رواية حكاية ترف الفصل الثالث والعشرون
ترف
بعد عدة أشهر من حمل منى فد يوم خابرت على ماما وطلبت منها تروح وياها لعيادة دكتورتها لأجراء الفحص الشهري لان عمه سعاد عدها واجب اليوم وماتگدر تلغيه .. ماما وافقت وماكو اي مانع وره ساعه وبالوقت المتفق اجت منى ووياها بناتها الي خلتهم يمنا آني ورهف وانطلقت ويه ماما لعيادة دكتورتها
لكن بعد ساعتين دخلن علينا ووجوهن ماتتفسر وخاصة منى كئيبة وتريد تبچي
- منى هسه فدوه خاله گوليلي شأسوي
- امي كولشي لا تسوين ، اتصرفي طبيعي
وإذا عمتچ سألتچ گولي فحصت سونار وبين عندي الحمل توم ولان كلش زغار ما بين شنو جنسهم
- منى اي هو هذا الصحيح بالاول مابين لان كلش زغار بس من بقت الدكتورة تعيد بالفحص بين التوم جنسهم بنات
- امي هسه اهم شي ديري بالچ على صحتچ وعلى حملچ ولاتضلين تفكرين برد سعاد وشراح تسوي ..خلي عندچ طاقة إيجابية
- منى هي عمتي تخلي عد واحد طاقة والنوب ايجابيه
- امي : والله أتعجب على سعاد هو كله رزق من رب العالمين اكو ناس تتحسر على البنية وناس تتمنى يصير طفل عدها
- منى أي والله خاله بس شيقنع العندي... والله شهم كلش يحب بناته وماعنده فرق واصلا چان يريد يسمي بتنا سما وأشرت عليها لأن چانت بحضني راد يسميها على اسمچ ترف لان هو كلش يحبكم ويعزكم
طبعا احنا ضلينا وحده تگح وحده تسوي نفسها مو يم الحچي وماما عود ما منتبهه وبقت تلاعب بآيه
والنوب كملت
- منى : وهسه من راح يسمع الحمل توم بنات اكيد راح يسميهن ترف ورهف حتى يطلعن مثل أخلاقكم وتربيتكم وهم دكتورات مثلكم
- رهف : والله يامنى من جبتي طاري أخلاقنا وتربيتنا خجلتيني وخليتيني اغيّر قراري لان چنت رايده اروح اتعارك ويه عمه سعاد لان جاي تضايقچ ههههه
- منى والله ياحبيبتي آني اعتبركم عائلتي وإذا على عمه سعاد فهي بحسبة امي ومره چبيره وبكل الأحوال لازم اتحملها
خالو من چان يخابرنا آني وماما عرض عليَّ أشتغل بأختصاصي بمستشفى اهلي بأربيل يوم دكاترة يعرفهم بدل ما گاعده استغل وقتي وهم اتعلم واتمرن لحين اعلان التعيينات بكلياتنا وچان ردي : افكر واردلك خبر
بس امي نبهتني لمسألة مهمه گالت هسه الأوضاع عالگه بين امجد ومرته ومن راح ترحين يمهم اكيد إذا اشتغلتي تعيشين ابيت خالچ وبساعتها اي مشكله تصير راح يذبوها براسچ في سبيل يغطون على السبب الحقيقي للمشكلة
وبلغنا خالو برفضنا للموضوع
ولأن اتصالاتنا مستمرة احنا الثلاثي فأخبار فاطمة ووليد توصلني تقريباً يوميه
فاطمه مسقره بحياتها رغم بعض المشكلات الصغيرة وفكرة الحمل الان مأجلينه لحين يتم الاستقرار المالي والاقتصادي الهم
وليد جاي يشتغل مع مجموعة شباب عراقيين كاشير بأحد المولات يعني مو بأختصاصه
وآني گاعده وساكته بس اساعد ماما بالطبخ وشغل البيت ومرات بدراسة سيف
وبين فترة وأخرى نروح لبيت جدو نشوفه ونسلم عليه ونطمئن على صحته لان هو صار نادرآ يطلع من البيت..
