رواية معتكف في محراب قلبي الفصل الثالث والعشرون
ركبنا وانا مازلت مش فاهمه وانا بشاور لبابا ال واقف يضحك علينا ، ولاول مره احسه بيضحك براحه
ركبنا العربيه وانا عايزه افهم هو لي عمل كده ، قبل م استوعب ان ده مش طريق البيت
_ هو احنا رايحين فين ؟
رد بنفس المرح ال كان ف البيت وهو بيبتسم بهدوء
= مفاجأة
_ تاني ؟!
مد ايده مسك ايدي ال اتخلي عنها بعد م روحنا لبابا
اتكلم بهمس وهو باصص بعنيه ال مليانه دفء مش غريب عليه
= اهاا ، عشان تصالحيني
بجد ؟ يعني بجد عايزني اصالحه ، يعني..يعني فارق معاه زعلي ، حلو
وع رأي المثل ، ال يلاقي الدلع وميدلعش..هو الحقيقه اني مش فاكره بقيه المثل بس المهم اني هدلع يعني
بصيتله بإبتسامة وانا بهز راسي بهدوء مستنيه اشوف محاولات استاذ نوح ف انه يصالحني
العشاء اذنت علينا ف الطريق فعند اول مسجد قابلنا وقف العربيه واتحرك عشان ننزل
التفتلي وهو بيبصلي باهتمام
_ انا هنزل اشوف مسجد النساء فين واجيلك عشان تطلعي تصلي ماشي ؟
هزيتله راسي بموافقه وف اقل من دقيقه كان جه بعد م شاورلي ع مكانه
_ خلي بالك من نفسك ، ومحدش يقولك تعالي معايا تروحي معاه
ختم كلامه وهو بيضحك بمرح
= ده ع اساس ان اى حد ممكن يضحك عليا
_ لا يحبيبتي ده ع اساس انك طفله واحنا بنقول كده للاطفال
بغض النظر عن انه مكذبش ، وان انا غصب عني بطلع الطفله ال جوايا معاه
بس اي حبيبتي دي يجدع ، اي خطف القلوب ده يراجل
قبل م ارد عليه كانو اقامو الصلاه ، فخدني وداني لحد المسجد وراح يصلي
صلينا ورا الشيخ الفرض ، وانا حبيت اصلي السُنه بحكم اني عارفه انه اكيد هو كمان بيصليها دلوقتي
خلصت وخرجت من مسجد النساء لقيته واقفلي ع بعد خطوات قليله مدي باب المسجد ضهره
فضلت اتامله بحب لحد م وصلتله ، حطيت ايدي ع دراعه فالتفتلي ، مسك ايدي وركبني العربيه واتحركنا عشان نمشي
فضل يتحرك بالعربيه وانا سرحت ف الطريق مع ايده ال لسه محتفظه بايدي
لحد م وصلنا ل.. اي ده ؟ ده بجد ؟ احنا ف الملااهي بجد ؟!
بصيتله وانا متفاجئه باننا جينا هنا
اتكلم وهو بيرفع كتفه بهدوء مع غمزه عينه
_ كنت عارف انك هتفرحي لو جينا هنا
ارتبكت من فرحتي وانابحاول اجمع جمله اشكره بيها
= طب..شكراً ي نوح ، شكراً بجد
_ امممم ، بس انا مش عايزك تشكريني
رديت باستغراب وانا ببصله بعدم فهم
= اومال عايز اي ؟
_ عايزك تصالحيني
اتكلمت بمرح وانا بنزل من العربيه وهو مازال مكانه ، عشان اغمزله بعيني زي م عمل من شويه
= اما شوف هتبسط هنا ولا لا
رد بعد م نزل من العربيه وقفلها باللوك
_ اها ، يعني لو اتبسطي هنصالحيني
= اينعم ، بالظبط كده
شدني من ايدي بمرح وهو بيضحك بخفه عشان نجري ع الملاهي زي الاطفال
_ طب يلا بقا عشان ابسطك لسنه قدام
ضحكت وانا مستغربه نوح كليا ، بس ده ممنعش اني استسلم ليه واجري معاه بخطوات هاديه اختارها هو عشان ملفتش النظر ليا وانا بجري عشان المرح يبتدي
جرينا ع اول لعبه ، طلعناها مع بعض ، ف حين اني كنت متخيله انه هيرفض يتخلي عن رداء الوقار والعقل ال دايما مرتديه
بس الحقيقه ان ده محصلش ، بل هو ال كان بياخدني عشان نجرب لعبه ورا التانيه بدون م يخاطر ويدخلني مكان مرعب ، ف حين اني كان نفسي ندخل
