رواية دخيله الشيخ زين العابدين الفصل السادس عشر بقلم أوتار حزينه
مالك
ظلام صار بعيوني وكمت مااشوف الكل
تراكض عليه غسلو وجهي ومااعرف شصار بيه
نفسي كامت تلعب وراسي ثكل كلش
اخذوني للمغسله هناك ذبيت من راسي
الما كلت بس غسلو اليه وجهي وايدي رجلي
بادن وكعت محمود صاح
ووولكم شيلوو
الدنيا افترت بيه ومااعرف منو شالني
وطببني جوه تمددت عيوني نفس الحال حجيت
گوة
مااجاي اشوف ولكم عميت
اسمع امي تعيط واختي نوار الدنيا انكلبت يمي
رداو مني بس اروح للمستشفى ماقبلت
روحي رايحه واي حيل ماظل
بيه غسلو الي مرة اللخ شربت مي وشويه
عصير كلشي يطب بحلكي مر وعلگم
عيوني فتحت بلحظه مثل ماعمت بلحظه
امي يمي تبجي وحالها حال واختي يمي ملخ
روحها واخوتي وابويه رددت
بوجع ترس روحي وعقلي
راحت لميس ولكم راحت مرتي وانهجم
بيتي
اتذكر شكلت الها وشلون
قهرتها قبل لاتموت
كعدت الوم بروحي وابجي مثل
النسوان حسيت بالندم بس بعد فوان الاوان
راحت وخلتني شايل ذنبها طول عمري
عاقبتني شلون عقاب حتى
مابرتني الذمه وخلت ذنبها برگبتي
ليوم الدين
🌿🌿🌿🌿
زين العابدين
كعدت اون اوصحيت جسمي مكسر والم قوي بجتفي كعد زين
سمعت صوت اختي الهنوف دحكت لها هي وامي الي اجتي وحظتني بهداوه تبجي
وتردد الحمدلله على سلامتك يبعد امك
ريكي يابس واحس بطعم غريب به اختي
حدرت حبتني من راسي تكلمت
بدموع
شسويت بينا هبطت گلوبنا ياخويه
هاا كعد زين به شي
سمعت صوت ابويه سرى ليمي بسرعه
دحكت له تعبان ووجهو اصفر شلت همو ماشلت
همي حجيت گوة
ماابي شي ياشيخ
صفن علي بعيون مغورك حدر عليه حظني
حبني من عيوني وخر وتكلم
بصوت مخنوك
هديت حيلي ياولدي
سحبت روحي هو سندني جاوبتو
وانا لازم صدري
ياشيخ انطيك من حيلي اذا جاس التعب حيلك
رجع حبني من راسي رد
اريدك سالم يبعد ابوك
الباب اندك حمد دش تكلم
صعب يريد يشوفك
الهنوف غطت وجهها هي وامي راحن كعدن
بعيد عن السرير
تفضل ياصعب
دش عليه وجهو مطعون هو وحمد اجوي عليه
تحمدو بالسلامه ووكفو يم راسي حمد
تكلم مع ابويه
يااعم اريدك بسالفه
ابويه دحك له هز راسو واخذو بره وطلعو
🌿🌿🌿🌿
صعب
طلعت مع حمد والشيخ راحو مسافه عن غرفه زين سريت بعيد عنهم وطلعت بره قصص وروايات عراقية كرار صلاح
ادحك للحرس يفترون يمنا وداخلين انذار
من ورة الصار سيارات تبع الشيخ
طبكن بكراج المستشفى
نزل عبد العزيز نسيب الشيخ وزلمه
الهنوف اختو الجبيره شافني
سلم
رديت السلام نزلن نسوان اثنين
عرفتهن خوات زين نزلت راسي وولد گرايبهن
تلگوهن
يااهاجر اسرعي
صاحن بنت وراهن رفعت راسي عيوني صارت
بعيون بنت ادحك عليه صفنت بعيونها وسيعه كلش وصفر متلثمه هي والوياها سرن من يمي
نزلت راسي بعدين رفعتو
دحكت لها
تمشي وراهن وكايده بنت صغيره كلت
وي روحي
هاي اخت زين الصغيرة
حمد عگب سلم عليهن وحدر جاي عليه
كتلو
ها خبرتو بالصار بمالك
اي خبرتو وكال روحو انتو اليوم وباجر
بس اطمن على زين اخذ عمامي وولدهم واروح
اعزيهم
يعني هساع نسري
اي خلي نسري ونكف وي مالك بهل الشده
يله عجل خلي نتوكل
🌿🌿🌿🌿🌿
هيله
انثر حب للدجاج وبالي يم الصار
وشلون انصاب زين ووكع عليه لحد هساع
كلمتو ترن باذني
ابريني الذمه ياهيله
عرفنا من عگب ابويه ساعه عشره الصبح
زين بخير كعد يتريك واسمعو يحجي
صوابو جان جتال لجن الله لطف به هو وابوه
يابه شفتو للزين طيب تكلم معك
ساريه سالتو بخوف
ابتسم بوجهها جاوب
اي تطمني طيب وتكلم معي
الفرح ترس ملامحها دحكت لريهام الي
كالت لها بفرح
كتلج زين گوي وماايموت
اسم الله علي ماايلفاه شر لابن الشيخ شعلان
اللهم امين
ابويه جاوب امي سكت سالتو
وش عملت امو هي وخواتو واهلو
