رواية ذاري النجوم الفصل الواحد العشرون بقلم زهراء السراي
:
وفُتنتُ بمَاذا سأكتُبُ يا تُرىٰ؟
وأنا عليكَ من الحُروفِ غَيورُ
ليكن سُكوتي في هواكَ طَريقَتي
فالشعرُ فيكَ وإن علا مبتورُ
:
:
:
:
:
:
:
:
:
:
:
ليل
✥━━━༺✦༻━━━✥
ومن بين الوجوه القريبة
لم اغرم الا بأبعدها
رحلة الحياة غريبة
كلها عبارة عن انتقالات
انتقال من رحم الام للدنيا
ومن حضن الام لأول خطوات
ولسنوات العمر الاولى
من الابتدائية للمتوسطة
والاعدادية من امتحان لأمتحان
لحد متحصل حلمك وتظن خلص
السعي بس طلع العكس
السعي بالحياة مستمر
انتهت أيام اقامتي چنت
منتظرة هالشي بفارغ الصبر حتى
اتفرغ لنفسي شوية واشوف
حياتي واعيش ايام خطوبتي ويه هاجس
براحة بس الصار الاتصال اللي
خله قناعتي اهتزت
بيوم اللي اتصلت بي وطلعتلي روان
اتصلت بيومها وانرفعت السماعة
-صباح الخير حبيبي
رد صوت بنية وگالت
-هلو ليل عمو بالحمام دايغسل
هاي راح انطي المنشفة وأگله يرجع
يتصل بيچ
بلعت ريگي وعرفتها روان
غلقت الخط وصابتني قشعريرة
وشعور مو حلو
غلقت الاتصال وطول الطريق ماببالي
غير شي واحد
من الصبح يمهم ليش
وليش بالحمام أساسا
شغلت نفسي بالشغل فهاي
اخر خمس أيام من دوامي واقامتي
طول النهار هلكت بالشغل حتى ابعد
تفكيري عن اللي سمعته بس مااگدر
اتصل بيه الظهر مارديت
توصل الرسائل ماافتحها
لحد مخلصت خفارتي ورجعت
للبيت غلقت الجهاز ونمت
اليوم كله وثاني يوم رحت
للدوام كذلك مغلق
ومرت ثلث أيام هو غايب
باليوم الرابع بديت رحلة جديدة
خلصت ذيچ السنين اللي چانت عبالك دهر
بين ركضة الممرات وريحة المعقمات وسهر الخفارات اللي ميخلص
اليوم واگفة گبال جبل من الأوراق
مو تقارير طبية هالمرة لا هاي المعاملة
اللي تعلن نهاية إقامتي وبداية مشوار القرى والتنسيب
بديت هالرحلة ببراءة الذمة لازم أثبت لكل قسم إني ما بگت سماعة ولا نسيت ميزان ضغط
من المذخر للإدارة
ومن الإدارة للذاتية
توقيع ورا توقيع
وختم يلحگ ختم
وكل موظف يشوف ورقتي يبتسم ذيچ الابتسامة اللي تگول خلصتي يا دكتوررة
الله يعينچ على اللي الجاي
استنساخ ملون فايل أخضر
صور حديثة ويا ريت لو ملامحي بيها مو تعبانة من السهر والتفكير باللي سمعته
من اتصلت بي وطلعتلي هايه
مضطرة اكمل أراجع منا ومنا
أتخيل وين راح أحط رحالي هالمرة
باليوم الأخير اجتمعنا اني
ونوح ويمنى واخيرا بعد شهور
من الخفارات المختلفة
مجتمعين بغرفة الاستراحة
وكل واحد يحچي شي مر
علي
واني الكل اجه ببالي بس
اكثر اثنين تأثرت بيهم
نور اللي انقتلت ظلم
وأيمان اللي بعد سنين
انتظار للطفل مات زوجها
وحملت بيدها طفل من صلبه
يذكرها بي
وغيرها وغيرها من السوالف
واحنه نحچي دگ تلفون نوح
-هلا هاجس هااااا اي موجودة
دفعلي التلفون وهمس
-هاجس يگول تلفونها مغلق
اخذته وهم گامو رديت بدون نفس
-الو
اجاني صوووته عصبي ويصيح
-النعااااااااال ليش مغلق
-عدل اسلوبك رجاءاً
-لا تطلعين روحي خمس أيام
الجهاز مغلق والرسائل تنفتح بلا
رد
خمس أيام كلت انطيها مجال
تعبانة ضايجة مشغولة
بس من ادري بيچ عايشة
طبيعي وكأن ماكوووو قندرة
منتظرج هناااا لازم احچي
-اسأل نفسك
-الغي بلا الغاااااز
-راح ارجع التلفون لنوح
-فتحي جهازچ خل افتهم
-اعتذر ماافتحه
-اذا انت بنت أبوچ ابقي
بمكانچ وشوفي
-خفت
گلتها بأستهزاء وغلقت الخط
ورجعت التلفون لنوح نص
ساعة اشتغل واجاني نوح
-اجاچ مدري شبي
يگول خل تنزل اخذتلها اجازة
-ماااااروح
اجاني صوته عبر التلفون ونوح
اشرلي
-روووحي يمعودة
-اذا مااجت اصعد هسه والله
سد الخط نوح وباوعلي
-ليل انت ذكية ومرتبة ومتتصرفين
تصرف بدون ماصاير شي
لذلك نزل تفاهمو احسن
-بس……
-انزلي بعد اخوچ
رحت للغرفة عدلت ملابسي
باوعت للشال فتحته وشمرته
عادي وهالنقطة تضوووجه
نزلت للگراج لگيته بباب سيارته
واگف أستعداد وجگارته بحلگه
شافني شمرها بالگاع داس عليها
وفتح الباب اليه
صعدت وهو صعد قفل السيارة
وطلع گبل لا كلام ولا سلام
يمشي ودگ تلفونه
وگف السيارة من دگ التلفون
باكثر من مرة فتح الخط عصبي
-الووووووو
سكت يسمع الطرف الثاني
والصوت واضح
-عمووو تعالي
-شبيج عمو
-الاستاذ طردني من القاعة الامتحانية
-لييييش
-يگلي غش لأن شاف السماعة
گامت تبچي بحرگة وهو
استغفر وكاللها جاي غلق الخط
وباوعلي فتحت باب السيارة
-ويييييين
-كمل مشوارك
-امشي وياي للجامعة
وبعدين نحچي
-روحلها دموعها غالييييية
-شبيييييچ بابا
-لتصيييييح
-ليش متاخذيلچ راشدي مووووو احسن
قفل السيارة وحرك للجامعة
وطول الطريق هي تتصل لحد موصلنا
باوعلي
-الكائناااااااات ضمييييها
الشااااال لفي عدل
عدل لفيييييييي الشااااااال
عدلته شويه واشرلي
-تفضلي
اشرلي وكل شويه مباوعلي خاف طالع
شعري
اتصل بيها ودخلنا القسم كالتله بالعمادة
دخلنا وشفتها واگفة بس وجهها منتهي
من البچي وعيونها وارمة
-عموووو يردون يرسبوني
حتى ميخلوني ادافع عن نفسي
دخلنا المكتب وهي ويانه
الاستاذ موجود اول مشاف هاجس
سلم هو رد السلام
ورجع يباوع لملف گدامه
-حضرتك موضوعها منتهي راسبة السنة
-اول شي من الواجب واصوليا
عينك تكون بعين المتكلم
شي ثاني شنوو مذنبينها وموكفيها بباب
