رواية الندم مابعد الخطيئة الفصل السابع عشر بقلم رونق
جان اكلهم مدامكم متجمعين كلكم حابه اخبركم قراري النهائي واتمنى بعد محد يحجي ويايه
اني مموافقه ع اخو اسيل ولو تذبحوني ذبح مااوافق عليه
عمار طفر جرني من شعري صحت اخ وخر عني انت ماالك حق تتحكم بيه
كام بابا يصيح ع عمار وغلط علي
بعدنه عدلين وهيج تسوي باختك الوحيده لعد اذا متنه شراح تسوي بيها
ماتسمعها بابا شكاعد تحجي
هذا الشي ميخصك اني ابوها واني المسؤل عنها انت ماالك حق ترفع صوتك وتضربها بوجودنه
زعل صعد لفوك واسيل هم راحت ويا
اني كمت ابجي وحيل ضجت من تصرف عمار
تعاي بابا فهميني فلمج شنو
كعدني يمه بابا احجيلي الحقيقه الولد اخو صديقتج تحبينه عندج علاقه بي
بابا وغلاتك وغلات ماما وداعت عافيتي مااحبه ولا اريده ابد
لعد شنو فلمج ليش ترفضينه لعلي
الولد خلوق وخريج وراح يتعين بيته جاهز بوحده مستعد ينتظرج لمن تتخرجين انطيني سبب واحد مقنع لرفضج
والله مامرتاحتله ولا اكدر افكر بي زوج الي
ابد مااحبه ولا الي رغبه بي
مو مشكله الحب بعد الزواج تحبينه واهم من كلشي الولد هاويج ومشتريج
بس بابا اني مو سلعه حتى يشتريني
اني اريد اعيش حياتي مثل البنات بدون ارتباط وبحريه بدون تقيد وبدون اوامر لمن اخلص فترة الجامعه وبعدها افكر اتزوج
خل يبقى ينتظر لمن اتخرج وعود يخطبني اذا هيج ماعندي مانع ابد
هذا مو حجي يابنتي ماكو واحد يبقى منتظر كل هالمده وبالتالي لو توافقين لو ترفضين
فدوه اروحلك بابا لتجبروني اوافق علي وحق الحق اذا جبرتوني اكتل نفسي
بنتي فكري زين ولاتستعجلين حتى متتندمين لان هاي الفرصه مو دائما تجيج مره بالعمر واذا خسرتيها متتعوض
ماما انت ليش متحجين ليش ساكته انت مو تدرين بيه اضوج من اسيل واهلها من زمان واكلج ماارتاحلهم ابد
بس ماما العالم زينين ولحد الان مطلعت منهم المو زينه
وانت كارهتهم من وره اسيل انت راح ترتبطين بالولد هو مو اهله
يعني ميهم اهله وهو اكد راح يطلعج ابيت وحدج
يعني لازم توافقين وتشوفين مصلحتج
واذا جنتي تفكرين بهذا اخو شهد لو تموتين مراح نوافق عليه لان هو نفسه الي دمر حياة اخوج وحول حياته لجحيم لو نسيتي
اني اشوف توخرين هاي الافكار السوده من بالج هواي افضل الج
راح نتركج تفكرين زين وانت جبيره وواعيه مو صغيره واكيد تعرفين مصلحتج وين
عفتهم وصعدت احس الدنيه ظلمه بعيني
منا اهلي وعمار الي ضاغطين عليه
ومنا مرتضى والي سواه بيه وشلون تخله عني بسهوله
حسبه تاخذني وحسبه تجيبني احس بنفسي عاجزه عن اي تصرف
مااعرف مرتضى راح يخبث وياي لو شراح يسوي لان مستحيل بعد الغلط يدك عليه
الصراحه اتندمت لان حجيت وياه بهيج طريقه المفروض مااتجاوز عليه اخاف لا ياذيني من صدك لا يعوفني هيج متعلكه
