رواية الوجه الاخر للرحمة الفصل السابع والعشرون بقلم عبير إدريس
القرية
(فجر بلا إجازة )
الساعة الرابعة فجراً
فتحت عيني باوعت للغرفة البنات نايمات بسابع نومة واني لازم اكوم على شغلي واعوف فراشي ، جسمي تعود يكعد بهيج وقت ، يعني حتى اذا حبيت انام أكثر ما راح اكدر ...
تعودت اكعد بدون منبه وبدون ما احد يكعدني
امي مريضة والبارحة كالت لا تكعديني والصراحة حتى لو هي ما طلبت انه ما ينطيني گلبي اكعدها او حتى اكعد اخواتي يساعدني ...
لميت فراشي ورحت للحمام جددت وضوئي ، فرشت سجادتي وكفت اصلي ، من خلصت رفعت ايدي ودعيت للكل من الجبير للصغير ، صفنت انه ليش ما ادعي لنفسي ؟ واذا دعيت شنو اريد ؟ شنو ممكن يفرحني ؟ معقولة اذا دعيت راح يصير شي ممكن يغير حياتي ؟
تنهدت ورفعت ايدي دعيت لأول مرة بالنصيب الزين ويرزقني زلمة طيب نفس طينتي وگلبه مثل گلبي
مسحت وجهي لميت سجادتي وكمت كلت يالله ...
لبست نعالي لفيت الشال على راسي ورحت للمطبخ ، طلعت طحين نخلته وبديت اعجن بيه وانه افكر بيني وبين نفسي وألوم بيها عليش دعيت اريد رجل ؟ مو عيب شني خلصت الحياة واتذمر تالي وكت على عيشتي ؟
رديت العجين بعصبية وغطيته بالصينينة وكمت جبت بطانية لفيته بيها ..
حطيت الجاي على النار خافن ابوي يكعد يريد ياكله لگمة يسند گلبه بيها ..
شوي وسمعت صوته يكبر بالهول ، جهزتله الريوك بين ما يخلص صلاته
خلص واجى للمطبخ كعد على الجودلية
طيبة : صبحك الله بالخير يابة
عبدالملك : صباح النور بوية
حطيت الصينية جدامه بيها بيض وجبن وصبيتله الجاي ، عاف الأكل وآخذ الاستكان يشرب ويباوع بالفراغ الكدامه ، عيونه بيها حزن وهم جبير ، خايفة اسأله شبيه ؟ وحابه يسولفلي همه ، كابلته وتربعت عاينلي وكال
عبد الملك : جوعانة بوية ؟
طيبة : لا بوية ما حاسة بجوع
عبد الملك : تريكي يابة مو زين عليج تشتغلين وانتِ على لحم بطنج ..
طيبة : عادي هسه شوي واتريك لا تشيل همي
تنهدت وجر نفسه بقوة
طيبة : شبيك يابه عليش شايل هم الدنيا على اجتافك ؟
عبد الملك : شلون ما اشيلها على اجتافي وانه حملي ثكيل يا يابه
طيبة : شنو بيك احجيلي ؟ صاير شي مكدر خاطرك ؟
عبد الملك : لا ماكو شي
طيبة : انه بنيتك طيوب ما تحجيلي ؟ ازعل عليك
عبد الملك : شايل همج يابوية وهم فارس وهم اخوانج وابوي وامي اللي وكعت فجأة علينا وتمرضت وسالفة الحلال تعبت وحدي وما كادر على التعب ، انه كبرت والعمر دا يمشي بية والصراحة ...
باوعلي وسكت
طيبة : شنو گول اسمعك
عبد الملك : رايد اتطمن عليج انتِ اكثر وحدة
طيبة : وشبية يابه شناقصني وانه ابيتك مثل الاميرة ؟
عبد الملك : بنيتي انه هم عاجبني افرح بيج واشوف حالج يصير لأحسن حال مو بس شغل وحصاد وركض هم تحتاجين زلمة يسندج توكفين بسده وتتباهين بيه
طيبة : يابه السند الله وثم انتم ابوي واخواني وعزوتي ماكو رجال بهالدنيا ينكال عليه سند
عيد الملك : انه اعرف هاي ردة فعلج بسبب اللي صار بس يابنيتي مو كل الزلم ليث مو صح ؟
طيبة : بوية وين تريد بهذا حجيك ؟ احجيلي ضايج مني ؟ ثكلت عليك ؟ متعاجز من لگيمتي؟
نزلت دموعي كام من مكانه مسحهن بغترته وباس راسي ، لزم وجهي بثنين اديه عاين بعيوني وكال
عبد الملك : يبلى عمري اذا جان هذا قصدي من الكلام
طيبة : اسم الله عليك ، وانه اعتذر هيج حجيت ، شنو الصاير احجيلي
عبد الملك : يابه انه رايدج بسالفة من كبل جم يوم بس متردد احاجيج بيها
دنكت راسي العب بأصابعي واستمع
عبد الملك : جايتج قسمة وانه اشوفها زينة بس الراي رايج والكلمة يمج محد يجبرج على شي انتِ ما تردينه
فززني كلامه رفعت راسي وهمست بخوف
طيبة : منو هذا ؟ المن ناوين تنطوني ؟
عبدالملك : ابن عمج راضي
طيبة : ياهو منهم عادل لو باسل ؟
عبد الملك : باسل
طيبة : باسل شلون ؟
عبد الملك : تقدم لخطبتج اكثر من مرة وانه جنت متردد احاجيج بالموضوع
دنكت راسي ما حجيت شي ، هو هم سكت ، ورا شوية رفع راسي بإديه وكال
عبد الملك : محد يجبرج بنيتي على شي انتِ ما رايدته بس هاي سنة الحياة ومصيرج لبيت رجلج وانتِ كبرتي وكل ما يتقدم العمر فرصج تقل
طيبة : لا يابة مو صحيح كلمن ياكل قسمته بالدنيا
عبد الملك : ادري بس انتِ ما عاجبج تخلفين جهال ، ما تحبين تجربين احساس الامومة ؟
طيبة : احجيلك الصراحة بوية وما تزعل مني ؟
عبد الملك : اي بوية احجي ما ازعل
طيبة : انه بعد اللي صارلي من ابن اخوك ما ضلت عندي ثقة بالبقية من ولد اخوانك والصراحة انه اتمنى اذا صارت قسمتي والله كتبلي ابن الحلال اطلع لغريب ولا آخذ كرايب ..
