رواية حكاية ترف الفصل السابع والعشرون 27

 

يهمسُ قلبي أن في الطريق 

شيئًا جميلًا ينتظرني، 

فرحٌ أعرفه قبل أن ألقاه، 

لأنه يشبه ما تمنّاه قلبي 

🤎🍂"

بعد رفضنا لطلب شهم 

ضلينا نفكر آني وأمي خاف الشي السوينا يأثر على خطبة رهف وتميم خصوصا من شفناها عزلت نفسها بالغرفة وباقيه بس ساكته وتصفن..

ماما گالت تعالي ندخل عليها ولازم نتواجه ونتفاهم 

هي جانت متمدده على قريولتها وتباوع على لاشئ بالسگف بس من دخلنا يمها وحست علينا .گعدت وعدلت نفسها وسندت ظهرها على راس القريوله وحتى غيرت من ملامح وجهها وابتسمت النا وگالت

- هلوو ماما هلوو ترف تعالو ادري عدكم شي وجيتو نحچي بي

- اي صحيح..انتي دومچ نبهه وذكية 

- بضحك وبحركه مسرحيه شكراً شكرا خجلتوني..هههه

- ضحكنا على حركتها وابتدينا بالجد

- ماما : بصراحه ومن غير لف ودوران شنو رأيج برفضنا لطلب شهم.. 

- رهف ردت بسرعه وگالت :  ماما ،ترف انتو تدرون برأيي ومن زمان الرفض الرفض

- ماما : يعني ماراح يأثر على خطوبتچ من تميم

- رهف: لا ماأعتقد يأثر .. وجهت كلامها الي شوفي ترف علاقتچ بشهم مالها دخل بعلاقتي وتميم 

- ترف :بس لو فرضنا 

-رهف :  قصدچ عمه راح تستغل هاي النقطه وتضغط بيها علينا وتسوي مشاكل 

- ماما اكيد راح تسوي مشاكل 

وتبزعكم من الخطبه 

- ترف: اذا موافقتي على شهم تصير لمصلحة علاقتكم صدگيني اغير رأيي واوافق عليه 

وبقينا بحيره خصوصا عمه صارت قليل تجينا لان ملتهيه بالبيت وبنات شهم .. وتميم مرات يخابر رهف وسؤاله العادي علينا إذا محتاجين شي 

وره كم يوم تم الإعلان عن التعيينات ..الحمد لله تم تعييني بأحد المستشفيات الحكومية ومن محاسن الصدف آني وفاطمة بنفس المستشفى.. وليد طلع تعيينه في أحد أقضية المحافظة يعني بعيد عن سكنه.. ومن باچر ابدي بالاجراءات اللازمه للتعيين 

وبقينا أحنا الثلاثي كلساع نتصل واحد على الثاني فاطمه رغم فرحتها بالتعيين لكن مراح تستفاد منه لأن هي بالغربه وابنها كيان وبيتها وقوانين الهجرة تمنعها من الرجوع للبلاد بس اقترحت عليها يجي ابوها أو أخوها ويقدم أوراقها وإذا احتاجو مساعده راح اكون موجوده

وليد گال خلال يومين تلاثه يصفي اموره ويرجع للبلاد وهم يكمل التقديم 

وبديت حياتي العمليه وصرت دكتوره ترف واسمي انكتب على الباج الي على صدري دكتوره ترف حسام .. ورغم عمل المستشفى چان متعب وصعب وهوسه لكثرة المراجعين مو مثل عملي بالعياده وحتى الادوات والإجراءات العلاجية تختلف ..بس چنت ابذل جهد كبير لخدمة المرضى خصوصا همه من الناس البسطاء..

وهيچ يگضي يومي الصبح مستشفى ارجع للبيت اتغدى وارتاح شويه حتى استعد العصر للعمل في عياده مع الدكتورة 

لكن بأحد الايام وأثناء راحتنا الظهريه بالبيت

سمعنا حچي بصوت عالي ونوع من الصياح جاي من بره من الشارع ما عرفنا مصدرها 

بس نزل سيف يركض وگال هذا صياح جاي يطلع من بيت عمي 

ركضنا نريد نفهم شكو

من وصلنا للباب شفنا سيارتهم حركت سريع شخطت الشارع وضل التراب گاب وراها منو بيها ماعرفنا امي وسيف ركضو للداخل لبيت عمو وآني ورهف بقينا ابابنا لان بعدنا لابسات دشاديش بيتيه مانگدر نطلع بيهن 

رجعنا طبينا البيتنا ندور شي نلبسه على الدشداشه ..