حالتي الصحيه اتدهورت من التفكير
كطعت الاكل لان اني من اضوج اكره الاكل
ماما حارت وياي وحسيت بنفسي حيل ضعفت حتى دوخه بدت بيه
مرتضى انقطعت اخباره عني ولا اشوفه ابد
بدت الامتحانات وجنت جسد بلا روح اروح للجامعه بس امتحن وارجع
عمار مايحجي وياي ابد
الكل يسالني ع حالي حتى بيت خالوا حسوا اكو شي
شكد يتوسلون بيه حتى اجيهم بس اني ارفض
كرهت الدنيه كلها وماالي واهس لكلشي تقريبا صار شهر ونص ومرتضى ماالي اي تواصل ويا وفاجئني من صدك تركني ولا فكر يشوفني ولا فكر يراسلني ويحاول يعرف اخباري
اليوم بيت جدو عدنه وكاعدين اني وديما نسولف
كالت احمد راح يخطبني كال بالعطله واذا وافقوا اهلي نتزوج بنهاية العطله
لعد ودراستج
كال ماعندي مانع السنه التجي اخر سنه الي واكملها يمهم
ان شاء الله يوافقون خالو وخاله
الله يسمع منج ان شاء الله
اخاف تعاي منين تعرفي وشلون اجوي وسين وجيم
هم صدك شلون راح يخطبج شيكل لخاله ولخالو شلون عرفتها
حاجي وي امه وكلتله نكول اكو ناس دزونه عليكم
زين لعد
تعاي فهميني شنو فلمج انت اشو صايره معقده لا اطلعين ولا تمشين ولا تجينه شنو فلمج
والله ياديما روحي طالعه من الدنيه كلها من وره اهلي ومرتضى
شبيهم وياج
ع اساس متعرفين شبيهم وياي
اشو اهلي شادين ويايه ويردوني اوافق ع هذا اخو اسيل واني لو اموت مااوافق عليه لو يبقى بس هو بالدنيه هم مااوافق عليه
ليش ولج شبي اشو يكولون حلو وطاك شتردين بعد
لو اله حبيب الكلب
كون اهلج يرفضون احمد ويجبروج ع غيره وذاك الوكت تعاي كليلي شبي
لا يمعوده اسحب كلامي من هسه اني اسفه
هههه ايا جبانه بسرعه قلبتي
عوفج مني وتعاي سولفيلي بعد مرتضى شبي
خل يولي طلع نذل من اول عثره عافني وتركني
حتى منطاني مجال افسرله الي صار
سولفتلها كل الي صار وشحجه وياي
معقوله زعلانين اشو اني واحمد منعرف معقوله احمد يعرف ومحاجي
ماادري والله
بس تعاي اكولج اذا انت منطيته حضر شلون يتواصل وياج
يكدر يراسلني من غير رقم لو يكدر يسال عني عن طريقج انت واحمد
والله ياروان مااعرف شاكلج بالليل اراسل احمد واستفسر منه
خل يولي الله عليج لاتسالين احمد هسه يكول ذابحه نفسها عليه
لاوالله مااكله هي سولفتلي اني اعرف بطريقتي الخاصه استفسر منه
لليل رجعوا لبيتهم بيت جدو
خلصت الامتحانات ولا لمحت مرتضى ابد
بين فتره وفتره افتح الحضر بس اشوف شكو ماكو وارجع الحضر بعدها
بدوا اهلي من صدك يضغطون عليه حتى اوافق وهذا الشي كله من وره عمار واسيل النهار كله يوزون بماما ويقنعوها حتى توافق وفعلا تخبلت عليه اله اوافق
عمار خبلني خبال لايحجي وياي واتغير ويايه تغير جذري مايطيقني ويكول لماما اريد بس اخلص منها
حيل ضجت منه عمار ومن صدك اخذت موقف منه
