رواية ليتك قدري الأول الفصل السادس والعشرون 26 بقلم رفل الكناني

عصام صدمني عبالي راح يعزيني لو يصبرني بس خيب

ضني وهوه يكلي

يله يابه لمي غراضج وامشي ويانه

شنوو وين ابو محمد صدك تحجي هستوهه خلصت الفاتحه بعد حتى العالم دتجي شلون اعوف البيت واطلع

قابل تبيقين اهنا اني ماقبل الناس راح تاكل وجهنه

وعندج حموين ممزوجين شنو كعدتج هنا

كلامه تيزاب وندار عليه كل كلمه حقاره وحقد اوجهه اله

قليله بحقه لتزمت الصمت وعفته ودخلت وهوه يصيح ورايه وين رايحه تعاي بعدني ماكملت دخلت للهول كعدت بمكاني واني اغلي امي لحكتني تحجي عليه مراضيه عل تصرفي

يمه شلون تعوفين اخوج يحجي وتفوتين

يمه لاتخبليني ابنج هذا ماعنده رحمه معدومه عنده الانسانيه بدال مياخذني الحضنه ويواسيني يكولي عوفي البيت وامشي يممممه لخاطر الله حتى الناس الغربه بعده دتجي واني مرته اعوف فاتحته واروح لهلي تره حتى الله ميقبل

اششش اسكتي صوتك ليسمعج أحد

ليش تسكتيتي لن الديصير عيب موو لعد ابنج ليش ميعرف العيب

حجيته وصكيت عل سنوني لان ام رقيه ليغاد مني بس شكله مركزه عليه انجبرت اسكت وحطيت ايدي بلبجي وكمت ابجي امي من شافتني هيج سكتت تقربت ام رقيه كعدت بصفي ومسحت هل راسي

هباوي حبيبه كافي والله كطعتي كلبي صار 3ايام جهالج شنو ذنبهم قوي نفسج وصيري انتي اممهم وانتي ابوهم

جيتت بحضنهه واني اشهك

احلام ماكدر والله ماكدر الحمل عليه ثكيل ليش راح وعافني مويدري بيه اني ماعندي أحد

لادكولين هيج اني عندج وماعوفج وكلنا وياج واحنا اهلج كومي اصعدي لبيتج ارتاحي انتي صار 3ايام تكرمتي بهل كعده وجهالج محتاجيج لاتحسسيهم همه تيتمو

مسحت وجهي وسندت نفسي وكمت وامي وياي صعدت لبيتي واني مكسوره هديت ايد امي الجانت لازمتني وفتريت بلبيت كل مكان وكل شبر يذكرني بي الغرفه هنا جنه نايمين قبل ميروح الهول ا هنا جنه نتريك قبل ماراح حتى الحمام دخلته ومن شفت فانيلته التعلاكه نجنيت لزمته وكعدت بلكاع ونهاريت بجي كوه امي سحبتني وطلعتني للغرفه وجهالي عل بجايه يبجون كوه سكتتهم ونامو واني عيني متاخذ نوم والجمره بكلبي بعدهه مشتعله لنص اليل كعد يوسف عايط تلمسته مصخن جمر حرت شيوي وين انطي وجهي كعدت امي وشافته كالت يومه خاف ينشمر مثل ذيج المره من تذكرتها خفت خليت الشال ونزلت البيت صنته بس متروس بكرايبهم نايمن بلصاله اجفص عل نسوان دادور ام رقيه ومن لكيتها بس كتله احلام فزت