عبد الملك : هذا هو بنيتي اعتبري الموضوع انسد من يمي وانتِ هم فكري اذا اقتنعتي بالولد رجعيلي خبر
طيبة : ان شاءالله يابه ، اجددلك چاي ؟
عبد الملك : لا بنيتي انه طالع للحصاد
طيبة : فد ما كلت ؟
عبد الملك : ما مشتهي رايد اغبش من وكت واطلع للعلوة
طيبة : ربي يسهل عليك وانه هم طالعة اخبز
عبد الملك : كعدي اخواتج يساعدنج مو عندهن عطلة لا تعلميهن على الراحة ويعتمدن عليج لا تصيرين نفس ابوج شايل كلشي فوك راسه واعتبروها فرض علية لازم كل يوم اطلع
طيبة : خلهن بوية مرتاحات ويشبعن نوم تاليتهن يشتغلن ويكومن للبيت وانت الله يعينك وان شاءالله اخواني بالعطلة ما يقصرون وياك
عبد الملك : فارس هذاك وينه ابغداد لابد ، لوما جدتج تتمرض واخابره اهجه ما ييجي
طيبة : الله يهديه ، اطلع انه اساعدك ماعندي شي
سحب راسي باسه وكال
عبد الملك : لا بوية شغل البيت كافي ، الله يرضى عليج يابنيتي ويريح بالج ويهدي سرج
طيبة : يحفظك النا يابة
طلع وانه آخذت العجين وطلعت للحوش جبت الحطب وشعلته بالتنور ايدي انجوت فد ما حسيت ، تعودت على النار ولهيبها
وكفت اخبز وبالي يم الحجي الحجاه ابوي
انه وباسل شلون نتراهم ؟ هو تفكيره لون وانه تفكيري لون ثاني ، هو صعب حيل وي اخواته وعصبي وانه تعلمت على حنية اخواني ...
مجرد فكرت بيه جسمي صار يرجف ، خبزت كرصة ورا الثانية واني ايدي تلجع كل شوية بمكان ، خلصت واشوفن ايدي صايرة خريطة من الحروك ، لميت الخبز البارد وخذيته للبيت ، دخلت وسمر نزلت شافتني ابتسمت
سمر : صباحج خير طيبو
طيبة : صباحج عافية سمرو
ضحكت
طيبة : اليوم الوجه يضحك عكس كل يوم شصاير وياج احجيلي
سمر : شصاير يدادة نضحك من الهم البينا وداعتج
نزلت الطبك البيه خبز من راسي وحطيته على المجمدة وانداريت عاينتلها
طيبة : وعليش مهمومة شبيج ؟
سمر : اسكتي عفية ما اريد اغثج واغث نفسي من الصباحيات
طيبة : لا تغثيني فد احجي
سمر : عمي
طيبة : قادر ؟
سمر : لا ابوج
طيبة : شبيه ؟
سمر : يكولي اختاري ياطابق تكعدين بيه ؟
طيبة : وهاي شينة ؟ فوكاها موزين جاي ياخذ رايج بعد شتريدين ياعوبة
سمر : اي شينة
طيبة : شلون خية ؟ چا غير راح يصيرلج بيت تنامين بيه وتكعدين بكيفج وتلبسين شخلع مخلع ومحد يحاسبج
سمر : يريد يجيبها يكعدها كبالي شايفة هيج ؟
طيبة : ابوي ؟ يجيب من ؟
سمر : لا مو عمي شهم يريد يجيب ضحى تكعد وياي
طيبة : فد بيت ؟
سمر : لا هي وحد وانه وحد راح يسوون بيتين مفصولات
طيبة : يعني بابج وحد وبابها وحد
سمر : ما ادري يمكن هيج
طيبة : چا شتريدين اكثر من هيج ؟ يعني بيتج وحدج وبيتها وحدها
سمر : طيبة انه تعبانة ومحد جاي يحس بية
طيبة : سمر اهلنا كبل يكولون البيت اللي بابه مفتوح همه ما يضيع ، يعني تحطين شهم كبالج وتفتحيله گلبج وحاجيه كوليله كل شي بخاطرج يابه يا ابن الناس انه هيج وهيج بية ترة شهم ييجي بالچلمة الطيبة والضحكة الحلوة
سمر : حاجيته كبل يومين وياريتني ماحجيت يكولي خابرتيني اتنكدين علية وهاي انه صارلي فوك الشهرين ما شايفته ولا حاجية وياه وتكولين عبالك كبل ساعة محاجيته ويتنتر بالحجي..
