رواية لأنها اختي الفصل التاسع عشر بقلم فاطمه حمود
منى تكول :-
رد اكلك اني احبك استحي اشلون اني اكول
اني طبعي مو جرئ بارد وكلش خجوول
خاف اكلك اني احبك وتكلي انت عجوول
خاف اضمهه وتبقى حسره وحسرة كليبي تطول
وهسه بعد العشره كلهه انت تسمحلي اكول
اني احبك والله احبك ومنك اترجه القبول
وهسه بس محتاج ردك هيه مو هيج الاصول
........
بعد مرور أسبوعين ...
رجع شيخ يقرأ الآيات ورجع سالني وافقت تم العقد طلع شيخ وي خالي كام نيار وهوه يرتب قاطه رفعت رجلي من المي عفتها على منشفه بيضه مزغرفه بعدها لبست كعبي كمت وكفت مقابيله وهوه يراقب كل تحركاتي
رفع الوشاح من راسي وباسني بين عيوني ورجع باسني ب خدي دكات كلبي عاليه اشهد انُ سمعها الابتسامه مالتي مرسومه ب هدوء على خدي ممزوجه ب خجل اجا خالي تقدم نحوي وباس راسي
ابو نيار :- انت بنتي قبل كل شي وهسه صرتي اعز مبروك عليج خالي طلع محفظته وعاف ورقتين بياض على الميز وربد على ظهر نيار ترخصو وطلعو
اجتي الي منى بسرعه وهي لابسه فستان محجبات لون بيجي طالعه اميره بي
ملاك :- منى فستاني ب الكنتور طلعي
ركضت طلعته الي لبست الفستان وطلعت كعدت على الكوشة بدت اجواء الحفلة الكل موجودين ودا يشاركوني فرحتي
عيونه مركزه عليه اسرتني ب نظراته تقدم وكعد يمي لحضات ما اعرف اوصف شعورها احس كل الي دا اعيشه خيال مو حقيقه
أحس نفسي بحلم حراره خجل مسيطره عليه واني اشوف نظراته الما فاركتني دكات كلبي العاليه
احس من كثر قوه دكتهن الكل سمع رجفه ايدي البسيطه قشعريره الي احتلت جسمي من تقرب الي ولامس خشونه طرف خدي وهو يهمس ب أذني
نيار :-بحياتي كلها ما توقعت انُ يمكن يجي يوم و اوكع بحبج واخليج تصيرين حلالي
ابسمت اله وكانت عيوني كفيله ب الرد على كلامه رجع همس الي
نيار :- وغلات امي احبج بزونتي
ابتسامه انرسمت على شفايفي وي لمعه عيوني كمنا وكفنا اني وياه أخذ الحلقه من العلبة مديت اله أيدي وهي بيها رجفه خفيفه
نزلت شويه واخذت حلقته مدلي ايده ولبسته حلقته أخذ الكلاده ولفها على عنقي تقرب الي صرت كلي ب حضنه
دا يقفل ب الكلاده حسيت ب شفته الحاره لامست جتفي بدون وعي رجعت شويه للخلف ب توتر وخجل تلاقت عيونه وهو يبتسم الي ب ابتسامه مكر مرسومه على شفته
كمل لبس باقي الذهب وباسني ب راسي وهمس الي
نيار :- راح اطلع يروحي الولد ب الباب ينتظرون وزحمه
ملاك :- احبك
ضحكت عيونه قبل شفته رفع ايدي الي كان حاضنها ب ايده وطبع بوسه سريعه ب كف ايدي وترخص وطلع
اجتي مريم ومنى بسرعه بفضول
منى :- شوف شوف الحياله متقبل تكول النا شنو سوه الها كولي ولج
ملاك :- ماا اكول هههههه
كمت واني اركص وي البنات عايفيني ب النص وهنه حوليه يركصن والفرح مالي كلبي
مر الوقت خلصت الحفلة الكل راح وفرغ البيت دانيا باتت يمنا بس كلامي
وياها كان قليل بس سلام أما أمي نوعا ما بعدها ما قابله بس ما تكدر تحجي او تكول شي
صعدت فوك الغرفتي بدلت واخذت حمام صارت الساعه ب 11 دك عليه نيار
نيار :- شلونج مرتي
ملاك :- ههههههه شلونك زوجي
نيار :- يابه مبروك اني عليج
نيار :- ههههه ولا يهمج مبروك علينا سوه لأن صرت الج وصرتي الي
ملاك :- تدري بعدني الحد الان ما مصدكه ولا مستوعبه الي صار ويانا وحتى إذا احجي الأحد ما يصدك اي شي من الي راح أحــچي !!
