رواية علي حافة الثأر الفصل الواحد والثلاثون بقلم زينب نور
- بابا الله يخليك كولي الدا اشوفه كذب !؟
- امج خرفت وباعت كل قيمها واخلاقها مكفاها سوالفها نفسها دنت على زوج بنتها اني مثلج راح اتخبل
- يعني شنو .. يعني الكلام حقيقي .. لا مستحيل ماما متسويها وعبااااس ميسويها بابا اكيد اللي وصلك غلطان لو رايد يوكعهم
- اصحي فيان يوكع منو افتحي عينج زين وشوفي زوجج وامج شنو سبب الخلافات بيناتهم وعلى شنو اختلفوا فجأة .
- لانو خاني
- هي الخاينتج وياه قبل الكل
- هذا الكلام مو صحيح ، ماما مو هيج
- الموضوع صعب تصدكي بس حقيقي يا بنتي امج وزوجج مستنقع قذر وقذر جدا ميليق بيج ولا بيه تبقين وياهم .
- لا بابا اكيد اكو غلط اني لازم اخابر ماما
- راح تأذين نفسج بنتي اتركيهم الي اني راح اتوالهم
كمت من مكاني خابرت ماما ردت ، حجيت : الو
- ها فيان
- ماما الشفته صحيح شنو البينج وبين عباس
- شنو البيناتنا
- هياته الصور والفيديوهات كدامي وبغرفتييييي ماما
- اي صور يا فيديوهات
- افتحي نت ادزلج الصور
- اشوف
فتحت نت دزيتلها ع الفايبر .. شافتهم مجاوبت .. خابرت مردت .. رجعت اخابر مردت وغلقت التليفون كله .
هنا انجنيت كمت اصيح : لا لا اني لازم اروح اشوف عباس واواجهه وجه لوجه وافتهم منه
كاملي بابا : لج بنتي راح ينكر
- بابا مستحيل يسووون بيه هييييج مستحيل
- سووها بنتي .. لما تجيبين رجال متعرفي شنو ما شنو هذا النتيجة .. يعز عليه توكفين كدامهم بضعف وتحاجيهم اتركيلياهم اني اخذلج حقج منهم واحد واحد.
- لا اني لازم اروح .. لازم
طلعت من البيت جسمي يرجف عقلي رافض يصدك نهائيا .. مدا اكدر استوعب الموضوع امي وزوجي شنو على فراشي شنو .. شوكت صار هالموضوع ليش ما حسيت معقولة اني هلكد غشيمة وغبيييية
مستحييييل اذا ماما سوتها عباس ميسويها .. لا
السايق واكف فتحلي الباب الورا .. ضربت الباب وكتله : مفاتيح السيارة بالعجل
- بس ست اوامر
- المفااااااااااااتيح
ابويه اشرله .. انطاني بسرعة وكاله : اصعد وياها
رحمن عمر ... اتبعوها لا تتركوها وحدها واي امر تنطيكمياه بلغوني قبل لتنفذون .
صعدت كدام الستيرن شغلت السايق ركب يمي وسد الباب وكال : بالهداوة ست كلشي ينحل
صرخت : سد حلككككككككككككك
انخرس .. دست بالسيارة واني افتح بالتليفون وادور رقم عباس صاح : كدااااااااااامج ... سياااااازة
دست بريك قوي صار صوت كلش قوي واهتزينا هز
صاح : ست ابوس ايدج خليني اسوق وانت اكعدي ودليني لا تسوقين وانت بهالحال
- انزل منا
- ست الله يخليج بس اتفهمي الوضع
- كتلك انززززززززل
- اعتذر منج كملي ما راح اقاطعج
رجعت دست بالسيارة واني اتصل رد عباس : ها حبيبي
- وين انت
- بالمستشفى
- عنوانك بالضبط
- شكوووو
- انطيني عنوانك وابقى مكانك ..
- صاير شي ؟
- عنواااااانك دزه بسرعة .
حجيتها وقفلت الخط بسرعة وستمرة اسوق واحول بين السيارات بسرعة والسايق مرتبك على ارتباكي وصلت رسالة شمرت التليفون ع السايق : افتح الرسالة بسرعة ودليني
كام يدليني لحد ما وصلت المستشفى ..
عفت السيارة والسويج ونزلت والسايق احتار بيها والسيارة الثانية نزلوا منا اثنين ركضوا ورايا ..
سألت الرسبشن عن اسم ام عباس .. دلوني
صعدت .. جانت مستشفى حكومي .. علياء وعباس وخاله واكفين .
بس شافني امشي بهمة حط ايده على حلكه : اشششش شكو على كيفج شكو
انطيته التليفون : شنو هذا عباس
باوع الصورة : شنو
- اني اللي اسألك شنو .. عباس ويا امي
- اسكتي منا ناس امشي نتفاهم
دفعته : احجي لكككككككك
- منو اللك احترمي نفسج فياااان
- احجي لتخبلني الصورة هذه شنوووو ويا اني وعلى فراشي كولي جذب كولي اني ما اسويهاااااا
- جذب طبعا .. اكيد اني ما اسويها
- ماما منكرت
- لان امج بربو*
ضربته راشدي بقوة راد يلزمني ركضوله الحرس خاله فزعله وعلياء ذبت روحها عليه وكامت تغلط عليه : جسرة طايحة الحظ ممترباية امشي منا انعل ابوج لابو الخلفج
وهو يتعارك ويدافع ويا الحرس ..
اتجاهلت واني اتقرب منه والحرس لازمي : ويا امي عباس !؟
نكرت غيد وغشمت نفسي وسكتت
نكرت نووووور وغشمت نفسي وسكتت
عباس ويا اميييييي
- لج حيوانه اتهمينيييييييي بأمججججج
- اعلمك الحيوانة شحتسوي بيك
- اخذوه
حجيتها وابتعدت منه وخاله ديكولي : ولج انت شنهي مالج رداد ما تنردييييين
حطيت الصورة كباله : ابن اختك ديخوني ويا اميييي تعرف شنو ويا امي .. ابن اختك مأجر شقة لامي سويااااا انتم تقبلوووووها
خاله انصدم : شني عباس
عوف عنه كام يدافع ويا الحرس وهو يكلهم : اتركوا خل نفتهم شكو
الناس كامت تباوع ..
وعباس يكلهم خل نطلع صرنا فرجة امشوا
اني ارجف وافتر بمكاني .. وهو ينكر ويريد يطلع ميريد ينفضح كدام اهله او يمكن ميريد امه تسمع ..
اجا الحرس وهم بهالهوسة حتى يفتهمون شكوا
الحراس مال بابا طلعوا باجاتهم وعباس كاللهم : نتفاهم سويا برا
عفتهم ومشيت كدامهم واني ارجف طلعنا من المستشفى وخاله وياه .. الحرس حواليا وكفت واني افرك بوجهي : كولي الصورة كذب عباس كولي هالصوووووورة مو بغرفتي وانتم مو سواااااا
- مو جذب بس مو مثل ما متصورتها اني ما عندي شي ويا امج
-وتقبل ماما تدخل عليك بهالمنظر
-امج هذا لبسها حتى بالبيت
-تنكر عندك شي وياها
-ما عندي شي وياااااها والله
طلعت اله المحادثة اللي بينه وبين امي : تنكر هالمحادثة .. تنكر انت كتلي اجرررررررت الشقة لامييييي
ضل يباوعلها : اني ممراسلها
- وترجع تنكررررررر
- والعبااااااااس ما اني ما مراسلها ولا كاتبلها هيج
- هذا رقمك لو لاااااا ؟ مو هذا الفايبر مااااااااالتك
حجه خاله : الحجي مو هيج بتي لا التفاهم بالصياح والحجي حلو بالشارع خلينا نرجع ونكعد ونتفاهم ولو الح حك ينوخذ من عيونه .
خاله يحجي ويهديني بس وجه عباس انطعن اسود وكام يشمر عرك من كصته ومتوتر ومحتقن ..
كل مرة لما اتهمه ميهتم ويتصرف على ان هو ممسوي شي .. بس هالمرة السانه يحجي شي وعيونه وتوتره وارتباكه يحجون غير شي
صعد هو وخاله ويا الحرس بالسيارة الثانية واني رجعت صعدت بس السايق يسوق ..
جان كلبي مثل الجمرة بصدري
احس مختنكة محتركة روحي مفرفحة مدا اعرف بيش اقنع نفسي وشلون اتقبل امي وزوجي
احس عقلي حيوكف
من كثر الحركة البكلبي عيوني حمر
ما ابجي بس مدمعات من القهر والحركة البكلبي
نزلنا يم بيت بابا نزل خاله وهو للبيت وابويه موجود ..
كعدوا بالصالة .. بدا هاله يبدي الكلام ودين وهالسوالف وابويه كاعد على اعصابه
كاله : من رخصتك اخي .. اني اريد اسمع من عباس .. الحقيقة .. كل جذب راح تكولها وتنكرها اكدر اثبتها عليك لاحقا ..
- تنكر اكو علاقة بينك وبين امها
- لا بس اني ما عندي شي وياها .. امها هي ....
