رواية بديلة اختي الفصل الواحد والثلاثون بقلم خاتون الكعبي
تذكير
ام طيف : همزين اجيتي روحي بساع البسي خل اروح البيت جدج
طيف بخوف : ليش شكو اشصاير
ام طيف : ولد الحجي منذر اكو غيرهم راحين داكين بيت واحد ومصوبين ابنه وناس ضالة تضرب بناس
طيف : عززا بس لا مات
ام طيف : ماعرف الولد راحولة وعمامج ونسر رايحين هادين ع ولد منذر لأن داكين بيت ازلمة بدون علمه ما اكول بس غير الله اليسترنه وهسة روحي بدلي بساعج خل اروح البيت جدج
طيف : ليش خلينة بيتنا
ام طيف بعصبية : بلا كثرت حجي وروحي بدلي ابوج كال اروح
طيف : هزيت راسي وصعدت بسرعة بدلت ملابس المدرسة ولبست عباتي ونزلت جوى قفلت امي البيت ورحنة من الباب السياج ع بيت جدي اباوع ع المضيف يصوفر باقي بس جدي والكهوجي بي دخلنة جوى وشفنة امه محمد كلهة جاية من عماتي ونسوان عمامي وبناتهن مالج محط رجل بصالة ضليت كاعدة بصالة الحد مأجى اخوي فضل من المدرسة ابتدأية ويحلون بثنتين خطية اجه وجهة اصفر لأن ما لاكي واحد بالبيت انطتى امي المفاتيح مال بيت راح بدل واجه كعد يم امي نزعت عباتي وكمت دخلت الغرفة جدو وحبوبة اباوع ع جدتي كاعدة تقرة قرأن واسبح بسبحه هاي. عادتهة كل ما يصير شي اضل كاعدة بالغرفة تقرة قرأن او اصلي الحد ميرجعون الولد وعمامي بخير وسلامة كعدت بصفهة وتجيت راسي ع جتفهة منا لتلاثة سمعنة صوت الولد وعماتي كامن كلهن تلكنهم بالباب اباوع ع حبوبتي كامت تشكر ربنة وتتحمد ع سلامتهم سدت القرأن باستة وانطتني يا رجعتى بالجراره وسندتهة حتى اتكوم دخلنة للصالة واجت رهام دفعتني وسندتهة ابدالي كلبت اعيوني بملل ورجعت كعدت يم امي الي احسهة ع اشوية وتبجي من خوفهة ع ابوي والولد اخذو جدتي للديوان يم عمامي وجدي وبدة صوت المصايح يعلة مبينين صايرين اعصاب من اصواتهم والفتهمنى من كل هالغوة والصياح ابن بيت ابو منذر المصوب الولد شارد واهل الولد صايرين نار بأي وكت ممكن ايهدون رجعت ظهري ع الحايط بملل مبينة السالفة مطولة للعصر طبو عمامي والولد للصالة اول ملمحت بابا الضحكة شكت حلكي رحت حظنتة بسرعة وامي حظنت ايمن وابراهيم وكامت تبجي ضحكو اخواني وباسو راسهة باوعت من بعيد ع نسر اشلون واكف اباب اصالة ويباوع ولد عمامي واخواني اشلون حاظنين امهاتهم اول مأجت عيني بعينه خزرني ودنك ع جدتي سندهة وداهة ع القنفة رفعت حواجبي بستغراب صكد خبل اشوية ودخل جدي واكتملت العائلة الكريمه وبدت الواكة الزايدة من نسوان عمامي ع بناتهن الي كامن كلهن باسن ايد جدي وبوجهن ع المطيخ قدمن المي والجاي باوعت ع امي تخزر بية حتى اكوم اساعدهن رفعتلهة اجتافي بمعنى لاوضليت اكرط بالكعك من الصبح ليجاي لا غدة ولا ريوك
نسر : عين ع جدي وعين عليهة معرف ليش مركز بكل تفاصيلهة وحركاتهة وردات فعلهة التلقائية اشلون تحرك حواجبهة الأمهة اعيونهة بيهة قوة عجيبة وعناد بنفس الوقت تجت راسهة ع ايد ابوهة وهية تاكل وتباوع الجدي بملل دومهة متحب مواضيع العشاير والمشاكل انتبهت ع حركاتهة طفولية ع ابعد درجة بس بالحظة ممكن تتغير هاي الحركات والنظرات المرة قوية ناضجة تعرف اشلون تحجي وتتحكم بمشاعرهة باوعتلي وصدت عيني بعينهة رفعتلي حاجبهة ودارت ع ابوهة ضحكت بكلبي عليهة ورجعت التفتت ع جدي اباوعلة يباوعلي ويبتسم حرك السبحة بيدة وهوة يكول
ابو مالك : ها بويه جنك بغير عالم
نسر :ههه لا بس اجت حسبة ابالي وصفنت
ابو مالك بمكر : وحمدية
نسر : هههه يا حمدية منهن
ابو مالك : المصفنتك
نسر : حكيت لحيتي واني ارجع اباوعلهة قربي منهة مشكلة الهالحمدية ضحكت واني اذكر شكلهة لمن واحد يكلهة حمدية الخدود من وحدهن ايكبن خطت استكان الجاي نافي كل هالفكار من بالي و......
