رواية الندم مابعد الخطيئة الفصل الثاني والعشرون بقلم رونق
جان يكول اتعاركت وي مرتضى وضربته بسجينه وهسه هو بالمستشفى
ماما لطمت ع وجها عزه العزاني هم راح تدخل للسجن ويعاند وياك وميطلعك لو راح يجبرك وياخذ اختك بالكوه
هاي اذا بقى عايش
شنو يعني بس لا مات الولد
ياالله بس لا يموت مرتضى خطيه هسه اهله شكالوا
بابا كام يغلط عليه ويحجي شلون هيج تسوي
مرتضى : جنت منتظر الرد ع نار كلت مستحيل ميوافقون بعد ماجبت هاي الشيوخ والساده
بس انصدمت من اجاني الرد وهو الرفض
مااكدر اوصف شعوري بهاي اللحضه يمكن من سمعت خبر وفاة زوجتي مريم الله يرحمها اهون عليه من هذا الخبر
ذليت نفسي اكثر من اللازم وخطيه ابويه هم هواي ذليته
اتعارك ابوي وياي كدام عمامي وكلي تنساها هاي السالفه نهائي مايدرون حياة البنيه مهدده اذا مااتزوجها
اذا اكول ندمان شويه بحقي واذا اكول جنت مو بوعيي ولا هذا تفكيري هم تكول الناس عليه جذاب بس والله العظيم ندمان ولو يرجع الزمن بيه مجان هيج اسوي ابد
طلعت من البيت وروحي طافره من الدنيه كلها
بيومها رجعت للبيت بوقت متاخر حيل ضايج واحس هموم الدنيه كلها فوك راسي
اتمنى اراسلها لروان اتمنى اعرف شكالت ضاجت لو فرحت لان انذليت هواي
بس مااكدر اراسلها ابد
ثاني يوم رحت لبغداد ع مود بضاعه للمحل كملت كل شغلي ورحت للامام الكاظم عليه السلام
دخلت زرت وطلبت منه يسهلي امري كتله للامام طلبتي الوحيده الاريدها منك هي روان اريد الله يهدي اخوها ويوافق ونذرت نذر اذا صارت القسمه اجيبها لروان واجي ونزور سويه واذبح ذبيحه لوجه الله واوزعها بيدي للفقراء
كملت زياره ورجعت للبيت لان تعبان سبحت ونمت كعدت وي الاذان صليت واتعشيت وردت اطلع صاحتني شهد للغرفه
ها شهوده خيرج
اكلك خطيه هاي روان مسويه عمل شعبي وباقيه للصبح تنظف والعصر راحت المشيه ولاعبين بيها طوبه يكلولها انت تدرين بالمشيه
بس لا هذا اخوها العار ضاربها لو ماذيها
لا بس حجي وتكول ابد لحد يراسلني لان كاعد ياخذه منها فجأه ويخلي للصبح يمه
اني اله عمار والله اله اندمه ع كلشي سواه بيه
اكلك اكعد واسكت مابينه حيل مشاكل ولتصعب الامور علينه اكثر
الله كريم يصير خير
رحت للمحل والتقيت باحمد وجان ضايج عليه حيل كال البنيه مو من نصيبك مدام اخوها معاند اتركها وخليها تروح لحال سبيلها
هسه هذا شيفهمه بالسالفه شاكله
لك احمد مااعيش بدونها احبها حب متتصوره ابد
حتلو اهلها رافضينك
اني اخليهم غصبا ماعليهم يوافقون
شلون بله
بعدين اكلك شلون
ثاني يوم كالت شهد روان واهلها بكربلاء يزورون ويباتون لباجر يله يرجعون
اجه ابالي ابا الحسن علي عليه السلام
رحت للمحل والظهر خبرتهم راح اروح للنجف
رجعت للبيت كلت لامي تروحين للنجف فرحت بس كلتلي شنو الخلاك تروح فجأه
مشتاق للزياره ماكو شي
خل تروح ويانه شهوده اني راح اخبرها وانت شوفي ابوي يروح ويانه
خبرت شهد وخطيه حيل فرحت
طلعنه تقريبا بالوحده
كالت شهد هم نمر بالمقبره
والله ماادري خل اشوف
حباب فدوه وديني نقره الفاتحه ومنتاخر ابد