نيار :- اذا اني صاحب الشان وبعدني مصدوم لأن وكعت بحبج لعد شلون على الباقي حقهم ما يصدكون
ملاك :- عود يعني هسه انت من بـ؏ــد كل الي سويته بيه مصدوم ؟
نيار :- وغلات امي تدرين من أتذكر الي سويته اضل صافن معقوله اني هيج سويت مصدوم كلش من نفسي لأن هيجي سويت وهسه من أتذكر سنه ونص اني أتصرف ب طيش انصدم ما اعرف اضحك لو شنو يعني شلون سويت كل هذني السوالف ؟! بس ها جانت عندي مواقف تنطلع بيها
نيار :- ذكرتيني تعالي تعالي الساعه الجبتها هيج انطاج كلبج وذبيتيها ؟!!!
ملاك :- شي بسيط كدرت اسوي اصلاً من ذبيتها
نيار :- ايا عوبه لــوو بايعتها ومطيه فلوسها الفقره اشرف ولا دكتج هاي الما تسولف
ملاك :- ههههههه خوش ان شاء الله ب المره الجايه ابيع وانطي للفقره
نيار :- حتى اكسر راسج كلشي اجيبه يبقه عندج حتلو تكرهيني وتشوفين دم سنونج وما تشوفيني بس تبقيهن يمج
ملاك :- ما اضمن
بقينا نسولف اني وياها إلا أن نمنا واحنا على الخط فزيت على طكطكه كان هوه بعده على الخط ودا يبدل ابتسمت ورجعت نمت بدون صوت
الايام تمر ب هدوء وكلها حب وحنان حسيتها مثل الايام شتويه الساكنه هيج مرت ايامي نشرو بالصفحه مال جامعه على النتائج
منى :- زين منو يأخذنا لــوو ناخذ تكسي مو احسن ؟ شتكولين
ملاك :- اها لا يابه عليمن الباجر ابويه يأخذنا هوه كلي
منى :- خوش لعد ابيش الساعه
ملاك :- والله ما ادري انشوف ب الليل اتاكد من الوقت وادزلج
منى :- ماشي
كملت كلام وي منى طلعت من الغرفه نفس العاده توقيت كعده حسن من نوم ويريد جاي عاد اني اليوم عندي مصلحه يمه ركضت بسرعه واني اسوي اله ورحت اله كان كاعد يم ماما ب صاله انطيته الجاي وهوه مندمج ب تليفونه دا يقرا ب موضوع
ملاك :- اكول حسوني بأجر انت ما عندك شغل مو اجازتك حبيبي
حسن :- أي خير يا طير شعندج اتسالين ؟
حسن :- تربات هل ايد واعرفج كولي شتومرين
ملاك :- حباب حسوني حباب أريدك تاخذني للجامعة أشوف نتيجه مالتي حبااااااااب (حجيتها ب توسل )
حسن :- خلي نيار ياخدج مو يسمو رجلج وينعد علينا نسيب
ملاك :- لا انت أخذني فدووه ماا اريد نياررر فدووووه
حسن :- عود ليش إلا أني شعندج ملاككك
ملاك :- هيج عاجبني اروح للجامعة ب زود اخويه اروح واتبختر هل حليوه والصاك اخويه وهيج يفوتوك بكل احترام وتقدير والبنات يحسدني عليك واعيش الدور ويجن يسالن عليك يمي والله حلو
حسن :- خويه انت واعيه لو شنو اشو احسج مو شكول جامعه شكول يرجعوج لل اول ابتدائي اشرف خاف فاضحتنا هناك
ملاك :- حباااااااب هذني البنات مو يجن ب زود اخوانهن اني هم اريد اروح ب زود اخوتي وياي
حسن :- حلوه هاي مال زود اخوتي يلا ليش لا اخذج بس سوالف تعبانه اذا شفت احطج هناك واموتج
رمشت اله برموشي برائه
