رواية لست غجرية الفصل التاسع عشر بقلم روز الحيدر
التكملة
لفيت ومشيت بسرعة كل خطوة ترجعني لفكرة
وحده
ماكو مكان إلي هنا.
وكفت بالباب وأيدي على راسي حايرة وين اروح؟
شلون أجع؟
لا بغداد إلي...
ولا هالمكان إلي...
ولا حتى نفسي أعرفها بعد.
لفيت بعيني على الشارع الناس رايحة جاية كل
واحد يعرف وين متوجه إلا أني تعبت حتى من
البچي
وردة : يارب لاتعوفني
مسحت عيوني وسمعت صوت ملهوف
نسر : جووري
لتفت.. اجه يركض كأنه عرف بية
نسر : شبيج؟ ليش نزلتي؟
نزلت عيني
وردة : مو حتريت بالسيارة وجعت نزلت أشتريت
كأنه عرف جذبت
نسر : أجيتي هسه سألتي عني؟
ماكدرت انكر
وردة : أي بس ماندليت مكتبك ورجعت كلت اكعد
هنا انتظرك
نسر : تمام امشي
رفعت عيني له
وردة : وين؟
نسر : اكعدي بالمكتب بين مااكمل شغلي
وردة : لا شلون عيب
نسر : شنو العيب؟
وردة : لا خليني هنا صعبه اكعد
نسر : مرة وحدة لاتعاندين
وردة : والله مو عناد
نسر : يله أمشي حالج حال الناس
سكتت ردت اخطي ويا خطوة ستوقفنا صوت
: أمير....
لتفتنا واشوف ذاك الشاب يكول للگمر غيب واني
بمكانك.. تقرب وجهه أبيض ولابس بدلة عسكرية
لونها اسود طويل وجسم وشعر أسود فحم
نسر : هلا بالغالي
تصافحو
: حمدلله على سلامة
نسر : الله يسلمك
: خلصت على خير ان شاءلله
نسر : الحمدلله
الولد باوعلي ورجع باوع النسر
: منو؟
نسر : الفضل لله ثم الورد جوري
ضحك
:هااا.. اسمها ورد جوري؟ شنو من أسم!
حسيت نسر دغه
: شلونج خوية؟
رفعت راسي وبسرعة نزلته ستحيت اباوعله رديت
وردة : الحمدلله
: وين رايحين؟
نسر : البرنسيسة ممتعودة على حر ساحت ماعت
: هههههه حقها عمي
من كلامهم حسيت نفسي صدك ضعت بملابسي
: كملت شغلك؟
نسر : لا والله لازم ارفع قضية طلاكها
: شلون؟ لازم تثبته محكمة ومااشوف هل شي
مناسب.. يمعود جيب شيخ منا وخلي يطلكهم
فك شرعي افضل
نسر : اي هم هيج اسوي لان مستحيل أثبت
زواجهم قانونياً بس ادمج ويا ملفه ملف خطف
وعندي تسجيل الكامرات
رفعت عيني بسرعة
وردة : لاا مااريد لاتسويها
نسر : شنو؟
وردة : مااريد اشتگي على باهر كافي لي صارله
رفع حواجبه
نسر : هاااا؟
وردة : أي بس خلي بالمقابل يطلگني
: امشي ندخل للمكتب ويصير خير خو مو هنا
تسولفون
مشينا نسر قريب مني واني ابتعد مااريد يحجون
عنه.. واذا رادو يشوفونا بس قضية "
نسر : شبيج شاردة؟
وردة : مو شاردة
هز راسه ومشى مو مقتنع بس مايكدر يحجي
دخلنا للمكتب خفت يكون هذا القبل شوي سمعته
يحجي ويا يجي عصرت ايدي
نسر : كعدي
شغل المروحه
نسر : ها ست ان شاءلله تكيفتي ويا الوضع؟
سكتت اشر
نسر : كعدي شبيج!
كعدت وحضنت الجنطة.. نسر كعد خلف المكتب
والولد مقابيلي
نسر : شخبارك؟
: نكول الحمدلله .. بس احس بضيق مو طبيعي
ضايج حتى من نفسي
نسر : خيرك؟
: هيج والله وحدي اتعارك بدون سبب
نسر : صدك جذب مو عوايدك؟
باوعت لأيده.. بس ماحجيت، تنهد
أيسر : أي والله ماعرف صارلي فجأه
رفعت راسي
وردة : تسمحلي اكول شي؟
لتفتلي
: تفضلي خوية
وردة : برجك ناري لو هوائي؟
نظروا البعض مستغربين
: ليش؟
وردة : المحبس اللي بايدك جزع اذا جان برجك
ناري ميوالمك ويجزعك من روحك لذلك سالتك
نتبه الأيده يباوع للمحبس
: بس هذا سليماني أصلي
هزيت راسي
وردة : أي عين الهر
بأستغراب
: تعرفين بيهن؟
وردة : مو كلش بس جنت اتعلم من جدة الله يرحمها
باوع النسر
: والله من البسته لليوم ماكو مشكلة ماصارت حتى
الحب تعاركت وياها
وردة : برجك ناري؟
: اي برج الحمل
وردة : ماانصحك تلبسه
بسرعة نزعه
:أجرب انزعه واشوف... أمير اخذه
نسر : شايفني برجي هوائي! كافي المصايب لعلى
راسي ماعايز
سكتت حسيت يقصدني بالمصايب بس راح اخلصه
مني..