امي مقبلت كالت تخوف المقبره العصر
شكو قابل يا يوم
وصلنه من وكت ورحنه للمقبره خطيه رسول ومريم واحد بصف اللاخ والطفل وياهم
شهوده دموعها الطريق كله يجرن واول موصلنه ذبت نفسها ع القبر
قرينا الفاتحه ومكدرنه نتاخر لان اخاف ع امي وشهد كلشي يصير والمقبره تقريبا فارغه
اتوجهنا للامام علي عليه السلام
تواعدنه نلتقي جوه وفعلا دخلنه واتلاكينه واتفقنه منو يطلع الاول هنا ينتظر
دخلت زرت واحس هموم الدنيه كلها شايلها
كتله دخيلك يبو الايتام اريد حاجتي انت تقضيها اليه اريد تسهلي امري وتهديلي اهل روان وينطوها اليه
اني خطأت واعترف بخطئي واريد اصحح خطئي وكل وسيله مابقت عندي بس املي بربي وبيكم كلش جبير
اني هاي البنيه رايدها حتى استر عليها ومااريد تتاذه بسببي
اني عاجز ماعندي اي وسيله بعد واهلي ملوا مني اني اريد البنيه باي طريقه واريدك يااميري بجاهك عند رب العالمين تسهلي كل امري
كملت الزياره والصلاه واذن المغرب هم صليت وكملت وطلعت لكيت امي كاعده بس شهد ماكو
هاي هم خطيه والله حيل ضايج عليها لان انظلمت هواي بسببي لا اتهنت وي حبيبها ولا اتهنت وي زوجها لو يرجع بيه الزمن ابد مااعارض عمار من يخطبها بس هاي ال لو انزرعت وماخضرت
سالت امي عليها كالت هي كالت اتاخر شويه
بقينه اني وامي ننتظر شهد كاعدين امام القبه
يوم فدوه اروحلج ادعيلي كون الله يهدي اهلها وينطونياها لان حيل تعبت
يوم والله لو مو ادعيلك مايقبلون الناس قافلين عليك والله الي يسووا حقهم لان انت سويت اكثر بيهم
بس يوم والله كاعد اتعذب والليل اليمر ع الناس كلها نايمه اني كاعد اتعذب
يوم والله متفيدك هواي تعذبت من وراها
بس يوم ابنج ميتزوج غيرها ولا يفكر بوحده غيره
هيج تحبها وين راح حبك لمريم
شريد اكلها مااعرف
يوم مريم الله يرحمها ماتت والحي ابدى من الميت لازم اشوف نفسي مااكدر ابقى ع ذكرتها
طبعا حجيت هيج حتى متشك بيه
اي ميخالف يوم شوف نفسك بس شلون تقنعني تحب بنيه حب اعمى بعد وفاة مريم الله يرحمه ع الاقل المفروض تتزوج زواج تقليدي لان الحب ميجي بهالسهوله
يوم الكلب اذا دك لشخص ميهمه لا وقت ولا يهمه التقاليد ولا ايدشي يوكف بوجها
اني البنيه عجبتني حيل واخلاقها عاليه وبديت احبها شويه شويه
والله يوم مااعرف شاكلك
بس اشوفها مو من ثوبك ابد
شلون يعني
البنيه مدلله هالوحده لاهلها وبدون عبايه وانت اكثر واحد تضوج من البنيه السافره والبنيه لاحضت عليها مو ام بيت وشاطره
يوم هاي كلها امور جانبيه اذا ع العبايه بس نتزوج البسها العبايه ومالت مدلله حقها لان هالوحده ومن تجي هنا انت علميها ع كلشي
هسه خل يوافقون اهلها والله كريم
يوم فدوه لعمرج ادعيلي دعوه حلوه واذا تكدرين ارجعي لابو الحسن زوري مره لخ وادعيلي
مو تدلل يوم اني شاريد غير راحتكم
راحت تزور واجتي شهد وجانت العيون حمر مبين عليها هواي باجيه
محجيت وياها شي
شنو ماما لهسه مجايه
لا اجت ورجعت مره ثانيه
عبالي اكول مستحيل لهسه
هم تخابرتي وي روان