- امها اغتصبتك جبرتك ؟
- عمي مو هيج
- احجي وياااااااااي بالعقل عبااااااس .. امها جبرتك تكعد يمك وتضحك بملابس نوم انت وياها كول هالصور جذب
- انت شنو كاعد تتهمني بامها اذا هي امها ما تستحي وتجي يمي بملابسها هاااااي شلون اطردها .... وجم مرة طردت .. فاد ويا امها
- ها يعني امها الجانت تجيك وانت ما تقبل
- هي تشهد احجي على شنو جاي اتعارك وياج مو اريد امججججج تطلع من البيييييت احجييييي مو اني الاطردها مو اني الرايد ابعدها عنججججج
- الشقة شنو موضوعها
- امها طلبت اجر شقة لصديقتها وكالتلي لازم نروح نشوفها .. كبل لتجي صديقتها من الامارات
حجيت : سألتك سابقا مكتلي لصديقتها كتلي لامج وسوالفها هسه تكول لصديقتها
- اللي اكتشفته بعديييين امج رايدة الشقة لسوالفهااااا
حجه بابا : وامها ليش تأجر شقة وعدها بييييت متروح لبيتها تسوي اللي تريده
- أسألها الها
- المحادثات موجودة بينكم اسألها وكلشي واااااضح وانت جاي تعترف بلسانك تكول اني اجرت الها الشقة وبعدها نكرت وكلت لصديقتها ومستمر تكذب انت شايفنا كدامك اطفاااااال متستحي على نفسسسسسسك .
- ما استحي شنو احترم نفسسسسك اذا انها مو خوش واني الاطرد بيها اطلع مو زين لا نحط اثمها براسي ياما حاولت اطردها وفيان هي اللازكة امها ابيتييييي
- فيان السبب يعني .. تمام
حجه خاله : ما جاي يقصد فيان يقصد هو يريد يوخرها يبعدهو وفياان ... قاطعه بابا
- لا لا لا .. فيان السبب
وامها المتحرشة بعباس .. والرسائل هاي مو هو الدازهن من تليفونه البيه رمز محد يعرفه غيره والصورة الهو وياها بملابس نوم وعلى شرير بنتي وبغرفة خاصة ما بيناتهم شي وعادي .. وامها هي الطلبت الشقة الها وبعدين صارت لصديقتها هذا كل التريد تكوله عباس ..
حجه : عود تريد تجمعهن براسي عمي والعباس اني مالي غرض بيهن ذني امها هي الصوج
- مصدكك اعتبرني مصدكك
فيان اطلبي من منال تجي ؟
اخذت نفس .. رجعت ليورا هي واكفة ولازمة ادو اشرتلها براسي تجي .. تقربت : ها ست
حجه بابا : تعالي منال .. تفضلي بنتي
دخلت وهي متخوفة عباس يباوعلها بس لزم ايد بأيد من شافها واني اباوعله لكل تفاصيله واراقب كل حركاته هو هو ولا على بعضه وكأن حبل اعدامه كدامه
حجه بابا : الج الامان بنتي احجي ومحد يمسج بسوء واني موجود .. احجي
باوعتله : شحجي
- شوصاج عباس
- شفت خالة طلعت من غرفته وهو طلع وراها وجان دنيا الليل الساعة تلاثة
حجه عباس : لان ما ردت فيان تعرف بسوالف امها
صرخ ابويه : خليها تكمممممممل
منال : وصلني ما احجي اي شي شفته وهددني في حال شفت شي لو حجيت مراح يخليني بشغل بعد ويطردني .
عباس : لحد هذه اللحظة اني ما ردت فيان تعرف ..
صرخ بابا : اسكت خليها تكمل ... المحادثة والصور منين اخذتيهم ؟
- من تليفون خالة
كامت والتليفون مفتوح وادو بيدي فلزمت التليفون وصورت كلشي من تليفونها ولما اجتي انطيته لادو .. بس هالشي طلبك عمو انت طلبت مني اكشفلك شديصير وبالدليل والا اني والله مو طبعي ادخل بشي بس ... طقاطعها بابا
- الج الامان بارك الله بيج اخذي راحتج .
هي تحجي اني كل كلمة منها مثل السهم براسي
حجيت : يعني جنت وياك بكذبة .. توهمني بحب مزيف ..
بابا شديصير صحيني اللي دا اعيشه حقيقي
عباس : فيان والعباس مو هيج اني كل اليهمني
صرخ ابويه : عندددددددددك لعبت بمشاعرها وحياتها بما فيه الكفاية من يوم اللي دخلت حياتها وانت ترتفع وبنتي تنزل ..
لك اذا كنت ساكتلك وصابر عليك فلعيونها بس
بس بعد اليوم محد راح يخلصك من شري والايام بيناتنا ...
راد يحجي طرده بره ..
اني لازمة راسي .. مكدر ينفي العلاقة المشبوهة بينه وبين امي ولا الصورة .. ولا تحذيره وتهديدة للمساعدة
احس وكف شعر راسي اني الداعيشه صدك لو كابوس !
امي وزوجي ؟ شلون وشكت ومن يمتى هم كبالي هيج واني على نيتي وياهم واحبهم اثنينهم واحرك بروحي حتى متزعل ماما وميزهل هو ..
تالي اثنينهم خانوني وغدروني
دموع ماكو بس واكفة بمكاني ومنتجية ولازمة راسي
احس قنبلة من الوجع براسي
.. هوسة وصياح بابا ويا عباس وخاله ..
مسمعت الهوسة لان وهم بهالاثناء اني انهاريت ووكعت .
محسيت بعد على اي شي
او الأصح .. ما اريد احس .. دخلت وكأني بإنبوب ضيق جدا من الأحساس ضلام وخوف من كل مكان يحيطني .. وبرد والم يلم كل تفاصيلك
اشعر هم يحملوني ويركضون وهوستهم
بس ما عندي رغبة بالشعور .. بطلت احس وكأني فقدت الرغبة بالأحساس .
شنو البقى شي ومتعرضتله بحياتي ..
موت اختي ..
خذلان اخوية
طلاق امي وابوية
عمر يضيع واني مغصوبة على انسان ما اريده
ويوم اللي كلت ما اريدة تعرضت للاغتصاب
ردت بيت وعائلة وضحيت واتنازلت بكل شي لحتى استقر واعيش مثلي مثل اي بنية ببيت خاص وزوج حنون واطفال واهل داير مدايرها .. لكن النتيجة كانت زوج خاين وخذول وطفل مريض ومشوه وام سافلة وكلمة سافلة اقل ما يقال بحقها .
كنت رايدة اختفي
او لربما اموت .. كأني اكتفيت من حصتي بالالم .
دخلت مستشفى فورا ..
انطوني اللازم من مقويات ومغذيات
لكن ما حانت عندي رغبة اكعد .. جنت غايبة او متغيبة عن الوعي .
اسبوع اني بحالة من اللا وعي
اشعر واحس بس مالي ردة فعل .. حتى بجي مبجيت لهسبب بابا جان كلش قلق عليه .. لان باسبوع قطعت الاكل نهائي بقوا بس ع المغذيات ينطوني .. واطباء الجسد عرضني عليهم بابا واحد واحد ما كان شي بجسمي يشكو من مرض .. بس ما كنت بخير لهذا اضطر يطلبلي دكتور نفسي للبيت.
... اجا الدكتور وكعد كبالي وبابا واكف يمه
حاول يحجي الدكتور يطلب مني اجاوبه ما اعرف شلون مريت بهيج حالة عجيبة بحيث الساني وعقلي رافضين التواصل الاجتماعي مع اي بشر .
فالدكتور النفسي وصف حالتي بالأكتئاب الحاد والذهول النفسي .. وهي حالة مرضية صعبة جدا يوصفها الاطباء من اصعب الامراض اللي ممكن يعاني منها الإنسان .. واصعب حتى من الأمراض الجسدية لان تعاملها صعب ومعالجتها أصعب .. مو شي ملموس حتى الطبيب يظطره لعمليه وينهي .. المشكلة النفسية من اصعب مشاكل الانسان
الطبيب حذر والدي من ابعاد اي شي خطر
سجين قلم كزاز اي شي ممكن يكسر ويسبب جرح
لان اكثر الحالات .. اذا استمرت وما تتابعت تأدي للأنتحار .
يعتقد البعض ان الموضوع هين
وبيه شيء من المبالغة لكن علميا وعالميا.. كل ٤٠ ثانية انسان يموت حول العالم او ينهي حياته من شدة حالات الإكتئاب وهو مرض صعب يضاهي السرطان .. لان السرطان ينخر الجسد والإكتئاب ينخر الروح .
تقل حالات الإكتئاب عند المسلمين .. لوجود الايمان الروحي والقران والادعية اللي يفرغ الانسان طاقته السلبية وهو يحاكي ربه ويطمن قلبه بوجوده
لكن وقتها للأسف اني كنت فاقدة حتى ايماني .. وفعليا فكرت بالإنتحار ..
كعدت بالليل .. ابحث عن مخرج او الك حادة ممكن تنهي حياتي بسرعة وبدون الم .. حتى اخلص ...
