رواية جثة اليتيمة الفصل الثاني بقلم محمود الأمين
الجثه اللي كانت قدامي على الارض هي جثه هيثم، ابن عم زهره الشخص اللي انا قابلته في العزا.. الناس كانت متجمعه وعشان كده طلبت من العساكر يفضوا اللمه دي
ولقيت البواب واللي المفروض هو اللي قدم البلاغ واقف ومش على بعضه.. قربت منه وسألته
_ انت اللي قدمت البلاغ مش كده؟
= ايوه يا باشا.. انا اللي قدمت البلاغ
_ طيب ايه اللي حصل ممكن تحكيلي؟
= الاستاذ هيثم ساكن في الدور السادس، وزي كل يوم وصل بعربيته قدام العماره وطلع على شقته بس هو كان متعود انه يطلب اكل من بره عشان هو عايش لوحده مش متجوز بس الغريبه انه النهارده ما طلبش، قولت انا مالي جايز يكون كل بره قبل ما يرجع.. لكن وانا بتكلم مع حالي لقيت في حاجه اترمت من فوق واتهبدت قدامي على الارض، جريت ناحيه اللي وقع كان الاستاذ هيثم جريت على طول واتصلت بيكم
_ طيب في حد غريب طلع العماره، قبل ما الاستاذ هيثم يطلع او بعد ما طلع؟
= لا خالص يا باشا، انا قاعد هنا من الصبح وما فيش حد غريب طلع العماره
_ يعني ما دخلتش الحمام مثلا، ما دخلتش اكلت او شربت؟!
= لا اكيد يا باشا دخلت طبعاً
_ منا بسالك عشان كده، جايز حد طلع العماره وانت في الحمام مثلا
= جايز برضه يا باشا الله اعلم
...
خلصت كلام مع البواب واللي عرفت ان اسمه عطا، وفي الوقت ده وصل رجاله الطب الشرعي ورجاله المعمل الجنائي، عشان يفحصوا الجثه ومسرح الجريمة.. وكان لازم طبعا يتم فحص الشقه اللي وقع منها المجني عليه، طلعنا فوق انا والرائد سيف ومعانا وكيل النيابه ورجاله من المعمل الجنائي لفحص المكان، ومن اول ما دخلنا بان انه في اثار مقاومه حصلت ما بين الجاني والمجني عليه.. الازاز بتاع النيش كان متكسر وفي كراسي واقعه على الارض.. لكن اثناء التفتيش خرج واحد من رجاله المعمل الجنائي مسدس كان موجود في غرفه المجني عليه وكان ضمن الاحراز اللي طلعوها من الشقه وتليفون المجني عليه ما كانش ليه وجود
وبعد ما خلصوا اتقفلت الشقه واتشمعت بالشمع الاحمر واتنقلت الجثه لمصلحه الطب الشرعي للتشريح
ورجعت على مكتبي واول ما دخلت اتكلم الرائد سيف وقال
_ اكيد مش صدفه، الجريمتين اللي حصلوا ليهم علاقه ببعض
= ده اكيد يا سيف مش محتاجه كلام، انا حاسس ان انا دماغي تقلت ومش عارف افكر، ايه الغرض من الجرايم دي كلها
هل في شخص حاطط العيله دي في دماغه بيخلص عليهم واحد واحد؟!.. ولا كل جريمة ومنفصله بذاتها
_ قصد حضرتك قاتل متسلسل يعني؟!.. بصراحه انا مستبعد الاحتمال ده شويه خصوصا ان في حاجه انا كنت هقولها لسيادتك بس جات الاخباريه دي واتحركنا
= اه صح، انت كنت هتقول حاجه بخصوص يسرا، بس جه التليفون في نفس الوقت واتحركنا عشان نشوف الجريمه
_ كنت عاوز اقول لسيادتك، ان يسرا مش بنت الست صفية أصلا على حسب التحريات اللي عملناها، الست صفيه وجوزها اتبنوا يسرا زمان من دار رعايه اطفال عشان ربنا ما كانش كرمهم بخلفه وبعد سنين كانت كبرت فيهم يسرا وهي فاكره نفسها بنت ست صفيه، الست صفيه حملت وخلفت زهره وطبعا ما حدش بلغها بالسر ده، وعاشوا الاتنين مع بعض على انهم اخوات
= اللي انت بتقوله ده كلام خطير جداً يا سيف، عشان على حسب التحريات اللي انت قلتها قبل ما نتحرك على البلاغ الاخير ان يسرا دخلت مصحه نفسيه وبعدها مدحت راحت اتقدم لزهره رغم انه كان بيحب يسرا، فاحنا لازم نعرف ايه سبب دخول يسرا المصحه النفسيه؟... وليه مدحت اتقدم لزهره وهو بيحب اختها؟
والسؤال الاهم ازاي اهل زهره كانوا عارفين ان مدحت بيحب يسرا ويوافقوا على موضوع زهره؟!
الاسئله دي هي اللي فيها حل اللغز
...
