رواية خطايا واجتثاث الفصل الثاني والثلاثون 32 بقلم نور البصري

ترى الخفاش مو بطران شاف الناس مو عدلين كام ينام مكلوبي ـــــــــــــــــــــــــღـــــــــــــــــــــــــــــــــ 

خليت إيدي فوك راسي مثل أسيرة حرب جان جسمي كله يرجف بخوف ما أريد أموت ياربي ما أريد أموت 

رغم الظلم والخذلان وهجران مـاجد الي بس جان أكو أمل صغير ينبض ببطني ​طفلي اللي جاي هو الوحيد اللي راح يعوضني عن كل الخسارات 

عيني على وجه بيبي ليش ربي ليش شمسوية؟ مو خطية بيبي راحت و أخذت ريحة جدي وياها.. 

وعمتي عبرت هي وبناتها وأبنها ظليت وحدي بلا أهل بلا رجل وبلا وطن يلمني بعد منو إلي يا ربي غير رحمتك

الله يشهد حسيت محتاجة بابا سـهيل محتاجة ذيچ الإيد اللي جانت تمسح على راسي الإيد اللي عاندتها وكسرتها بخطاياي وهسة بقت خطيتها تطاردني

وقتها حسيت أريد السند يحميني.. 

إيدي تتراجف و سنوني تصطك من الخوف آلام التقلصات من ورة ضيم الأجاني يومية هالآلام و الطفل بعده يقاوم يريد الحياة بزمن تقتل الحياة قبل الولادة وحدي بين هذولي 

رجع الضابط جان رتبة لابس زيتوني وعلى متنه ثلاث نجمات.. 

: هـا تردون تشردون خونة غوغائيين تنكرون فضل الريس القائد وتخونون الوطن ولج أنتِ منهو؟ شنو هاي الشردة وشكو وراج؟ أكيد أنتوا تنظيم الـ...

دفرني ببسطالة بفخذي صرخت وآني أرجف خوف وألم وخذلان.. 

: سيدي.. سيدي.. مخطوفة آني..

مدري شلون هيج حجيت و شلون أجتي هالفكرة معرف ولو هم هسة على أساس عود حيصدكوني هة.. 

رجعت أحاول أثبت بالكلام وأكرر ولو  بخوف بس المهم أصر على كلامي..

: لا سيدي لا آني جنت مخطوفة حتى جدتي خطفوها وياي.. 

معرف شلون رتبتها لكز كصتي بطرف سلاحه.. 

: يله كومي.. من هِينا..

مبين ما مصدك صخام ميصدك حموت هنا وتاكلني الذيابة مدري وحوش البر

على كيف كمت مكدرت رجعت على ركبي صاح بيه 

: يله كومي! من هِينا..

: سيدي سيدي بس خلي أوضحلك..!  مخطوفة و آني بنت واحد معروف يشتغل ب..... 

بعدني مكملت أجاني راشدي بوجهي أنسطرت.. 

: اااخ.. 

جرني من شعري يوكفني من الخوف كمبصت خدرن رجليه.. 

صرخ بيه : كومي.. 

و أشـر للعسكري.. 

: فتّشها وبدقة! لا تخلّي شي يفوّت عيونك.. 

تردد العسكري وهو ظل بمكانه وگفت خايفة منهم وجسمي كله يرجف من عيونه جانت مثل الصقر تخترقني وتدور بيه ثغرة جان صوته مو بس حجي جان رعد يزلزل الكاع جوه رجليه 

جان يحجي بلهجة أهل ••••• نفس لهجة سيادة ريسنا ذيج القوية الحادة ​باوعتله وهو يگول للحرس بنبرة الآمر اللي ما يتثنى أمره:

: ​ولك شبيك ما تنفذ الأمر؟ يله فتّشها وبساع أريد أشوف شتهرب و شنهو ضامّة وياها يله كل ورقة ضامتها هساع تطلع هين گدامي لا تخلّي شي يفوتك هذولي خونة تنكروا لفضل الوطن و لفضل الريّس.. 

أشّر على المهربجية المطروحين بدمهم وهم جثث بلعت ريگي وصوته يدوي بأذاني التفت علي وضحك ضحكة ناشفة خوفتني أكثر من صياحه وگال:

: ولچ إنتِ منهو؟ شنهو وراچ؟ شاردة هين؟ إنتِ تابعة لتنظيم الـ...؟ والله وتالله اللي يخون الأمانة ويغدر بالبلد ماله غير السيف هِيّنا نجزه وننحره جبالي.. 

​حسيت الدنيا ضاگت بيه و الحرس تقربوا مني وأني أفكر بالورقة اللي ضامتها بصدري توصية للجهة الي أعبرلها من العقيد المتعاون ويانه هو جان ضمن بابا سـهيل وجدو بتهريب المظلومين معقولة راح يلكوها؟معقولة هاي نهايتي بهالمكان؟ ونهاية إنسان  راد يساعدني هم آخذ خطايا دمه بركبتي..

: سيدي شلون أفتشها حرام..

النقيب : آني أعلمك شنهو حرام؟ ولك أنت َ تبعي الـ... (تذكر أسم التنظيم) خاين والله وتالله لأربيك.. 

رفع مسدسه وعدمه بمكانه وباوع لملازم نجمتين وكله..

: قيدو سبب الوفاة خاين وما قام بواجباته و يساعد المتسللين يعبرون الديرة ويساعد المطلوبين للقانون بالهروب.. 

ظل الملازم عيونه تحجي خوف ضرب تحية وراح يهرول.. 

: صار سيدي.. 

: أنت شفتو بعينك؟ أنت شاهد ترى والشهادة هِيّنا واجب وطني..

​: أي نعم شفته! حتى جان يريد يهرب هاي الخائنة  عميل وخائن سيدي..

​صحت بوجع والقهر ياكل بگلبي..

: لا.. كذابين! يمتى؟

​ما حسيت إلا وإيده الثقيلة نزلت على راسي كفخة خلت الدنيا تظلم بعيني وصاح بصوت يرج المكان:

: أنثبري ولج صوتج ما يعلى هِينا هسّاع تبين الحقيقة كلها يله كومي.. 

مشيت كدامة رافعة إيدي لفوك عبالك أسيرة حرب هنا تذكرت كل الأحداث والضحايا بقصتي وأجت بعقلي هيج فكرة.. 

كل الشعب أسرى حرب مع الحكومة 

أسرى بقلوبنا الموجوعة والصامتة الخائفة أسرى بدواخلنا بأجسادنا الي تساوم أسرى بأنفسنا و حتى الغيرة صارت أسيرة بقفص ومقيدة أحنا شعب على مر الأجيال والعصور أسرى لحكوماتنا بلا إرادة أحنا مسيرون غير مخيرون واللي يتجاوز النظام مصيرة موت أو يخسر شرفه..

رديت للواقع وآني ألتفت لبيبي دمعتي نزلت من شفتها تلفتت حولي ودموعي تحچي الخوف اللي بگلبي.. 

