج 

:: و غصبًا ماعليهم أنثى اصلاً تروحلج فدوة رحاب وهي بترابها 

فزينه ثنينه من كزار طلع بيده تفكة رمى ليفوك و رجع وجه سلاحه ع الولد واحد واحد يحجي بحقد 

كزار :: ياهو منكم گتلها ادري بيكم تكرهونها جي تحجي الحگ صارت مكروه 

هاشم :: كزار خلني محترم صوابك و نزل اسلاحك ولا تخليني أمد عليك وانت بهل عمر هذا 

وجه سلاحه ع جدي الولد كلهم انتفضوا صاروا كدامه 

كزار :: حتى انت بويه صرت ويا الباطل تنحش بيك إصالة و تقرا بأذنك عليَّه و ع حرمتي 

زاح جدي الولد من جدامه ما خايف و بصوت حاد گاله 

هاشم :: كض لسانك لا اشلعه من نص بلعومك الك و نوبة الآخرة من تحجي وياي عينك لا تحطها بعيني و صوتك ترفعه أعلى من صوتي فااااهم 

كزار تخبل ركض بالتفكة صوب غفار حطاها بصدره و يصيح 

كزار :: انت ماكو غيرك يتجرأ و يسويها هنا و معروفة  شغلتك هاي.. سيوف و خناجر و الذبح 

كض غفار التفكة و لوا ايد كزار و خذها منه شمرها ع تراب 

غفار :: واذا مسويها شنهي خايف منك ما احجيها ... ترباة حاكم انا اللي العرب كلها تسولف بصيتة موش الصح حتى الغلط الاسوي اتنومس بيه 

ابتعد عنه عاين ع ولد مرة يروح ع جراح يوجه اصابع الاتهام اله مرة ع عون... همست لترفة 

عنبر :: دگول مرتي مجلوبة و ما مخلية محب الها هل وضاع دمها بين القبائل 

ترفة :: ولج سكتي لا يسمعج و يجينه 

عنبر :: وشني خايفة منه غير ابوي گبل لا يوصلني يطره نصين 

صفن عمي كزار يروح و يرد يصفگ بادية بخسارة ندار عليهم ونشد غفار يستفسر 

كزار ;: سمعت هاي البت الصفرة تگلك الگتلتها حرمة مو ؟ وينها اريدن انشدها شافتها تعرفها ياهي ؟

درعم يريد يروح لبيت عمي حاكم وين رحمة موجودة اعترض دربه غفار حط ايده بصدره موگفه بمجانه ومن سمع طاريها ع لسان كزار نگلبت أحواله كلها ذرة هدوء ما ظلت بوجه 

غفار :: انا محذرك و محذر عرجك النجس عيونكم ع ظلها و ظل كل حرمة ابيتي ما تشيلونها وجايني تريد توكف گبالها و تسولف وياها شسامع عني شادهن حديد  كزااااار 

ارتعب عمي كزار غفار معروف عنه رزن وما بتعصب بساع لو اغتاظ معناها السالفة جبيرة وكلها تتكتر عنه 

كزار :: مثل بنتي حسابها شمالك گمت ترجف عليه 

غفار :: غريبة عنك لا بنتيك ولا اخيتك واذا شفتك فد يوم ما غاض نظرك عنها من تفوت اخليك لاخر يوم بعمرك مگابل الظلمة 

تگرب جدي و قسيم و جراح كلهم باعدوا بينهم و جدي حذر عمي كزار 

هاشم :: البت ضيفة يمنه كزار و أمانة بشارب غفار لا تورطها بمشاكلك لان راح تلگاني انا بوجهك ساعتها 

راح عمي كزار لساگية شال ماي غسل وجه أكثر من مرة وكعد مشابك اصابعه فوك راسه 

:: ياهي هاي الحرمة السوتها و شلون انطاها گلبها تذبحها الله أكبر الوادم اكلت لحم ذرعانها ما ظل خوف من الله عدهم 

مسوي روحه يبجي و مقهور حتى يكسب تعاطف الوادم فجأة فز و ركض يدور وين حط التفكة 

كزار :: ماكو غير إصالة سوتها هي تشوف الدم الـ ع خبرة ولا تشوفها 

وياه ما كض التفكة جدي طگه بالعوجية ع ايده حيل مخليها تطيح منها شالها وجه عليها 

هاشم :: جرب و لوح إصالة بخدش واحد بس جرب وعلي اگتلنك كزار واخلي هل الوادم كلها تسولف بينه الاب جتال وليده 

خاف عمي كزار تراجع كاض ايده و ملامحة تعكرت بوجع 

انتبهت ع آمين واگف ع جهة بيده سجينة أخذها من ورشة غفار مشه الطرف الحاد ع جف ايده يخلف جرح و يضحك وصاح 

آمين :: اطلق لها السيف وليشهد لها زُحل 

التفتت صارت عيونه بعيوني ابتسم ومسح الدم يضم ايده ورا ظهره عجزت افهم تصرفات... نوبات احسه عاقل... نوبات مجنون تنطبق عليه مقولة... اعقل مجنون 

براءة :: گاعدة و الرعب أحسنه لسه مربع ع صدري رحمة بس صافنة من رد نظرها و رجليها صارن زينات گامت تمشي 

بخمول غسلت وجهه واجت فتحت الكنتور طلعت جنطتها و تلم بهدومها 

براءة :: ع خير رحمة تلمين هدومج وين تردين 

:: اريد اروح لـ اهلي.. اريد أمان خايفة اني هنا حتى واني صاحية احس روحي بنص كابوس 

البت مهما كبر بيها العمر ومهما اشتد عودها و قوى تبقى ضعيفة و باصغر مشكلة تصير وياها تظل تدور بالوجوه ع أهلها وما تحس بـ امان الا بحضنهم... و رغم هذا كله حاولت اقنعها تبقى 

:: حگج والله و معذورة والله يلوم اللي يلومج بس هل شغلة موش بادينه من صارت ولا احنه اللي ماذينج ليش تمشين وسالفتج بعدها ما كاضية 

ذبت الهدمة من ايدها وكعدت مرتجية ع كنتور غطت وجهه باديها وبجت 

:: ما ماذيني بس اني اريد اهلي ما اگدر ابقى أكثر صورة رحاب وهي مقتولة حتى واني مفتحة عيوني گدامي 

:: هسه اقرالج قران و اكتبلج آيات تشيلينها وياج وتصيرين زينة 

:: لا براءة عفية خليني اروح اريد اشوف ابوية بس بشوفته يطئمن گلبي و ترتاح روحي 

عجزت عن الرد وهي مسحت دموعها ،،ذبلانة و التعب مبين عليها كملت لبست صايتها 

رحمة :: بلكي تگولين لاخوج يوصلني ما اندل منين اصعد منا

طلعت من الحجرة لكيت جراح يسولف وياه سجدة ضارب الدنيا عرض الحايط جايب الها ريوك و كعدها بالحديقة يكلها بيده 