حسن :- لا هاي هي واضحه السالفه من اولها
ملاك :- لا شبيك والله ما اسوي شي
سكت ب رضه
ملاك :-اروحله فدووه الاخويه اني يمه فدوه فدوووه وها يعني عود أخذ وياك فلوس هم ما يحتاج اوصيك يعني
حسن :- لا هاهيه راح يخلص راتبي عليج وعلى رجلج
ملاك :- لعد كم ملوكه عندك يا عيوني قابل هي بس اني ونسيبك مدخلني محد كال الك تعزم بي
حسن :- شوف شوف تهاج هاج هذا جايج جاي المصلحة خل اكوم اسبح وابدل واطلع احسلي من ما باقي يمج
أم ملاك :- لا يمه راح يصير المغرب مو زين تسبح اكعد تـ؏ــآل يمه
حسن :- حجيه وين بعد نص ساعه الا يصير بسرعه خل اسبح
كام حسن واني كمت وراه صعدت مر الوقت وصار الليل دكيت على منى وأكدت عليها الوقت الي نروح
كعدت الصبح بدلت ولبست جهزت نفسي وطلعت كان حسن كاعد ب الصاله ودا يتصفح ب تليفونه
ملاك :- كملت اني
كام اخذ السويج وطلعنا بالسياره
ملاك :- ههههه هذاك هوه روح اله طلعهن من خشمه وبكيفك شتسوي سوي
حسن :- اكولج خاف انتِ يمنه تتبرين منه ويمه تتبرين منه هيج وضعج
ملاك :- لا والله انتو خط احمر اخوتي شحده يحجي شي عليكم
حسن :- عفيه عفيه ب ترباتي
وكفنا ب الباب مال بيتهم دكيت عليها طلعت وصعدت
منى :- السلام عليكم
ملاك :- وعليكم السلام عيوني ولج شصايره كيكة يهنياله الي ياخذج ينام ويكعد يعض ب هل خدود يمههه
احجي متعمده وإني أباوع على حسن الي رفع عينه على المرايه ب نضره
خاطفة وراها نزلها ولا كانو مسوي شي ك المجرم البريء
أما منى اباوع عليها صار وجهه أحمر دم ضحكت وخزرتني ب عيونها ادري حجايتي ثكيله بس حجيتها حتى يباوعلج حبيب الگلب
ضحكت بكلبي على الي صار وصلنا للجامعة ونزل ويانا اول ما نزلنا ضربتني منى ب عكسها ب غضب
منى :- ليش ولج جلبه هيج حجيتي خليتيني ضعت ب هدومي كدامه شكد عيب هو هذا حجي ب شرفج
ملاك :- ايباااااه مرت اخوي خجلانه من زوجها يمه يمه اروح فدووه للتخجل من زوجها المستقبلي لــوو هيج النسوان لــوو متنراد
منى :- اسكتي اجه ... احم اا ملاك اني راح اروح للقسم مالي أكمل واجيج القسمج أو للكراج تمام
ملاك :- ماشي حبيبتي روحي
راحت منى ورحنه اني وحسن للقسم مالي الحمدالله ناجحه كملنا اجتي منى القسمي هي هم ناجحة اباوع عليها الخجل مسيطر عليه ما تكدر ترفع راسها وكلبي يرف عليهم رزانه حسن وثكله يراد الها هيج خجل وفطره
ملاك :- يلا عيوني انت اخوي الحبيب بما انو ناجحه اعزمني اني وصديقتي على ريوك يلا حبيبي
حسن :- يا ريوك راح يصير غده بـ؏ــد ست ملاك
ملاك :- يلا بعد احسن اعزمنا على غده انت كريم واحنا نستاهل مو هيج منى
كرصتني ب زندي بدون ما ينتبه
حسن :- خاف البنيه ما تقبل واناخرها لو عادي ؟
ملاك:- لا تخاف غصب عنها تجي ويانا العزيمه مني بس دفع عليك حبيبي
حسن :- ها يعني صيت الج وتعب علينا