اعرف مكان النفط والبانزين بالمخزن .. طلعته
كعدت مرت ابويه كالت : ها فيان شتريدين
سمعتها بس ما كأني اسمعت .. مشيت واني اتجاهل صوتها وهي تحجي : شتسوي بالبانزين ..
تركته ودخلت المطبخ هي صعدت فوك ..
ادور بالمطبخ على جدحة مدا الكه .. ادور .. ماكو
دست دكمة الكهرباء مال الطباخ وجدحت العين .. اشتغلت عين الطباخ دا اريد اطلع وكف بابا : شدسوين
صرت احرك براسي وكاني ابعده مني واريد امشي لزمني: لج بنتي احجي ويايا شصاير وياج فهميني لج ما خليت دكتور زين يوصفون ومجبته الج ومدا تحجين بابا حبيبتي .. شنو المأذيج
جان يلزمني واني ابعد بأديه مني
كام يبجي وهو يكولي : ارحمي نفسج بابا محد يسوى تأذين نفسج علموده .. اذا انت مرايدة نفسج اني وابنج نريدج انت حبيبتي وبنتي وكلشي املك بهاي الدنيا الله يخليج بابا ارجعي لوعيج مو وحدج مريضة اني دا اتمرض وياج بنتي لج والله راح اموت من القهر واني ما اعرف شلون اتصرف واداويج .. يا دكتور اجيبلج ويرجعج لج بنتي احجي ويايا الله يخليج
حضني وكام يبجي بقوة
بس كاني جثة بين اديه .. يلزم براسي ويباوع بعيوني ويحجي ويبجي بس مجنت اباوعله وكأنما ديضايقني بوجوده .
ما اعرف كانت حالة غريبة جدا صابتني من العزلة العاطفية بحيث مكمت اتفاعل ولا انطي ردة فعل ويا اي حدث ديصير كدامي ..
اضطر بابا ينقلني للاقليم
حتى يبعدني من جو بغداد الصاخب والمشاكل والانفعالات .. وياخذني لهولير .. واخذ مساعدة منزل وزوجته .. ومساعدة ثانية طلب منهم اكون تحت مراقبتهم ما يغفلوني عني ولا ثانية شفتات تروح وحدة تجي لخ خاف يغفلون واكوم اسوي بنفسي شي
اقاربنا واهل بابا وصفوا لبابا رجل كردي بس قروي وبسيط .. مؤمن وعلى كد حاله هواية ناس تعتقد عنده البركة ويشافي الناس بدعائه ..
فبابا ترك الدكاترة وراح ع الروحانيين
وطلب هذا الرجل يجي للبيت ويشوفني ..
كاله انطيك كلشي بالدنيا بس شوفلي علاج بنتي شنو لا دا تاكل لا تشرب لا تحجي لا تشكي عجزت الكى احد يوكع على علتها
كاله .. تصلي ؟
- مو ملتزمة بهالأمور احياني اي واحيانا لا ..
- متزوجة ؟
- اي متزوجة بس زوجها هو الخلاها بهالحالة بسبب موقف
- عندها اطفال ..
- طفل واحد بس صغير .. وعند زوجتي تعتني بيه باعده عنها حتى متأذي ..
-ماكو ام تأذي ابنها لو مهما كان مرضها .. علاجها روحي مو مادي اتركها مع ابنها لو شكد ما يبجي اتركه الها .. وراقب وتصير بخير ان شاءالله .
وانطاه مي مقري عليه القران وحرز ومن هالأمور .
شي شربتي عنوة وشي حطه تحت وسادتي .
فاني ونايمة بالغرفة طلب من المساعدة تترك ابني يمي وهي تبقى قريبة خاف أذي ابني ..
كل هالفترة بابا بعد امني مني نهائيا لان اني مريضة وهو مريضة .. حبيبي ابتلى بينا اثنينا فخلا مرته تعتني بابني .. لحد ما طلب منه هذا الرجال القروي .
ادو جان يلعب .. بس بدا ينغوص
اني مغمضة بس اسمع ابني .. شي على شي كام يبجي
كمت اسد اذاني .. كام يبجي بقوة .
كمت اندار منه واسد بأذاناتي
بس وجع صابني بگلبي وهو يبجي
فحط وهو يبجي .. كمت اباوعله سكر من البجي وتشنج وشفته فجاة صارت زرك
كمت من حيلي اركض الزمه شايله ادك عليه ناط من البيج ميتنفس .. كمت اصرخ: بابااااااااا ابني حيموووووووت بابااااااااا
اتراكضوا كلهم .. اخذته مرت ابويه ودا تركض بيه
واني اركض وراها .. ابويه مجان هنا .. الحرس تراكضوا وهم ياخذون الطفل
كمت ابجي واصرخ من كل گلبي وكأنه انفجار عاطفي
اصرخ بكل صوتي ابني .. راح يمووووت ابنييييي
شالوني بالسيارة اخذته بين اديه .. فقد الوعي .. ركضنا بيه للمستشفى .. اخذوه من عدنا بالباب .. تراكضوله الاطباء كالوا لازمه عملية فورية
اجا بابا بهالأثناء اني لازمة راسي وابجي ابجي من كل گلبي واني اكوله : بابا ابني حيموووت راح يموت ابنييي الله يخليك بابا لتعوووفه .
- راح يتعالج بنتي لتخافين راح يتعالج
الدكتور طلبنا بلغ بابا ان الطفل دخل الإنعاش ..
جنت اشوف بابا بأسوء حالاته .. ولا كأنه ذاك الرجال القوي اللي ماكو شي بالدنيا يهزه ابد .
اخذلي بابا غرفة وانطوني مهدأ اعصاب وجنت لازمته بقوة واتوسل بيه ميتركني وما تركني ..
جنت بحضنه وهو يسولف ويايا : حتكومين بسلامة وابنج بخير ويمج .. راح اخلي ابنج بأفضل المراكز التأهيلية وراح يكون من اجمل وافضل الاولاد .. لتنقهرين اني موجود
باوعتله : ماما محجت ولا خابرت
- ماما اعتبريها ماتت ..
- هي مكالتلي ليش هيج سوت بيه بابا
- ما عدها جواب تواجهج بيه هي اقذر من انو تحاجيها او تسمعين جوابها .. الام اللي كانت تسعى بخراب بيت بنتها حتى ترضي رغباتها هذه مو ام ابدا هذه شيطان
ربما انت عتبك والمك من عباس
لكن ذنب امك كان اعظم .. عباس ومهما كان يبقى غريب لا حمل بيج تسع شهور ولا رباج ولا انت من دمه ولحمة لكن اللي سوته امج ما ينغفر ابدا .
- ما اريد اعيش اني وابني وهم عايشين
باوعلي : لتفكرين بهالشكل اتركيهم اني اخذلج حقج منهم
- لا اريد اشوفهم ميتين
سكت .. حجيت : لو اني لو هم بهالدنيا منكدر نعيش ونشتم نفس الهوى ما اكدر .
.. اجا بابا كاله : الطفل راح يدخل عملية فورا عنده انسداد بالشريان ويحتاح قسطرة.
كام من عندي واني كمت لحيلي اتبعه ..
طلبوا توقيع ابو الطفل مموجود .. بابا وقع ع العملية
اني كعدت بالكاع بس اعصابي مجمدة من كد الابر والادوية ..
اريد ابجي وما اكدر
بس كلبي احسه يريد يوكف من القهر والحزن
يمكن بسببي ديضيع هالطفل .. يمكن ديعاني سوء اختياري .
اجا بابا يمي وهو يحجيلي انو العملية سهلة ولتخافين .. ومراح تأذي ومحيحس
واني بداخلي اغلي ودا افكر هالنار الجواية شلون احرك بيها الجان السبب .. مراح ارتاح ولا يهنالي بال اذا ما اخذ حقي منهم كلهم .
من بعد ساعتين طلعوه وخلوه بغرفة خاصة
اني وبابا رحنا نباوعله من الشباك والسستر دا تنطي مميته وتعتني بيه ..
حجيت : حيكون بخير بابا
- اثنينكم راح تكونون بخير لتخافين .
اجا حضني وبقى يمي مفاركني .. حجزلي بقندق مقابيل المستشفى غرفة وبعث بمساعدة تبقى ويايا ..
لثاني يوم طلعوه من المستشفى ووصونا ببعض الامور اللي لازم نبقى حذرين بالتعامل وياه ..
يومين وقلبي يغلي بحقده ..
عباس حاول يخابرني ويتواصل ويايا رفضت حتى اقرا رسالة من رسايلك كل ميراسلني من رقم اكوم احظره بلا ما اقرا المكتوب ..
ممستعدة استقبل اي شي
ولا اسمع اي حرف .. احس روحي كلشت تعذبت منه
ميستاهلني ولا يتاهل حبي ووفائي وصبري وتحملي وتنازلاتي .. اني كنت غلطانة جدا الحب وحدة مو كافي حتى نتحمل ونتنازل .. اذا ما اتوازنت الكفة بالوفاء والاهتمام .. غلط اتحمل واتنازل .
بابا راد يرجع لبغداد ردت ارجع وياه ..
اقترح عليه ابقى بهولير ما ارجع لاجواء بغداد المشحونة .