گلبو المستشفى يازهيرة تحزمو بالسلاح وهم
يصيحون الثار الثار
امي دحكت ليه اشرت لريمه تاخذ خواتي بره
كامت اخذتهن بره تكلمت مع ابويه
يابو ساريه احاجيك بسالفه
كولي اسمعج
مدري لجن غانم وعبد الله سامعين
الجيله طلعت من يم تل الگصب الي بگاعنا
صفن على امي وعليه هزيت راسي باي
وكملت
اي يابه هم هيج كالو
هاي السالفه مااريدها تطلع لاحد
حجه بغضب امي ردت
تانحجي معك بس
اعرف ياام هيله لجن اريد انبهجن وهم راح
انبهم الشغله جبيرة
وراح تكع اوادم من وراها اذا تكلمو ووصل
الكلام لشيخ شعلان
ياابه لازم يعرف عم شعلان تايخذ حذرو من
غدر الشيخ صگبان
خزرني تكلم بغضب
ياااهيله انتي شفتي بعيونج هو الي
رمى زين
لااا يابه
عجل عش تحجين هالكلام
سكتت هو كمل
اذا صار بها حلفان بالقران تحلفين انتي
والسمعو الجيله
انا ماسمعت ولا شفت هم الي سمعو
اي وراح يخلوهم يحلفون كلام
اذا تكلمو يجوز مو هو
يجوز واحد حاقد على زين وانتو
تعرفون اعدائو جثيرين
يعني مو بس
الشيخ صگبان الي يكرهو
هوو هددو ياحميد
امي حجت ابويه دحك عليه بعتب نزلت راسي
جاوبها
يااام هيله الشيخ صگبان دومو يهدد بهم لجن
ماسوه شي اكلج تطلع من زين ماتطلع
منو اعرفو جبان وبس كلام
لجن زين مايهاب احد يسويها وهو واكف
جدامو وصدروا الو
تكلمت
يابه الجبان يغدر لجن الشجاع مايغدر
سكت وكرر
اعيد واكول مااريد احد يحجي بهل السالفه
اسكتو وخلو الشيخ شعلان هو يعرف من نفسو
من صوب ولدو
سكتنا وبعد محد حجه هوجاس صار براسي
عكب السمعتو من عبد الله وغانم
وكلت الا اروح لتل الگصب
العصر
حدرت له وسريت حوالي ادور فشكه لمحت
اثنين بالگاع حدرت گضبتهن عكدت حواجبي من شفتهن جديدات مو قديمات
اشتميتهن ريحه البارود بهن دحكت من مچاني
المچان الي انضرب به زين لاح
ذاك جدام نظري
ياهيله
درت روحي بسرعه جان ابن هم عزام الصغير
بكد ريهام اسمو سعود
هاا ياسعود وش تريد
اجه عليه الخوف تارس ملامحو تكلم
بهمس
احاجيج بشي بس مااريد احد يعرف به
ولادكولين لابويه يذبحني والله اذا عرف
انا حجيتلج شي
كول مااحجي
تردد وبعدين تكلم
ياهيله انا شفت سياره واكفه هناك
اشر على اشجار مسافه عن تل الگصب وكمل
من تصوب الشيخ زين العابدين انا جنت اطرد وره الدجاج لمحت واحد يسري بسرعه لها
وشايل باروده
من مااعرفتوو من
لااااا والله ماشفتو ولا عرفتو لجن اظن هو الي
ضربو للشيخ
منين حدر من هينه
لااا ماشفت حدر من نفس مچانج لجن شفتو
يسري على درب التل
اشر صفنت علي تكلمت معو
المن يشبه بجسمو
صفن عليه بظل يفكر بعدين كال
هو بطول شهم لجن اترس منو هاا ويكزل
برجلي هيج خفيف
سكتت وظليت افكر منو من ازلم صگبان هيج
ماتذكرت تكلمت
ياسعود لاتحجي الشفتو لاي احد لاجيب البله
لابوك احنا مااعرفنا من الضربو ولا
نكدر نحجي بدون دليل
افتهمت
هز راسو باي وجاوبني
ياهيله الكل يكولون شيخ صكبان غدرو حتى
يحرك گلب ابوه علي
خزرتو خنس رديت
مااخصك بهل السوالف وعگب لبيتكم
زين ياهيله بس امانه الله ورسولو لادكولين
لابويه اني تكلمت معج بهل السالفه
عبد الله كال له سمع الصوت
من هينه ورزلو وهددو
مايحجي شي
مااتكلم تطمن
سرى من يمي وخلاني متاكده الغدر اجه من صگبان الغدار لجن ماكو دليل
حتى الواحد يگضبوه به
🌿🌿🌿🌿🌿
ليان
فتحت عيوني ونيت بصوت تعبان
كعدت ماما كعدت ليان
سمعت صوت اخويه وماما اجتي
عليه صفنت بوجهها ملخته وحالها حال دموعي نزلت ماحجيت شي نزلت راسها
خلته يم ايدي واسمعها تشهك
بالبجي
اخي الله يخليك اخذ الوالده واطلع هسه يصير
بيها شي وتصير من مسؤوليتي
صفنت على السگف بجمود اسمع اخويه
يحجي وياي هو وماما ومااجاوب
التزمت الصمت وعي موجود بس كله يم ايهم
