رواية دار ماما حميدة الفصل الثاني بقلم مصطفى جابر
ماما حميدة كانت بتقول للأطفال اللي مشيو من هنا إن كل ما هيسمعو كلامها ويكونو مطيعين ليها في اي حاجه اهلهم هييجو اسرع لكن العيال اللي مش بتسمع الكلام بتفضل محبوسة هنا في الدار واهلها مش هتيجي تاخدها خالص وهيا مش بتقول الكلام ده لكل الاطفال هيا بتقولو لاطفال معينه زيك كده ولو سمعتي كلامها هتلاقي اهلك جم ياخدوكي
_ااااه عشان كدا هيا حبستني في الاوضة الضلمة يعني لو سمعت كلامها هتوديني لأهلي؟
- أكيد طبعا.. اسمعي كلامها وإعملي كل اللي تطلبه منك علشان تبقي زي البنات اللي مشيو من هنا
_طيب هبقي اسمع كلامها.. يالله خلصي اكل وتعالي ننضف المطبخ ده زي مهيا قالت علشان متجيش تزعق.
باب الاوضة اتفتح وبتدخل حميدة وهيا مبتسمة ومعاها وهدان
- يا فريدة يا حبيبتي يلا افرحي اهلك جم علشان ياخدوكي يا حبيبتي تعالي سلمي علي بباكي
فريدة بصدمة: بس ده مش بابا يا ماما حميدة بابا كان قصير واسمر كده
وهدان بيتكلم: يا حبيبتي أنا مش باباكي بالظبط أنا هكون باباكي الجديد انا اللي هتبناكي وهجيبلك كل اللي نفسك فيه فساتين ولعب وشوكولاتة كتيرة جدا.
فريدة بتخاف وبترجع بخطواتها للوراء: لأ أنا عايزة بابا وماما الحقيقيين ده مش بابا أنا مش هروح معاك
حميدة بتقرب منها بغصب وبتهمس في ودنها... إيه الكلام ده مش قولتلك لازم تسمعي كلامي في اي حاجه والا هحبسك في الاوضة الضلمة وبعدين انتي عايزة ابوكي الحقيقي ليه مش هو ده ابوكي اللي جابك هنا ورماكي لينا يا فريدة وقال مش عايزها تاني؟ لازم يحبيبتي تسمعي كلامي انا عايزة مصلحتك وانتي بنوته جميله تستحق تعيش معا ناس حلوه وغنية زي بابا وهدان ده وهو هيحبك وهيعتبرك بنتك وهيجبلك كل اللي نفسك فيه يالله اسمعي كلامي وروحي معاه ولا عايزة تفضلي قاعدة في الدار هنا واحبسك في الاوضة الضلمة؟
_عندك حق يا ماما حميدة خلاص حاضر هسمع كلامك وهروح معاه
وهدان بيقرب منها ويوطي ويمسك ايدها
- شاطرة يا أمورة وانا اوعدك هحبك وهعتبرك بنتي وهجيبلك كل اللي نفسك فيه وكمان واحنا مروحين هجيبلك عروسة لعبة وهخليكي تعيشي في بيت جميل يلا يا فلافيلو تعالي معايا.
فريدة بتمسك إيده وهي خايفه وبتمشي معاه
.. بعد شويه..
كانت راكبه جمبه في العربية
_عمو انا جعانه وعايزة اكل انا مكلتش من الصبح
- حاضر يحبيبتي بس قولتلك اول ما خرجنا من الدار طول محنا عالطريق اسمي بابا وهدان ولو اي حد قابلنا وسألك انا بالنسبالك اي تقولي ده بابا وانا اوعدك هجبلك اكل كتير دلوقتي من اقرب مطعم ماشي؟
_خلاص ماشي بس هو احنا رايحين علي فين دلوقتي وقدامنا كتير لحد ما نوصل.
- متقلقيش يقلب بابا كلها ساعة بالكتير ونوصل وهوديكي مكان جميل تتبسطي فيه
فريدة بتتنهد وبتغمض عنيها وبتحاول تنام
بعد شويه وهدان بيقابل لجنة عالطريق
- إيه ده كمين يا نهار اسود ومنيل هو ده وقته
بيوصل الكمين ويقف
الضابط بحزم بيقرب منه: هات رخصك ومين الطفلة اللي معاك دي يا أستاذ ومالها فيها اي.