هااا هبه

احلام الحكيلي يوسف مجمر

يممه وليدي وينه

فوك عفته

كامت وياي خطيه تركض صعدت شالته تلمسته والخاولي امي مخليته عل راسه نار كالت

هبه خل انودي ليصير بي شي

اني بس ابجي كتله

عفيه احلام سوي اي شي

نزلت تركض وصعدت وياها بارق كلتله لاتفوت اني أجيبه أخذته مني واسمع يكوله

شبيك عمو حبيبي

ويوسف يبجي كلها راح اخذه

اجي وياك

احلام شسالفه شكو جايه اني أخذه

اسمع وادكرضم صحت أحلام اجتي

احلام روحي وياه عفيه يوسف يرضع ممه شلون ميكدر

بلياها

وج عيني هذا عنادي وميتحاجه

امي تريد تروح وياه بس تستحي وهوه ماسمع لاحد اخذه وطلع واني ابجي لاساعه ولاساعتين كل شويه اخلي أحلام دك عليه ويكله مخليا سيروم خافض الحراره ولحد ماطلع الصبح ال جابه تنطتنيه احلام وراحت واسمع بارق يعلمه عل دوه خليت يوسف بحضني تلمسته زينه حرارته ونايم ال رتحت بيومه رجعت نزلت جوه والبيت ناس تروح وناس تجي لحد يوم السبعه ال كفت العالم بس اني عصام ماكف مني وكفلي وكفه ال تجين دكيت لطمت يمعود ماروح ماكو قفل واكف يم درج بيتي من جهت الحديقه وحكمني ال انزل وامي تتوسل

يمه عل بختج امشي وياه هذا مخبل

يمه وين اعوف بيتي ترديني ارجع عل ضيمه وضيم اساور

يمه كعدتج هنا غلط والله امشي واستري علينه ليروح يفضحنه واحنا بيت العالم وعدهم مصاب

وين الغلط وين مدكليلي اشو البيت مفصول وحتى باب الشارع وحد

يمه الناس مترحم اسمج كاعده بيتهم

ابقي انتي يمي

ماكدر شلون تقبليه عليه اكعد بيت النسيب

كمت اخرمش بوجهي

وينه النسبب وينه مو لفه التراب واخذته المكابر وخله عصام وغيره يتحكم بيه عوفيني ووووروحي خلي حذام يمي

ولج يمعززززايه وين يقبلون يكعدون رجال غريب بيتهم وبعدين نسيتي حذاااام شعنده هنا ولج تريدن تبلينه

يعني سديتيهه بوجهي

اي اي سديتهه وكومي وانتي ساكته

اعرف امي مومن كل كلبه بس متريد مشاكل كمت غصبن ماعليه اللم بهدوم جهالي وهدومي ودموعي تجري وعيوني تدور عل بيتي وتودع كل ركن بي احلام صعدت ددكلي انطيني الجهال امي طلعوهه من المستشفى داشوفهم اله

بس نفاجأ من شافتني لابسه ولامه هدومي لطمت عل صدرهه

هاي وين هبه

رايحه لاهلي

احجي وابجي

وين عايفه بيتج والمن عايفته احنا منو عدنه ليش مبهذله نفسج وجهالج هذا بيت ابوهم واكعدي ربيهم بي

ماجاوبته بس ابجي وامي كالتله

ام رقيه اخوهه ميقبل والله وكعدته موصحيحه وانتو عدكم ولد والناس ماترحم

هزت راسها وطلعت

واني قفلت البيت ونزلت شايله جهالي وحذام تلكاهم واخذهم والجنط بيدي لكيت عصام واكف ومهند يمه وبارق وخلدون اني مبوشه والدنيه ظلمه بس اسمع صوتهم مهند كال :

ام يوسف يابه هذا يضل بيتج شوكت متجين هلا بيج وجهالج جهالنه شيصر تليفون واحد احنا يمج