________________
اوتار
الجد : باوعت ع محمد بشك والتفتتلهة وانه اكول احجي بويه شكو شصاير
اوتار بتوتر : بس بخصوص موضوع الخطوبة غيرت رئيي مموافقة بعدني اشوف نفسي مو حمل مسؤلية وزواج
الجد : براحتج بنتي ما اجبرج ع شي كال هيج وهوة يخزر بمحمد
ام اوتار بتفاجئ : شنو مموافقة بوية غير رجعنة الموافقة لهل الولد وجايين ايشوفوهة حتى عيب من الناس
الجد : اليوم امج ادك وتعتذر منهم الزواج قسمه ونصيب يمكن ربج ما قاسملهةيا
اوتار : اباوع ع امي تخزر بية والشرار كام يطاير من اعيونهة معرف اشلون تماسكت ومنفجرت كدامهم اترخصت بسرعة من الكل ودخلت الغرفتي رجعت نوبت البجي مالتي بشكل اقوة احس كولشي انتهى بنسبة الي بعمري وحياتي مجنت مصورة بداخلة هالكم من الحقد والنذالة بس الصدمني عادل معقول هيج ايسوي ويقبل ايدخل البيتة مال حرام رجعت طلعت الملف واني اكلب بي يمكن مزورة يمكن كل هذة عادل ميعرف بي اكلب بالملف واني احاول اقنع نفسي انو تزوير وعادل مستحيل يسوي هيج شي بس كل الأوراق كدامي تثبت غير هالحجي فركت وجهي بقوة كافي دموع وكافي بجي مراح يفدني بشي لازم اصرف ووكفة عد حده حطيت الملف جوى افراش الجرباية و........
_______________
شاهين
مرسلين : شااهين وخرر شاهين خنكتني وخرر
شاهين : لا رد
مرسلين : شاهين فدوة وخر والله اختنكت احجي واهز بصدرة وهوة ولا يمة الحد مبدة يحرك راسى ع ركبتي بنزعاج وهوة ايكول
شاهين : كافي تتحركين
مرسلين بسخرية: خاف م...سكتت واني اشوفة رفع راسى من ركبتي وصار وجهة مقابيل وجهي شعرة منكوش من النوم واعيونة صايرات حمر نزلت اعيوني بخجل من هيأتة ودفعتة بسرعة وكمت من ع الجرباية عدلت تشيرتي بأرتباك واني اشوفة يباوعلي ومبتسم ع خجلي فتحت اعيوني بصدمة واني اشوف الساعة صارت بالسبعة ونص الة خمسة رحت ع الكنتور بسرعة طلعت ملابسة وملابسي واني اكول
مرسلين : كوم كوم اتأخرنة حصير بثمانية خررب وعندي امتحان اليوم اباوعلة فز من الجرباية بسرعة وهوة يشوف الساعة دخل للحمام واني رحت الغرفة زهراء القديمة غسلت بحمامهة ولبست ملابس المدرسه ورجعت للغرفة شفتة واكف ع المرايه يمشط بشعرة وكفت كدامه واني الف بشالي انتبهت ع طكع بنفسجية قوية صايرة بركبتي باوعتلة ورجعت باوعت ع المرايه واني اتلمس بيهن ع كيف شو يوجعني معقول منه رفعت راسي علي بشك واني اشوفة حابس ضحكتة اخذ اسلاحة بسرعة من الميز وطلع من الغرفة
سهلة اني اعلمك رجعت تلمست ركبتي بوجع ولفيت شالي اشلون مكان واخذت عباتي وجنطة ونزلت وراه صبحت ع عمه وعمو وطلعنة بلا ريوك كبل للمدرسة وصلني وراح الدوامة دخلت للساحة الحمد لله بعدة مداك الجرس مسوين اصطفاف اصطفيت ويا البنات وبدت المديرة بتعاليمهة اليومية الحد مدك الجرس للصفوف و........