المكتب
-هي متختلف عن احد وحضرتك مو
معناها اهلها بمؤسسة عسكرية وتجيبهم
ونخاف
-اووووول شي تختلف هوووووايه
هم
-بشنو تختلف
-لو حضراتكم عدكم ادنى حس
بالمقابل چان سالتوها
-السماعة بأذنها ولازالت للعلم
وواضحة من خلال حجابها
هاجس ضرب عالمكتب
باوع لروان
-عمو رفعي حجابچ
-عمو فدوة
-شفت بعينك رافضة حتى تطلعها وتسلمها
-روووووان رفعي حجابچ بابا
وگعت دموعها ونزلت راسها
ورفعت الحجاب ووگعت عيني
عالسماعة وميزتها
سماعة لضعاف السمع
-كدامك دكتورة تشرحلك الوضع
وكفت بصف روان نزلت حجابها
ورديت
-سماعة اذن لضعاف السمع
اللي العصب السمعي متضرر
عدهم
روان انطينياها
خلتها بيدي وشوفتها للأستاذ
وشرحتله عنها
وگف هاجس واشرلها
-الامتحان يعتبر مؤجل الها
والموضوع ميعدي بدووون
مااوصلة للعميد خجلتوها
وجرجرتوها بين زملائها على
شي مو بيدها
-الموضوع محلول حضرتك
تدخل تكمل امتحانها
-لا امتحانها تكمله بعد ماتوضح
الجامعة الموضوع كدام القاعة
نفسها اللي تفشلت گدامهم
يلا بابا
طلعنا وهي تبچي دخلنا السيارة
التفتتلها
-عليمن البچي يعتذرولچ وهم
الممنونين
-بس اني مردت احد يعرف
-شنو بابا عليمن ممسوين شي
موزين هي حالة طبية
حالها حال الحالات الباقية
مماثرة اصلا عليچ
مشى بالسيارة وصلها
ورجع بينه ماشي
-صفيتلچ هسه احچي شصاير
-جيد زين من صفيتلي بعد
خمس أيام
-لييييييل
-ويعني من صحت بأسمي حيييل
راح اخاف
وگف ومسح وجهه متعصب
-حبيبتي عيووني شبيچ
چان يرص الحرف رص ويحچي
طالعة روحه
-هو سؤاااال واحد
-اي وهوووو
-يوم الخميس لييييش
من الصبح رووووان تجاوب على تلفونك
صفن بوجهي ورد مستنكر
-تلفوني اني
-اييييييييييييي
-صووووتچ لا اطيح حظچ
فتحت باب السيارة منفتح مقفول
-ويييييين
-اذا تبقى بهذا اسلوبك انززززل والله
-فهميني
-تمام
هديت نفسي وخليت عيني بعينه
-يوم الخميس الصبح اتصلت بيك
وردت علية روان
-وشگالت متمدد بحضنها
لو نسبح سويه
-افتتتتتح الباب افتتتتتحه ارررريد
اوووولي
لزم ايديه يهديني
-احچي خل افتهم
-تمام شعندك بحمامهم
-ياااااحمام بابا
-اووووول شي لتگلي بابا
كافي عليك روووان تگللها بابا
-اييييي بالله وثاني شي
-ثاني شي اتصلت گتلك الو حبيبي ……
ابتسم وقاطعني
-گلتي الووو حبيبي
-اي وهي ردت ……
رجع قاطعني
-بالله شلون گلتيلها
-الوو حبيبي ……
-بعد نجوووومه
صفنت بوجها گاعد يغازل واني
گلبي نااااار رديت متعصبة
-لتغييير المووووضوع
-كملي حبيبتيييي
كالها ضاحك
-اسمع هاااااجس لتسخف الموضوع
البنية كالتها بلهجة متلاعبة تتنعوص
عمووو بالحمام هسه انطي المنشفة
واگله من يطلع يتصل بيچ
يعنيييييي حسستني انتم عرسان
وهي منتظرتك بباب الحمام
استغرب ورجع سالني
-هي هيچ گالتلج
-وداعة بيبي
-تحلفين بعذبة القرچ
خزرته وهو كمل
-نفسسسر شي شي تمام
هزيت راسي
-اول شي الخميس اتفقت وياهم
رحنه زرنه النجف وزارت ابووووها
-وهاي هم نقطة نرجعلها
-سمعي لچ وثاني شي عمتها
جابتلي كوب جاي واني بالباب
من خلته بيدي انگلب عليه
فتت للگراج هااااا للحمام
بباب الگراج وشفتي من رحنالهم
تلفوني چان بيدي خليته عالرف
وغسلت نسيته وطلعت هو والسويچ
واحتمال ردت عليچ من طلعولي وجابته
بطريقها
-مشفت مكالمتي يعني
استغرب ورجع للسجل
ماكو مكالمة مني بوقتها صدگ گلبي
لعب
-يعنيييييي حاذفة المكالمة
-لا شنو القضية
-حاااااذفتها والله
وشي ثاني هي صدك جابتلك
منشفة
-اي بس بالباب بره اني
گلتلها مااحتاجها ورجعت طلعت
هي وعمتها جابت بيدها التلفون والسويچ
لأن ماردت ادخل كراجهم مرة
ثانية
-شتفسر تصرفاتها
-خطأ غير مقصود منها
-زين رجعني للمستشفى هاي هي
-زعلانة خمس أيام علمود هاي
-ليش هالتصررررف حلووو
-لا اكيد بس لتخلي بخانة الغيرة
شفتيها بعينچ بنية مكسورة
وينها ووين هالسوالف
-تمام هاي هي
-تمام
گالها وطلع بيه للمستشفى
اخذت اغراضي
وطلعت للبيت فتحت جهازي
ومهتميت نشرت الاذكار دائما
انشرها
وتفاعلت ويه منشور نوح ويمنى
على ايام التدرج الجاية والتعب
المحتمل وتركت الموضوع مثل مگال
بالليل اتصل بيه وكأن شيئا لم يكن
-ها حب
-شلونك
-زين يعني من الواجب
ان تتصلين بما انج گاطعة
ذيچ الأيام
-عندي اسبابي
-تمام اخذي راحتچ
غلقه قبل ماارد وتركني
لمدة أسبوع ابد مادز شي
لحد ماعصرية نايمة وماما گعدتني
-زوجج بررررره غيري ملابسچ
وطلعي
باوعت بالمراية بيبي ضافرتلي
ضفيرتين مالي خلگ حتى افتحهن
تراكي نصين التيشرت سمائي البيجاما وردي
مال غير تراك
غسلت وجهي رشيت عطر وطلعت
دخلت للصالة ماما لاگتني بيدها
صينية ضيافة انصدمت
وخزرتني وهي فايته غلطت عليه
-ياطايحة الحظ هو هذا منظر
سلمت وهو ضحك
-روووحي حبابة صيحي مرتي
گعدت مسافة عنه
-شبيچ
گالها وتقربلي
-مابيه شي
-مستحيل انتِ لسانچ مستحيل
يسكت عاتبي عالاقل حتى اعرف
السبب ولتگليلي من كل عقلچ مسألة روان
خلتچ غاضبة لهالدرجة
-تمام مدامك تركتني لدماغي
يفسر ويصور اللي فهمته واستكثرت علية التبرير
فآني من حقي استكثر عليك العتاب
-ااااااخ بنص الگلب بسمارك
-هذا واقع مو بسمار
گام من مكانه گعد بصفي
سحبني من ضفيرتي سندني
غصبا عني على كتفه واتصل بروان
بثانية فتحت الخط
-عمو شلونك