ولارا والسمعته منهم
الانسان الي حبيته وسلمت گلبي اله
خاني ووي منو وي اختي
نام وياها واخذها وعرسنا بعد كم يوم
لو احد حاجي اليه الصار بي ،،،،،، جان مااصدگت
كلت مستحيل ،،،،،اخت تسوي باختها هيج
مستحيل انسان مثل ايهم يسوي السواه
شفته شسوه اليه وشجان يحجي
وعدني بحياة اني
جنت احلم بيها وويا هوو ردتها ويا هو
لان حبيته من كل گلبي وردت
ااكمل حياتي ويا بالحلوه
والمرة
والمر ضگته وجان سم وخلاني اموت ببطئ
اخويه يردد
لاتبجين وتحرگيني كولي ليان شاسوي
ردت اقتلها واقتله رد اخذ ثارج منهم واغسل عااري ماخلوني ليان مااخلوني
خله راسه يمي يبجي ماما تردد
انكسر ظهرنا وانفضحنا
الممرضه بصعوبه طلعتهم من يمي ظليت
وحدي هي رجعت يمي حجت وياي
ليان اي شي تحسين بي كولي اليه
غمضت عيوني وظلت بس الدموع تحجي
الصار بيه، ،،، مدده بسرير
واكثر من جهاز مشدود
بجسمي
كلشي يوجعني بس مااكدر احجي
صرت مثل واحد اخرس انفجرت علي
قنبله وجسمه انترس شضايا يوجعه كله ومايكدر
يصرخ بس يلوب من الوجع وويون
من جروحه الترست جسمه
وروحه
ايهم ولارا بجوني دم مو دموع الغدر
اجاني من اقرب الناس اليه من اختي
بنت امي وابويه من انسان حبيته من كل گلبي
شهكت بالبجي فزة صارت بجسمي
وعقلي ماجاي يستوعب السمعته هزيته
واني اردد بجنون
لييش اايهم ليش،،،لاراااا
ليش ذبحتوني ولج موو انتي ااختي
شلون انطاج گلبج تاخذين مني رجلي شلوون
ياربي صار هي وليييش
صرخت گلبي وجعني لزمته وكمت اون
الممرضه تصرفت بسرعه ضربت ابره بالكانوله
وره لحظه هدأت وعيوني غفت
ظليت عايشه على المهدئات اكعد اتذكر
الصار ابجي وادعي عليهم افقد ويضربوني ابر مهدأ
عرفت بعدين من الصدمه ضربتني ذبحه
ووصلت للموت لازم ماانقهر ولا اصير عصبيه
واعيش بجو هادئ
وكل هذا ماكو انهيار بداخلي خلتني اعرف اني
ماراح ارجع مثل الاول صحتي راحت
واني نفسي متت وصرت انسانه
ثانيه مو ليان الي اني نفسي اعرفها
ضعت من ضيعوني الجنت
احبهم
🌿🌿🌿🌿🌿
زين العابدين
عرفت من الولد مره مالك توفت بالولاده
انقهرت علي كلش،،،، خابرته كوه يحجي
اخذت من خاطره وتعذرت منههو عرف الصار بيه
وكال ماعليك عتب لاتجي الاهل كفو ووفو
ابويه اخذ امي ثاني يوم وويا عمامه وولدهم وخوالي طلعو علي اخذو من خاطرة وعگبو
ظليت ايام اتصل بي مرة يجاوب مرة لاا
كلت صوابو قوي ويحتاج وگت حتى
يطيب من هالمصيبه الحدرت علي فجاه
وخلت بنته يتيمه الام
متمدد بالصاله وادحك للاخبار عالكه وماتبشر
بخير ناس طلعت تطالب بحگها من ورة الوضع الردي وعلكت بينهم وبين الحكومه
هاك يمه
اخذت منها ماعون الفواكه وسالت
يمه وين ابويه لحد هساع بالمضيف
اي يمه لفو يمه الشيوخ
من ورة الكاعد يصير بهل البلد والله يازين
الجاي مايبشر بخير
اكلت شلف برتقال جدتي تكلمت
اسمع يبن فضه
ابتسمت من امي گلبت خلقتها جاوبت
ها ياجدة
اكعد هينه ولاتسري لا لبغداد ولا لاربيل جوز
عاد من النسوان واركد لايصير بك
شي
هاا اركد الما تفض موو
ااسكت ولك ولاتخليني اكوم اكسرك بعصاتي
هاااي
هههه
سكتت ولزمت الجرح امي انهدت
بسج منو وعوفي بحالو وين يروح والدنيا
مگلوبه ومانعرف شراح يصير
ااسكتي انتي ماضيعو غيرج
ياعمه خلينا كاعدين ومستجنين لاتخربين علينا
الكاعده بهل المغثه
انغثيتي ياافضه
كتمت ضحكه من جدتي ابتسمت امي ردت
اي انغثيت ياعمه
وهو هذا الي اريدو
ههههههه
ضحكت وتقدمت ليجدام امي تكلمت معي بعتب
تضحك يبن بطني وانا واكفتلك وافزع لك
عش تفزعين لو ابنج عندو لسان ويكدر يردني
ماارد ياجده انا مو كدج
ااي انا مااكدي الا خلقني انا شيخه مزنه شيخه النسوان شيخه بنت شيوخ ابا عن جد قصص وروايات عراقية كرار صلاح نغزت امي الي ردت بضوجه شتقصدين ياعمه جدتي دحكت لي ابتسمت وانا هم ردت