ام رقيه اجتي حضنتي بوستني وبوست الجهال وبارق وخلدون هم بوسو الجهال وطلعنا وصلت يم الباب وام رقيه خلت علاكه بيدي كالت هاي امانه يبقن لجهال اخته وصعدت السياره والعيون ماكوفن الله يساعدهن والله راح يعمن الطريق كله ماهديت وأول مادخلت البيت كبل للغرفه كعدت وماضل بيه حيل الكلشي جهالي يفرون براسهم مستغربين والعبره خانكتهم وامي تصبر بيه حذام نزل غراضي ومن ضمنهن العلاكه فتحته بيهه ساعة سلام ومحبسه وفونه وحتى محفضته عل حطتهه هيه والفلوس البيهه لزمتهن ضميتهن وكلت ذني يضلن ذكره للجهال من ابوهم

ومرت الايام اول أسبوع خلص بضيم الجهال مستغربين وبس يبجون او بلاحراه جهالي مرعوبين من يوم الفاتحه والعياط كامو يتنحسون وعلى أقل شي يبجون

وجهال عصام لجوو وياهم يتحارشون بيهم ويداهروهم

وهمه اصلن ممتعليمين همه وين طالعين وين شايفين ناس هوه بس اني وياهم جنه فوك فتخبلوو خطيه حذام يطلعهم شويه ويجيبهم ونفس الشي واني روحي ممتحملتها

واساور كل حجايه والثانيه كالت اوووي جهالج مينحملون بس يبجون عبالك يدورن حجه بله هاي شحجي وياها

همه جهال يعرفون يتحججون بس هذا عقلها شسويلهه

الايام دتركض وكلمن عايش حياته ال اني بهل غرفه ام رقيه خطيه كل جمعه يمي تجي محمله ملاعيب وحلويات وهيه تطلع دكب العيطه جهال عصام يأخذون الألعاب لو الحلويات من جهالي وجهالي متنحسين وتعلك بينهم واساور متسكت كامت تسوي هاي حماتج جيتهه علينه فتنه جنت ابلعهها واسكت واسكت واتحمل واصبر لحد الاربيعين وام رقيه أصرت اجي ورحت اني وامي واساور دخلت سلمت عمتي نفس وضعهه مشلوله ونايمه والدموع تجري سلمت عليه بس كدام الناس وال اني كلبي ميسامحها ابد

الجهال خلتهم هديل بحضنهه وهيه دموعهه تشرح كلشي بداخلها منقهرت عليها لان السوته بينه موشويه بس بنفس الوقت متشمتت لان الدنيه دواره يجوز باجر اصير بنفس وضعها والله يدزلي اليتشمت بيه

سوو العشه وبعدها ردنه نرجع ماقبلت ام رقيه كالت باجر غابشين للنجف ابقي بقيت اني وامي واساور رجعت بيومهه نمت بغرفة هديل الي اليل كله تحجي بالموبايل اكيد وياه حذام شوفي هبه شوفي كلمن يكول ياروحي شوفي شلون حتى اخته ممهتمه بس اني نكسر ظهري ونهدم حيلي

للصبح كعدنه بدلت الجهال وهوه هوستهم بره لحد ماكملو طلعنا مهند وايناس واني صعدت وياهم وامي وام رقيه وهديل وخلدون ويه بارق الطريق طويل واني منايمه زين والجهال نحصرو بس كاعدين حيل تبهذلت لحد ماوصلنا لوادي السلام اووووف هذا المكان من شفته كلت هم اكو

بعد ناس عايشه نمشي نمشي والحر موطبيعي يابه شلون سلام نايم هنا الله يرحمك ويصبرني وصلنا للقبر وبي

صورته شفتهه وروحي لابت هاي الصوره بيدي طاكته اله بكربلاء بدشداشه والسبحه بيده متحملت كابلتا وكعدت وجهالي بحضني وام رقيه نعيهه يبجي حتى الصخر حتى الولد بجتهم وأكثر واحد خلدون فقد حتى كعد وتربع بلكاع وكوه شالوو الجهال يهبدون عل صورته والله يعرفو واني روحي نحمست من القهر متحملت كمت عل صفحه تقيت والبوشيه ذبحتني ام رقيه غسلت وجهي واخذتني السياره وهمه غسلو القبر وشغلو البخور وطلعنا رجعنا للبيت ذبوني بلباب وراحو وعلى أثر هاي الروحه تمرضت يومين ال صحيت ومن صحيت بليل ودك عليه الموبايل شفته رقم غريب مجاوبت دزلي رساله اني بارق دك جاوبته