ملاك :- ماكو تعب عيوني هنه كم فلس ذبهن علينه اني وصديقتي الكيمر نستاهل
حسن :- بعيوني ليش لا خوش يلا اصعدن اصعدن خل اخذجن المطعم
واخلص من الهديه ترا من هسه ست ملاك لا هديه زواج ولا نجاح انطيج كافي مخاسيري عليج
ملاك :- لا والله حبيبي ترا هاي العزيمه أداء واجب ل منى لا أكثر مدخلني اني شنو تريد تروح البنيه الاهلها تكول كوب مي ما ضيفوني وترا هاااا
انت محضرتلك الهديه ال أريدها تجيبها الي من هسه من نوصل ادزها الك
ملاك :- لا عيوني نيار هم يجيب خاف قبل جان ابن خالي وشوية شويه نستحي منه ما نطلب هديه هسه لا عمي تغير الوضع غصب ما علي يجيب وهوه الممنون اطمن اطمن
حسن :- هههههههه أي بعد اخوج أريد اطيحين حظ حظه هيج ما تبقين ب جيبه فلس احمر
ملاك :- دشوف بلا العالم تكول للبنيه لملي حالج وحال رجلج اخواني يكلولي لا تبقين على رجال فلس احمر هاي منو كالب المعادله
ضحكنا ونزلنا المطعم بالطريق وإني كوه اسحل بمنى ما تقبل تنزل تستحي وبنفس الوقت ما تكدر تحجي خاف يسمعها حسن نزلنا طلبنا الأكل اجا شيطان تربع ب عقلي كال الي
انُ لازم اصير مودبه وانسانه محترمه وتسعى الى الخير وبما انُ اني انسانه تسعى الى الخير والستر راح اتركهم وحدهم حتى يصير بينهم حديث حتلو كلمتين
دكيت على نيار بدون ما ينتبهون اول ما فتح خط سديت الخط بوجهه كنت اكوله من اسوي هيج ارجا دك عليه لان معناها ما عندي رصيد
رجع هوه دك عليه فتحت خط
ملاك :-الو الو
سويت نفسي ما اسمع شي وخطيه موضوع مهم كمت من الطاولة وتوجهت يم الحمامات حجيت وي نيار كملت
باوعت عليهم دا يحجون ومنى مدنكه رأسها اباوع على خدودها راح يطكن من الحمار والخجل واضح ومرسوم عليها رسم
من صدك هنيالك يا حسن اذا صارت الك منى انت المحظوظ مو هي رحت للحمامات عدلت شالي وضيعت وقت شكد ما اكدر
رجعت الهم كان الاكل نازل كملنا اكل ودفع حسن الحساب ورجعنا وصلنا منى لبيتهم
منى :- مشكور حسن على الغده ما قصرت
حسن :- احم لا على شنو شكر مو من مقداركم هذا ومبروك على نجاح
منى :- تسلم
نزلت واني بس اباوع ب عيوني ب ضحك كاني الهبله وهوه حسن يسوق ونرسمت ابتسامه على وجهه
بدون ادراك مد ايده وهوه يمشط شاربه ب اصابع ايده ضحكت لان هاي الحركه نيار يسويها وسالته مره شنو معناها كال نسويها بدون وعي من نكون مرتاحين والوضع عاجبنه
نزلني وراح طلع عنده شغل
مر اليوم ب هدوء من بعدها الايام مرت رجعنا للدوام والهوسه وخلصت مرحله ثانيه وبدينه سنه جديده وبديت مرحله ثالثه وحياتي مستقره
قررنا اني ونيار زواجنا يصير لمن أخلص المرحله الثالثه بديت أجهز على راحتي ب غراضي وبهدوء
كاعده يم ماما دا نتناقش على تجهيزات والحجوزات اجا حسن كعد يمنا واضح من حركاته متوتر من طكطه اصابعه الحكه راسه وشجهه
