رواية خاطف مجهول الفصل الثاني بقلم تقى محمد
_طب ما هو كل حاجه طبيعية اهو لحد دلوقتي.
قالها يونس وهو بيبص للواء باستغراب
مفيش كام ثانية ولقينا الكهرباء قطعت بصينا كلنا لموبايلاتنا بس فجأه لقينا الكاميرا فصلت عندنا كلنا والموبايلات فصلت كلها.
طلعنا نجري بسرعه على الأوضة واللواء كان أول واحد فينا.
فتح الباب بتاع الاوضه و وقف متسمر مكانه وهو بيبص للاوضه بصدمة بصيت ل يونس لقيته بيبصلي بنظرات استغراب من حالة اللواء و بعدين شاورلي ندخل نشوف فيه ايه.
_يا نهار مش باين له ملامح.
دي كانت أول حاجه قولتها بعد ما دخلنا الأوضة إذ بي الاقي السرير فاضي والكلب مش موجود مكان ما حطيناه من شوية ومفيش اي أثر و كأن السرير بلعه زي الأطفال بالظبط .
بصيت على يونس اللي كانت صدمته متقلش عن صدمتي انا وكل إللي كانو موجودين معانا وقتها.
_معنى كدة ان الخاطف مأخدش باله ان دة مش طفل واخده هو كمان؟
قطعت ياسمين زميلتنا الصمت بالجملة اللي صدمتني اكتر من الاول.
سمعت صوت احمد زميلنا بيرد عليها
_وليه ميكونش الخاطف بيراقبنا وعرف كل اللي احنا بنعمله حتى ان الكهرباء والكاميرا فصلت الساعه ١٢ بالظبط اكيد مش صدفة يعني؟!
بصينا ليه باقتناع تام و حل الصمت مرة تانية في المكان.
_طب وايه اللي هيخلي خاطف زي دة ياخد كلب مش طفل زي اللي بيعمله؟
سألت السؤال دة في دماغي بس ملقتش ليه إجابة وقتها.
اللواء قالنا نروح بيوتنا لإن قعادنا ملوش لازمة "بصراحة عندة حق اصل اللي كنا جايين نمنعه من أنه يحصل خلاص حصل واحنا مطلعناش بأي دليل برضو "
بصيت في ساعة أيدي قبل ما نمشي لقيتها
الساعه ١٢ وعشر دقايق يعني الخاطف كان اسرع
مننا بكتير في أقل من خمس دقايق كان خلص كل حاجه.
روحت البيت معرفتش انام من كتر التفكير في اللي حصل بس بعد شويه غلبني النوم واستسلمت ليه.
♡♡_
سبحانك اللهم اني كنت من الظالمين.
بعد كام يوم /القسم
مر كام يوم واحنا برضو مش عارفين نوصل ل دليل
_ايه الاخبار مفيش اي دليل برضو موصلتيش ل حاجه؟
كان صوت يونس وهو بيدخل مكتبي لأن اللواء قالنا ان احنا اللي مسؤولين عن القضية دي وأنا وهو شركاء فيها للأسف
اتنهدت بملل وانا برد عليه
_لا موصلتش لحاجة،انتَ وصلت لحاجة؟
قعد على الكرسي اللي قصادي وهو بيهز راسه بمعنى"لأ"
فضل الصمت هو سيد المكان لحد ما قطعه هو
_مالك،سرحانة في ايه انهاردة كل شوية تروحي فين؟
_لأ مفيش حاجة انا تمام.
ضيق عينه بشك
_ازاي مفيش انتي مش شايفه انتي عاملة ازاي؟!
_حلمت امبارح حلم غريب مش عارفة افسره و بفكر فيه.
بصلي باهتمام وهو مستنيني احكيله
ولما سكت شويه بصلي وقالي بزهق
_ما تخلصي يا بنتي تحكي،هسحب الكلام من بقك!؟
اتنهدت و غمضت عيوني وانا بفتكر الحلم
__♡♡
Flash Back
_يلا يا يويو عشان الغدا.
_حاضر يا مامي هروح اغسل أيدي و اجي.
كانت بنت صغيرة متتعداش ال١٠سنين بتكلم مامتها بس انا حاسة اني شفت البنت دي قبل كدة ايه دة ثواني البنت دي تبقى انا!!!
البنت دي أو اللي هي انا راحت غسلت ايدها ورجعت قعدت مع باباها ومامتها على الترابيزه وبدأو ياكلو بس في نص ما هما بياكلو البنت بصتلي بصات مرعبة وابتسمت ابتسامة خبيثة جانبية .
_انا عارفة ومش هسيبك دلوقتي غير لما تعرفي انتي كمان.
وبدأت تضحك بشكل مرعب وهستيري
بصيت على الترابيزه لقيت الام والاب اختفو ومبقاش في غيري انا والبنت المرعبة دي.
بدأت تقرب مني بخطوات بطيئة و انا بدأت اجري منها وانا مش عارفة انا رايحة فين لحد ما لقيتها وقفت فجأة عن الجري ورايا و بصت بصتها المرعبة وقالت بصوت عالي اوي
_لأ مش هتمشي دلوقتي يا يمنى هجيلك تاني متنسيش.