_______________
اوتار
صافنة ع الأشباك ومثنية رجلية ع صدري لحظات ودخلت امي باوعتلهة بأستغراب اشلون مبتسمة والضحكة مرسومة ع وجهة اتوقعت حترزلني من بعد كلام البارحة بس كولشي مسوت كعدت كدامي ع الجرباية وهية تكول ليش مرحتي للكلية كتلهة تعبانة ورجعت اعيوني ع الشباك
ضلت اتباوعلي بحيرة ع فرح وبدت تمهدلي عن موضوع الخطوبة والزواج والعائلة الحد منهت كل هالكلام وهية تكول محمد اليوم خطبج من جدج وحذرتني بشكل واضح وصريح انو ملازم ارفضى وانو محمد زين ومناسب ومن هالكلام ضحكت بداخلي عليهة وكأنو ممكن ارفضى اصلاً معندي خيار ثاني غير الموافقة والة ممكن عادل ي.. هيزت راسي برفض مجرد التفكير بهالشي يخوفني وترعد كلبي لعد اشلون اذا صارت بالواقع
ابتسمتلهة مجاملة بوجهة واني اهمس بكلمة الشوفي اباوعلهة طارت من الفرح حظنتني وهية تكول عفية بنتي اسباعية جزمت انو ممكن هية اكثر وحدة فرحانة بهالزواج وطلعت من الغرفة دقايق وما اسمع غير صوت الهلاهل صار يرن بالبيت دخلت ام محمد وبيبيتي باركلي وراهن سارة وابتهال للظهر شفت محمد دخل للبيت استقبلتة عمتي بالهلاهل والكولات هية وبيبي
اباوعلة يباوع ع شباك الغرفة ويضحك بنتصار بلحظتهة كرهتة كره مصاير مستحيل اكو انذل واحقر منه لليل وصاحني جدو حتى يتأكد من موافقتي انتبهت علي يسئلني وعينه ع محمد مثل الشاك بي كتلة موافقة باركلي وكمت حظنتة وبست ايدة التفتت ع اخوي عاد يباوعلي ويبتسم وكام حظني وباركلي ضليت مثل الصنم بحظنة حسيت بقربة بخنكة مع انو جان مصدر امان وراحة بنسبة الي
ابتسمتلة ابتسامة مصطنعة ورجعت الغرفتي بعد مقررو ايكون الزواج بنهاية هالسبوع يعني بعد يومين طبعاً مجان كدامي غير الموافقة مع انو حتى امي وام محمد مقبلن ع هالستعجال بس اكيد كلمت الأخ التمشي اتصل جدي بعمامي وكلهم بخبر خطوبتي وكل عادة كالو البت صارت بتكم وانتو تقررون وسد التليفون معقول هذولي اخوان بابا الجان لازم ايصيرون بمكانه هه بس شكول النسوان هم تلعب دور تفر اعقول وما شألله نسوانهم ينحلف بيهن من الخباثة والكطع العليهن وجدي وبيبتي متوفين ولدهم وبناتهم كل واحد مخذلة بيت وهاج بروحة
اخذلي محمد اجازة من الكلية ومراً هاليومين واني عايشة بعذاب وتشتت جبير بين انو ارفض واخلي اخوي ينسجن هذة غير امي الي راح تنتهي اذا صار بي شي لا سمح الله وبين اني ازوج واحد حقير ونذل واكيد جان نهاية كول هالنقاشات والتشتت اليدور بعقلي هوة اني ازوجة