طيبة : حاجيتيه على البيت ؟
سمر : اي ، يكولي اختاري الطابق التردينه وما عليج بالباقي
طيبة : سوي الكالج عليه وريحي بالج
سمر : طيبة ترة مو سهلة علية اشوفهم كدام عيني مرتاحين وسعيدين غير اموت بقهري ، لا تشوفيني ساكتة ، مرات الوجع ما ينوصف ، ينشاف بالعين وانتم ما حاسين بية ، جاي اموت على البطيء ، انتِ عبالج هينة من هاملنا انه وبنته وشبه ناسينا كل يوم اموتن قهر وياكلني التفكير أكل...
طيبة : سمر انتِ صوجج لا تعيشين دور الضحية زايد
سمر : راح نرجع للملامة ؟
طيبة : اي نرجع لأن جنتي تكدرين تخلصين من هذا الوضع وتعيشين حياة ثانية و بدل الفرصة اجتج اثنين وانتِ برجليج ترجعين لشهم هو ما ردج لذمته من كيفه بالمرتين انتِ دزيتي عليه وجبرتيه...
سمر : المرة الاولى هو ردني من عرف بية حامل ما ردني لسواد عيوني ولا انه دزيت عليه..
طيبة : والثانية ؟ مو ما رادج عليش دكيتي رجل لو هو لو ما اريد وفرحتي ولبستي فستان وصالون وكلتلج ياسمر لا تتأملين بشهم هواي ترة هو هو ما تغير كلتي لا حاجيته بالنقال وسمعني للأخير وهو اول مرة يسويها ويسمعلي كلتلج هذا مو معناه حب هذا وهم حتى لو سمعج مو معناها رايدج ...
سمر : عليج الله يعني انه شنو بية ما ينحب ؟ ها حاجيني بشنو قاصرة ؟ ليش ما يشوفني بعيونه كاملة؟
طيبة : الرجال ما يدور شكل وتنظيف بيت وعجن وخبز والركض ورا الجهال ، الرجال يريد الاهتمام والسالفة الحلوة والدلال وتلبسيله وما تعانديه انتِ ياسمر خلصتيها وياه جامدة تدلليه بالأكل والشرب والتنظيف تلمعين بغرفته وملابسه وكاسرة ظهرج ، فكرتي بيوم تلبسين تدللين عليه ؟ لو مخلصتها وياه مثل البومة وها انتِ كل اسلوب ماعندج وياه
سمر : عليش تظلميني مو حرام ؟ مو جنت البسله وهو يرفضني ؟ شكد جنت اهتم بنفس ما يشوفني الى ان مليت منه تعبني
طيبة : اي وكمتي تنامين بدشداشة الطبخ يمه الى ان شردتيه منج ما تسكتين ياسمر ، من تالي صرتي تهتمين ما تشوفيه من لكاج قافلة الغرفة عليج ومبدلة وحاطة المكياج عباله تخونيه لان انتِ ما معودته على هيج شي ، كل عركاته وياج بالفترة الاخيرة بسبب الغيرة يكولج هاي المن هيج لابسة والمن هيج مهتمة وكاصة وصابغة الشعر وتسودن ...
سمر : اذا هو ما شايفني بعينه شلون تريدين اخليه يشوفني ؟
طيبة : بالكلام الحلو بالاسلوب غيري من نفسج هو راح يتغير
سمر : شلون اغير من نفسي ما تكوليلي ؟
طيبة : فكري بيها اذا حبيتي تتغيرين لنفسج تغيري واذا حبيتي ترجعين شهم لحياتكم تغيري علموده هو
سمر : تعاي انتِ وين متعلمة هاي السوالف ؟ طلع بيج بلة والله
طيبة : الزمن يعلم ومن يعلم ياخذ أجره ، انه ما صرت بهذا الفهم لو ضليت مثلج ، انه انتبه على تصرفاتكم ، امي شلون تعامل ابوي واشوف الغلط اللي تسويه وتخليه يغضب منها اقرر وي نفسي اذا اتزوجت ما اكرره وتعلمت من حياتج وحياة نبأ وسارة و وفاء كل وحدة منكم نطتني درس بالحياة بدون ما تحس ، انه صح تشوفيني ساكتة فد آخذ اللي يفيدني من تجاربكم واشمر اللي يأذيني بالمستقبل ولا تنسين تجربتي وي ليث فتحت عيوني على هواي اشياء جنت غافلة عنها ..