بعدين ماما هم طبكت ويا وضغطوا ع بابا
اخر شي اتفقوا كلهم بالموافقه ع اخو اسيل وحددوا موعد يجون يخطبون رسمي
لا بابا الله يخليك لتجبروني فدوه اروحلك ارفضهم
بنتي احنه نريد مصلحتج وانت بعدج صغيره متعرفين مصلحتج زين بعد شكم يوم تشكرينه ع هذا الاختيار
لا بابا والله اموت ولا اقبل بي
حجت ماما وياي ع جها
انت بيج شي احد مهددج هذا الحقير لاعب بعقلج
لا ماما والله بس اني اكرها لاخو اسيل
هذا الحجي اضحكي بي طفل عمره سنتين مو اني امج
وافقي بارادتج احسن ماتنجبرين
ماما شبيج انت امي لو عدوتي ليش توكفين ضدي
ماما والله اني لمصلحتج هيج اسوي لتصدكين اكرهج ومااحبج
بس ماما الولد اخو شهد ميفيدج ابد ومن سابع المستحيلات عمار يوافق عليه حتى اذا فكرنه اني وابوج نوافق
بس يوم والله اذا وافقتوا ع علي معناها توافقون ع موتي وراح ادزوني للنجف بيدكم
لج ماما من شوكت طلع الزواج يودي للنجف
اله اذا جان اكو وراج سر وسر جبير
تعالي سولفيلي شنو الفلم يجوز اكدر اساعد
ماكو فلم ماما بس والله مااريد اتزوج اتمنى تفهميني انت بالذات
فكرت اسولف لامي كلشي بس باللحضه الاخيره اتراجعت معرف لويش حسيت بخوف مو طبيعي
مرتضى : تخبلت من حجت ويايه بهاي الطريقه صحيح اني تسرعت وغلطت عليها بس من وراها اكيد حاولت وياها تفهمني بس هي رفضت
بعدين بدت تتجاوز عليه وانطتني حضر اني اعلمها عبالها ابقى اتوسل بيها لان اني غلطان وياها
صحيح اني غلطان واغتصبتها بس مو معناها تستغفلني ولا تاخذ بحجيي
ع اي اساس تطلع وي هذا العار بدون علمي وحتى مفكرت تبررلي موقفها كلشي مفتهمت منها غير مجبوره طلعت ويا
قررت بعد ماعليه بيها ولا راح احاول اخطبها لان الظاهر هي موافقه ع هذا العار واحتمال تتزوجه يجوز تروح لدكتوره تسويلها حل
تركتها وعاندت وقررت ابد مااتصل بيها ولا اراسلها من غير رقم لان حاضرتني
اني متاكد هي متصوره لازمتني من الايد التوجعني وكالت لو شاسوي بي عادي مراح يتركني
بس راح اثبتلها العكس
مرت الايام والحضر ع حطته ابد ملغته مني
الصراحه اني ع اعصابي هيج ابتعدت لان كرامتي متسمحلي اروح اتوسل بيها
بس بنفس الوقت اتمنى اعرف اخبارها واطمان عليها
كمت اراقبها من بعيد لبعيد بدون متحس بيه ابد
جانت حيل ضعفانه والتعب واضح عليها
مااعرف السبب بالضبط هل هو ضغط اهلها مثل متكول
هل هو بعدي عليها ولان اتخليت عنها هيج صار بيها
مااعرف السبب بالضبط ومااعرف شاسوي وشاتصرف وياها
اني لحد الان مااعرف ردها لاخو زوجة عمار هل موافقه عليه لو لا
لازم اشوفلي حل واعرف اخبارها
خلصت امتحاناتها وكعدت
بعد مااعرف شلون راح اشوفها بعد
لازم اشوف ديما واحاول اعرف الاخبار منها
اليوم اجاني احمد وسالني ع روان
صدك انت وروان متتحاجون