: وبيبي.. هناك بقت..دفعني كدامة بعد ما فتش جنطتي وغراضي حمدت الله ما فتش جسمي ركبت سيارة بيكب دبل قمارة مشت مسافة ساعة وصلنه سيطرة هناك تحفظوا علي و تحقيق منو أنتِ و شسوين على الحدود و ذكروا أسماء ما أعرفهم 

ويردون أدليهم.. 

: عمو والله ما أعرف! آني مخطوفة وبيبي وياي أنخطفت يردون يبيعونه للعدو ما أعرف شيردون بس هم من عرفوني بنت لؤي... ال.... هنا خطفوني وكالو نحرك گلب أبوج عليج وعلى أمه.. 

باوعلي وذكر رتبه لـؤي.. العاليه وياها أسمه 

: ولج أنتِ منين تعرفين لؤي؟ 

: أبـوي.. 

ظل محتار بين يصدك أدعائي و بين لا

بس حسيتة متوتر حتى كال.. 

: أنتِ تعرفين لزوم التحقيق وآني جاي أقوم بواجبي الوطني الوطن أغلى من الكل وما بي مجال للعواطف هين القانون فوگ الجميع.. 

​التفت على واحد من عساكره وصاح بي بصوت يرج القاعة.. 

: ولك ترحون هسّاع تسحبون جثة الحجية وتجيبوها هِيّنا لبين ما نتأكد من هوية هاي البنت والجثة.. 

: مو شفتم أوراقي الجنسية وكل الأوراق تثبت آني منو؟! 

: الأوراق ممكن تشابه ممكن تزوير محترف هسّاع نتصل بالأمن ونتأكد من سيادة ال •••• لؤي.. 

ظليت كاعدة بمكاني و أشر للمنتسب يأخذني بغرفة يتحفظ علي لبين ما يتأكدون أوراقي سليمة ومن المعني أبوي فعلاً  دخلني بغرفة وحدي 

تلفتت وتظاهرت بالهدوء نزلت راسي بين ركبي بساع طلعت الورقة حطيتها بحلگي وصرت ألوچها وأمضغها بقوة معرف شمكتوب بيها بس صوت الباب فززني غصيت بيها وبلعتها 

وآني أكح مختنگة شفت ترمز صبيت وشربت گلاص ورى گلاص من الخوف حتى الورق أكلناه هذا زمنا اللي هسة تتحسفون عليه.. 

آني وجثة بيبي تم نقلنا بسيارة لمكان ثاني بناحية حدودية وظليت هناك

وراها إسعاف أجت أخذت جثة بيبي اللي رافقتني بالتنقلات

ظليت يومين لا أحد يسألني ولا يحقق وراي تأكدوا من أوراقي الرسمية الي عندي صحيحة غير مزورة وراها محد فك حلكه وياي كم يوم بقيت هنا

الملل بالمكان ما اوصفه الكم و الوقت حسيته توقف وصار طويل لمن ما بيوم بالليل  أجوا أشخاص وقعوا على أستلامي وكف واحد منهم كبالي 

: يـله..

: منو أنت؟ ما أروح وياك عوفوني  أطلع 

رجعت باوعت على النقيب الي جان سبب قتل جدتي و من وراه آني هنا..

: سيدي ما أروح وياهم..  

وگفت كباله وجسمي صار كتلة مال أعصاب و توتر جان يباوعلي بنظرة ما تنقري ونبرة صوته صارت أهدأ بس أخطر كأنه ديحضرلي الصدمة الجبيرة

​نطق الكلمات وحدة وحدة وهو يفر  بيد وإيده الثانية ساندها على الميز

: أجتنا بلاغية هسّاع من جهات عليا وقررنا نسلمج الهم أنتِ تدعين إنّج  وحبّوبتج كنتن مخطوفات مو بالله؟ 

​ضحك ضحكة أستهزاء ورجع كمل وهو يوجه كلامه للحرس:

: سلموها للجهات اللي طلبتها خل يشوفون سالفة هذا الأدعاء عبالهم السوالف تعبر علينا وعلى الدولة يالله أخذوها من هِينا وبساع! 

​حسيت الدنيا أنطبقت على صدري جثة جدتي بجهة محفوظة بثلاجة المستشفى مال الناحية ما أعرف أذا سلموها للؤي.. لو لا وتم تسليمي لهذول باوعتله وبعيوني ألف سؤال بس هو دار وجهه وعافني وية الحرس اللي سحبوني من إيديه وقيدوني أقوى..

ورجع باوعلي بشك وضحك ديوصل رساله طلعت بنت لـؤي.. مشكوك بتوجهها بس ما راد يفتحله باب سكت و طلع من جرار ملف شكبره.. 

: هاذ ملف التحقيقات ويا الجماعة اللي مسكناهم وأعترافاتهم دز الملف للأستاذ لـؤي.. حصراً تسلّمو أياه بالأيد

​حچاها وضحك عبالك مسوي فضل على لـؤي.. تستر على بنته الي هي آني بنت لؤي عميلة وهذا عود ستر على لـؤي وأكيد كاعد ينتظر مكافأته باوع علي بعيون حادة.. 

: أخذنا أعترافاتهم بأساليبنا.. 

مد إيده العسكري للي أجو يستلمون من هيئتهم شكيت بيهم أمن ومخابرات وكفت و داخلي أرجف ولويات ببطني أتعجب هالطفل شلون ديقاوم و ديعيش رغم المعاناة.. 

خفت منهم وين حيودوني مصيري شنو هواي بنات أخذوهم الأمن ومحد يعرف شنو نهايتهم.. 

ركبت بالسيارة الطريق تقريباً فوك الساعتين بس ما دخلنا للمدينة باوع السايق للي كاعد بصفي و حجه.. 

: عصب عيونها حندخل المكان.. 

من لزمني أخذتني رجفة رهبة وخوف ونبضي زاد.. 

: وين موديني أسمعوا لـؤي هو أبوي وهو يشتغل بالأمن يعني جبيركم هو دزكم مو؟ 

ماكو جواب بس عيوني أنشدت وإيدي تقيدت الظلمة كامت تخنگني و أحس السيارة تدگ بطسات ومطبات حيل كبيرة عرفت إحنا بطريق متعرج وعر  مو مبلط.. 

يمكن ساعة وشوية توقفت السيارة نزلوني و دخلوني مكان أذكر ريحه المكان خليط من العلف فضلات روث مدري وين دخلوني وأنقفل باب

لحظات رهبة وخوف صحت بيهم 

: آني وين؟  

بس ماكو جواب المكان بارد و كاعدة بمكان أرضيته تراب ضايقني صوت  أي صوت صخام خفت ولج ماما هاي عكاريك ضفادع.. 

: وين آني.. 

صحت

: لـؤي.. طلعني لـؤي.. وين دفنتني..

