رواية حكاية ترف الفصل الخامس والعشرون 25

كان علينا أن نقتطع 

من فرح الطفولة

زادًا لبقية الطريق.

لم يمهلها المرض طويلا

رحلت وتركت في قلوبنا جرح عميق مع ذكرى جميلة 

اصعب يوم من سمعنا العياط ابيت عمو .. إحنا كلنا چنا متوقعين وفات منى بأي لحظة لكن من سمعنا العياط ركضنا كلنا لبيت عمو .. فتنا رأساً الهول .. نسوان هواي ملتمات ووياهن عمه سعاد وهم عرفت شكم وحده من اخوات منى .. ومن تذكرت منى رأساً دموعي نزلن.. وتذكرت البارحه من طلبت من عدنا نروح يمها وهي على فراش الموت طلبت تشوفنا وتحچي ويانه 

البارحه وره الغده وهستونا نريد ندخل كلمن لغرفته دگ تليفون أمي 

- عمه سعاد الوو

-امي الو ها ام شهم شلونچ.. منى شلونها 

- عمه سعاد والله يا أم سيف منى مو زينه

- امي لا اله الا الله 

- عمه سعاد.. وهسه بالگوه شربتها خاشوگة شوربه ماتگدر تبلع.. بس رأدت مني تشوفكم انتي والبنات 

- اي تدلل شوكت تريدنا

- هسه إذا ماعندچ شي

- هسه جايه آني والبنات

من أمي بلغتنا نروح وياها آني ورهف لبيت عمو ، بصراحه آني رفضت اروح لان ماريد ادخل لبيت عمي بس امي گالت عوفي هاي السوالف هسه احنا بياحال البنيه بيت الحياة والموت ورايده تشوفنا ويمكن تريد توصينا لو تتباره ويانه الذمه وانتي بعدچ بهذا تفكيرچ السطحي. ..شي راح وانسى لاتبقين تعيدين بي..

ولو آني ما مقتنعة بكلام امي بس رحت وياهم 

هنّ سبقني للداخل وآني ضليت بالباب اقدم رجل وأأخر رجل ومتردده أفوت لولا بس من شفت عمو طلع وگالي فوتي عمو فوتي ام آيه تنتظركم جوه استحيت منه وطبيت للمطبخ وچانن بعدهن أمي ورهف واگفات ويسألن عمه سعاد على حالة منى 

اخذتنا عمه لمكانها بالغرفه الجوه غرفة الولد ايمن وتميم لان من ساءت صحتها بقت تنام جوه ماتگدر تصعد لغرفتها وتنزل للحمام

چانت نايمه على قريوله ويمها وحده من خواتها الكبار وفاتحين مسجل بي صوت هادئ للقرآن الكريم

.. هي كوه تحچي اشرت النا نگعد يمها

آني ماشايفتها من قبل ثلاث اشهر يعني من أول أيام مرضها.. خطيه كلش متغيره وصايره مثل الهيكل العظمي... 

احنا من دخلنا أختها وعمه سعاد طلعن من الغرفه حتى يخلن النا مجال ونگعد يمها 

گعدنا ووجهت كلامها بالبداية لأمي وگالت (طبعاً الحچي كله متقطع وبصوت ناصي وگوه ينفهم ) وگالت 

- خاله انتي هواي تعبتي ويايه من يوم مرضي لهالساعه

امي تقربت أكثر منها وصارت يمها على القريوله... لزمت چفها وگالت 

- منى أنتي غاليه عندي وأحسبچ وحده من بناتي ... 

- خاله ابريني الذمه خاف في يوم طلعت حچايه مني عليكم ولو آني ماجيب طاريكم الا بالخير 

- مبريت الذمه يمه دنيا وآخره 

النوب وجهت كلامها لرهف وگالت

- تدرين رهف يمكن آني أكثر وحده فرحت من اختارچ تميم وچنت احسب الايام وأكول شوكت يتزوجون وتصير يمي ونسولف ونگعد ونطلع سوا ونعيش مثل الاخوات وحده تساعد الثانية وحده تنصح الثانية وحده تاخذ رأي الثانية.. بس أنا أشاء وانت تشاء والله يفعل ما يشاء 