نسر : شوف منو برجه هوائي ونطيهيا
: هههه لا اكو واحد اكره رح اكلة هذا محبس تسهيل
امر ويفتح الابواب المغلقة ويدر الرزق در
ضحكو ولاارادياً بتسمت وياهم
نسر : هههههه حرام ولك
: لا هو مات عليه كال اشتري منك ب300 الف
بتسمت
وردة : اذا برجه هوائي كلامك يصير صح
:هههههههه لا اول شي اسأل عن برجه اذا ناري انطي
واذا هوائي ماانطي
بتسمت.. نسر كمل الملفات اللي بأيده ونهض
نسر : جوري خليج بالمكتب لاطلعين
باوع للشاب
نسر : أيسر خليك يمها وممنوع أي شخص يدخل
بتسم وهز راسه
أيسر : صار سياتك
ضحك والتفتلي
نسر : جوري ماتأخر
هزيت راسي بأيجابية طلع وبقينا اني وأيسر
احس عنده حجي بس يخجل اخر شي كال
أيسر : كلتي تعرفين بالخرز؟
وردة : مو كلشي بس اعرف شكم شغلة تعلمتهن
من جدة الله يرحمها
هز راسه
أيسر : الله يرحمها.. زين اذا اشوفج حجر تعرفي؟
وردة : له اشوفه
أيسر : مو عندي حالياً يم صديقي بس يكول مال
محبه يخليلهن ياكلن شكر
وردة : لونهن ابيض على حليبي؟
أيسر : أي صح شمدريج؟
بتسمت
وردة : كتلك تعلمت
أيسر : شكد عمرج؟
نزلت راسي بخجل
وردة : عشرين
أيسر : العمر كلة ياربي
وردة : تسلم... عادي أطلب طلب؟
أيسر : اي طبعاً تفضلي
وردة : أريد اشوف باهر يصير؟
هز راسه
أيسر : لحظة بس اشوف وين مااتوقع اخذو
وردة : هو هنا؟
أيسر : بلي
طلع موبايله وأتصل
أيسر : ها يسار.. أكلك باهر هنا؟...
زين هاي زوجته تريد تشوفه..... لالااا موزوجته
شلون افهمك هسه
بس هي نفسها البنية الساعدتنا... أي تريد تشوفه
.... يله صار
سد الخط ونهض
أيسر : يله خوية كومي
نهضت
وردة : أشوفه؟
أيسر : اي يله
طلع طلعت وراه متوترة وخايفة أول مرة ادخل لهيج
مكان احس الناس كلها تباوعلي...
دخلنا الغرفة ثاني بس بيها ناس هواي وكذلك شخص
كاعد خلفه المكتب ياخذ الملفت ويوقعها وشرطي
واكف خلفه
أيسر : وين باهر؟
رفع راسه
: هسه اشوف وين اخذو
أيسر : مو تكول هنا؟
عينه بالملفات
: أي... أي بس يمكن اخذو للتوقيف وأجو أهله هم
سوو توكيل للمحامي
أيسر :صلافة هاي تسمى
: شتريد يعوفون ابنهم!
أيسر : يله دشوف وين زوجته تريد تشوفه
: شتشوف منه ممنوع
أيسر : هل أجيت عليك
: أني شكو غير القضية قضيت نسر
أيسر : يسار شبيك فشلة من البنية كتلها تشوفي
حتى لو من بعيد بعدين نسر حولها الياسر
يسار : نسر وين؟
أيسر : يمكن يجيب شيخ يفك زواجهم
يسار : هااا.. تمام نتظروني دقايق
بقينا واكفين بين ماكمل الملفات دخلت بنية طك
بالكاع من جمالها مكياج والبس صارت تحجي وي
يسار واني صفنت عليها ورتاحيت لان مو وحدي
جنت خايفة شوية من هيج اماكن ذكورية بس من
شفت بنية عادي تدخل مركز ويمكن هي محامية
نطاها ملف تشكرت منه وطلعت.. بعدها نهض عدل
ملابسه اجت عيني بعينه
يسار : هاي زوجته باهر؟
أيسر : أي..
يسار : شتردين منه؟
نزلت راسي
وردة : أريد اشوفه أخر مرة
يسار : تضلوا
مشيت وياهم أيسر طلع المحبس
أيسر : هاك خلي بأيدك
يسار : هاا شعجب منك من الشيطان؟
اخذه
أيسر : انت برجك هوائي يوالمك
يسار : شمدريك؟
أيسر : بعدين بالبيت أفهمك
لبس المحبس وبقى ينظرله مبتسم دخلنا بممر
خالي مو مثل قبل شوية المكان يعج بالناس
واشوف اهل باهر.. امه وأبو.. وطلعو باهر من
الغرفة مكلبچ أديه..
لا ارادياً طلع صوتي
وردة : بااااااهررر
لتفت مصدوم عينه اتسعت من شافني تقدم
خطوة وهو مكلبچ رفع إيديه المقيدات بصعوبة
ركضتله بدون شعور ضربت نفسي بصدره
ضمني بحدود القيد ومال علية كأنه يخاف أختفي
نزل راسه برگبتي يشهك
باهر : ااااخ ياوجع گلبي.. شجابج!
رفعت راسي
وردة : ليش هيج سويت بينا؟
رفع راسه ببطء وعينه حمرة
باهر : لأني غبي...