بعد وين متصفة خل تصفة الكاتبة ربي هوة الي ايصير ودني امي وعمتي للصالون حفلي وسولي تنظيف بشرة وراهة رادن اروح للبدلات كتلهن هنة يختارن ورجعنة للبيت وراحن باليوم اثاني اشترن الذهب والفستان وبيبي وعمو يعزمون بناس الكل استغرب بخبر الخطوبة واستعجالهة بس محد حجة شي وبين كل هالهوسة محمد الي صار شبه مقطوع عن البيت بس يجي اينام ويروح محاول مرة انو يحجي اوياي او يبررلي كل يلي سواه يلة ع ساس اشكد منتظرتة ايبررلي واجا يوم الخطوبة واني اشوف كل التحضيرات والترتيبات من بعيد لبعيد رحت ويا ابتهال وسارة من الصبح للصالون للثنتين يلة خلصت باوعت ع شكلي النهائي بسخرية واني ارجع بشعري ورة اذني الفستان جان حلو بالون ذهبي طويل بس حيل ضيق يبرز تفاصيل الجسم اكثر من الازم لبست صايتي وشالي
وطلعت ويا البنات العادل باوعلي وهوة يبتسم ركبت ورة وسارة ليكدم وابتهال بصفي الطريق كولة وهوة يحاول يحجي ويشاقي بية بس ماكو ذابتهة ع الصامت كلتلة سارة خجلانة كام يضحك ويهز بيدة وصلنة للبيت وستقبلتنة امي وعمتي بالهلاهل والجكليت ابتسمتلهن وحظنت امي وعمتي ورحت الغرفتي ويا البنات ذبيت صايتي وعدلت شعري ورجعت للصالة شفت بيبيتي وقربت عليهة بست ايدهة وحظنتهة وكعدت ع الكوشة باوعت ع مرسلين دخلت وهية شايلة بت اختهة شافتني وابتسمت اجت سلمت علية وكفت بصفي اشوية وصاحو حيعقدلهم الشيخ كومتني امي وعمتي كعدني بغرفة بيبي وجدو بعد ملبسني چادر الصلاه دقايق ودخل جدي وراه الشيخ ومحمد واخوي عادل بدة الشيخ يحجي واني اردد وراه حسيت مغص ابطني قوي وهوة يحجي خوف رهيب وتوتر تملكني باوعت ع اخوي كاتمة دموعي واني اهمس بكلمة نعم وتم هالزواج وصرت زوجتة شرعين اباوعلة ابتسم بنتصار ودنك ع جدي باس ايده وشكر من الشيخ وطلع هوة ويا بدت هلاهل النسوان من برة وباركلي جدي وعادل ورجعو للأستقبال
دخلتلي امي وعماتي وهنة ايهوسن ويهلهلن رجعني ع الكوشة وصاحت عمه ع البنات وهية تكول حيدخل العريس وفعلاً اقل من خمس دقايق ودخل محمد بنطرون اسود وسترة جوزية حلوة وعطر ايعط باس راس امة وبيبي وقرب بتجاهي اصدكون اذا اكلم محسيت ابأي شعور واني بقربة لا توتر ولا خوف ولا خجل بس قرف انقرفت من فكرت ممكن ازواج واحد مثل هذة انقرفت من فكرت اني حبيت بفترة معينة شخص مثل هذة دنك علية باس راسي وهوة يهمس بخفوت
محمد : مبروك عليج اني مريتي
اوتار :.......