طلعت اشوفن غفار وين 

براءة :: رحمة تريد تمشي لبيتهم 

غفار :: شنهي تمشي و ليش،، امي سمعتها حجاية 

:: هي وينها امي اصلا لگفتها عبايتها و طلعت ما اكتفت بالنقال مشت لخوالي تبث الهم مباشر 

:: جا ياهو وياها 

:: جا الصار هين غفار من اهد ما اجت يومية طلابة بوجهه صايرة و ختمتها رحاب ما لكت تموت الا جدامها 

:: وشنهي زعلانة ع موتة رحاب روحي گلها هي جانت موش خيرة وهاي جزات اعماها 

:: الحرمة ماتت غفار هي و ربها تتجازه 

شاف سجدة گاعدة بالحديقة و جراح گبل لا يدخل غفار صاح لجدة كعدها بينه و بين سجدة حتى غفار ما يحجي ... خزر جراح 

غفار :: تسممت 

جراح :: اي خوية الحمد لله شلون جبن عرب فاتك يخبل 

:: يعني شبعت 

ضحك جراح عبن يعرف تالي هاي الأسئلة شني دگدك ع بطنه وگاله 

:: الحمد لله بعد منا لأسبوع ما اكل 

:: خوش يله گوم ولي لبيتك وبعد لا تجي لهنا 

:: قابل بحالك انا جاي اشوف مرتي 

ما رد عليه غفار دنگ ع گاع يدورله ع شي يهفه بيه و جراح ركض مالحك يوصل الباب طفر من السياح و غفار هفة بخشبة ثخينة اجت بظهره خلى يصيح 

نفض اديه من التراب و صد بوجه ع سجدة 

غفار :: شلون صرتي خو ما يوجعج شي 

سجدة :: لا زينة الحمد لله 

تگرب الها ساعدها تنهض ساندها 

:: جا فوتي احجي وياها اللي هاي شسمها اقنعيها تبقى 

ابتسمت سجدة اله وهو مدري شهمس الها أكو موضوع بينهم دخلت سجدة الها وهو بقى يلوب 

وبعد كل شي رحمة ما جان جوابها الا الرفض ومن شاف دموعها وهي تتوسله 

رحمة :: ودعت البنات و جدو وبيبي هم و طلعت رغم اعرف شنو منتطرني هناك بس يبقى بيت اهلي وهمه يمي 

و ارحم من اللي شفته بهذا المكان اجر تكسي لان سيارته مدري منو منهم أخذها... صعدت رجيت راسي ع جام و الأفكار تنخر براسي مثل الدوم من ينهش بالجثث 

رسمت طريقي واضح هل مرة مو مشوش ولا مجهول.. راح اروح... راح تاخذني الشرطة... نزار وياه القانون و القوة... مصير واضح السجن... الأفكار سرحت بيه أكثر 

ابوية شنو يصير بيه من انسجن... عروة... أزاد....

طلعني من شرودي من فتح الباب باوعت متفاحئة هوسة... و السيارة واگفة بشارع الامام الكاظم عليه السلام 

:: هاي وين جبتني 

:: دنزلي هسه شنهي نسولف جدام الوادم تردين 

نزلت فشلة من السايق بقى يباوع النه مشه واني ورا أشر اللي ع دخول النساء 

:: فوتي زوري وصلي و من تطلعين اوديج عود 

:: دا تضحك عليَّه انت مو 

:: هل لدرجة تشوفيني مستهين بيج حتى اضحك عليج 

:: اي هي وحدة اثنين لو تضحك عليَّه لو مستهين بيَّه مالهن ثالث 

:: لو مستهين بيج  ما تعب نفسي وياج اخابر ع اخوج يجي ياخذج وأنهى السالفة 

:: لعد اتصل عليه هسه خل يجي ياخذني مناه 

:: خوش هسه ما طول وصلنه فوتي اقري الزيارة من تطلعين تلگينه ينتطرج هنا بمجاني 

هزيت راسي اي و صدكت بكلامه توضيت و دخلت أزور كل مرة وياه رانيا لو صديقاتي هل مرة وحديع

دنيا صبح و ناس قليلة زرت براحة گلبي أكو لشعور غريب من دخلت الحضرة 

عبالك واحد وانتزع من صدري شكو خوف... بس امان و راحة كعدت قريت قرآن... الزيارة.. و راحة غريبة مرافقتني طول ما اني گاعدة بهذا المكان 

كملت و طلعت دورت بعيوني لا هو.. لا عروة.. غرغرت عيوني عافني وحدي هنا و راح... لا اتصل ع اخويه لا موبايل عندي 

مسحت دموعي احجي وياه روحي 

" شكو تبجين شبيج زعطوطة ما تندلين بيت اهلج هسه اروح و اگول لعروة عليه هم " 

دورت بجنطتي حتى فلوس ما عندي حسيت الدينا ضاقت بيه ما احس الا واحد من صفي مد الي علاكة 

:: هاج 

نداريت عليه عگد جبينه من شاف دموعي مسحت خشمي اخذتها منه وما كتله خفت.. شيگول عليَّه هسه  طلعت المي شربت وجايب وياه عصير و كيكة 

:: وينه عروة مو كلت من تطلعين تلكي جاي 

ما انطاني جواب بس تقدم خطوة يمشي گدامي مشيت ورا كل ظني راح نروح لاهلي 

:: شوفي يا بت الناس انا اعرف انتِ بنت ناس اجاويد وتعرفين بالاصول لو اجيلج انا واحطن أمانة عندج يصير تجيبنها الي گبل لا اني اجي عليج أخذها 

صفنت الجواب واضح بس هذا الجواب راح يكون عقدة بطريقي وتاليه ارجع وياه ه لازم 

:: اشوفنج سكتي يعني لا... جا شلون تردين اردج لبيتكم 

ضاق صدري جنت فرحانة راح اشوف ابوية وانسد الباب بوجهي بس كلامه خلى حواسي كل تنتبه وياه 

::  انا مقدمج حتى ع ابوي رحمة 

:: مقدمني ع ابوك!!! 