ملاك :- ها حسون تريد شي ؟
حسن :- يمه عندي موضوع وياج اني
ملاك :- يعني شنو اطلع ابقه استاذ
حسن :- ما يحتاج اطلعين لأن انتِ اول ما اطلع من الصاله راح تعرفين شحجيت ب تفصيل ف ميحتاج
ملاك :- همزين تعرف يعني
أم ملاك :- شنو يمه احجي محتاج شي تريد شي وضعك معجبني
حسن :-لا يمه اريدج سالمه كل الخير ان شاء الله بي شسمه يمه اني قررت اتزوج واستقر بـ؏ــد
أم ملاك :- يمه ساعه المباركه الاشوفك بيها عريس واشوف أطفالك أبشر أشر منو تريد واروح الك من باجر اخطبها الك يبعد امك
حسن :-والله يمه ماكو وحده ب بالي انتِ شوفي الي على معرفتج بنيه زينه ونشوف عود
اني كال هيج ما تحملت بسرعه حجيت من يمي
ملاك :- يمه من رخصتج طبعا يعني بس ليــش نتعب نفسنه شتكولين ليــش ما نخطب صديقتي منى اله خوش ابنيه وأهلها خوش ناس ومعاشريهم ونعرفهم وامها تعرفيها وهاي وكدامنا واني البنيه أ؏ــرف معدنها تخبلل ها حسون وانت شنو تكول انت شايفها المنى
أم ملاك :- أي والله يمه لا عاب حلكج معاشرتهم وامها دره مال الله تنحط على جرح يطيب شتكول انت يمه
حسن :- يمه بس مو كانُ البنيه اني أكبر منها ب هواي وهي صغيره بعدها ما اريد هيج
ملاك :- شنو أكبر حسن شدا تحجي ترا نيار أكبر منك ب سنه واخذني وهي ب عمري بس اني أكبر منها ب شهرين شنو الفرق لا كبيره ولا صغيره
أم ملاك :- يمه شنو سالفه ترا بعدك انت صغير عود راح تدخل ال 30 السنه جايه بعدك ب عز شبابك ومبين ابن ال 18 يمه وهم نفس ما كالت ملاك شي عادي هذا وهم انت فكر بالسالفه خوش وردلي خبر وإني خل اكوم أبشر اختك دانيا هسه اطير من الفرح وعود نشوف اذا ما تعجبك صديقه ملاك نشوفلك وحده ثانيه
كنت اتصنع الثكل والاحترام كدام امي واول ما كامت امي اني طفرت كعدت يمه
حسن :- يا ستار ياربي
ملاك :- ليش ما تريد منى بيها شي كولي الي ها كولي
حسن :- شبيج انتِ والله البنيه دره مال الله أدب واخلاق وجمال لمن طلعنا اني وياج وهي ما رفعت عينها ب عيني ابد تخبل
ملاك :- اذا هي دره وكل هذا الحجي والمدح وهلا هلا لعد معقوله ما تتمنه تصير عندك هيج مره تصون بيتك حتى ما قابل !!!؟
حسن :-ليش ما اتمنه يا خويه بس احسها صغيره كلش وإني أكبر منها فوكاها جنها عصفور مبلل يمي هي يعني فرق شكلا وعمره بينه
ملاك :- أي أي جاي تحجي هذني سوالف ب راسي على أساس هسه امي راح تجيبلك أصغر منك ب 3 سنوات الله وكيلك تجيبلك من 19 وجوه عمرها اني اكولك امي واعرفها على ابو صغيره ما تعبه ف فكر ب منى ولا تخسرها من ايدك وهم اكول الك شغله مهمه كلش انت ما تعرفها ولا احد يعرفها اذا خطبتها اكولك يا وها ترا هاي شغله من لمن جنت بالمتوسط اعرفها اني