_________________
طيف
جاي اسكي الحديقة وعيني ع امي وابوي فارشيلهم بساط وكاعدين ع الزرع وفضيل كعد يلعب بسيارتة اشوية ودك تليفون ابوي طلع رد علي ورجع سئلتة امي منو كلهة ابن عمي شاهين خطوبة ابنة محمد ع بت عمته بنهاية الأسبوع وعازمنة كلتلة ياهي منهن كلهة ام عادل بتهة اصغيرة اوتار لا اردين وكع بريك الماي من ايدي صاحت علية امي بعصبية
ام طيف : ثول يلة غمة عايني ثوبج اطين
ابو طيف : هههه يلة بوية ما صار شي طبي بدلي وانت ولك كوم اسكي بدال اختك
طيف : هزيت راسي بأحراج وطبيت جوى احس الصدمة بعدهي متملكتني معقول حتخطب زين ونسر معقول حيسكت ومراح ايسوي شي ما اتوقع مبين يحبهة نكتت ثوبي بعصبية وانه اكول ما دخلني بيهم نارهم تاكل حطبهم
بس صارت حسرة بكلبي اشوف شكل نسر هسة اكيد انصدم يمكن انجن لليل كملت عشة ورحت سويت جاي لأبوي واخواني اخذت صينية الجاي والستكاين وكعدت كدامهم اصب ووديلهم رفعت راسي ع امي وانه اسمعها تكول الأبوي تروح للخطوبة لا شرب الجاي وهوة ايكول اي اكيد اروح عيب من ابو محمد وعمي ابتسمت بمكر ع الفكرة الجتني وكمت بسرعة لزكت روحي ابابا باوعتلة برائة واني ارمش بعيوني ضحك وهوة ايكول
ابو طيف : هههه ها بوية شكو وراج شي من هالنظرات
طيف برجاء : خن اروح وياك البغداد فددوة
ابو طيف : لا بوية اشترحين شايفة بغداد اشكد تبعد عن البصرة اسيارة ادك وما ملحكة
طيف بعناد : فدددوة باباا خن اروح اريد اشوف بغداد بعمري ما رايحتلهة وهم احضر الخطوبة وياك فددوة فددوة والله ما اسوي شي اكعد بصف حبوبة وسكت اباوعلة صفن وباوع الأمي بتردد اشرتلة امي بمعنى اي ببتسامة ابتسم وكال
ابو طيف : ماشي بس من هسة اذا سويتي مشاكل وطولتي السانج ويا وحدة تحرم عليج اطلعة بعد مفهوم
طيف :هزيت راسي بفرح وحظنتة اباوع ع افضيل حسرتة البچية وكام يتوسل بأمي خاطر يروح صعدت ركض فوك نفشت الكنتور نفش ع ملابس بس ماكو ولا شي كلة يا بشتات وتنانير رجعت نزلت جوى باوعت ع امي برائة واول مردت احجي كالت
ام طيف : لا تحجين لو تموين ما اشرتيلج عندج ملابس كومة ولبسي منهن
طيف : جهزت روحي للبجية واول مردت ابجي كدامهة زمخت بوجهي اخوي كام يضحك وكلهة اخذيهة اشتريلهة اي شي ناقصهة وعلية لو مو ابوي موجود جان ركصت من الفرح رحت حظنتة واني ارفع حواجبي الأمي بغيض وفعلاً رحنة ثاني يوم للسوك فرينة اسوك كلة انه وامي واحنه نتعارك ساعة كصير ساعة ضيك اخر شي يلة اقتنعت بفستان طويل من فوك ماروني ومن جوى لون اسود وبنص احزام ع شكل افيونكة كدرتة بالبيت وطلع بي جاكة طويلة من وراه والله لو امي اشوفهة جان نعلت يومي الحمد لله البسة هناك وحضرت جنطة اصغيرة حطيت بيهة الفستان ومكياجي وكل الشغلات الممكن احتاجهن نمت واني مشوقة الثاني يوم الي هوة الخطوبة كال ابوي لازم نطلع من الفجر حتى لا نتأخر ما لحتكت اناملي ساعين واجت امي ندهتني مطيت جسمي بنعاس ع الجرباية وكمت سبحت وصليت ولبست بنطرون وتشيرت عاديات وفوكاهن البشت باوعت ع المسكارة بتردد احطهة لو لا هزيت راسي بنفي هوة الطريق طويل حتى يصير وجهي خريطة بهالحر من وراهة