-روانة بابا
هو گال هيچ واني لگطته بعضة
من زنده بكل قوتي
ضحك وقدملي كفه اعضه
وماگلت لا هم عضيته كمل كلام
-بابا قبل كم يوم من اجيت
اخذكم تزورون متصلة بين مرتي
وانت مجاوبة
-هاااا عمو
-ردي عمو وفسريلي الصار
-عمو اسفة بس شفت التلفون يدگ
ورديت ماگلت شي والله
-ادري عمو بس هالتصرف غلططط وخصوصا
حاذفة المكالمة
-ها مو استحيت منك لأن رديت
خفت تفهمني غلط
-تمام الله وياچ
غلق الاتصال واني بعدني
ملزمة بكفه عاضته
-يحتاج القحچ
بعدت اسناني عن كفه وهو رجع
خصل گذلتي
-ما تهنيت ١٠ ايام بهالخطووووبة
گضن زعل بزعل
سكتت وسويت نفسي البريئة المظلومة
أباوع للگاع وما أحچي
-ماتحچين لو لسانچ اكلة البزون
-اغييير ملابسي وارجعلك
وگفت ردت أنهزم من نظراته
بس ملحگت انسحلت من تيشيرتي وانجريت لحضنه بقوة
-وين مولية
وگف يباوعلي من فوگ
ابتسمت بوجهه بلكي أكسر حدة الموقف وأنهزم
من ايده
-اكشخلك
-لا هيچ حلووو حبيت
التنسيق
-هاجس
-انچبي
تقرب لوجهي نفخ علي طير شعري
-زعلانة
-اييييي
جعص وجهي حيل بين ايدي
-الزعل ميلوگ لهالچهرة
گالها وخطف بوسة سريعة مني
خبص بيها شعري وابتعد
سحبني وگعدنا لازم كفوفي
- أني أدري بنفسي نحس أحياناً
-دائما
-دائما هاي هي بس اسلوب السكوت
بطلي ماااااحبه
عاتبي واحچي اذا اكو غلط
وهسه بعدچ زعلانة
-بعدني لأن إنت ما اعتذرت
بس تريد تخطف رضاي خطف
- هاچ اعتذار رسمي يابه
آسف ويلا غيري ملابسچ نطلع
-مااااريد
-شنو بعدچ زعلانة تردين نعيد الصلح مرة ثانية
فهمت تلميحه السخيف ووگفت
-گول لبابا
-تمام غيري ملابسچ
دخلت غرفتي غيرت ملابسي وطلعت
هو مستأذن من ماما واني هم استاذنت
وطلعنا
هاجس طبيعته ويا احبابه صح اسلوبه
خشن بس تجي اوقات حنين ودافي
وهالشي عرفته من مراعاته
لجده وحتى لروان رغم اني حاسة
بي يعرفها مو مريحة بس لخاطر
صديقه
وكالمعتاد نزل جاب ورد برتقالي
-تفضل حب
-شكرررا
-جدي يريد يشوفچ
-ببيتكم
-اي
-بس مگايله لبابا
-شنو القضية غير وياي طالعة
-تمام بس اتصل بي
هو بعده بره السيارة أتصل ورجع
صعد وطلع للبيت
قبل لننزل جددت العطر
ونزل هو فتح الباب واشرلي
-تفضلي ياحلوة
دخلت وهو ويايه حاوط اكتافي بيدة
-عيييب هاجس
-اسكتي
وصلنا للباب اللي يودي لداخل البيت
طلع مفتاح فتحه
-ليش مفتااااح شنو محد هنااااااا
كبسني كبس مخلاني اتحرك وفتح الباب
ودخلني گوه البيت ظلام
-شنووووو هااااااي رجعنيييييي
فتح الاضوية وباوعلي
ببرود
-هسه ارجعچ
وگفت مكتفة ايديه
-لييييش محد بالبيت
-كلهم راحوووو للگاع يغيرون جوووو
-وشلوووون تجيبني لووووحدنا
واساساً ليش جايبني
تقدملي خله وجهه بوجهي
وهمس
-حتى اغتصبچ
قدمت وجهي اله وصرنا عين بعين
-ليش مااني أسويها
صفن بوجهي مصدوم
دفعته ورحت للقنفات گعدت
دار وجهه واجاني بسرعة نزل
نفسه لمستوايه
-من اگوووول قرچ تزعلين
ابتسمت وسحبته گعد بصفي
-اول شي غلط جيتنا ليجاي
ماحبيت الحركة وثاني
شي نعساااانة ومطفية شراح تستفاد
مني
- اولا غلط غلط عااااادي مو مهم
المهم يمي
وثانياااااااا ناااااامي ياريت تنامين
عندي الچ افكار ماتخطر
على بال أبليس
هزيت ايدي واخذت زنده
انسندت علي
-سخيف وهمجي
-حييييييل همجي
منروح للغرفة تجربيني
عضيته وهو ضحك
-تلقيييييح
نزل راسه باس راسي
وايده سحبت الحجاب
والكاب اللي جبرني البسه
حتى مااطلع شعري
-لتفتح الحجاااااب شيلفه
-فتحي شعرچ بنت ال……………
-لتغلطططططططط
-حلاتها بالغلط
مد ايده لضفيرتي فتحها
ويمشط بخصلاتها
-ماكو حنة هالمرة
-ممخلية صار فترة متنغسل تشلع
الگلب
اني احچي عبالي محترم
وايده تسللت لخصري مثل الحية
بهدوء ويسولف
-تررررى ايدك تجاوزت حدها
-وحلگي هم يرررريد يتجاوووووز حده
-ههههههههههههه ماااعرف استحي
من هالحچي لو أنهزم
لأنك فاااااااسد
التفت بسرعة سحبني لحضنه ورفعني صرت
بين ايدي
-لييييش تنهزمين تفوسدي وياي
ابتسمت لسخافه وعيونه اللي تتابع ملامحي
تلمست مكان لحيته وشواربه العالية
-شكلك يطلع يجنن باللحية
-والشارب ماعاجبچ
-يجنن بس فكرررة اللحية
عليك حلوووة اكيد
وگف وتمسكت بي لا اوگع
-ويييييين
-اشوفچ صوري باللحية
مشى بيه بباب غرفتة وگفته
-وييييين
-انچبي اشوفچ الصور
-نزلني لعد
-هم انچبي
ولاواهتم فتح الباب وخلاني عالكرسي
بجانب ميز المرايا وراح يدعفس
بالكنتور طلع صندوگ چبير
خلا عالميز وگعد بصفي عالطابورية
وطلع الالبومات تساقطت الصور
منها للگاع سحبني واخذ الصندوگ بيده
-نزلي هنا صووور بالمئات
خل اشوفچ
نزلت للگاع تضايقت
من شعري لفيته ورفعته
ماكو شي يمي بجيب قميصة قلم
سحبته ودسيته بالكباية اللي سويتها
ثبت شعري وهو تاه بوجهي
-هالحركة اااااخ
-فساد كافي طلعلي الصور
فتح الالبومات مالته
-هاي صور المعهد
اباوع چان بعده صغير ولحية ناعمة
مزينة وجها
بديت اتصفح بالصور يشرحلي
اغلب الصور هو وابو روان
وابو صعبة
-هاي انتم من زمان اصدقاء
-من المتوسطة
-يعني اتفقتو تدخلون عسكرية سويه
-اكييييد
-بس ابو روان چبير مبين اكبر منكم
-صحيح سالفته طووويلة بعدين احچيلچياها
يشرحلي هنا وهنا وگعت عيني
على صورته ويه بنية تجنن
-هاي شنو
-هاي صاكة المعهد
-وانت اكيد مأدي دور العاشق وياها
