رواية رسائل من المستقبل الفصل الثاني
أعادت قراءة الرسالة الثانية وكأنها تبحث بين سطورهاعلي كذبة ولو صغيرة تنقذ علقلها من هذا اليقين المرعب الذي يسيطر عليها !!
ومع كل حرف كانت تقرأه كانت تعيد ذاكرتها ما حدث تفصيلاً و كأنه مشهد سينمائي هي بطلته تشاهده يمر أمام عينيها !!
أمسكت بالورقة التالية ، كان العنوان واضحاً " الرسالة الثالثة " ولكن محتواها مازالت غامضاً .
وقبل أن تفتحها ، وجدت مكتوب أسفلها " تحذير لا تقرأ إلا بعد منتصف الليل وإلا عرضتي نفسك للخط,ر " !!!
في المساء ...
عاد عمرو إلي المنزل ، وجد مظاهر الحزن تغمرها !! وحين سألها عن السبب أخبرته بتركها للعمل ، و قصت عليه كل ما حدث !!
عمرو : خلاص يا حبيبتي متزعليش نفسك ، كويس أوي إنك أتصرفتي كده .
منال " بحزن " : طيب أعمل ايه دلوقتي ؟ أنا لازم أشوف شغل تاني .
عمرو : أنا هشوفلك شغل عند أي حد من معارفي .
منال : ياريت في أسرع وقت يا عمرو ، متنساش الاقساط اللي علينا !!
عمرو : ميهمكيش يا قلبي ، قولتلك خلاص متشغليش بالك أنا هتصرف ، المهم دلوقتي عايزك تفرفشي وتخرجي من حالة الحزن دي .
منال : حاضر يا عمرو .
عمرو : وخلي بالك فرح مروة أختي بكره ، فاكرة ولا نسيتي ؟
منال : فاكرة طبعاً .
عمرو : عايزك تجهزي نفسك للفرح ، مش معقول هتقابلي الناس بنظرة الحزن اللي في عينيكي دي !!
منال : حاضر يا حبيبي .
أنتهي اليوم حتي دخلت فراشها وأنتظرت حتي أستغرق زوجها في سباتٍ عميق ، و كانت الساعة قد تعدت منتصف الليل .
قامت وأحضرت الحقيبة ، وفتحت الرسالة الثالثة لتقرأها ...
" إياك وحضور تلك المناسبة !! العواقب وخيمة وحياتك في خط,ر !! ستنتهي تلك المناسبة نهاية مآساوية !!! " .
أرتجفت بشدة حين قرأتها وشعرت ببرودة تسير في جسدها !!
هل ستكون هذه الرسالة صادقة أيضاً ؟
" هذا ما دار في ذهنها " !!
ثم بدأت تفكر بصوت عالٍ ...
أعمل ايه دلوقتي ؟!!
أنا لو رفضت أروح الفرح عمرو هيزعل!!
معقول مروحش فرح أخت جوزي ؟!!
وهل فعلاً الفرح هينتهي نهاية مآساوية ؟؟
يا حبيبتي يا مروة !!!
يا تري هيحصلك ايه بكره ؟؟
تلاحقت الهواجس، تضرب رأسها بلا توقف…
حتى ظهر السؤال الأخطر :
هل تُحذر عمرو وعائلته ؟
من الممكن حينها أن تتحول إلى مادة للسخرية !! أم تسكت ؟؟!
ظلت كل تلك الهواجس والأفكار تطاردها بعد قرائتها لكلمات تلك الرسالة المرعبة !!
صباح اليوم التالي
وأثناء تناول الفطور ،
منال : عايزة أقولك حاجة يا عمرو .
عمرو : قولي يا حبيبتي .
منال : أأانا .. مش رايحة فرح مروة .
عمرو " بدهشة " : اييييه !!! ليه ؟ أزاي متروحيش فرح أخت جوزك ؟
منال : وأنت كمان يا عمرو ، لازم متروحش .
عمرو " بذهول " : أنتي أتجننتي ولا ايه ؟!!
منال : علشان خاطري يا عمرو أسمع كلامي .
عمرو " بغضب " : كلام ايه اللي اسمعه !! ايه الجنان ده ؟!!!
منال : مش جنان يا عمرو ، أحنا لازم منروحش الفرح ، ويستحسن لو مروة أختك لغت الفرح خالص .
عمرو : أنتي حصلك ايه يا منال ؟! ايه الكلام الغريب اللي بتقوليه ده ؟!!
منال : أرجوك يا عمرو متسألنيش عن حاجة ، أنا مش هقدر أقول أكتر من اللي قولته .
عمرو : لأ بقي ، أنا لازم أعرف فيه ايه بالظبط ؟
وبعد مناقشات طويلة و محاولات من منال أن تتهرب من أسئلته ، أضطرت أم تخبره بالحقيقة !!!
عمرو : ايه التخاريف دي يا منال ؟! أزاي دكتورة متعلمة ومثقفة زيك صدق الكلام الفارغ ده ؟!!