لكن رفضت ابقى بنفس دائرة المرض واصفن وابجي ..
محتاجة ارجع لنفسي وحيلي واشتغل واختلط ..
رجعنا لبغداد ..
بقيت اسبوع يلا اخذت قرار اطلع من البيت لان كل يوم بالليل اقرر واسهر للصبح وانام ويا طلعة الشمس واكعد العصر وارجع اقرر من جديد .
ولما قررت
حطيت سبع منبهات دقيقة ورا دقيقة اسكت الاول يدك المنبه الثاني لحد ما انزعجت وكمت للحمام سبحت صحيت .. بدلت رسمي ومكياج خفيف وسشورت شعري وبرمته برمة خفيفة ..
نزلت منال موجودة : صباح الخير
ابتسمت من شايفتني كاعدة من الصبح : هلا ست شنو الحمال اللهم صل على محمد وال محمد تخبلين طالعة اليوم
ابتسمت .. وكلت الها : مينو حبيبي ما اوصيج بادو لتفاركي ابد تركي كل البيت وكعديلا .. واذا زوجة بابا حاولت تطلب منج او تسخرج ارفضي واذا اصرت خابريني كلشي ما اريد منج غير ادو .. هو ميقبل غير بيه وبيج واني اعتمد عليج
-من عيوني الاثنين ادللي .. اسويلج ريوك
- لا لا ممشتهية مع السلامة
سلمت عليه وطلعت .. السايق والحماية بالباب .. راد يرافقني واحد رفضت اخذت السيارة وطلعت لمكتب بابا .. لما وصلت استقبلوني الحمايات وهم يفتحولي الباب نزلت شمرت السويج عليهم ديصفوها بمكان مناسب واني دخلت للمكتب ..
لكيت بابا كاعد وكدامه رجال ديحجي وياه ، حجيت : صباح الخير
شال راسه بابا وفز : اهلا يا صباح الورد والهنا اليوم منو منورتني بالمكتب
وفتحلي اديه سلمت عليه ، وعرفني على الكاعد كدام مستشار بمجلس النواب .. كام مد ايده سلمت عليه وبابا عرفه عليه : بنتي فيان ماجستير ادارة اعمال وكانت المديرة الادارية بالوزارة .
- الي الشرف ست اتعرف عليج وسعيد جدا بلقائج
- شكراً ، تفضل لو سمحت
كعد واني كعدت .. ضل بابا يتناقش وياه بموضوع واجا المساعد حط الكهوة كدامي خلص موضوعهم سلم وطلع اندارلي بابا : اني كلش فرحان اليوم بجيتج هيج اريدج ترجعين قوية ومتنكسرين ولا احد يكدرلج لو يكدر يكسرج اريدج ترجعين فيان القديمة اللي لما جانوا الموظفين يسمعون بأسمها كلمن يركض كدام مكتبه ويتراجف بمكانه ..
- واترك اللي اذوني مرتاحين
- محد يرتاح وابوج موجود .. اني ما ارفع انسان فوك لا ما احسب احساب اذا فد يوم علط وياي شلون انزله لسابع كاع واعلمه شلون يغلط ويايا لو ويا بنتي
- شلون !؟
- اول شي امج باعت او وكلت محامي يبع كلشي عدها وشردت لتركيا واعتقد بدون رجعة تعرف اذا دخلت العراق ما راح اخليها بحالها .
- والثاني
- عباس وهذا اني موقعه بلا ميدري على عقد قيمته ١٠ مليار دينار .. لو يسددهن لو يدخل السجن .. وباشرت برفع دعوى والقانون دياخذ مجراه .. وهيج اللي غلط وياج بابا بحياته ما راح يشوف النور .
- راح يعيش يعني
- ليش تريحي وتموتي خلي يعيش بحسرة ويعرف قيمة غلطه وياج .. وبنفس الوقت محد مراح يضايقج او يهددح بابنج .. تكدرين تعيشين انت وابنج براحتكم ..
واني عندي مشروع لو توافقين عليه
- اللي هو ؟
- ابنج حالته خاصة وهيج حالة التعامل وياها بالعراق سيء جدا حتى اذا ما يريد يعيب عليه ويكول منغولي راح يكول يا خطية منغولي ويعيش بنقص ويا هذا المجتمع
- وشراح اكدر اسوي
- تكدرين تسافرين بيه وتشوفين شغل بالخارج وافضل المانيا .. برأيي اشوفلج عقد عمل مع شركة المانية وتنتقلين لبرلين تشترين بيت وتستقرين هم ابنج يربى بمدارس تأهيلية اطور من مهاراته ومن قدراته وتخلي انسان محترم وهم تصنعيلا مستقبل يليق بيه بعيد عن اجواء الحرب والدمار وعقول المجتمع هنا .
- بس عباس ما راح ينطيني وكالة سفر اطلع ابني بيها
- اتركي هالموضوع عليه اني ارتبلجياه من مطار اربيل ، ساعتها حتى او اقام دعوى عليج ببغداد متاكل بالاقليم .. وهو الى قير في ظلمات السجن .. وهيج تنطوي صفحته الى الابد وانت بمجرد ما تنوين تبلشين تبدين من جديد كل المؤهلات كدامج الج ولأبنج .
اخذت نفس مديت ايدي لفنجان القهوة شربت منه وهو يباوعلي : شكلتي
- ما اعرف الابتعاد فكرة تروقلي الإن لكن تنفيذه يحتاجله وقت .
- قرري حتى ارتب عقد العمل مع المانيا ..
هزيت راسي : قبل لتخطي خطوة بالقانون اطلب من عباس طلاق رسمي
- على بالي وخابرت عمه وهو رافض لكن مو بكيفه راح يطلقج .. وهذا درس الج بنتي .. مو كلشي يعجبج زين .. الشين التعرفي احسن من الزين الما تعرفي مو هيج يكول المثل العراقي ؟
اخذت نفس مجاوبته ..
بقيت فترة كم ساعة عنده بالمكتب وطلعت بعدها ..
دا ارجع للبيت .. مشغلة بالسيارة موسيقى كردية حزينة وعايشة جوها ودا الف اريد ادخل الفرع عرضلي عباس ووكف كدامي .. دست بريك مفاجئ انهزيت بقوة .
التف وكال : انزلي اريد احجي وياج
- ابتعد مني
- ما راح ابتعد اني رايد احجي وياج
- ما مسموحلك تحجي انتهت فرصتك انتهتتتتت ابتعد من عنددددددي
- ما انتهى شي انت لازم تسمعيني
- ما راح اسمع شي
قفلت باب السيارة .. صار كدام السيارة : ادعميني اذا تريدين اني ما راح اتحرك اذا متسمعيني .
كمت افرك براسي وامسح بوجهي وهو يصرخ
اذاني جدا ممستعدة ابدا احجي وياه ولا مستعدة اسمع
احس گلبي صار يوجعني وهو يصرخ يرد يتفاهم ويايا
مدا يفهم اني ما اريييييد ما اريد
سحبت التليفون .. وخابرت ع الحماية اللي ابيتنا : اني براس الفرع وتعرضلي واحد تعالوا بسرعة ولتقصرون وياه
قفلت بوب السيارة كلها وبقيت براس الشارع .. اجت ورايا سيارة كامت تطوط .. هو مشالها يريد يتعارك وياها .. دست للسيارة وهو لحك السيارة طلعوله الحماية ..
نزلت من السيارة وهو يكلهم : ما حاي اتعارك اني جاي بس اتفاهم وياهااااا . ولج احجي وياااااااااج سمعينييييي
وكفت بالباب وهم لازم يصرخ .. رفعت انفي بتكبر عنه وكلت الهم : اضربوه .
اول ما كلتها احمد السايق جابه ببوكس على وجهه .. ديحاول يتعارك وياه لزمه الثاني واثنينهم تناوبوا عليه كسروا تكسير وكع بين اديهم بالكاع وهم مستمرين يضربوه
اباوعلهم عيوني دمعت وكلبي كام يوجعني
صرخت : اتركووووه
حجيتها ومشيت دخلت للبيت وصعدت للغرفة فورا
قفلت الباب ووكفت ورا الباب گلبي يدك بقوة .. انتجيت على الميز وكمت اباوع لنفسي مهزوزة جدا اتصنع القوة بس والله اني مو قوية وهالوضع مو بس ديأذيني ديحطمني
سمعت صوت صياحه مشيت للشباك باوعت من فوك لكيته بعده رغم اللي صار بيه بعده يمسح الدم من خشمه وحلكه ويتعارك وياهم يريد يحجي ويايا .
انطيت ظهري للشباك وحطيت ايدي على كلبي
ما اريد اضعف ما اريده ولا اريد كلبي .. اتمنى لو اقتلع كلبي من صدري واشمره بعيد وما اباوعله ابد .. ما اريده
كمت ابجي بقوة
اجت منال شايلة ادو ..
اخذت ابني حضنته بقوة وكمت ابجي من كل گلبي
مدا اعرف شسوي .. شقرر اني كلش ضايعة .
للظهر اجا بابا سمعته يحجي ويا زوجته جوا
نزل بسرعة واني بعدني بنفس الملابس ومكياجي بوجهي كلش مخربط وعيوني متصخمة من الكحل .