يازين
ها ياجده
الي بعبو صخله وش تكول
مع مع
هاجر خربت ضحك امي خزرتني كتمت الضحكه
لجن جسمي اختض رجعت ليوره سندت
ظهري على المخده وكتمت الضحكه
هيجي الحجي يازين
امي تكلمت بزعل
امزح معج يايمه شبلاج صايره مااتتحملين
مزح
صااف وي جدتك عليه يبن بطني
دحكت لجدتي مبتسمه وسانده حنجها
على العصا رديت
جدتي بعد وام ابويه شلون مااصف معها
واانا ولك موو امك ماربيت وتعبت بك
انهدت بيه ماجاوبت ظليت ساكت ومبتسم
جدتي نغزتها
من حجيت انا كلتي بسج عاد وعوفي الولد
وخلي راكد وهاي انتي صارلج ساعه
تتنحارين معه
ابويه دش امي كامت بوجهو
سلم
الله يساعدهم
هلا يابو زين
اخذت عبايتو منو كعد يم جدتي ادحك له
وجهو متگدر سالتو
خير شيخ وش نوحك صاير شي
شصير بعد اكثر من الصار بلد مكتوب علي مايركد يوميا سالفه يوميا بله لافي به وشاعل
اهلو
الكل سكت هو كمل
لاحد يطلع برة الديرة اكعدو واستجنو هينه
الوضع مايبشر بخير ولازم الواحد يتحزم
زين لليوم الاسود
عكدت حواجبي وسالتو
عرفت شي يابه
ماايحتاج اعرف يبعد ابوك ذيج مبينه
مثل عين الشمس هم راح تلفي حرب علينا
مادام الشراره اشتعلت
الشيوخ وش كالو
جدتي سالتو جاوبها
المجلس انعقد واتفقنا الكل تتحزم وتتحضر
للجاي بسلاحها وولدها
اطيب يابه واوكف وياك
جابتو امي انهدت بيه
ااكعد واسكت انا مو جايزة منك عش انت تروح
اكو غيرك خلهم هم يروحون
يمه جبان اانا حتى اكعد يم النسوان
ااسمعو ياشيخ وش يتكلم
ابويه دحك بخزره لها وجاوبها
ولدج غالي يافضه لجن ولد الاوادم مو غاليين
على اهلهم
يااشيخ هذا وحيدي وشفت روحك شصار
بك من تصوب وشصار بيه
اي شفت شصار بينا لجن هساع الوضع يرادلو
زلم تكف وياي وانا اريد اشد ظهري
بولدي
وانا حزام ظهرك ياشيخ
جاوبتو امي حجت بخوف
على بختك يابو زين هدو لاتخلي هالسالفه
براسو
بسج عااد
جدتي صاحت بها وكملت بغضب
شبلااج انتي جازعه ومجزعه الاوادم وياج
خل الولد يسري وي ابوه ويكف معو
وخليها ترجيه بأذنج لو يريد
يلف علي الموت واسم
الله جعل من عمري على عمرو يجي
وهو بحظنج
ااسم الله على ابني يومي قبل يومو لاتحجين
هيج ياعمه گلبي يكوم يوجعني
ابويه رد
الكاتبو الله نشوفو والي يريدو ماانكدر نردو
لجن ندعي من الله اللطف بينا
اللهم امين
جدتي تكلمت وكملت معه
كوم ياولدي ريح واستراح اشوفك تعبان
ومهدود حيلك
اي والله يايمه تعبت جثير بهل جم يوم
كام سرى لغرفتو وامي لحكتو جدتي تكلمت
هاا راحت وراه والله ماتخليك تكف مع ابوك
لاااا والله
ماعليج بيها ياجده انا مااعوف ابويه بهل
الشده
هزت راسها باي هاجر اجتي كعدت يم رجلي
بدت تفرك بها سالت
يعني ماراح تعكب للمزرعه
خيال السمره لف جدام عيوني ابتسمت
رديت
ارروح واعكب هينه
هاا اجي وياك يازين ضايجه منا واريد
اروح هناك حتى انفه عن نفسي شويه
اي بعد جم نروح
ابتسمت وكملت بضحك
حيل ولج لاااتصيرين ماايعه
ههه هو انا مايعه من يومي
صيري گويه مثلي انا من جنت بكدج الزم
الطلي واشيلو للسياره
يمه ياجده تشيلين طلي
اي والله اشيلو وازتو بالسياره رحمه ابويه
الله يرحمو جان ساند روحو بيه لان
اخوتي جانو صغار
يااا مثل هيله بنت عم حميد
هاجر جاوبتها بالي راح لها تسري بالزرع
وبالحلال وهي جنها عود خيزران
گويه ولسانها بعد اگوة
تمددت غمضت عيوني اسمعهن يحجن لجن
بالي مو يمهن يم هيله الجيله
من ثارت يمنا خلتني اخاف
عليها جريتها عليه لجن
بلحظه انضربت
وكعت وهي تلكتني بحظنها
گلبي اختلفت دگاتو بس تذكرت الصار تاكدت
انا حبيت هيله حبا جبير
من خفت عليها وردت احميها
بروحي لجن هالحب بس من طرفي انا