حيل فرحت من جاب طاريها
شمدريك بينه
هسه دحجي من شوكت وانت تضم عليه
دكلي منو كلك بالاول واني احجيلك بالتفصيل
من ديما سالتني كلتلي معقوله تدري بمرتضى وروان ميتحاجون وساكت متخبرني
اني اتفاجأت كتلها مااعرف والله
وهي معقوله هم ماتدري بينه وروان محاجيه شي وياها
لا والله ابد ماتدري البارحه همه يمهم وصدفه ديما سائلتها عليك
اي وشكلتلها الله عليك لتجذب عليه بحرف
والله ماحجينه بالتفاصيل بس تكول كلتلي مانتحاجه اني ويا وعلاقتنه انتهت وكلمن راح لحال سبيله
الله عليك هيج كايلتلها
اي والله شبيك
تعال سولفلي
كعدت سولفتله السالفه كلها هو اتخبل
شلون هيج تسوي بيها بربك فوك ضيم اهلها انت فوكاها
غير تفتهم منها السالفه
ياسالفه لخاطر ربك شحال لو ما شفتها كاعده بس هي ويا بعيني وانت شاهد
اي ميخالف بس انت متعرف ظروفها وشنو الي خلاها تطلع ويا
اي ليش مخبرتني وكالتلي ليش من اسالها تكلي انت ماالك حق تحاسبني
من ضيمها هيج تحجي والله تسولف عليها ديما تكول كاطعه الاكل ومقاطعه الناس كلها واهلها شادين وياها وهذا اخوها يكومها بضربه ويكعدها بضربه
ايا نذل تنشل ايده ان شاء الله
اي يا عيني غير اخوها ويعرف بيها ع علاقه وي عدوه شلون تريد يتعامل وياها
زين وشخبار خطوبتها
لك ياخطوبه انت من كل عقلك توافق عليه
تكول ديما من شفت هاي حالتها كلت خطيه خل اقنعها توافق عليه لان الولد كايل انفذ كل طلباتها بس خل توافق بيت وحدها وانتظرها لمن تتخرج تكول بعدني ماحجيت شي وياها بسرعه طفرت كال مااكول غير كون الله اهلج يرفضون احمد ويجبروج ع غيره وذاك الوكت تعاي قنعيني
لا ياالله اني اشسويت بيها ومن غبائي عفتها وقررت اقطع علاقتي بيها
اتوقعتها موافقه عليه بعنادي
وهسه شتكول عليها ديما بعدهم مصممين ع الخطوبه
تكول اي قرروا اخر شي يحددون موعد الخطوبه وغصبا ماعليها ترضه
شنو بكيفهم يجبروها اذا ماتريده وماتحبه حرام عليهم يجبروها
ذاك اخوها وروح احجي ويا اني شمدريني بي
اشو انت الي تخليت عنها بسهوله بعد لادزيت احد ياثر ع اهلها ولا سعيت
وهي خطيه الواكعه بيها
عفته ورحت كام يصيح وراي وين تريد يمعود مهتميت
خابرت الولد بالمحل كتلهم مااكدر اجي انتو عزلوا المحل
رجعت للبيت وجنت حيل ضايج من نفسي لان فكرت اتخله عنها بسهوله
هي لو ما مغتصبها ماعدها مانع توافق ع اي شخص بس شلون هسه وهي تعرف بس يدري احد بيها راح تكون نهايتها واهلها راح يرحون بالرجلين من وره سمعتهم
صعدت للغرفه اجتي امي وراي وسالتني شبيك
كتلها راسي يوجعني واريد بس انام وارتاح لحد يكعدني
طفت الضوه وطلعت
احس بنفسي عاجز مااعرف شاتصرف وشاسوي
مااعرف شاسوي لاهلها حتى ااثر عليهم واخليهم يوافقون