بقيت يوم بدون أكل ولا مي حلكي ميبس وحسيت أنفتح صوت سركي

تلفتت بعتمتي وآني أدور بوجهي أعرف ما أشوف بس أحاول أتصنت للآصوات متأكدة سمعت صوته

: فتحو عيونها و إيديها وخلي تزغنب لا تموت تجيف علينا.. 

: صار سيدي..إ

يدي أنفتحت و العصابة أنزالت المكان شبه مظلم بس تتميز الغراض البي شلون مخزن زراعي لأسمدة أكياس من أسمدة الطبيعية روث ومشكاة و مناجل أدوات.. 

بدت عيوني تتأقلم فتحول المكان لمضيء الظاهر جانت عيوني بسبب العصابه وفقدان الضوء تخيلت أول المكان شبه مظلم توضحت الرؤية أكثر.. وهو يأشر لجماعته

: فرغوا الغرفة من كل الأدوات الحادة.. 

وبده شغلهم وآني بس أباوع رجع تلفت ناحيتي.. 

: تردين تهربين؟ ماتت أمي! تعترفين غصباً ما عليج شلون وصلتوا للخونة الحرامية المعدان المهربجية؟

ظل يشتم وهو فاقد أعصابه وآني بس أباوع عليه بجمود لحد ما رفسني.. 

: ولج أحچي منو اللي ساعدكم أوكفي لحظة حـارث.. مـاجد.. منو توسطله؟ منوو آني شاك بواحد خاين بس خلي أتأكد ولله إلا الحكه بسـهيل.. 

خفت لا هم يأذي الرجل.. 

: منو هرب مـاجد؟ و حـارث.. 

رجع يزأر بصرخة غضب تشبه زئير وحش مفترس

: شلون جهاز؟ قوي ومن جواكم تهرب ناس مطلوبة.. 

ظل يشوت برجله أكياس السماد والغبار والريحة الخانقة بدت تتناثر بكل مكان أختنگت وكمت أسعل بقوة وبدال ما يرحمني لزمني من شعري وسحلني وخلا راسي بداخل كيس من أقراص الروث.. 

: أعترفي منو العنصر اللي بالحكومة ساعدكم؟ ما دام هرب مـاجد الخاين وأخوج الـ**** وديهربكم وديتفق وي مهربجية يعرفهم يعني هنا الخطر شخص منا وبينا ديخون البلد و الدولة

أريد أتنفس ما أكدر أشامر بيدي أدور على هوى مديت إيدي مجلبة برجليه أجر بملابسه بتوسل بس وخر راسي من الكيس.. 

: أحــجي.. 

: ما أعرف.. 

ضربني.. 

: متلطف بيج بس لأن سيد حامد.. رايدج زوجة سرية بس تولدين ومصالحي تحتم أتحمل عنادج 

ثقي أتخلى عن المصالح أقتلج و أطلع أبن الزنا الي بطنج بضربة مني فأعترفي.. 

: ما أعرف بيبي ماتت وسر الشخص يمها والله معرفه منو؟ 

ضربني و أيس  مني صاح بيهم.. 

: تنطوها ربع وجبة باليوم والمي ملوث.. 

آني مشمئزة ريحتي وجهي الملوث بالروث اليابس 

أحس غبار جيفه الروث التصقت بيه 

أشهك و أبجي أتوسله.. 

: عوفني خليني أغادر الوطن وبعد وجهي ما تشوفه بس طلعني منا  المكان هذا يخوف.. 

  

جوابه رفسني برجله وطلع سحبوا كل الغراض وفرغوا المكان والباب أنقفل 

       

         

    مـــــــــــــــــــــღــــــــــــــريم 

أمي وضعها تحسن شوي بس هو هذا المرض وهيج طبعه الجرعة نوبات تهد حيلها وما تتحملها ونوبات ترد عافيتها يوم يومين بس رغم هذا التحسن تظل عيننا عليها وما نتركها لأن عظامها رگيگة وتحتاج عناية و مداراة وحذر بكل خطوة.. 

خالتي بعدها باقية يم أمي رغم رجلها يخابر ليل نهار ويرزل بيها كافي عاد رجعي لبيتج اختج يمها بنتها مقصرة 

أذكر رحت أشوف أمي لكيتها فشلانة وهي تحاجي خالتي.. 

: خية أم شـيلان.. كفيتي ووفيتي وما قصرتي بس يا بعد عيني هذا حالي وهذا وضعي هي أيام معدودة وأغادركم يا خية روحي سافري لبيتج و لرجلج أوجب مني.. 

: لا والله خية ما أعوفج شوفي يا بعد عيني كومي على حيلج وخليج قوية و مريم بنيتنا وما تقصر لوما دراستها وأبنها صعب تجيبه هنا و أنتِ تعرفين اللي يآخذ كيمياوي وإشعاع الطبيب يوصي لا يتقرب طفل مدامه توه ضارب هاي الامور وأكيد أنتِ فاهمة وعارفة أبن مـريم.. طفل خطية.. 

ردت أمي.. 

: أي والله لو ما وليدها بنيتي تداريني و لا ادولبنج وادوهنج بالسفر من الشمال لهنا

سلمت و أبني على أيدي أمي أشرت ورزلتني

: طلعي الطفل يمة.. 

ضجت من خالتي شلون هيج تحجي 

اصلا سائلين الطبيب كال الكيمياوي ميضر الطفل ولا اي شخص بس الإشعاع إذا احتوى يود مشع وأما الكيمياوي حذر أول يومين أو ثلاث أيام من جرعة التعرق او سوائل الجسم... 

: والله الطبيب كال شي أصلا السالفة كلها نظافة تعقيم بعد التواليت وإذا صار تقيؤ حشاكم يتنظف بكفوف ماكو أي خوف لا على طفل ولا على كبير 

أصلا الخوف منكم على مريض السرطان الماخذ كيمياوي لأن مناعته ضعيفة أي عدوة يأخذها.. 

سكتت خالتي وحسيت زعلت من صوتي جان عالي عليها والله أجت تعنت واجب عليها أختها وآني لو يقبل نصير.. ولا اتردد بس العندي ما يثق بنوري وعون بباله عون يسمع بيه هنا ويجي وهو يغار.. 

ظليت يومية أجي لأمي مدام نـصير الله هداه شرط أول يجيك عـون.. مو هنا ونوري طالع.. 

صراحه كلام خالتي تحسست منه بحجةالطفل يجوز هي تضايقت وما رجلها يلح ترجع ورادت منفذ ترجع

عاد بيوم جان جمعة وعطلة وصلني نـصير.. سامع نوري ملتهي بالكهاوي ويدور طلايب وي العالم وهم يشرد لا أحد يوصيه على أدوية لأمي تكفل بيهن نـصير.. خطية العلاجات غالية كولش وضع البلد ميساعد وكوة نحصل علاجها.. 

تقيأت أمي ورفعت راسي لكيت خالتي واكفة متردده بحيرة وتردد اعرف خرافات العالم تتصور مرض السرطان معدي ويتجبجبون منه.. 