وعالسريع ركض لبيت عمو.. شفت عمه سعاد گاعده بالگاع وبنات شهم دايرها ويتباچن... والله والله منظر مؤلم .. ونريد نعرف شنو الصاير عمو بي شي لو واحد من الولد .. وبدت عمه  تحچي لأمي :

- وره الظهر طب علينا شهم  من الدوام تلگنه بناته وبده يحضن هاي ويشيل هاي

گتله اگعد اصبلك غده..مارضا گال راسي يوجعني اريد انام.. أخذ بنياته وصعدو لغرفتهم شويه واسمع البنات يتصارخن وآية نزلت تركض تگول بابا وگع وطلع منه دم

صعدوله الولد وابوهم وآني وگعت بهذا مكاني وتأشر على مكان گعدتها.. رجليه بادن ماگدرت اتحرك 

وأشوف الولد نزلوا شهم لاأيد ولا رجل وخشمه يجري دم وتارس هدومه

- يمه حچولي شبيه شهم

- صاير اغماء عنده

وركضو بي للمستشفى 

وطول ما عمه تحچي احنا كلنا نبچي حتى بناته وبدن نسوان الجوارين يدخلن حتى يعرفون ويستفسرون شنو الصاير

بالگوه گومناها من الگاع وگعدت عالقنفه ..امي گالت 

لرهف تجيب گلاص ماي وشربتها حتى تهدأ شويه بس طول الوقت تبچي وتصيح ربي ..ربي ..كلشي ماريد بس وليدي يرجعلي.. يرجع لخاطر ابنياته .. منو الهن بعده..وهن خطيه يتباچن 😢

وهم عمه كلساع وگالت 

- يمه رهف خابريهم وشوفي شصار لشهم 

تخابر ومايجاوب والقلق بدأ يزيد نخابر على عمو هم ماكو جواب بالأخير عمه

- گالت ودوني اله للمستشفى 

- عمه غير نعرف بيا مستشفى 

والله بعد شويه وجاوبنا تميم هي صح بضع دقائق بس عبالك ساعات 

وعرفت منه رهف واجتي بلغتنا

(يكول تميم هسه الحاله  مستقره التشخيص يگول ارتفاع بضغط الدم وبس يخلص محلول العلاج انجيبه ونجي)

هذا الشي الگالته رهف لعمه سعاد وبأمر من تميم لان  مايريدها تعرف الحقيقة ولو مؤقتاً 

حالته هي تعرضه لجلطه دماغية ويحتاج لأسابيع ياله تستقر الحالة ولأن راح يواجه صعوبة بالتحدث والحركة والمشي

بناته من سمعن ابوهن زين وراح يجي بس يخلص محلول العلاج كلش فرحن وآية گالت يعني بابا راح يجي للبيت يمنا ومايروح يم ماما بالسما

احنا سمعنا بالكلام وكلنا بچينا .. رحت يمهن ولميتهن بحضني وگمت ابوس بيهن..لاتخافن حبيباتي هسه بابا يرجع وتگعدون يمه وتسمعون القصه اليحچيها الكم وتلعبون وياه ويجيبلكم هدايا بعيد ميلادكم.. ويشتريلكم ملابس حلوه..

وهن طول ماآني احچي فرحانات وحده تذكر الثانية اي نشتري فلان شي لو نروح لفلان مكان لونروح نلعب بفلان لعبه

اسبوع بقه شهم  بالمستشفى  الكل راح زاره وآني من ضمنهم

چنت اروح يوميه مرات من يخلص دوامي ومرات أخذ زمنية واروح 

جنت بالوقت الأروح  يمه اهتم بي طبيا أبدل الكانونه اتناقش ويه الأطباء والممرضين على حالته وحتى صارت بيني وبين الكادر الطبي المسؤول عنه  نوع من الصداقه لان كلنا أطباء ونعرف شلون نتعامل ويه بعض

وچنت أقوي من عزيمته وأكوله لازم تصير زين حتى تفرح بناتك بالدرجة الأولى وهم تفرحنا كلنا وياهن 

اليوم كتبوله خروج بعد استقرار نسبي لحالته لكن بعدها راح يبدي أشهر من العلاج الطبيعي والفيزيائي

جنت وياهم من رجعنا للبيت عمه تلگته وحضنته..بناته وحده وحده تسلم بهدوء وتبوسه وتروح الظاهر موصينهم بابا مريض ومايصير تسوون الحركات الطفولية من تستقبلونه

وبدت رحلة العلاج الطبيعي 

يومين بالاسبوع بمستشفى خاص وچنت اروح وياه مع واحد من اخوته..وبدا التحسن ولو بشكل طفيف بس يعتبر إنجاز كبير استمر العلاج ثلاثة أشهر وبعد العلاج الطبيعي راح يبدي بالعلاج الفيزيائي وهم بأحد المستشفيات الخاصة 