لأني كل ماخفت أخسرج خسرتج بإيدي
الشرطي دخل يريد يبعدني
أيسر : خليها.. مايصير شي
بچيت أكثر وضربته على صدره
وردة : دمرتني... وكسرتني والله مااستاهل الي
عشتى بسببك
ما دافع عن نفسه بس هز راسه
باهر : أدري... أدري والله بس صدگيني أني أذيتج
لأني ماعرفت أحب بطريقة صح
رفعت عيني له ودموعي تنزل
وردة : ليش أني حبيتك صح؟
طاحت دمعه من عينه
باهر :لأنج الصح الوحيد بحياتي
اول مرة اشوف دموعه مديت أيدي ترجف مسحت
لف وجهه وباسها
باهر : يأعظم خسارتي
بجيت
باهر : جوريتي اللي ماعرفت أهتم بيها
كسرتج هوأي أعترف ومابدر منج غلط اني الغلط
رجع ضمني الصدره يشهك
باهر : ياريت لو أكدر أرجع الزمن.. مااخليج تعيشين
لي عشتي
بتعدت عنه وطلعت من حضنه امسح دموعي واني
أذكر أخر موقف شفتى هو ورند
باهر : جوريتي..
رفعت عيني له
باهر : هذوله أمي وابوي
لتفت كال بصوت مكسور
باهر : هاي محبوبتي شوفوها حلوة
امه ضمت وجها وصارت تبجي لتفت لـ أيسر طلبت
تودع ابنها
هز راسه
أيسر : أي عادي
حضنته تبجي لزمت وجهه تبوس بي وابو كذلك
بتعدو ابو يحاول يخفف عنى
:: بابا الغلط ارتكب وانتهى هسه أهم شي تبقى قوي
سكت لحظة إيده على كتفه ترتجف شوي
:: ما أگلك الإنسان مايغلط بس أگلك تحمل نتيجته
وأني وياك مهما صار...وأهم شي وتعاون ويا القوات الامنية
هز راسه مكسور
:: ما أتركك وأظل أركض لآخر يوم بعمري حتى
أطلعك
امه لتفت عليه..باهر نتبه
باهر :هاي مرتي
قربتلي
:: مافرحت بيكم
بتسم بحزن رفع أديه المقيدة لمس شعري
باهر : اني هم مافرحت بيها
سكتت ونزلت راسي
باهر : جوري باعيلي
رفعت عيني له
باهر : أريد تعيشين بيتج أني كلشي بي سويته ألج
هزيت راسي
باهر : وين ترحين ماعندج أحد
وردة : بلكت الله يحن علية وياخذني يم حبوبتي
سحبني بحضنه
باهر : لا يوجع گلبي لاا
أجه صوت رج الممر
نسر : شــكــــووو هناااا؟
شفت نسر ويا شيخ بايده سجل بتعدت بسرعة
قرب متعصب
صاح على شرطي
نسر : ليش مو بالتوقيف؟
أيسر : زوجته طلبت تشوفه
لتفت بعصبية
نسر : زوجته؟ شلون تسميها هيج!
قبل مااحجي صاح
نسر : أخذو
اشرلهم على غرفة اخذو باهر ماقاوم بس عينه
نكسرت علية.. كأن يريد يحفظ شگلي قبل ما يدخل
بسجن أفعاله
نسر : تفضل شيخ
رجع لتفت الأهله
نسر :ماحظرتوا الزواج بس تفضلوا احظروا طلاك
الشيخ وأهله دخلو للغرفة حتى يسار وياهم اجبت
ادخل لزمني
نسر : تردين تطلگين؟
وردة : طبعاً على شنو أجبت!
نسر : وليش طلبتي تشوفي؟
وردة : حبيت اشوفه للمرة الأخيرة
ترك أيدي
نسر : يله
دخلنا للغرفة باهر بعده مكلبج والشيخ كاعد يمه
واهله واكفين والغرفة بيها شرطة هم
فتح ملف كال
يسار : تردين ترفعين قضية خطف؟
وردة : لا مااريد بس يطلگني
هز راسه وماعرف شنو سجل بالملف وتركه
نسر كعد وأشرلي كعدت يمه صرنا مقابل الشيخ
وباهر
نسر : بلش شيخنا
الشيخ عدل جلسته وفتح السجل اخذ اسمائنا
الكاملة
الشيخ : الطلاق أبغض الحلال عند الله...
قاطعه نسر وهو معتدل بجلسته صوته ناشف
نسر : شيخنا الله يرحم والديك... مثل ما وضحتلك
هذا الزواج من أساسه صار تحت ضغط وإكراه وما
صار بينهم معاشرة... نريد نخلص الموضوع بأسرع
طريق شرعي.
الشيخ هز راسه
نسر : بس نسوي طلاك شرعي خاف باجر عگبه
يطالبها بحقوق وهذوله اهله بالشهود
صار هدوء
الشيخ رفع عينه لباهر
الشيخ : صحيح الحچي؟
باهر نزل راسه وماطلع منه حرف خفت يحجي غير
كلام باوعت النسر بخوف أشرلي يعني طمأني
رجع سأله
الشيخ : تمت بينكم معاشرة؟
باهر : لا
الشيخ : موافق على طلاق؟
رفع عينه ألي
باهر : موافق
التفت
الشيخ : وانتي؟ موافقة على الطلاق؟
حلگي نشف بس هزيت راسي
وردة : إي
باهر رفع عينه إلي... وانكسرت ملامحه
الشيخ : گول وراي...
أني باهر طلقت زوجتي ورد
باهر ظل يباوعلي عينه تعلكت بوجهي بلع ريگه
بصعوبة وصوته طلع مبحوح
باهر : أني باهر... طلقت زوجتي ورد ...