: ها خية انطيج هار الوصلة تمسحين التقيء.. 

وآني تخبلت لعد المن باقية آذا أمي تنظف القيء ردت أمي.. 

:لا آني اكوم هم أريد أسبح اتعطر تعرفيني خية نظيفة وما أحب تطلع بيه ريحة..

دمعت عيني ودخلت هنا انهديت بخالتي..

: أكولج خالة ترى أمي زينه ولله صارت وأنتِ هم رجلج كل شوي خابرنا تعاي وتعاي عليمن عشتو سافري ترى وجودج مثل عدمة.. 

آني لاحظت التواليت أمي تزحف زحوف تروح المي هي تجيبه القيء تغسلة صار عدها إسهال أمس لكيت أمي تغسل شغلاتها لعد المن باقية زيادة حمل روحي خاله وتوكلي بالله وأنعم الله ما قصرتي وجزاج الله خير والله يدفع عنج كل مرض و ابتلاء.. 

هو آني هيج حجيت وهي انهدت بيه 

: يا ما تستحين يا طاحية حظ هاي جزاتي عفت بيتي ورجلي ومصالحنا وحلالنا وأجيت تالي اخت المطرودة

حجتها وتصيح علي وانهدت طكتني.

ما حجيت بعد وجه أمي أصفر صار ليمونة وبجت وظلت تدك على وجهها

: ربي موتني لا تخليني بيد بشر يتمنن علي ربي لا تكرمني خليني بحيلي اموت.. 

ركضت لأمي سندتها

: عمرج طويل يمة ان شاء الله تنتصري عالمرض يمة المرض مو الج

والله مقصدي المح على خالتي قصدي هيج مجرد كلمة 

خالتي سمعت هيج بلكنه عربيتها المكسرة نزلت فشاير وسب وسبت أبوي الميت وشتمته بكبره 

: خالة ما اسمحلج.. 

بس هاي رديتها هي خلت ولمت ملابسها وراحت بيت بتها و مناك تسافر و أمي تعتب.. 

: يمة هي هذا لسانها بس گلبها أبيض جان ماراددتيها

: يا لسانها يمة دخيل بختج غير تتجبجب تلزمج تخاف تنعدي مدري شني خلي تولي المن باقيه زيادة عدد و مسواك أكلها يفيدج ادوية..

سكتت أمي بس ما بطلت بچي على هاي الدنيا التخلي مريض يحتاج بشر و معين عاد سبحتها بيدي وعطرتها وآني اندعي يهديلي نـصير بس مبارك بالنهار اداري أمي 

 

سويتلها اكل شوربة شوي سوائل كالو ونضفت مكانها وعطرت غرفتها وجبت سطلة وخليت اربع أكياس كيس بطن كيس بالسطلة 

: يمة من تردين تتقيئي أنتِ رچيچة عظامج ما تلحكين ترحين للحمام  فتتقيأي على روحج هنا سطل جوة إيدج.. 

مدت أيدها لزمت أيدي تريد تبوسها هذا مشهد حيل أثر بيه وخرت أيدي 

: أستغفر الله واجبي يمة لا تذلين روحج لبشر الله موجود يمة يعد گليبي وكل عافيتي بي ولا بيج المرض 

خلت أيدها على حلگي.. 

: اسم الله مريم.. اسم الله حبيبة يمة المثلي بمرضها تنذل وتتوسل العالم لا يعوفوها بحيدها.. 

دمعت عيني هاي أمي هيج منذلة أكيد وي نوري.. وخالتي وحتى عـون.. تتوسلهم العطف والحنان وفلوس العلاج و لا تعوفوني تكلهم تخاف تنمل وتنشمر.. 

: مدام أشم الهوا معاش اليذل ام مريم

مددتها انطيتها علاجها نامت وغطيتها طفيت الضوة وطلعت للصالة وآني أفكر اقنع نصير أخذ أمي عندي بالايام اللي تضرب جرعة بلكت الله يهديه  هو صاير زين وياي و وي أمي بس يتضايق من نوري وعون خاف بحجتها يجونه لبيتهزعاد للمغرب اجه علي..

: تغديتو عمتي شلونها ..

: نايمة خطية أي سويتلها شوربة و اخذت العلاج.. 

: خالتج تغدت جبتلها وياي مسواك مال أسبوع.. 

: لا تنزل المسواك خالتي راحت خابرولها زوجها رجله منكسر وكتلها روحي آني موجودة هم ما أريد العالم تكول عافت أمها على خالتها

أكلك حبيبي خلي نأخذ أمي هي الجرعة أسبوع أعراضها وترجع طبيعية بفترة الجرعة ناخذها فد أسبوع عفية ليش بمنةالعالم وكله بثواب أهلك.. 

هز راسه يفكر.. 

: اوكي.. 

(قبل ميختصرها اوك ولا وك ) 

راح للكلدور مال بيت أمي وخابر.. 

: شلونك أبو صالح شخبارك أي والله إحنا بخير أكلك خوية شنو أخبار الكعده ها خوش واعذرني والله ما فارغ أجي وي الزلم مشكور خوية أي والله زين نوري و عون أكيد وياكم أي عرفته ههههههه أي والله على كولتك معروف هذا ما يفوت كعدات عشاير هو بالنص يردح هههههه لا والله بس بلا امر عليك صيحه أريد استأذنه بشغلة

باوعلي نـصير.. وابتسم وجرني قريب منه عض خدي وهمس

: كله لخاطرج والا ما اتورط وي نوري بشي يخصه.. 

همست وآني أبوس شفايفة حيل.. 

وأمي تخصني أكثر مما تخصه

همس بأذني 

: ذبت بالبوسة ذبت.. 

شوي أشرلي بأصبعه على شفته اااش

يمكن نوري.. أجه للتلفون.. 

: هلا  ابو عـون.. شخبارك تمام كلنا بخير أكول راح أخذ أم مريم.. خالتها رجلها مكسور ورجعت للشمال والمرة تحتاج مدارهو و مريم.. متكدرتعوف بيت لذا ناخذها يمنا كلما تضرب جرعة وأنت لا تكلف روحك وتجي آني متكفل العلاج والأدوية أنت خليك مرتاح.. 

ردت أضحك انطاها ياه بالكصة لتجي هههه شوي نهه مكالمه باوعلي حضني و ضحك

: رادها من الله بس حتى ميرجع للبيت يكول وراي سفر للوسط طلابة ورايح وي صاحبي فزاع 

ضحك

:  قصدك رايح يكرف فلوس الله لا رده..

باوعلي وكال..

: عمتي نايمة وحرام نكعدها تعاي أذكر غرفتج قبل زواجنا مناك دتعاي شلون ذبت بيها اللوتية.. 

ضحكت و كتله.. 

: مو ياسر.. وحده.. 

: يلعب هنا عوفيه... 