خرجت من مكتبي وطلبت من سيف يتابع اخر المستجدات ويستعجل شويه تقرير الطب الشرعي في الجريمه الاولى والتانية وتقرير المعمل الجنائي والبصمات.. اخدت عربيتي واتحركت على المستشفى ولما وصلت هناك قابلت الدكتور من تاني اللي قابلته قبل كده وسالته عن الست صفيه هل حالتها اتحسنت ولا لا؟!
فرد عليا وقال
_ اه هي دلوقتي قادره تتكلم.. ولسه الاستاذ هيثم كان عندها امبارح بس ما جاش تاني
= طيب ينفع ادخلها دلوقتي.. عاوز اتكلم معاها في امر مهم
_ اكيد طبعا يا فندم، بس هستاذنك يعني بلاش تضغط عليها في الاسئله عشان مش عاوزينها تتعب تاني حضرتك شايف سنها كبير وممكن ما تتحملش
= لا ما تقلقش يا دكتور، انا هاخد منها بس كلمتين كده وامشي
...
دخلت الاوضه كانت قاعده على السرير سلمت عليها وقعدت قدامها وما رضيتش اقولها انه هيثم مات عشان ما ترجعش تتعب تاني.. طلبت منها تهدى وقولتلها
_ البقيه في حياتك يا ست صفية، انا جاي اخد منك كلمتين وماشي على طول ده لو عاوزه حق بنتك يرجع
= اكيد عاوزة اعرف مين اللي عمل فيها كده؟!.. انا مش عارفه ايه اللي بيحصل ده بناتي الاتنين كده يروحوا في غمضه عين
_ ده مقدر ومكتوب يا ست صفيه، احنا بس عملنا شويه تحريات كده وفي شويه حاجات غريبه لاحظناها.. على حسب التحريات يسرا الله يرحمها دخلت مصحه نفسيه والشخص اللي بيحبها اتقدم لاختها زهره والغريبه ان حضرتك وافقتي فانا عاوز افهم ايه اللي حصل بالظبط؟!
= لو رجع بيا الزمن عمري ما كنت هوافق، يسرا لما عرفتنا على مدحت ما قالتش ان هما بيحبوا بعض هي قالت انه زميلها في الدراسه بس بعدها لاحظنا انه يسرا مش بتخرج من الاوضه والكلام ده قبل ما مدحت يتقدم لزهره اصلا، يسرا كانت متغيره واللي كان بيتكلم معاها كانت بتعمل معاه مشكله
بس الموضوع اتطور وكنت بسمعها بتكلم نفسها بالليل، وفي مره دخلت عليها الاوضه من غير ما اخبط لقيتها باصة للحيطه وبتتكلم معاها.. ولما سالتها بتكلمي مين صرخت في وشي وطلبت مني اطلع بره، والحاله كل يوم كانت بتسوء لدرجه انها كانت بتقول انها بتشوف ابوها اللي مات، اضطرينا ندخلها مصحه نفسيه عشان تتعالج
= طيب ما جايز هي كان عندها مرض نفسي من ايام ما كانت في الملجأ؟
_ ها.. ملجأ ايه؟
= ست صفيه حضرتك بتتكلمي مع ظابط شرطه عامل تحريات عن العيله دي كلها، واكيد احنا عرفنا ان يسرا مش بنتك وانها كانت عايشه في ملجأ او دار رعايه بمعنى اصح
_ ما حدش يعرف السر ده خالص، ولا حتى اختها زهرة كانت تعرف انا ما كنتش بفرق ما بينهم في التعامل، كنت بعامل الاتنين على انهم بناتي.. وما اعرفش اذا كان الموضوع وراثي ولا لأ
وبعد كام شهر لقينا مدحت جاي وبيتقدم لزهره، في الاول الموضوع كان غريب لكن زهرة كانت موافقه وهو كان شاب جاهز وما فيش حاجه تعيبه بس بعد كده اكتشفنا انه بيلعب بزهرة وعشان كده فسخنا الخطوبه
= تمام يا ست صفيه، وعلى حسب كلامك ممكن تكون زهرة انتحرت بسبب الموضوع ده مش كده؟!
_ هي حالتها النفسيه كانت وحشه بعد فسخ الخطوبه، بس ما توقعتش أبداً انها ممكن تعمل كده في نفسها
...
حاولت اهديها لكن في الوقت ده تليفوني رن واللي بيتصل كان الرائد سيف رديت عليه وطلب مني ارجع المكتب بسرعه عشان في حاجه مهمه وصلها ومش هينفع نتكلم فيها في التليفون
رجعت المكتب ولقيت الرائد سيف مستنيني واول ما دخلت اتكلم وقال
_ انا عرفت مين اللي قتل يسرا؟!
= مين يا سيف؟!
_ تقرير المعمل الجنائي بيقول ان الرصاص اللي في جسم يسرا طالع من المسدس اللي اتمسك في شقه هيثم معنى كده ان هيثم هو اللي قتلها، لكن وانا بقلب في الاحراز لقيت فلاشه كانت برضو موجوده في شقه هيثم.. اتصرفت في لاب وفتحتها وكان موجود فيها فيديو لهيثم وهو بيعترف بتفاصيل الجريمه بس المفاجأة في اللي قاله هيثم
= قال ايه؟!
_هيثم قال..