دمعته نزلت على خده
باهر : ...طالق ياوجع گلبي
أول ما سمعت كلمة طلقت حسيت شي انكسر
بصدري نزلت عيني وأيدي صارن يرجفن بحضني
ابد ماردت هيج تكون نهاينا.. الغرفة هدوء بس
صوت شهكات امه ودموعها
أبوه غمض عينه ولف وجهه للحايط حتى يخفي
دمعته.
الشيخ كتب بالسجل وبعدها رفع صوته بهدوء
الشيخ : تم الطلاق ولايستوجب عليها العدة
لعدم المعاشرة.
باهر نهض تقدم خطوة رغم القيد الشرطي شده
لورى.
باهر : دقيقة بس.. احجي وياها
رفعوا عينهم عليه باهر تقرب وصوته مكسور
باهر : جوري...
نهضت بوجهه تقرب لزم أيدي
باهر : أبد ماردت هيج تكون لابدايتنا ولانهايتنا
بتسم كأنه يواسيني نزلت راسي
باهر : من هسه صرتي حرة بس...
ديربالج تربطين عمرج بواحد مثلي عيشي ضحكي
ولاتخلين الذنب يلبسج سوادي.
بچيت غصب وماعرفت شأرد
باهر : وإذا يوم ذكرتيني...
اذكريني رجال حبج بس خرب كلشي بإيده ماجان
صالح للحب
الشرطي سحبه من أيده
باهر صاح بسرعة كأنه الوقت يهرب منه
باهر : قوية تبقين! سمعتي؟ خليج قوية!
سحبوه للباب
قبل لا يطلع لف راسه آخر مرة
باهر : أحبج... وأعتذر متأخر
أهله طلعوا خلفه ونسد الباب جسمي كله خانه
حسيت رجلية ماتشيلني
بسرعة نسر لزم كتفي قبل لا أوگع
نسر : جوري...
رفعت عيني له
وردة : تعبت
نسر : خلاص تنهى التعب
أيسر : خليها ترتاح
هزيت راسي
وردة : لا أريد اطلع منا ختنگت
نسر : تمام يله
بتعدت عنه وشيديت نفسي وطلعنا من الغرفة
ومااعرف اذا فعلاً نتهى التعب لو هسه بلش..
نسر : امشي بالمكتب
وردة : لا أنتظرك برا
أيسر : اخذج للبيت؟
رفعت عيني بصدمة هو فهم
أيسر : ماعدنا احد بس أمي ونسوان اخوتي
صفنت بوجهه وذكرت الكلام اللي سمعته قبل مارد
أيسر : خوية مكانج مو المراكز ودوائر وتعب امشي
بالبيت بس حريم اكلي ورتاحي ونامي وبعدين قرري
وين تردين
نزلت عيني وشي غص بحلگي
وردة : مشكور
نسر : جوري... أمشي ماعدهم احد بس عمتي والبنات
رفعت راسي بصدمة اكبر
وردة : امه عمتك؟
نظروا البعض وبتسم
نسر : أي احنا ولد عم
وردة : هاا الله يحفظكم بس والله عذروني مااكدر
نسر : اخذج البيتنا هم بس أمي وخواتي
وردة : لا
أيسر : اي وين ترحون هسه! خليج...
قاطعة
وردة : والله مشكورين هوااي بس مااكدر اعذروني
نظر لـ أيسر
نسر : ميفيد زمرت دمها عنادوليك
أيسر : خليها على راحتها
نسر : يله امشي بالمكتب بين مااكمل شغلي
وردة : لااا انتظرك برا بالباب
نسر : جوري بالمكتب محد يجيج
وردة : لا انتظرك برا
قربلي خله مف أيده على حلكه همس
نسر : خاف تموعين
وردة : لاا اكعد بالفي
نسر : تمام بس اكمل شغلي واجيج ولاترحين بعيد
هزيت راسي
وردة : صار
نسر : ندليتي المكتب أي شي تحتاجين تعاي
وردة : ميخالف
راحوا واني طلعت ببطء كلش أستغرب المكان
والناس طلعت بالباب... بقيت اتلفت معرف وين
أروح
الدنيا صافنة مابيها ذرة هوى الشمس عمـودية
تلهب واني لابسه بلوز ختنگت خنك ولاتكـول
موسم شتا بس اليوم يوم صيف يلهب يزيـد
ناري وجع روحي
حسيت بجسمي يند عرك التفت ادور فّي اكعد بي
ماكو... رحت كعدت على رصيف وضميت ركبي
الصدري وسندت راسي عليهم
وردة : هسه صفيتي وحيدة يوريدة حتى باهر
الي قبلتي بكل قذارته وخيانته الدنيا اخذته منج
بجيت رفعت عين عالسما وتذكرت حبوبتي من
تدعي هيج تسوي
وردة : صدك ربي؟..
على غيرتك يبو خيمة الزرگه التفتلي شوية
رجعت سندت راسي على رجلية
وردة : شني ذنبي وداعتك تعبت هي هاي الحياة
اللي تحاسبني عليها؟ لا وداعتك امشي برجلي للنار
واخذ حطبات وياي
رجعت رفعت راسي
وردة : أدري بيك رحيم... نارك ولا هل عيشة هاي
مر من يمي شخص شافني اسولف وحدي رگبته
نكسرت وهو يباوع
وردة : يااااع هسه عباله مسودنه احجي وحدي!
هي هاي العايزة بعد..
مسحت عيوني وكمت أشتريت ماي ريكي نشف
وطلعت غسلت وجهي ومررت أيدي على رگبتي
ورجعت بالباب اروح وارجع اريد الوقت يمشي
ماكو حتى مبايلي مثلي خلصت طاقته والماي
خلص...