كررت كلامه بيصغة سؤال و تعجب هز راسه اي 

:: صاحب ابوي الحجيتلج عنه و گتلج يساعدنه بقضيتج 

:: اي 

:: جاي اسويله فضل و المقابل چان تنفتح قضية ابوي و ينعاد التحقيق بيها حتى اوصل لگتاله بس صار شي و تغير كلشي و صار المقابل قضيتج و البراءة الج 

:: ما يحتاج  تـ 

بتر كلامي ينهي الجدال 

:: لا يحتاج... و يحتاج جثير هم انتِ لا تفكرين ارتاحي ويجيلج الصافي مني 

:: و شلون اتأكد من كلامك 

تسلطت ابتسامة ع وجه و طلع موبايله يتصل فتح مكبر الصوت شوية و رد عليه رجال منيين من بحة صوته بالخمسينات من عمره 

:: اهلا ابن الغالي بشر وين وصلت وياهم صارت ثـ.. 

قطع كلامه تحمحم و الرجال سكت كأن فهم أكو احد يسمع مبين اكو سر بينهم 

:: شلونك سيدي شخبارك ما رديتلي خبر ع القضية الگتلك عليها ذاك اليوم 

مبين من كلامه مو سهل ما جاويه رد سؤاله بسؤال ثاني 

:: اي سيد ما گتلي صاحبة القضية شتعود الك 

:: من اهلي 

سكت ثواني و رجع سئلة كأنه متأكد من الجواب بس يريد يسمعها منه 

:: البنية عندك غفار 

:: اي عندي 

:: ما اخفي عليك القضية لو ما تدخل زوج المجني عليها 

:: البت ماتت موت الله شنهي مجني عليها النوبة سيدي تريد تورط البت انت 

:: غفار گتلي احجيلي بالقضية واني دا احجي الك الموجود بالملف شنو تريد تتعارك وياي تعال للمركز اخلي الشباب يضيفوك 

:: و شنهي يعني خايف سد هسه خمس دقايق تلكيني يمك 

ضحك الرجال يقهقة هاي الضحكة مال الاغنياء مو ملتنه 

:: صدك اذا گالوا الخلف ما مات دوم اشوف الوالد بيك 

:: هسه ما گتلي شبيها القضية و شنهو الصعب بيها 

:: هي قضية عادية بس اهل هذا نزار  متدخلين بيهم وهم جايبين توصية من المكتب عليها و جايبين شهود و أدلة.. وتقرير من الطب العدلي.. القضية صايرة اشبه بغرفة ما بيها باب 

:: سهلة نفلشها للحجرة ع روسهم و روس الخلفهم 

:: و يجون اهله يفلشون بيتكم و ترجع انت تفلش و تستمرون ليوم القيامة 

:: جا شني الحل وانت سديتها بوجهي توصية من المكتب و أدلة مدري شنهي 

:: عادي احنه هم نجيب توصية عليها 

:: شوكت يصير هل الحجي اشوفنها صارت طويلة 

:: راح احاول احصل الها استثناء كفالة حتى نمشي بالقضية 

:: شوكت 

:: غفار عمي احجي الك من الاخير الطرف الثاني من القضية فوق القانون تعرف شنو فوق القانون يعني لازم اروح لشخصية هم فوق القانون و بعد أعلى منهم حتى نگدر نلعب وياهم 

:: اعتمد عليك سيدي 

:: اريد شغل غفار فيد و استفيد مو تريد تصير السبع الياكل وما ينكول 

:: اذا ما حصلت حكم البراءة الها كلشي ما تحصل مني حتى العندي اتلفهن شاهد الله 

:: الظاهر أكثر من مجرد أمانة صارت 

عگد جبينه و ارتبك 

:: شنهي اي جدي زين يله الله وياك سيدي عود بعدين نتخابر 

كعدت ع رصيف مهدود حيلي... و عقلي يراجع كلمات الرجال يسطرهن كدام عيوني ،،،أدلة ،،شهود ،،،،توصية ،،،فوق القانون ،،، بالمقابل اني واگفة وحدي 

:: شمالج اشوفنج نخطف لونج 

:: ما سمعته شيگول أدلة و مدري شنو كلما اكول راح تنحل تتعقد أكثر 

فتح بطل العصير يقدمه اللي وگال بهدوء نبرة صوته تختلف احسها من يحجي وياي 

:: انا وياج لو كل الأدلة ضدج و الاريده منج توگفين وياي ما تظلين حجاية و الثانية لاگفة عباتج و ناحرة الشارع 

اخذت العصير اشرب وهو رجع فتح الكيكة و خلاها بيدي.. گتله واني متعصبة عود 

:: لعد ترديني انهان لو اشوف قتل كدامي وابقى گاعدة كأنما دا أشاهد فلم ليش اهتم اصلاً

:: لو انا ما وكفت وياج، ،لو رضيت بـ اذيتج و سكتت ع حجاية الشينة عليج ذيج الساعة الج حگ تطلعين و بـ أيدي اوصلنج لبيتكم 

هزيت راسي اي وحطيت أمل بعد رب العالمين بيه و بهذا الرجال ساكتة و عيوني ع الناس انقهرت لان جنت فرحانة راح اشوف اهلي 

:: اشوفن تگدر خاطرج أكو شي اخر مضوجج احجي 

:: لا بس مشتاقة لأهلي ظنيت راح اروح الهم گلبي يمهم 

:: باجر ان شاء الله تلگينهم يمج 

الفرح مو شعور بس لا شي أعمق يتصل بالروح احسه 

:: صدك عليك الله شلون راح تجيبهم 

:: انتِ ارتاحي انا ارتبها 

شعور الامتنان اله كل يوم يكبر.. شكوكي اتجاه تبدد شوية شوية للحد گمت احسها تتلاشى حتى خوفي تبدل بعد أهلي صرت ما احس بالأمان الا قربه 

عنبر :: اجه عمي كزار دگ الباب حيل بالعوجية وصاح بإسم ترررفة 

گامت  تحجي وياه من ورا الباب عبالك غريب عليها و تعودت ع كلفة وياه حتى حجابها ما تنزعه جدامه 

ترفة :: هاا بوية رايد شي 

كزار :: امشي للبيت كفي الفاتحة وياه علياء ما تكدر لوحدها 

:: اي هسه جاية 

كمزت انا من مجاني و طاحن الكرزات من شليلي المهن بيهن ع سريع و احجي ويا ترفة 

:: من كل عگلج تمشين وياه موش غفار حذرج 

:: جا ما تسمعين شيكول قابل اگله لا و يقنع غير يفوت يطكني وياحذني غصب عني خل امشي بكرامتي احسن وبس تمشي النسوان ارد 

:: جا خل اجي وياج احبن الفواتح تصير بيها سوالف وأسرار تطلع ومنها احميج منهم  عبن انا گوية حتى المرحومة محصلة گتلة من ايدي 