منال : ده مش كلام فارغ يا عمرو ، والدليل إن الرسالتين الأولي والثانية أتحققوا بالحرف !!
عمرو : صدفة !! مجرد صدفة يا منال !! هنبني حياتنا و تصرفاتنا علي الصدف ؟!
منال : لأ مش صدفة ، اللي حصل هو نفسه اللي قريته في الرسالتين .
عمرو : فين الرسايل دي ؟؟
منال : معايا .
عمرو : هاتيها بعد أذنك .
منال : لأ .
عمرو : بقولك هاتي الرسابل دي !! أنا مش ممكن اسيبك تسلمي عقلك وتفكيرك للخرافات دي .
منال : خلاص يا عمرو ، لو عايز تروح الفرح ، روح أنت ، أنا مش هروح .
عمرو : أروح أزاي من غيرك ؟! منظري قدام أهلي وخصوصاً مروة هيكون ايه ؟!
منال : لما منظرنا يكون مش لطيف في موقف أحسن ما تحصلنا كارثة .
عمرو : أنا هعتبر نفسي مسمعتش الكلام الفارغ ده ، هنزل أروح أحلق شعري وأجهز ، والساعة ٥ بالظبط تكوني جاهزة علشان نروح مع بعض فرح أختي مروة .
غادر عمرو المنزل بينما بقيت منال تفكر ، ماذا تفعل ؟
تستشعر خط،ر يقترب منها ومن زوجها وعائلته لكنها لا تستطيع فعل أي شئ !!
وبعد طول تفكير ، أمسكت هاتفها وأتصلت بمروة !!!!!
حاولت الاتصال بها عدة مرات حتي أجابتها أخيراً ...
مروة : أيوه يا منال يا حبيبتي أنتي فين ؟ وعمرو أخويا فين ؟
منال : بصي يا مروة أنا عايزة أقولك حاجة ، بس مش عارفة أقولها أزاي !!
مروة : أتكلمي يا منال فيه ايه ؟
تسكت منال للحظات !!!
مروة : فيه ايه يا منال ؟ أخويا عمرو حصله حاجة ؟؟
منال : لأ ، لكنننن ...
مروة : لكن ايه ؟ قلقتيني !! اتكلمي ..
منال : لازم تلغي الفرح يا مروة .
مروة : نعم ؟!!! أنتي بتهزري أكيد .
منال : لأ ، أنا بتكلم بجد .
مروة : أنتي بتقولي ايه ؟ يعني ايه ألغي الفرح ؟ أنتي مالك يا منال ؟!! أنتي طبيعية ؟!!!!!
منال : يا مروة الفرح هيحصل فيه حاجة وحشة ، وأنا بصراحة خايفة عليكي ، علشان كده كلمتك دلوقتي .
مروة : منال ، أتكلمي بصراحة ، أنتي مش عايزة تيجي الفرح ، صح ؟
منال : والله يا قلبي أنا كنت جاية ، أنتي عارفة أنا بحبك زي أختي بالظبط وأحب لك الخير ، لكن لما عرفت أن هيحصل حاجة قولت لازم أنبهك .
مروة : هيحصل ايه يا منال ؟ وعرفتي منين ؟
منال : معرفش هيحصل ايه ؟ كل اللي أعرفه إن هتحصل كارثة .
مروة " بسخرية " : عرفتي منين بقي يا ستي ؟
منال : عرفت وخلاص .
مروة : أديني عمرو أكلمه .
منال : عمرو مش هنا ، راح يحلق شعره .
مروة : طيب يا منال سبيني أنا كمان في اللي أنا فيه علشان مش فاضية ، ويا حبيبتي لو عايزة تيجي الفرح تنوري ولو مش عايزة تيجي براحتك .
منال : طيب أسمعيني يا مروة .
مروة : سلام يا منال ، معلش مشغولة .
أنتهت محادثتها معها ، بسخرية مروة منها كما توقعت !!
وأصبحت الآن مجبرة بعد كلام عمرو وأخته مروة علي حضور الحفل !!
غيابها عن الحفل سيسبب مشكلة كبيرة لها مع زوجها وأسرته ! خاصة إذا كذبت الرسالة ومر الحفل بسلام !!!
عاد عمرو إلي المنزل ليجد زوجته كما هي ، ولم تعد نفسها للذهاب للحفل !!!
عمرو : أنتي لسه مش جهزتي نفسك يا منال ؟؟ الساعة ٤ !!! باقي أقل من ساعة علشان نمشي .
منال : أنت برضو مصمم تروح الفرح يا عمرو ؟؟
عمرو : أكيد ، وهي دي محتاجة كلام !! اوعي تكوني لسه بتفكري في التخاريف اللي كنتي بتكلميني عنها الصبح ؟؟
منال : مش تخاريف يا عمرو ، دي حقيقة .
عمرو : أفهم من كلامك إنك مش هتحضري الفرح ؟؟