تقريباً الدنيا صارت عز الحر وبدت الناس
تخف واني على فرد وگفه حتركت حرك والعرك
يصب
سمعت صاح
نسر : جوري..
التفت ملهوفة
وردة : هلااا خلصت؟
بتسم
نسر : ولج صاير بيج!
وردة : لا مابية
شافني ضحك وحفرت خدة برزت اكثر هي من دون
شي واضحه نوب ضحك نزلت راسي وعيونه تراقبني
احس العرك نزل من شعري الركبتي
نسر : هسه فهمت شنو تعني " عرك چيدك زمزمي"
رفعت راسي
وردة : شنو؟
نسر : امشي عمي امشي اشغلج التبرد
حجاها ومشى مشيت ورا
نسر : گيمر عرب مايتحمل يموع..ياربي
صعدنا شغل السيارة وشغل التبريد واشوف وجهي
صاير عبارة عن بقع حمرة خفت
وردة : عزااااا
نسر : لاتخافين لجعتج الشمس شوية
مسحت وجهي ونزلت عيني بخجل
وردة : والله صرت طماطة
ضحك ودار التبريد علية أكثر تقربت للهوى ونزلت
بلوزي شوية عن رگبتي حتى أتنفس.
نسر : أروح شوية وأجي
لتفتتله بسرعة
وردة : يعني ما كملت؟
نسر : لا... بعدني عندي شغلة صغيرة
وردة : وتعوفني وحدي؟
لحظة وباوعلي كأنه انتبه لنبرة صوتي
نسر : عشر دقايق وراجع وإذا تأخرت تعالي للمكتب
اسحبيني
هزيت راسي بخفة
وردة : زين بس لاطول
ابتسم ابتسامة خفيفة
نسر : أمريني بعد
وردة : لاسياتك انت تأمر وأني انفذ
نسر : والله جذابة عرمة و مشيتني على هواج
بتسمت بخجل ونزل وسد الباب رجع يركض كأنه
فعلاً خايف يتأخر علية..
واني خايفة من رد فعلة شلون أصارحه واكول
مااريد ابقى هنا..
تنفست بعمق وقربت وجهي على تبريد مثل نار
وخمدت وافكر شلون افاتحه بالموضوع والله
يعلكني من اذاناتي
ذكرت جدة علمتني شغلة اسويها ويا واجرب
بالكت الله تجب مفعول مرت العشر دقائق وشفته
هم اجه يركض ضحكت
وبقيت اردد اللي اعرفه لحد ما وصل فتح الباب
وصعد نفخت بوجه بدون ماينتبه او يحس
نسر : ها ست خو ماتأخرت
وردة : ابد على وقت مضبوط
حرك السيارة
وردة : وين نروح؟
نسر : ميت من الجوع نروح نتغدا اول شي
لتفت
نسر : هم كولي مااكل لو مااشتهي
وردة : لا اصلاً عصافير بطني ماتن من الجوع
والحر
ضحك وهز راسه ورجع نظرلي
نسر : لو الله يهدج واخذج البيتنا
وردة : لاتحرجني أكثر
هز راسه
نسر : هاي هي
سكتت واباوع من للشارع بدون مالتفله
وردة : تدري عبالي ماكو سافرات بغداد
نسر : اول مرة تجين لهنا؟
وردة : اي
نسر : يمتى استقريتوا بالشمال؟
وردة : بعد سقوط النظام بس ماعرف اي سنه
بالضبط ولا بكم سنه
نسر : وين جنتو بالضبط؟
وردة : مامستقرين بمكان تعرف جدة اصلها بدوية
حتى عدها لهجة تختلف
نسر : جنوبية؟
وردة : لا لهجة البدو تختلف تكول چنه رحال بس
بعدين ستقرت وي الغجر
نسر : يعني هي مو غجرية؟
وردة : لا بس مدري شيسموها من تدخل وي
مجموعة او عشيرة
نسر : تعرفين ليش دخلت وي الغجر؟
وردة : اي كالت جدي نطلب ثار وضيع نفسه وياهم
نسر : زوجها؟ شنو الثار؟
وردة : ماعرف بس كل لي اعرفه اخو يمكن كتل وهو
طلبو دمه لذلك ضيعو نفسهم وي الغجر كونهم من
المنسين والقلة القليلة
نسر : يعني متعرفين وين جانت بالضبط؟
وردة : لا والله حتى لو حاجيتها قبل ماتذكرها
لتفتله
وردة : ليش؟
نسر : هيج فضول
وصلنا صف السيارة ونزلنا دخلنا المطعم حلو ومرتب
وهدوء..طلبنا اكل وبقينا كاعدين هو سند كوعه على
ميز وصفن بية نزلت راسي
نسر : اي ماكلتي شلون شفتي بغداد؟
وردة : حلوة بناسها
نسر : جذابة غير حركتج
وردة : هههههههه لا اني لابسه بلوز ثكيل
نسر : وجهج؟
رفعت راسه
وردة : بعده؟
نسر : لا صار احسن
وردة : اروح للحمام وين؟
نهضت نهض وياي
نسر : امشي
رحت ويا دلاني.. دخلت
غسلت وبقيت واكفه اتفحص وجهي الحمدلله
افضل بهواي من قبل شوي ... طلعت وشفته
بعده واكف... بتسمت ومشينا
نسر : نكمل واخذج للصيدلية خلي تنطيج علاج
مرهم او شي
وردة : لا ماكو داعي
باوعلي
نسر : بالصيف شيصير بيج!
سكتت وكعدنا حايرة شلون افاتحه بالموضوع
نسر : اعتقد عندج حساسية او مرض جلدي!