حسن :- ههههه يعني هسه راح تخليني اخطبها علمود اعرف شغله لان عبالج اني فضولي نفسج ولازم احشر نفسي ب كلشي
ملاك :- يااي مو على اساس انت صاحتلك تخطب وحده مثل منى اصلاً غصب ما عليك اني هسه صاعدة اكول الها جهزو نفسكم راح نجي نخطبج
الاخويه اني قبلت او ما قبلت العلمك ترا يعني خاف ما تدري ترا غصب عليك تخطبها
حسن :- والله خوش بعتي اخوج الي مغركج ب دلال علمود صديقتج شنو هاي ولج انتِ طلعتي غداره والله
ملاك :- عيوني انت اخوي على عيني وعلى راسي بس هاي منى مو عشره يوم يومين راح يصير النه 9 سنوات صداقه اعرفها اكثر مما أ؏ــرف نفسي ولوما متاكده منها شنو هي ما كان حجيت ولا كلت
حسن :- شوفي ملاك انتِ اسالي البنيه على فارق العمر تقبل لو لا وكولي واني افكر ب الموضوع بس الاهم اساليها
ثاني يوم نزلت امي ب المطبخ دا تخدر الجاي
ام ملاك :- البارحه كلت الدانيا وفرحت كلش كال تعرف بنيه صغيرونه وحلوه الحسن
ملاك :- يمه ومنى ؟!!!
ام ملاك :- ما يحتاج أحــچي انتِ شفتي اخوج شلون متررد ناحيتها ف ما اريد اضغط علي خلي يسوي الي يناسبه ويريده المهم يستقر ويكون عائله
سكتت والخوف احتلني بس لا يروح يخطب غيرها والله ما اكدر اكول الها الي تحبي خطب صعبه شلون اكول الها ؟!
زين شلون شسوي لازم اقنع حسن لازم حتى لا يروح ولا يشوف غيرها وتبقه بس هي المتاحه
حسن :- بس شنو أحــچي بسرعه يلا
ملاك :- فدووه كول انت موافق على منى حباااب
حسن :- اكولج شخبصتيني ب منى وهي البنيه هستوها صارت عشرين وإني راح ادخل الثلاثين وين اني وين هي بعدها صغيره ملاك ما ترهم
ملاك :- والله لمن تخطبها راح تعرف ليش هيجي أحجي والح وهم ترا
انت هسه بعدك هستوك دخلت لل29 عود السنه الجايه 30 وهم هسه مو نيار 30 عمره صار وهاي شو ما حجيتو على العمر ؟!
حسن :- نيار كان مقتنع اني لا
ملاك :- من تحجي وي منى راح تقتنع صدك وراح ترضيك
حسن :- شوفي راح اقبل بس ها ترا كل شي قسمه ونصيب انروح نشوف
واحجي وياها اشوف تفكيرها وضعها واذا صارت صارت لا والله ما صارت لا ترجعين تلحين على راسي وتزنين خوووش وهسه اطلعي وسدي الباب أريد ابدل وانااااام
طلعت ركض رحت جبت التليفون ودكيت عليها واني اركص ركص من الفرح
منى :-خيررررررر
ملاك :- وسم احجي عدل لج
منى :-شعدج داكه لا تكولين مشتاكه ومدري ايش هاي الكلاوات مو عليه
لأن صار سبوع مكابله خلقتج وكاعده ف فوتي ب المفيد وكولي شعدج ترا متعاركه وطالعه روحي
ملاك :- اكلتيني حاصل فاصل وإني جايبتلج خبر يمكن هسه يغمه عليج من صدمه والفرحة بس طلعتي ما تستاهلين
منى :- يا ستار عمي لا أريد اغمه ولا شي احجي وكولي الي شعندج لكيتي البدله لو الصالون
ملاك :- لا البدله ولا صالون عوفيهن هسه على جهه البدايه كولي الي يمج أحد لأن موضوع قمبله وما اضمن رده فعلج علي