-حبيبتي هاي المعهد كله عاشقها
باوعتله صفح وهو يطلع البوم
ثاني
صور عائلية شفت صور
لأمه وطن بي من ملامحها حنطية حلوووة
وصور لعماته بشبابهم ولبيبيته
-حلوة بيبيتك
-اييييي الله يرحمها گدرت
توگع جدي وخطفته من بيبتج العرمة
-اممممم صح
نتصفح وصور قديمة وجديدة
وگعت عيني على صورة صغيرة رفعتها
-هاي ……
-عذبة العرمة اييييييي شوفي
التشابه انت وياها نفس البچم
-ليكون مو عاجبك
-عاجبني حتى لو مدعوم ومصلح الف مرة
-راح اخذها
-تخص جدي مااگدر اتصرف بيها
-زين عادي اصورها
طلعت تلفوني صورتها
وكمل باقي الصور رفعتهن رتبتهن
بالصندوگ ووگفت
-شووووو نحاسة فول
-گولي حب
-عطشانة
اشر على حلگة بخبث
-تعاي شربي
-شيريد مي السبيل
كفخني وفتنه اني ويا للمطبخ
شربت مي طلع فاگهة
ورجعنا
-للغرفة ماارجع امشي للهول
-تركي الهول والبيت وتعاي
بجيبه مفتاحه طلع للترك فتح الباب
ودخل عالمشتمل اكو مفرش عالحبل سحبه
ودخل فتح اقفال البيت
فاررررغ مابي اثاث خله الفاكهة والمفرش عالشباك
وحاوطني بين ادي ومشى بيه
فتح باب الغرفة
-هاي غرفة النوم
اوووو مسرح الاحداث
بعكس ايدي ضربته على بطنه
-تأدب
دخلنا واسعة وحلوة سند فكه
على كتفي نازل لمستوايا
-شيعجبج خشب عراقي ايطالي
تركي
-اي شي مرتب
-ماكو اي شي اليعجبج
-غرفة اوف وايت
-تم
-ومراااااايات هووووايه
-النرجسية والغرور عاليييه عند
حضرتچ
-لزمت خدوده بيدي
-حتى نوگف ناخذ صور اني وياك
عليهن
-ااااخ يابه
مشينه صالة صغيرة
-وهاي الصالة شتحبين تسويها
-تخم بسيط نازك قهوائي وبردات
تول ونخلي شاشة بالركن
طلعنا للهول
-والهول
-اريدة داااافي يلمنا من نجتمع
-احنة ومنو
-احنا واطفالنا
ضحك وعض كتفي
-تردين اطفال
-ايييييي اربعة
-يااااابه هالگد
-اي وبنات
-لييييش
-معايشة شعور الاخوات
أريد اعيييشه ويه بناتي
-اقترح اقتراح
جاوبته عبالي صدگ يقترح شي
لفني صرنا وجه بوجه ولزم وجهي
بجدية
-شنو اقتراحك
-الوقت يركض ركض خل نبلش
بأول طفل هسه هنا والثلاثة للمستقبل
-ليش لا يلا
طكهة ضحكة واني اخلي ورايه وامشي
للمفرش فرشته بالهول نزلت صحن
الفاكهة وگعدت
گعد بصفي جاعصني
ورجع مدد راسه على رجليه ورافعة
يباوعلي
-خططي شتحبين اسويلج هنا
-هناك بالزاوية اريد موقد نار
وهنا هذا الحايط يتغلف بخشب دافي
والقنفات ناعمة تتحول لسرير من نتفرج
عالتلفزيون
-امووووووت عالسررررررررير
كرصتة من رگبته باوعلي
-بووووسي الأووووووا
ضحكت ونگرته كلة خفيفة
-اريد الارضية خشبية
-وهييييچ يتفلس الرجاااااال
خليت فراولاية بحلگه
-الزوووواج مكلف تعب نفسك
حبيبي
-اتعب حتى ابوووووي
عيديها بالله
-حبيبي ليش مستغرب
-اني گلت هالكلبة ماتطلع منها هالكلمة
وابقى احلم بيها
-بغض النظر عن الغلط بس
ليش ترى اني طبيعتي شاعرية
-شو الشاعرية ماشفت منها شي
ابددددددد بس عرك
نزلت راسي بست خده ووگع شعري حوالينه
غمض عيونه ذب نفس مرتاح
رفعت راسي وايده تلعب بخصلات شعري
-عندي شي اريدچ تشوفينه
طلع تلفونه وفتحه لمعرض الصور
خلا بيدي
صور تقريبا عشرة اثناء
فترة مرضه
اغلبهم واني مشغولة بعلاجه
ماخذهم الي ووحدة لظهري طالعة ضفيرتي
من الشال
-هنا چنت حاير اكره لسانچ الطويل
لو احب چهرتچ
-وشصار
-صرت استفزچ حتى نسوووولف وقت
اطول حتى لو نتعارك
-احچيلك سر
-اممممم
-چنت انتظر رسائلك الحقيييرة
حتى اتعارك وياك واستفزك
-چان كره متبادل
-جدا
ضحك وگعد صار گبالي
-من خابرني نوح وگال تعال للگاع
بيوم سفرتكم گلت راح الگاها فد وحدة
داگة الحاجب والمكياج
-لا بالله وشنو سبب هالتخيل
-لأن گالو بنات ذيچ الصفحة برابيگ
-خلف الله عليكم
-انچبي المهم شو من اجيتي
صفنت گلت هسه هاي واحد يبوسها
ويحطها على گصتة لو
يتعارك وياها
-حتى حقدك سخيف وفاسد
-اووووويلي ومن اجيت گتلچ اريد
چاي فصلتچ تفصال
-منحررررف طبعا
-المهم وگعتي بالفخ
تقربتله وهمست يم اذنه
-ليش مااااكون اني سحرتك
والفخ اللي تظن نفسك وگعتني بي
اني اللي ناصبته
-ماااظن
-ليش
-من طلعت من المستشفى
بعد العملية احچي بيچ ومتعصب
جدي گالي
-انت عاشگ وماتدري بروحك
ابتسمت
-يعني عاشگ انت وهيچ لسانك
ويايه لو موو عاشگ شتسوي
همس كلمة سخيفة باذني
واني ضربته حيل على صدره
وجهه بهت وخله ايده على
گلبه وانحنى
-هاااااااااجس شبيك
-بس………
ماكمل كلامه تمدد بالگاع يحاول ينظم
انفاسه
-شبييييك بس گلي
اشر على بلعومه
نزلت افحص نبضه عبالي خفقان
جان يهمس
-محتاج جرررررعة تنفس بووووسيني
گعدت عدل واني اغلي
-والله العظيم عبالي بيك شييييي
گلت معقولة ضربتي هيچ أذته
گعد يضحك ولزم كفوفي
-حني شووووويه
-شحن وانت هبطتني
وگفت اعدل شعري
-تأخرنا
طلعنا من المشتمل
للبيت جابلي حجابي
على المراية اريد اسوي
حاوطني
-اخذيلنا صووووورة
خله راسه سنده على كتفي
وابتسم اخذت الصورة
وابتعدت
عدلت الحجاب وطلعنا بالگراج وانفتح
الباب تفاجئت بأم يمنى وجه بوجه بيدها
صينية اكل
-هلاااا عمة
تقدمتله باسها
-شلونج خالة
-هلا بيج
ردت وانطته الصينية
-ادري بيك وحدك سويت الاكل گلت اخلي
الك بالمطبخ شوكت مترجع تاكل
اخذه واشرلي
-دقيقة راجعلچ
راح وهي رافعتلي حاجبها
-خالة ترى لاحگين عالختلات