لا والله ماصارلي مجال ابد
بقينه شويه كاعدين واجتي امي
ودعنه الامام ورحنه تعشينه بالمطعم وبعدها رجعنه للبيت
احس بنفسي مرتاح نفسيا وكلبي مطمأن تقريبا من ناحية روان صارلي امل جبير اهلها الله يهديهم
نمت من وكت لان تعبان وصارلي يومين سفر وتعب
كعدت من وكت تريكت بالبيت وبعدها رحت للمحل بقيت هناك لحد الظهر مرجعت للبيت جبنه غده للمحل واتغديت اني والشباب الي ويايه
اجه احمد وبقينه نحجي اني ويا طلبت منه يصير واسطه بيني وبين عمار اريد احجي وياه واعتذر منه واشوف شيريد وشيطلب مني اني حاضر ماعندي مانع
كلي زين تسوي خطوه جيده
كتله خل نشوفه بالمحل مالته الي بصفنه اذا موجود خل نحجي وياه واذا مموجود خل نروحله لبيته
اني قررت احجي وياه بهدوء ولازم نتوصل لحل
اتمشينه اني واحمد للمحل ولكينا موجود الحمد لله حتى نحجي وياه
دخلنه للمحل سلمنه عليه بس فاجئنه برده بدون سلام ولا كلام
اطلع بره لا اراويك شي مشايفه بعمرك وحياتك
عمار رد السلام ع الاقل لان السلام لله مو لبشر
مرتضى اطلع بره لتجبرني ع شي اسوي بيك
احمد كله عمار صلي ع النبي جاينك حتى نقدم الاعتذار الك
مرتضى حاب يتعذر منك
بعده يحجي احمد وهو حجه احمد انت كلشي متعرف شنو الي سواه بيه مرتضى لهذا السبب مااطيق اشوفه ولا اطيق اسمع صوته الافضل الك واله اطلعون بره
اني هنا فقدت هاي شبيك عمار شنو شايف نفسك شوفه ومحد يوكف بوجهك اجيتك بكل ادب واخلاق حبيت اعتذر منك وكلت اسف واعتذر منك واي شي اطلبه اني حاضر
واني اكلك مااطلب منك غير تطلع بره
مااطلع اله تسمع مني اني احب اختك واحب اكلك اذا موافقت بارادتك راح يجي يوم الي تتندم بي مثل مااني اتندمت
وها اسمعني اختك متصير لغيري لو ع جثتي مستعد اخذها وانهزم من العراق كله يمكن رحت زايد شويه وجان المفروض مااحجي شي بس نرفزني عمار هواي
باللحضه هجم عليه طاحلي دك بوكسيات
حاولت مااتعده عليه بس اذاني كمت ارجعله الضربه
احمد واكف بنصنه يريد يفكنه بس ماكدر ابد
لك ساقط والله اكتلك واخلص منك بس تفكر ولو تفكير تتعده ع اختي لو تحاول تهرب وياها
لو اطير لسابع سماء هم اطير وياك وهذا وعد شرف مني
والله اذا موافقت اله اكسر خشمك واشرد بيها
اعترف الك واكلك احبها واموت عليها ومااعيش بدونها ومستعد اهرب بيها اذا موافقتوا عليه
هنا هجم عليه وضربني ع راسي مااعرف بيش عيوني غوشن لحضات وضربني بسجينه ابطني وكعت فاجأني بيها ومااعرف منيله ومنين جابها
هنا احس امعائي تكطعت تكطع كمت انزف واحمد اتخبل
حسيت بدوخه قويه لحضات وفقدت مااعرف شصار بعد
كعدت لكيت نفسي بالمستشفى ومشكليلي كانيولا ومغذي والم فضيع مينوصف ابطني ردت اتحرك منعوني كالوا مو زين عليك لان سوينالك عمليه
لكيت ابوي ومهند واحمد يمي
اتذكرت الصار اتحمدلوا ع السلامه كوه احجي بس كمت اون من الالم
طلبت منهم مي حيل عطشان مقبلوا ينطوني كالوا مو زين عليك بس بللوا شفتي
كمت اصيح اجوي ضربوني ابر مهدئه وضربوني براسيتمول هدئت لحضات ونمت
كمت انام واكعد احتاجيت حمام طلبت من احمد ياخذني