اول شي آني اريد اتأسف منچ لان بمرضي وحالتي هاي راح تتأخر الخطوبه والزواج 

- يمعوده ياخطوبه يازواج هسه بس صيري زينه والباقي كله سهل

- وثاني شي هم اريدج تبريني الذمه 

- مبريت الذمه دنيا وآخره 

- وثالث شي اريدچ تديرين بالچ على بنياتي وتساعديهن إذا تگدرين بالدراسة...چنت أتمنى يصيرن دكتورات مثلكم ومثل تربيتكم واخلاقكم 

وطول ما هي تحچي احنا دموعنا تجري 

وهسه اجه دوري هم اشرتلي وتقربت منها وگالت تدرين اول ما تزوجت شهم چنت اشوف نظرة خيبة أمل بعينه.. اي خيبت أمله بيّ لان 

يمكن من خطبني چان يتوقع اطلع مثل وحده منكم عدها ذكاء ومخلصه دراسة وصاحبة شخصية مو مثلي كلشي ماعرف غير الطبخ والتنظيف..شسوي هاذ نصيبي من الحياة من ماتت أمي كلشي تغير بحياتي.. وتردون الصدگ ماريد بناتي يطلعن مثلي ...سكتت شويه وگالت: أتمنى توافقين على شهم إذا طلبچ للزواج... شهم دائما يمدح بيچ وبتربيتچ وياريت توافقين عليه حتى بناتي يتربن يمچ...

آني تفاجأت بطلبها وسكتت لا اگدر اوافقها الرأي وأچذب عليها وعلى نفسي لان مستحيييل اوافق على شهم ولا أگدر ابلغها برفضي للموضوع وهي بهاي الحالة...

بقيت ساكته ..بس هذا سكوتي راح يتفسر غير شي راح يتفسر السكوت علامه للرضا 

بس گلت خلي احچي 

- منى حبيبتي انت يشهد الله حاسبتچ مثل رهف بس هذا الجاي تطلبي مني ماأكدر أسوي... الزواج موضوع چبير وحياة كامله وسنين من العمر ومو بالسهولة اتقبل شهم واوافق عليه..وإذا على البنات أحنا مستعدين يبقن يمنا من الصبح لليل .. وأن شاء الله تصيرين زينه وتگومين على حيلچ

هي يمكن ضاجت من جوابي ورأسا گالت

- ابريني الذمه 

- مبريت الذمه دنيا وآخره 

بقينا گاعدين يمها شويه وهي طول الوكت مغمضه عيونها وتردد آيات القرآن ويه صوت القارئ

رجعت من ذاكرتي واحداث البارحه ... بالهول هواية نسوان يمكن اخواتها وگرابتها وعمه سعاد وامي وكلهن يبچن ويعيطن ... وأختها الي چانت وياها بايته البارحه گالت

الفجر گعدت وحسيت بيها شويه زينه وحتى راحت وحدها للحمام تغسل وتتوضى للصلاة رغم هي ماتگدر الا اروح وياها اتچيلها..راحت توضت وگعدت على الكرسي صلت الفجر ورجعت نامت وآنه گلت بلگي العلاج جاب فايده وراح تتحسن

الصبح من گعدناها رادت تشوف بناتها.. وگعدن يمها وتريگن سوه هي ما أكلت ماتگدر بس وگلت بناتها ...شربت علاجها وگالت اريد انام...من صبينا الغده ويه جيت شهم من الدوام رحت اگعدها لگيتها صايره ثلج وماتتحرك صحت عليهم يشوفوها.. أخذوها للمستشفى وهناك گالو ميته..

أختها تحچي واحنا الكل دموعنا تجري وقسم يعيطن ويلطمن ...الله يرحمها برحمته الواسعة 

شويه وجابوا التابوت دخلو يمنا وكلنا التمينا عليها..بجي ولطم وقسم يقرون قرآن..

وأشوف بناتها متسطرات وگاعدات على القنفه وحده حاضنة الثانية ويبچن... تذكرت بوفاة ابويه هم هيچ چنا آني ورهف متحاضنات ونبچي ومانعرف ليش نبچي

الفاتحة سووها ابيت عمي رغم إخوانها رادو الفاتحة ابيت أهلها بس لاشهم ولا عمو قبلوا وگالوا منى من اخذناها صارت بتنا وندفنها بمقبرتنا وفاتحتها ابيتنا 

مره وحده شفت شهم لابس دشداشة سوده ومنگب بشماغ ومتغير كلش 

- البقية بحياتك ابو آيه

- حياتچ الباقية بويه

هو هواي داراها بالعلاج والأطباء لكن كل هذا مافادها لان واصله مرحلة من المرض مايفيد بيها العلاج 