بس خوفت يقول عليا مش رقيقه وكده هههه ويحس انه خد مقلب فيا
لحد م خلصنا تقريباً معظم الالعاب ال موجوده كلها ، ف وسط ضحكنا ال مزين اليوم بالفرحه والمرح او ضحكه هو
ف حين اني كل م اضحك يبرقلي بعينه عشان اسكت ، مع ان صوت ضحكتي هادي جداً ورقيق ، ههه بهزر معاكو طبعاً ضحكتي ضحكه رقاصه
الساعه كانت تقريباً 3 الفجر وخلاص المفروض هنروح
لحد م لمحت لعبه فشديت ع ايده ال مفارقتش ايدي من اول م خرجنا من بيت بابا
بصلي وهو بيبتسم بحنيه
_ عايزه تجربي اي تاني ؟
= احم ، بص ف لعبه عايزاك تلعبها
رد وهو بيرجع بينا تاني ومتوجه لمكان الالعاب
_ تمام يلا بينا نلعبها
= لا مهو انت بس ال هتلعبها
_ مش فاهم اي الفكره يعني ؟
= عشان انا مش هعرف العب اللعبه دي
_ تمام ، ممكن توريني اللعبه دي
= تعال بسرعه
خدته واتحركنا ع اللعبه ال طلبتها منه ، الحقيقه هي مكنتش لعبه بالمعني الحرفي
_ اي ده بس عشان مش فاهم ؟
= بص هفهمك
_ فهميني
= دلوقتي ده اي ؟ ده مسدس صح !
_ صح
= وال قدامه ده مكان بتنشن عليه صح ! من غير م ترد صح
فانا ي استاذ نوح عايزاك تنشن وتجيب كل الطلق صح عشان عمو يديني لعبه من دول ؟
_ لحظه يماما ، لحظه يحبيبتي مش كتب كتاب هو ، نفسك ف لعبه نشتريها ، لزمتها اي الفرهده دي
= بص هي اجابه منطقيّه ، بس هما معملوش كده ف الروايه
فانا عايزاك تجيبهالي بمجهودك زي الروايات
رد وهو بيمسك المسدس عشان يستعد بعد م اتكلم مع صاحب اللعبه
_ غلط يحبيبتي ، غلط يماما ، مش كل حاجه تتشاف تتقلد
= الاه ، مش البطل عمل كده للبطله ، انا مالي
_ امممم ، ع كده انتي شايفاني بطل
= انا شايفاك البطل بس عارف فين المشكله ؟
رد بعد م صوب 3 طلقات صح بحرفيه من اصل 4 ف وسط م احنا بنتكلم ، وف وسط مانا خايفه من صوت الرصاص ومتمسكه بالجاكيت ال لابسه
_فين ؟
= ان مش انا البطله
خلصت جملتي عشان الطلقه تخرج من المسدس وتغلط ف مكانها لاول مره
بصلي بصدمه بدون م يتكلم
اتكلمت انا وانا ببصله بمرح مصطنع بعد م نكدت انا عليا وعليه
_ ده باين بتوع الروايات دول بيضحكو علينا
فضل يبصلي بدون م يتكلم والمسدس م زال ف ايده ، روحت اتكلمت مع عمو وال كان لطيف بشكل غير طبيعي
ووافق انه يضرب طلقه غير ال فاتت
اتكلمت وانا ببصله بهدوء وببتسم بمرح
_ دايما فيه فرصه تانيه
= يعني اي ؟
_ اضرب غيرها انا قولت لعمو ووافق
بصلي بصمت وبعدين استعد وضرب الطلقه واخدنا اللعبه ومشينا
ركبنا العربيه بعد م حط اللعبه ف الشنطه ورجع مسك ايدي وانا رجعت احاول ارجع جو المرح ال كان بينا
_ نوح
رد وهو مركز ف السواقه بتفكير واعتقد انا عارفه بيفكر ف اي
= همممم
_ انا جعانه
= عايزه نجيب حاجه واحنا مروحين ولا نعمل اكل ف البيت
_ لا انا عايزه اكل برا مش ف البيت
بصلي وهو بيهز راسه دليل ع موافقته ، اتحرك ووقف قدام مطعم بيتزا فخم
فك الحزام واستعد عشان ينزل فاتكلمت وانا ببصله باستغراب
_ انت رايح فين ؟
= هننزل ناكل
_ يعم ناكل فين ؟ اي المكان ده
= ماله المكان ؟ مهو راقي اهو
_ مهي دي المشكله ، نوح اطلع ع عربيه كبده ناكل انا مش هاكل هنا
اتكلم بصدمه وهو بيبصلي بعدم استيعاب
= عربيه كبده ؟!