أخذنا الوقت و نمنا مكعدت الا على الباب انفتح وظل رجال وسعت عيني بخوف وصرخة فززت نـصير.. اليجر الجرجف علينا جان عـون.. عيونه الخضرة الحشيشية تجدح غضب 

كولش تفشلت هو وجهه تغير واصفر

وخلا و طلع من البيت كلة بس ركع البيبان بكل قوته..

هذا شجابه اليوم حظي ميجي يوميه لو جابه حظي باليوم اللي نصير بقى 

النوب شلون جفت زين شلون طب أكيد بيت أبوه وعنده مفتاح.. 

باوعت لنصير.. بدل ما يغضب شو أبتسم وضحك مدري شنو هاي اللعبة شو شكيت.. 

: شعجب ما كتلي هذا شجابه هذا متعود يلتقي بيج ومن هذا الخريط مالك والتشكك.. 

كام وأخذ ملابسة المتطشرة بالكاع.

و طلع كما خلقتي للحمام الي جوة درج بالهول يتلفت خاف أمي كامت وتشوفه 

شوي طلع سابح مرتاح وآني بحيرتي رجعت دون غسل على ملابسي.. 

: ما تسبحين يا حلوة.. 

بغضب خزرته.. 

: خبيث أنت ما تخجل أكيد مرتبها وبطريقة خليته يجي حتى يشوفنا هيح ولك عيب ما خجلت همزين آني لابسة ملابس.. 

: غير آني كتلج لبسي لا تبردين.. 

: حتى هاي مخططها.. 

ضحك.. 

: خلي يبطل منج بعدج بنفسه وما متهني بحياتي وياج مشاكل و أمراض وموت و نفسه هاي مدولبتنا أي تركت الابواب مفتوحة ودزيت خبر بيد شخص يجي لبيت أبوه مرت أبوه مواته.. 

: أسم الله صدك كذب مفاول على أمي حتى تقهر عـون.. وتشوفه آني وياك بغرفة وجرباية لا ممقبولة منك هاي وعيب.. 

زعلت و رحت أشوف أمي اللي كاعدة تلعب أبني يركض يجيب الطوبة لجربايتها ويضحك وهي تشمرها للباب ويرجع يركض يجيبهة ألها 

: شلونج هسة يمة.. 

: الحمد لله على كل حال شلونك عمة نصير.. من يمتى هنا. 

حجت بتوتر أكيد عـون.. قبل ليجفت النا شاف أمي وكلتلة مريم.. يمي وآني مبيه شي منيلك الخبر هذا فأجاني للغرفة يستفهم وشاف الشافه بلغت أمي تجي ويانا.. 

و طبعاً شـيلان.. خابرت بس نـصير.. و امي وهي تعاركني طاردين أمها 

كتلها بعدين اخابر من أوصل بيتي طالعين ردت

: لو تخابرين اسده بوجهج ميسوالكم افضال طاح حظج تتجاوزين لسانج طويل على أمي اللي أجت طريق شطوله تاليتها تنطرد. 

: حبوبة اخابرج بعدين.. 

بس وصلنا نـصير.. كال عندي شغل بمكتبي لازم أروح.. 

خلا وراح دخلت أمي ورتبتلها غرفة ومكان ونومتها هنا ترتاح آحسن من بيتها

طلعت اخابر على شيلان ترفعة تسمع صوتي تسده شو خايبة ولي يطبج طوب شنهاي عايزتج أنتِ وخالتي تزعلن زعلة جلاب ممسوية غلط. 

ثاني يوم دوام كالعادة نصير.. يأخذ ياسر يمه بس هسة عدنا أمي كالت زين اليوم روحي يمة هو أخذ علاج أنام لمن ترجعين اكعد.. 

بوستها وخليت يمها ترمز مي زغير وكلاص والعلاجات على ايديها ردت أخذ إجازة كم يوم بس اليوم تمشي وحدها تكدر توصل تواليت..

أول ما وصلت الجامعة رحت للزراعة ودورت شيلان كاعدة بكشك تبلع لفات المفجوعه ام الطلايب شلون تغلط علي هي وحجابها ونظاراتها الشمسيه و تاكل متشبع وكفت كبالها زين محد يمها.. 

: هلو.. 

رفعت راس ونزلت النضارة من على راسها لعيونها وبكردي ردت 

: لا هلا.. 

: همزين أعرف الكردية مو كلش غبية وما أفهم لغتكم نسيتي أمي كردية

: لا ولو شلون أنسى ليش غير أمج هي خالتي المريضة اللي أمي سحلت روحها من الشمال تداري أختها و النتيجة انطردت صدك انتم ميسوالكم خير

: شوفي احترمي نفسج أمج شسوت ها مو آني اجيك وضع أمي شو كاعدة وتحوك جايبة وياها العدة مال حياكه 

أمي تسحل بروحها تطبخ تخلي بحلك أمج 

غير الديون من محلات أمج ولا عبالك حصار معلمة لازم الريوك منوع بيض واجبان مو نوع واحد أمي تتقيء وحدها تنظف مكانها بدل ما ترتبلها سطل للنظافة يعني 

بس بعد هي طفرة بس أمي يجوز نضيفة بخواتها هواي أمور شفت أمج المن باقية بس تعب على أمي تخدم وامج جاي جية خطار متطلب كوتلها رجلج  هواي يلح ترجعين روحي لا تتقيدي بينا وتشكرت منها وماتجاوزت الا لمن كتلتني وتغلط وتفشر وسبت أبوي الشهيد. 

: يمة الكذب أمي كالت هاي مريم.. تستاهل نصير.. المدولبها طلعت هي ما تنعسن ولا تنجرع يمة يمة عيالها ماتو خلصو منها بت اختي واعرفها طلعت هي التعيل بالعالم وتكول مظلومة 

حبوبة بعد لا أعرفج لا تعرفيني أمي ولج تنطرد أمي اللي دمعتها بعينها على خيتها لو بني آدم ما يجي بعينه شي روحي روحي لهنا وبعد انتهت وياكم وبعد لو تموتون لو شما يصير لاتتصلين وتعالو وين خالتي لحكيني

و نصير.. ميخليني إداري أمي خلي خالتي تجي لأمي والله ولا أخليها خاف گلبها يرف على خيتها روحي عيني روحي لو تموت خالتي والله فلا نلبس اسود ولا نوكف دفنتها ولا فاتحتها تطردن أمي ولجن حصوة ملح بعيونجن..

 

كولش ضجت غميتها ومشيت حتى ما رديتها تولي شنهاي عشتو بياحال آي

هاي شلتنا يوم على يوم تختفي وحدة لو زعل وخصام حيل أشتاق لماجدة.. ولو طلعت جاسوسة بس ولا اكدر أصدك لان عاشرناها من صغرها من قبل لا نسجل مدرسة إحنا بنات منطقة وحدة بس  بعد شسوي بطلت وسمعت عنها أمور مدري صح مدري إشاعة الله أعلم اتمنالها التوفيق 

بس نصير.. ما يقبل بعد اتورط وياها أي إتصال كال قطعي وراها طلايب

أما سـؤدد.. هم ضاع خبرها بين بالهور هربت بين خارج البلد.. 