اكيد هاي حوبة شهد وعمار بيه اني هم جبرت شهد خطيه وهم هيج سويت بيها بوكتها مجنت اعرف شاسوي وشاتصرف
اكيد اخوها هم كاعد يتصرف تصرف اي واحد بمكانه يسوي واني اول واحد هيج سويت من عرفت بشهد وعمار
اصعب شي ع الواحد من يعرف اخته عدها علاقه بولد يمكن لو ينذبح اهون من هذا الموقف
اتمنى تفتح الحضر عني حتى اراسلها
اذن المغرب كلت خلي اتوضه واصلي وادعي ربي هو يحلها الي
صليت ودعيت ربي كون يخليها من نصيبي وتتحقق معجزه وتخلي اهلها يوافقون
حسيت براحه نزلت جوه كلت خل اروح للمحل افضل واخذ خط حتى اراسلها منه
رحت واتفاجأوا بيه الولد كتلهم عندي شغله جانت خلصتها ورجعت
اخذت خط وعندي جهاز بالبيت كلت من ارجع اخلي الخط واراسلها
طلعت اباب المحل وكفت وعيني ع محل عمار
صافن واكول يجوز اطخ عندي واحجي ويا واتفاهم بلكي الله يهدي
باثناء التفكير وجان يمر من يمي يباوعلي بنضرة حقد
ماالومه ابد لان السويته بي جان قاسي ولو يدري شمسوي باخته يمكن يذبحني ومايشفي غليله
دخل للمحل كلت بس يطلع هذا الصانع الي مخلي ويبقى بوحده ادخل واتفاهم ويا مستعد كلشي اسوي حتى يوافقون عليه
بس ماكو ماطلع ابد وره لحضات هو طلع
بعدها اني هم دخلت لمن عزلت ورجعت للبيت كبل خليت الخط
خابرت بالاول ع احمد كتله فدوه خل ديما تخابر روان وتتاكد من الجهاز عدها لو لا اريد اخابرها هسه واخاف عند اخوها
كلي راح اكلها وارجعلك خبر
بس الله عليك لتخبرها اني اريد اراسلها اخاف متجاوب خلي تحجي وياها بصوره غير مباشره
اوك
دخلت سبحت وطلعت لكيت متصل بيه احمد
رجعت خابرته كلي عدها الجهاز راسلها
ماشي راح اراسلها يله باي
مااعرف شاكتبلها لو شلون اعتذر منها
مااكدر اتصل اخاف الصوت ينسمع ويجوز متجاوبني
بسرعه فعلت الفايبر وبديت اكتب
هلو روان شلونج شخبارج ان شاء الله مرتاحه من دوني سمعت بيج مخطوبه وموافقه وحبيت اباركلج دزيتها
دزيت هيج حتى تنفعل وتجاوبني
قرت الرساله وبدت تكتب
حبيت تباركلي لو تشمت بيه احب اهنيك لان وصلت للهدف الي ابالك من اغتصبتني وخليتني بهذا الموقف اشكرك واشكر موقفك ويايه
بس رجائي الك انسى اسمي وانسى رقمي وانسى كلشي يخصني وروح مبري الذمه ع كلشي سويته بيه
لج تحجين صدك الله وكيلج كلبي ينزف دم عليج واني اسف واعتذر منج ع كلشي بدر مني والله ساعة عصبيه ومو قصدي الحجيته عليج والله بس انتي عصبتيني من مبررتي موقفج وطلعتج وي العار والله مبقه عقل براسي من شفتج ويا اتخبلت انت شي يخصني وملكي ومستحيل اخليج تصيرين لغيري لو ع عكص ركبتي
مرتضى هذا حجيك ميفيد بعد ولا راح تضحك عليه بي ومثل مكتلك روح انت حر شوفلك وحده بنت اوادم مو بنت شوارع وتطلع وي الولد وتحجي