_ او كشري ، ال يعجبك
= يبنتي الساعه 3.5 الفجر ، مش هتلاقي حاجه من دول موجوده
اتكلمت وانا بربع ايدي بزعل
_ خلاص روحني
بدون م يرد شغل العربيه ومشي ، لحظه انت هتروحني بجد
انا كنت بهزر والله ، انت هتاخد ع كلامي ولا اي ، لا متعملش كده ده انا واحده نسوان ارجع ف كلامي عادي
طب اعيط ؟ والله اعيط ، انا جعانه ..
قبل م اعيط فعلا لقيته لحقني وهو بيقف قدام مطعم كبده ، هو مش عربيه
ومطعم فخم مش بسيط بس مش مشكله ، اهم حاجه اني هاكل كبده
نزلنا ، طلب اوردر ، فضلنا ف صمت لحد م الاوردر جهز
هو بدا ياكل بهدوء ورقي وانا بدات اكل بهدوء اشد
ههه بهزر معاكو طبعاً ، دي كبده يجماعه ، يعني كنت بفترسها طبعاً
خلصنا اكل وحاسب ومكنش ينفع اليوم يعدي كده
اتكلمت وانا ببصله ببراءه كوسيله انه يوافق
_ احم ، نوح
رد بنفاذ صبر وهو تفريبا فهم انا عايزه اي من ال حصل طول اليوم
= همممم
_ مَنِفسَكش ف حمص شام ؟
ضحك بحلاوه وهو بيبصلي بحنية اب فاهم دماغ بنته
= انتي نِفسِك ؟!
هزيتله راسي بسرعه وانا ببصله بحماس
عشان يرد بحنيه مبقتش غريبه عليه اليوم ده
= يبقي انا كمان نفسي
_ طب يلا بسرعه
ركبنا العربيه وهو مازال بيضحك بحلاوه بتخطف دقات قلبي بشكل خطر
قابلتنا عربيه حمص ع الكورنيش جيت انزل لقيته مسك ايدي
=استني هجيب وناكل هنا
_ لا لا ده حلاوته ف اكله ع الكورنيش ، يلا بقا عشان اصالحك
بصلي بعدم استيعاب وهو بيرمش بعينه بسرعه بطريقه..بطريقه حلوه
_ هو انتي ده كله مصالحتنيش ؟
= بص هصالحك لما ننزل ، يلا بقا
هزلي راسه ونزلنا فعلاً ، راح عشان يطلبلنا وانا قعدت ع كرسي قدام النيل مستنياه يجي ، وبحاول ابعد تفكيري عن ال جه ف دماغي
لحد م جه قعد قدامي وهو بيبص لمكان نظراتي
التفتله وانا باخد شهيق وزفير عشان اهيء نفسي لل هعمله
مسكت ايده لاول مره بمبادره مني طول اليوم ، او يمكن من يوم م اتجوزنا ، او من يوم م عرفته
بصلي وبعدين ابتسم بحلاوه بدون م يتكلم
_ شكراً ي نوح ..شكراً عشان اليوم اللطيف ال اول مره اعيشه بالمناسبه
وشكراً عشان اهتميت بزعلي واهتميت تصالحني ، وشكرا عشان..