خلال أيام الفاتحة الي صارت وره الإمتحانات النهائية لرهف ...چنا نساعدهم بتقديم الچاي والماي للنسوان وبالليل انظف البيت بس اغلب الوقت أبقي بنات شهم يمي احچيلهم قصص او اشغل وقتهم بالرسم والتلوين لونضل نسولف سوالف طفوليه وهم يسئلوني مثل كل الأطفال وكأنما التاريخ يعيد نفسه : ماما وين راحت... وشوكت ترجع...مثل ماچنت آني وأختي نسأل على بابا

وهم چان جوابي مثل الاجوبة الي چنا نسمعها

ماما سافرت للسما.. 

من خلصت الفاتحة والبيت فرغ من الناس والمعزين ... عمه سعاد بلغت عائلتها هي راح تصير المسؤوله عن البنات ..وهم بلغتنا راح تتأجيل خطوبة تميم ورهف إلى أن تخلص فترة الحداد 

التعيينات بعدها ماطلعت وبهاي الفترة خالو جابلي اسم عيادة دكتوره معروفة بمنطقتنا حتى أشتغل يمها هم اقضي وقت وهم اتدرب واتعلم.. وبديت اروح يمها بالعيادة ومازلت اتعلم منها التقنيات الحديثة بمجال طب الأسنان 

وهم عن طريق الصدفة سمعت من الدكتورة فاتحين قبول للدراسات العليا بكليتنا وقررت اسال خاف هذا التقديم يتعارض ويه التعيين إذا طلع ...وإذا ماكو مانع اقدم ليش لا

ومن سألت خالو گال خوش فكره وانتي قدمي اوراقچ وشوفي اذا طلع التعيين اتعيني وإذا انقبلتي بالدراسات كملي دراستچ..ياهو اليطلع اول شي چلبي بي 

وبديت بتحضير أوراقي وتقديمها للدراسات العليا 

مرات رهف ترافقني وتروح بالصيدليه القريبة من العياده هم تتعلم وتتدرب على عمل الصيدله

وليد وفاطمة على إتصال دائم بيناتنا . فاطمه على وشك الولادة بولد واتفقو يسمو كيان

وليد صار يتكلم اللغه التركيه بطلاقه وهسه يشتغل مترجم بأحد المجمعات الطبيه في تركيا ودائما يسئلني ماتزوجتي ومن أكوله لا والله بعدني بمحطة الانتظار رأسا أسمعه يگول الحمد لله 

قبل يومين طبت علينا عمه سعاد وبدت تحچي لأمي عن معاناتها اليومية ويه بنات شهم وشلون مشلوع گلبها بينهم وبين شغل البيت شوهاي التفتت عليَّ وگالت 

- شتگولين ترف اذا اطلبچ لشهم؟؟؟ توافقين؟؟؟ 

- لا ما اوافق

- يااا ليش 

- شعندي ماخذه واحد شايب وعنده كوم بنات ( حچيت نفس الكلام الي هي دائما تگوله )

- شايب شنو اصلا الف بنيه تتمناه 

- اي روحي على الألف ليش جايه علي 

- غير الگريبه احسن من الغريبه

- مو شرط مرات الغريبه أحسن من الگريبه 

خلت وگامت ويمكن زعلت من كلامي هههه 

امي ورهف ايدن كلامي وگالن عفيه خوش جواب هسه صايره تدور على مصلحة البنات ومن چانت امهن الله يرحمها شايله البيت والشغل والجهال ماچانت راضية صدگ المثل الگال مارضى بجزه رضى بجزه وخروف 

هسه خلي أنسى كل هاي الذكريات الجميلة والمؤلمة الماضية وأرجع للواقع ارجع لحياتي... 

اليوم خابر جدو يريد يجي يزورنا وطلب اكون آني موجودة يعني ماروح للعيادة 

- حاضر جدو تدلل 

اكيد يريد يجي ونكون كلنا موجودين واحتمال يريد يطلب رهف لتميم ونحدد موعد للخطبه 

نظفنا البيت على السريع وماما حضرت الضيافه وبدلنا بملابس بسيطه وگعدنا ننتظر

اندگ الجرص راح سيف فتح الباب ودخل جدو وشهم

اتعجبنا شهم ليش جاي مو تميم