وكفت كدامه كتله : اني قررت وموافقة اسافر وباسرع وقت ممكن بابا
فز : شبيج شصايرلج ليش هشكل
- اني رايدة ابتعد منانا بابا اني كلش تعبت
وكفلي : عباس السبب شسوالج
- مسوى شي اني بس اريد اخلص منه اريد اروح بعيد بمكان لا اشوفه ولا يشوفني .. ما اريد ابقى
- تمام تمام كلشي حيصير مثل متردين اني من باجر راح اتواصل مع اصدقائنا يدبرولج عقد عمل بالسفارة .. وتسافرين انت وابنج .
- بس بسرعة
- هالامور متخلص بسرعة بس اذا تحبين قدمي على فيزة سياحية وارتاحي حتى لو مو لالمانية للامارات لايطاليا اي مكان ممكن ترتاحين بيه
- يكون افضل .
- تمام راح اخليهم يقدمولج فيزة سياحية لايطاليا هم تشوفين اخوج هناك .. وهم ترتاحين فترة من هالاجواء بس انت اهدي بابا
- مدا اكدر اهدأ بابا مدا يعوفني
- راح اخابر عمه وانهره يتقربلج
صعدت وهو بقى يخابر عمه وعمه يكوله حرام عليكم مانعينا يتفاهم ويا زوجته لو يشوف ابنه ما بيها شي لو سمعته هو يكول ما عندي شي .. بس بابا حذره يعترضلي مرة ثانية
بقيت يومين بالبيت اخاف اطلع ..
بعدها طلعت دا احاول اغير جو احس اختنكت ..
فبنص الشارع العام ما احس الا واعترضني بسيارته .. ووكف سيارته كبال سيارتي .. فزيت وخفت حيل نزل من السيارة ويأشرلي انزلي .. سحبت الكير ع البك ورجعت السيارة بقوة .. وهو ديمشي كدامي ويكولي : بس انزلي احاجيج انزلييي
اخذت نفس بقوة وهو كدام السيارة سحبت الكير ودست بانزين باقوى ما عندي بحيث بلحظة وحدة عباس طار من كدامي انضرب بسيارته وانلطخ بالكاع واندعمت سيارته مكدر اوكف السيارة بسرعة رحت فتت بيه وبسيارته
على صوت الحادث الناس شي طلع من محله شي من بيتها كلها التمت واني اصطكيت بمكاني ..
رجال صار عصبي وهو يحاجيني ويريدني انزل .. لزمت راسي ما اريد احجي ويا اي احد اريد بس ابتعد حركت السيارة حتى ابتعد منهم .. اعترضوني الناس وناس كامت تضرب السيارة ويكولي : ولج كتلتي الزلمة وتريدين تشرديييين نزلي
سيارة شرطة مال السيطرة القريبة من المكان حضرت بسرعة والضابط كام يدك ع الجامة ويكولي انزلي .. قافلة البوب لعليه لا اتحرك ولا اتفاعل ويا اي شي
واباوع لعباس كدامي وجهه مكام ينشاف من الدم
ناس تكول مات وناس تكول بعده عايش
والشرطي يضرب ع الحامة بقوة يريدني انزل
لزمت تليفوني كلت لبابا : اني قريبة من البيت وسويت حادث والشرطة مطاوقتني
انطيته العنوان خلال دقايق سيارتين من الحمايات مال البيت وكفت وركضت للشرطة تتدخل .. طلعوا باجاتهم وحجه للضابط ان هذا زوجها وهي بنت فلان .. وتشغل منصب فلان ..
هم يحجون واني اباوع لعباس نقلوه بسيارة وشالوه للمستشفى كامت دموعي تجري .. اني شنو سويت
قتلت ابو ابني !
اني ما قتلته هو اعترضني
لا اني قتلته جان اكدر اتجاهله بس اني جانت عندي رغبة باذيته وقتلته
دموعي تجري واني بنص خبصة افكاري ..
والضابط مصر لو مهما كان منصب والدي ومكاني لازم يعتقلني وياخذني للسجن لان اتسببت بقتل انسان عمد بوضح النهار وكدام الناس .
كام رحمن الحماية مال ابويه ياشرلي ويدكلي ع الجامة : لا تخافين ست احنا يمج بس انزلي من السيارة .
رجعت شغلت السيارة .. كام يدك بقوة : لا تحرجين الوالد ست لتحاولين تتعدين على القانون انزلي وخلينا نحلها بدون لفت انظار مو بصالح الوالد هالموضوع ارجوج ست انزلي
- نزلت الجامة : مات ؟
- لا مامات
حجاها وبسرعة مد ايده وفتح باب السيارة وسحب ايدي
ردت اوكع من السيارة كد ما خاوية .. بسرعة لزمني ووكفني ..
واللي ابط يكول للشرطي اعتقلها
رحمن كاله : كتلك اني راح اتكفل وصولها للمركز ابعد شرطتك عنها
- المرة هذه كتلت بششششششرً
- البشر هذا زوجها وهو اللي كاعد يعترضها بكل مكان .. احترم المشاكل العائلية وابعد الشرطة احنا نتكفل بوصولها للمركز
- تحت مراقبة الشرطة
ما اهتمله وهو يكولي : ست الله يخليج اكفي لحيلج وساعدينا .
- مات ؟
- ما مات والله بس ساعدينا .. عثمان ساعدني نمشيها .. عججججججججل
سندوني ووصلوني للسيارة مال الحماية وهم اخذوا سيارتي ومشى لمركز الشرطة .. الشرطة تريدني ادخل وهم معرقلين دخولي لحد ما يجي المحامي ..
بس الضابط اصر فطلبوا مني انزل للمركز
مجنت استجيب لاوامرهم .. سحبني من ايدني ونزلني من السيارة ومشاني للمركز .. دخل بيه كدام غرفة ضابط التحقيق
طلب منه يطلع من الغرفة
طلع رحمن بقيت كاعدة .. واني افرك براسي
يسالني مدا اسمع هو شديسألني او ما اريد اسمع
ضايقني كلش واذاني بملحته .. كمت من عنده كام يصيح الحماية دخل الشرطة لزموه .. كام يكولهم : الست عندها ازمة نفسية وعذها تقارير كاملة عن حالتها النفسية
والضابط يكوله : المرضى النفسيين مكانهم الشماعية ما يلزموهم سيارات عاليه ويديحوهم بالشارع
كام الحمايا يتحاجى ويا الضابط ويكوله : احترم نفسك ما مسموحلك تطعن بيهاااااا اندمك على كلامك هذا والله .
طلب من الشرطة يعتقلون الحماية لتجاوزه ع الضابط ويعتقلوني ويخلوني بالسجن .. بس السجن جان بيه شباب .. فطلب منهم الضابط يحبسوني بالمخزن مال المركز .
جنت امشي وين ميجر ايدي الشرطي بدون اي اعتراض او تفاعل .. سد عليه الباب كعدت بالكاع .. كل البالي اني قتلت عباس
الانسان اللي حبيته سنين اني قتلته وشفت دمه بالكاع كدامي .. وجان جثة ليحرك ايد وليحرك رجل .. ووجهه مغطى بدم وينزف بقوة
هان عليه وعلى كلبي ووصلني مرحلة نفسي تنطيني بقتله .. اني قتلته اني شفته كدامي مقتول .
ساعة او اقل .. اجا الشرطي يطلعني
وبابا على باب المخزن .. محاولت اكوم راد يبادر الشرطي بابا سبقة وكومني : لتخافين بنتي اني يمج ماكو قوة ممكن تأذي شعرة من راسج واني موجود ..
حضنته وبجيت : بابا اني اريد اموووووت
-الموت لعدوينج بنيتي لا تحجين هالحجي انت واعية ومثقفة اذا متكومين لنفسج كومي لابنج ينتظرج
-بابا اني قتلت ابوه
-ما مات بنتي لا تأذين نفسح هو نال اليستحقه لتنقهرين
حجاها وهو يساعدني امشي
طلعت بكفالة .. وتوكل محامي بالقضية .
اخذوني للبيت .. وخابر الدكتور النفسي كتبله لستة علاجات لمضاد اكتئاب اخذهم حتى اكدر اسيطر على نفسي وما اذيها
بس رجعت انتكست حالتي
لكن هالمرة كان بكاء بلا توقف
جنت مكسورة من الداخل ابجي بحرگة
مر يوم واني بهالحال مدا اكدر ارتاح
ردت اطلع بابا منطي اوامر بعدم خروجي من البيت حتى لا اتسبب باذية لنفسي
فطلبت من الحماية يرافقني وياخذني للمستشفى البيها عباس ... وبالفعل هابر وعرف مكان عباس وين .. واخذني
لكن لما وصلت كانت مصيبة ..
امه لما سمعت بعباس مسوي حادث واني اللي ضاربته بسيارتي ورايدة اموته باقية ادك على راسها وتبجي ومتخربطة وناقليها للمستشفى .
عباس حالته خطرة وبالانعاش ..
محمد و علياء شي ويا عباس وشي ويا امهم ..