وردة : لااا ابد مابية شي هاي اول مرة هيج
يصير كتلك لان لابسه ثكيل
هز راسه
نسر : واليوم الجو مصيف
وردة : إي
بقيت اعصر بأيدي واردد وانفخ بخفه بدون
لا ينتبه....
وردة : ياربي حباب لاتخلي يعصب علية وداعتك
تعبت مابية حيل يحجي ويلومني سهله ياربييي
نزل الاكل سمينا وبدينا نكل رن مبايله فتح خط
من الاسبيكر يحجي
نسر : هلا بالغالي
اجه صوت
أيسر : هلا بيك.. وين رحتوا؟
نسر : طلعنا نتغدا
أيسر : والله عيب عليك فشلنا صدك جذب عمي
البنية ضيفة تروح توكلها اكل مطاعم!!
نسر :والله ميت على طبخ البيت بس سمعتها بعد
أيسر : متيصير بوية زحمة
نسر : يله ان شاءلله غير مرة
أيسر : ان شاءلله ولاتقصر وياها
نظرلي
نسر : والله شسوي مقصر هي هواي سوت لو
ماهي مانجحت
أيسر : الله يوفقها سلملي عليها وتشكر منها
نسر : ان شاءلله
سد الخط.. خجلت من كلام أيسر
وردة : ربي يسلمه
نسر : وفعلاً مقصر وياج هواي وماشكرتج على
اللي سويتي
وردة : ماسويت شي لولاك
سكت ونظرلي
نسر : اي شلونه ودعتي؟
هزيت راسي
وردة :اني وباهر بينا زاد وملح وعشرة ومواقف
رغم مرارتها بيها حلاوة
نسر :اهمممم
وردة :والعشرة متهون له على ابن الحرام
هز راسه
وردة : شكد ينحكم؟
نسر : القاضي يقرر
رفع عينه بانزعاج
نسر : ليش ناوية تنتظري؟
ضحكت بستهزاء
وردة : ماانتظر لو اريد رحت ويا من البداية
هز راسه سحب نفس قوي
نسر : عندي موضوع وياج
رفعت عيني وبصعوبة بالعت اللكمة
: اااااع... هو هم عنده موضوع اويلي عليج وريدة
نسر : شبيج؟
وردة : مابية منتظرة تكمل كلامك
نسر : ماعرف منين أبدي بس...
بگلبي
: اويلي عليج وريدة هم حاير مثلج يررربي
وردة : ابدي منين ماتبدي
نسر : بعد يومين محكمة باهر
وردة : اي
نسر : تقريباً القضية خلصت كل اللي متورطين
بيها نلزموا
هزيت راسي مستمعه
نسر : وبعد ماتنسد وتخلص نهائياً..
رفع عينه بعيني
نسر : عندي قضية أهم..
گلبي نخمش بلعت ريكي بخوف
وردة : شـ..ـني!
بتسم
نسر : انتِ قضيتي"
رجفت وتركت من أيدي صوتي طلع مكسور
وردة : لا حباب مو گتلي مااسويلج شي
وماتتحاسبين انت وعدتني
بأستغراب عقد حاجبه وضحك
نسر : شبيج اني وين احجي وانت وين؟
شوية له دمعتي طيح
وردة : مو كتلي قضية يعني تفتح علية قضية
مصعب؟
ضحك بقهقه
نسر : لا بربج هيج فهمتيها؟
وردة : شني من قضية؟
سحب نفسه رد بجدية
نسر : لا اني ولا غيري نكدر نحاسبج بدون ماهمَ
يرفعون قضية عليج... وان صارت ورفعوا وهاي
ماتصير بس نفرض.. صدگي مااخلي الهوى يمس
شعر راسج
زفرت نفس
وردة : والله خوفتني.. احجي؟
نزل راسه
نسر : بس توعديني ماتعارضين
بتسمت
وردة : خلي اسمع اول
رفع عينه بعيني
نسر : أريد افتح ملف واعرف أهلج وأصلج شنو؟
نزلت راسي
وردة : وشنو استفاد؟
نسر : على اقل تعرفين..
قاطعته
وردة : مااريد اعرف.. أريد احافظ على ماتبقى
مني مااريد وجع ودموع كافي شنو استفاد اذا
عرفت؟
نسر : جوري...
وردة : لا هل شي يخصني ومااقبل لاتفتح ملف
ولاتلزم قضية اللي عشتى لليوم كافيني تعبت
والله
رفع صوته
نسر : غيررر تخليينييي اكمل
سكتت ونزلت راسي
وردة : اعتذر
نسر : اسمعي للأخير وبعدين أحجي
هزيت راسي بدون مااحجي
نسر : لما سلطانة نلزمت وصيت لي حقق وياها
يضغط عليها ويسألها اذا تعرف عنج او عن المراة
اللي سلمتج ألها حتى وان كان شي مو مهم وتافه
يسجله
رفعت عيني
وردة : وعرفت شي؟
هز راسه
نسر : عرف وجنت شاك من اول ماعرفت بيج
بتوتر
وردة : شنو؟
نسر : تذكرين بيبيتج قبل ماتموت شنو كالت؟
وردة : هواي حجت أي وحدة منهن؟
نسر : كالت سلطانة اخذت الملهي من حلكج
وباعتها لان ذهب
صفنت بكلامة
وردة : صح.. بس من وسألت سلطانة ماذكرت
هل شي
نسر : طبعاً تكلج أخذتها لو لازم تطلع كدامج ملاك
الرحمة
وردة : ماعرف بس شنو المهم بالموضوع؟
نسر : ألمهم؟... سلطانة حجت كل شي وكالت مو
بس ملهي اكو هاي لي يخلوها للطفل اول ماينولد
سبع عيون ذهب هم باعتها
گلبي صار ينبض بقوة
وردة : أي
نسر : يعني وين اكو وحدة تولد بالحرام وتلبس
طفلها ذهب؟!