تنهدت وذبيت حسره
فتحت جدتي سرت من يمي سمعتني وكفت
دحكت لي وركزت بعيونها عليه
تكلمت
وش بك اشوف هواجيسك تلوب بك
ماجاوبت ابتسمت كملت بنهده
ااااي لاتشيل هم يازين
عسى الايام تخالف ظنونك المعتاده
وتبهرك بشي مايطري على بالك
عرفت البيه هزيت راسي جاوبت
ياجده سريت لبابها لجن سدتو بوجهي
ينسد باب ينفتح ابواب بأذنو
اشرت لفوك وكملت
وان جان لك قسمه معها تصير تصير يازين
مارديت هاجر دحكت لي ولها
سرت وهي تردد
تغيب عن عيني ومسكنك في الجوف
مـاغـبـت عـن بـالـي وروحــي دقيقه
مـن ويـن اوجـه نـظرتـي كني اشـوف
زولـك ولا ادري حــلــم ولا حـقــيـقـه
بـس الـحـقـيـقـه انـك بجوفي حـروف
مـنحـوتـة تـحـت الـضلـوع الـرقـيقـه
🌿🌿🌿🌿
ايهم
خسرت كلشي بعد السويته بليان غلطت بحقها
وبحق نفسي من ورة لحظه ضعف ورغبه وشهوه
ووي منو وي اختها الي
عرفت شلون توكعني وتخليني اخذها حتى
اعوف اختها وارتبط بيها
المشاكل علكت بيني وبين ابويه وااخوتي
يريدوني اطلگ ليان واعقد
على هاي الساقطه
رفضت اكثر من مرة وبكل مرة تصير مشكله
جبيره اخر شي من كعدو عمامي يم شيخنا وشيخهم كالو لو يزوجها لو نقدم بي
شكوى هو خطفها واعتدى عليها
ابويه رجع من الكعده هو واخوتي وعمامي
اول ماشافني حجه بغضب
ااايهم الكلت علي يصير
مااسوي ولا اخذها لهاي الساقطه وشتريدون
تسون سوو
ااانجب ولك
عمي الجبير واكبر من ابويه انهد بيه
تقدم عليه وكمل بصياح
ساااقطه هسه عرفتها ساااقطه بعد ماوكعتك
وخلتك تاخذ شرفها ضحكت على هالشوارب
ولك
ضربني عليهن وخرت منه جرني عليه وكمل
بغضب
ووولك ااانت مقدم بالشرطه يعني شايف
كلشي وتعرف هاي الدنيا شلون صارت
تمشي بالعكس ماافكرت عقلك مااشتغل صح
وكلت هاي ليش تريد تجي لبيتي
ماافكرت عم والله ماااجه بالي الي راح تسوي
ولاا وعيت الا من
سكتت وكمت اضرب راسي امي صاحت
ولزمتني وهي تبجي
كاافي ولك كافي شااحصل اذا صار بيك
شي
مااكدر اعوف ليان يمه كولو اي شي الا الطلاك
روحي بيها يابه يمه تعرفيني احبها
كلش شلون اطلكها ولكم
شلون واني اريدها واريد اكمل
حياتي وياها
دموعي نزلت ابويه انهد بيه
اااانت بوعيك يعني ماخذ اختها وتريدها تستمر
وياك مخبل انت ليان هي الي دزت
وكالت خلي يطلگني
هزيت راسي بلااا وجاوبت بصياح
مااطلك
مووو على كيفك
زهير انهد بيه وكمل بعصبيه
ولك كلشي راح يضيع منك الوظيفه الرتبه
سمعتك بشغلك راح كلها تصير اسفل السافلين
اذا قدمو شكوى بيك
شيررردون يسون خلي يسون
ابويه انهد بيه
اااسمعني ولك كدام الكل عمامك وولد عمك
اذا ماسويت الي كالو علي الشيوخ
اتبره منك ليوم الدين
ياابه مااكدر ولكم اافهموني ااني ااريد
ليااان احبها هي شلون اخذ غيرها
شلوون
تگدررر انت اخذتها بعد وصارت برگبتك
وحيل وابو زايد بيك اليجي من ايده الله
يزيده
صاح بيه عمي ناظم كمل بغضب
اطلك ليان وتعقد على هاي الادبسسز
صفنت عليهم بجمود عقلي فصل كلت هذا كابوس
هسه اكعد منه اني جاي احلم هسه
اكعد واروح ليان بالمشتل صوت رن
باذني وخلاني اصفن علي
بقهر
سممعت ولك
ضباب صار على عيوني النفس ضاك بصدري
نار اشتعلت بگلبي روحي اختنگت اياد
حجه بقهر
ايهم كلشي انتهى لاتفكر ليان ترجع الك
بعد السويته
انتهيت واني كتبت نهايتي بايدي اني
الحكم والجلاد بهل القصه والخسران هو اني
عيوني غورگت جاوبت گوة
هاهيه الي تريدو سووو
🌿🌿🌿🌿
ليان
طلعت من المستشفى وره ايام ووفوك الذبحه صار بيه انهيار عصبي جنت ابجي واصيح بصوت مكتوم واني رافضه اصدك
السمعته رافضه ايهم الانسان
الي خلاني احبه خاني
وي اختي
ردت اموت اخلص مو هالدنيا ومن الصار بيه
ردت اروح يم الله الي ارحم من ذوله
البشر