لما شافني محمد راد ياكلني .. ويصيح عليه بنص المستشفى .
رجعت علياء اجت وهجمت عليا تريد تضربني ولزمها الحارس .. من لزمها الحارس محمد تخبل شلون تلزم اختي كام يتعارك ويا الحارس
لزموا محمد والحارس واخذوهم لادارة المستشفى ونبهوا على علياء في حال حجت وتعاركت بالمستشفى راح يطردوها وممنوع تدخل المستشفى حتى لو عدها مريض
فكامت من بعيد تدعي عليه من كل كلبها وهي تبجي
وتكول : عساج لا ارتاحيتي اخوي وامي مكراح يمووووووتون من وراح بربوك ... كتلتي اهلي ملهم ما كفاج جاية تدفين هلى ناااااااارهم جاية تتشفين بحااااالهم
ابتعدت منها وهي تصيح .. مشيت منها للاستعلامات واكفة مرة جبيرة وهي تكولها : حبيبتي هالكلام مو هنا اكو مرضى وناس تعبانة امشي بنتي منا واكعدي يم مريضج امشييي
وهي دا تحجي طلعت جوزداني سحبت ٤ ورقات حمر وكلتلها : ارجوج اريد اشوف المريض
باوعتلي : كاميرات منا حبيبتي رجعيهم
سحبتهم : دخليني والج اكثر
- دخلي هنا وانتظريني
فتت من كدا الاستعلامات راحت هي دقايق ورجعتلي : تعالي وياي
اخذتني ودخلتني للانعاش : وينه مريضج ؟
-ما اعرف
-شو البجيبج
طلعت الفلوس انطت ظهرها للكاميرات وهي تكولي : منو منهم شوفي
مشيت ادور عباس بين المرضى .. شفته وكوا عرفته لان راسه مضمد ورجله رافعيها مكسورة .
مجرد ما اتقربت هو حس فتح عيونه خفيف
وكفت اباوعله .. هو يباوع بس مدا يكدر يحجي بس كام يون
تقربتله : هذا اقل شي تستاهله
لتعتقد اللعب بالنار سهل .. انت عرفتني من الاول اليأذيني شسوي بيه مع هذا انت مبطلت تطلع بطريقي .. هذا اقل شي تستاهله على قلة الوفاء على غدرك وهيانتك الي ويا اعز الناس
كام يون ويبجي وينطق باسمي بصعوبة
كام يكح ويحاول يكعد .. ركض الممرض وهو يكولي : اطلعي بسرعة ابسرعة راح يجي الطبيب وج اطلعيييييي
تركت المكان وطلعت من المكان كله خارج المستشفى
اني كمت ارفع بسعري واحاول استجمع نفسي محمد جان موجود .. ركضلي ودفعني
دفعته جانت قوية واني خاوية بسرعة انلطخت بالكاع .. وسارع هو ويسحب ايدي ويغلط ويكلي : ولح حق اخوي وامي لا ما اخذهم من عيونج ما ارتاح والله
كعدت بمكاني وكمت ابجي وهو يهدد ودفرني بطرف رجله ويصرخ عليه والناس ادخلت تكوله : ها ها يمعود مرة تتعدى على مرة كول يا الله .
ركضلي الحماية وهو يسحبه ويتلازم وياه والناس صارت بيناتهن ساعدني اكوم ونقلني للسيارة .
بقى قرابة اسبوعين بالمستشفى لحد ما طلع ..
بس امه ما طلعت جانت حالتها كلش صعبة ..
بابا قدملي فيزة سياحية وطلعت بس ممنوعة من السفر لان عندي قضية دعم عباس الشرطة رفعتها للقضاء .. حتى لو طلعت من كردستان هالموضوع راح يأثر على سجلي .. بملف العمل اللي ديمشي بيه لحتى استقر بالخارج .
بابا تواصل ويا عباس وطلب منه يتنازل عن القضية ..
عباس تنازل عن القضية بنفس اليوم .. بس مجان يدري بموضوع السفر
وصله خبر اني من الموظفين مال الشركة مال بابا المتواصل وياهم عله يسمع خبر عني .. وصلوله انو: الست فيان راح تنتقل للعمل والاستقرار بالمانيا .
هو هنا انجن ..
اجا للبيت وهو على عكازه ويصيح على باب البيت ي ما راح اقبل تسفر مرتي وتبعد ابني مني .. اني رايد احجي وياااااها خليها تطلع نحجي ويااااااااي ما اخليها تسافر والله
الحماية هددوه يبتعد بس مجان يسمع
وهو يبجي ابابنا ويصرخ بس حتى اسمعله .. بابا كال الهم : اتركوا مثل الكلب ينبح ع الباب لتهتموله .. وتقتربوله لان مريض وباي ضربة ممكن يوكع ويتاذى ونرجع لشبكة المشاكل اتركوه
بقيى مثل الطير المذبوح كدام بابنا يصرخ بكل صوته وهو يطلب بس يحجي ويايا .
جنت اصم اذني عن صوته وصياحه وبجيه
ومجنت مستعده انزل واسمعه ما اريد .. احس تعبت منه حتى لو شي بالكلب متأذي له .. نفسي بعد متريد .. جزعت اذيته .
كمل اجرائات السفر
وحضرت كلشي لحتى ابتعد منا واطلع خارج العراق
وهو كان اكثر الوقت مكابل بابنا خاف اطلع من البيت
عمامه هددوا يريدون الطفل .. وهو هدد بالعشاير والقانون في حال طلعت ويا ابني بطريقة غير قانونية .
بابا جان يتجاهل كل تهديداتهم ..
وحان رايدني بس اطلع من العراق حتى اطلع من جو الاذية الاني بيها .
يوم السفر جان يعرف بيه
حضرت جنطي وكلشي يخصني .. ونزلت سرب من الحمايات كان مرافقني حتى ميعترضني واطلع لهولير بدون مشاكل .
اول ما طلعت من البيت وشاف الحنط كال : ما راح اسمحلج لا تتوقعين راح اسمحلج .
وكفه السايق وكاله في حال تعرضتلها عدنا اوامر باذيتك ابتعد منا
وعباس يصرخ : وخرررر لك اريد احجي ويا مرتك
حجيت : جنت مرتك وعندك ومأمنتك بس ما حجيت شنو فايدة الحجي بعد ما عرفت كلشي بدون ما تحجيلي .. شنو فايدة الكلام بعد الخيانة شنو فائدة الاسف بعد الغدر
انت قبيح جدا .. جدا
لدرجة كنت بين اديك وراضية بوضعك وكل عيوبك ومجنت طالبة غير توفيلي بس وتبقالي .. وانت اختاريت تستغفلني والعب عليه ..
اصحى واعرفني زين اني مو غيد وابني مو مثل اولادها
اني فيان دلشاد .. وانت مو مستوايا ابد
- ولح والله مفتهمة غلط والله وكتبه ورساله والله اني ما جان عندي وياها شي اذا غلطت وقبلت تكعد وياي وهي بملابسها ماي عني اني عندي شي وياها والله مالي وياها شي وراس ابني وراس اولادي والحسين ودمه اني ما عندييييييي شي وياها
- كلامك وكل تبريرك مرفوض وانتهى وكته .. كان الاحدر تصارحني باول محاولة منها لو كنت صادق لكن انت مثلها .. ماكو فرق بينهم
- ولج مو اني الجنت اصيح واستريح حتى اطردهاااااا شكلج امج تفتر عليه وانت مريضة نفسية ومريضة شك حاولت المحلج هواي انت الي ما تفتهميييييين
- تركت الفهم الك
- ما تكدرين تسافرين
- جرب اذا اكدر لو لا
- ما راح اخليج والله والله ما اخليج اني ما رايد ابني بس اني رايدج يا بشر افتهيم والعباس ما عندي شي ما خذلتج والله
- راح اسافر عباس .. وماكو شي راح يمشي على كيفك
زمان اللي جنت امشي بكيفك انتهى .
حجيتها وتركت المكان وتوجهت للسيارة
وهو كام يصيح ويحاول يتعدى والحماية لازمي تحركت السيارة وهم قيدوه وسحبوه داخل حتى ما يتبعني ولمنعني .
جنت اسمع صراخه وصياحه اليطلع من نص گلبه رغم السيارة تبتعد .. جنت احاول اسد اذاني عن اذيته واكول اتذوق طعم العذاب اللي اني اتذوقته .
جان الطريق صعب وكل دقيقة تمر بسنة من الالم والعذاب .. وصلت مطار اربيل وموعد طيارتي بعد ٣ ساعات .. وعندي ترانزيت بقطر .. من قطر اصعد بطيارة اخرى لالمانيا .
جان گلبي كلش يؤلمني ..
اشعر وكأن كل جسمي مريض ومتأذي ..
محرد ما وصلت الكاونتررافقني ضابط كردي اخذ حوازي وجواز ابني .. ختمهم ورحعلي ورافقني لحد ما وصلني لباب الطيارة
صعدت الطيارة وادو مكعدت يمي بمقعد اطفال على الكرسي البصفي وملبسته احزمة الامان .. شرب مميته و بمحرد ما صعدت الطيارة هو نام ..
