رواية ليليان الفصل السابع عشر 17 بقلم زينب نور

                                                    

ليليان ..

                                

بعد ثلاثه اشهر من زواجنه ..

حبلت ،، كمت ابجي من الفرحه ..

                                

عشت اجمل ستة اشهر بحياتي ..

وراهه بعد ماشفت طعم الفرحه والضحكه ..

                                

يوم ... 10/13 ...

                                

جانت دنيا ليل وسامي بلمختبر ع رجعه ..

واني وايه كاعدين انسوي كيكة ونتفنن بيهه ..

                                

كلسع تاكل منهه ايه مثل الطفله  ..

خلصته وحتاجينه بعد كريم ..

                                

خابرت سامي حته يجيبلي كريم برجعته ..

اخابر عليه ماكوو مايجاوب ..

                                

ضل بالي عليه ..

دائماً يجاوبني بسرعه..

ومايخليني انتظر ..

                                

خابرت ايه هم ..

ماكو جواب ..

                                

الساعه ب ٩ ،، مايجاوب ..

تأخر هواي ، مو من عادته هاي ..

                                

رحت صليت ودعيت ربي ..

لزمت بطني ،، حسيت احساس غريب ..

نزلت دموعي وماكدر اوقف بجي ..

                                

نزلت جوه يم عمي وعمتي ..

مشغولين يحجون ويا هذا وهذا ..

                                

ضليت كاعده بس ابجي ..

اخر مره شفته قبل مايطلع يضحك ..

باسني و ودع ابنه وراح مثل كل يوم ..

                                

شصار وياك سامي ..

وين رحت ..

                                

اتخبلت محد يعرف وين ..

الي بلشغل وياه يكولون طلع من زمان ..

وياه واحد هم ..

صارله ساعتين من طلع  ..

                                

لبست عبايه اسلاميه ..

ورحت ويا عمي ..

ماكدر استحمل كعده بلبيت ..

                                

لبيت مرتضى اخوه ..

ماموجود يمهم ..

                                

خابرت ياسر ..

مايعرف مكانه ..

كالي راح يخابر اصدقائه الثانين ..

                                

رجعت صعدت ..

صليت ودعيت ربي ..

مايحرمني منه ..

                                

كعدت بلكاع علسجاده اقره قرآن ..

ودموعي تنزل ع كل آيه ..

                                

كطعت قرائتي بفتحت الباب ..

باوعت ،، آيه ..

                                

حضنتهه وضلينه سوه نبجي ..

نمنه ،، للصبح كعدنه ..

                                

صوت قرآن بلبيت عالي..

وكف كلبي ..

                                

نزلت سمعت الكل يبجي ..

افترت بيه الدنيا ..

ردت اوكع من الدراج ..

                                

لزمتني ايه ..

بلكوه اتحملت كعدت ع الدراج ..

                                

خنكه البكلبي ..

طلعتهه وصيحت بأسمه ..

                                

ساااااامي ..

                                            

                                              

                                                    

اني المفروض اموت مو انت..

اني البيه مرض ..

                                

ياريتني صدك بيه مرض ومتت ..

جان ماخسرت احد ولا عشت بعذاب ..

ليش ياربي ماخذت حياتي ..

                                

اتخربطت واخذوني للمستشفى ..

ماعرف شكد ظليت ..

مثل المخبله احجي ويا سامي ..

                                

ليش عفتنه ، ليش عفتني وعفت ابنك ..

ليش ماتريد اتشوف ابنك او بنتك ..

ليش خليته يعيش يتيم وبعده ما جاي للدنيا ..

ليش حرمته من حنانك وتكبيرك بأذنه يوم ولادته وانت تنطي اسمه ..

                                

اجتي يمي ميان وجود وابويه ..

بس اني مو بحال احد ..

امي ماعرف ليش ماجتي ..

                                

ماحب المستشفى ..

ذكرتني بي ..

اول مره شفته هنا ..

                                

بسرعه كتلهم يطلعوني ..

مابقه هنا ثانيه بعد ..

                                

طلعنه ع مسؤوليتنه ..

لان الطفل وضعه مو زين ..

بسبب الهبطه ..

                                

رجعت للبيت..

ضليت فوك بغرفتي ..

انعزلت وماحجي ويا احد ..

                                

اجيبلي ايه اكل بس ماكل ..

وبلكوه اكل شويه علمود الطفل .. 

                                

طلع مندعم بلسياره ..

وميت هو وهذاك الولد الي وياه ..

                                

بمنطقه بعيده ومو هواي عالم بيهه ..

هو هناك بيت الولد الي وياه ..

شجاك وقبلت اتوصله ..

                                

مادري شحال الدنيا ..

ماكدر اصلاً اكوم ..

                                

ماتحمل اروح للدفنه ..

وضعي كذلك ماكدر ..

                                

ماريد اخسر الشي الوحيد..

الي اكدر اعيش علموده ..

الشي الي بقالي من سامي ..

                                

بيوم السابع يله اجتني امي ..

جان كله ايه ، ميان ، وشمس ..

حته مرت اخويه مراد ماعرف ليش ماتجي ..

                                

اجتني امي وضلينه نبجي ..

وليش تبجي علمودي اني ..

ظلينه نبجي بدون كلام ..

                                

- ماما شبيج ؟ ليش تبجين؟

- سامي مو بس هو مات ..

- شنوو ؟؟ ليش منو مات بعد ؟؟

- مرت اخوج مراد د ليش ماجتي ..

