رواية ذاري النجوم الفصل الرابع العشرون بقلم زهراء السراي
هانت عليك مدامعـي.. فهجرتني
وكسرت قلباً ما أحبَّ سواك
وأنا الذي لولاك ما ذقتُ الهوى
يوماً ولم أكُ عاشقاً لولاك
:
:
:
ليل
_______________
_______
وأن تجني ثمار تعبك
هذا يعني بأنك كنت فلاحاً مجتهد
:
:
:
آخر أيام التنسيب چانت تشبه الغبشة
ضوه قليل بس يملي العين أمل
بهالايام چنت أحس بنفسي
مجهدة وجسمي تعب من طريق القرى وبعدها
بس گلبي چان مليان سعادة بأني أديت دوري
چنت أحسب الأيام بالدقيقة
كلما يخلص يوم أگول هانت ماباقي شي ونرجع للمدينة ولحياتنا المستقرة
بس بنفس الوقت چنت أباوع للوجوه الطيبة بالقرية للناس اللي شاركونا حياتنا خلال هالسنة
وأحس بغصة
هاي الأماكن البعيدة انطتني دروس بالصبر مچنت أعرفها
هسه واني أجهز جنطتي للرجعة
شعوري غريب مزيج من فرحة الانتصار
لأن خلصنا المهمة بنجاح وبين خوف من الجاي التنسيب علمني إنو بيتي
هو وطني الحقيقي سواء چنت بمركز المدينة أو بآخر قرية منسية بعيدة باطراف البلد ماكو استقرار
وحضن مثل البيت
واخيرا حل يوم الانفكاك
من وقعت الورقة الأخيرة حسيت بوزن جبل انزاح عن صدري استغرقت براءة الذمة
اسبوع كملت الإجراءات براءة الذمة من مكان التنسيب سلمت المكتب العهدة الأختام
التنسيب مچان بس دوام
چان اختبار اليه ولهاجس كزوجين
وقبلها كحبيبين بعد المسافة
الانشغال تعلمنا شلون نتحمل البعد
وبساطة العيشه وقلق الحالات الصعبة
اللي تجي ولازم بابسط الامكانيات نساعدها
طلعت من المركز الصحي وأني ألتفت
شفت ذيج الغرفة الصغيرة اللي شهدت
تعبي وتعب زميلاتي
وجرأتنا بطرق العلاج احيانا وخوفنا
ودعتها بدمعة محبوسة وطلعت
بهاليوم وصلني هاجس
طول ذيچ السنة چان رجل بكل معنى الكلمة
واخيرا مراجعة دائرة الصحة التابعة الها
سلمت الانفكاك وطلعت بعد مااستخدمت رصيد اجازاتي المتراكم اخذها كأستراحة شهر عسل
قبل الاقامة القدمى
لزم إيدي واحنا طالعين وگالي
- خلصت أيام التعب وبدت ايام الدلال
راح أعوضج عن كل لحظة تعب عشتيها
هناك
كلماته چانت أحلى من أمر الانفكاك نفسه
وانتهت ايامي بذاك المكان اللي تعرفت بي
على اصدقاء وصديقات واطفال
حلوين انطبعت صورهم وذكرياتهم
بذاكرتي للأبد
رجعنا والطريق كله مشاعري متضاربة
بين فرح ودموع
-غير اعرف ليش تبچين
-تذكررت ام هنودي اجتني
الصبح سلمت عليه
-الله يرحمه طير جنة
هسه عندي موضوع وياچ
-گول عيوني
-ماحان شهر العسل
-جدااااااا
-العببببببب
گالها وطلع سريع بالسيارة للبيت
اني عندي ثلث أسابيع
وهو عنده اسبوع بس گال احاول
احصل اجازة يومين استراحة
شبعت بيهم نوم وهو يحاول ياخذ
اجازة نطلع بيها للشمال او اي
مكان ثاني نتونس
سمعت صوته بالمطبخ طلعت
وشفته يفتح الجدر يشوف الغدة
-ميوووووو
التفتتلي وفتح ايده
-شنو لچ عتوووي اني
-باميا مثل متريد
وبشرني
مد ايده بجيبة طلع هويته
الفسفورية
-وبعد متحتاج شي
-لا هاچ
طلع ورقة الإجازة
الموقعها مدير قسمة
بالإضافة لهويته
وهوية السلاح الشخصي او الرخصة
اللي تسمحله يشيل سلاحه ويا بأي
مكان
-يعني هاي هي
-اكيد هاي هي بس بلغت
اخبار اداري بمكاني يعني بحال حدوث
طارئ او انذار
-ويييين نروح
-وين تردين للشمال
لبغداد للبصرة براحتچ
صفنت وفكرت ابتسمت بمجرد
مامرت ببالي الفكرة
-بشري شقررتي
-يومين بگاعنا
-هلااااااا بالاصالة هلا
بالشيخة
ضحك وكفخني
-لچ سفرة سفرررة يا گاع
-والله شبيك يومين بالمزرعة
والباقي بالشمال
-ليش مو بغداد
-انت حاب بغداد
-يومين ببغداد وللشمال يومين
-تمام وياااااك
-جهزي الجنط بعد مانتغدة
تغدينا وبديت اجهز وهو بالحمام يدندن
طلعلي وجهه يجنن مرتب شواربه ويا سماره
صاير فتنة
-ياحلو
التفتلي وضحك
-نعم محتاجة شي
-متنطيني بوسة
-مرتي ماتقبل
-قنعها شو حلووو تسوي واهس
نزل راسه عليه وباسني
-انعل ابو مرتي شو تعاي
جعص وجهي جعص وخبصني
كالعادة بحضنه
-شلون اشتغل
-وانت بحضني عادي
ساند راسه على كتفي ويباوع
-شو بس بجايم شنو ماخذ وياي وطن
-سفررررة ميصير ناخذ اشياء قليلة ادب
-صح اعتذر
طبطبت على خده وبسته
-عفيه بالحباب
وكف فتح الكنتور وطلع ملابس
وشمرها بالجنطة صفنت علي رجع لمكانه
گاعد محاوطني وساند فكه على كتفي
-ما كذبتي ميصير ناخذ اشياء قليلة
ادب لازم ناخذ اشياء سافلة
ضربتة ببطنه تألم بصوت
التفتت ممصدگة
-وجعتك
-لا حبيبتي
گام ومبين صدگ متوجع
-هاجس بيك شي شو اشوف
-الم بهالمكان المتليف
-ليش مرجعت للدكتوووور
-ماعندي وقت ماالحگ
ويلا كملي نطفر للگاع
خل اتصل بالحارس ينظفون المكان
كملت تجهيز الجنط ورحنا لبيت
جدو سلمنا عليهم وطلعنا لطريق
الگاع بالطريق اخذنا اكل جاهز
ومسواگ خفيف لليومين
وصلنا تلاگينه ويه العائلة اليحرسوها
فاتحين الابواب وريحة المعطر والمنظفات
تفتح النفس سلمو وهاجس صاح لأبنهم الصغير