اخذت السماعات الكبار وخليتهم على اذاني واني اريد اسمع موسيقى تهدأ نفسي ..
من بين الاغاني وهي تشتتغل وحدة ورا اللخ ..
طلعت اغنية ( لا ترحلين ) انلجم گلبي بمجرد مسمعت موسيقى البداية مالتها
ردت ادورها وانذكرت كلمته وهو يكولي: هذه الاغنية اسمعها الج تشبهج رقيقة وراقية مثلج واحساسها ترف احسها تشبهج .. اعتبريها مني الج .
كمت اسمع كلماتها
لا ترحلين من بعدج يموت ورد الياسمين
... يا ما كلتي شلون انسى.. انسى لا مستحيل كل كياني بدمي انت وليلي من بعدك طويل تالي عفتيني بجروحي اهمس بأسمج يروحي ... ليش ؟
كلمات كلمات اسمعها واكأنه يحاجيني
كلبي كام يوجعني حيل .. بجيت بقوة .. واني احاول اقوي نفسي .
بنزلة الطيارة ابني كام يبجي بعدت الاغنية من راسي بعد ما عدتها فد ستالاف مرة .. حاولت العي نفسي بابني وما اضعف .
نزلنا بمطار الدوحة وكعدت بالانتظار ..
استخدمت هاتف من المطار وخابرت بابا لان كال من توصلين خابريني وطمنيني عنج .
فرد بسرعة كتله : اني بمطار الدوحة .. طمني عن الاخبار
- بخير كل الامور تمام
- عباس وعمامه كون سووا مشاكل بروحتنا
- لا لا اصلا من بعد روحتج فورا هو اجا اتصال وراح والحمد الله راح يلتهون عنا لحين متستقرين انت
- ليش صار شي
- امه توفت .
اخذت نفس واني اكول : انا لله وانا اليه راجعون
مع السلامة
مكدرت احجي بعد
شعرت وكأنما الدنيا ضاقت بيه واسودت بعيني رغم نهارها .
شنو شعوره هسه وفاة امه وهجرة مرته و ابنه ..
راح يتحمل .. شنو راح يصير بيه
ويصير هو ما فكر بيه من اذاني افكر بيه ليش
بس هو مكالي حتى ميأذيني
كذاب كلها تبريرات فارغة
بس عباس عمره ما برر بكل مشكلة تصير يتجاهل وميحاول يبرر ولا يحجي ويكول تصدكين تصدكين ما تصدكين شسويلج
هالمرة على غير عادة حاول بكل الطرق اسمعله
اقسم بكل المقدسات والاحباب هو بريء
هو بريء لو ديبرر ؟
ماكو مجرم يكول اني مجرم ولا اكو غلطان يعترف
لو ما جان مجرم ؟
اني ظالمته لو لا ؟
حرمته من ابنه يحقلي ؟
ما اعرف راح انجن ما بين عقلي وكلبي ومعاركي الداخلية اللي مدا تخليني ارتاح ابدا .
اي راحة راح اشوفها وحدي هناك ؟
وحدي اني وابني بنص ناس غربة لا اعرفهم وليعرفوني لا لغتي لا لهجتي لا اهلي لا ناسي غربة من صدك
راح ارتاح
اني جنت بنص بيتي وبلدي واهلي وناسي واحس بغربة ونفسي مريضة لان اشعر بغربة بوسطهم
شلون لو ابتعدت كليا
شلون راح اعيش وحدي
شلون لو اكتئبت مرة والشيطان نساني ابني وقتلت نفسي ساعتها شراح يصير ..
زين هسه هو بهالوقت شديسوي
اكيد ديبجي بحرگة وبألم .. هو محاول يأذيني مرة وحتى بقمة عصبيته من ياذيني بلا قصد يعتذر بنفس الوقت ويبوس راسي ما مرة هنت عليه رغم كلشي صار بيه .. تعرضت للاغتصاب واني على ذمته وانجرحت رجولته وكرامته واتحرع كل الحجي والكلام بس محاول يتخلى عني ابد .. هو حان يمي بكل اوقاتي الصعبة .. بس هو هان عليه .
هان لو لا ؟
كمت من مكاني ورحت استفسرت : العفو اقرب طيارك لبغداد متى ؟
- بعد ساعة ونص
- ممكن تحجزلي لو سمحت
- تأمرين يا ست
حجزلي وركبت بطيارة بغداد .. وطيارة المانيا بعد الها ساعتين انتظار وجنطي وكل مستلزماتي جانوا متجهين لالمانيا .
باقرب طيارة .. غيرت وجهتي ورجعت لمطار بغداد
من المطار اخذت تكسي على بيت عباس فورا ... دخلت الفرع منصوب جادر ..
جان دنيا ليل تقريبا ب١ بالليل
حجه السايق : هسه شنو ست ..
طلعت ١٠٠ دولار وكتله : اتمنى تتحملني
- على راحتج ست تامريني امر
بقيت اباوع قرابة النص ساعة صفت سيارة كوستر جبيرة ونزلوا منها ناس هواية .. نساء ورياحيل اعتقد كانوا يدفنون ورجعوا
لمحت عباس من بعيد اجا من ورا السيارة لابس دشداشة سوا وعليها غترة لافها على ركبته ونص وجهه ولازم العكازة ..
نزلت من السيارة واني شايلة ابني وشايلة جنطة ظهر .. تقربت ضوا الجادر صار عليه وكفت بمكاني واني اباوع لعباس ..
محمد شافني قبل عباس وندسه وهو يكله : هاي مو فيان
عباس اندار بسرعة شافني كدامه .. اجا بهمة اتجاهي
محجه ولا اي كلمة بس دفع العكازة من ايده واستند علينا وحضني اني وابنه باثنين اديه وكام يبجي من كل گلبه .
همست بأذنى ( مكدرت )
اهمس وهو يشد عليه وعلى ابني بحضنه ويبوس بينا ..
ناس قرابته كاموا يباوعون ويحاجوا : عباس جوا عباس
ابتعد وراد يدنك حتى يتناول العكاز لزمته ودنكت اخذت العكازة وحطيتها بأيده : هذه جيتي من مطار الدوحة مكدرت اسافر رجعت
- ادخلي هنا ناس عيب تعالي
- لا .. ما اكدر ادخل
- فيان محتاجج لا تعوفيني اني والله ما غلطت وياج والحسين ما غلطت
- ما اجيت اسمع تبرير رجعت اقلب الصفحة الاخيرة واملي بيها شروطي .
عقد حاجبه : شروطج ! هسه دفوتي سهلة بس تعاي
- لا ما اكدر .. لازم نروح لبيتي اني ما تكدر ادخل هنا .. وليكون بذهنك كل رجوعي الك سابقا كان بدون مقابل لكن هالمرة ما راح تكون بالمجان
- رايدة فلوس !
- لا
- شتريدين
- اروح لبيتي
واشرتله ع التكسي الواكفة
اندار لمحمد اشرله محمد افتهمه وكاله : روح ارتاح سهلة
حط ايده ورا ظهري وهو يمشيني للسيارة ويتكى على عكازته .. صعدني ورا وهو كعد كدام وطلب اناوله ادو
اخذه كام يشمشم بيه ويبوس بيه ويحضنه بقوة
رجعت لبيتي القديم اللي كعدت بيه بالبداية وتركته من اتزوجت
مفتاح الباب كان داخل وحدة من السندانات الكبار
اخذتهم وفتحت البيت
هو دخل يعرج على عكازته
البيت كان بارد .. فتحت التدفئة وهو يكولي : عوفي السبلت بس تعاليلي
رحت يمه اخذني بحضنه وهو يكولي : وحقج وحق كل نفس بيج وبابنا اني ما غدرتج يمكن جاريتها وجنت انهرها بالسر وجنت محترم وياها بالبداية من اختلفت عليها حركت عليه كلشي المحادثات اللي شفتيهم ما كاتبهم وروح محمد مو اني متراسل وياها ماخذة حسابي ماخذة تليفوني مورطتني بس مو اني الكاتبهن صح الصورة جانت بوكت نا انت نفسه ونايمة جوا جانت تصعد بالليل واحاول اتقبل لان هذه عادة امج متحتاط بلبسها والدليل انت مفد يوم حاسبتيها على لبسها بالبيت او نهرتيها انت وهي متعودين اني اجي افرض عليكم شتلبسون .. بالصورة ما جنت اعرف اللي بداخلها من بعدها عرفت .. جنت اثول نفسي اسوي روحي ما افتهم حتى لو تحاول تغريني وتتحارش .. بس جانت تحاول تصادقني وتفتح ويايا مواضيع عن صديقاتها وسوالف سخيفة اعترف غلطت واني اسولف واجاري مجنت متوقع تكلبج عليه ب كامت تضوج من اتعمد اتجاهل .. فتحاول تغيرج عليه حتى تأذيني .. ومن بعدها من ما شافت وجه رادت تفرق بيني وبينج حاولت ابعدها بس انت متمسكة بيها ما ردت ابنلج حقارة امج اني اعرف انت حسااسة وتدخلين ازمات نفسية بسبب هالامور ما اكلج اني ملاك غلطت وغلطت هواي بس ما غدرتج والله .