- ماتت ؟

- مو هيه !!

- لعد ..

- ضوه عيني وفرحتي الاولى !!!

                                

ما الي اي رده فعل ..

تعودت ع الصدمات والحزن ..

عيوني ظلن يدمعن ..

                                

اخويه ،، مراد ..

شبيكم تعوفوني وترحون ؟؟

                                

اني شر وتبتعدون عني ؟؟

بس فهموني ليش ؟ 

                                

خسرت كل الي احبهم ..

الي ظنيتهم سند الي ..

                                

هيج تجازوني ..

واديرون ظهركم الي ..

احبكم وعفتوني ..

                                

.....

                                            

                                              

                                                    

بعد عدة أشهر ..

جبت ولد وسمته مراد ..

ع اسم اخويه المات الله يرحمه ..

                                

ضليت ابيت عيالي ..

بوحدهم كاعدين وايه كليه ..

واساعدهه ..

ماكدر استغني عن سامي هم ..

                                

بقيت شغل بيت ..

ومراد ماخذين كل وقتي ..

                                

وره سنه ..

                                

اشتغلت محاسبه بنفس الشركه الي جان بيهه مراد ..

وويا شمس هم .. 

                                

مانطي مجال لأحد ..

والكل يعرفني ..

                                

من اشوف ضحكه مراد ..

احمد الله واشكره ..

                                

ع الأقل عوضني بشي احبه ..

رزق ورحمه من الله ..

                                

اني وشمس نفس الشي ..

هيه عدهه ابنيه واني ولد ..

                                

بس مراد مات بأنفجار..

 وسامي مات بحادث سياره ..

                                

ارامل وجهالنه يتامى ..

بس ان شاء الله نكدر انعوض الهم ..

وانصير ام واب بنفس الوقت ..

                                

جانت الوظيفه هم تشغلني ..

تشغلني عن هاي الحياه واحزانهه ..

                                

بيوم من الأيام ..

كعدت الفجر ..

                                

تخبلت ..

ياربي ..

                                

نفس الصوت الجنت اسمعه ..

صوت الي بأذاني ..

                                

ماكدرت انام ..

من الصبح رحت للدكتور ..

فحصني وسوالي اشعه ..

                                

طلع عندي التهاب بقناه اوستاكي ..

بين فتره وفتره تلتهب ..

                                

لهذا يصير خلل بلتوازن وتضرب ع الراس ..

وايصير صوت بأذني وتشويش ..

                                

اخذت علاج ..

وبمرور الوقت اشافيت ..

                                

اذكرت كلام جمانة ..

مرة كالتلي يجوز عندج التهاب، مرض بالأذن ..

صدك كالت الدكتورة جمانة ..

                                

لما خابرتهه وكتلهه ..

ظلت اتسمعني  كلام ..

لو سامعه كلامي ومادري شنو ..

                                

هواي مرات نتشاوف ..

هيه الي خلتني اتجاوز هاي المحنه ..

بوكفتهه ويايه ..

                                

وسما كذلك ..

اسميهه اني دكتورتي النفسيه ..

هواي تريحني بكلامهه ..

                                

بعد كل الي صار ..

لازم اكول والكل يكول..

الحمدلله ع كل حال ..

                                

🎵🎵

                                

قصة ليليان ..

                                

سلطت الضوء بواسطتهه ع الظلم الي كاعد يصير بهلوقت ..

الكليات الأهلية ..

                                

اشخاص يطلعون ب ٩٠ ومايدخلون اقسام طبية ..

واشخاص معدلهم ب ٦٠ و ٨٠ يدخلون اقسام طبية ..

                                

مو ضدهه ابد بس ضد الاشخاص الي دخلوا الكليه مثل سامي ..

معدل مو زين ومايسمحلهم لهيج قسم ..

                                

الظروف خلتك اطلع معدل مو عالي وفرصتك الوحيده لتوصل هدفك هيه بس دخول الكليه الاهليه ،، عادي روح ادرس بكليه اهليه ..

بس اقره بضمير ،، اقره واتعب وانجح ..

مو تنطي فلوس وماتمتحن لحته تنجح وتتخرج ..

                                

الله فوكانه ويشوف كل شي ..

                                

اذا خطأت انت بشي غيرك راح يتحاسب عليه ويموت بسببك ولا تنسى انت هم راح تتحاسب بلاخره ..

                                

فكر كم روح راح تموت وكم شخص راح يبجي ع فاقدينه ..

اهله اقاربه اصدقائه ،، شخص يحبه ..

                                

....

                                

السنة الماضية ..

                                

اني من الاشخاص الي تعرضت لهيج موقف ..

مو مثل موقف ليليان ،، عكسه ..

                                

جنت مريضه وسويت تحليل طلع كلشي مابيه ..

مرتين سويت وماكو شي ..

                                

واني ضليت مريضه ، ماكل شي ومابيه اي قوه ..

عشت ع المغذي ..

                                

رحت للمستشفى سويت تحليل ..

طلع عندي التهاب الكبد الفايروسي ..

مو النوع الخطير ، همزين ..

                                

لو مالحكت ع نفسي جان صار عندي تلييف بلكبد او يتوقف الكبد ..

وبعدهه شيفيد اخسر فلوس وايجوز اموت هم ..

                                

بسبب خطأ تقني بسيط ..

                                

بس الحمدلله ،، عشت وتعافيت ..