سمر : هسه احنا لو دارسات مو هذا حالنا ، جان حسبولنا حساب وخافوا على زعلنا
طيبة : الدراسة ما تعلمج اسلوب الحياة والتعامل وي البشر ، الدراسة تنطيج علم وفهم وثقافة والباقي تكتسبيه من اهلج من عشيرتج من تجاربج وي الحياة ، اضربلج مثل ، علاقتج بداية زواجج وي شهم مثل هسه ؟
سمر : لا طبعاً هواي تغيرت
طيبة : من اي ناحية ؟
سمر : يعني كمت ما اقبل يهيني ولا اقبل يقلل مني ولا ارضى يوصل لغرفتي مجرد هو مشتاق لفراشي مو لسمر نفسها ، شلون اوصلها الج ، باعي شهم احسه يحبني كجسد ما يحب روحي ما يحب علاقتنا ما معترف بية زوجة ولا احسه يتباهة من يجيب طاريي عكس ضحى يرفع خشمه ليوفك من يسألوه عنها ويحير شلون يمدح بيها وبطبخها وبأهلها ، يكوم ويكعد يصيح تفتهمني ومريحتني وانه ياطيبة حاطني على الهامش لهذا السبب تشوفيني ابعده عني رغم ربي شاهد من جواية اتكطع
طيبة : تحبيه عوبة ادري بيج وشفتي هذا القصد من كلامي الانسان يتعلم من اخطائه وتجاربه
سمر : شلون ما احبه وهو اول حب بحياتي اول شخص فتحت عيني عليه اكثر واحد بالدنيا اهتم بية ويتفكدني اكلت شربت نعست ، اذا ما قارية يكعد يقريني واذا ما مخلصة واجباتي يقلد خطي ويكتب واجبي حتى ما اتحاسب من معلمتي ، شنو انسى منه حتى اكرها بس تصرفاته ورا الزواج خلتني شوي شوي انفر منه بس ما كارهته ولا اتمناله السوء ، تصدكين مرات بودي افتح گلبي واضمه بيه هيج اخافن عليه ..
طيبة : هنيالة والله وين لاكيها اثنين يتعاركن عليه ويحبنه
سمر : اجذب عليج اذا بيوم كلتلج اكرها ، اضوج من تصرفاته وانقهر بس ما اكدر اكرها لو اطلعه من گلبي اتمنى مرات اكرها تصدكين
طيبة : ليش تتمنين تكرهينه ؟
سمر : حتى اكدر اعيش بدونه ، ما افكر بيه ولا اغار عليه بغيابه
طيبة : الله يبرد گلبج يسمر وما يخلي وحدة تعيش اللي عشتيه
سمر : آمين يارب ، كومي نخلص شغلنا كبل لا تكعد عمتي وتشوفنا بعدنا كاعدات
طيبة : كملي ريوكج ونكوم
سمر : انسدت نفسي ، كومي خيتي كومي
كمنا على الشغل ، للظهر خلصنا البيت ودخلنا للمطبخ نساعد امي بالغدة ، التفتت عاينتلي وكالت
زهرة : طيبة ما تخابرين فارس شوفيه وين صار ، دزيته يجيب كم حاجة راح وما اجى بعد لايكون رايح لجماعته وغاط يمهم
طيبة : هسه اشوفنه
خابرته كال انه وصلت راح اطبك السيارة وانزل ، حجيت لامي ورحت عند جدتي ، آخذت كف ايدها بسته
طيبة : تعبانة ياروحي ؟
صدمة : ما اعرف راسي دايخ الدكتور يكول بية ثري وبري
طيبة : شني هذا جدة ؟
صدمة : ما اعرف احسن قربت ايامي وراح اموتن
طيبة : عمرج طويل جدتي لاتكولين هيج فدوة
دخل فارس شايل بيده علاكة رفعها وعاين لجدتي
فارس : جبتلج شغلة ترجعج شابة
صدمة : شنو جبت ؟
فارس : بروكلي كالو زين للبشرة ويسويلج نظارة ويرجعج شباب
صدمة : شني هذا الموكلي ؟
فارس : جدة بروكلي بروكلي
طلعه من العلاكة وشوفه الها
صدمة : يا هذا قرنابيط ما مستوي بعده اخضر هو انت تجيب شي بيه حظ ؟
فارس : لا جدة هذا بروكلي نسويلج منه شوربة خضار لو نسلكه وتاكليه وحده واوعدج ترجعيلنا شابة بالعشرين من اول مرة
صدمة : ياشابة والدكتور كال عندج الثري والبري نازل فرد نوب
فارس : شني هذا جدة ؟ مرض جديد ؟
صدمة : ما اعرف فد كال لازم تكعد بالشمس ويريد اكشف عن زروري الخايس الما يستحي
فارس : اي جدة طلعيهن خلنا نشوف الكيمر عليمن حارمتنا منه
صدمة : لا تداهرني وخر غاد من وجهي مالي خلكك
طيبة : فارس شنو هذا الثري والبري ؟
كام يضحك اتدنى مني وكال
فارس : قصدها الدي ثري عندها نازل
طيبة : ولهذا السبب جاي اتدوخ ؟
فارس : اي مابيها شي عيارة
طيبة : يعني ما يحتاجلها غير فيتامينات وتصير زينة ؟
فارس : اي حتى علاج ما كتبلها بس هي حابة تتدلل على يعكوب
صدمة : شجاي تدردم ؟
فارس : ما مدردم كومي اطلعج على الشمس شوية
صدمة : مابية راسي دايخ وضعيتي تعبانة فرد نوب
فارس : جدة من النوم والحركة القليلة هيج يصير بيج كومي هسه ارجعج شباب
كومها وهي ما تقبل تكوم ، حط ايده جوا رجلها وظهرها وشالها من الفراش
صدمة : يايا جدة نزلني لا توكعني واتكسر
فارس : شني جاهل شايلج ويوكعج ؟ لا تخافين لبدي بسدي ..
