رواية المغتصبة الفصل الثاني 2 بقلم ورود الخالدي

وفعلا.. اجه خالو عدنان ثاني يوم وكعد ويانه اني، وماما وسألني، اذا جنت موافقة لولا باعتبارنا اهل وبيت.واحد وهو بمقام الاب الي، وميحتاج يدز مشية وناس لان احنا منه وبيه ومعدنا حتى رجال بالبيت يستقبل المشيه فاجة ياخذ موافقتي،   بيناتنا بس.. ومن سألني مجان كدامي اي حل غير اكوله موافقة خالو.. وطلع من عدنا فرحان وع اساس فداسبوع او اسبوعين زمان يجون يلبسوني، حلقة ويجيبولي نيشان.. وعشت برعب ثاني وقلق وانتظار وترقب ما اعرف شسوي جنت اتمنى عندي، فد مساحة او فسحة امل زغيرة اكدر، بيها احجي الماما كل الي، بداخلي،.. واخليها تشاركني بمصيبتي كأم وتفهمني، وتمنع هالزواج قبل ميصير شي رسمي بس مجانت عندي هالجرأة واصلا مجان عندي ذرة امل انه ماما حتتفهمني يمكن ماما اذا احجيلها تنجلط.. لان فرحتها واملها بيه يمكن بكد الدنيا ويمكن متنجلط لا والله  امي، واعرفها وكحة وعصبيه ومراح تسكت يمكن تروح لخالتي، سلوى وتسويلها طلابه مالها اول من تالي، بس اذا سوت الطلابة شراح يفيدني، ويفيدها هالموضوع قابل خاله سلوى راح تكعد ابنها الميت من قبرة حتى يصلح غلطته وياي.. اكيد مستحيل هالشي ولا منطقي ولا عقلاني.. وماما من راح تتعارك ويه خالتي، راح احصل بس، الفضيحة والعار ويمكن محد يصدكني، وراح يكولون تبلت على شخص ميت حتى تذب عارها عليه اي احتمال يفكرون اني، مو زينه واريد اذب بلوتي على شخص ميت حتى اخلص من الفضيحة.. واصلا اني، ما املك اي دليل اقنع بيه الناس على صحة كلامي وحقيقة الي، صار قبل كل هالسنين الي مرت.. 

وخلصن الاسبوع الاول والاسبوع الثاني بس بيت خالو مجوي، ولاجابو نيشان يعني، تاخروا كم يوم عن موعدهم لان من خطبني خالو ماما بعد مراحت لبيتهم ع اساس، عيب نروح ونرجع عليهم هالفترة كنوع من الثگل والاصول والتقاليد.. وصار عندي امل انه الزواج يمكن ينلغي، وكومة افكار افرح بيها نفسي، فكرت بيها كلت يمكن الولد ميريد يتزوح وخالو ديلح عليه واضطر يكولهم خطبولي،.. رزان بلكي، راجع افكارة وكال هي مو بعمري  ومتناسبي وغير رأية وبطل.. بلكي.. مرت خالو مرايدتني لان هي جانت دائما تكول اتمنى ازوج واحد من ولدي بنيه شگرة وعيونها زرك حتى يطلعون جهاله يخبلون.. بلكي بطلو وميتم هالزواج.. يمكن رب العالمين استجاب دعائي ومراح اتزوجه لكريم 

من يمي جنت مرتاحة نوعا ما لان تأخروا ومجوي، وبديت ارسم ٱمال على انه ينلغي هالزواج بس ماما كلبها يفور تتصل بخالاتي وتسولف وتبسمر وتحاول تلمح الهن انه خالو راح وبعد مردلها خبر ولا جوي للنيشان. 