لبسنه عبي نمشي و طرت ع بالي سالفة ضحكت 

:: ولج ترررفة أيدي عافية بس طكيت رحاب ثاني يوم ماتت 

:: اذا عافية وياه ما جستيها ماتت لو ايدج سم شسوي 

:: شنهي قصدج ولج احسنج جاي تذميني أكو مذمة بكلامج بس ما جاي الگفها 

دگدگت ع جتفي بضحك و دنكت ع ساگية طايح بيها برتقال اخذت وحدة تمشي و تگشر بيها 

:: لا ولج جاي امدحنج ما دام ايدج عافية ما تكضين ابوي بعد شمالج مغلولة...سكتت مبوزة شفايفها و عاگدة مابين حواجبها بتأنيب ضمير.. وگالت.... استغفر الله ربي راح اصير عاق من ورا ابوي 

صارت فضيلة جدامي تحوي جت للحلال اشرت براسي عليه لترفة وگات 

:: بعد فضيلة هم طكيتها شوكت تسلمها اموتن منها ما تحب اخوي ما تريد تنطي سجدة 

:: و ع اساس جدي يمشي بكلام النسوان هل انطاه سجدة و صارت اله 

وصلن بيت كزار واگف ع صفحة يحجي وياه علياء و يعض بـ إصبعه حيل و يهز اصابعه الباقية 

كزار :: علياء لا تطلعين حسي جدام الوادم وفوتي لبسي ثوب اسود 

:: كتلك ما عندي كلهن بس خلص محرم انطيتهن لـ لمرت محمد من ماتت عمتها 

:: روحي طلبيلج هدمة سودة من ياهي الجان ولبسي 

:: ما البس شني هي كوه لو جبر واذا تريد تجبرني هسه اعوفن الفاتحة وامشي لأهلي و فوت انت سوي جاي لسنوان 

طلعت وهو يشتم بـ علياء و أهلها و شتم حتى رحاب ما خلى عليها حتى الدفان اللي دفنها شتمه شالت ايدها علياء ورا غمته 

علياء :: بره و عوذة منها حتى فاتحتها ثگيلة اله الساعة القوري من حطيته ع نار ما يرضه يفور 

تگربت ترفة شالت القبق تعاين و دنگت راسها تعاين حدره لنار هزت ايدها بسخرية 

ترفة :: جا غير العين طافية عليمن يفور ع ذنوب المرحومة 

علياء :: يااا يمكن خلصت القنينة موش كلتلجن ثكيلة الله يستر من گرفتها لا تسحل الوادم وراها 

عنبر :: لو مخليني جراح اطلع اشوفنها جا شاورتها بأذنها تسحل جدي جبران و عمي كزار و فضيلة... 

اعد ع اصابعي وتحجي درت بوجهي ع ترفة 

:: بعد ياهو موش زين ذكريني ولج 

:: هم هذول اساس البلة لو بس نخلص منهم موش بس احنه العالم كلها تعيش براحة 

اجه جدي جبران هو و بناته سليمة و مرمر... سليمة ويا ما طبت البيت نشدت ع عمي كزار وين و راحت تحرض بيه مدري عليمن توزه الله يستر منها 

هي جبيرة بس ما تزوجت جانت عرمة كلش و تطگ جناينهم من هيج محد أخذها 

و مرمر هذة حسنة بيت جبران غبينة عنده مثل هيج بنت چن نسمة هوى باردة بوسط تموز حلوة و أخلاق و دين من كلشي حاويتها 

اجت سلمت علينه وياها بناتها ثنين گبل سنة مات رجلها خطية ترملت و ردت دغتني ترفة إصبعها و جان اكض إصبعها و الگطه بعضة 

:: چم صار اگللج لا تدغيني موش صارت غمازة بخاصرتي من وراج 

:: اشش سمعي عرفت شي جديد بعده بالباكيت بس اهلنه يعرفونه 

انتبهت كل حواسي و جوارحي.. صفيت ذهني حتى استلم المعلومة الجديدة و احتفظ بيها لنفسي...  ما اگولن 

لاحد بس سجدة جي حاسبتها أخيتي وما اعرف اضمن عليها شي و براءة هم اكولن خوش تضم السر  و رحمة هم اخابر عليها انطيها علم عبنها صارت منه وبينه فشلة نضم عليها سالفة 

:: شنهي ولج شسمعتي 

:: يكولون 

:: من همه و شيگولون 

:: موش شخص واحد سمعت منا ومنا حجي وبعد ما اطقست عرفت الصح من الجذب 

:: عوفي الجذب حتى لا يتخربط عگلي و سولفيلي الصدك 

:: أبوج.. عمي ابو طالب سمعت جان رايد مرمر و جبران الله يكسر خاطره كون ما انطاها اله و بنفس الاسبوع زوجها غصب لواحد أعمى ما يشوف 

دمعت عيوني احس اكو قهر بگلبي و نشدتها اتأكد 

:: يعني ابوي چان عاشگها ؟

:: شبيج بجيتي شنهي زعلتي ع امج تره عمي ابد ما گصر وياها وچان يحبها و محترم وجودها ابد ما جاب لعشگة  طاري جدامها بيوم 

:: شنهي تعلميني بـ ابوي ما اعرفنه قابل 

:: جا عليمن تبجين الغبرة دومج عكس الناس من يبجون تضحكين ومن يفرحون تبجين 

:: ولج ابجي ع ابوي انقهرت عليه شحال گلبه وهو يشوف العاشگها ياخذها غيره شنهي حس ليلتها ولج ترفة نمرد گلبي عليه 

:: جبران طاغي كلش ما خلى گلب ما كسره اتوقع من يموت ما يحاسبونه گبل يزتونه بالنار 

:: وكلما تذوب شحمته يرجعون يكسونه لحم و يمعونه مرة لخ 

دفعتني وعكرت ملامحها بقرف 

:: كافي لعبتي نفسي تخيلته مشوي و الجلد مكسب عليه 

قطع كلامنه عمي كزار من صاح وين الجااااي 

عنبر :: كون سم فأر هسه واخلي الفاتحة بفاتحتين  

اخذت ترفة الجاي الهم ...و  خطية بنت مرمر كامت تشرب ماي و عثرت برجل وحدة من النسوان جانت امدده كومي سليمة و طكي البت ع ظهرها حيل و كضتها من كصيبتها تهز بيها 

سليمة :: الثولة ما تشوفين جدامج النهار كله تعلفن و عميات لو مجوعيجن جا هسه مشيتن عدل انا الجن منا وغاد خبز وماي بس 