دموعي نزلت وهانت عليه صارت مثل نهر يجري على خدي اصفن بضياع
اسال روحي
اني شبيه ليش الفرحه ماتلوك اليه
ليش حظي هيج يجون وافرح بيهم واكول
راح ابدي حياة جديدة وابني عائله وبعدين انصدم بيهم من ينسحبون على غفله وهاي
ايهم اجه وخلاني احبه واعشقه
وكلشي رتبنا وفرحتي بعد كم
يوم وخاني وي اختي
اقرب الناس اليه
رددت بدموع
شبيه اني الله مايحبني لوو جاي يختبرني
باوعت لفوك وحجيت وي رب العالمين
يارب هذا الاختبار صعب ليش اني ليش
اختي ليش ايهم الي حبيته ليييش
صحت وكتمت صوتي بالمخده عطت اريد اموت
اريد ترجعلي الذبحه سمعتهم كالو
لااتخلوها تنقهر مو زين عليها خاف ترجعلها
الذبحه بنتكم وضعها مو مستقر
ليااان
صوت اخويه صاح اخذني لحظنه
حظنته بقوه واني اشهك بالبجي والوب من
البيه
ماما كاافي راح يصير بيج شي
صااار ماما صار اختي ذبحتني ووولكم
خانتني وي رجلي
ضربت گلبي بقوه وسيم لزم ايدي
وماخلاني اضربه صحت بخبال
ليييش ماما لييش مو هي اختي لييش
اخذته مني ليش باكت فرحتي
ولكم فهموني اني
شنووو ذنبي وشسويت الهم
ابويه طب يمشي بتعب وبظهر مكسور
حجه گوة
ليااان بابا كافي
ااخ بابا اريد امووت ولكم عقلي ماجاي
يستوعب السمعته ااختي ااني
ووسيم ااختي واختك
غدرتني ولكم خانتني وي رجلي
صدك هذااا موو ماجاي احلم مووو
ووج كافي راح تروحين من ايدي
بابا حظني يبجي واني ابجي ويا حيلي
راح والعياط تعبني هو والبجي تمددت بفراشي اون وادعي بگلبي
عليهم
🌿🌿🌿🌿
مالك
مر على وفاة لميس ايام وعقلي
مامستوعب لحد هاي اللحظه هي راحت وبعد مااشوفها اسمع بنتي تبجي
بغرفه امي ووي بجيها
دموعي تنزل
ابويه يمي صافن عليه بقهر ردد
اذكر الله مالك
يالله
جاوبتو جرس الباب اندك كام محمود كال
هذا زين العابدين وخالتي اكيد وصلو
راح كمت اترنح وراسي يوجعني كلش سمعت
صوتو بره طب ايدو رافعها
ليفوك بشداد شافني
اجه بسرعه عليه حظني وانهاريت
بحظنو بجيت بنهده وتعب روح
وگلب
البقيه بحياتك اخويه
ماجاوبتو مخنوك ولا بيه احجي كلمه خالتي
حظتني تبجي وتواسي بيه امي اجتي
شايله تاليا شافتها زادت
بالبجي
اوف يمه سوده عليه ماشبعتي من امج
راحت ويتمتج وانتي بعدج بالگماط
كعدت وخلتها بحظنها خالتي كامت تنعي
وهي تبجي
يتـشابـهن باللـون كلهن عبـيـچن
لچن ولاشميت عطر أمي بيچن
كعدت مهدود حيلي زين حجه
الله يصبرك يااخويه على مابلاك
الحمد لله والشكر
جاوبت ابويه كال
هاهيه لهنا واجلها اجه
ااي يايمه ااي عروس راحت وشهيده
خالتي جاوبتو نزلت راسي دموعي تنزل وماامسحها
الكل سكت بس صوت امي وخالتي يبجن
تاليا بجت وكامت بيها حجت وياها
تعالي،ياخيه جوة
خالتي راحت وياها ابويه كال
شلونك هسه يازين
بخير ياعم
ماعرفتو منو الضربك
لااا ماعرفتو
اسمع الحجي ومالي خلك افك حلكي بكلمه
سال
شسويتي على هاي الدكتورة ماقدمتو شكيه
عليها
قدمنا يابه بس وين تمشي ناس
تضم لناس
لميس جان سبب وفاتها نزيف بالرحم ماكدرو
يصيطرون علي ظلت تنزف الما
سلمتها بنتي الله سلمها من الموت بس
اخذ امها وخله بنتي يتيمه الام
رفعت راسي زين يدحك عليه ووجهو
مطعون غمضت عيوني رجعت
ليوره سندتو
على القنفه
تعبان واي حيل مابيه كلشي انهد بيه
ضعت وضيعتها من ايدي بسوالفي الشينه
كمت الوم بروحي واردد
راحت زعلانه مني مامبرتني الذمه
خلت ذنبها برگبتي وعقابها جان قاسي
تمنيت سمعت كلامها وكلام اهلي تمنيت اني
مو اني ولا سويت السويتو
ظليت وحدي اني وزين من كام ابويه
للصلاه هو واخوتي كعد يمي ردت احجيله البيه
ردت اطلع الي بگلبي وحارگني
زين راحت زعلانه مني ماابرتني الذمه
صفن بوجهي وجاوبني
لميس تحبك مالك ومستحيل تظل زعلانه
عليك