يحجي واني مخلية راسي على صدره يم راس ادوا اللي منومه هم على صدره .. همست : تسافر ؟
- شنوه ؟
شلت راسي واني اباوعله : شرطي الوحيد برجعتي تسافر
- وين ؟
- لالمانيا
- وشيوديني لالمانيا ؟
- انت كولي وانطيني قرارك اذا تسافر ويانا واذا لا .. مضطرة ارجع اسافر بدونك .
- ليش حتى نسافر
- حتى محد يتدخل بينا .. حتى ابنا بعيش ببيئة نظيفة حتى نصنع مستقبل اله والك والنا كلنا .. هنا كل الظروف المحيطة مدا تخلينا نعيش ..
ضل صافن بوجهي
امك توفت ومبقالك شي تتحجج تبقاله واذا اختاريت غيد واولادك من حقك لكن ايضا من حقي اسافر واعيش ببيئة سليمة واصنع مستقبل لأبني .
- اي مكان انتو بيه هو جنه بالنسبة اليه
يحجيها وهو يرجع راسي لصدره
ابتعدت بسرعة : يعني موافق
- اني اوافق على كلشي يرضيج وخليج اليه وما يبعدكم عني اني مالي غيركم بهالدنيا والله .
كام يبوس بيه وبراس ابنه
كلش فرحت .. وطرت من الفرحة هماتين
صعدنا بغرفتنا ونمنا جان حاطني على ايد وابنه على الايد الثانية شي مرة يبوسني ويرجع يبوس بادو .. جان كلش مشتاق النا .
خابرت بابا الصبح واستغرب
وكتله اني قررت افتح صفحة جديدة ونعيش اني وياه برا .. مهما يكن اني ما اريد الصار ويايا يتكرر ويا ابني ابني محتاج لام ولاب .. واحنا هماتين محتاجي
بابا اتقبل قرار ومحاول يعارضني وراد يباشر ينظم ملف سفر بطرق ملتوية لعباس .. بس عباس رفض كال : ما اريد اطلع بزود ابوج اني راح اطلع تهريب عن طريق تركيا بس انتظريني اطيب
من بعد شهرين سافرنا لتركيا ..
ومن تركيا اني طرت لالمانيا .. وهو عبر بالقارب لليونان .. من اليونان عبر لاوربا .. وبدل ميوصل المانيا انلزم بهولندا ..
فاضطر يسلم نفسه للسلطات الهولندية
كامت هولندا دزته لقمر اللاجئين .. كان وقتها هجرة قوية من العراقيين و السوريين لاوربا فجان طريق العبور سهل نوعا ما باسبوع وصل بس اللي ضايقني انو اني مقدمة على عمل بالمانيا .. وناوية حتى اشتري بيت بالمانيا هرب كلشي لما قدم لجوء بهولندا .
هولندا حولته لكامب خاص باللاجئين ..
اضطريت اجر بيت قريب على الحدود الهولندية الالمانية .. وانتقل هو من الكامب الى البيت .. وقدم الكيس مالته انو العراق بحالة حرب وهو تحت التهديد وتعرض لحادث راد يموت لهسبب قرر يسافر .. وابنه عنده متلازمة داون ورايد يعالجه هنا ..
فخلال ٨ اشهر هولندا انطته اقامة
من انطته اقامة هو لزم عقد عمل بهولندا وبلش شغل .. وطلب من عندي اكعد وقدم ملفي على انو زوجته وينضاف اسمي واسم ابني وناخذ اقامة على اسمه .
وبالفعل كم شهر كملت اوراقنا واستلمت اقامة هولندية
.. بنفس الشهر اللي استلمت بيه الاقامة حملت بطفلي الثاني وجان هالخبر من اسعد الاخبار على قلب عباس ..
عباس بهولند اشتغل بالسيارات وصارله وارد قوي .. فطلب مني اكعد بالبيت واترك الشغل اله واني قبلت لانو صعب عليه اشتغل واني حامل
هولندا كلش اهتمت بملف ادو لان مصاب بمتلازمة داو .. جان يحظى باهتمام بالغ ... ويتكفلون كل دراسته ومدارسه التأهيلية ورغم هو صغير كانوا ياخذوه سفرات ويلفون بيه حتى يتعايش مع المجتمع والمجتمع يتعايش وياه وميحس بنفسه غريب
صارت عندي بنتي ابلين وجان عباس حيل فرحان بيها لان اول مرة تصير عنده بنية ..
بعدنا بعز فرحتنا وساءت الامور لما عرفت بعباس قدم على لم شمل لاولاده من غيد لان حاس بتأنيب ضمير .. ولان هم اطفال وتحت السن القانوني شملهم قانون شافيز .. وشمل امهم
وحصلوا اقايم هولندية على جنسية عباس باعتبار هم قاصرين ويحتاجون امهم فاستلمت اقامة وطارت من بغداد مقيمة
جانت جيتها لغيد ويا وقت ولادتي تقريبا
تضايقت حيل وتعاركنا اني وياه .. لانو كل هالفترة احنا عايشين مرتاحين .. بس هو اقسملي انو ماله علاقة بيها ولا راح يتواصل وياها .
وبالفعل هذا اللي صار
بحيث من بعد ٧ اشهر لجيتها لهولندا هي اتزوجت واحد سوري وعاشت وياه واولادها وياها وعباس ما عارض كال من حقها تشوف حياتها مثل ما اني عايش حياتي واولادي الهم حرية الاختيار اذا خبوا يعيشون ويا امهم وزوجها السوري او يجون يعيشون وياي
وهم اختاروا امهم .
من بعد الاقامة ب٥ سنوات
اني وعباس وادو استلمنا الجناسي الهولندية وصرنا نملك الجواز العراقي والجواز الهولندي .
اعتبر قرار عيشتنا باوربا كان افضل قرار
لان واحنا بالعراق جان دوم يحس بنفسه نقص وانو هو اصغر مني بالحالة المادية .. بهولندا سقطت هذه الافكار لان الغني والفقير بمجتمعهم واحد خصوصا هو صار يشتغل وشغله خير من الله وسيارت وفلوس وبيت عنده فمكان يفكر هو اقل لو افضل .. عشنا بطريقة افضل
بكورونا ولان عباس كابلني وكعد من شغله وماكو لا روحه ولا سفر منا منا .. فبهذا الوقت اني حملت للمرة الثالثة وصار عدنا ابنا علي .. بفترة كورونا
جنت خايفة انطي فرصة ثانية واقلب صفحة
بس كان اصح قرار لانو عباس تغير لما وصل لاوربا بطل عصبية وتسرع وصار اهدأ وارزن .. وكلش اعتزينا بعائلتنا وبحبنا وكل طفل يصير يقوينا ويقوي عائلتنا ويكبرها
من بعد عمر من الخوف من انو اعيش وحدي .. ربي بدد هالمخاوف ورزقني بزوج محب وطيب ورزقني باولاد زيننوا حياتي حتى ادو احسه نعمة كلش كبيرة بحياتي لولاه ما فكرنا نعيش بالخارج ولا استقرينا هشكل .
بابا بعده عايش بالعراق بنفس النفوذ والهيمنة
كل فترة يجي زيارة باعتبار عنده جواز دبلوماسي كلما اشتاق النا طار واجا .. غير زياراتنا للعراق بالسنة مرتين بعطلة راس السنة وبالعطلة الصيفية .
كنت على شفا حفرة من انو انتقم وارمي بنفسي بالغربة وارمي عباس بظلمات الفراق واخليه يموت ويتعذ مثل ما سوا واثار لذاتي لكن تركت القرار لگلبي يقرر عني وانطي فرصة .. وكان القرار بمحلة
ماما من بعد سنوات سمعت من اخوية اللي بايطاليا انو هي تعاني من مرض السرطان ولليون هي تحت العلاج .. دعيتلها بالشفاء لكن ما غفرتلها اللي سوته بيه ابدا .
الان اني بخير
ومعي عائلتي عباس وداريان وايلين وعلي ..
ادركت ان الانسان لو ملك مال قارون بدون عائلة هو افقر الناس .. العائلة شي ميتعوض لا بااموال ولا بالمناصب .. الاستقرار الروحي اللي تنطكيته عائلتك ماكو ولا اي شيك بالدنيا ممكن تعوضه او تنطيكياه .
هذه كانت قصتي اللي قدمتها للست زينب حتى تكتبها وهي من معارفنا .. وانتظر ملفها يكمل حتى تنتقل يمنا بهولندا ونصير صديقات قريبات .. لانو اني ما املك صداقات كثير .. لكن زوجي يعرف زوجها واني اعرفها من زمان بسبب فترة كعدتي بكورونا تعرفت على قصصها ومن يومها فكرت انطيها قصتي تكتبها وتقروها .. وصارت
اتمنالكم حياة سعيدة مع احبابكم
قصتي للي حاب يستمتع او ياخذ عبرة اغلاطها
اعتذر منكم جدا اذا ازعجكم فد تصرف من تصرفاتي او ما ناسبكم .. لكن احنا بشر وما معصومين عن الغلط وكلنا نغلط بسبب ظرروف محيطة بينا
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