ومنى بيوم إلي چان مقرر لولادتها وبعمليه قيصرية طلبت من أمي هم ترافقهم ويه عمه سعاد وشهم وچان الغرض حتى تخفف من صدمة وعصبية عمه إذا عرفت الولادة بنات
ورغم رفض عمه بس ماما اصترت وراحت وياهم
ام سيف
شهم التها يسوي الإجراءات الإدارية والمالية الخاصة بالدخول للمستشفى وحجزنا الغرفه وبقينا بيها بين ما تحضر الدكتورة المختصة والكادر التمريضي ويسوون الفحوصات اللازمة لمنى حتى تدخل لصالة العمليات وچانت سعاد الفرحة مالية روحها
(هي تدري الحمل توم بس ماتعرف شنو جنسهم وچانت دائما تكول اكيد واحد منهم يطلع ولد إذا مو اثنينهم ولد هيج چان اعتقادها )
وكلما تدخل علينا ممرضه او عامله رأساً سعاد تگول إذا بشرتوني بالولد اغرگكم فلوس...إذا صار عدنا ولد اطش هاي الفلوس واهليه
ومن هالكلام اللي تفرح بي نفسها وهم صار عد الممرضات والعاملات نوع من الاهتمام الزايد بينا حتى بلكي يحصلون شي من هاي الفلوس والواهليه
بس چنا آني ومنى المتمدده على السرير وجانت خطيه حاضنتني وتريد بس تبچي من تسمع كلام سعاد ووعودها إذا جابت ولي العهد
وبعد الفحوصات الطبية اللازمة دخلت منى لصالة العمليات
وره أكثر من ساعتين اجتنا البشارة الاولى الحمد لله صار عدكم بنيه
آني وشهم رأساً گلنا الحمدلله وشهم شال ورقة نقديه واطاها للممرضه وسألها عن زوجته وگالت زينه الحمدلله
وطلعت وراها ممرضه ثانيه شايله الطفلة.. سعاد مارضت تاخذها ..آني تقدمت وشلت الطفلة.. وآلممرضه هم مدت ايدها تريد فلوس وهم ناوشها شهم ورقة نقدية ..
سعاد چانت واگفه قريب الباب لأن تنتظر تشيل الولد مو البنيه
اطيت الطفلة الشهم حتى يشوفها ويكبر بأذنها
دقايق وطلعت وحده بشرتنا بالمولود الثاني بنيه
سعاد وبصوت شويه عالي شلوووووون بنيه امشي روحي اتأكدي الثاني لازم ولد
آني وشهم هم گلنا الحمد لله و الممرضه ما هتمت لحچي سعاد هي جايه تريد تاخذ فلوس وطلعت وراها الممرضه الشايله البنيه الثانية
استلمتها آني وچانت نسخه من اختها يعني توئم متشابه
وهم كبر بأذنها شهم
رحنا للغرفة المحجوزة النا وخلينا بنياتنا على السرير وسعاد بقت بباب صالة العمليات وبس تتعارك ويه الطاب والطالع من الصاله..