( العلاج الفيزيائي هو تخفيف الألم وتحسين القدرة الحركية باستخدام أدوات وتقنيات فيزيائيه مثل الحرارة والبرودة والتدليك والأمواج فوق الصوتية والتمارين وتقنيات أخرى )

صرنا احنا عائلتنا نقضي اغلب أوقات المساء أو ايام العطل ابيت عمو وحتى مرات من أرجع من العياده وره المغرب امي رأساً تتلگاني يله وين صرتي عمتچ سعاد تريدنا نتعشى سوا ..يعني موعزيمه وانما عشانه وعشاهم ونلتم بيها وبسفره وحده... هواي تغيرت عمه بعد مرض شهم ورجعت مثل قبل من چنا نلتم سوا بأكلنا او سوالفنا أو گعداتنا وطلعاتنا

وبنات شهم يوميه يقضن اغلب الوقت ابيتنا يم امي ورهف ومرات إذا موجودة اني ونگعد لونحچي قصص لو نطلع العاب بالتليفون لو كارتون بالتلفزيون 

ومرات من اكون ويه شهم  أثناء التمارين يگول

- تعبت بعد ما أگدر

- لا لازم تكمل التمرين حتى تصير زين

- يعني اذا أصير زين واخطبج تقبلين بيّ 

- طبعا أقبل بيك انت كاريزما اكو وحده تگدر ترفضك

من يسمع هذا الحچي يرجع للتمرين وبنشاط

هاي الايام التحسن صار واضح على شهم وبده يروح بالداوم الي صارت داخل المحافظة لأسباب صحية... وهم دائما نذكره بالالتزام بوصايا الدكتور المختص اكل صحي لا انفعال لا عصبيه

اليوم وره العشا اندگ جرص الباب ودخلو بيت عمو كلهم ووياهم جدو وعمو ليث

- ماما : يا أهلا وسهلا اتفضلو اتفضلو

- جدو اني قبل ماأكعد اريد أطلب منچ وتگولين تم

- ماما : اعتبره تم عمو

- جدو : جاي اطلب بناتنا ترف لشهم ورهف لتميم

- ماما :  الرأي الأول والأخير لصاحبات الشأن ترف ورهف

الكل باوع علينا ضحكنا ودنگنا

- جدو : ها جدو ترف شتگولين توافقين على شهم

- ترف : اذا انت وامي موافقين آني اوافق

- جدو : وانتي جدو رهف موافقة على تميم 

- رهف : اذا انتو موافقين آني اوافق

وتمت الموافقة وبدت الهلاهل والگولات وبنات شهم يگمزن

وزعنا ضيافه بسيطة لان ماچنا حاسبين حسابنه 

من گعدنا گال جدو 

- جدو : هسه نرجع ونگول شنو طلباتكم 

- ماما : والله عمو اهم شي يعيشن ببيوت معزولات  ومستقلات

- جدو : اي احنا قبل مانجيكم فتحنا هيچ موضوع وقررنا 

شهم يبني مشتمل كامل بالحديقة غرف نوم وصاله ومطبخ وحمام ومخزن

وآني راح اساعده بتكلفة البناء ويعتبره هدية الزواج 

وبالنسبة لتميم قررنا يكمل ويه بناء الفوگ غرفه ثانيه وصاله ومطبخ وحمام ودرج خارجي يعني راح يكون بيت مستقل

- ماما : ألف شكر عمو

- جدو : وهم راح اساهم بتكلفة البناء ويعتبره هدية الزواجهم

- ماما وآني راح اساهم بالأثاث وهم اعتبروا هديه الزواج 

وبدو عمه سعاد وعمو ليث وزوجته وأيمن كل واحد منهم يصيح عليّ فلان شي والثاني يگول عليّ فلان غرض

هي هاي حياتنا لازم نتعاون على الفرح وربي يديمه ونتعاون أثناء الالم وربي يبعده عنا

خلصت حكايتي الي چانت مثل الفصول تروح وترجع أحياناً تكون قاسيه مثل برد الشتا.. وأحياناً جميله وزاهيه كألوان الربيع وأحيانا تصير بحياتنا مشاكل ويسقط منها أجمل الأشياء مثل فصل الخريف.. وأحياناً يسكنها حب وشوق مغموس بلهيب وحنين نفوسنا تماماً مثل فصل الصيف والي بي نشتاق للمطر حتى نروي عطش گلوبنا..💖💞💓