وبعد الاسبوعين بخمس، ايام خالو خابر ماما وكلها جايين العصر وفعلا جوي.. خوالي، وخالاتي وطبعا بناتهم وولدهم ووياهم نيشاني، واجه وياهم كريم.. طبعا كريم ابن خالو اله هيبه واحترام خاص.. ومكانه تختلف عن كل اولاد خوالي، وخالاتي.. هيج وحده ماخذ، صفحة ومكانه خاصة عدهم يحبواويحترموا.. يمكن لان.. هو مو من النوع الي.. يختلط  ويسولف هوايه شخصيته غامضة واليشوفه من اول نظرة يحسب حساب الكلام الي راح يحجيه وياه.. واني بصراحة عمري مفكرت انه اني وهو ممكن ان نكون زوج زوجة مهابته عندي.. تساوي، هيبه بابا وخوالي.. ومن كعد يمي شفت ابتسامه خفيفة جوة عيونه يربي شنو المتغير بيه اني جنت عادي اسلم عليه من اشوفة ابيت خالو.. بس هسه من كعد يمي بصفته خطيب الي، حسيت كلبي يرجف بين ضلوعي.. يربي.. شسوي دبرني شلون راح اتزوجه وبالنسبه لمصيبتي شلون راح تمر.. شنو راح يصير بيه اكيد شاب بعمرة راح يعرف اني مغتصبة من اول علاقة تجمعني بيه واذا عرف شراح يسوي راح يذبحني مو.. اي اكيد راح يذبحني لو خوالي كلهم راح يشاركون بموتي باعتبارهم خوال وبمقام العمام لان همه المتكفلين بيه بعد وفاة بابا واكيد عاري عليهم ويطموه بأديهم.. 

مرت عليه لحظات وجودهم يمنا ولحظات كعدته يمي عبالك مو دقايق لا والله عمر كامل الثواني جانت تمر بطيئه كل ثانية بسنه وحسيت روحي طلعت من لبسني حلقة الخطوبه ومن اضطريت البسه حلقه باصبعة.. الكل فرحانين وخالاتي، يهلهلن وماما كلبها بيه فرحة تكفي الدنيا كلها.. واني افكر واكول اي.. بدا العد التنازلي من ايام حياتي شكد باقيلي ع الموت كم شهر بعد ويزفوني، ووره الزفة يقتلوني.. 

ومرت الايام بسرعة وخلصت كليه وتخرجت وبقه يفصلني على موعد زواجي الي اعتبره موعد موتي ايام قليلة.. ومن حددوا عرسي بعد ٢٠ يوم جنت مثل المحكوم بالاعدام الي حددوا موعد اعدامه ومنتظر الموت.. 

يمكن من تقرون كلامي راح تكولون وانتي شبيج مخليه الموت نهاية حتمية الج.... شبيج مستسلمة للموت شنو معندج لسان روحي، لامج احجيلها الصار وياج انتي، مغلطانه ولا ماشيه بدرب اعوج وبسببه فقدتي، عذريتج.. انتي ضحيه وجنتي، طفله. بوقت الاغتصاب.. احجيلها سولفيلها كل الي بداخلج.. خليها تلكالج حل احسن من الموت الي تفكرين  بيه ليل نهار وحارمج من النوم.. 

اكيد كولكم راح تفكرون هالشكل وتوجهوني، انه اروح لماما احجيلها بلكي تلكيلي، حل يم دكتورة او قابله اغلب الاراء راح توجهني، اروح اسوي، جارة لنفسي واستر عليها.. بس اني ما اريد ابني، حياتي،.. الجاية على تستر وغش وطمطة موضوع الاغتصاب يم الدكتورة مثل ميسون البنات اليمشن بدرب اعوج وتروح امهاتهن.. ترجعهن بنات بيوت بحيلة طبية ويمشن الموضوع ويعيشن بروس الزلم ع اساس، هنه عفيفات شريفات اني ممسويه شي حتى اروح الزكة لو اخيطة لو استرة يم دكتورة حتى اعيش، بعز وكرامة بعيون الناس وبداخلي، حاسه انه اني جذابه وغشاشه.. اني ضحيه والي اعيش، وياه لازم يعرف الي مريت بيه.. واصلا محتاجه تأهيل نفسي، وجسمي، حتى اخوض، تجربة زواج كوني،.. مارة بحالة اغتصاب هذا هو الصحيح والي، جان قراري الاخير.. 

اي قررت  هالقرار قبل زواجي باسبوع راح احجي الي بداخلي للانسان الي اختارني، زوجة اله وشيصير خلي يصير.. اذا.. تقبل الموضوع.وسكت وقبل يستمر وياي. اكون خلصت ضميري كدام رب العالمين وكدامة وبنيت حياتي ع الصح والصدق.. واذا متقبل الموضوع وفضحني، وبسببه انقتلت.. يكون هذا مصيري الي جنت خايفه منه.. والله يعرف اني انقتلت مضلومة ويجزيني من يمه خير الجزاء بالاخرة اي هذا الي شفته صح احجي لكريم كولشي.. واخلص ذمتي، والباقي يبقه هو يقرره.. والمثل يكول وقوع البلاء  اسهل من انتظاره خل يعرف خل تعرف الناس السر الي، ضامته كل هالسنين ومعذبني، وحدي،وحارمني، من لذة كل لحظة بحياتي هي شنو حياتي اصلا اني، متت بيوم الي اغتصبني، مصطفى والسنين الي عشتها وره الاغتصاب جانت اسوء حتى من الموت نفسه خلي احجي.. خلي يقتلوني اهون عليه من هالعذاب ولتكولون ليش مفكرتي تحجين من الاول اكولكم هاي، هيه وصلت حدها ومبقه كدامي، الا اكشف الحقيقة كامله للشخص الي، قرر يتزوجني، ومادام امري راح يصير بيدة هو الي يقرر مصيري