خله بيده فلوس ودخلنا
فاتحين البنكات يهوون المكان
خليت الجنطة بغرفة النوم البسيطة
وطلعتلة واگف بره وعينه مادها على الخضار
وجمال المكان
سندت نفسي علي
-حقهم بيبي وجدو يتعاركون عالگاع
-اثنينهم ادبسزية
-ههههههههههه
ليش بالله
-عماتي حقدهن عاميهن وورثونا
هالسوالف واحنه مافاهمين
وبيبتچ مخليتچ تكرهينه بدون شوف
وهي وياه من يتلاگون دگ سوالف
وذكريات
-اني مااكرهكم شو انتو اول معرفتوني
لسانكم شطوله وتتجاوزون واني هم
مثلكم لان اسمع بحقد عماتكم دست
بييييها
وبعدين وين السوالف والذكريات
بيبي تگضيها بسامير ويه جدو
-خلينا ساكتين جدي لوما العمر والخجل
چان لزگها بوسة طير ملامحها العرمة
حاوطت زنده وضحكت
-والگاع الاختلفت عليها العوائل
صارت مهرب للأحفاد من الضغوووطات
بعد ماانجمعو رغم كل الماضي قبل
التفت باس راسي ورجع يباوع
اشرلي على مكان وگفتنا من تعاركنا بسفرتي
الجامعية
-هنا شفتچ اول مرة بنت الكل………
گرصته وتراجع
-بنت الحباب سلطان
ولسانچ يلوط اذانچ
-اعترف انك وگعت بغرامي من اول
لحظة
-لا بس انعجبت بچهرتچ هوووواي
بحيث رجعت للبيت گلت لنوح
هاي القرچ مامرتبطة بالجامعة
گال لا مكروها محد يتقربلها
-چنت انتظر واحد مكروه مثلك
يلا ارتبط
-عصابة مال ثگل دم وغثة مو زواج
التفتلي دفعني لداخل البيت وسد الباب
-هاااااا سلامات
يفتح بقميصه ويتقربلي
-السلامات شنوووو
-شبييييك يممممه تحولت
-اريد اشعل ابوچ اليوم
-لتغلطططططططط على بابا
ضحك ووگف گبالي
-جديات ليل شوفيلي الجرح بي
شي
باوعتله فحصت المكان
-لا بس احمرار بسيط بس
لا خراج ولا دم
انت من تسبح تليف المكان تضغط علي
-تقريباً
-نرجع لدكتورك باچر
-لا حبيبتي ابو صعبة موجود هناك
هسه راح اخابره يحجزلي لنفس الدكتور
ماله
-قلقتني والله
-تعاي اگلج شغلة ثانية
-شنو
ضحك عليه وضربني كلة
واخذني للغرفة
-تعبان ونعسان
تمددت وفتحتله ايدي
حضنته والعب بشعرة القصير
-اذا متگدر نرجع للبيت
-ماكو گوة حصلت الاجازة
دلكت راسه وهو غط بالنوم
واني اخذني الواهس ويا حتى الغدة
نسينا
للعصر حسيت بي يتسوفل فتحت عيني
-شتسوي
-مشتاق
-وخررررر جوعانة
سحبت نفسي منه وطلعت للمطبخ
انحبش بالاغراض الجبناها اكو شاورما
بس بردت
طلعتها احميها عالنار وطلعت صمون
وهو يحوس ورايه
-شتسوي
-مشتهي نرگيلة
-ممنوع عليك
-جگارة
-انت مو تركت ياعيني
-بوسيني
-هاي سهلة
تقربتله بسته وهو يلگط منا ومنا وياكل
-انتظر اكمل
-كملي راح افرش مفرش بالحديقة الوره
طلع شغل بروجكتر وفرش ورجعلي
اخذنا الصينية ورحنه
الجو چان يجنن نسمة حلوة تداعب الروح وتطفي حرارة الشمس اللي بدت تنسحب وتترك السمة صبغة برتقالية دافية
والحديقة الورا جانت عبارة عن قطعة من الجنة ريحة الثيل المبلل وشجر النارنج
والورد الرازقي اللي متخلى منه هالگاع
من سنين
گعدنا عالمفرش والبروجكتر يعكس ضوة خافت على وجه هاجس
الملامح اللي جانت قبل شويه
غرگانة بنوم عميق هسه صحت
ونظراتة المو راحة تحاوطني
گعدت بصفة وريحة الشاورما والحموضة مالتها فاحت
هو چان يباوع للاكل بس عينه ما فارگتني
يحوس بيده يريد يمدها بس مو عالاكل
-ايييييدك بس عالاكل
-اريد اضوگ
-هاااااجس بطل سوالفك
واكل زين ترى اليتمرد يميييي يتحاسب
اخذ اللگمة من إيدي وعض أصبعي بخفة
-آخ لو كل المتمردين عدهم سجانة مثلچ
- اكل لا اسجنك
ضحك وبلش ياكل وكالعادة كم لگمة وبطل
- تدرين هالگعده ناقصها شي واحد
- چاي مهيل
تقرب خله عينه بعيني
ومسح على خدي
- لا ناقصها نعلن الحرب على هالمسافة اللي بيني وبينج
-والمطلوب
- حني حبيبتي حني
-جوعانة هاجس واگعد راااااحة
-تنگطين سم
گالها وراح جاب مخدات ورجع
شلت الصينية وغسلت ورجعتله
بدأ يشاكسني تمددت عالمخدة
سحب المخدة من جوه راسي خلاني
أنام على رجله
يلعب بخصلات شعري وكل شويه
مسويله شغلة يزعجني
-تدرين بت سلطان من اجيتج قستيلي ضغطي
وراشة عطرچ المزعج
ردت انگرچ بوسة اطير چهرتچ
-لتكذب چنت تكررررهني اصلا
-هي هنا المعضلة اكرهچ وغثيثة بس
لابسة حجاب كلاوات لونه وردي
ومخليه هاي سوالف البنات على شفتچ
ومتوترة وانتِ
تششتغلين گلت هالقرچ تشتغل
لو تسويلي اغراء
-وبوراها انرگعت بنص وجهي بجهاز الضغط
-وتركوني وياچ من فقدتي الوعي
والقميص انفتح وشفت بلاوي
شهگت وهو ضحك
-ياغبية لابسة سكراب ششوف منچ
بس ضفيرتچ وگعت وشلتها خليتها جوه
الحجاب ساعتها گلت هاي مو خوش
سالفة شنو اكرها بس اريد احضنها شهالازعااااج
جعصت خدوده وهو مستمر يخبث عليه
بسوالفة تمدد بصفي حاضني وسط هالهدوء
الطبيعة حوالينه جانت تشاركنا هالليلة
الأشجار تميل ويه الهوا
والضوة الخافت يستر جرأة هاجس
وشطحاتة الغير متوقعة
چانت لحظات راحة حقيقية
بعيد عن صخب المدينة وقلق الشغل
فجأة گام هاجس
مد إيده إليه وسحبني بخفة
دخلنا للبيت وصوت خطواته