اخذت جنطتني ونزلت جوى كعدت اشرب جاي بصف ابوي وانه اسمع تعليمات امي احس نفسي طالبة اول بتدائي وجاي توصيني لا تحجي هيج ولا تتصرفين هيج وسوي هيج وضلي يم جدتج فاتحة تك عين واهزلهة براسي بمعنى اي وبابا يضحك علينة اشوية ورمش تليفون ابوي كام وهوة ايكول
ابو طيف : يلة بوية الولد منتظرينة بالباب
طيف : هزيت راسي وكمت ودعت امي وحنظتهة وطلعت البس بحذاتي واني اباوع علة بابا من جامت المطبخ باس راسهة ومدري شهمس بأذنهة خلاهة تضربة ع صدرة ع كيف بخجل متت ضحك عليهم مرات اكول مستحيل الاكي شخص نفس بابا بحنيتة او بحبة الأمي واحترامة بنفس الوقت الهة رفعت راسي واني اعدل بشال طلع بابا شال الجنطة وفتحلي ايده كظيتهة واشرت الأمي بمعنى باي وطلعنة من البيت شفت عمو جواد ساند جدتي وصعدهة بسيارتة وعمو راكب بصدر ومرت عمو بصف جدتي ونسر واكف متجي ع سيارته وبصفة جدو باوعلي بأستغراب ورفع حاجبة ابتسمت بستفزاز وانه اصبح عليهم صعد جدو بصدر ونسر بصفة قربت ع بابا وانه اهمس بأذنة بستغراب شنو نصعد وياهم هزلي راسة وفتحلي الباب باوعتلة برطمة وانه اصعد والله لو مو عيب جان رجعت للبيت وانعل ابو الطعلة بس لا صارت بعد بنفسي اريد اشوف شكل نسر بالعقد معرف اذا حقد الجاي افكر بي بعد السوا بية ذيج المره او غيرة بس كل الأعرفة اريد اشوف الكسر بعيونة مثل ما كسرني اريد ارد ولو اشوية من كرامتي الفقدتهة بسببة وكرامت امي اريد اشوفة منو بنت الخدامة اليحجي عليهة سمة جدي بسم الله وشغل نسر قرأن وبدة ايسوق اباوع من الجامة ع السما استوهة بدت تطلع الشمس رجعت راسي ع الكشن بنعاس ع برودت التبريد وصوت القرأن كمت اغفي بنعاس الحد منمت ساعة او اكثر يلة فزيت اباوع ع السيارة فارغة بس انه ونسر بيهة عقدت حاجبي بستغراب وانه اكول
طيف : جا وين ابوي وجدي
نسر : راحو للحمامات
طيف : هزيت راسي بأحراج وسكتت ضليت اتلفت بعيوني من الجامة بتوتر الحد مكال نسر
نسر بسخرية : شبيج خايفة ترة مراح اخطفج
طيف وهية رافعة حاجبة : لا وليش اخاف قابل صاعدة ويا غريب غير ويا اخوي ولو ما ابوي ايأمن بيك وحاسبك مثل ابنه مجان راح يبقيني وياك بنفس المكان
نسر : هزيت راسي بسخرية وانه اباوعلهة من المرايه الكدام خزرتني والتفتت ع الجامة ابتسمت بستمتاع وانه اهمس بكلمة كويه وفعلاً هالشي المره التوكف بسد جدي وعمامي لجن عاير امهة وهانهة انه اعتبرهة كوية صحيح عدهة طلعات مو مناسبة لبنية وحجي اكبر من راسهة لاكن رغم هالشي هية بنظري كويه رجعت باوعتلي من الجامة بعيون شفت بيهن كيد ومكر وحقد عجيب ما جنت متوقع بيوم اشوفه بيعونهة عدلت البشت ع رجليهة وهية اتكول
طيف : صكد شيخنا ما كلتلي
نسر : شنو