الجهال مابطلن بچي ..صحت الممرضه وعلمتني اسوي حليب الهن بالمميات الخاصة بين ماتجي الدكتورة وتفحصهن
شهم راح صاح على أمه ويمكن متعارك وياها لان من رجعو اثنينهم ووجوهم ماليها الغضب
شويه واجت الدكتورة فحصت البنات وگالت ماشاء الله صحتهم زينه
شهم سألها على منى گالت هسه بالافاقه شويه ونجيبها يمكم
آني خليت بحضني وحده وجاي ارضعها ممه وشهم هم گاعد وبحضنه وحده وهم يرضعها ممه
وسعاد گاعده گبالنا على الكرسي وبيدها سبحه وتبسبس مادري تدعي علينا لو جاي صدگ تسبح
گلت خلي استغل الوقت وأكول
- شهم ممكن اطلب منك شي
- ام سيف انتي تأمرين
- الأمر لله.. بس آني كلش حبيت البنات (وأشرت عليهن) ممكن اشارك وياكم باختيار اسماء الهن
- اي اكيد
- شنو رأيك وحده نسميها حور ووحده نسميها نور
- اعتبري تم
- شنو رأيچ ام شهم بهاي الاسماء لو انتي محضره غيرهن
- لا آني محضره جود وكرم
بس الظاهر مالنا نصيب
- يمعوده كولي الحمد لله على السلامه والحمد لله على تمام الخلقه والبطن الجابت بنيه تجيب الولد
وردت شويه أثير اهتمامها گلت
- تدرين ام شهم البنات بيهم شبه منچ
- .... ما جاوبت وهم ما اهتمت وبقت تسبح
- وسبحان الله وجههم بي فرحه وان شاءالله يكتبلهم الفرح طول العمر
- سعاد : آني سامعه التوم يصيرون زغار شو ذني وأشرت عليهن طلعت كل وحده هالكبرها (وتأشر بيدها على الحجم الچبير)
- اللهم صل على محمد وال محمد شبيچ ام شهم گولي ياالله
- شهم بصياح يمه الله يخليچ جوزي من هالحچي
ويمكن چان تماده وياها بالصياح بس يمكن خلى إعتبار لوجودي أو يمكن لان احنا بالمستشفى
بهالاثناء جابوا منى على السديه ودخلوها يمنا
چانت صاحيه بس مغمضه لان يمكن ماتريد تشوف نظرات العتب أو الغضب من سعاد..
سلمنا عليها وباركنا وتحمدنالها عالسلامه بس سعاد كلشي ماگالت بس تباوع عليها بنظرة كره مع رفع تك من الحاجب
بس الحاح الممرضه على منى أن لازم تكون بحالة افاقه ومنتبهه وميصير تبقى بس نايمه وبدت تشكل بيدها الكنولات وصودنه للادرار... وماطينا مجال لاآني ولا شهم لسعاد تستفرد بمنى أو تبسمر الها أو تسمعها كلام ينغص عليها ويقهرها..لان بقينا قريبين عليها واحد منا وواحد منا وكل واحد شايل وحده من البنات
ومن راد شهم يروح يسوي بيان الولادة شاور منى يمكن گال الها سوي نفسچ نايمه بين ما أجي
لان اول ماطلع ، منى غمضت عيونها ونامت
وسعاد بعدها على الكرسي ما تحركت منه
وحتى شهم من طلع راد يطيها البنيه الي چانت بيده ..مارضت تاخذها وخلاها يمي لان چانت نايمه
وره أكثر من ساعة اجه شهم وبيده هواي علاليگ جايب اكل من المطعم وعصائر ولبن وگال وصيت وحده من العاملات تچيب ترمز چاي خلو يمكم
وهم گال سويت بيان الولادة وسميت البنات حور ونور مثل ما ردتي ام سيف
اتغدينا وسعاد مارضت تاكل وبعدها على كرسي جابر
اليوم لازم منى تبات بالمستشفى وقررت آني ابات يمها
طول الوقت التليفونات مابطلت سواء من أهلنا أو أهل منى خصوصا اخواتها كلهم يسألون على صحة منى أو صحة البنات وهم وحده من اخواتها گالت تجي بالليل حتى تبات ويانه
شهم گال لامه ترجع وياه للبيت لان وجودها مابي فائده
وهي ماصدگت خبر رأساً كامت ولملمت غراضها.. وتوجهت للباب وحتى ما سلمت ولا تحمدت لمنى بالسلامه
والله بس طلعت احنا شويه ارتاحينا ومنى عبالك تحررت من القيود وطلبت مني اقرب الها البنات وحضنت وحده وره الثانية وتبوس بيهم.. وهم بدت ترضعهم من صدرها
آني خابرت على بناتي واطيتهم آخر الأخبار
ترف
العصر اندك الجرص وسمعت صوت عمه سعاد طلعت الها وسلمت وچانت جايه تاخذ بنات شهم... ومن طلعّت الها البنات گالت والله حسافه يا ترف ماخذتچ لشهم ، وأخذت هاي العوبه الفطيسه الترست بيتنا بنات
طلعت وسدت الباب وراها وآني بقيت واگفه بمكاني صافنه ومذهوله من الحچي الگالته ....شنو چانت تقصد؟؟؟