على الأرضية الخشب چان هو الإيقاع الوحيد اللي يكسر هدوء المكان
شعل الضوة الخافت
وراح للمطبخ الصغير
واني وراه
اراقب ظهره وكتافة وشلون يتحرك بثقة
كأنه يعرف تفاصيل هذا البيت قبل لا ينبني
يفتح الخزانات يريد يسوي چاي
اجيت اريد اسوي مقبل رفعني بين
ادي گعدني گباله عالكاونتر ويسوي
الچاي ويسولف
- تدرين ذيچ الأيام من چنا نلتقي كل يوم بالمستشفى
تفترين اول متوصلين بگعبچ
افز على صوت الرنة واعرفچ اليوم خافرة يمي
ابتسمت
-اي هذا الكعب بس برستيج اول
مااوصل اطلع الفلات البسه
-واني بداخلي عاصفة ضحك
على طولچ بعد متنزعين الكعب
-وچنت تسوي نفسك ممهتم
وانت حتى صوت رنة الكعب عالارضية تعرفه
-تفااااصيلچ لزگت بمخيلتي بلا ارادة
مني يابربوگ
گالها وهو يصب الچاي ويجي يحاوطني
وعينه بعيني يحرك الخاشوگة داخل الاستكان
ومركز بيه
ترك الخاشوگة وتقرب اكثر سند ادي
عالكاونتر شبك أصابعه وخلاهم جوه فكه
وبدت عيونه تتلاعب بملامحي
-إي چنت أراقب وأحترگ
صراعنا ما چان بس صراع قديم
بين الاهالي چان صراع عقول
إنت تردين تثبتين إنچ قوية وما تنهزين
وأني أريد أثبت انچ وحدة بربوگ
ضحكت وهو ابتسم
-هسه مافهمت چنت معجب بيه لو لا
-خليط بين الاعجاب بچهرتچ والحقد
على شخصيتچ المستفزة
سكت شويه نبرة صوته صارت أعمق
-من تعاركت وياچ من دخلتي وچانو الضباط
موجودين ورغم هالشي اديتي
واجبچ من طلعتي شفت الدمعة اللي تعلگت بطرف رمشچ كرهت نفسي وقتها رغم بقيت متحاقر وياچ
لأنچ غثيثة وجامدة
ابتسمت ونزلت راسي تذكرت ذاك الموقف
- واني رحت بوقتها للحمامات
وگمت ابچي على سوء ظنك
وتجاوزك بحقي
رفع وجهي بإيده ومسح على خدي برقة
-اني تربيت على إن العاطفة ضعف وإن الحب لازم يتغلف بحديد وقوووووة
چنت أشوف جدي شلون يتعامل وية جدتي
عين تصد وعين تود
ودااااائما ذكر جدة عذبة حاظر بينهم
ورثت منهم هاللعنة عبالي ………
تنهد وسحب استكان الچاي واخذ منه رشفة وكمل
-عبالي الصد راح يبعدني عن احساس الاعجاب
البنيته ناحيتج وانت حسب الاقوال
بنت الاعداء
ابتسم وكمل
-بس شفتي تاليها
الاشخاص اللي أعلنت علمودهم الحرب
وياج نفسهم الوجهو گلبي ناحيتج
بسته من خشمه وضحك وخلة وجها بقرب
وجهي
-يعني جدو الللي حثك على حبي
- اي گال اي شي تسمعه لو سامعة بهالبيت
بحق عذبة وتارثتها باطل
-ومن كلمة وحدة من جدو نسفت كل
تاريخ الحقد الدفين بينه
-الندم بعيون جدي وضح هواي مسائل
مراح ننقاشها لأن تخصهم
-وشتضح
-غيييرة نسوان مثل ميگول
-وانت چنت تسگيني سمممم كلامك كل يووووم ياخبييييث
ضحك وسحبني منزلني للگاع
ونزل راسه يباوعلي براحة
- أحس ذيچ الأيام من الكره المتبادل
بكل صراعاتها ومشاكلها
هي اللي خلت لهاللحظة طعم
لوما ذاك السم اللي چنا نتراشق بي
ما چان ضگنا هذا العسل هسه
مسح على شفافي بطرف اصبعه
-همجي
ضحك ودفعني يمشي بيه للغرفة
امشي لبسي
-وييين
-نطلع نتمشى ونگعد عالشط الجو
حلووووو بما ان شبعنا نوم
مشيت بسرعة لبست بشت
عالتراك وحجابي وطلعنا نتمشى
المنطقة حلوووة والخضار وريحته
ترد الروح گعدنا عالشط عالجرف مسوين
نزله درجات
نزلت رجليه للمي وهو وياي
فجأة باوعلي
-ليل
-عيوني
-اريدچ تردين بصراحة
-هممممم
-هم انعجبتي بأحد بالجامعة منا
منا
-ابد مالحگت اساساً
دراستنا صعبة ومكثفة ويادوب
الحگ اكل وانام تجيني ايام
حتى ماانزل لأهلي
بس ليش هالسؤال
-مجرد سؤال
-الماضي ميتحاسب علي الانسان
هسه مثلا گلت چنت تحب بنية
بالمعهد وياك هم گلتلك شي
-لتكبرينها لچ سؤووال والا اعرفچ
مكروهة غثة ومحد يباوعلچ واني نفگتچ
ضربته على كتفه وضحك
سندت نفسي علي وعيني
عالمي وهدوءه
-تتخيل بيبي وجدو چانو
عايييشين هنا
-سر تمسكهم بهالگاع غريب لدرجة
خلونا احنه كذلك متمسكين بيها
-والرازقي اللي مااتذكر خلت منه هالگاع
-نفس الشي وحتى حديقة البيت
شفتيها ببيتنا وبيت
جدي وحتى بيتكم
هم تعرفين سالفة الرازقي
-لا بس اعرف بيبي تحبه
- اني اعرفها
ابتسم وبده يسولفلي
- من چنت صغير جدي كلما يزرعه
جدتي سهاد تغافله وتقلعه من الگاع
قلع من كبرت وتمرضت گامت توصي عماتي
الى أن بمرة لكيت جدي جايب شتلات
جديدة شتلها وگعد مگابلها وسألته
-ليش جدتي تكره هذا الورد بالذات
-شگد چان عمرك
-بالعشرينات المهم گال جدي
ريحة هالورد تردني لسنين صباي
وجدتك كل شي متعلق بصباي تكرهة
وانا مااكسر خاطرها اخليها تشلعه وارد
اشتل ومااحاجيها
-بطل تشتله جدي اذا هيچ كارهته جدة
-بويه كل واحد ويحن لأصلة
جدتك انا صار عمر فرض علي
وانا الممنون اخذها لبيوت اهلها الباشوات
ومگابرهم
انا مالي غير گاع اهلي
وهالرازقي يردني لذاك الوكت
وهاي قصة الرازقي يگول
چنت شاتله يم الساجية بصف
البيت هسه وصدگ شفتي هسه
نفس الساجية مليانة رازقي
ضحك وحاوطني
-اني حاس چان يزرعه لجدتچ البربوگ
عضيته اضحك على تصرفاته
وگلت للمستقبل راح اعرف قصة الورد مسترخين