الوووو

انتي وحده متستحين

شنووو

اي متسحتين لو تستحين متوكفيلنه بلمحاكم

اريد أستوعب وافهم شديكول ماكو عقلي تبنج ولساني نربط

ليش سكتي لان تعرفين نفسج غلطانه

بارق عل شنو دتحجي والله مادري

ليش تغشمين نفسج

والقرآن وداعت جهالي مادري عل شنو تحجي

يعني موانتي موكله عصام يرفع قضيه ويطالب بحصتج وحصت جهالج

ضربت عل وجهي عزه بعيني

بارق صدك تحجي

يعني متدرين قابل

وداعت جهالي وروح المرحوم مادري الله يخزي عصام

على هاي السوايه

اسمعيني ام يوسف اذا هذا ملعوب من اخوج فهاي شغلتي اطببه بلشط واطلعه غركان اما اذا هاي انتي موديته فكولج انجوم السمه اقربلج متشوفين من حصتج شي وخشمي يشتم الهوه الج حق انتي وجهالج تاخذي من يكبرون اما هسه كلشي مالج يمنه وجهالنه احنه ننطيهم حقهم

بار

طوط طوط طوط

سده بوجهي

يابه شصار بيه شدعيلك عصام شلون تسوي هيج كمت شايطه عل غرفته مالكيته بس مرته وتحجي من وره خشمهه مموجود رحت عل امي سولفتله تخبلت ومااقبلت احاجي كالت اني اكله وافتهم منه انتي اسكتي لاتقارشي سكتت ونتضرت تاليها ال اجه واسمعه يكول ال امي اي عادي وشكو بيه ا هنا طفح الكيل وطبيت عليه

عصام شنو عادي انت شلون تسوي هيج

اي غير حقج خوما ياكلونا عليج

ياحق ابو محمد رجلي قبل يومين طلعت اربيعنه وترابه بعده اخضر تروح تداعي بحصتي ليش

وشكو بيهه اولج واخيرج ماخذتهه

ومنو كلك اني اريدهه مافكرت شيكولون عليه عيالي من سويت هيج

وطبهم مرض شيكولون خل يكولون لعد رجلج كومه عل

كلبه فلوس وينهم شو اجيتي ايد وره وايد كدام

عزه بعيني شعنده هوه بطرك الراتب ومن مات انكطع

والسياره بذاك الحساب وحصته من البيت

لا عصام اكيد تشاقه شسوي بسياره هيه حديده اذا راعيهه ماكو شصخم بيهه وتريد اداعي بحصته بلبيت وهوه اخوه الجبير طلع بيت وحد صار كومه ومداعه بحصته واني مات صار شكم شهر تريد أدعي بحصته

والله هاي مشكلتج اني مشيت بلمعامله وغصبن ما عليج تأديني سمعتي لو لا

تهسترت كمت ا صيح لو تموت ماسوي التريده

كمز عليه يريد يلزمني اجه حذام صار بينه ومرته تعيط وامي تهدي بينه وهوه يريد بس يلوحني شفت جهالي تصركعو شلتهم وركضت للغرفه وسديت الباب واني ارجف من الأعصاب وهوه بعده يصفط بره كمت خابرت ام رقيه وسولفتلها حتى يكونن عل بينه ويعرفون اني شنو اخاف عبالهم طماعنه بورث لو شي كالت هاهيه فتهمت اني اروح اكول البارق وافهمه