اذيتها زين قهرتها ولك اااخ ماتت وخلتني
شايل ذنبها طول عمري
بجيت بصوت مخنوك لزم جتفي وجاوبني
شلون ااواسيك يااخويه وانا اعرف بيك
هسه نار وشابه بصدرك
ااي نار هنا
فركت صدري بقوه وجاوبتو
نار مشتعله هنا يازين واني الشعلتها
اني بالدرب المشيت بي
سكتت وكملت بقهر
بس والله تركت كلشي لخاطرها هي وتاليا
تركت يااربي ليش اخذتها مني
موو اني مو لخاطري جان عفتها
لخاطر بنتها
سكت ظليت الوم بروحي واحس
عمري ماراح ارتاح من ورة السويتو بمرتي
🌿🌿🌿🌿🌿
هيله
وره ماتصوب زين كمنا
نسمع حجي هينه وهين مره يكولون جيله تايهه
مو مقصود هو ومره واحد يتصيد
واجتي به لجن السمعتو من سعود خلاني
اتاكد الي غدرو هو الشيخ
صگبان دز علي واحد من
ازلامو وضربو
اسري بمهره وافكر بالصار ادحك للمچان
الي تصوب بي واتذكر المشهد
جيله وزت من بينا تقدم عليه وهو خايف
جرني علي وبلحظه وزت اللخ رد
ليوره ووكع بين ايدي
كلت هذا مجتول من صگبان مادام خلاه
بعگلو اعرفو طبعو نجس وغدار وزين تحداه
وجسر علي وهو مايحبو ولا يحب
ابوه وراح يكررها مرة اللخ بس يلفه هينه
بمزرعه ابوه
ولازم واحد يگلو لعم شعلان لجن من
صفنت من بعيد لدارهم اهوجس بالي راح
يصير واشوف المشهد راح يتكررر
مرة اللخ ومو كل مرة
تسلم الجرة
احاجي ابويه
لااا كال ماخصنا بهل السالفه ماشفنا
اي شي وبيها حلفان قران
اعرف ابويه يخاف من الله كلش ومايكدر
يتهم احد لجن هاي
روح ولازم الواحد يحذر من غدر
الغدار
وكفت يم الكنطرة ادحك للمچان الي تصوب به
حدرت لگاعنا خليت مهرة بالمحصر طلعت افل
بلثامي
شلوونج ياهيله
گلبي فز بفرح من سمعت صوت شهم طلع
من دارنا سرى ليمي مبتسم
كمل وهو يتفرس بوجهي
شلونج ياملي
نزلت راسي خدودي اشتعلت نار جاوبتو
هلا ياشهم الحمد لله على السلامه
الله يسلمج يبنت العم
نازل باجازه
سالتو جاوب
اي والله اسبوع واعگب
خواتي طلعن اجني يفترن يمي وامي هم
تكلمت
تعالو جوة الدنيا مطرت
بدت شويه تمطر دشينا كلنا لجوة هو كعد
بالهول وامي كعدت اگبالو
سريت اذب الصايه وحزام الظهر بدلت
وعگبت وكفت من سمعت امي
ادكول
اي خطيه الله سترو ومامات
خل يموت ياخاله حتى الاوادم تخلص من
شرو
لاااا يمه شنو هالحجي مايجوز تتتمنى لاخوك
المسلم الشر
دشيت يمهم وكعدت بصف امي
شهم دحك عليه وهو مبتسم ريهام تكلمت
تعرف هيله جان يمو من تصوب
عكد حواجبو والوجه تغير سال
وشعندج يمو
رحت اسلم على عم شعلان وصار الصار
سكت بس وجهو تغير امي سالت
ابوك مافض الدين الي علي
دحكت لامي بضوجه شافتني سكتت
غيرت الموضوع
شصاير بالديره ياشهم يكولون الاخبار ماهي
بزينة
اي والله كلما جالها تسؤ بعد اكثر
انت وين يايمه مچانك زين ماعليك شي
خاله هساع هو زين لجن ماادري بعد يكولون
راح نتحول لغير وحده
هاا الله كريم يمه تروح بحفظ الله وامانتو
تسلمين ياخاله
ريمه جابت جاي وكليجه خلتها يمو
اشوفو يريد يتكلم لجن خجلان اشرت بعيوني
لخواتي كمت دحك
عليه وسال
وين ياهيله
اروح بشغله وارد
سريت من يمو ورحت للغرفه خواتي ورايه
هاله سالت
وش الشغله ياهيله
تعالن صفطن هدومجن زين
مابهن شي
ريهام جاوبت رديت
لاا مهوسات رتبن مثل ماعلمتجن
صار
كل وحده وكفت يم خانتها يطلعن يصفطن
ويرجعن كعدت تدحك لهن وبالي
شي واحد شهم
هم راح ياجل العقد هوجاسي طلع صح
ريمه اجتي شايله جاي النا كعدت يمي بالكاع
وويانا خواتي تكلمت
مو كتلج شهم امرو مو بايدو
اشرت لخواتي بعيوني هزت راسها باي
وسكتت اكلن وهن يحجن
بالصار بزين
امي دشت علينا مبين عليها مقهوره
صفنت عليه ريمه تكلمت
وينو شهم
عگب لبيت اهلو
جاوبتها بنترة كعدت على الجربايه ساريه
كامت وكالت
اروح اشوف كارتون