مدينا بصرنا على ضوة القمر
العاكس عالمي واسترخينا بهالهدوء
لمدة ساعة واكثر
اصوات طيور بالسما بعيدة
وصوت جلجلة صراصر الليل
حفيف اشجار الصفصاف عالشط
كل هالاشياء خلقت لوحة
فنية هادئة صابتنا عدوى
هدوئها وامتدت ويانه للبيت واحنا
راجعين مجرد حضني هاجس وغفيت
بهدوء بين ادي
الصبح گعدنا رحنا لگاع بيبي بالهوا والفي
وهو اخذ السيارة نص ساعة ورجع جايب ريوگ
تريگنا جوه قمريات العنب
هاليوم عبارة عن هدوء راحة
وتأمل گاعدة امشط شعري
وهو بصفي يتصفح بتلفونه
اجانة صوت طفل يصيح
-عميييييي
وگف هاجس وطلعله ورجع بيده
نجانة صغيرة
-شنووو هاي
گعد بصفي مبتسم
-وصيتلچ على حنة
ياربي على شعوري الحلو بلحضتها
احلى شي بالدنيا الانتبااااه للتفاصيل
بالليل نسولف وگتله مشتاقة للحنة
-ها ياحلوووو منتبه لتفاصيل التفاصيل
-ماميت عليچ
-هههههههههههههههه
لعد شنوووو تسوي بالحنة
-اشتاقيت لأيام المعارك بينا
من تصعدين وياي وتملين المكان ريحة حنة
نقرت خشمه ودخلت للبيت
جبت مي وكيس اخلي حواليه
واني اخلي حنة
گعدت يمه فتحها وضحكت
-شوووو جاهزة
-وصيتهم يسوونها كاملة مثل ماتحبين
مي ورد وهيل وقرنفل وهالحبشكلات
-اعترررررف تحبنيييييي يلا
-اعترف ونصصصصص
گعدت اخلي وهو گبالي استغل فرصة
ايديه المتدمرة وبيها اكياس حتى
متحمر وگعد يتسوفل
كملت ورفعت شعري بالقراصة
-شگد تبقى
-فد ساعتين
-امشي دخلي جوة شو صار هوى
دخلنا هو وراي يحوم
-مو تگولين اتعب من غسلها اني
اغسلها الچ
باوعتلة صفح واشتغل بالمطبخ
اجهز للغدة
-فگس لهالعين لچ لتباعين صفح
-راح اگص شعري ولادي حتى مااحتاج
احد بالسبح
-هسه دجربيني شبيچ
-شكراااااا ماااريد
كفخني وطلع للغرفة يرتاح
صارت ساعتين دخلت للغرفة
لگيتة راجع نايم
دخلت سبحت وطلعت انشف بشعري
ضربني عرج الخباثة ورحت اقطر مي علي
نكثت شعري حوالي وتساقطت القطرات
على ظهره العاري نز ورفعلي راسه بنعاس
-سبحتي بربوگ شتفقنا
-گوووووم نشف شعري
سحب المنشفة وشمرها على راسي
غطى وجهي كله وظليت أضحك وأحاول أطلع راسي من جوه
لزمني من كتافي وثبتني بين رجليه وهو گاعد على طرف السرير
وبدأ ينشف شعري بحركات هادئة
عكس لسانه اللي ما يبطل يشمر سخافات
- لو أدري الحنة هيچ تهدئ أعصابچ
چان غرگتچ بيها من أول زواجنا
من طنگرتي چنتي مثل القنبلة الموقوتة
هسه من خليتي الحنة صرتي اليفة
درت وجهي عليه نص دورة
وباوعتله
-يعني اني حيووووانه
رجع راسي ليگدام وينشف بي
-تقريبا
-امممم عادي المهم هسه
انت اعترفت إنك تخاف مني من ازعل
-اخاف عليچ مو منچ والا انت هسه
براشدي اطيرچ للشط
-جرررررررب وشوف اني اطييييرك
ضحك ضحكة هزت السرير
وسحب خصلة من شعري شمها
-ياخوف بربوگ
-كتلك اگصه ولادي احرمك منه
تقرب عليه نزل راسه سنده
على كتفي وصوته المتلاعب يهمس
-جربي تسويها وشوفي شلون اطيح
حظج
-لا بالله انت التعبان منه لو اني
-اذا تعبانه منه خلي عليه غسل وتنشيف وشم
وگفت سحبت شعري ودفعته بخفة وأني أضحك
-هااا يعني السالفة مصلحة
تريدني أبقي شعري طويل بس حتى تتونس
- إي مصلحة ونص
گمت وگفت گبال المرايا أعدل شعري اللي بدأ ينشف ويتموج بلمعة محمرة نتيجة الحنة
باوعتله من خلال المرايا
-هااااي هي صار الشعر اختصااااصك مالي
علاقة بي وقت الحنة انت تتورط
وگف وراي حاوطني بين ادي ونزل راسه على كتفي يباوع لشكلي بالمرايا
-تم على هالخشم
التفتت رفعت نفسي بستة
وتملصت من بين ادي
صفن عليه
-ياااااابنت ال…………
-هااااااا
-بنت الحباب لتبوسين وتنهزمين اثبتي بمكانچ
-امشششي نتغده جعت
مشى ويايه وهو يفتحلي الباب
-هيييين بنت سلطان واليوم بعده بأوله
بين الغده وسوالف هاجس اللي متخلص
بالليل مخليني اتصفح ويا بتلفونه
عالفيس بوك اجته أشارة على بوست
فتح البوست صورة بيها هو وياه ابو صعبة
وابو روان واثنين مااعرفهم
كاتب ابو صعبة جوه البوست
"مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ ۖ فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ ۖ وَمَا بَدَّلُوا تَبْدِيلًا"
-منو ذوله
-نصير الله يرحمه استشهد ببداية
دخول دا*ش
وهذا ابو رانيا صاحبي طاهر الأستشهد
بالسيطرة
هدأ صوته وسكت سد التلفون
تحركت سندت راسه على صدري
-الله يرحمهم
-طاهر من خوفه على زوجته قربت تنجلط
علي رجع هنا واني وياه لزمت السيطرة
وصار اللي صار وفجر الارهابي نفسه وهو
حضنه
-لا حول ولا قوة الا بالله
-اليقهر زوجته واولادة الثلاثة
بقو بلا اي احد ماعدى اهله الله يباركلهم
البنية أهلها راحو بالاحداث لأن بالغربية وبنص
الاحداث تخيلي صدمتها
ماباقي بس امها واختها واجو عاشو يمها
-لا الله الا الله
حضنته حيل خنگته وكأنما فهم
شحسيت حاوطني هو ويمسح على اكتافي بهدوء
-اني رجعتلچ خلص كل شي حبيبتي
بس قدري هالشي تهشتكي تبشتكي
-مثلا شسوي