كوه امشي سالته شنو من عمليه
ضربتك بالامعاء بس الحمد لله ممتاذيه حيل
وهذا العار وين ومنو جابني
اني جبتك صحت الولد ويايه وجبناك واتصلت بابوك
اكلك ماحجيت كدام اهلك والشرطه ع عمار
ليش عود
مرتضى مو من صالحك ينسجن وانت ادك وتنوح ع روان منريد مشاكل اكثر
خل نحلها ابيناتنه بلكي ينطوك روان وتفض السالفه
لعد شاكل لابويه اذا سالني
كله اني اتجاوزت عليه وعلت بي وهو فقد بس الخطئ خطئي
الشرطه شويه ويجون ياخذون اقوالك
كللهم اجوني للمحل رادوا يسرقوا وماعرفتهم منو
مراح يصدكون
مو مهم
رجعت لكيت ابو روان وخاله بالغرفه
ساعدوني مهند واحمد ونيموني
اتحمدولي ع السلامه
ابوي ومهند صافنين ميفتهمون السالفه
بهاي الاثناء دخل ضابط وبده يتحقق وخبرتهم مثل متفقنه وفعلا مصدكوني وكلي ع راحتك اذا متريد تشتكي ع احد
عافني وطلع وبقوا ابوها وخالها يتشكرون وكالوا شنو التريده احنه حاضرين
ابوي كال فهمونه شنو السالفه
كتلهم بعدين افهمكم
كمت اتغفه وفعلا نمت يمكن من المسكنات
كعدت لكيت امي خطيه يمي وعمي ابو رسول ومهند وابوي
كعدت ميت من العطش والجوع كالوا ميجوز هسه بعد فتره يله تقريبا ب12 بالليل
بللوا شفتي وكعدت اون من الالم
لكيت احمد حاجيلهم ومفهمهم بان اني متجاوز عليه وهو فعلا اني استفزيته وجنت قاسي لان مستحيل احد يتحمل احد يحجي ع اخته ويكول اخذها وانهزم اني مجنت اعني الحجيته بس حبيت اخوفه
بقوا يحجون عليه وكلولي مهما يكون المفروض ترفع قضيه عليه وهاي ثاني مره تدخل مستشفى من وراه لازم نسويله حل
يابه اني مااكدر اتعب نفسي واحجي مثل مكللكم احمد اني الي علت بي واتجاوزت عليه
هاي القضيه تهمني اني واني مااريد اشتكي ولا اريد مشيه حتى منطلع نريد حجه عليهم
امي بس تبجي فوك راسي
يوم والله مابيه شي هاي اني كدامج وباجر اطلع
بقيت يومين بالمستشفى وابو روان وخالها وجدها مفاتوا حالنه ابد
اني داخل خاص ومن البدايه دافعين تامينات رادوا يتحاسبون همه ومقبلوا احنه ندفع بس اصرينه وكنالهم اصلا دافعينهن لكدام
حالتي اتحسنت شويه
لحد الان مااكدر اكل بس سوائل
الالم قوي بعده بس كاعد ينطوني مهدئات
طلعت من المستشفى للبيت وذبحوا ذبيحه لوجه الله
بدت الناس تجي اصدقائي واقربائنا
بقه ابو روان يجينه ويطمان علينه
ابوي ميحب المشاكل ابد كال مدامك انت العايل بي ننهي السالفه لا مشيه ولا تشتكي
اجوي خالهم وجدهم وكالوا راح نجي مشيه الكم ماقبل ابوي كال سدوا الموضوع ومنريد لا مشيه ولا شي بس نريد ابنكم يفوت حال ابنه لان هاي ثاني مره يأذيي والله يستر بس المره التجي منمضمن هم تسلم اذا نعادت لتلومونه بلي نسوي
كالوا لا ننطيكم ضمان وحجايه اكيده مستحيل بعد يفكر ولو تفكير ياذي لو يتقرب يمه بس احنه هم نريد منه ليجيب طاري البنيه بعد وانتوا تعرفون الزواج قسمه ونصيب والبنيه قسمتها مو وي ابنكم نتمنى هم تحترمون رايينه
اكيد هذا حقكم وهم يستحيل بعد نزعجكم بهذا الموضوع