مرت أيام ورجعت امي لبيتها وهي بس راح تاثير الكيمياوي كأنما طبيعية بس دون شعر  و شاحبة.. 

بيوم نصير.. اجاني وكال دمشي معاملة تحيل الاملاك كبيع شراء بأسمج أحسن من التنازل خاف ينطعن خفت من هذا الشي ولا حبيت فكرته.. 

 : نـصير ​شنو هذا الحچي اللي دتگوله شبيك ليش تنقل الأملاك باسمي؟ بس گلي شبيك أحد مهددك؟ متعرضلك أحد؟ نصير لا تخوفني عليك أحچي.. 

: لا.. بس لضمان مستقبلكم..

: والله مدري شكولك اليوم أروح بيت أمي شوي رجعت  تعبت تعرفها  صاحب هيج مرض عليل.. 

: اوصلج ومعليج برجلها السكط بالليل اجي عليج أمشي يله اوديج.. 

من نزلت من سيارته وصاني.. 

: بالليل أجي عليج وهذا رجل امج لا تكعدين يمه ولا تنطيه عين.. 

هزيت راسي بالموافقة ودخلت انتظرني لحد ما فتت للبيت وبعدها حرك سيارته وراح أول ما دخلت ركضت حضنت أمي أحسها يوم عن يوم دتذبل وتظعف شعرها الواكع حواجبها المختفية وبشرتها اللي تجردت من كل ملامح الحياة

 قطعت صفنتي وهي تسألني بصوت تعبان عن أحوالي.. 

: يمة آني زينة بس أفكر بيج والله أمشي وياي شو تعبانه احسج..

: الحمد لله يمة زينة والله لا تفكرين بيه يمة اجيج بس أيام الجرع جرعتين بعد شهرين فلا تلحي عالرجال لا يملني 

: صدك كذب يمة.. 

: أي والله يمة ما أكدر هم أترك بيتي بكل وقت أنتظر عون.. يمرني قبل لا يسافر.. 

ترددت ما أعرف ليش سألت عليه.. 

: عـون.. مو رجع للعراق يمة شنو بعد هم يسافر..؟ 

: يروح ويجي ينطيني للعلاج ما قصر وياي يمة.. 

دمعت عيونها دومها تحس ذنب ما انطتني لعـون..

: يمة ترى آني دأحجيلج جاي أكولج ما ناسية عشرتنا ما گلتلج عاشگته آني مرة متزوجة حتى حرام وما أفكر بغير رجلي ليش تظنين بيه لا تخليني أزعل منج والله.. 

غيرت الحجي وياها لغير موضوع .

: نـصير.. يريد يسجل أملاكه بأسمي الزلمة مدري شبيه مو طبيعي أبد.. 

: هو رجلج هذا صح تاب بس قبل شوف بشنو متورط وانعكس عليه الله يحفظه لخاطر أبنه و لخاطرج.. 

: آمين.. والله يمة قلقانة وهواي يخابر و هواي معصب.. 

: شوفي مـريم.. لو ما داكين بيبان العالم محد يدك بابكم زين يمة.. 

بلعت التلميح وسكتت كمت نظفت و عزلت البيت أمي مريضة والبيت صاير مهوس و ممنظف زين كفيت كلشي 

وداطلع الزبل برى شفت عـون.. نزل من السيارة شنو من صدفه وكف متصنم..  

: مـريم.. 

باوعتله وهمست..

: شلونك خوية ..

: أخـوج؟ أبد ما أصير أخوج شدسوين هنا؟ 

: أشوف أمي.. 

طلعت أمي و هي تسلم عليه وحظنته

: يمة عـون.. الحمد لله على سلامتك يمتى راجع.. 

: من أسبوع وكلت أمر عليج أشوفج محتاجة شي شنو أخباركم.. 

حجاها وباوعلي وذب حسرة

: كلنا بخير بوجودك ما تخليت عني الله يشهد ادعيلك بكل فرض صلاة ربي يوفقك ويرزقك بنت الحلال.. 

دار وجهه وباوعلي برفعه خشم..

: ما أفكر بالزواج منو تستاهل عـون.. و قلب عـون.. كرهت النسوان.. 

: فوت فوت... 

ارتبكت بس لا يفوت ونـصير بعد شوي يجي علي و يسويها طلابه بس آني منو وامنعه من بيت أبوه.. 

: نوري.. هنا؟ 

: لا بهيج وقت بالكهوة يلعب دومنه ويقامر..

: زين ما أريد أشوفه.. 

دخل للبيت وآني على نار لا يرجع نـصير.. قبل ليل وتصير طلابة.. 

شردت للمطبخ أشرب مي ولكيت أمي تجهزلة ضيافه.. 

: شلون تدخليه ها  بلة رجع نـصير الي خلك نـصير.. ورعصاته علي

: أنعل أبوج لابو نـصير شمحصله من هالعشيرة بس عـون.. طلع منهم ملاك.. 

: اهوووو بعد بس عوزج تغنيله.. 

طلعت أشوف أبني لكيت عـون مكعده بحضنه وحاضنه يشم بي ويهمس.. 

: ياريحه خاينين العشرة و گليبي يبن بت كلبي.. وكسرة فؤادي.. 

جريت أبني منه

: أبني كولشي يفتهم لا ينقل لأبوه كلامك و تسويلي طلابة.. 

وكف وكال.. 

: طاح حظج وحظ أبوه وحظ العرفني بيكم عموماً جاي داشوف خالتي مجايج..

باوع لأمي و طلع مبلغ خلاه بيدها.. 

: تعالجي محد  يفيدج مو تنطيهن لنوري لو ياخذهن منج..  

دنكت تريد تبوس إيده وهي تبجي

وخر أيده بساع ويحضنها.. 

: ما أقبل هيج تصرف من اتكفلج أحس أمي متكفلها ممسوي فضل و انجبر تجاهج.. 

: والله ندمانة أوف أوف والله آني يمكن بداية كسرتك.. 

وباوعتلي أمي.. بس هو برئها.. 

: معليچ منها.. لو هاي ما عندها عقل؟ لا والله عندها عقل هي اللي اختارت الفلوس وفضلتها علي وياريتها مرتاحة وياه شو شابعها نعل عبالها ما أعرف بأخبارها أدري بكل شي بس ما باليد حيلة وأتدخل.. هي اللي اختارت.. 

عاركته : شعليك رجال ومرته نطاكك نتباوس نتحاضن أنت شنو ومنو... 

صار وجهه أحمر من العصبية ورفع أيده و ضربني.. 