-بدلة رقص حبشكلات
دفنت راسي بصدره حتى يسكت
-خيالك واااااسع الهمجي
تغاضى عن كلامي ونمنا للفجر دگ المنبه
وگعدنا تجهزنا وطلعنا لبغداد
الطريق كله مشغل اغاني رياض أحمد
-تحبه
-اكثر اثنييين احبهم
رياض احمد وچهرتچ
-هم نعمممممة من تحبني
وصايرة عندك بالمركز الثاني
بعد صوت رياض احمد
يغني ويا بصوته الحلو ويدندن
الى أن دخلنا بغداد وهو على اتصال
بأبو صعبة دخلنا وتوجهنا لفندق
اخذنا غرفة وقت الغدة واجانه
الاتصال
-ها خووييي لا تكلف نفسك بشي
هاااااي هي جاااايين
-ها عيوني
-غيري ملابسج معزومين عالغدة
ابو صعبة وعائلته
-شو استحي مااعرفهم
-ابو صعبة اخوييي وعائلته يوجبون عائلتنا
يلا حبيبتي
-دخلت للحمام رتبت نفسي وطلعت
اشوفه يتراسل
-خلصت عيوني
-اي خلصت بس ثواني
ترك التلفون دخل الحمام
واني واگفة ارتب الحجاب
رن تلفونه برسائل ماعرتها اهمية
شويه وطلع كاشخ
-محروووس من عين البشر
ضحك ولزم تلفونه اتصل
-ابو صعبة نستغل الفرصة مناك نطلع للدكتور
اتفقو وغلق الخط
-هااااااجس نسينا تقاريرك
-راسلت نوح مصورهن بجهازه ودزهن
اليه
-تمام يلا ياحلوووو
-معجبة اليوم
-وكل يوم
خله كفه بكفي وطلعنا نزلنا
للطابق الارضي سلمنا كارد الغرفة وطلعنا
لمطعم بوسط بغداد
شوارع بغداد وجمالها رغم كل شي
تبقى المدينة الاجمل اللي عشت
بيها ست سنوات من حياتي
باوعلي
-حنيتي لبغداد
-هووووايه
-ننتقل
-لا مو لهالدرجة اني احب ولايتنا
هووووايه ومستحيل افارگ اهلي
بعد ازدحام وسوالف وصلنا
والتقيت واخيرا بزوجة ابو صعبة
سلمت علي ورد السلام
وهي طلعت من مكانها بوستني
بنية حنطية حلووة بالعمر تجي بعمر اصغر من هاجس
عدها اولاد اثنين اعمارهم بين ال٨ وال٦
-اعتذرررر منچ تأخرت بواجبكم
صادف زواجكم ويا ولادة هالنتفة
تفاجئت بسلة طفل عالكرسي اللي بصفها
بيها بنية
-فدوووة احنه اللي مقصرين لو اعرف
چان اجيت
گعدنا وهم الاثنين باوعولنا
هاجس وگف عدل تيشيرته
-نترككم تسولفون وتلغون ناخذ نفس
نرگيلة هناك
ابتسم ابو صعبة وزوجته اشرتله
-روووحو لتخنگولي الطفلة
گامو وهي التفتتلي طلعت علبه من جنطتها
-هايه هديتچ وعذررريني والله ظروفي
حكمتني بسبب ولادة زهورة
-ياحبيبتي ليش هالتكلفة هايه
-شي بسيييط متعرفين هاجس شگد صاحب افضال علينه
-اخووكم هووو علاقته بأبو صعبة قوووية
متفوت ساعة مابينهم رسالة لو كلام
-هههههههههه حتى انت عودوچ تسمي ابو صعبة
-ههههههههه والله اعتذر مااعرف اسمه الحقيقي
-اسمه مُصعب ومشوها الولد علي ابو صعبة
واني اسمي أديان
-عاشت الاسامي حبيبتي والحلوين
-هاي النتوفة زهراء اخر العنقود
وهذا الگاعد گبالچ ابني الچبير جود
ضحك جود وبينت اسنانه المكسرة
-واللي لحگ ابو وعمه هذا الوسطاني
اسمه فهد
-فدووة ربي يحفظهم
تلفون مصعب يمها دگ سحبته من الميز
وباوعتلة شفت اسم روان عالشاشة
تأففت وفتحت خط اجاها الصوت
-عموووو
تمط الكلمة مط ردت عليها أديان بنرفزة
-نعمممممم
عدلت صوتها وسألتها
-هلو خالة
-هلا
-عمو موجود
-لا محتاجة شي
-بس گليله عادي يستلملي راتب بابا وياه
-احنة ببغداد
-شو مگلي عمو
-هاي عرفتي حبيبتي محتاجة شي
بعد
-شكرا اني بعدين اتصل بي
غلقت الخط بدون متودعها وبين عليها
الانزعاج لدرجة باوعتلها اخفف حدة الموقف
-الجماعة تأخرو
ابتسمت بأنزعاج وباوعتلهم جايين ناحيتنا
اول مگعدو دگ تلفون هاجس فتح الخط ورد
-ها عمووو روان شلونچ
باوعتلي أديان هزت راسها
-هاي متلگه مصعب تركض لهاجس
متلگه هاجس تركض لمصعب المدللة
تقربت منها
-الظاهر مسويتلج موقف
-اووووه موووواقف وصلني خبر
سالفة زووواجكم هي هاي تحببببب تثير
الاهتمام حواليها
انتبهت لهاجس گام والتليفون بيده
ورجع
سأله مصعب
-شكو
-تگول عبالي موجودين تستلمولي راتب
عمتها مريضة ومخلصين مصرف دزيتلها وطن
ياخذها تستلم
تقربتلي أديان
-عوزهم بس يرضعوها
ضحكت وهي ضربت كفها بكفي من جوه
الطاولة
رفعت راسها لمصعب
-شنو عيوني عزيمتنا للعرسان بس
عصير وأراگيل
-الضلع هذا يشلع عيييييني
كالها مصعب وتخبل مله الميز اكل من كل الاصناف
صحبتهم حلوة وسوالفهم
وذكريات اصدقائهم حااااضرة ببين موقف
وموقف خلصنا الغدة وشربنا الچاي
ورجعو أرگلو بره وهي اخذت الطفلة
غيرتلها ورجعت
-شتگولين نروح لفد مكان حلو بين ميرجعون
من الدكتور
-ليش متتفضلون يمي للغرفة ترتاحون
-دمشششي نتونس ذولة الاثنين شغلهم ميخلص
-نروح مكان هادئ
-يلا ياخذونه بطريقهم
فعلا خلصو ارگيلتهم وطلعنا
الاولاد مقبلو يبقون يمنا راحو
وياهم واني وياها والطفلة
گعدنا بكافيه يقدم حلويات وعصائر
هاااادئ ومرتب
الطفلة نامت وهي بحلگها كلام
باوعتلي ونطقت بخجل
-شوفي ليل اني مو قصدي اخلي البنية
تنقهر او اقلل من قيمتها بس مستفززززة
وافلامها هوووايه بين فترة وفترة
تسويلها فلم عليهم وهم من حبهم لأبوها يتغاضون عنها
-فاهمتج حبيبتي