مشى بيها للحديقة يضحك ويداهرها ويتغزل ، نزلها على الكرسي كعدها ، لزمها ثوبها حتى يرفعه ضربته على ايده
صدمة : وخر غاد سرسري
فارس : جدة خليني اتفرج والله محروم
صدمة : انجب ارعن
فارس : اصيحلج جدي يكشفج وعلي خوب تكيفين انتِ
صدمة : ما توخر مني انت ناوي اليوم تموتني ؟
فارس : جدة مابيج شي عليش خابصة روحج اموت وما اموت ، انه اموتن كبلج
صدمة : والله يا فريس هاي آخر ايامي وكول جدتي كالت
فارس : جدة من سنة التسعين وانتِ تكولين نفس الحجي وهياتج ماشاءالله عمرتي
صدمة : هو انه عليش تمرضت انت حاط عينك عليّ
فارس : لا والله جدة انتِ تريدين تجددين عريس مو بلة ؟
صدمة : انجب ارعن
فارس : اي مادام كمتي تتداهرين وياي مابيج شي
صدمة : اخ راسي امشي وديني انامن
فارس : انه اعرف شنو دواج ، ابقي كاعدة هنا شوي واجيج
صدمة : ولك وين رايح وعايفني تعال ردني للبيت
فارس : هسه راجعلج
شافني واكفة اباب البيت عاينلي وكال
فارس : روحي يم جدتي هسه اجي
صدمة : وين رايح ؟
فارس : بشغلة ما اتأخر
صعد سيارته وراح ورا ساعة رجع وجايب اخوات جدتي داحسهن دحس بالسيارة ، فات بيهن للحديقة ، وكف وصاح من بعيد
فارس : جدة جبتلج رداعة ومطيرة وحريزة ونعيمة ونوفة اشبعي بيهن هسه تردلج روحج
يمشن على كيف وصلن لجدتي وبدت النعاوي مالتهن من سمعن بيها مريضة وتريد تشوفهن
نوفة : مت عيني ياخية فارس يكول مريضة وتريد تشوفجن عليش ما تحجين ما تكولين
صدمة : فرفحت روحي عليجن ليش ما تجني اشوفجن ؟ اي والله ياخياتي نهايتي قربت
رداعة : من يجيبنا عليج غير فارس ؟ ينطيه العافية كون ، عمرج طويل ان شاءالله
راح جابلهن فراش فرشه بالكاع وكعدهن ، جدتي اشرتلي انزلها يمهن بالكاع ، ركض فارس نزلها ودفع الكرسي غاد عنها وتربع يمهن وكال
فارس : شمحلاتها الدنيا كبل ناس تدور على ناس
نعيمة : اي والله هسه كل شي تغير ، ولك ما تزوجت ؟
فارس : اي وصار عندي وليد
رداعة : يا صدك صلوات يمتى تزوجت وعليش ما دزيتوا علينا؟
فارس : صارت بساع بساع
صدمة : جذاب لا تصدكن بيه
فارس : مو جذاب هسه اجيبلجن ابني شوفنه
كام منهن وجدتي تضحك على سوالفه ، فات للبيت جاب مصيول ، ملبسه لبس حلو و امشطله صفح والملهية بحلكه ، تربع وحطه بنصهن وهذني عاطن يبووو
فارس : هذا استقبالجن لأبني تعيطن بوجهه هسه اخترع فوك ما تنطنه نكوط
التفتلي وكال
فارس : طيبة جيبي مي وشكر خل اشربه صارت بيه خرعة ، انه هم صوجي اجيب ابني واحطه ابنصجن
نعيمة : وخره غاد عابت هلحلك شلون يضحك
فارس : ما يستغرب جنه عرفجن
نعيمة : عبالنا صار براسك خير وصدك تزوجت
فارس : بضميرج مو يشبه جدتي ؟
صدمة : انجب خايس
فارس : ها هسه وجهج ورد ورجع الدم بيه مادامج شفتي اخواتج صرتي زينة
عاينتله ودارت وجهها ، شافتني واكفة كالت
صدمة : طيبة كولي لأمج تجثر بالغدة تلكيها مسوية على الكد
طيبة : صار جدة ، فارس تعال وياي
كام شال مصيول حطه على ركبته ولزم ايده الاثنين ومشى وياي ابتعدنا عنهم وكفت احاجيه
طيبة : فارس رحت جبتهم وما انطيت خبر لأمي وتدري بيها مريضة هسه فد اكوللها على الغدا تتعارك وياي وتطلع قهرهه بية ، روح انت حاجيها واصدمها
فارس : ما تحاجها انتِ عليش تخافين ؟
طيبة : منو جابهم ؟ انه لو انت ؟ روح تورط وي امي انه معلية
فارس : اي اروح قابل خايف
مشى للمطبخ مشيت وراه امشي ، دخلنا جانت تهدر بالتمن ، طلع خيار ويكرط بيه يخاف يحاجيها