طيف : شنو رد فعلك وانت رايح تحضر خطوبة حبيبتك بنفسي اعرف شنو احساسك نهيت كلامي وانه اغمزلة ببتسامة اباوع ع ملامحة اتغيرت ١٨٠ درجة والعيون صارت تجدح وهوة هذة الأريدة قبض ع يدت الستيرن بعصبية واول مأجة ايرد فتح باب السيارة ابوي ركب جدي واجا ركب بصفي باوعلي وابتسم وهوة ايكول اشلونهة انومة زينة كلت هيج وانه اباوع ع نسر ببتسامة لحظات ومحس غير بالسيارة انشخطت وبدة يسوق بسرعة جبيرة باوعلة جدي بستغراب وضربة ابوي ع جتفى ع مود يبطئ السرعة وفعلاً بطئهة وكضة الطريق كلة وهوة يخوزر فعلاً فرحت بعصبيتة وغضبه ابتسمت بمكر وانه اكول بعدك مشايف شي وبعد ساعات طويلة يلة دخلنة البغداد وصلنة البيت اخو جدي نزلنة من السيارة ورحت سندت جدتي ويا مرت عمي ودخلنة للبيت استقبلتنة جدتهم ونسوان كومة منهن اعرفهن واجونة بعرس عمي بس الباقي لا تغدينة عدهم وكمت سلمت ع البنات وساعدتهن بالمطبخ لأن خطية اهواي ناس وهنة قليلات مو مثلنة كل واحد مخلفلة عشيرة كملت غسل امواعين وياهن وصعدت ويا البنات فوك دخلت غسلت ولبست فستاني ويا كعب اسود طويل احس ع ساعة وانجبح انه والفستان بي شسورتلي بنية منهن شعري وهية اصلي ع محمد ع طولة والله لو امي شافتني فاتحة شعري كدام النسوان جان صرت بتعداد الأموات تموت من شي اسمه حسد ودوم مترضى افتحى او العب بي حطيت مسكارة وكحل وحمرة خفيفة ونزلت ويا مرت عمو جوا شافتني جدتي واستلمتني بدال امي اخر شي جرتني يمهة وهية اتكول
ام مالك بعصبية : والله اذا تكومين لحش ارجولج حش فلك اصابج شنو استهترتي وياهن ما لحكتي وانه صارلي ساعة احمد بيج كدام السنوان وانتيي نازلتلي محمرة والزنود طالعة
طيف : محمرتيش انتي شايفة البنات اهنا لابخات لبخ وانه ع الحمرة رزلتيني
ام مالك : هذني مستهترات قابل تستهترين وياهن بس اصبريلي دخل نرجع واعرف اشلون اصرف وياج
طيف : باوعتلهة وكلبت اعيوني بملل مسحت الحمرة وخففت الكحل خاف انوب صكد وانكتل اشوية ودخلو العروس وانسوان ايهلهن ويركصن ما شفنة منهة شي راحت كبل جوى دقايق ورجعت طلعت كعدنهة النسوان ع الكوشة ورجعن ايهلهن ويركصن اباوعلة طالعة صكد حلوة ومبينة هادية وحبابة حتى نسر متستاهلة تباوع بعيون النسوان وتبتسم مثل المضيعتلهة شي انتبهت ع ايدهة تفرك بيهن بخوف ع توتر والله لو اشوف بنات عمي ذبن بخطبهن لحم والضحكة شاكة حلكهن
ما مصدكات انخطبن ابتسمتلهة بادلتني البتسامة ودنكت اشوية وصاحوهة ع العقد صعدت انه والبنات فوك لبست البشت ولفيت الشال ع شعري لا يدخل العريس ونزلت جوى جانت مشتعلة الهلاهل تم العقد والعريس جاي مدنك ع جدتة يبوس بيدهة ابتسمت وانه اوكف بنهاية الصالة كدام الباب بصف البنات واصفك وياهن لا اردين راحت عيني ع بابا الديوان مالتهم صاير كدام الصالة شفت جهال كومة يطبون ويطلعون طلع نسر وهوة ايخابر بتليفونة اجت عيني بعينة لو انثولت ما كمت اعرف شسوي خزرني وطلع برة لحظات ورج التليفون بيدي شفتهة رسالة منه فتحتهة بسرعة وانه اقرة كاتب بيهة
نسر : استري نفسج وطبي جوى ازلم يا طابة يا طالعة
طيف :.......