عصام ماجاز مني وضل يطب ويطلع يخزرني ومرته تبسمر بيه وره سبوعين من هذا الموضوع اجاني عصام بذيج الضهريه لعب بيه جوله لان بارق مسقط الدعوه وحتى عصام ميعرف شلون ضل يغلط ويهدد بيه والله لندمه والله لخليج تذبين جهالج عليهم هاي كلمته خوفتني اني كلشي ولاجهالي غير اموت ضليت اسكت واسكت كمت من يكون بلبيت اقفل الغرفه عليه وعل جهالي وهومه يتخبلون من يتقيدون ويضلون يصرخون وهوه يضل يسب بيهم واني انطحن انعل ابو الوكت الذبني عليك وخلاك تسب اليتامى همزين ميفتهمون جان شكالو وهوه يسب ابوهم

حذام خطيه لاحول ولاقوه ميكدر يحجي يعرفه شيطان ويتولاه ويطلعه عايل خلصت العده بضيم والله عبالك مكاعده بيت اهلي كاعده بمعتقل الفلوس العندي خلصن وحتى ذهبي كله بعته وام رقيه من صارت هاي السالفه كطعت بيه كامت متجي رجعت ادرس بس موهبه القديمه اشرح واني نفسي مادري شداشرح وديستوعبون أولا

من غير جهالي لاعوفهم يم امي وكل شويه جايني واحد يبجي واضل اسكت بي ومن ارجع انسى ليون وصلت حتى أمهات الطلاب من يجون يسلون عل أبنائهم ويشوف حالي بلاسود وجهالي يعتعتون بيه ينقهرون عليه ويضلن الله يساعدج وشصاير بيج وشلون حالج واني احمد الله عل كل حال واليوم اني ودادرس اجتني امي وهيه كوه تمشي

هبه يولي عمام الجهال اجوي بلباب

كلبي نخطف عبالي جايين ياخذن الجهال الولد ماكو احد عصريات وطالعين كمت عل سريع صرفت الطلاب وخليت العبايه عل راسي ومن وراه الباب سلمت عليهم طلعوو

بارق وخلدون كتلهم تفضلو ماقبلو كالو بس جيبي الجهال دنشوفهم طمنيت من شفتهم طبيعين وسلموو عليه بأحترام ركضت جبت الجهال وننطيتهميا شالوهم وبوسوهم وكعدهم بالسياره ويضحكون وياهم وهمه مكيفين مشايفين هيج ملاشاء صار هواي واني وراه الباب انصنت تقريبا

نص ساعه ودكو الباب طلعت نطونياهم وياهم علاكه حلويات ويوسف بجيب تشيرته فلوس ونزلو سياره جايبهنه الهم كبيره ومن هاي الغاليه كلش خلوها بلباب وسلمو

وراحو

دخلت الجهال والسياره وهمه فراحنين بيهه صعدتهم وشغلتها يالله تخبل تمشي وبيهه سترين يتحكمون بي وكلوبات واصوات اباوع عل جهالي شلون يضحكون ومكيفين وجهال عصام يباوعون هم صعدتهم شويه رغم همه كبار بس يبقى عقلهم عقل جهال واساور تسوي عيني وينقهرون عليهم ويكولون يتامى كل هذا الدلال ويتامى لعد جهالي شيكولون

امي جاوبتهه: كل كنوز الدنيه متعوضهم ابوهم أحمدي ربج جهالج فوك راسهم ابو

ولايمهما تعوج بحلكهه يمنه ويسره واني محاجيته غوربت الدنيه دخلت جهالي وخليت السياره جوه الدرج وكعدت بلغرفه فتحت العلاكه أشكال بيه انطيت ال جهالي ولجهال عصام وحتى الامهم طلعت الفلوس حسبتهن 250الف ضميتهن هم خلفله عليهم خلص اليوم عادي وثاني يوم من الصبح اشتغل العرك بين الجهال عل سياره واني داشر ملابس عل حبل وماسمع بس صرخت يوسف ركضت وياريتني ميته ولاشايفتهه بهل موقف لكيت ابني سابح بدمه