زهرة : فارس آخذ السفرة مدها بالهول ، وانتِ تعاي صبي الاكل وياي
فارس : صار يمة بس اكو شغلة صغيرة اريد اكولج عليها
التفتتله عاكدة حاجبها
زهرة : خير شكو ؟
فارس : اجوي خطار على جدتي وجدتي كالت كثروا الاكل
زهرة : ياهو اجى ؟
فارس : اخواتها
هي سمعت اخواتها اجن لو كلبت الدنيا على فارس
زهرة : انت جبتهن ماكو غيرك يدور سوالف العجايز ، روح انت حير بغداهن انه مالي شغل
عافته وطلعت من المطبخ لحكها
فارس : يمة عيب الجاي عليك حكه عليك
زهرة : عليك مو علية ، ما صخمت وجهك وكلتلك روح جيبهن وتعال
فارس : يمة هنه شنو ياكلن هي لكمتين
زهرة : انه مو على شكد ياكلن ، ما تشوفني مريضة وتعبانة بالكوة واكفة ؟ والغدة خلصته ما اسوي زيادة انت حير بيهن وبغداهن
فاتت غرفتها وقفلت الباب ، عاينلي وميل راسه
طيبة : راح تورطني ادري
فارس : انه وياج نتساعد ونسويلهن الغدة
عاينتله بعتب جريت نفس وهو آخذ راسي باسه
فارس : والله خطية جدتي ما تشوفيها شكثر فرحت انه اساعدج والله نتعاون ونخلص بساع
طيبة : خلينا نغديهن بهذا الاكل والجديد احنا نتغدا بيه
فارس : فدوة لحلكج طيوبة
صبينا الغدة وهو نقل الاكل للسفرة وطلع صاحهن يتغدن ، وانه وكفت اطبخ من جديد ، صحت سمر اجت ساعدتني نص ساعة ونصينا النار جوا الجدورة
سمر : هذا فارس ما يجوز من سوالفه ؟
طيبة : لا ما يجوز وامي تعاركت وياه وزعلت بغرفتها
سمر : فوكاها مريضة وروحها بخشمها وهو حاير بجداته
طيبة : اي والله تحجين تطلعين ما تريدين الخطار ، ما يتوب ابد
ورا شوية خلصنا الغدا صبيتلهم الچاي وطلعنا انه وسمر نتمشى نشوف البناء وين وصل
وصلنا للكاع جانوا العمال طاشين ، دخلنا افترينا البيوت ماشاءالله صاعدة طابق اول بعدهم ما مسكفين ، عاينتلي سمر وكالت
سمر : آخذ الطابق الثاني مو احسن ؟ شتكولين ؟
طيبة : ليش الثاني ؟ الاول بيه حديقة وانتِ عندج طفلة تلعب تتحرك عليش حاصرتها فوك
سمر : ما ادري احس بيه خصوصية اكثر اذا خذيت الفوك
طيبة : براحتج
سمر : اي آخذ الثاني
طيبة : وهذا بيت يوسف هم صاعدين بالبناء ، فد بيت فارس بعدهم ما مبلشين بيه
سمر : هسه شوي شوي يكملوهن
طيبة : الله يباركلكم بيهن وعتبتهن خير ان شاءالله
سمر : الله يسمع منج
طلعنا حتى نرجع للبيت تلاكينا وي باسل ، غطيت وجهي بعباتي واريدن اختفي من عيونه ما اريده يشوفني ، تعديته واسمعه يسلم على سمر بعدها صاحني سرعت خطواتي وحسيته يلحكني ، ويصيح
باسل : طيبة طيبة لحظة احاجيج
ما التفتت مشيت سريع وصلت للبيت ، دخلت وگلبي يركض من الخوف عبالك راح ينهبني مو يحاجيني ، ورا شوية فاتت سمر وبيدها ماعون عاينتلي تضحك
طيبة : شكو شبيج تضحكين ؟
سمر : عليش انهزمتي منه ؟ الزلمة راد يسلم عليج
طيبة : ما اريدن سلامه
سمر : يا ليش متعاركة وياه ؟
طيبة : انه وجه يتعارك ؟
سمر : شبيج ركضتي منه ؟
طيبة : مابية سدي الموضوع
حطت كبالي ماعون وكشفته بيه قطعة كيك
طيبة : شنو هذا المن ؟
سمر : باسل كال هاي حصة طيبة مسوين عيد ميلاد لرفل وتنغصلج
تحجي وتضحك
طيبة : اكليها انتِ بالعافية
سمر : الج جايبة مو الي
طيبة : هو لو يعرف الاصول صدك ، يجيب للكل مو فد الي
سمر : المهم ذكرج بشي مو زينة هاي ؟
طيبة : لا موزينة
تركتها وصعدت لغرفتي ضايجة ومهمومة شبيه هذا يلاحكني ما يستحي هيج الخجل انعدم عند الوادم واذا بنت عمه يتمادى وياي ، خل يعيدها الا اربيه من جديد ولا اخافن منه بعد ...