هاي شبيج روان لاتحجين هيج والله لا اضحك عليج ولا مفكر بيوم اضحك عليج والله راح اسوي المستحيل حتى اقنع اهلج انت تحجين من كل عقلج اعوفج واخليج بحلك الموت يستحيل
رسلتها واتفاجأت منطيتني حضر خرب يومها شبسرعه
سويت برنامج الواتساب ورسلتلها انقرت بس ماكو جواب
دزيتلها فدوه اروحلج لاتنطيني حضر مابيه حيل يوميه جايبلي خط وانت تحضرين
لكيتها هم حاضرتني
انعل يومج روان ع هاي الدكه
ياربي شاسويلها هاي غير عنوديه وراسها يابس ولو اني جفصت بالحجي وياها هواي واكيد جرحتها
كلت خل اتركها لروان لمن تهدئ اهم شي خل اشوفلي حل وي اهلها ولو اني مااعرف شلون اخليهم يقتنعون بيه
هسه لو احمد يتزوج ديما جان اخذت ابو احمد لخالها وحجيت وياهم
ثاني يوم حجيت وي احمد كتله متفضها وتخطبها لديما
ليش شكو شصاير
لا مصاير شي بس اريدك تتزوج باسرع وقت حتى اخذكم انت وعمي ابوك مشيه لخال روان بلكي ياثر عليهم
والله حجيت وي امي واكلت كلبي سين وجيم وين تعرفها وشلون وحلوه لا نادره لو فاهيه من ذني ام الاندومي وجمالها طبيعي لو اصطناعي وهم نافخه شفايفها وهم مسرحه شعرها وهم داگه تاتو وصارلي اسبوع دك تحقيق ويايه
لابربك تحجي صدك 😂😂😂😂😂
اي وربي 😭😭😭😭
اي وشكلتلها
كتلها البنيه مشايفها وممركز بيها ابد انت روحي وحققي وياها بس ع كيفج وي البنيه مو تسحوليها من شعرها حتى تتاكدين من شعرها
وين عرفتها وشلون مشايفها
كلتلها جيران ولد صديقي
اجيت اكحلها عميتها 😂😂😂😂
اي وبعدين
كالت شوفلي ام صديقك جوارينهم خل تروح وياي
😂😂😂😂😂😂كول والله
اي والله
كمت امتمت مااعرف شاكلها
بعدين كتلها يوم الله يخليج مااريد صديقي يعرف اخاف يطلع مخلي عينه عليها خليها لمن اخطب وعود يله احجي كدامه
لك احمد احجي الصدك ممعقوله الي تحجي
وعيونج ممجذب عليج هي هاي الحقيقه
زين من اروح اخطبها شاكل لاهلها منين نعرفكم
كليلهم ناس كلولنه عنكم ومدحو بيكم وبسمعتكم الزينه وانت لسانج ينكط عسل بعد بيج ومتمدحين بيكم
موافقه بس من هسه اكلك اذا جمالها صناعي مااقبل تتزوجها ابد
موافق يوم هو اهم شي راييج الي توافقين عليها اني اوافق والي ترفضيها اكيد ارفضها
الله وكيلك حجيت وياها هيج حتى تفرح بحجيي ومتشك بيه ابد
اني اذا ابقى وره امي مستحيل اتزوج يوميه جايبتلي وحده شكل ومن اكلها مو حلوه تكلي اهم شي الاخلاق
اي يايوم والشكل شلون
اي عادي اكو صالونات ويلعبن بخلقتها وتتغير الله وكيلك
والزبده ولك
باجر راح تروح هي واختي حتى تشوفها وتحجي وياها
كتلها يوم اهم شي جيبيلي صورتها حتى اشوفها 😂😂😂😂😂
وصدكت بيه واتمنى متجفص جفصه كدام الناس
ياالله كون خاله تقتنع بديما حتى تتزوجون واني وراكم
الله يسمع منك
يعني باجر عشانه عليك
ليش يابه ليكون اني الخاطب وماادري
لا انت متلهف للموافقه ازيد مني
لتستغلني لك