: آني شنو؟ ولچ مو نكارة جميل أنتِ؟ آني كل شي بحياتج آني الكبرتج بين إيدي مداعيرج قبل لا تحچين.. بس أريد أرد على كلامج آني اللي لبست مرگع بسبيل تلبسين أحسن لبس.. آني اللي جعت و اجيبلج حصتي من أكل المطعم وجبتها الج بسبيل تاكلين وتشبعين آني الحلمت تكبرين وإلي تنزفين بس آخ غدارة ومصلحجية.. 

حجاهن وديطلع كلت أي همزين ميبقى يجي نـصير ما يشوفه وابتلي آني بس أمي لحكته.. 

: وين رايح أبقى اكلك لگمة ما اشتاقيت لطبخي.. 

: مشتاق والله بس غير يوم آني مطول بالبلد شهر وارجع أطلع غير يوم امرلج من ما عندج هاي.. 

أشر علي و خزرني وطلع غثني بطلعته بالشارع تفل بالكاع شنو هاي إهانة يقصد أنتِ حالج حال هاي متسوين شي صرتي حيل انقهرت والله.. 

سدت الباب  أمي وهي تدردم علي عاد ظليت أحسب ساعات يجي نـصير.. أجه نوري.. هنا اخذت أبني وفتت لغرفتي القديمة.. 

هو هم تجاهلني همزين مذبلة كلمة سم لليل اجة نصير.. ورجعت لبيتي..

         مـــــــــــــــــاجدة

الشهور مرت و آني بهذا المكان شفت أنواع العذاب النفسي ديحاربني بكل قوته حتى ألين حتى أقبل بالزواج السري اللي يخدم مصالحه وترقيته 

بس بقيت أقاوم أصبر وأشجع بنفسي لا تصيرين رحمة وتضعفين وتخافين الموت بشرف ولا أخسر كرامتي وشرفي مستحيل أصير رحمة ثانية.. 

أوقات أتصنت لكلام الحرس جانوا يسولفون عن وضع البلد صاير تعبان حيل و الدول العظمى ناويه تزيل حكم بلدنا وعن الشوارع اللي أنترست ملاجئ مبنية من أكياس الرمل هذا الكلام جان يتناقشون بي واحد كالاله.. 

: البنت اللي جوة شنو مصيرها.. 

: شمدريني وشعلينا روح جيب مثل مكال نص وجبة باليوم..  

: من كم شهر والبنت هنا حالها حال الحلال نعلف بيها حتى الحلال أحسن من علفها.. 

حجاه وضحك صوت فتح الباب أنفتح وفات باوعتله و نظراتة مو مريحة.. 

: الظاهر تموتين هنا طولتي بجلسات التأديب يا حلوة القبلج ميطولن أيام لو ساعات وترضخ للباشا.. 

ما تصورت بيوم عندي طاقه وقوة وآني اللي تربيت بشخصية ضعيفة

رديت عليه.. 

: آني أختلف آني عندي كرامة وشرف ما أفرط بي برضاي.. 

خلا الصينيه يمي.. 

: تردين أهربج؟ عجبني أهربج بس كولشي بمقابل.. 

: كل الفلوس العندي صادروهن آني حافيه شعندي أنطيك.. 

: أنتِ تنطيني رغم حامل بس بيج جمال مو طبيعي..  

خفت لا يتعدى علي يعني هم أكيد يعرفون لـؤي.. أبوي وهيج جرئة يطلب هيج طلب سخيف..

: لو أقبل أبيع شرفي جان مشفتني هنا ولك آني هنا لأن رفضت أصير زوجة سرية لكبير من كباريتكم و هسة أنتَ تعرض علي بالحرام وتريد أقبل تف عليك وعلى جهرتك الزفرة.. 

عصب من ضربته وصاح 

: آني الج...  

كام بيده لاسلكي مدري شيريد يبلغ  بس عناصر دخلت بساع وحاوطته وكلبچوه بين صدمه وبين حيرة من الصار توه يهوبز يهدد يراودني عن نفسي وهسة يتوسل..  

ميلت وجهي باوعت للصينية كرصة خبز بيها عفن كالعادة و كوب مي خابط كم مرة العطش يجبرني أسد خشمي بأصابعي وأشربه المي ريحته لا تطاق أذكر أول مرة شربته تقيء واسهال وبقيت بالمستشفى أيام لمن معدتي تعودت على المي الخابط..

  

وبعدني أقاوم آني وطفلي شريكي التعذيب النفسي الجسد نحل وصرت هيكل بس أهم شي الكرامة أسوي الإكدرلة وأقاوم بس لو الزم لزمة على لـؤي.. اااخ... 

رفعت راسي سمعت صوته وهو يلزم الرجل الي جان يساومني من شعره و يخلي عينه بعينه

: من وراي تلعب عبالك ممراقب المكان كله مراقب وبي تصنت.. 

توترت شيطان ومن طلع مسدسة خلاه براس الرجل الي ظل يتوسل غمضت عيني وسديت أذني بأيدي نزيت بصرخة رغم آني أحتاطيت لا أشوف ولا أسمع بس صوت الرصاصة عبالك براسي

فتحت العين على كيف راسه ينزف دم وحتى من عيونه و حلگه أشر بأصبعه  طقطقهن عبالك ينادي أزلامه.. 

: نظفو المكان...أنسحل الرجال و المكان تنظف آني أرجف وأبجي بهستريا أخاف من هيج أمور و اللي شفته مو شويه جدتي و معاناة قتلها كدامي ما نسيته مو بعد هذا  كمبص كدامي.. 

: تأدبتي لو بعدج أستاذ حامد يسأل عنج هواي..

ظليت ساكتة مرد كام رفس ببطني.. 

: ما تدمرين مصالحي.. 

وطلع وهو يصيح 

: قيدوها أريد حاجتها جواها تعاملوها مثل الكلب ريحتها كون تطلع وأكل ماكو ليومين خلي تتربى 

أسمعه ينطي تعليماته و آني المنهارة أبجي ما بيدي شي يارب موتني ولا هذا العذاب والله ما أكدر والله صعبة أطيعه بشرفي شي فوك طاقة البشر 

أحس روحي جاي تطلع أتمنى الموت وما جاي يجي ​بدت وياي آلام ولادة مبكرة أتمرغث بالكاع من الوجع وبدل ما يرحمني نفذوا أوامره وقيدوني.. 

قيدوا إيدي ورجلي  وانطبكت رجلي بالحبال وصلت لمرحلة من الذل ما تنوصف من شدة الألم والضغط بللت مكاني.. 

أبجي ومنهارة والوجع ياكل بأحشائي طلوك كوة أطلكها بس القيد حابسني مكدر أولد ومكدر أتحرك بقت بس روحي معلكة وبكل ما بيا من وجع وقهر صرخت.. 

: لحكونييي ااااااخ يارب حموت! ولكم سوها لله وفتحولي بس رجلي راح أولد.. 

أصرخ وأصرخ تعذبت حيل الله لا يراوي بشر اللي شفته فوك الساعة بس أطلك ومحد مگلبني لمن أنفتح الباب ودخل لؤي وياه مرة..