كامت مرمر اخذتها منها و رجعت لمجانها ساكته 

ترفة :: ولج ما تروحين تخطبينها لابوج مبين شابعة ضيم عد ابوها تكسبين بيها اجر و تفرحين عمي 

عنبر :: صدك 

:: والله روحي هي جبيرة و ارملة ما تحتاج موافقة جبران بعد 

وزت بعگلي مثل الوسواس لحد ما اقتنعت اقترف الخطية رحت انطيتها جاي ترفة المخوط و ربعت جدامها 

مرمر :: انتِ بنيت ابو طالب 

عنبر :: اي انا 

طالت النظر عيونها تجول ع ملامح وجهي تدور ملامح جانت تحبهن غورگت عيونها بحزن قديم جان بالقاع و بشوفتي طاف ع السطح

:: تشبيهن امج الله يرحمها بس ماخذة من أبوج العيون 

:: كلهم هيج يكولون الي نفس الحجاية اشبه امي بس ماخذة اعيون ابوي 

عاينت منا ومنا ادور سليمة... من سليمة تكرفها كون شفتها ما موجودة استغليت الوضع ملت بجذعي عليها همست الها بصوت خافت و حتى غطيت حلگي بأيدي اخافن وحدة تقرا شفايفي 

عنبر :: تردين ابوي 

مرمر :: شني 

:: ابوي ما تردينه ؟ والله خوش زلمة حوك سيد و عنده عمامة.. يحترم الحرمة ابد ما يصيح عليها ولا يرفع ايده عليها و يحبني والله ابد ما يخلي جراح يطگني 

ضحكت بوجهي و سكتت أشرت اللي بعيونها بتحذير درت راسي شفت سليمة اجت عاقجة وجهه المخسف سكتت جي سليمة ردا 

رجعت يم ترفة واكفة تصب جاي و تدردم 

ترفة :: هااا شكالت الج 

عنبر :: گتلها تردين ابوي شو سكتت واجيت سليمة اظنها تريده بس خافت تحجي جدام اختها 

:: حكها والله موش اخت سعلوة 

:: عابت وجهة يذكرني بجدر فضيلة المخسف ما تقبل تشمره تكول صوغة من امي بعرسي جابته الي 

فزينه من عمار مد راسه من الشباج 

عمار :: جاي و سوي عدل ابوي يكول فشلتنه جدام الزلم جايها چنه بـ/ول البعير 

جياد بيهم بدون ما اغيره فوگه درت ماي و حفنة بثل و كروطت الهيل بسنوني و حطيته ع نار و ترفة تضحك عاينت ع نسوان مسويات مجامعين مغلقة يسولفن و لا وحدة جاية حزينة ع رحاب 

ترفة :: شوفي ولج بكل فاتحة النسوان تلتم عبالك توهن شافن بعض سوالف و ضحك وهاي اللي تكول جايج بارد و هذيج تكول جايج فاهي مابيه طعم... اول مرة ارضى عليهن 

عنبر :: اي والله حتى سمعتهن يحجن عليها عبن ماكو محاسن تنذكر الها كامن يحجن بعمايلها السودة 

لجحت مرمر باكت روحها بوك و طلعت من ورا البيت عفت ترفة تصيح وراي و طلعت وراها 

تمشي البستان و تتختل كل شوية توكف تعاين وراها بحذر وكفت تعاين ع بيوتنه و مشت صوب بيتنه قلصت عيوني امشي وراها 

فتحت باب الحوش و دخلت اسمع صوتها تنده بـ اسم ابوي سمعت صوت ابوي بالحوش 

گمت اتحكرص شلون اشوف جفيت التنگة وصعدت اعاين الهم واسمع 

مرمر :: شلونك ردت اسلم عليك بس ما شفتك بالفاتحة 

ابو طالب :: الحمد لله انتِ شلونج 

همه يسولفون وانا مبتسمة لوحدي 

عاينت هي ع أركان بيتنه تفرك ايد بالآخرة جن خايفة مرتبكة 

مرمر :: يله اردن انا لا سليمة تفكدني و تسويلي سالفة 

رادت تطلع صاح ابوي ب اسمها 

:: رايدة شي مرمر 

حسيت من صدك جيتها لبيتنه ورا شي وابوي فهم عليها بدون ما تحجي ... وكفت تدور بعيونها بكل مجان ما عدا ابوي ما ترفع ناظرها عليه وهو گال يخفف توترها و ينطيها الأمان 

ابو طالب :: مرمر... خلها ابالج دوم حتى لو القدر فارگنه وصرتي نصيب غيري و حتى لو بينه وبين أبوج دم و ثأر انتِ خارج قوس من هذا كله و شوكت ما تحتاجين شي تلگيني يمج 

مرمر :: تتزوجني 

من الصدمة زلگت رجلي من التنگة و نزغلت كلها بالغطه ملتها ظليت اكمز سكتة من الوجع سمع صوتهم يحجون رجعت صعدت عبن لو اسمع بلا ما اشوفن ما افهم 

ابو طالب ::  جبران جاي يأذيج 

نشدها جي يعرف جدي جبران و شلون يعامل البت والحرمة هزت راسها وگالت 

مرمر :: ما اريد بناتي يربن أبيت ابوي وهم كلما يجون خطابة عليَّه يريد ينطيني و يدز البنات لعمامهن... 

سكتت غاصة بدموعها و ابوي طلع جفية من جيبه مدها الها مسحت دموعها وكملت 

:: اذا نتزوج اگدر احافظ ع بناتي يمك 

گلب ابوي خرزات السبحة بيدها نبح الجلب وراي و يجر بدشداشتي بحلگه هشيته بيدي و رجعت اعاين الهم 

ابو طالب :: تخلص فاتحة حرمة كزار و يصير اللي تردينه 

ابتسمت هي وسط دموعها تضغط ع جفية باديها

:: اجيت وجنت متأكدة مراح تردني وتساعدني ومقابل هذا معروفك عقد زواج خميلة مضموم عد سليمة اجيبنه الك خاطر تسكت حلگ ابوي وحلگ كل واحد يحجي بشرفها و يگول عليها زانية 

صارت هوسة نزلت اركض رجعت.. لگيت ترفة واكفة بالباب تنتظر گبل لا ادخل لجحت غفار رجع و رحمة وياه فد فرحت طلع جبران من الجادر تلاگوه وجه بوجه 

جبران :: لا تظن ناسي الثأر غفار دم ابني أخذه مربع منك 

أشر لرحمة تروح للبيت و صار بظهرها حتى لا يشوفونها حتى وهي تبتعد 

غفار :: شنهي ماكو سلاح ابيتكم جبران لو عندك نقص بالجيلات هل الك سنين بس تحجي بدون فعل واذا تكول انا زلمه و زود ابلع لسانك وخل أفعالك تسولف 