وخلص الاسبوع واجة يوم زواجي يركض.. وسووللي حنه والكل مستغرب ليش اني مفرحانه ليش ماكو اي ابتسامه على وجهي وماما تكول لخالاتي بينها وبينهن: 

كوة.. قنعتها تتزوح تكول بعدني زغيرة توني تخرجت اريد اتوظف يله.. اتزوج غبرة عبالها رجلها محتاج لوظيفتها لتشوفنهامكدرة هسه.. هذا كوله.. دلال بنات هالوكت يردن يعرسن بكيفهن وبالوكت اليردنه عشتو

ومشت الامور خلصت الحنه واجت الزفة وفاتو ياخذوني من بيت اهلي، هاي، هيه.. احتمال.. اليوم هو اخر يوم الي، بهالدنيا.. واخذني كريم من بيت اهلي.. كعدت..بصفه واخو يسوق وماما كاعدة بالصدر.. سيارة الزفة تفتر، بينا.. وما احجيلكم عن كريم شكد ثكيل مو مثل هذه العرسان الي، منتظر تكعد يمه عروسته حتى يبدي يلزمها ويغازل جان كولش، ثكيل وهاديء وحتى من صورونه جان مدنك. ومبتسم ابتسامه خفيفة .. 

ومرت احداث الزفة واجت الساعة الي انسدت باب غرفتنا علينا.. اول مفتت كعدني ع طرف الجرباية وكلي

مبروك رزان

اني محجيت ادنه يمي وخر البركع وباسني بخدي.. غمضت عيوني حست  نبض قوي، برگبتي بعدها شفته على خدي ممكمل بوسته.. جفلت.. منه وكمت.. لزم ايدي

اهدي.. اهدي عمري.. لتخافين.. اعرف انتي شكد خايفة مني بس والله ماكو داعي.. للخوف تره اني مو من ذوله الملطلطين الي كل همهم يخلصون شغلتهم باسرع وقت ع ابو هذه رجوله وفرضها واجب ع الزوجة

كريم.. اني

انتي شنو عمري.. 

اني اريد احجي وياك!! 

اكيد نحجي ونسولف والله اني هم عندي سوالف وياج للصبح متخلص

انته تريد تسولف وياي! 

اكيد

فكرت كلت خلي هو يحجي الي عنده بلكي، اتشجع واكدر احجي.. لان احس النبض السريع الي ابلعومي يمنعني، اسولف

طبعا انتي.. اول شي فكرتي بيه هو العشر سنوات الي بيني وبينج مو..!! 

محجيت هو كمل 

اي اكيد مفكرة بهالشي، لان من خلال وضعج بيوم الحنه من البارحة لليوم وملامحج مبين انتي،  هالموضوع.. ماخذ حيز من افكارج وطبعا اني محسب هالحساب.. 

مفهمت!! 

شوفي رزان... من الاخيراكولج اني، مجنت مفكر، اتزوج بهالفترة.. بس اهلي، يلحون وهذا من حقهم.. وطبعا الي، اسبابي.. 

اسبابك!! 

اي.. وبصراحة اكولجياها.. الي اشوفه من بنات هالوكت خلاني، معنده اي.. قناعة باختيار، اي، وحدة تشيل اسمي، واثق بيها رزان.. كل بنيه فكرت.. بيها صدمتني،.. يمكن حظي، سيء والي، جانن بطريقي، كلهن بنات حرام.. ومصادفت بنيه شريفة تشيل هالفكرة السلبيه من راسي طول هالسنين.. 