صفنت على وقاحتها ردت ارد وهي كملت بحقارة
-ترة الرجال من ياخذ اليريده من المرة يبرد
سألي بيبيتچ
طلع هاجس واني انلجم لساني ماعرفت
شرد سألته قبل لنطلع
-يمتى تتزوجون امي
-متفقين عمة اني وياها تخلص
سنة التنسيب يلا
-ها عبالي هسع گلت مايصير اثنينكم
انت واخوك نفس العرس تصيبكم العين
-لا خليهم يتزوجون شنو متوازين
طلعنا هي راحت واحنه طلعنا بالسيارة
شگد ماتونست بالسوالف ويه
هاجس فرحتي انكسرت بسبب
كلامها السم وصلني للبيت
وراح مااعرف احس الحچاية هوووايه
جرحتني
بس ماااگدر اگول شي او اشتكي
وزحمة من هاجس يگول تتعارك
بالليل اتصل بيه بس عصبي
اريد افهم شبي ماكو
-شبيك حتى سلامك صياح
-انتِ وعمتي شدار بينكم من
حديث
-ماحچينه شي
-ليل سؤال وردي علي
-ليش وصلك شي
-اي والله وصلي
-احچي حتى اعرف ارد
-مارديتي بساعتها لا لسانچ
بس ويه هاجس يرش رش
انصدمت بكلامه وكمل
-لييييش مارديتي
-مفهمت هسه غير توضحلي
-من گايلتلچ لاحگين عالختلات
مارديتي
-شرد كلامها عيب شگوللها مثلا
-مثلا گليلها رجلي
ماخاتلة ويه غرررريب
اشوووفچ وجهچ انعصر وتغير بطريق
الرجعة
شوفي ليل خل اگلچ شي عماتي وكحات
رغم احبهن بس وكحاااات ويرادلهن واحد
لسان بلسان فلا تتفاهين وتنوكلين فهمتي
-صدمتني معرفت شگول
-سدمتچ لا قيمنا بابا شبيييييچ
-هسه انت فهمني منين عرفت
-غير هي تتفاخر وذبت كلمتها گدام
جدي
شوووف الحقيرة حجت بس هالكلمة
اللي گالته بعدين بخصوص بيبي
مگالته
-ميخالف خليها قابل جدو ميعرفك شنو
-هنا المشكلة
-شكووو
-جدي گاللها ابني ساقط بس البنية مؤدبة
ضحكت وهو رد براحة
-هالسوالف اريدج انت تتولين امرها لتنتظريني
ارد سوالف النسوان ماادخل نفسي بيها
-شنو شوو جاي تخوفني الظاهر
ام يمنى راح تفتحلي جبهة
-خل يولون شنو شعندچ باچر
-ماعندي شي
-نعقد محكمة
-غير تبلغ بابا
-راح اخلي الوالد يتصل بي
شگد عندچ عطلة
-ماعندي بس هاليومين دزولنا گالو التنسيب
من الوزارة يطول تبقون بالمستشفى الى
ان يجي الامر الاداري
-تمام جهزي نفسچ لباچر
-ان شاء الله
-شرعاً وقانوناً صرتي تخصيني
ابووووچ احرگه منا وهيچ
-لتغلط
-ردي الغلط يلا
-مااااا عيب اغلط على عمو
-يلا افوسدچ عالمستقبل
-ماااااريد
-اگلج اني رجل عسكررررررري روحي
الفسااااااد
-يعني البسلك لمع وجلد النمر
وادگلك حواجبي تاتو
-ااااااخ والمشبك لاتنسينه اهم شي
-ذوووووووق همجي
ضحك عليه وودعني
ومنها اكتشفت ان قرب عمات من بيتهم
راح يسبب هوااايه مواقف
وعقبات للمستقبل
تبلغ بابا بالموعد وثاني يوم
الصبح ماما اصرت البس لون فاتح
لبست سترة اوف وايت وبنطرون جوزي
ورتبت حجابي وطلعنا
وبين جيب وودي وتحاليل وسوالف
وتم العقد طلعنا ايدن بيدي مرتاح
ومترهي
-هسه لو ابوچ اسمطه محد يگلي
لا
-لا بالله
-ليش مانقرب المووووعد
-والله نتبهذل هاجس
منرتاح اكضي يومي بالطريق
ومااشوفك بس وقت النوم
-هوووو وقت النوم المهم
-هااااااجس
-بعد نجوووومه
-شوووو حبيييييت تعال ابوسك
-امششششينه لبيتي
-ههههههههه فرح ابو نجوم
-لا تصيرين جبانة
-غدييييني
-مو گتلچ نزاكتج ماراهمة ويه
الثرررريد التضربينه
-عايشة بين ولد شتتوقع
-الزلم الخشششنة اكيد
طلعنا للسيارة موسيقى
وفرحة وضحكات وسوالف
تغدينا ورجعنا للبيت سلم على بيبي
وماما وطلع
بعد يومين بابا اجه من المجمع بالليل
وبلغ ماما ان بيت اهل هاجس
عازمينة عالغدة وهالشي من تقاليدهم
يعزمون بعد العقد العروس
واهلها ماما مقبلت تروح وگالت ان
اسلوب العمات چان محلو بالخطوبة
بس بيبي وكفتلها
-تلبسين وتكشخين ونرووووح
شني ولچ مكسورة عينچ منهن
-يممممه تعرفين اسلوبهن وتصرفاتهن
-شني يمه وامچ وين راحت
باچر نرووووح ولا تحچين گدام
سلطان شي عيييب
-لا محچيت شي
وصدگ ثاني يوم ماما بعباية
اسلامية انيقة وحجابها
وبيبي بثوبها النازك الأسود
وفوطتها صاحتلي
-ليلة
-ها حبيبتي
-طلعيلي چلابي اليمچ
-البي شذر ازرگ
-اييييي ومحبسي الازرگ
-ههههههههه بيبي بعد عوزچ
تعلگين ام سبع عيون
-لو بيدي اسويها
جبتهن الها لبست الچلاب بالفوطة
ورشت العطر يربي كيكة مو مرة
-هاچ المحبس لبسي انتِ
لبسته ولبست قفطان مرتب
عسلي مطرز بفخامة
وبابا لبس دشداشته
وتأنق وطلعنا بالسيارة
وصلنا على صوت السيارة طلع
هاجس وابو
سلمنا ودخلنا صارت بوجهي
ام يمنى واختها ميعاد وزوجة ابو
هاجس سلمت ينطن خدهن
صافحن ماما ماعدى زوجة ابوهم
سلمت
وصلن لبيبي رادن يصافحنها
واجه صوت جدو
-سلمن على عمتچن
باوسن بيبي مرغمات وتوجهنا
للصالة مجهزين طاولات عليها عصير
وضيافة يمنى واخواتها احب لمتهن
وبنات ميعاد كذلك سلام وسوالف
وطن ماكو شويه واجتني رسالة
منه فتحتها
-اطفري للگراج ظلام
-وينك عراق شو ماكو
-دتعاي
اشرت ليمنى اجت وياي
طلعنا للگراج وهي دخلت گعدت يمه
على حافة سياج الحديقة
-ها وطن قلقتني
-شوفي
اشرلي عالشاشة رسالة طويلة
من غيد وكلام بينه وبينها
ناهيته بأنها متحب جو العلاقات
وتشوف نفسها مسويه غلط
باوعتله
-وطن احجي الصراحة
تحبها
-اعجاب واشوفها مناسبة
اليه
-من اي ناحية
صفن بوجهي
-وطن شتعتقد نهاية
اللي جاي تسوي
مسح وجها ورد
-اريد اخطبها
ابتسمت ممصدگة
-الله عليك