ريهام لحكتها وهاله شالت الصينيه وطلعت امي
تكلمت بغضب
ووج هذا هم اجلها عمج ماخذ راتبو كلو
ومامنطي غير بس الكروة
ها ماكتلج هذا امرو مو بايدو
بحظي وبختي ماايردوج الو لا اختي ولا عمج
ماجاوبت ريمه تكلمت وحجتلها
السمعتو من علا امي انصدمت فكت عيونها
بذهول صاحت بيه وبها
عش مااكلتوو لي عش ماحجيتو
ريمه خافت من غضب امي ودحكت عليه
جاوبت بهدؤ
منو يكول هذا الحجي صح
لااا صح سمعتها من غير اوادم
لجن مااصدكت وهساع هم سمعتها من علا
يمه رحمه لاهلج خالتي الحجت
شهم شنو خصو
انهدت بيه
يصير زلمه حك يبعد امج مو روح روح
تعال تعال صارلو شكد گاضبج بالكلام مو سنه
لاجاب حلقه ولا عقد يجمع اافلس
منا ياخذه ابوه وامو منا
هم اولى بي مني
وولج ياهيله لاتفتين گلبي كاعد اكلج
يلزمج بشي حتى يسد الحلوك
جاوبتها بضوجه
يمه انا مو رخيصه حتى اروح انا لو انتو نروح
نگلو تعال اخطب واگطع الحجي
اي يمه كلامها صح
ااسكتي ااانتي
انهدت بريمه خنست وبعد ماحجت شي
يجي ابوج وانا،،،، احجي معه خله يحجي مع اخوه
شنو يردون يخلوج مثل البيت،،،، الواكف لا عاقد
عليج وساد الحلوك ولا عايفج تشوفين
غيرو
ماجاوبت هي رجعت تكلمت بقهر
مااعتب على الغريب من يحجي ويكول
خلفتها كلها بنات اختي حجتها
وهي بنت امي وابويه
كامت تبجي روحي انمردت عليها دحكت
لريمه بغضب تكلمت بخوف
لازم تعرف ياهيله
اي تعرف وتنقهر عايزة قهر امج لو احنا
تره البينا مكفينا
سكتت واني ظلت تبجي على حظها
وحظي شاريد احجي اليريدني هو يجيني
برجلو مااگطو روحي علي لو جان
الهوه بايدو
ابويه عگب وحجتلو وهم نفس كلامي
بنتي عزيزة ومو بايره الي يريدها يندل الدرب
سد السالفه وكال مااريد احد
يحجي بيها بعد
شوكت ماجهز روحو الولد هلا به
امي ماحجت له كلام خالتي حتى ماينقهر
ضمتو بگلبها وكالت من تحدر علينا
اعاتبها بيني
وبينها
لجن خالتي ماحدرت بعد ولا
كامت تجي علينا سحبت روحها من عدنا وتصرفها اكد كلام علا واختها وغيرهم عليها
ورة جم يوم الشيخ شعلان عزمنا على
الغده بدارو بالمزرعه هو جان دائما يعزم ابويه
لجن هالمرة طلبنا معه ماردت اروح
كلت اظل بدارنا ماقبل ابويه
ولا امي خافو الشيخ
صگبان يلفي
بكاعو وانا وحدي سريت وياهم
واجتي سيارتين اخذتنا من يم الگنطرة
وصلنا حدرنا وخواتي يحسن بالخجل
الهنوف طلعت
بنتو الجبيرة وياها هاجر نفسها ماتغيرت
هلن بنا بوجه يضحك سلمن على
ابويه ورد السلام
ياهلاا بخاله وياهلا بزينه البنات
هلا بيج ياشيخه
امي ردت عليها ضحكت وردت
ماانا بشيخه يمج ياام هيله انتي بحسبه
اختي
امي ابتسمت وجاوبتها
يعز قدرج يبنت الشيوخ
صفنت عليه وتكلمت
كبرانه ياهيله
مانظل صغار ياام زين
جانت مسميه ابنها الجبير على اسم اخوها
ابتسمت وكملت
اي كبرتي وحلويتي جثير
ابتسمت ومارديت
تفضلو تفضلو
ابويه راح مع الشيخ للمضيف واحنا كعدنا
بالاستقبال كلت باي لحظه راح اشوف
برق الشر
لجن مابين ولا شفتو حمدت ربي مالفه وياهم
الهنوف دارت الجلسه تحجي وتتكلم
من زمان هي عاقله وثكيله
طبعها مثل طبع
ابوها
خواتي ضاجن من الكعده وظلن وحده تحجي
مع اللخ هاجر حست بهن تكلمت
تطلعن بره بالحديقه
ساريه فزت وصاحت
اااي
يله عجل اسرن معي
اشرت اليه ولريمه ترخصنا وطلعنا وياها
سرينا بالحديقه تخبل وجبيره خواتي شافن
دجاج كوجاك اسود شكلو حلو
راحن يدحكن عليها وريمه راحت يمهن
هاجر التهت تراسل بجهازها وره دقائق تكلمت
ياهيله نروح للبستان
هزيت راسي باي سريت معها وخواتي يلعبن
بالحديقه تحجي وانا افكر اكله للشيخ
شعلان وش اهوجس به
لااا مااحجي هو يعرف بغدر الشيخ
صكبان يعرفو هو وره الصار
بزين
شلونج ياهيله
انداريت بسرعه
من سمعت صوت الكاعد افكر به