العشه عليك اذا امك اقتنعت والعشه عليه اذا اهل ديما وافقوا عليك
اتفقنه لعد هاي هي
صار عندي امل ولو ضعيف
ثاني يوم راحت ام احمد وشافت ديما وجنه ننتظر اني واحمد ع نار
كل شويه واتصل بامه وماكو جواب
بعدين كال راح اروح انتظر بالبيت احسن
الله عليك خبرني بس تعرف شي
ان شاء الله
بقيت اني منتظر ع نار بلكي تصير القسمه
وره الاذان اجاني احمد للمحل وجان وجها مكلوب كلاب
لتكلي امك معجبتها ديما
😭😭😭😭😭اي معجبتها وهو عوزه ميبجي
انقطع الامل مني وحسيت بنفسي عاجز
يله خل نروح نتعشه لان حيل جوعان واني منا فرحان
لتكلي تجذب عليه
كام يضحك لك شبيك بسرعه ايست من رحمة الله لك اتشاقه وياك نبع الحنان اجتي متخبله خبال عليها تكول هي هاي الي احلم بيها
بس ادعيلي كون الله يوافقون اهلها
ان شاء الله والله راح ادعيلك
حسيت بفرحه متنوصف
رحنه للمطعم وجانت الفرحه واضحه علينه اثنينه
كال لك لو تشوف امي تكول ابوس بيها واتلمس بشعرها وبخدودها وبشفايفها حتى اتاكد من جمالها 😂😂😂😂
كول والله 😂😂😂😂😂
وحق الله ورسوله
خابرتني ديما تبجي تكول امك فصختني تفصخ وكل شويه وسالتني هذا شعرج طبيعي لون عيونج طبيعي زين ورموشج وشفايفج
اخر شي جاوبتها من حركتي كتلها خاله بعد نسيتي شي مسالتيني علي
شنو خاله النسيته
طولي و وزني هل طبيعي لو صناعي
ها هم صدك نسيت
خاله امني مواصله لا صالون ولا مركز تجميل يعني كلي طبيعيه
هنا امك سكتت وبعد متنفست ابد
لعد شلون اقتنعت بيها
مااعرف اجت تكول عجبتني كلش
هاي هي الحمد لله بعد موافقت اهلها لديما
كالوا اسبوع ونرجعلكم خبر
بقينه ننتظر ردهم
بس ديما اكدت لاحمد ماعدهم مانع لان سائلين عنه هواي ومقتنعين بي
وفعلا رجعوا الموافقه وانخطبوا رسمي ودزوا مشيه وجان بنفس الوقت يوم العقد
اني مارحت واتعمدت مااروح اخاف يشوفني عمار ويخرب الخطبه واني مااريد هذا الشي يصير
بيومها عزمت احمد مثل متفقنه ورحنه للمطعم
باركتله لاحمد وجنت فرحان اله هواي
سالته ع روان جايه لو لا
كلي اي ديما كالت اجت
بعدها عقدوا محكمه راسا متعطلوا
اتفقوا الزواج بعد شهر
احمد مكمل غرفته وماعنده شي
كملوا العقد وره تقريبا 3 ايام جنه اني واحمد سويه نتعشه وجان تخابر ديما ع احمد
سمعته نخبص خبص
لج اسكتي خل افتهمج كلشي ماافهم
لتخبليني شبيج تبجين لخاطر الله
هسه اجيج بس فهميني
شنو تحجين صدك
لا اله الا الله
شوكت وليش هيج يسوون
وين انتي ..... هسه اجي انتظريني
ان شاء الله ماكو شي حبيبتي بس اسكتي لتبجين
كلبي لعب من هاي المخابره بس مااكدر احجي خل يخلص واشوف شكو
كمل كلامه والتفتلي وكلي
مرتضى راح اكلك شي بس اتمنى تتمالك اعصابك
شكو احجي شصاير
جان يكول روان انتحرت ...........
هاي الكلمه قضت عليه ع التخير