-والله دخلنا السنة الثالثة ليل
مااعتقد موجودة وعايشة واني
هم اعيش لازم
-وطننننن اذا مفكر تنسى گلزهار بغيد فاني
من يمي مااقبل
-لا لا مو هيج بس هاي هي الحياة تستمر
وغيد مناسبة من كل الجهات
-توكل لعد
-هيج تشوفين
-ان شاء الله
اجة هاجس لزم وطن من ياخته
-شترررريد من مرتي
-شغلة سرررررية
غمز وطن وراح سألني هاجس
-احچي لچ
-ميصير
ضحك واحنه راجعين
-مسألة بت خالتچ
استشارني بيها ورجعلچ
-شتشوف انت
-اشوفه ونعم الاختيار
-فعلا والله غيد وررردة
-انعل ابوو غيد احچيلي
بالگذلة الطالعة
-هااااا
-وجعاااا شنو هالگذلة يوم تستسلم
ويوم لا مرة طالعة مرة مستحية ومضمومة
ابتسمت اضيع السالفة
-مو اجينه بسيارتنا محد شافني
-ووطن وونوح
والكائنات بالشارع
-بس هالمرة
صرنا بباب الصالة همسلي
-سماح هالمرة بس اخذ اجرة
-بعدين نتفق
-تعجبيني
ضحكت علي ودخلنا لگينه الحرب
الباردة قائمة وام يمنى تسولف
ويه بابا وهو يگللها
-الگاع خصبة وحلوة بالقرية
-صح گاعنا خصبة وحتى الوصلة اللي
انطاها ابويه لعمتي
بيبي عصاتها بيدها ساندة فكها عليها
باوعلها هاجس
-هاي الصفنة مو لله سمعي
وخرت العصى وگعدت عدل
-بالله عمة عذوووبة ……
-اسمي نهاد عمة
-لا يابعد عمتچ اسمچ عذبة
التفتت لجدو
-ابو كمال مو انت السميتها على اسمي
انا اخيتك
ضحك ورد عليها
-صح سميتها عذبة
رجعت ردت ام يمنى
-ومرحومة امي سمتني
على أسم خالتي نهاد
-ايييييي عمة كلمن يحود النار لخبزته
ابوچ رادچ على اسم اخته
وامچ رادتچ على اسم اختها
بس الجنسية هي التاكل وانت بالجنسية
عذبة
سكتت ام يمنى والجو توتر وبيبي ماسكتت
-ووصيلة الگاع التگولين ابوچ اطانياها
هذااااا شاهدي وياي
التفتت لجدو وسألته
- الگاع اطيتنياها لو
هي گاع اهلي
-گاعچ وحقچ
صاح عمو كمال
-يابه تفضلو شربو بارد السوالف
ماتخلص
گامت ام يمنى بس تنفث نار
بيبي اشرتلي ورحتلها
-ها حبيبتي
-الماعون الياكل منه رجلچ اكلي منه
-استحي بيبي شيگعدني يمه
-انا اگعدچ انچبي ولا تستحين
ربع ساعة والبنات مدو السفرة
وتوزع الاكل عالسفرة وسمى عمو كمال
بسم الله وانجمعنا بيبي متگدر تاكل بالگاع
وجدو وبابا هم خلولهم كل واحد طبلة
گدامه
هاجس صار بصف بيبي بس هي عالقنفة
گاعدة تاكل صاحت
-يمه ليلة تعاي بعد روحي گعدي هنا
بابا باوعلي من نظرته افتهمت ان هو
موافق گمت وصاحت ميعاد
-ليش تتضايقون تعاي يم البنات
هاجس اشرلي
-مكانچ تعاي
گمت يمه راد يجيب صحن
گتله
-ميحتاج اكل وياك
تقرب وهمس
-بنفس الخاااااشوگة
ضحكت وسكتت جابلي خاشوگة
وگعدنا ناكل بيبي تخاف من الملح
گالتلي
-ناوشيني نومية بيبي
انطيتها ليمونة عصرتها وتاكل
كالت ميعاد
-الاكل مو مالح عمة
-لا عمه مسوياته مالح ادري
بيچن حتى يغزر
سكتت وبيبي ولا كأنه قصفتهن
لحد مكملنا گمت ويه البنات اساعدهم
وصلنا الصحون للمطبخ ورجعت يم
اهلي هاجس يمنه وجابو الچاي
نشرب گعدت ام يمنى گبالنا بدت
تسولف ويه ماما وبابا
-اعذرونا عالتقصير
-ماقصرتو اكرمكم الله
-والله ياام ضرغام ذاك
اليوم استحيت من اجت ليل
ويه هاجس مالزمتها عالعشا
احس الدم تجمد بعروگي
وهاجس خزرها خزرة بس جدو
شكد عندة سرعة بديهة كمل بدالها
-صوچي اني البت راجعة للبيت
خابرت هاجس گتله جيبها شو
انا دايخ ونوح ومرته مو هنا
عاد عدنا دكتورة ثالثة بلكي تنفع
ضحك بابا ورد علي بشقة
-هاي اخذتو دكتورتنا وظلت
حجية عذبة وحيدة
بيبي ردت بنبرة كلها حب
-بنيتي هاي سنين عمرها كلها
جابتها نايمة بحضني
وعلي انا الربيتها واليرشها بماي
ارشة بنار
ردت ميعاد
-شنو عمة داخلين حرب
-لا عمة الجچاية لاتمسچ
شني قابل انتن تأذن بنية
ريحانة مثلا
ردت نهاد
-لا ياساتر ليش احنه عدنا هاجس
عزيز
-چاخوش عزن مريته على معزته
هاجس شافها حمت
دزلي رسالة
-سكتي عذبة ترى راح تقومها حرب
عالمية حتى العرس يخرب
-سكت عماااااتك الحبابات
-قصدچ العكس اكييييد
ضحك واشرلي اوگفيلي
بعد جر وعر وبسامير خلصت الگعدة
وعمو وبابا راحو للمشتمل يشوفونه
وماما وعمات هاجس وبيبي بالگراج
نهاد نطت
-شعجب تردين عزال وانت مرت الچبير
غير تلزمين البيت
اندارت ماما لمرت عمو كمال وردت بهدوء
واسلوب حلو
-البيت اله ام بيت لازمته ام وطن ممقصرة
مرت عمو كمال ردت
-يعز قدرچ حبيبتي البيت بيتهم
واني خطاره
-لا بعد امچ هم امهم انتِ مو اجيتيهم
والصغير هاگداته
جاوبتها بيبي ورجعت ماما ردت
-وليل يشهد الله متدري بشغلة
المشتمل وبعدين هم مو بعيد
بيت ببطن بيت
-امممم شنريد بس سعادتهم
سكتت ماما وبابا وعمو وهاجس
وجدو اجو بس
من اجو وياهم خبر وقرار صدمني
جدو سحبني گدامهم خلاني
جوه جنحه
-اگلچ جدو من اطلب طلب
ترديني
-لا جدو عيوني الك
-هالشهر نزوج نوح
والوراه انتم ياجدي ليش التأخير
وسنة كاملة
-بس جدووو……
-دسمعيني ياجدي خل نفرح بيكم
باوعت لبيبي هزت راسها وبأسلوبها الحلو
ردت
-سمعي كلمة جدچ ومادام ابوچ قابل
-هاي هي جدو التگولو انتم اني موافقة
بقو يسولفون وهاجس
ساكت عينه مني يدري مموافقة
هسه طلعنا ودعانهم ورجعنا
للبيت ماما عرفتني مموافقة
بس كلامها واضح مدام انطينا
كلمة انتهى الموضوع
بالليل دزيتله رسالة
-موجود
مارد عليه لنص الليل اتصل
-حبيبتي