وضحكت تاني بس الفرق ان المرادي كان صوت ضحكاتها عالية جدا زي صوتها وهي بتقولي اخر جملة
_♡♡
Back
فتحت عيني بعد ما حكيت ل يونس كل الحلم و بصتله لقيت على وشه علامات استغراب كتير اوي
فضل ساكت شوية وبعدين اتكلم
_طب ودة معناه ايه يا ترى؟؟
هزيت كتفي بمعنى "معرفش"
رجع يسأل تاني
_طب اي تكملة الحلم كملي.
_بس كدة،بعدها قومت من النوم مفزوعة و معرفتش انام تاني.
_غريبة،طب طفولتك كان فيها حاجة أثرت في نفسيتك يعني؟!
_تؤ طفولتي زي الفل.
قام وقف عشان يطلع من المكتب وهو بيقولي
_طب راجعيها تاني،ولو شوفتي حلم زي دة تاني تعالي احكيلي.
_اوكي.
وطلع من المكتب ومشى
خلص اليوم وروحت البيت غيرت هدومي ودخلت نمت علطول
__♡♡
استغفر الله
تاني يوم
كنت بعمل القهوة بتاعتي أول ما وصلت القسم عشان مش مفوقه كويس
لقيت يونس جه يعمل قهوة ليه على المكنة اللي جنبي وهو بيقول
_ايه يا بنتي مالك تاني شكلك مش كويس اكتر من امبارح؟
مردتش عليه و كملت عمل القهوة بتاعتي
_ايه اللي حصل طيب؟
بصتله بعد ما اخدت القهوة من على المكنة
_شوفت حلم تاني امبارح.
_زي اللي قبله برضو؟
هزيت راسي بمعنى "اه" وانا بشرب بق من القهوة
_طب و شوفتي فيه ايه دة كمان؟
_ لأ تعالى نقعد في المكتب واقولك عشان دة طويل شوية.
روحنا قعدنا في المكتب خدت نفس عميق وبدأت احكيله
______♡♡
الحمدلله
_مش قولت لك هجيلك تاني يا يمنى.
بصيت لمصدر الصوت اللي كان من البنت اللي شبهي بس النسخة المرعبة كانت بتبصلي بنظرات مرعبة برضو بس شكلها كان متغير شوية مش زي المرة اللي فاتت.
كنا في بيت قديم انا مش فاكراه والبيت كله ضلمة مفيش اي ضوء.
بصيت حواليا يمكن الاقي اي حد ينجدني منها بس كان المكان فاضي مفيش غيري انا وهي بس
قربت مني بخطوات بطيئة ف رجعت خطوة لورا.
بس اتفاجأت لما لقيت وشها اتغير ل وش بنت عادية جدا وجت قعدت قدامي وقالت بصوت عالي اوي كأنها بتسمع حد معانا اللي هي هتقوله بس انا مش شايفاه.
_بصي يا يمنى احنا هنعلب لعبة.
استغربت ورديت
_لعبة ايه دي؟؟
_انتي هتطبخي لي اكلتين لو واحدة منهم عجبتني هوريكي حاجه عمرك ما شفتيها،اتفقنا؟
_وهتسيبيني في حالي؟
_تؤ دي مستحيل لحد ما اعرفك اللي انا عايزاه.
سكتت كام دقيقة وبصت في الساعة اللي على الحيطة وسقفت مرة واحدة.
_يلا الوقت هيبدأ دلوقتي قدامك ساعتين وتخلصي الاكلة الأولى.
روحت بسرعة عشان الحق اخلص وكنت عاوزة اخلص منها بس مش عارفة ازاي .
جبت مكرونة كدة لقيتها في المطبخ شكلها على شكل صوابع أطفال صغيرين اوي.
سلقتها وعملت المكرونة وحطيت عليها شطة كتير اوي.
خلصت وروحت حطيته قدامها وانا حاسة اني هيجرالي حاجه من كتر الرعب.
بصت في الطبق وقالت لي
_حلو شكله مش وحش.
وبعدين داقت وكملت
_بس حامي اوي وانا مش بحب الحامي الكتير فا هنروح للعقاب بتاعي.
قلبي خبط في جدرانه وسألتها بخوف
_عقاب ايه؟
_هو انا مقولتش ليكي،سوري العقاب هو انك هتستخبي هنا ربع ساعة لو لقيتك هأكلك الاكلة اللي انتي عاملاها دي وبعدين هخلص عليكي،مفهوم؟
بلعت ريقي بخوف
_مفهوم.
_طب يلا روحي استخبي بسرعة.
طلعت اجري في الضلمة وانا مش شايفة حاجه ومش عارفة انا رايحة فين.
فجأة سمعت صوتها قريب مني وصوتها كان عالي جدا
_انا قربت منك، انصحك تغيري مكانك لو عايزة تحافظي على حياتك.
قومت اجري تاني لحد ما تعبت وقعدت في ركن بعيد
بعد شوية وقت مش عارفه قد ايه حسيت بإيد بتتحط على شعري مع صوت عالي ومخيف
_لقيتك اخيرا!!!
______________________________
قولولي رأيكم يا رفاقي وتتوقعوا ايه اللي هيحصل في يمنى وهل الوقت خلص ولا لسة؟
وادعولي كتير معاكوا