ثاني يوم الصبح جنت اخبز واجت سمر تساعدني وما شوفه اﻹ جاي من بعيد يتمشى ويعاين علية مبتسم
طيبة : شعنده هذا وياي ؟
سمر : منو ؟
اشرتلها براسي عليه ، اندارت عاينتله ورجعت تعاينلي تضحك
طيبة : لا تضحكين لا اطمس روسكم بالتنور انتِ وياه
سمر : يا وانه شكو ؟
وصل يمنا سلم ، سمر ردتله السلام
باسل : طيبة شلونج ؟
رديت من ورا خشمي
طيبة : جنت زينة لحد قبل شوية
باسل : ضجتي لأن شفتيني ؟
طيبة : زين من حسيت
باسل : شبيج وياي ؟ شمسويلج انه ؟
طيبة : ما مسوي شي سلامتك
باسل : لا والله شمسوي البارحة تنهزمين مني وما سلمتي علية واليوم تحاجيني من طارف خشمج
طيبة : وانت شنو تحاسبني شلون احجي ؟ روح منا لو احاجي اخواني يحطولك حد ؟
تربع وكعد على فرشة الخبز ، آخذ خبزة ياكل بيها
باسل : شنو تكوليلهم ابن عمي مر بالصدفة وسلم علية ؟ لو اجى ياخذ خبز من شم الريحة عقله طار
شمرت الشنكة من ايدي على سمر
طيبة : هاج انتِ كملي خبز انه رايحة
باسل : ياعمي والله ما مسوي شي رايد احاجيج كلمتين
طيبة : ولا كلمة اسمع منك
عفتهم ورحت للبيت ورا شوي سمر خلصت خبز واجت فاتت للمطبخ تعاينلي وتضحك
طيبة : عابت شبيج ؟
سمر : الزلمة بيانه واكع ومحد مسمي عليه
طيبة : شنو قصدج ؟
سمر : يحبج
طيبة : وشلون عرفتي بلة ؟
سمر : عيونه تسولف
طيبة : خبيرة عيون صايرة وما ادري بيج
سمر : عليش ما تسمعين منه شوفيه شنو يريد ، انه الفضول موتني البارحة جايبلج كيك واليوم مغبش من الفجر عليج اكيد وراه شي
طيبة : اعرف شنو وراه لهذا ما رايده احاجيه
سمر : احجيلي صايرة تضمين علية ؟
دنكت راسي وحجيتلها بالكوة
سمر : يعني خاطبج من عمي ؟
طيبة : اي وانه رفضت
سمر : ليش ولج باسل خوش باسل
طيبة : خوش لنفسه
سمر : انطيه فرصة عليش رفضتي من البداية ؟
طيبة : وعليش انطيه فرصة وانه اعرف اطباعه
سمر : شبيها اطباعه حاله حال اخوانج ترة
طيبة : لا عيني شجابه عليهم ، باسل عصبي نار وروحه بخشمه ما يوالمني
سمر : وانتِ معاشرته حتى تعرفينه عصبي نار
طيبة : عليش خطيبته فسخت لو ما اطباعه الزفت وياها
سمر : ياااا طيبة هاي سالفة قديمة وجان صغير حيل من خطب هسه اكيد تغير من كبر
طيبة : لا حبيبتي ما تغير ابو طبع اسألي عن سلامته
سمر : اسمعي منه وبعدها ارفضي اذا ما عجبج
طيبة : كلت لا يعني لا
سمر : ليش غير افتهم ؟
طيبة : جزت نفسي من ولد عمامج كلهم
عفتها وكمت اشتغل حتى ما تحاجيني بالموضوع لان بالنسبة الية منتهي كبل لا يبدأ ....
بغداد
الأعظيمة
شهم صف سيارته كبال بيت سرى اخت ريحانة ، طلع موبايله واتصل بيوسف يستفسر عن شوية معلومات عنهم
شهم : يوسف شنو اسم اختها اللي ابغداد ساكنة
يوسف : اذا ما تخوني ذاكرتي اسمها سرى ، بس ليش تسأل ؟
شهم : انه كبال بيتها كلت احاجيها بلكت تجي للمستشفى وتستلم اختها وتخلصنا
يوسف : من وين جبت عنوانها ؟
شهم : من ريحانة منين يعني
يوسف : ونطتك العنوان عادي ؟
شهم : اي
سأله مستغرب
يوسف : شلون كدرت تقنعها هاي راسها بيه حجارة مو عقل
شهم : طبطبتها ونطتني العنوان
يوسف : شنو ؟ خاف آذيتها ؟ شهم احجي الصدك ؟
شهم : هاي شبيك بكل شي تصدك
يوسف : الصراحة مستغرب شلون نطتك العنوان وانه شهور اركض وراها وما قبلت تنطيني معلومة وحدة عنهم
شهم : اختلاف سياسات ضلعي
يوسف : وهسه انت راح تحجي وياها ؟
شهم : لا اشرب جاي وعصرونية واطلع ، اي اكيد احاجيها بموضوع اختها
يوسف : انت ليش روحك بخشمك دائماً بس اريد افتهم
شهم : كل اللي صار بينا والراح يصير وبعدك تسألني ليش روحي بخشمي ؟
سكت يوسف ما جاوبه بعدها كال
يوسف : اي شي يصير وياك بلغني اول بأول
شهم : ماشي
يوسف : دير بالك ترة زوجها حسب ما اتذكر مسؤول هيج شي
شهم : اي واضح من الحراسات الكبال بيته
يوسف : وشلون تحجي وياها اكيد ما راح يخلوك
شهم : نجرب ونشوف
يوسف : الله يسهل لا تنسى اتطمني
شهم : ماشي