-تعبت من الكلام وسكتت گمت مااعاتب
مصعب يعني ماعدها وقت محدد
شوكت ميعجبها تتصل تخيلي ب١ متصلة
تريد يجيب ملابسها من اللوندري
بحجة نستهم
صفنت بوجهها
-وراح
-اوووو اكيد راح حبهم لصديقهم
عاميهم عن سخافتها
-يعني ولو اخجل احچي بس موقف
زواجنا ماانسى العياط بالاتصال
واحنة بجلسة التصوير خلانه صافنين
وبالاخير اجت للزفة شخط مبيها
-اي هي هاي تصرفاتها بكل لمة
تجمع مناسبة لو تتخربط لو تتحسس
من كلام من شي وعمتها مثل الزعطوطة
وياها وياها شتريد تنفذ بحجة
يتيمة
-اني صراحة خليت حدود
-نفسچ خليت حدود بس هي
صلفة ولا كأنه
-خليها هم ازواجنا مو صغار يعرفون
هيچ تصرفات غير مقبولة يمنه
-شنسوي نغلس والله كريم
اخذتنا السوالف
اسلوبها حلو ولطيفة ومتكلمة
موظفة بدائرة حكومية
ومجازة حالياً شخصيتها قوية
واضح هالشي من ردودها لروان
بقينا كم ساعة الى أن اتصلو جايين
هاجس وجهه متغير باوعتله حسيته بي شي
باوعتله فهم عليه
-ها شباب نروح نرتاح
وگفو واني اساساً محاسبة عالحلويات
والعصير وگوة اديان وافقت
مشينا وقبل ليوصلون سيارتهم
وگفنا بوست اديان واخذت النونو منها
خليت فلوس بملابسها
-ليييييش هيج هاي ترديها وحدة بوحدة
-لا والله بس واجب هذا حبيبتي
اشوفچ على خير
-مو تسوووينها اخر مرة
-لاااااا نلتقي عن قريب
ودعناهم وهي مثل مگال هاجس اهلها
ببغداد وهم يمهم طول الطريق ساكت
هادئ
-حبيبي
-عيوني
- شگلك الدكتور شو خوفتني
التفتت ابتسملي
-ليييش قلقة الموووضوع بسيط
گال التليفات يحتاجلها وقت تتحسن
داخلياً كل شي طبيعي حتى علاج ماانطاني
-يعني اطمأن
-مثل ميگولون المصرييين اطمني وحطي ببطنك
بطيخة صيفي
-ايوووا ياگدع
ضحك وتغيرت ملامحة الحلوة للراحة
رجعنا للفندق بلا كلام زايد غطينا بالنوم
مقررين نروح للكاظمية نزور بالليل
وفعلا طلعنا وصلنا بحددود الساعة ٧
نمشي بهدوء والقباب الذهبية
لاحت گدامنا ايدي بيده مرتاحة ومستقرة
وصلن لباب المراد وحسيت الهوا هناك اختلف
بي طعم السكينة اللي چنت أدور عليها بين صفحات الكتب وضجيج المستشفيات وتعب الدوام
نزعت حذائي ولامست رجلي مرمر الصحن البارد
بذيج اللحظة
حسيت كل ثگل بگلبي بده يذوب مشيت لجهة النساء وهاجس اتجه لجهة الرجال ورغم الازدحام
بس چنت أحس روحي وحدي خفيفة مثل ريشة طايرة وياه نسمات الهوا
فوگ القباب ودخلت وتنفست
ريحة الحضرة اللي متشبه أي عطر بالدنيا
خليط من الياس ومي الورد
وبخور العود الأصيل
تنفست و رئتي انفتحت
كأنما چنت مخنوگة وجيت هنا حتى أتنفس صدگ
لزمت الشباك
وبرودة الفضة انتقلت لأصابعي
وحسيت بذاك الهدوء المهيب يلفني
صوت القرآن والصلوات چان مثل النشيد اللي يطهر الروح من شوائب الدنيا
طلعت من الصحن بعد فترة صليت بالحرم
صلاة الزيارة وقريت الزيارة الواجبة
والادعية المستحبة وطلعت بعدها بوقت
طلعت لهاجس بعباية الصلاة اللي لابستها
وهو بدشداشتة الانيقة لگيته سبحته بيده يحرك بيها شافني واجاني
-تقبل الله
-منا ومنكم صالح الأعمال
باوعت مصور واگف
-هاجس خل ناخذ صورة هنا
-تعاي
لزم كفي ومشينا بلغ المصور وگفنا
و كفه بكفي اخذ الصورة
وهاجس طلب منة ينقلها للتلفون منلحگ
ننتظرها تطلع ورقية
مشينا بشوارع الكاظمية الضيقة اني وياه
نسمع صياح الباعة وريحة الچاي المهيل
اللي ماقاومنا وشربنا واحنه ماشين
بعد مسافة نزعت العباية وطلعنا
لمطعم داخل المنطقة دخلنا للعشه
گعد گبالي هادئ مو مثل عادته يشاكس
باوعلي وابتسم
-بعدك تعبان نرجع للبيت
-هو اليشوف هيچ چهرة گباله هم يتعببببب
-متحررررش
غمز ولزم تلفونه يتصفح بين ميجي الاكل
عيني منه سرحت بشكله اللي يشوفه
يگول شنو هالمكروه حتى تغرمين بي
سماره رسمة حواجبه
شواربه اللي احسهم مرتبات شعرة شعرة
بمكانهم
رفع راسه ناحيتي
وگام من مكانه مبتسم گعد بصفي
وعيني لازالت علي
-مغرمة حلوتهن
-فوگ متتصور
لمعت عيونه بفرح ولزم كفي من جوة
الطاولة ضاغط عليها
-اييييي بت سلطان من يمتى
-من گام يلفتني اي تصرف صادر منك
مثلا شكل الجگارة بيدك
أول مره يكون مشهد إشعالها ساحر وهي بيد شخص
من مرة نفثت الدخان حواليك سألت نفسي
شلون ممكن أن يسلب گلبك هيج حدث حياتي
اعتيادي كأنما لوحة انرسمت حواليك
من صار كل تصرف معتاد عادى جداً من الباقين
يحوله عقلي روايه حب كامله مجرد انه صدر منك
-بالله هسه شرد على هالكلام واني
رجال ردي كله فشگ وسلاح
-ممحتاج ترد حبني بطريقتك
ابتسم وضغط على كفي
-وبعد
-واحضني بوقت الزعل
-وبعد
همستله
-وترى مشهد الجگارة
قبل اسبوع بحديقة بيت جدو
من اجيت اصيحك وچنت يم عمووو
يعنييييي شفتك تدخن ويه عمو خلسة
-ذيييبة لگفتيني
-اخاف على صحتك
-مرات ماااتحمل ارررريدها
-دخن غير شي
-مثليش
-حشيش
ضحك وكملت كلامي
-هاجس الارگيلة والجگاير نفس
الدخان لتتعود جسمك طالع
من صدمة عظيمة الحمد لله صحيت
منها بصعوبة