عشان خلتني احبك من غير م احس بنفسي ومن غير مانت تحس بيا
انمحت ابتسامته وسحب ايده مني بسرعه وهو بيبصلي بصدمه
= تت..تحبيني
اتكلمت بمرح غريب ع الموقف ككل
_ لا متقولش انك اتفاجئت ، عيب ع ذكائك والله
اتكلم بارتباك وهو بيحاول يجمع جمله ع بعضها
= اان..انتي..انا
ضحكت من ارتباكه ال المفروض كان يبقي محتلني انا ع عكس المرح ال محلتني بدال الارتباك
_ اي ي نوح ، انت متفاجيء ولا اي ، ده الشركه كلها كانت عارفه
ده ابويا نفسه كان عارف يراجل
= حوراء انا..
قاطعته بهدوء وانا بشد ع ايده ال مسك بيها ايدي كانه بيواسيني انه مش بيبادلني نفس الحب
_ انا عارفه انك مش بتحبني ينوح ، وانا مش بجبرك تحبني
ولا قولتلك عشان تقولي وانا كمان بحبك ، لا انا عارفه انك اكيد مش هتخدعني ف حاجه زي دي بالذات
انا بس عايزه اعرفك حاجه
رد وهو بيشد ع ايدي اكتر وبيبصلي بتشجيع ، مع حاجه غريبه ظهرت ف عنيه
= قولي ي حورا
الدلع ال قاله شجعني اكتر اني اتكلم وانا بشد ع ايده اكتر
_ عايزه اعرفك انك حقي ، وانا مش بسيب حقي لحد ياخده مني
وانك هتحبني كده كده يعني ، ده مش بمزاجك ع فكره
ضحك وهو بيحاول يخفف حده الموقف ، او حده كلامي ، مش عارفه
= ده انتي واثقه بقا ، بس ازاي مش بمزاجي يعني ؟
رفعت كتافي بلامبالاه وانا برد بهدوء وبشاور ع قلبه
_ لانه فعلاً مش بمزاجك ، ده بمزاج ده
خصلت كلامي ف نفس اللحظه ال وصل فيها حمص الشام
بدات اكل بحماس كاني مفجرتش قنبله ف وش نوح من خمس ثواني
قنبله خلته هو نفسه مش عارف ياكل
بس اي المشكله ،خليه يعرف هو داخل ع اي ، ده حبيبي برضو ومينفعش اخده ع خوانه
خلصنا اكل او انا ال خلصت اكل ف حين انه مخلصش ربع الكوبايه حتي
حاسب وبعدين فتحلي الباب ركبنا العربيه واتحركنا عشان نمشي
_ نوح
= نعم ي حورا
_ انا صالحتك ع فكره
ضحك بهدوء وهو بيبصلي بحلاوه بعد م اتخلي ع ايده ال بيسوق بيها ومسك ايدي رفعها ع شفايفه باسها
= طب الحمدلله يست حوراء
ضحكتله بهدوء وانا بستسلم لايده ال ماسكه ايدي وانا بفكر ف ال هعمله عشان اوقع سي نوح ف حبي ع جدور رقبته
ولا لا بلاش رقبته احسن يجراله حاجه ، وانا فدي رقبته وفدي رمش من رموش عيونه
عيونه ، واه من عيونه ال كل شويه بتلتفت تبصلي كانه..كانه بيطمن عليا وبيطمن اني بخير
_ اي ي نوح ، عمال تلتفتلي لي
اتكلم بجديه غريبه عن مرح اليوم
= انتي كويسه ؟
_ الحمدلله كويسه جدا ، لي بتسال
= عادي
ضحكت بمرح بعد م فهمت سبب سؤاله من توتره
_ نوح هو انا صعبت عليك ولا ايه ؟
= لي بتقولي كده ؟
_ عشان ده ال حساه منك ، حساك بتبصلي بشفقه
= أكيد لا بس حاسس بيكي
_ عشان بحبك وانت مش بتحبني وكده ، لا انا...
قاطعني وهو بيرد بسرعه ، كانه بينفي تهمه عنه
= انا مش بكرهك ي حوراء
_ ومش بتحبني ي نوح
رد وهو بيبصلي بتشجيع كانه بيحاول يواسيني
= بس انتي قولتي اني هحبك ، ومش بمزاجي ، ولا انتي بترجعي ف كلامك
ابتسمتله بتحدي وانا بتحرك عشان اقعد ف الكرسي براحه اكتر بعد م غمزتله بعيني
_ بكره تشوف
..........