نفسي صار سريع خليت أيدي على صدري ونزلت
البلوز نهضمت اكثر رديت بنبرة مكسورة
وردة : لاتخليني اتأمل.. أميرر اترجاك لاتخليني
اتامل وبعدها انظرب بقاع يحطم أحلامي
لزم أيدي
نسر : والله العظيم لو مامتأكد ماافتح هيج موضوع
وردة : وبالكي طلع تفكيرنا غلط؟
هز راسه وبتسم
نسر : ولج وين اكو طفل يخلون بحلكه ملهي ذهب
لو ماعزيز؟!
حسيت كلامة سجين بنص گلبي ضميت وجهي
بجفوف أديه صرت أشهك بجيت بقوة
نهض وكعد يمي بعد ايدي عن وجهي باوع بوجهي
نسر : جوري...صدگي رح أعرف أهلج واخلي
قضيتج مفتوحه الأخر يوم بعمري
سكتت بس دموعي تحجي مد ايده وبطرف ابهامه
مسح دمعي
وردة : وبلگي ماعرف شي؟
نسر : عادي تعيشين وكأن شيء لم يكن
وردة : يعني المرأة مو امي؟
نسر : حسب كلام سلطانة تكول ماعرف بس هي
هم متوقعة مو امج لان لاحظت عليها تصرفات غريبة
واهمهن سلطانة تهددها تكلها اذا مادزيلي فلوس احجي
الورد الحقيقة
وردة : و شنو يهمها اذا عرفت الحقيقة؟
نسر : اكيد اكو سر وسر جبير
وردة : زين سلطانة شكالت؟
نسر :أخذتج وعمرج اقل لـ40 يوم وتكول جانت
حلوة كلش وعطرها يفوح ونظيفة
برطمت شفافي وبجيت
وردة : أمير والله خايفة مابية حيل بعد تعبت
بتسم
نسر : أنطيج من حيلي اذا حيلج نقص
وردة : أميررر
ضحك
نسر : كومي غسلي وتعاي كملي أكلج
قبل مااحجي صاح
نسر : اسسسسسسـ كومي
نهضت غسلت وجهي ورجعت كعدت
نسر : شلون صرتي
وردة : اجذب عليك اذا كول زينة
نسر : وله يهمج اني وياج
وردة : هسه شتسوي؟
سحب نفس قوي
نسر : دزيت رقم اللي تتصل عليه المراة التحقيق
وانتظر خبر
وردة : يعني مو امي؟
هز راسه
نسر : حسب المعطيات لا
وردة : زين ليش لما شافتني تحضن وملهوفة وليش
تهتم ودز فلوس؟
نسر : كتلج وراها قصة وسر بس يجي ملف الرقم
من التحقيق نعرف كل شي
وردة : شكد ويجي؟
نسر : اليوم دزيته واشوف شكد يطول تقريباً اسبوع
هزيت راسي
نسر : كملي اكلج
وردة : اي هو أكل والله
ضحك.. كملنا اكل ونهض
نسر : كومي
بقيت كاعدة متوترة اطكطك بأصابيعي
وردة : اريد احجي وياك بموضوع
رجع كعد
نسر : احجي
وردة : بس حباب عليك الله لاتضوج ولاتعصب
نسر : بيها مقدمات وحلفان الله! ياستار ياربي
شمصخمة ولج وريدة؟
بلعت ريكي ونزلت عيني
وردة : أعرف هواااي تعبتك وحملتك مسؤوليتي
وماسويت له كل خير
نسر : جوري احجي گلبي طك
وردة : كتلك لاتعصب
نسر : مو معصب احجي
وردة : لااا شوف اعصاب وجهك تحجي ونبرة
صوتك هم
بتسم
نسر : هاا انت من ذوله لي يسمعون النبرة..
لزم أيدي
نسر : كافي رح تكسريهن
وردة : كول والله مااعصب ولا احجي ولا اعترض
نسر : احجي بدون حلفان
سكتت ضحك
نسر : والله اذا ماتحجين اعصب
وردة : أريد ارجع للشمال
حجيتها بسرعة وغمضت عيوني بقوة وسديت
أذاني خايفة من رد فعلة..
فتحت تك عين ببطء لمحته صافن بوجهي وملامحه
طافية من الفرحة. بعدت ايد وفتحت عيوني
وردة : لا تسألني ليش.. أريد ارجع وبس
نسر : بعد كلشي صار؟
هزيت راسي
وردة : اعرف تعبتك بس اخر تعبه هاي
ضحك هز راسه
نسر : صدك تحجين؟!
هزيت راسي
وردة : حباب الخاطري والله اذا ابقى هنا ماارتاح
هز راسه
نسر : توقعت هل شي
وردة : يعني موافق؟
سكت ثواني تنهد وكال
نسر : موافق
ضحكت وصفكت
وردة : جاب مفعول؟
نسر : شنو؟
وردة : دُعاء دعيت حتى ماتعصب وماترفض
ضحك
وردة : كوم يله هم يله نلحك
نهض
نسر : شنوووو! ترديني ارجع هسه؟ شبيج تخبلتي؟
بهتت
وردة : موكلت موافق!