-اشتاقلها عشششرة عمر اني والجگارة
-اشتاقلي بدالها
-الغيييييي العشا وامشششي نرجع للبيت
-هممممممجي
بقى يداهر بيه الى أن تعشينه ورجعنا
للغرفة بعد ساعات متأخرة من الليل
وهو وسوالفه المعتادة محاصرني مثل
جيش محتل
قررنا بعدها نبقى ببغداد
وكل يوم گمنا نروح لمكان
للمتنبي للمتاحف للنصب
تونسنا وارتاحينا بهالكم
يوم ماما اتصلت بيه نجيب
بيبي بطريقنا من بيت خالو علي
اتصلت بيها وردت متلهفة
-ياالگاطعة يووومين مامخابرة
-جااااية اخذچ عذابي
-هلا بيچ يابعد روحي خابرتني امچ
تعاي ولچ صويحبتچ هنا اجت
صفنت على كلام بيبي
-منوووو من البنات
-غيدة
قلقني هالخبر غيد شجابها وصلنا
وبين استقبالهم ورفضهم ان نطلع
بدون غدة واتصلت بغيد
-وييينچ غيدة
-ببيت اهلي
-تعاي لبيت خالو علي اني يمهم
-جاااااايه
ربع ساعة وصارت يمنا دخلت بس
وجهها ذابل ومتغيرة بوستها وگعدت
بيها على جهة استفسر
-شبيچ حبيبتي ولچ شو ماگلتي رايحة
لاهلچ
-تعبانة ليل هوووايه تعبانة
غصت بالكلام وسكتت
-احد مأذيج
-وطن وحبيبته
صفنت بوجهها مستغربة الكلام
-شبي وطن
فتحت تلفونها وطلعتلي سكرينات
لقائمة بحث فيس بوك وانستجرام
اسم گلزهار باحث عنه انجليزي وعربي
-شوفي عرررفته ماخذني
يتخطى بيه الماضي
بيوم اللي فرحانة اريد ابلغه بحملي ………
انصدمت بفرح واني اضربها على كتفها
-يااااااسخيفة حامل شووو ماادري
-والله طارت فرررحتي بسبب اللي
شفته ترك تلفونه وراح للحمام
واني ماادري شبيه هالفترة
اشوفه مركز بالتلفون گعدت
انحبش بسرعة وگعت عيني
عالبحث بكل البرامج باحث
وحتى عندة رقم موجود باحث من خلاله
ومابي اتصال
-وشسويتي
-واجهته عرفته بعدة يحبها
من لمعة عيونه رغم گال مجرد ماضي
وراح بس لاااااا واضح بعده عالق بهالماضي
-المهم انت المستقبل غيييييد
-ليل الماضي مينحفر وراه
ووطن جاااااي يبحث ولو عن طرف
خيط يوصله الها
-وانت شعرفچ بالموضوع
-هو حچه رؤوس أقلام وام يمنى تعرفين
شلون تحب تهدي النفوس كتتهن كت وعرفت
-وتركتي بدون خبر عن حملچ
-لا عرف من جابني ليجاي من وصلني
كتله اني حامل
-ليش ياحبيبتي هذا ماضي وهو
گالچ تضيعين سعادتج على شي قديم
-اني زعلانة وعتبانة عليچ اذا
تعرفين ليش مگلتيلي
-والله مو قصدي بس بينكم وهذا موضوع
خاص اعرف بس الخطوط العريضة للموضوع
حالي حال البقية
-ماااعرف شتصرف
-هو لاگيها
-لا
-وثقي حتى لو موجودة وطن مستحيل يفرط
بيچ مستحيييييل
-ماااعرف اريد ارتاح حتى اعرف افكر
وبعد كلام وعتب اعتذرت منها
وطلعنا راجعين بعد الغدة
بيبي مقبلت تگعد گدام تريد براحتها وره
تگعد هاجس كل شويه يتحارش بيها
-خطافة الزلم عندي الچ سؤال
-غمة للمابي خير شخطفت خايب
التگول علي خطفته هو الچان
يدور رضاتي بس عميماتك الحياية
ترسن راسك
طگها ضحكة وهي ردت
-انشد يالمسودن
-ليش جدي يحب الرازقي
وانت البربوگ هم تحبينه
-انا مو بربوگ ياساقط
والرازقي يذكرنا بأهلنا وبسلفنا
ضحك وهي كملت
-ياجدة ابن ادم لو صار عمرة ١٠٠ سنة
يظل يحن لديرته وأيام صبا
-ليش جدتي سهاد ماتحبچ
غمزلي يشوف ردها وكالعادة ردت
بحكمة
-ياجدة لا محبتها تدخلني الجنة
ولا كرهها يدخلني النار
-وانت تحبينها
-لا ياجدة لا احبها ولا اكرهها المرة
مااعرفها بس من بعيد لبعيد بس
غلطت بحگ روحها وظلت تطاردني
وانا البايعة الدنيا ومشتريه عايلتي
رغم هي عدها الوليدات والبنيات
والزلمة بس ظلت عينها مني
عبالها انا عدوتها
بس الصدگ انا عدوة الباطل
-وهي باطلة
-لا مالة الله حشاااااااها
المرة من تغير غيرتها تحرگ بلاد
بس هي غيرتها زادت وغطت وخربت
عليها ايام حلوة من عمرها
-حقانية جدة
-بعد روحي غصباً عليك حگانية
ونص وانا دوم اگولها ام كمال معدلة
لمت جدك وسوتله بدل البيت عشرة
وجابتله الزلام الزينة ابوك وعمك وحتى
الحيايا عماتك
ضحك هاجس وهي كملت
-ورغم سويلفاتها العوجة مرات بس
تتواصل ويا الناس وهدت ديرتها واهلها
لخاطر جدك
التفتت هاجس وشمرلها بوسة
-ابوووسچ عذبة خانم على كلامچ المؤدب
-ددير وجهك لا تگلبنا يالمسودن ورايه
روحة للعمرة
يسوق ويداهر بيها وهي ترد وهو يصد
لحد موصلنا نزلتها واطمانيت عليها
دخلت ورجعنا للبيت گضينا الليلة نوم
ثاني يوم هاجس انطلق لدوامه
واني انشغلت ابحث عن الاشياء
اللي تنفعني للأقامة القدمى بما أن
سنة التنسيب أنتهت ويا فتح باب التقديم
للدراسات العليا قدمت لدراسة البورد
العراقي ولازلت بالانتظار المنافسة شديدة وتعتمد على استمارة المفاضلة
ومعدل التخرج من الكلية اله الحصة الأكبر
درجة امتحان القبول
نقاط إضافية مثل الخدمة بالمناطق النائية البحوث المنشورة
وهالاشياء خلتلي الافضلية بأيجاد
مقعد اليه
رجع بالليل هاجس لگاني لابسة نظارتي
ومگابلة الحاسبة
-شلووونها عجوووز البيت
-تعبببببانة
-لتشغلين دمااغج حبيبتي مقبووولة
مقبولة
- هدفي هو التخصص بطب الاطفال