وهدان بهدوء: دي فريدة بنتي يا باشا تعبانة شوية ورايحين المستشفي وهيا نايمة شويه بسبب التعب
_الظابط بيلف وبيفتح الباب من الجهة التانية وبيصحيها
-فريدة..فريدة اصحي
بتصحي فريدة مستغربة في اي
_الراجل ده يبقي بباكي يا فريدة؟
- لا يعمو مش بابا ده عمو اللي خدني من الملجأ
_مش ابوكي؟ انزل يا استاذ بعد اذنك إيه الكلام اللي البنت بتقوله ده؟
- يا باشا قولتلك بنتي مريضة ورايحين المستشفى وهيا بتعاني من اضطراب في الشخصيه وبتتعالج فا هيا بتقول أي كلام بتتخيل حاجات يعني.
_ انت بتكدب يا عمو..انت مش لسه اخدني من دار ماما حميدة دلوقتي وقولتلي هتعيشي معايا وهبقي بباكي الجديد
- دار اي دي وفين اهلك؟
_انا اهلي رموني في الدار وماما حميدة خدتني وقالتلي لازم اسمع كلامها واروح معا الراجل ده وهو هيكون بابا الجديد وهو هيجبلي شكولاتات كتير واعيش معاه بدل بابا اللي رماني
_دنتا هيطلع عين امك لو الكلام ده حقيقي وتكون خاطف البنت دي..انزلي يحبيبتي بسرعة وتعالي وانت يا عسكري هات الطفله دي والعربيه وتعالو ورايا...اما انت يحلو فا تعالي معايا عالقسم اما اشوف موضوعك ده
- نزل ايدك دي انا مش هروح في اي حتة
في لحظة وهدان من كتر التوتر سحب مسدسه وضرب الظابط طلقة في كتفه وضرب العسكري وركب عربيته وجري بسرعة
الضابط بوجع: ااااه إلحقوه متخلهوش يهرب منكم بسرررعة. .. فريدة من الخوف طلعت تجري والظابط بينده عليها ومش بترد وفضلت تجري
لحد ما بتلاقي مكان وبتستخبي فيه
صوت من وراها: انتي مين وبتعملي اي هنا؟
بتبص وراها بتلاقي شاب صغير
- هاا انتي مين ومستخبيه كده ليه؟
_في واحد كان هيخطفني وضرب عمو الظابط بالمسدس وجري وانا هربت منه وجريت
- ضرب نار ومسدس؟ طب انتي كويسه
_ انا كويسه بس مش عارفه ارجع مكاني انا كنت عايشه في الدار ومكانها بعيد
- طب استني هنا متتحركيش هنادي ماما تشوفك او اقولك تعالي معايا ليها.
بياخدها ويروح لمامته وتحكيلها كل حاجه حصلت
_ يعني ماما حميدة دي هيا اللي خلت الراجل ده ياخدك من الدار والراجل ده ضرب الظابط بالنار؟
- اه والله وانا هربت منه وفضلت اجري اشوف مكان استخبي فيه لحد ما جيت هنا.. أنا والله مش بكدب… هي كانت بتقولنا لو مسمعناش كلامها هتحبسنا في الأوضة الضلمة ومحدش هييجي ياخدنا علشان كده روحت معاه
الست قربت منها ومسكت إيديها بحنان:
انا مصدقاكي يا حبيبتي متخافيش انتي هنا في أمان معانا
هات تليفوني يا أحمد… أنا هبلغ الشرطة وهما يشوفو اي الحكاية
بعد شوية…
بتوصل الشرطه والست خرجت تقابلهم:
انا يا باشا اللي قدمت البلاغ. البنت دي كانت مخطوفة والقدر جبها هنا علشان نقدر نلحقها
الظابط بأبتسامة : اسمك اي يا جميلة
_اسمي فريدة يعمو
_طب يحبيبة عمو احكيلي كل حاجة بالتفصيل واي حكاية الراجل اللي خطفك ده وفين اهلك عارفه مكانهم؟
فريدة بدأت تحكي وهي مرعوبة… من أول دار ماما حميدة… لحد وهدان وضرب النار
- واضح إننا قدام عصابة كبيرة بيتاجرو في الاطفال .. طب انتي عارفه الدار دي مكانها فين يا فريدة؟