منى :- كولي والله ( ب صوت عالي )
ملاك :- شبيج وسم شهرتيني والله يابه والله
منى :- دا تجذبين عليه مو ملاك
ملاك :- هههههه يا شبيج وداعت امي راح نجي نخطبج والله والله وامي يمكن اليوم أو بأجر ادك على امج تأخذ موعد حتى نجيكم والله
منى:- ولي ولي
سدت الخط ب وجهي ما فهمت شي منها ولا رده فعلها رجعت دكت عليه
منى :- احلفي ب القران الي كلتي مو شقه
ملاك :- يابه والقران هسه حسن كال خطبوهااااااا
سدت الخط ب وجهي فرحت وضحكت من كل كلبي هاي شنو شصار بيها ما مستوعبه الفرحة ما سايعتني نزلت جوه واني ادبج
يمين يسار
يمين يسار فوك فوك فوك تحت تحت تحت
واسبححح
وصلت يم امي واني اطك اصبع
ملاك :- يمه حسن كال كولي الامي تحجي وي أهل منى وتاخذ موعد منهم حتى تروحين تشوفيها للبنيه
ام ملاك :- متاكده هوه كال هيجي ؟؟ ملاككك
ملاك :- أي والله هوه كال الي هسه والله وحتى اصعدي اسالي بس لا صعدين كال حنام كلش تعبان
ام ملاك:- الله يتمم على خير
ملاك :- شوكت ادكين على امها يمه
أم ملاك :- خل احجي وي حسن واتاكد منه مو يفشلني وي المره ونشوف يمكن بأجر الصبح ادك عليها وأخذ منها موعد نروح نزورهم ونشوف منى
صارت ب 9 ونص أخذني حسن لبيت منى وصلنا للبيت نزلت دكيت الباب
طلعت الي امها سلمت واجتي منى وجها صاير طماطه من الخجل
ترخصنا من امها اني رحت بسرعه طلعت و كعدت ليورى وخليتها تنجبر ك احترام الحسن تكعد ليكدام اشوف حسن مرتبك وهي حاصره نفسها يم جامه
مال سياره على ساعه توكع واضحك ب داخلي على وضعهم واصلي على محمد احس نفسي من كثر فرحتي بيهم راح احسدهم
وصلنا للصالون هي بسرعه هروله نزلت اني وراها
ملاك :- عريسنا عود وصيلنا غده مو تخلينا على لحم بطنا
حسن :- خوش ادزلج بيد رجلج
ملاك ؛- لا فدوه لا دز بيد رجلي ولا شي هسه اطبك منى على مطعم من مطاعمكم وادفع وكول الهم ب 1 يوصل الفلان مكان وهاي هي
حسن :- شوف شوف ما تربد اتعبه خوي يلا روحي وداريلي عروستي
سديت الباب واني اضحك هسه صارت من صدك عروستك أخذت الغراض دخلت للصالون بدينا ب مشوارنا
كملنا كل شي اباوع على منى كانُ اميره وكاعده فستانها لون بنفسجي من فوك تول ومن يم الخصر حزام وب الخلف
ورده كان كلش حلو وي تسريحه شعر بسيطه ومكياج اباوع عليها وإني أصلي على النبي دك تليفوني حامد اجا حتى
يأخذنا لبستها البرنص مال الفستان وضميتها ضم عروسه اخويه ما اخلي الهوى يطخها قبله طلعتها
صعدتها ليوره وإني بالصدر وصلناها للبيت ورجعت اني البيتنا
اول ما دخلنا الشارع هوسه كلش السيارات من طول للطول عمامي وخوالي واصدقاء ابويه واصدقاء حسن وحامد
ملاك :- بيك شي حامد
حامد :- شبيه مثلا بيه مرض وظيم
سكتت ما حجيت كانو عرفت سبب عصبيته أو حزرت شنو هوه السبب اكيد مريم .