-وليش الاطفال بالذات
-لأن احبهم
ابتسمت بخجل وكملت
-ولأن دراستها ٤ سنوات
واحبه احسه السهل الممتنع
هذا الاختصاص يتطلب دقة ملاحظة عالية
لأن المريض ميحچي
ولا يعبر لازم انت تفك رموز بكائه وحركاته
واشوف نفسي قااادرة على هالشي
ولأن مدة دراستة اقصر
بسنة من النسائية والجراحة
-وليش متكملين دبلوم مثل يمنى
مو اسهل
-يمنى انلزمت بطفل وحددت هدفها
اني حاليا هدفي اكبر
صفن بوجهي سألني ويه مدگ الباب
-ليش انتِ متردين طفل هسه
اريد ارد واندگت الباب طلع هو
ودخل وطن اسمع صوته بالهول
لبست عباية الصلاة وطلعت
وجهة تعبان ومتغير ضربه هاجس
على كتفه
-مبروووووك حبيب
صفنت عليهم
-شنو
-جاية طفل بالطريق
ابتسمتله
-مبروووك ابوووو عراق
رفع راسه بس عيونه تحچي
كلام غير اللي جاي نباركله علي
-رجعت
صفنت للكلمة وهاجس مثلي
-منووو
-گلزهار
گعدت صافنة بوجها وهاجس
مستغرب
-وشعرفك برجوعها
-ورة اتصالي بغيد وبلغتني
بخبر الطفل وصلتني رسالة من حساب
اسمها بلغة غريبة بس
چانت صورة عيونها عرفتها
-شرجعها وشلون
سألته وهو رد
-بالسويد لاجئين
صفنت عالقدر وتوقيت الرجوع الغريب
مالتها
سأله هاجس
-باب الماضي تخلي مقفول
وتروح تجيب مرتك هنا فهمت
هز راسه بحركة غير واعية
وطلع للبيت تاركنا بحيرة
بسبب هالخبر
گعدت صافنة بوجه هاجس
وهو مستغرب رجعت للغرفة لحاسبتي
وهو اجة گعد كبالي
-٤ سنوات غياب شذكرها
وشرجعها حتى تربك استقراره وحياته
ووزوجته حامل
نطقت الكلام عن قناعة مچنت
اعرف هالكلام راح يكون بداية فجوة
عميقة بيني وبين هاجس
-اكببببر غلط بأول سنة زواج
يصير طفل
رفع رأسه ناحيتي نظراته هادئة سحب نفس عميق وسأل بنبرة غريبة
-وشنو السبب ليش تعتبرين الطفل بأول سنة زواج أكبر غلط
- الخلافات عدم الاستقرار
وهواية اعتبارات القصد
إن الطرفين إذا كانوا وحدهم
يگدرون يفكرون بعقلانية
يواجهون مشاكلهم بدون تنازلات
قسرية أو عاطفة عميه
بس بوجود طفل راح تتقدم التنازلات كواجب وتندفن الخلافات مو لأن انحلت
بس لخاطره ومع الوقت تندفن وياها المشاعر
وحتى الحب يتحول لمجرد مسؤولية مشتركة
تخنگ الطرفين
سكت لحظة عيونه تقره ملامحي بدقة مخيفة
گال ببرود
-الافهمه هسه إن متردين طفل لأننا بـسنة أولى زواج وخايفة من الخلافات وياي
ضحكت بخفة ضحكة صافية
لأنني ممخلية ولو لواحد بالمية
احتمالية أن يتحول هذا النقاش
المنطقي لحقل ألغام بيننا اقتربت منه
لزمت كفه
-لااااا حبيبي يا خلافات الموضوع أعمق
اني هسه بـقمة التوتر
السنة الأولى من البورد عبارة عن ركض و تعب
وخفارات ليلية ودراسة متخلص
أريد أخلص هالسنة وأثبت رجلي بالنظام
وبالتخصص والسنة البعدها نخطط لطفل
أكون مستقرة متعودة عالنظام
ومو منهكة جسدياً لدرجة ما أگدر أشيل ابني
فجأة وگف ونظرة عينه تغيرت
صارت حادة ونبرته ارتفعت لدرجة
هزت هدوء الغرفة
-واني وين من هالقرار وين مكاني بإعراب حياتچ
حاولت اتدارك الموقف مديت ايدي اهدئه
-هاجس حبيبي اني جاي أشرحلك وجهة نظري حتى نكون على بينة
قاطعني بصوت عالي وهو يسحب كفة
من كفي
-لا مجاي تشرحيلي
جاي تبلغيني بقرار انتِ متخذته ومنتهية منه
جاي تخليني أمام الأمر الواقع
وتنتظرين مني بس أهز راسي وأوافق مووووو
استفزني أسلوبه ورديت
-ليش راح يكون عندك اعتراض
-اكيييييد هالشي ميخصچ لوحدچ
- هذا مستقبلي وهذا جسمي
الحمل والولادة ومابعدها مو من أولوياتي هسه وهالأشياء كلها اني اللي راح أمر بيها
تعبها وسهرها وتأثيرها على دراستي
ونفسيتي راح يكون عليه وحدي
فمن الطبيعي يكون اليه الرأي الأكبر
لأن قراري هو الأول على حياتي وجسمي
وبعدها تجي بقية الآراء كأستشارة
ارتجف فكه وضغط كفوفه ببعض
وهمس بصوت مكتوم من العصبية
-هيچ إذن اكون اني مجرد تحصيل حاصل عندچ مجرد شريك بالاسم بس ماله حق يقرر
يمتى يصير أب
حاولت تلطيف حدة كلامي
اثنينه اعصاب مااريد الموضوع يكبر
-لا هاجس افهمني
لا تاخذ الموضوع بعصبية حبيبي
ليش تغيرت ملامحك هيچ
هي سنة وهالكم شهر المرو على زواجنا
يعني مراح أطول اريد من يصير طفل
يلگه ام بكامل جاهزيتها مو منهكة ومشتتة
صمت ثگيل لف المكان و أطلق سؤاله اللي چانت إجابته بمثابة نار انشمرت بكومة قش وحرگت الأخضر واليابس
-الافهمه إنت حالياً مانعة الحمل
بحسن نية رديت مچنت اعرف
هالموضوع راح يكون سبب
لخلاف وهوه عميقة راح تكون
بينا للمستقبل
- أكيد حالياً مانعته
ثبت عينه بعيني وسأل بكلمة وحدة
- بشنو
-أبر مانع صار شهرين آخذهن …………
قاطعني بكلمتين بس
- هين يصير خير
كالها وراح اخذ السويچ
وطلع ضرب الباب وراه بقوة
هزت أركان البيت
وراها سمعت صوت شخطة التايرات بالشارع
ورا بقيت واگفة بمكاني
الغرفة اللي چانت دافية قبل شويه
صارت باردة لدرجة الانجماد
طلع تارك وراه تساؤلات
وعواصف افكار مراح اعرف
تأثيرها على حياتنا شنو