-هاجس ليش تجبرني
-مموافقة لازم
-بس افهمني والله علمود
راحتنا
-ليش نفوت على نفسنا سنة
ياحبيبتي
-نگضي نهارنا بره
-نفس الشي من ترجعين هنا
فبما ان احنه الاثنين عمرنا عبارة
عن خفارات خل نتزوج
شغلنا هيج يريد شلون نبقى
طول العمر
-انت هيچ تشوف
-هسه اتفقنا
-هاي هي
-فتحي كاميرا اشوف چهرتچ الزعلانة
-ما
-شلابسه
-صدگ تحچي
-اي
-لا عسكرررري عسكري مو شلون ماكان
-شنو هالسمعة الزفت
-اسأل نفسك اكو واحد يسأل مرته
شلابسه
فتحت الكاميرا باوعلي
-اكلچ ليل
-ها عيوني
-هاي عيوني سولفيها لأبوچ
-ها حبيبي
-احسنتي ليش مانستغل الفرص
بما ان هالايام دوامچ عادي ماكو
خفارات نجهز الاثاث
-تمام جهزلي جييييبك للصرف
-جهزيلي شفتچ
-يبوووووووو
ضحك وباس الشاشة
-ولي انت وچهرتچ خل اشتغل
ودعني وراح
قررت افرح ويا واعيش هالأيام
وفعلا فرة الأثاث اخذت اسبوع
بس اختاريت هو گال اني اتولى
الباقي
وانت جهزي نفسچ جهزت
نفسي الضروريات والاحتاجه
وهيچ كملت كل شي
وبدت تحظيرات زواج نوح
فرحة غامرة واحد يحب اللخ
نوح مجهز الطابق الثاني اله وليمنى
طلعنا ندور فساتين وبدلات
اخر شي ايست رحنا اني وماما
اخذت فستان راقي بلون ماروني
وياه حجاب بيج وحذاء وجنطة
مناسبة صار الزواج بقاعة صغيرة
الكل مجتمع واني صاگرني
حتى من اصفگ
-نزلي ايدچ طالعة من الردن
-شنوووو هاجس
-ليش مالبستي بدي جووووة
الثوب
-بدي وثووووب
فستااااان فستان
-ايييي ليش
مالبستي عواصم
-شنو
هو صفن بوجهي واني صفنت
بوجه استوعبت وطگيتها ضحكة
-قصدك معاصم
-اي ذني
-شسوي بيهن
-اديييييج طالعة
-بووووشني جيبلي بوشية
عينه بعيني يفكر
-صخام صخمني جاي تفكرررر
هاي هي البس معاصم منا وجاي هاي هي
-وعدسات سود
-يااااااشبيك هاجس
-حتى ماتهنيت بالعرس
هسه شعندچ جاية
-غييير عرس
صديقي وصديقتي وحمايه بنفس الوقت
وبعدين شعندك گاعدلي روح اخذ راحتك
-اگلجياها من الاخير الاقرباء والاصدقاء
كلها مو راحة وگو***د
-قابل يباوعون لمرتك
-حتى للصخلة يباوعون
-خلف الله عليك
عله صوت المزايق وبدت الزفة
وهو لزم ايدي
-متتحركين خل يطلعون
-ماما وبابا
-يدرون بيچ وياي
-يبووووو
-انچبي
-شبيك ززززفة اريد اتونس
-توووونسي بزفتنا خووووش
-هاي هييييي عقدتني العقدددددد
-البسلج گرون واگلهم تعالو شوفو مرتي
الحلوة
ابتسمت ورمشتله
-صدگ حلوة
-تشگين شگتين
خله الناس طلعت وطلعنا للسيارة
افترو وطلعو للفندق واحنه رجعنا
طول طريق رجعتنا للبيت
مشغلي اغاني وعزف وفرحان
-بسسسس شهر يفصلنا عن
لحظة الصففففففر
-شنو قنبلة موقوتة
-اكيييييد عررررس هاااااجس
مو ياهوووو الچان
-نرجسية مفرطة
-غير ماخذ احلى النسووووووان
-تعال اگلك
-گولي
-شوووووو قبل چنت لسانك شطوله
ومتنجرع چنت اعتقد انت دائما هيچ
هدأ ورد
-بعدني هيچ بس ناعم وياچ
لأنچ ناعمة
-شو حبييييت
-مخلصتها عليه حبيت وحبيت ومامحصل شي
-مثليش
-رومانتيكيات منا منا
-رووووح لأم جلد النمرررررر
-قياساتي
ضحك وونسة الطريق كله
لحد مرجعنا وبديت مثل مگال تجهيز
عبالي الموضوع سهل
بس بده الارهاق يصيبني
وگمت أحس نفسي صايرة مثل خيط مشبك ما أدري منين أفتحه
الضغط هالأيام مو مجرد تعب
جاي احس الوقت يسبقني
وإن ليل الدكتورة اللي متلحگ تسوي
شي لازم هسه تتحول عروس
بكل تفاصيلها
دوامة التجهيز اخذتني
النزلة للسوگ صارت تختلف
عيني مو على الكتب ولا على السماعات الطبية
عيني على القماش على التفاصيل
لجهاز العروس مثل ميسمو
أحس بالمسؤولية تاكلني
أريد كل شي يكون كامل
وبنفس الوقت أسأل نفسي من اشتري
شي القطعة هذي راح تبني سعادة وفوگ كل شي
عشت صراع الأذواق
بين رأي أمي اللي تريد كل شي كلاسيك وفخم وبين ذوقي اللي يميل للبساطة والهدوء
وتعببببني التفكيير بالتفاصيل الصغيرة
حتى لون المناشف ياخذ من طاقة عقلي أكثر من خفارة ٢٤ ساعة بالمستشفى
وانتهى التجهيز ودخلت دوامة ثانية
التفكير بالبدلة البيضة هل راح أكون مثل ما تخيلت لو التعب راح يبين جوه عيوني
وفوگ كل هذا ضغط السؤال
ها ليل شسويتي شوكت العرس
أحس نفسي بعرس جماعي مو عرس شخصي من كثرة التدخلات
وكل شي مقاهرني غير لمن اباوع لماما
وبيبي وبابا فرحانين بيه بس مقهورين على فراقي
اباوع لغرفتي هنا كبرت
وهنا درست حتى احقق حلمي
فكرة إني راح أترك هذا الأمان وأروح لبيت جديد مسؤولية جديدة تخلي گلبي ينبض بخوف ممزوج بلهفة
بس بوسط هذا الضغط كله يجي هو بكلمة أو مشاكسة يفلش كل هذا التوتر
أحياناً أحسه يضغط عليه بطلباته
وأحياناً أحس هو الملجأ الوحيد من هوسة التجهيز
وارجع أفكر شلون راح تخلص هاي الايام
شلون راح نتحول من مجرد مخطوبين لـروحين
بيت واحد يجمعهم
بالليل من يهدأ البيت
أفتح دفتر ملاحظاتي أريد أكتب قائمة بالأغراض الناقصة ألگه نفسي كاتبة اسم هاجس بنص الصفحة ومحوطته بقلب مكسور من التعب
بس يهووون التعب هي هايه ضريبة الحب لازم نمر بالنار حتى نوصل للجنة
باقي لليوم الموعود اسبوعين
وكملت تجهيز واتجهت للعناية بنفسي
من بعد التعب بيبي استلمتني حنة للشعر
وتخلط زيت وسعد مطحون ادلك
بي بشرتي بعد ازالة الشعر
ماما متخليني اسوي شي وتريدني
مرتاحة
واتفق بابا وضرغام وفارس يجيبون