: و أخيراً شوفي شغلج أهتمي بالأم الطفل مو مهم يعيش يموت هو أبن زنا.. 

صرخت ما أقبل يسمي ثمرة حبي وزواجي بماجد أبن زنا.. 

: حلاااال أبني حلاااال.. 

بين موجة طلوق و تعرق يتصبب من جبين وجسد تعبان بوسط وضع متأزم وي أذان الفجر أنولدت طيف.. نقطة الضعف أنولدت وضعفت إرادتي كل همي صار بنتي تعيش ميقتلوها ولدت كدام أكثر من عشرين نفر يراقبون بصمت وعلى رأسهم لـؤي.. ماكو أي ستر يسترني لحد ما صاح بيهم طلعوا

 أنولدت طيف.. بحضيرة الحيوانات 

أنولدت بعد معاناة و لـؤي.. ظل كاعد يراقب والقابلة بيدين ترجف وهي تكمل قطع حبل السر باوعتله.. 

: ملابس ولحاف و حضاين للطفلة

بكل برود كال.. 

: تبقى هيج لمن أمها تعقل وتطيعني

أخذي أجرتج وروحي كملتي العليج.. 

طلعت بساع هو طلع وراها ​و صوت رصاصة غمضت عيني أرجف قتلها ليش؟ عيني على بنتي ديوصلي رسالة 

الباب أنغلق وبقينا بهاي الأوساخ بنتي ترجف من البرد ما أعرف نسى يعيدون تقييدي أو تعمد أحك بشعري وسخ لا سباحة لا شي حتى التواليت تنكة مخلين نظافة ماكو حاولت أكعد الألم قوي لميت طفلتي لحضني.. 

هم المجرم يقتلج؟ ويحرموني منج أحاول بملامحها ألتقي بماجد عيونها واسعة كولش بس لونهم ممبين وجهها أبيض ناصع على وردي ورثته مني.. 

دوخة وإغماء ما عرفت شصار من فزيت لكيت روحي بمكان نظيف وصوت بجي طفلة يمي  مسبحيها ومبدليها.. 

بعد شهرين اللي عشتهم من الذل والوساخة والتقييد بوسط حضيرة الحيوانات حسيت براحة بس بعد جسمي يحكني دخلت مرة.

: الأستاذ يكول لازم تنظفين نفسج..

: آني وين؟ هذا مو بيت جدي؟

: المزرعة ست.. 

: هااا..

كلت شنو ترقيت رتبة من الحضائر لغرفة نظيفه بنفس المزرعة سندتني أكوم.. 

: أرضع الطفله ممية يومين عالمميات ست نمتي يومين متواصلات

أستغربت يومين نمت غسلت وطولت بالحمام لكيت ملابس نظيفة الله يستر من هذا الإهتمام الي نزل فجأة

أخذت طفلتي وحضنتها و كعدت أرضعها آلام الرضاعة لأول مرة عكرت وجهي بس بعدين بحنان تحملت.. 

أباوع لملامح بنتي خليط بيني وبين مـاجد.. هاي ثمرة قصة حب بين طبقتين كان مستحيل يلتقون ببلد يمنع زواج المثله بلي مثلي بس تزوجنا تحسرت وآني أهمس أفترقنا..

نامت وهي ترضع أريد أوخرها عقجت وجهها تريد بعد جوعانه بنتي.. 

مرت الأيام وآني بدلال لؤي.. كولشي يدز أكل زين ملابس وهواي أمور مستلزمات الحياة بس ولا مرة أجه من يوم ولادتي لطـيف توجس داخلي هذا ديذبلي الطعم.. 

تعلقت ببنتي كولش وبقيت بالمزرعة أربعة أشهر وفجأة دخل لـؤي.. 

: عدمو مـاجد.. و هاي البنت أنطيها لأهله.. 

تمسكت بيها.. 

: لا ما أقبل بنتي شلون تأخذها.. 

حيل تعلقت بيها وهي بدت تفطن بس جرها بجت وتباوع علي وأنتبهت للي كاله.. 

: شنووو عدموه.. وهو طلع من البلد.. 

: اللي وصلج خبر هروبه كان مو دقيق عميل وغوغائي إحنا ما يهرب من إيدينا مجرم أول صدكت هربه بس لمن رفعت أسمه كالو أنعدم.. 

وكعت على ركبي أدك وأنوح.. 

: قتلته ولك قتلته..

أمشع بشعري وآني كوة أجر نفس يتم بنتي ومستمر يدمرني راد ياخذ مني بنتي جريتها وآني أحضنها أشم بيها

: الحل يمج وافقي هواي طولتي بأعنادج

رديت بإرادة ضعيفة 

: وبنتي محد يأذيها ؟

: محد يأذيها.. 

هزيت راسي وهو طلع فرحان رجعت حاضنه بنتي و أبجي بإنهيار ليش ما طلعت والله فرحت من كالو طلع يارب ليش كل هذا صار بيه.. 

أبجي وبنتي تصارخ وياي أيام وآني الوب أريد أتأكد كلامه صح لو لا ورى أسبوع سيارة نقلتني لبيت جدي.. 

رجعت للبيت فارغ بس رنا وجهالها

أثار ضرب على وجهه وخياط بوجنتها

جارم بيها أكيد جهالها بخوف يباوعون شنو من أب شنو من مجرم الله يأخذك

: رنـا...بس حجيت وياها شردت مفهمت ليش تخاف من أي أحد يمها رحت للغرفة يم بنتي صرت ما آمن بعد.. أوراقي الرسمية بقت يمه بس شفت جنطتي اللي هربت بيها مشمورة على جربايتي 

الأغراض مطشرة بإهمال أكيد من أخذ أوراقي طشرها أخذت ألبوم الصور المرمي بالكاع وي ملابسي 

أگلب بالصور وآني أبجي أتلمس وجه مـاجد قتلوه و نهوني وياه والله أحبك و مشتاقتلك والله ظلمتني ما خنتك 

حتى رحـمة.. نصحتها والله هي اللي طاعتهم.. و تحملت ذنب خطيتك وخطية أهلك وأختك يا رب ساعدني.. 

و أبجي بكل حرگه.. 

مسحت دموعي لازم أدمره مثل ما دمرني سنين وهنا تاريخ أمي ينعاد من أختارت سـهيل.. حتى تدمر لـؤي 

رحت لدليل التلفون شفت رقم جريت نفس أريد القوة إجه الوقت اللي آني أدمرك يا لـؤي 

جيكت المكان مموجود ودورت خاف يمكن أكو تصنت حتى فتحت سماعات التلفون صرت خبرة بفضله وهم قلدت الأفلام القديمة كل شي تمام..

جريت واير التلفون وطلعت للكلدور ركبت الفيشة وكفت بطلعة الباب وآني أتصل سمعت صوته بكل ثقة وقوة وآني أريد أنتقم منه بأسلوبه حجيت