سده منه ونزل من السيارة ، عبر الشارع وكف كبال بيتهم اجاه واحد من الحرس باوعله وكال
_ تفضل رايد شي ؟
شهم : اي
_ شنو ؟
شهم : هذا مو بيت الست سرى ؟
_ منو حضرتك ؟
شهم : دكتور يوسف عبد الملك
_ وشنو تريد ؟
شهم : اريد احجي وياها بموضوع خاص
_ شنو هذا الموضوع ؟
شهم : يخص اختها
_منو اختها ؟
شهم : ريحانة باسل احمد
_ انتظرني هنا ابلغها وارجعلك جواب
شهم : انتظرك ياطيب
النوب عليها حراسات ونبلغ وكذا ، بعد وبعد وين نوصل من ورا سيد يوسف وريحانته ، ورا دقايق طلع وكال
_ المدام تكول ما اعرف وحدة بهذا الاسم نعتذر منك
شهم : شلون ما تعرفها متأكد هي اختها
_ هذا اللي صار ما اكدر افيدك بشي اعتذر
شهم : زين جرب تكوللها عندي امانة من اختها واريد اوصلها الها وشوف شنو تكول
_ ماعندها اخت بهذا الاسم اخي روح منا
شهم : هسه بلغها ونشوف ردها وبعدين نسولف اذا رفضت داير وجهي وراجع من وين ما اجيت
رجع للبيت دخل ، وهالمرة طول نصف ساعة وتارك شهم بالشمس ، واكف يستغفر وراها يسب ويلعن بيهم
طلع من البيت باوعله وكال
_ حاجيها من هذا الجهاز اذا تريد بس وجه لوجه ممنوع
شهم : نحاجيها ليش لا
آخذ منه الجهاز وحجى
شهم : السلام عليكم مدام شلون الصحة ان شاءالله تكونين بخير
سرى : احجي شنو رايد ؟ وليش جاي ؟ منو دازك علية ؟
شهم : السلام عليكم كلت
نفخت بضجر وردت من ورا خشمها
سرى : وعليكم السلام
شهم : وياج الدكتور الاستشاري يوسف عبد الملك واجيت على العنوان الموجود بأضبارة المريضة ريحانة باسل احمد اللي هي اختج واريد تستلموها لأن البنية تشافت تماماً وانه خلصت علاجها بالكامل ، وعندي تقرير يثبت سلامتها من جميع الامراض النفسية ، والصراحة انه خلصت شغلي بهاي المستشفى واريد اتطمن عليها قبل لا اروح
سرى : ها كلتلي ريحانة وتعافت ؟ لا عيني ما نريدها ولا نريد نستلمها
شهم : زين ليش هي مو اختج ؟ حرام تعوفوها وحدها لا تسألون عليها ولا مهتمين بيها ليش هيج ؟
سرى : وانت حضرتك صاير مصلح اجتماعي لو دكتور تسوي شغلك المطلوب منك وتسكت ..
شهم : لا شغلتي مو بس اعالج ، اريد راحة المرضى واحب اشوفهم بوسط اهاليهم على شنو تاركيها بالمصح وهي تعافت ؟
سرى : انت شعليك ؟ روح عيني روح وبعد لا ترجع
شهم : لا راح ارجع وادوخ راسكم الى ان تستلموها لو تنطيني عنوان ثاني ﻷختها او اي احد يستلمها اذا انتِ ما تريدين
سرى : ماعندها احد روح ﻷمها بالسجن خليها تستلمها
شهم : امها ؟ ليش هي مو امج انتِ هم ؟
سرى : جانت امي قبل لا تقتل ابوية وتستولي على ورثنا وتحرمنا منه ، وبعدين انت شكو واني ليش جاي ابررلك يلة روح منا
شهم : زين مابيها مجال تطلعين ونتفاهم ؟
سرى : مابيها طبعاً وبعدين انت من وين جبت عنواني ؟ سالفة الأضبارة ما دخلت راسي
شهم : الصراحة من اختج يعني هي تريد تشوفج
سرى : جانت اختي وانتهي موضوعها هسه تذكرتني؟
شهم : لا ما انتهى انه جاي واريدج تستلميها حتى اطمأن عليها صدكيني صارت زينة وهي بحاجتكم
سرى : هاي مو آدمية متبرين منها ما كفاها فضحتنا بين الناس انت كل شي ما تدري الظاهر
شهم : ليش شنو سوت ؟ غير تمرضت وهذا قدرها ما يصير نحاسبها على شي مو بإيدها
ضحكت وكالت
سرى : انت بطران وكل شي ما تدري روح عيني روح
شهم : اختي هذا مو اسلوب لو تفهميني مثل الناس لو ادوخلكم راسكم
سرى : شنو جاي تهدد ؟ ترة بإشارة وحدة مني اخليهم يشيلوك منا وحرام تخسر مهنتك بسبب وحدة ما تسوى شي
شهم : شنو سوت ليش هالكد كارهتها هي مو دمج ولحمج ؟ ليش الظلم ؟ بعدين الله شلون يرحمنا واحنا هاي نفسيتنا ؟
سرى : اكولك بدل ما تنطيني مواعظ روح اسأل مريضتك شلون قبلتها على نفسها تاكل ورثنا وقنعت امها تتنازللها عن حصتها اللي هي بالاساس حصصنا وغير هيج مريضتك فضحتنا بين الناس من تركت زوجها وانهزمت بليلة العرس وسودت وجهنا ، على شنو تريدني اعترف بيها واجيبها يمي ، اصلاً هاي عدو مو اخت
شهم : شنو ياعرس هذا ؟