اني متكلمت ولا بحرف لان مو مالت اخذ وانطي وياهم بس عمار يستحيل اعوفه بحاله لازم اخذ حقي منه وزياده بس خلي اصير زين ويصير خير
رغم ماكنالهم منريد مشيه فاجأونه واجوي تقريبا 20 نفر وياهم سيد ورادوا يدفعون فلوس رفضنه رفض نهائي
وره 3 ايام اجوي اصدقائي جنه نحجي سويه بهالاثناء كامت تجيني اشعارات وحده وره اللخ شفته من روان كلبي كام يدك سريع مااعرف ليش راسلتني اخاف صاير شي
مااكدر افتحه واشوف عيب منهم بقيت ع نار
وذوله لزكوا ميقبلون يرحون وناصبين عليه يردون يرحون للشمال
اني كتلهم اصلا مااروح لان ثلوج بالشمال حاليا
يكولون هي حلاتها بالثلج ابقى هنا بفراشك واسكت
احمد كللهم اني مااروح ابقى يم مرتضى
لتكول ابقى يم مرتضى كول الحكومه متقبل
لا الحكومه شعليها بس هذا صديق العمر شلون اروح واخلي بوحده
عفيه بضلعي خل اطيب ونروح اني وياك بعنادهم
ان شاء الله
بقوا لوقت متاخر تقريبا ل11 يله راحوا
نسيت الرسائل
اخذت علاجي وردت انام دك عليه احمد استغربت
الووو
ها مرتضى بس لا نمت
لا بعدني خيرك
اكلك خطيه رامي نضربت سيارته هسه
تحجي صدك
اي والله هسه من رجعنه منك اني ذبوني يم اهلي وهمه راحوا للكوفي
لحضات وخابروني كالوا اندعمنه
خطيه بس لا اتاذوا
لا الحمد لله بس السياره متاذيه
لا بربك
اي والله يكول اتاذت
حيل ضجت عليه لان سيارته جديده خطيه طبعا سيارته جارجر
فدوه السياره اهم شي سلامتهم
لاوالله حيل ضايج رامي
بيمن الصوج بي لو لا
لا مو بي بالسياره الثانيه
التهيت وياه وبعدها اتصلت برامي ونسيت الرسائل بس من طبكته صارت كبالي الرسائل
ضربت كصتي شلون نسيت لا ياالله بس لا هسه نامت الوقت اتاخر فوك 12 الساعه
فتحت الرسائل
مرحبا
شلونك مرتضى
الحمد لله ع السلامه اسفه مراسلتك لان كلت خطيه خاف بعدك تعبان
طبعا اني اسفه واعتذر منك لان الصار بيك من ورايه
اتمنى منك لهنا وكافي عوفني وشوف حياتك واني عن نفسي مسامتحك ع كل السويته بيه
دزيتلها مراحب
شلونج روان شخبارج
ماكدرت ادز اكثر اله تجاوبني اخاف مو عدها الجهاز
بقت تقريبا خمس دقائق ومنقرت الرسائل كلت اكيد نامت ممعقوله باقيه لهيج وقت
ضجت وردت انام هو اني ممصدك راسلتني واني الغبي ضيعت هاي الفرصه
لحضات وجان تنقري الرسائل حيل فرحت بس ماكو جواب
هنا الخوف امتلكني اخاف عند عمار الجهاز
لحضات واجاني الجواب
هلو مرتضى شلونك انت
الحمد لله وانت
تمام بخير
شلون صرت
الحمد لله
شنو الخلاك تروح لعمار وتستفزه
والله رحت اله باسلوب حلو وحبيت اتفاهم ويا بس اخوج عنده مشكله بعقله وايده والضرب وشكد يحب ياذي المقابل
والله مااعرف شاكلك بس كل الاعرفه هسه اتمنى تعوف سالفة الخطوبه نهائي انساه الموضوع ومثل مكتلك اني عن نفسي مسامحتك وشيصير بيه انت متتحمل مسؤليته
روان شنو كاعد تضحكين عليه لو تضحكين ع نفسج
انت الي ويستحيل تصيرين لغيري لو ع جثتي هاي اخر مره اسمعج هيج تحجين
اني مراح اسكت لعمار وراح اتصرف ويا تصرف افاجئه بي
لا مرتضى الله يخليك بروح زوجتك عوف عمار بحاله ادري بي اذاك بس لتنسى انت هم اذيته هواي
لج بابا اني اذيته مره هو اذاني 10 مرات واكثر