اجهزة للبيت وبابا بلغ هاجس ان
السبالت عليهم مخلو يشتري
ماما وبيبي ميحچن ومتفقات
يجيبن فد شي
كل شي بده يستقر بمكانه
وهاجس ووطن ونوح اتفقو
يرحون لبغداد علمود بدلاتهم
الرسمية واتفقنا اروح وياهم
لأن ملگيت بدلة تناسبني هنا
زواجنا المفروض يكون شهر العاشر
واختاريت الموعد ٢٣/١٠/٢٠١٦
بيوم اللي اتفقنا نروح لبغداد
الولد گالو يرحون بسيارة
نوح واني وهاجس بسيارته
وفعلا اجاني الصبح وهم بسيارتهم
مد راسه وطن من سيارة نوح
-هااااا الحية لزكتي ويانه
وفررررقتي الاخوووووان
من هسسه
-اييييي وراح اسويلكم سحر اخلي
بالچاي
-سمعتتتتتت هاجس بالچاي
لأن واضح مرتك ماتعرف تسوي غيره
-يلا روووووحو لتعكرون صفو سفرتناااااا
-سهلة اسبوعين واسحلچ
ذهاباً وأياباً
تحركنا وطول الطريق فاتحين
خط وعرك احنه ووطن منا لمن دخلنا
بغداد
كاللهم هاجس خل ناخذلها بدلة
بالبداية لان سالفة النسوان
طووووويلة
ودخلنا اول محل والثاني وهو
رأية كلهن مو مستورات وطلعنا
دخلنا للمحل الثالث وأنا أحس رجلي ذابت من المشي التفتت لهاجس اللي چان يمشي ورايه
وعيونه تفحص الفساتين كأنه ضابط تفتيش
مو عريس جاي يختار ويه خطيبته
وبديت اتفائل المحل هذا عملاق ورااااقي
بديت بأول فستان منفوش وبيه شغل كريستال
على كورسي بارز الخصر
عجبني لمعانه تحت الإضاءة
هاجس باوعله من بعيد ضيق عيونه
-أنتِ رايحة لعرسنا لو طالعة تحررين الأندلس
حسيت بخيبة امل
-ليييش
- هذا مو فستان هذا درع قتال
وتم اقصاء اول فستان
جربت فستان ثاني بسيط وقماشه ناعم طلعت من غرفة القياس وأني فرحانة بجماله الهادئ
هو باوعلي سكت ثواني وبعدين سألني
- وين باقي الفستان
- هاجس عجبني هذا ستايل بسيط وراقي
- هذا قطعة قماش بيضة مالها ملامح
نفخت بضجر وتم اقصاء الفستان الثاني
ورجعت للبحث اخذت فستان
وصحتله يشوفة بغرفة القياس
فستان فتحة الظهر عميقة ومرصعة بالستراس
درت وجهي حتى ميشوف الظهر دخل
باوعلي
-حلو
-هاي هييي ناخذه
-بالنسبة للفتحة الطولها متر بالظهر شنووو
تراجعت لطشت بالحايط
-يادكتووووورة المرااااية وراج
ابتسمت بغباء
-بسسس نازك وحلو وتغطي الطرحة
گال بلهجة حازمة غلفها بابتسامة لعوبة
-هذا الفستان ممنوع من العرض والمشاهدة
هذا يحتاج سترة فوگاه
لو نلبسج عباية طول الحفلة
الفستان اللي يخلي الظهر مكشوف محذوف من القائمة خووووووش
هزيت راسي موافقة واشرتله
-اطلع بره يلا
-ديري خل اشوف نعمة الله
-اطلع راح اعيط
غمزلي بخباثة وطلع
واستمرينا ندور الى أن بالنهاية
بعد ما رفض نص المحل بحجج تضحك
وگفت گدام فستان هادئ ستان اوف وايت
باكمام تول وصدر مستور تول
-شنو رأيك
باوعلي وگال بنبرة هادئة
-اي هذا فستان يليق بيچ
واخيرا اختاريت الفستان بقت الطرحة
من بين هوووايه موديلات
جربت وحدة طويلة
هاجس لزم طرفها
-تفييييد سفرة للاكل
-هااااااجس هذا الموديل
-الموديل شي واگعد اتعثر بذيالچ
طول العرس شي
مد ايده سحب وحدة قصيرة
-جربي هاي القصيرة حتى ناخذ راحتنا
بالقاعة
جربتها حلوة اخذناهم وطلعنا
ودخلو هو والشباب مجمع متعودين
علي خلال ربع ساعة اختارو
بذلاتهم
باوعلي وطن وغمني انصدمت
-ثلث زلم بربع ساعة اختارينا ونتفة
چنها ابو بريص اربع ساعات
شتلتنا بالشارع
كفخه هاجس وطلعنا
هاليوم چان من احلى اياااام تجهيزي
للعرس تونسنا وضحكنا وسولفنا
ورجعنا بالليل للبيت مر الاسبوع
وبقى اسبوع طلعت بي اشتريت فستان
للحنة
وقررت اسويها حنة تقليدية ولمة
بنات بالحديقة مال بيتنه بين الورد
والاشجار وعزمت الكل حتى عمات
هاجس حتى متتسجل عليه نقطة
قبلها بيوم حلفني هاجس اشوفه فستان
الحنة واني لابستة لأن ماخليته يروح وياي
ويعقدني بالاختيار لبسته ورفعت شعري
فتحتُ الكاميرا والضحكة تملي وجهي
واگفة گدام المرايا الچبيرة بغرفتي
وفستان الحنة محاوط اكتافي وخصري
بلونه الأحمر الغامق
بالكصات الجانبية كأنها بتلات وردة مفتوحة
فتح الكاميرا ببيتنا مستند عالسرير
بغرفة النوم ماانتظرتخ حتى يرد
-شوف اللون انت مو تحبه يعني مراح نختلف
انتبه للتفاصيل القماش خيالي
والتطريز على الصدر نازك
افتريت حوالين نفسي اشوفه
-شوف شلون يلمع ويه الحركة
والحلو الحذاء اللي اشتريناه للعرس
طلع مناسب جداً ويا
احچي واشوفه ذيل الفستان وتفاصيله
وهو صافن تماما
ماقاطعني بلسانه وسوالفة المعتادة
وعيونه بيها لمعة غريبة
غمزتله بضحك
-وحدة منهن لو الاتصال علگ
لو الفستان بهرررك وجمالي خااااارق
عدل گعدته وهمس
-بالله فتحي شعرچ اشوفه وياه
فتحت القراصة وتساقطت خصلات
شعري غطتني
ابتسم ساند وجهه على كفه ويباوعلي بنظرات
عميقة وطويلة
-هاااا رأيك
-شگدر اوصف
ابتسمت خجلانة وسألته
-يعني تمام متگلي مو مستور البسه بالحنة
سكت مرت ثانية ثانيتين وسكوت ثگيل
مر يلا رد تحركت شفافه وبصوت هادئ كأنه جاي
من بير عميق گال
-ليل وگفي كل شي
توقفت ضحكتي تدريجياً
وعقدت حاجبي بعدم فهم
لأن مفهمت القصد
-شوگف حبيبي……
قاطعني بنبرة واثقة
والصدمة ملت روحي وانسحبت من هالعالم
لعالم فارغ مابي شي غير صدى كلمته اللي
كسرت روحي وگلبي وحولتهم لأشلاء
تناثرت حتى اصحى لواقعي واسمع كلمته
-وگفي كل شي ليل العرس ملغي