كلامه... احسه مثل الي، يرش على جروحي، ملح.. فكتله بصعوبه: 

لعد.. ليش.. اختاريتني،.. وتزوجتني، اذا ما الك ثقه بالبنات

خوش سؤال.. كتلج قبل شويه ابويه صار اكثر من اربع سنوات يلح عليه بموضوع الزواج..... موشغله يجبرني، لان.. محد يجبر احد ع الزواج بس نهايه الملحة مالته قنعتني، انه وقت العزوبية بالنسبه الي، انتهى ولازم اتزوج واستقر.. وخلص،.. لازم اشوفلي، بت حلال اخلص، عمري، وياها.. 

بس.. بس ليش اني، بالذات بنات خالاتي، كومة

صح بنات عماتي وعمامي، هواية.. واني، ما انكر فكرت بيهن وحدة وحدة.. وملكيت اي، وحدة ترهملي، غيرج!! 

ترهملك!! 

اي.. ترهملي.. رزان اني، صار سنتين بالي كله مخلي،.. يمج واعرف انتي، منعزلة تماما عن كل هالبشريه لا عندج صديقات ولا عندج حتى علاقة مجامله وتقارب حتى ويه بنات خالاتج وخوالج.... شخصيه بعيدة عن الناس، وانطوائية والي، متعرفيه عني هو انه اني، مثلج تقريبا.. ما احب الاختلاط الزايد بس مو لدرجة التعقيد علاقتي، ويه الناس محدودة بالعمل والعائلة.. وغير هالصفات المشتركة بيناتنا.. الي، خلاني، اقرر اشاركج حياتي، هو احساسي انه انتي، اشرف بنيه.. عرفتها.. 

بس بنات خالاتي، وخوالي هم كولهن شريفات

ههه كلمة كولهن مامضمونه وبالاحرى مو صحيحة اسأليني اني عنهن ولو احنا مو بصدد تحديد منو الشريفة او الموشريفة بيهن حاليا ميخدمنا هالحجي.. بس كتلج كولهن فكرت بيهن واختبرتهن وفصلتهن وحدة وحدة مقاييس الشرف مختلفة من وحدة لوحدة

هيج انت تحجي عليهن تره ذني عرضك!! 

تره محاجي شي منافي للواقع ولا كاعد بگهوة واشهر بيهن انتي مرتي وهنه بنات عماتي، وعمامي وبنفس الوقت بنات خالاتج وخوالج.. هسه انتي ليش تحسستي.. تره محددت منو.. ولا شرحتلج تجارب وياهن ولتاخذين عني فكرة انه غايتي اشهر بيهن كل الي ردت اوصله الج هو انه اني اختاريتج لان حسيتج اشرف وحدة بيهن

من جاب طاري الشرف وكرر الكلمة اكثر من مرة حسيت كلبي، حينفجر، فكتلة: 

مو كل بنيه منعزلة.. شريفه ولا كل بنيه اجتماعية مو شريفة.. كريم قبل متختارني، زوجة الك لازم تعرف ليش، اني، منعزلة عن الناس.. الانعزال مو من صفاتي.. بس، الي اسبابي

ابتسم وكال: 

واني هم احب اسمع اسبابج واكيد الكلام مو بس الي، بس، مادام قاطعتيني عادي، سولفي، اسمعج عمري

كريم.. الشي الي راح احجي، الك ميعرفة بس رب العالمين.. 

بسرعة تغيرت ملامحه فكتله: 

اعرف الي، اكوله مو سهل.. بس.. لازم احجيه.. لان صار سنين طويلة شايلته بكلبي ومكدرت احجي لاي، مخلوق لان محد يكدر يقرر او يبت بيه بأي، حل الا الشخص، الي، يهمه!! 

رزان شنو هالعبارات الغامضة وشنو هالموضوع الي، ضامته سنين وبليلة زوجنا لازم ينحجي!! 

اي، لازم احجي الك.. لان انت الوحيد الي، الك الحق تقرر اي قرار بخصوصه

خررب لج كلشي.. مفهمت

كريم ممكن تخليني احجيلك كولشي وانت بس تسمع تره والله معندي، شجاعة احجي

لج احجي مو خبلتيني.. 

توعدني، تسمعني، للنهاية وبعدين شتحكم بيه اني، راضية

لج احجي

وبديت احجيلة: 

جان عمري ١٢ سنه وتحديدا بيوم وفاة مصطفى ابن خالة سلوى.. 

وسكتت

طلع جكارة ورثها وكال: 

كملي: 

مصطفر.. ابن خالة سلوى بنفس، اليوم  الي صار، بيه الحادث  وتوفة هو.. هو!! 

كملي

هو اغتصبني.. 

شنو؟؟؟!! 