عفيه مرتضى عوف عمار بحال سبيله واترك سالفة الخطوبه وانساها ع الاقل لمن اتخرج ويصير خير
واذا تقدملج احد ووافق عليه عمار
لا يستحيل اوافق ع اي شخص ويستحيل يجبروني مره ثانيه وانت تعرف السبب
والله مااعرف شاكلج ياروان اخوج منطاني امل ولو قليل يقبل بيه ودايخ شاسوي وشلون اقنعه مااعرف
تدرين اني اكدر ارفع عليه قضيه واكدر اسجنه مثل قبل واكدر مااتنازل عنه اله يوافقون عليه وينطوج اليه بس ماسويتها تعرفين شنو السبب
لا والله معرفنه كلنه دايخين بهذا قرارك لان صدك اتوقعنه هيج راح تسوي وفاجئتنه من مارفعت قضيه ضده
شنو السبب تكدر تخبرني
بسببج انت مااشتكيت عليه حتى متضوجين مني اكثر ولاردت اشوه سمعتي كدام اهلج واني كاعد اعمل المستحيل حتى يرضون عليه وعندي امل يوافقون عليه
والله اني اشوف بعد لتحاول تخطبني انطي مجال خل ينسون وبعدين ارجع اخطب
الله كريم هم بيناتنه الحجي حاليا ماعندي اي وسيله او طريقه حتى اجي بيها لاهلج راح اترك السالفه منا للعطله ويصير خير
شلونها عمليتك متاذي حيل لا
والله حيل متاذي وخاصه الجو بارد ميلتام الجرح بسهوله واكلي بس سوائل
طبعا اني اسفه واعتذر بالنيابه عن عمار عن الي سواه بيك
ماكو داعي تتاسفين نيابه عن اخوج والمفروض اني الي اعتذر منج عن كل شي بدر مني وسببلج كل هاي الهوسه والازعاج
مرتضى الي صار صار وخلص وانت من اعترفت بذنبك وخطأك يكفي والي سويته يجبر الواحد غصبا ماعليه يسامحك بغض النضر عن الذنب الي ارتكبته
لهذا السبب اني اكلك والله العظيم وهذا قسم عليه اكلك روح شوف حياتك وي الانسانه الي تعجبك والي تشوفها مناسبه الك ومعليك بيه واني مسامحتك من كل كلبي ولتتقيد بيه ابد لان اني مااعتقد راح يوافقون اهلي عليك الافضل الي والك نبتعد عن بعض
صار شكم مره احجي وياج واكلج هاي السالفه انسيها مالت اشوف حياتي واعوفج هيج كطنه وطلعيها من اذانج وانسي هاي السالفه واهلج اني اعمل المستحيل حتى اخليهم يوافقون مراح استسلم ابد ولا راح اعوفج ابد بس راح اترك السالفه للعطله الجبيره
تعاي كوليلي اهلج شكالوا عليه من مااشتكيت
والله بابا وخالو وجدو هواي مدحوا بيك وكالوا طلع ابن اوادم واحنه جنه فاهمينه غلط
الحمد لله اتمنى يرضون عليه ويوافقون
الله كريم
اني اسفه لان دوختك وازعجتك وانت مريض ولازم ترتاح اخذ راحتك
لا بالعكس لا دوختيني ولا زعجتيني بالعكس هواي ارتاحيت من راسلتيني واتمنى منج دائما اطمنيني عليج من يصير مجال عندج
الله كريم تصبح ع خير
وانت من اهله
حسيت براحه نفسيه مو طبيعيه لان راسلتني وسالت عليه حتى الالم حسيته اختفى نمت واني افكر بيها وصورتها كبالي
ثاني يوم كعدت مرتاح واحس نفسي هواي احسن
ردت اروح لرامي بس رفض وكلي ازعل عليك اذا اجيت لان بعدني مريض
حيل ضجت من الكعده ممتعود بس هم مااكدر اطلع لان الجو بارد ومو زين ع العمليه
مااكدر اراسل روان لان اخاف بيد عمار
بقيت هيج وضايج لحد مااجه اليوم الي فتحت الخيط وحسيت براحه جبيره