تفشل جدي جبران جدام الزلم اغتاظ كلش كف خاجيته واشر لبناته يمشن و مرمر استغلت انشغاله وياه غفار اجت و وكفت يم سليمة 

راح مشه مسافة و صاح ورا غفار 

غفار :: جبران.... حرگ النخل ما ناسي خلها ابالك بس هل النوبة تختلف راح اخليها ادگ بالعظم 

مشه جبران يسحل برجلة العرجة صارت عيون غفار ع ترفة وين واكفة بالباب زمخ بيها خلى صينية الجاي طاحت من ايجي 

غفار :: انتِ شجابج لهنا انا موش گتلج هل بيت ما توصلينه الا يطلع اخوج 

ترفة :: هـ هو... اقصد ابوي صاحني اساعد علياء والله هو 

أشر الها بيده تطلع لبست عبايتها و ركضت بساع بس فرحانة جي خلصها من تعب الفاتحة و الجايات تگرب عون همس يم اذن غفار وانا مادة راسي بنصهم سمعته گاله 

عون :: سمعت كزار يريد يمشي للمركز باجر و يحط اسم البت العندك شاهد بالقضية 

رجعت ايد غفار و رص ع أسنانه بغضب لاف ايده ع جتاف عمي كزار وگاله 

غفار :: تعال وياي عمي شلون سويت أمس منجل ما يلوگ الا ع رگبتك بالمسطرة والقلم ضابط القياسات عليك 

رجلين عمي كزار گامن يتراجفن يريد يجر نفسه منه و غفار موش كاضه بس لا خانگة ويمشي بيه وصل الورشة دخلوا و غفل الباب ورا 

بقيت واكفة اعاين لزوم اشوفن دقايق و طلع عمي كزار يمشي و يتلفت مرعوب وأثر جرح ع ركبته طالع منه دم شوية 

براءة :: گاعدة اقرا قرآن حتى تهدأ روحي و انسى شوفة رحاب و سجدة جدامي گاعدة بيدها مگص تعدل شعرها رغم چي بالمستشفى حالقين الجهة اللي بيها جروح بس ... وهي گصته ساوت الأطراف صار كله ولادي 

اجت امي ذبت عبايتها و غسلت وجهه و طبت حجرتها گامت سجدة وراها صدقت وكمت 

لا يتعاركن..و سجدة تعبانة وامي ماتعرف تعب لا تروح اطگها وتاذيها وكفت سجدة مگابل وياه امي بين العتب و الوم تحجي وياها 

سجدة :: شفتي يمه شلون الدنيا دين... بالضبط مثل المرايا ترجعلج ملامح أفعالج بلا زيادة ولا نقصان 

امي ساكتة و تعزل بملابسها  تگربت عليها سجدة أكثر 

:: تردين اتطلك من جراح واخذ مصطفى مو 

انتبهت امي كل ظنها سجدة رضخت الها 

فضيلة ;: هو هذا الصح بس انتِ تعاندين و ماشية بالغلط 

:: تدرين ذاك الخوف.. الرعب... شوغة روحي وانا ادور عليج حتى اكلج يمه مصطفى اذاني وانت صميتي حلكي بيدج لا ابوي يسمعني 

تدرين لو أخذت مصطفى كل هذا راح اعيشه نوبة لخ بس وياه بنتي 

:: وليش تعيشنه وياه بنتج اسم الله 

:: عبن انا ما مسامحة بحگي والي حوبة و دين يمه و لزوم الله يوجع روحه حتى جان رد الدين هذا بقطعة مني 

:: ابقي سولفي بحجي المثقفين لحد يعرفون السالفة و يگتلونج 

:: ما اموتن الا يسيل دم مصطفى ع جف أيدي 

عافتها و طلعت كاتمة وجعها وامي صفنت وراها عبن سجدة لو گالت فعلت 

طلعت ادور سجدة وين صارت رحمة جدامي من كل گلبي فرحت برجعتها يمنه 

رحمة :: اي وأخيرا رد عگلج لراسج و رديتي 

ابتسمت بخجل اخذت جنطتها اساعدها ترجع هدومها للكنتور 

براءة :: خلصت ايام فاتحة رحاب مالها ذكر طيب ياهو يذكرها يدعي الله ما يرحمها و يضيق الگبر عليها 

أمس تعاركوا عون و غفار و من الصبح غفار يتكرضم ما يعرف يبقى هالگد مغتاظ منه  بس محد يتنازل و يجي للآخر 

غفار بيده المسحاة فتح الوح ع گاع بعد ما طش البذور 

و عون ليغاد منه يعاين اله و يغسل بالسيارة مالته و رجع غسلها مرة ثانية هم و اشمن ريحة ديتول گامت تكفخ وياه الهوى 

موش بعيدة عليه يحب النظافة كلش النوب مدد حدرها فك التاير اجه فك تاير سيارة غفار و خذاه شده لسيارته كل هذا حتى غفار يغتاظ و يحجي وياه حتى لو عركة المهم يحجون سوه 

النوب وكف جدامه يدخن و جراح حاط كرسي و كاعد بالباب يعاين الهم و يضحك 

و عون يقرا بصوت عالي حتى صوته يوصل مسامع غفار 

_ اخو مثلك بعد يحصل اجيب منين 

_ اذا انت زعلت مني اروحن وين 

_ يخي هونك يخي هونك

_ العمر ما يسوه من دونك 

....... يضي عيناي ...... 

غفار ملامحه لانت يتهمه يريد يروح اله و يرجع يصلب ملامحه عليه محد يعرف ع شني متعاركين .. جراح صاح عليه 

جراح :: ولك لو انا يقرلي هيج وعلي لونه يرفس ابطني هم اعذرنه 

غفار :: جراااااح مو اجيك 

ضحك جراح مستمع و گال يحرض عون عليه عود 

جراح :: بذات هذا صاحبك ناكر الملحة و الزاد 

عون :: وكلته من لحم ذراعي من جاع وما غزر بيه شنطي بعد حتى يغزر اشلع گلبي من هروشة و انطهياه 

جراح :: مو جنك حميت خوية تره هو كضه عمره يعلف بيك موش انت 

عون :: تخسى تعيرني جي ماعندي ام تطبخلي هسه ادورها و اجيبنها تطبخلي والله لا يعوزني الكم 

كمل جكارة طلع الثانية شعلها يدخن گام يكح بصوت عالي مخنوك غفار عيونه نطت من الغضب مشه اله يدج الكاع بخطواته حتى جراح راح اله بقلق واضح 