رأسا نزلت دموعي، 

ادنه لزمني، من زندي، حيل.. قبل ما احجي، كلي: 

اغتصبج شنو.. عمرج١٢ سنه شنو شهالخبال؟؟ 

اي.. جنت جاية من المدرسه مارة على بيت خاله وهو جان وحدة بالبيت.. لان خاله والبنات جانن عند اهلي واني مريت بيهم وهو هناك اغتصبني، والله هذا كل الي، صار

شمر الجكارة وعصر متوني حيل وكلي: 

وج انتي منتبهة شدتخرطين!! 

اي والله هو هذا الي صار!! 

رجع ورث جكارة ثانية.. دموعي وحدهن يجرن.. ومكياجي يمكن صار خريطة وسمعته كال: 

وامج شلون زفتج اليه وانتي، مغتصبة!! 

وجرت دموعي اكثر وطلع صوتي بالكوة من كتله: 

ماما متعرف.. محد.. محد يعرف بهالموضوع.. مصطفى مات بنفس، اليوم والسر مات وياه.. ومحد يعرفه لاحجيته ولا كلته لاحد بس رب العالمين مطلع على مصيبتي.. 

ادنه يمي اكثر. ونتلي من ايدي وكال بصوت يخوف: 

ولج شلكيتي كمش،.. لو اثول.. لو غبي حتى اصدك قصتج هاي المابيها اي شي منطقي وحقيقي.... اي صدكت مغتصبيج وانتي طفله.. لا والاقمش.. مكايلة لاحد بس الله يدري.. وبعد.. شنو كلتي.. المغتصبج اغتصبج واتكل مات 

والله هذه الحقي.. 

قبل ما اكمل زمخ بيه وشمرني حيل بالكاع بس متني، طخ بالميز وسمعته يكول

لتحلفين لتجيبين طاري الله.. هو انتي تعرفين اللله اساسا.. جايه بكل صلافة عين.. تحجيلي قصة خياليه حتى اطمطين عارج يمي.. وفوكاها ذابه تهمتج على شخص مات من زمان لعد شكد ساقطة شكد عاهرة.. حتى حرمة الميت ماوكفت كبال عينج.. وج هذا ميت.. شلون تتهميه بهيج تهمة.. 

والله هو اغتصبني ممتهمته باطل.. 

لا باطل.. وما اصدك حرف من حجيج المخربط ولج لو جنتي فعلا طفلة ومغتصبيها ع الاقل جان ركضتي لامج لو لاختج حجيتيلها.. ولو اني، حتى ممصدك امج متعرف.. يجوز متفقة انتي، وياها على هذا الفلم شكولك انتي بت عمته ومن يسمع بهالقصة المأساويه مال الطفلة المغتصبة راح يتعاطف وياج ويستر عليج

لا والله ماما متعرف شي اني محجيت لان مصطفى كلي لتحجين لهلج لان من تحجين راح يذبحوج ويشمروج بالبلوعة جنت طفلة وصدكت كلامة ومحجيت ومجنت اعرف شنو نتائج الاغتصاب جنت متوقعة انه هو مجرد جرحني جرح ومن شفت الم الجرح خف كلت اني مبيه شي وطبت بس من كبرت وفهمت عرفت معنى اغتصاب

ومن كبرتي ليش بقيتي ضامة السالفه.. شنو منتظرة يجيج كريم يتزوجج وتحجيلة!! 

لا.. لا جنت مقررة ما اتزوج ابد لان اخاف لا انكشف بس ماما جبرتني اله تتزوجين 

ومن جبرتج ليش ماحجييلها ليش حتى تتجنبين وكفتج هاي كدامي

لان اذا.... اذا.. اذا حجيت لماما اكيد راح تاخذني لدكتوره او قابلة حتى تسويلي، جارة.. وحتى ترجعني، بنيه.. وهذا غش كله غش وجذب واني، مردت اغش الشخص الي راح يصير رجلي.. 

ايباااااه هلكد انتي.. صادقة وشريفة ونيتج ذهب

اي، والله مردت اغشك ردت احجيلك كل الحقيقة وانت تقرر مصيري

شو هذا دار وجههه ورجع التفتلي، وكعد كبالي بالكاع: 

اي اني راح اقرر.... جايتني بقصة كلها جذب بجذب وترديني اقرر اي.. كلتي، هذا كمش وراح يتعاطف وياي وتخلص.. وتعبر عليه.. ترديتي اقرر رزان ماشي يجيج القرار الزين🔥