رجعت للبيت وسبحت لان هاي الفتره كلها ممنوع عليه
حسيت بنفسي نولدت من جديد بيومها ماطلعت
ثاني يوم بديت امارس حياتي الطبيعيه وبديت ارجع لشغلي وبده الدوام وخلصت العطله
وره اسبوع من دوام شهد اجت وكالت اريد اترك الجامعه سالناها شنو السبب كالت ماعندي واهس بالجامعه طبعا رفضنه ورفض قاطع وهي هم صممت اله تترك الدوام
كلت لازم اراسل روان واستفسر منها
اتصلت بيها الصبح وهي بالجامعه بس مجاوبت ابد
وره ربع ساعه اتصلت بيه انطيتها رفض واني اتصلت بيها
الوووو
الووو
هلو روان شلونج
تمام الحمد لله وانت
الحمد لله
اكلج هم تعرفين شهد شعدها بالجامعه ليش تريد تترك الدوام
والله مااعرف اني وديما توسلنه بيها وردنه نفهم السبب تكول هيج بدون سبب مااريد اكمل تكول محبيت اجواء الجامعه ابد
وانت مقتنعه بهذا السبب
لاوالله ابد ممقتنعه هواي توسلت بيها حتى تصارحني بس رفضت
والله دوختني اتمنى اعرف السبب بس يستحيل اخليها تترك الجامعه
اي عفيه حرامات والله اكيد راح تتندم بعدين
ان شاء الله مااخليها تترك الجامعه لو تموت
انت شلونج شخبارج
تمام وانت
بخير الحمد لله
عمليتك شلون صارت
زينه صارت شكو ماكو
ماكو شي
عمار شلونه وياج
زين ماكو شي بيناتنه
يله عيني اخذي راحتج اخاف عندج محاضره
اي والله راح تبدي محاضرتي مع السلامه
الله وياج طبكته منها
بدينه نضغط عليها حتى اداوم وفعلا داومت بس احسها بدون واهس ولا لهفه مثل قبل معرفت شنو السبب
اجه الصيف وع ابواب امتحانات النهائيه
صدفه اتواصل وي روان لان مااكدر اني اراسلها اخاف عليها ومن اداوم بالجامعه لو تنطيني رفض لو متجاوب وادزلي رساله مااكدر لو تحجي ويايه لحضات
حجيت وي احمد وطلبت منه يفتح الموضوع وي اخو ديما حتى يحجي وي عمار عله وانه يوافق ولو اني مأيس منه
فعلا احمد راح لنسيبه واتفقوا ويا وراحوا لعمار
بقيت منتظر الجواب ع نار رغم اني متاكد من الرفض بس رغم كلشي بداخلي امل ولو ضعيف جدا
جنت كاعد بالمحل واجوي احمد واخو ديما استغربت جيته الولد الي اعرفه هو دكتور
سلموا عليه رديت السلام
ماسالت لان كلت عيب من الولد دزيت ع كابتشينو شربوا وكملوا وحجه احمد اشو مسالت عن رد عمار
ميحتاج اسال لان اكيد احساسي يكول رافض مثل كل مره
حجه الولد شنو المخليك متاكد من رد عمار
والله ياعزيزي عمار عنده عداوه ويايه جبيره مااعتقد راح يفكر بيوم يوافق عليه بسهوله
بس هالمره اكلك انت متوهم احساسك غلط
شلون يعني
يعني عمار موافق ينطيك روان بس عنده شرط واحد اذا وافقت عليه راح يوافق تتزوج اخته
تحجي صدك لو تشاقه ويايه
لاوالله مااتشاقه احجي صدك
شعوري مينوصف بهاي اللحضه يمكن اذا اكول اسعد واحد شويه بحقي مستعد انفذ اي شرط اهم شي يوافقون اهلها
ها اشو سكتت
حجه احمد كال اكيد من الصدمه لان ممصدك
اي والله لحد الان ممصدك
لا حبيبي صدك
زين شنو الشرط اكدر اعرفه
جان يكول شرط عمار الوحيد هو ..........
توقعاتكم حبايب شنو شرط عمار ؟؟؟؟
شنو السبب الي خله عمار يوافق ؟؟؟؟
راح يوافق مرتضى ع الشرط لو لا ؟؟؟