________________
مرسلين
وكافة اسد بسحابة الفستان وماكو فايدة اتنفست بتعب واني اكول
مرسلين : فدوة زهراء مسويلي ياهة شو مدا اصير
زهراء : بلة قربيلي شو
مرسلين : تقربت عليهة ودرت ظهري سدتلي سحابة الفستان بصعوبة وهية اتكول
زهراء : شنو هاي سمنانة لو الفستان ضيك
مرسلين : هههه لا الفستان ضيك امي جابتلي يا وطلع مو مقاسي بس مالحكت تبدلة
زهراء : هههه بس طالع عليج فيت مفصل جسمج تفصيل انوب عنابي اويلي عليك يا خوي والله لو يشوفج
مرسلين : ضحكت ع حجيهة وكلبت شعري صفح واني اباوع ع هدى من المراية دترتب بشعر بتهة وتباوعلي بنظرات حارقة خطية كامت اجرجر بشعرهة ونونة تبجي رحت اخذتهة منهة ونزلت جوى
صاحن النسوان العروس اجت ضليت واكفة بالمطبخ واني منتظرة يدخلوهة يمكن الحد هسة محد مستوعب خبر خطوبتهم وسبب استعجالهم اشكد خابرتهة بهاليومين حتى افتهم منهة اسبب متأكدة هية مموافقة ع هالزواج ذاك الأسبوع اتصلت بية وهية تكلي عن خبر موافقتهة بالولد التقدملهة شبسرعة رفضتى وقبلت بمحمد الي جانت نافرتة نفور قوي مراً هاليومين برمشت عين والكل اجمع ابيت جدي من البارحة كربت كراب من الصبح ليجي احس جسمي متكسر من ورة الشغل
وشاهين بين ساعة وساعة داك علية لا اسوين هيج ولا تلبسين هيج ورسائلة عبالك عسكري عندة كولة تهديدات وأوامر
رحت سلمت ع اوتار وباركتلهة اباوعلهة طالعة جنهة حورية ربي يحفظهة ضليت واكفة بصفهة واني ابتسم ع خوفهة وتوترهة معرف ليش بس رجع بية الوكت اليوم خطوبتي غمضت اعيوني واني اشوف طفلة عمرهة معابر الثنعش سنة وهية ترجف كدام باب الأستقبال وتردد ورة كلام الشيخ وكعن ادموعهة وهية تسمع كلمة اعلنكم زوجا وزوجة فتحت اعيوني بسرعة واني امسح طرف عيني مريد ابجي وخصوصن بهاليوم باوعت ع هدى تباوعلي وتبتسم مثل الي كأنو عرفت بشنو جنت افكر اخذو اوتار الغرفة جدو وبيبي حتى تعقد واجتني مرت اخوي تركض وهية اتكول
زهراء : لجن وينج خابرني شاهين وهوة يرعد وين تليفونج صارلة ساعة ايدك عليج ماكو
مرسلين : خفت من الهوسة لا ايضيع لو ينباك فبقيتة فوك
زهراء : المهم جايبة وياج تشيرت قميص الشاهين
مرسلين : لا بس التشيرت لليوم نزعة
زهراء : اي زين اصعدي انطي يا تلكي بغرفة محمد منتظرج قميصة مدمر عصير مادري جاي المهم وديلة بسرعة كبل لا يكب بوجهج
مرسلين : هزيت راسي وصعدت بسرعة فوك اخذت تشيرتة ورحت الغرفة محمد دخلت وشفتة واكف ع المراية ينزع بساعتة دنكت راسي بخجل ع توتر واني اشوفة نازع قميصة وتحمحمت بأحراج واني اكول
مرسلين : هذة التشيرت مالتك اسفة بس جنت مبقية تليفوني فوك اباوعلة ضل صافن علية لا ياخذ ولا ينطني دنكت راسي ع جسمي بستغراب وغمضت اعيوني بفشلة واني اشوف اشلابسة خررب اشلون نسوة اجيت اشمر التشيرت علية وافلت بس وكفت مثل الصنم بمكاني واني اسمعة ايكول
شاهين : جنتي نازلة هيجي
مرسلين :........