نزل حامد من السياره لمحه نيار واجا ناحيتنا طبطب على ظهر حامد راح حامد وهوه اجا فتح الباب ناحيتي ونزل راسه
نيار :- عدلي شالج
ملاك :- معدل حبيبي
نيار :- ملاك عدلي شالج دا اكولج
ملاك :- هاي عدلته ولا شعرايه طالعه زين !؟؟؟
نيار :- كتلج عدلي زين وهسه تنزلين عينج ما ترفعيها أبدا خووش وبله انتِ شلابسه خل اشوف
ملاك :- شبيك نيار ترا الفستان مال محجباات وما بي شي بـ؏ــد على شنو وهم وفوك هذا كله انو فد شويه راح اطلع وهم الكل راح يشوفه ترا
نيار :- فد شويه لمن اطلعين الكل طاش ب سيارته وافكس كل عين تنحط عليج وهم شحدج اطلعين من الباب اذا مو اني واكف ب الباب منتظرج بالسياره ما تمشين خطوه وحده وي غيري ولمن تنزلين من بيت منى نفس الحالة
ملاك :- هسه شلون أريد ادخل بعدني ما كامله اكسسوارتي جوه وهواي أمور لازم اخلص بسرعه لان حطلعون
نيار :- هسه أجيب عبايه شي واجي انتظري هنا ونزلي راسج
ملاك :- يااا شبيك نيار دا تحسسني ما لابسه شي اذا كلش مستحي
من لبسي أصعد سياره وذبني ب الباب ورجع سياره ومحد يشوفني ترا كبرتها كللش
نيار :- وزين والي ب طرمه الزلم اكول الهم ارخصولي فستان مرتي ضاب على صدرها ويجيب الفلك كله وما تقبل تلبس عبايه وتنزل ارخصوني غمضو عيونكم شويه ؟ شرايج ها
ملاك :- ماشي يمه يمه من السانك يلا عمي روح جيب
نيار :- راح اروح أجيب وراسج نزلي اياج ترفعي ملاااك
ملاك :- ماشي ماااااااشي بس يلا اتاخرررت
راح ما طول ثواني وأجا وبيده عبايه
نيار :- هاج البسيها
ملاك :- خل أنزل من سياره والبسها حبيبي
نيار :- لا هنا البسيها ما تنزلين
وهوه كبالي تقدم نحوي وهوه يرتبلي العبايه من فوك وغطه كلشي طالع مني حركته
وهوه واكف وجكاره بين شفايفه ويضم بيه جوه العبايه ضحكتني ضماني ضم بس عيوني طالعه لزمت ذراعه ومشيت وياه دخلت للبيت
الطرمه ماكو محط رجل بيها همه اول ما شافو مره دخلت سوو مجال وإني ركضت جوه
كملت تجهيز صاحو يلا خل نطلع طلعو الكل بقيت بس اني انتظره دك عليه ألا طلعت صعدت وياه ب السياره وتوجهنا البيت منى
كانو الزلم والشيوخ هستوهم دا ينزلون من سياره ونيار
طبك سياره مالته كبال البيت فت
نيار :-أنزلي بسرعه قبل لا ينزلون الكل
منى :- ولج عود صدك حلمي تحقق ملاك واخوج حصير مرته !!!
ملاك :-أي خيه تحقق وان شاء الله سنه جايه ب رابع اداومين وانتي بطنج ليكدام كواي امينننننن
منى :- شنو سالفه ترا اليوم خطوبه مو العرس
ملاك :- دا يقرون الفاتحه ولج منىىى حتصيرين عروس حسن منىى صرتي مرت اخويه الي عشكتي عشك نظيف
دمعت عيونها صاحو قرينا فاتحه بدت هلاهل نبع الحنان ب زواج جبيرها
وبكرها ب هذا اليوم فرحه غير عيونها وجها وكل تفاصيلها تعبر عن فرحتها
صاحو خل تجي العروس حتى يعقدون راحت منى ورى الباب
وهي مرتبكه تم العقد رجعت المكانها ثواني والكل دخل للبيت بدت الفرحه مالتنا منى بس تباوع مصدومه ما مصدكه الي دا يصير
شويه ودخل حسن اباوع واوثق كل تفاصيل هذا اليوم اوثق هذا الحب الي من طرف واحد الشريف الي ما صارت بي كلمه وحده حرام وبارك ربي بي وشاء ربي انو يجمعهم سوه
جمع ربي عاشك ولهان على نيته ب انسان ما يدري ب انُ الطرف الثاني هايم ب كل تفاصيله