جر الجكارة من ايده و سحكها بالكاع زمخ عليه 

غفار :: موش گالك دكتور لا تدخن بعد زمال انت عگل ماكو براسك 

و جراح يدكك ع ظهره عود يخفف الخنكة و يهفيله بيده و يصيح  من خوفه عليه 

جراح :: ربو... و تك كلى شيسوي بيك الله بعد و تعوف الجكاير 

عون : احسنك جاي تشمت بيه 

جر غفار جراح عنه وگال بعصبية 

غفار :: عوفه هو انا صوجي انطيته كليتي لو ذابها لجلاب احسن 

عون :: وانت الاخر الك سنة تعير بيّ شو انطوني سجينة ارد اطلعها لهل كلى الكشرة و انطيها اله 

تعاركوا واحد كاض الثاني من ياخة قميصة و جراح حاجوز بينهم النوب جراح صار وياه غفار و نداروا ثنينهم عليه 

جراح :: وحك هو علي اذا شفتك مرة الخ موش تدخن لو هيج بس كاضها بيدك اطفيها بلسانك وانعل شيب الخلفك 

دفعه عون ضايج خلگة وبعد نا خفت الكحة و تنفسه رد طبيعي 

عون :: لا تسب جراح لا تشوفني ساكت تره محترمك لخاطر عمي ابو طالب

رفع جراح حاجبة ربع اديه ع صدره 

جراح :: عوف عمك ع صفحة بله راويني شسوي 

تحمحم عون يعاين اله بطرف عينه جراح أكبر منه و عون تربية جدي ابد ما يتجاوز ع أكبر منه وخاصة عمي ابو طالب و جراح كلش يحترمهم ،،،تنهد وكاله 

عون :: اسلمنك بيد الله 

ضحك جراح و طكة ع ظهره حيل 

جراح ::ولك الجكاير بلاش روحك هم بلاش لو ما ذاك اليوم وصلت النجف 

عفتهم يسولفون و مشيت لحديقتي گاع مربعة خمسين متر معزولة عن باقي الزرع ورا البيت زارعة بيها كل أنواع الورد و نبتات اموتن عليهن وين ما اشوفن بنات جديد

اخذ غصن و ازرعه خبطت تراب و فتحت الشتلة اللي انطاها اللي عمي ابو طالب زرعتها و زگيتها كعدت جدامهن راحتي هنانة 

طلعت نقالي اصورهن وحدة وحدة عبالك بناتي كملت رجعت لبيتنا 

صارت عيني ع غفار يگلي طماطة لعون جي يحبها حتى نص الليل يجي لبيتنه علمودها كاعدين جدام النار و سمعت كلامهم 

عون :: وهسه شراح تسوي تخطبها من ابوها 

غفار :: موش هسه بعد نخلص من هاي السالفة اول 

::  جا ما تحجي لقسيم هلبت الله يساعدك 

:: خل يولي هذا مايعرف يتفاهم يروح يورط البت النوب 

::واذا عرف شلون تره موش بعيد ياخذها يسلمها بيده 

جان كل ظني يسلمها لبيت عمها لان رايدها الهم.. وغفار ضاج تگدر خلكه وگال 

::  حتى اطيح حظة غير واذا صدك صارت اخذناها و امشي لبيت عمي فاضل 

:: لهل درجة مستعد تهجر اهلك و السلف لأجلها 

ابتسامة هادئة نرسمت ع وجه و لمعت عيونه وانا تبسمت ع فرحته ادعي الله يدوم الفرح لگلبه صفن جن يتأمل صورتها گباله و كال بنبرة عاشك وحاير بگلبه 

:: غير امس توجهت  اريدن اصلي و صارت گدامي عين لقبلة الله وعين عليها 

ضحك عون و دك ع ظهره ينشده 

::  ما كتلي شلون عشكت وانت تستحرم تشيل عينك ع ظل حرمة 

:: جا هو بكيفي الله راد و گلبي طاع 

:: وانت شلون تحب اطيع ربك 

اغتاظ منه غفار دمغه ع راسي و رجع مسح ع شعره جي طكته صارت قوية وگاله 

:: ماعرف شلون صرت دكتور بخمس صخول ما اسرحنك 

گالها و سكت اخذ باكيت الجكاير من عون يدخن و ينفخ بعيد تعكرت ملامحه عبالك اكو هم ع گلبه و عون لاحظ هل شي عليه نشده 

:: شبيك اشوفنك تكدرت 

من كح عون هو طفى الجكارة بالتراب بساع 

غفار :: خايف لا تنحل قضيتها وترد بيتهم وانا  أحسنها صارت مالتي 

:: ولك ما صار الها شهر شوكت لحگت تبني الها هل مكانة بداخلك 

مدد غفار ع عشب يعاين لسمه و خلى ايده ع عيونه و يحجي 

غفار :: ولك يا شهر احسن اعرفها من زمان يمكن ملتقين بعالم الذر 

الله كلامه شكد حلو... عفتهم و رجعت للبيت گبل لا أسد الباب و اشوفن قسيم اجه شايل بنته و وجه ابتسامة چن توها أشرقت شمسه 

ذبيت السندانة الفارغة من ايدي و بخطوات مستعجلة و لهفة رحت اله 

اخذتها منه احبن بيها وهي بأديها الصغار شبگت رگبتي و حبت خدي 

نرجس :: نونج عمة بلائة 

براءة :: يمة تروحلج عمتج سبع فدوات 

حضنتها لصدري اشبع عيوني و روحي منها وهي تضحك صوت ضحكاتها تگول سمفونية عجزوا أشهر المس من عزفها 

و قسيم وياه ضحكة منها يبتسم ثغرة 

براءة :: شنهي رجعوها الك لو تشوفها و تردها الهم 

هز راسه لا وانا انمحت ضحكتي 

قسيم :: شفتها بالشارع و جبتها.... خطفها 

:: تشاقة اكيد 

:: لا و ربج خطفتها و بعد ما ارجعها و فنه واحد منهم يصل لهنا الا اخلي دمه بطوله 

:: تسودنت هسه يشتكون عليك و تروح سجن 

أخذها مني و دخل للبيت يسولف وياها شني يشتري الها و بين جملة و الآخرة يگول 

قسيم :; ما اخليهم ياخذونج بعد بوية والله اموتن وما انطيج الهم 

وهي ردها ضحكة و شبگة لرگبته و تحرك رجليها بحماس من يحجي وياها 

ركضت لغفار وين كاعد هو وعون يم الساگية 

براءة ;: غفار الحك قسيم خطف نرجس و يگول بس يوصل وأحد من خوالها البستان افيضه بدمه 