- لا بس هيا قريبه من هنا لاننا بعد ما طلعنا بالعربية بشويه لقينا الضباط دول وكمان هيا جمبها جنينة كبيرة وكانت علي طريق العربيات بتجري بسرعة اووي فيه
_ يبقي كده ممكن تكون عالطريق السريع.. انتي كده هتيجي معايا وانا هتصل بالقسم يحدد المكان ويبعتلنا قوة تقابلنا علي هناك
بعد شوية الحكومه بتوصل الدار وبتقبض علي حميدة وبياخدوها عالقسم يحققو معاها ووهدان هرب وبيتم البحث عنه
_ها يا فريدة هيا دي الست اللي كانت في الدار وباعتك لوهدان؟
-ايوة هيا دي ماما حميدة مديرة الدار اللي كانت بتحبسني في اوضه ضلمه وخلتني اروح معا الراجل ده
حميدة بغضب: يا باشا الموضوع كله سوء تفاهم انا فعلا خليتها تروح معا وهدان بس علشان هو اتبناها ..هو كان جاي يختار ينت تبني وخلص إلاجراءات واخدها
_طب والدولارات اللي لقوها عندك دي جبتيها منين؟ والاطفال اللي دخلت الدار وخرجت ورقهم فين؟
- م معرفش حضرتك بتتكلم عن دولارات اي الفلوس دي مش بتاعتي
_ طب وورق دخول وخروج الاطفال من الدار فين.. وورق خروج فريدة فين؟
- انا مش هتكلم الا قدام المحامي بتاعي
_ تمام خدها يبني عالحجز دلوقتي.. بس هقولك حاجه.. شريكك اتقبض عليه وهو حاليا بيتحقق معاه في قسم تاني واعترف عليكي بكل حاجه والقضيه لبساكي لبساكي
- اعترف بي ايي ده كداااب ده هو والله اللي كان بيهددني انه ياخد الاطفال اللي هو عايزها مقابل الفلوس ولو رفضت كان هيقتلني
_ تمام.. اكتب كل اقوالها دي عندك يبني وانتي يا حميدة الافضل تحكيلي كل حاجه من البداية علشان تقدري تخرجي من هنا ومتتحوليش للنيابه
قعدت حميدة تحكي كل حاجه
بعد شويه العسكري بياخد حميدة ويوديها الزنزانه
- اي رأيك كده يا فريدة خلاص كله اتمسك وهيتحاسبو هما واللي وراهم
فريدة بصتله بإبتسامة: طيب… أنا هروح فين دلوقتي؟
الست حاولت تطمنها: متخافيش يا حبيبتي انتي هتفضلي معايا انا هخليكي تعيشي معايا
الظابط رد بهدوء: مينفعش تاخديها للاسف احنا هنودّيها دار أيتام تانية… دار محترمة وتحت إشراف الدولة… ومش هتتعرض لأي أذى تاني
فريدة سكتت لحظة… وبعدين قالت بصوت مكسور:
يعني مش هروح ل ماما وبابا؟
الظابط اتنهد:
هنحاولو ندورو عليهم يحبيبتي بس علي كلامك كده لو هما اللي رموكي فا هتفضلي في الدار. الا لو ناس محترمه جم اتبنوكي
الست بإبتسامة: يعني لو كلمت الدار وقولتلهم اني هتكفل بيها هيرضو يخلوني اخدها؟
- اكيد.. هتعملي بس شويه اجراءت والموضوع بياخد وقت ولو الدنيا تمام هتاخديها
_ الست بفرحة: اطمني يا فريدة انتي هتروحي الدار وانا هجيلك كل يوم اطمن عليكي لحد ما اطلعك من الدار واجيبك تعيشي معايا.
فريدة بصتلها وابتسمت
متنسوش الريأكت وبالمناسبة القصه دي من القصص الواقعية اللي بتحصل حوالينا كتير فا رجاءا رجاءا حافظو علي ولادكم واهتمو بيهم وخلو عيونكم عليهم لأن خطف الاطفال منتشر بشكل رهيب واللي بيحصل فيهم بعد ما يتخطفو شئ ميخطرش علي بالكم 💔💔
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