نسر :اي مو هذا ويا الشمال وارجع بيج
وردة : يعني؟
نسر : يعني بعد كم يوم وارجعج
دكيت رجلي بالكاع
وردة : ولا ما ارجع اليوم يعني اليوم وماتكدر صعدني
واني اولي وحدي
نفخ بنفاذ صبر ومشى واني ورا تحاسب وطلعنا يم
السيارة
وردة : أميررر
لتفت
نسر : يمعودة ارحمي بحالي شيوديني صرت ثنين
من التعب
وردة : اني اروح وحدي
نسر : اي هاي هي ماعدنا مرة تطلع وحدها لا وين؟
للشمال اشدهن أستيل يلمعن أحسن من سالفتج هاي
سكتت وبقيت واكفه صاح
نسر : صعددددي
صعدت سديت الباب بقهر
نسر : دخيلك يابَطل صفين احضرنا
شغل السيارة بعصبية خفيفة
نسر :اصبح اجيت من الشمال وقبلها يومين ماشايف
الراحه شنو غير خوفي وقلقي عليج وهسه يوم كامل محاكم ومراكز... وهسه تريد ترجع للشمال؟
وردة : إي
نسر : ولج شايفتني سايق يم الخلفوج!
سكتت ونزلت راسي كمل طريقة بدون وجهه بس
صوت المكيف لحد ماكسر الصمت..
نسر : شبيج مستعجلة هيچ؟
وردة : بس أريد أرجع
نسر : هاي مو إجابة
وردة : هاي اللي عندي
زفر بقوة وضرب الاستيرن بخفة
نسر : اذا متبقين ليش وافقتي شايفتني مضحك؟
وردة : أمير أترجاك لا تجحي شي والله گلبي خلص
تعبت أفهمني ولو مرة وحدة
بلعت ريگي وكملت ودمعتي على طرف عيني
وردة : شتحمل كلام الناس لو أفعالهم ترا أني بشر
دم ولحم هم عندي إحساس ومشاعر مو كافي علية همومي لا تزيدها
سكت فجأة كأنه انصدم من كلامي
خفف سرعته وبقى عينه على الشارع
نسر :الكلام الي بالمكتب سمعتي.
نزلت عيني ومسحت دمعتي بسرعة
وردة : إي
تنهد ومرر إيده على وجهه
نسر : أني مااهتم الكلام الناس
وردة : بس اني اهتم مااريد اي مخلوق يحجي
عنك ويسئ لك بسببي
لتفتلي بنظرة قصيرة ملامحه هدت بقى ثواني
ساكت كأنه يستوعب
نسر : يعني كل هذا مو لأنج ما تريدين تبقين؟
هزيت راسي بخفة
وردة : لا.
نسر : ليش ما گلتي من البداية؟
وردة : لأنك ما تخليني أحچي كل مرة تعصب قبلي
نسر : اذا الناس تحچي خليها أني أعرف نفسي
وأعرفج
وردة : بس أني ما اتحمل الكلام
مد إيده ورفع قنينة الماي ناحيتي
نسر : تعلمي لأن من هسه محدد يقرر حياتج غيرج
لزمت جف أيده بتوسل
وردة : اذا تهمك راحتي وسعادتي ولو شوي رجعني
سحب ايده وزفر نفس قوي
وردة : حباب عليك الله
التفت
نسر : مو تبعديني عني؟
ارتجف صوتي
وردة : أني أحميك مو أبتعد
ضحك ضحكة قصيرة كلها تعب
نسر : ومنو كال لج أحتاج حماية منج؟
وردة : الناس ما ترحم
نسر :طزز خلي الناس تموت بحچيها
وردة : بس أني ما أتحمل أكون عار عليك
خفف السرعة أكثر وصف السيارة لف كامل جسمه
ناحيتي
نسر : اسمعيني زين أنت مو عار ولا غجرية وان كالو غجرية ثقي _
سكت لحظة،وعينه ثابتة بعيني
نسر : الغلط مو بالأصل
الغلط بالناس اللي تقيس البشر بأسمهم ونسبهم
نزلت عيني ودمعتي نزلت
نسر : أنت جوري... وبس لا ماضيج يعيبج ولا حچي
الناس يصغر منج
وردة : بس المجتمع مايشوف هيچ
نسر : المجتمع إذا عجبتيه يوم باچر يذمج وإذا
ذمج اليوم باچر يصفگلج لا تربطين حياتج بمزاج
ناس
نزلت راسي
وردة : بس ماارتاح اذا بقيت هنا
سكت وسند راسه على كشن
نسر : فعلاً تحتاجين راحة
رفعت راسي بدهشة خفيفة
وردة : يعني ترجعني؟
هز راسه
نسر : نرجع
بتسمت
وردة : مشكور
باوعلي ثواني وبعدين رجع نظره للطريق
نسر : أول مرة أشوف الشكر يوجع
اختفت ضحكتي
وردة : ليش؟
نسر : لأنج شكرتيني كأني غريب وصلج مشوار
مو واحد يريدج تبقين يمه
سكتت وما عرفت شأرد شغل السيارة ولفها بهدوء
وردة : زعلت؟
نسر : لا بس أتعلم شلون أخسر بهدوء
سكتت ماعرف شكول بس والله كل هذا حتى
مايسمع كلام بسببي مااريد اشوه صورته بين
الناس والمجتمع يلوم بي الى متى يبقى يدافع
عني!
فزيت على صوت غنية بيها معنى مديت أيدي
كتمت الصوت التفت
نسر : ليش؟
سكتت لحظة وماعرف شلون اجتني الجرأة وكلت
بدون ماارفع راسي له
وردة : لا تحبني