كاموا ثنينهم اجو وياي للبيت وغفار يحجي بعصبية 

غفار :: تريدلك واحد بهل البستان الاكشر عنده عگل براسه ماكو شايلين ادمغتهم وحاط جوم حجار 

عون :: اكيد انا استثناء ما تشوفني صرت دكتور 

ندار عليه عاين اله من فوك ليجوه 

غفار :: خيعونه من صرت دكتور وبعدك تمشي ويانه ع نفس الكاع 

عون جان مبتسم من لمح لهجة الاستهزاء ووفهم معنى الكلام غندب و مشه ورا يصيح 

عون :: شنهي قصدك غفار عود انا شايف نفسي تره انا دكتور مو حي الله وظيفة 

هز ايده غفار و طب للبيت گبل لا يحجي اجاه  قسيم خلى بنته بين اديه 

قسيم :: سلمي ع عمج بوية و حبي راسه 

تلاشى شكو غضب بوجه غفار و قسيم عرف شلون يمتص عصبيته شبگته نرجس و حبته و بعد ما ترضه ترجع لابوها 

نرجس : اليد غفال 

قسيم :: لا بوية موش هيج اسمه غفارررر گولي رررر 

نرجس :: للللل

ضحكوا عليها عاينت هي لعون شمرت روحها عليه تعرفهم كلهم و يحبونها كلش خاصة عون و قسيم جراها منه 

قسيم :: تعاي بوية هذا لا تتكربين الا ابد خوش 

والبت جلبت بيه كضته منا ومنا و حبته من لحيته 

نرجس ::  هبيبي احبنك 

عون :: بوية الاحبنك من حلكج ترد الروح 

قسيم شال روحه ودكها بالكاع هو و عون مناكر و عركات 

قسيم :: شني حبيبج و كدامي تگولينها طرطور انا 

راد ياخذها عون دفع ايده عنها 

عون :: اشش لا تلوث عگل البت بهاي أفكارك العفنة 

راد يعترض غفار أشر الا يبتعد 

غفار :: لا تعلم الطفلة ع الحقد قسيم ولا تحجي بهل السوالف جدامها بعد 

هز راسه اي مقتنع نص ونص طلع الها نقاله حتى تجي اخذت النقال منه وكعدت بحضن عون... ضحك عليهم غفار وگاله يستفسر منه 

غفار :: و شنهي سالفة الخطف تريد تخسر القضية انت 

قسيم :: غفار انت بعدك ما صاير اب ما تعرف شنهي بنتي موش بحضني وماعرف شلون يعاملونها ولا أكدر أأمن عليها يمهم اصلا ناس سفلة سووا الها شي شكولن انا ساعتها 

غفار :: و جبتها و بعدين شراح تسوي  تره أول واحد تجي بتفكيرهم انت حتى لو موش انت ماخذها يحطونك بالسالفة حتى يكضون عليك زلة 

أشر لـ غفار ثواني راح خلاها يم سجدة و البنات و رجع گعد ع ثاني باية بالدرج اديه ع راسه 

قسيم :: و شسوي هسه ما اريد انطيها الهم غفار تفهمني 

:: و جي افهمنك هسه تعوف البت هنا و تروح الهم 

رفع راسه اله بساع وبلا ما يفتهم منه رفض 

:: و شسوي اروح الهم 

::خل اكمل كلامي قسيم لا تظل تطفر بالحجي 

:: يله احجي بله خل اشوف وين تريد توصل بس تكلي رجعها الهم 

عصب غفار منه أشر اله بيده بغضب 

:: ها هي خلها عندك وانا مراح ادخل بعد   بس اذا خذوها منك للأبد لا تجيني 

راد يمشي ركض قسيم كضه من ايده يوكفه 

قسيم :: اوكفي شبيك فهمني خل افهم 

غفار :: تروح الهم هيج ع رسلك.. الله بالخير جاي اشوفن بنتي وينها 

:: شنهي وينها موش هاي يمي 

:: قسيم ركزي وياي لا بطابوكة عدلة و افتحه لداماغك هسه 

:: غفار انا بكلشي مفتح الگفها وهي طايرة الحركة  الورا ظهري اشوفنها بس من توصل لبنتي عگلي يوكف بس گلبي يشتغل يعني اكعد و فهمني

:: تولي الهم يابه جاي اشوفن بنتي وينها واكيد من الهوسة تعرف البت مختفية تصير عصبي عليهم و بوجهك للمركز تسجل دعوة اختفاء البت وهي بعهدتهم وهيج تسجل نقطة بصالحك 

:: يعني قصدك اتغدى بيهم گبل لا يتعشون بيه 

:: يراد الها واهيلة من طبت عگلك 

عون صافن بس يدور وجه بينهم نشده غفار 

غفار :: شمالك صافن انت الاخر 

عون :: لا بس جاي اشوفن الشيطان كاضله ورق وقلم يسجل يتعلم منك 

خزره غفار سكت يضحك وقسيم طفت فرحته ينشد غفار 

قسيم :: هسه گول رحت الهم و سويت الگلت عليه وبنتي  ؟

:: انت روح سوي الگتتلك عليه والباقي عوفه عليه 

:: راح ترجعها الهم مو 

كلامه طلع بخنگة كضه غفار من جتافة و مقرب وجه منه يحجي وياه جن متأكد و واثق من كلامه 

:: اقل الشهر و تصير يمك واذا عدى الشهر وهي موش بحضنك هذا الشارب ازينه 

هز قسيم راسه اي رغم وظيفته و الكل تحسب اله حساب و رغم كلشي بس من توصل بنته ينكسر دكدك غفار ع جتفه بدعم 

غفار :: كوم يله و هذا المحامي تنطي اتعابه و تفك الوكالة وياه.. جم يوم تصير سجدة زينة و تروح تسوي الها وكالة هي تكض القضية منا ووغاد 

بقى قسيم بحدود الساعة مگابل بنته و عيونه ابد ما تحيد نظرها عنه عبالك لو حاول يمغض تختفي من جدامه... و بعدها طلع ينفذ كلام غفار.. نزلت دموعي بقهر عليه 

براءة :: والله خطية تلوع گلبه 

غفار :: هانت ما ظل شي و ترد اله 

اخذ غفار نرجس و طلع فهمت منه راح يردها الهم بدون ما يعرفون قسيم هو الماحذها 

گمت اريد اسوي الغده انتبهت ترفة مالها حس... دورت كل حجرة بالبيت مالها أثر 

اخذت عباتي و طلعت لبيت عمي كزار اشوفنها اخافن ردت لبيتهم لو عمي خذها طبيت بيتهم بس علياء و ازل 

البت اختفت مالها أثر بكل مجان  ..... 

الفصل الخامس عشر من هنا