رواية دخيله الشيخ زين العابدين الفصل الخامس الثلاثون بقلم أوتار حزينه
ليان
عرفتها هاي لارا سمعت امي تبجي وتردد
ليش هيج سويتي بروحج وبينا ليش
لارا غدرتي اختج واخذتي رجلها منها
سكتت للحظه بعدين كالت
ااني ما صدكت بي من كال انتي ذبيتي روحج
علي بس اختج ولج ليان سمعتج ادكولين
سلمتك نفسي
مااعرف المن اصدك مااعرف الصار عقلي
ماتحمله اذا انتي ادكولين هو ضحك عليج
واخذج لبيت ليان واعتدى عليج
ليش ماحجيتي ليش
سكتي لاراا
امي سكتت تبجي وسمعت وره لحظه شي
زرف گلبي بسجين حار
شنوو حامل موو ابنج بعده صغير وماايكدر
خليت ايدي على حلگي كتمت صرخه رادت تطلع وياها روحي سندت جسمي على الحايط
من ردت اوكع رددت بخنكه
اجاه ولد وحامل عاايش حياته ايهم
هو وياها ونسو السوه بيه
ابجي وكاتمه شهكتي سمعتها
كالت
لييش يااذيج من الله لاينطي واهله وينهم
شلون يخلو يضربج وانتي حامل وابنج
ماوديتي لدكتور
دفعت الباب شافتني فزت تباوع عليه بخوف
رفعت الجهاز وكالت
لارا بعدين اخابرج
سدت الخط حجيت بغصه وقهر
هاااي من شوكت تخابريها وتخابرج
ليان بس اسمعيني اختج ماتكدر وهذا جاي
ياذيها يوميا
من عساااها ماتطيب لا هي ولا هوو
شلووون تحجين ويااها شلون ماما نسيتي
شسووه بيه نسيتي اني ردت اموت من وراها هي
وذاك العار
نوار اجتي تركض حجت بخوف
شبيج ليان
تعااالي شوفي عمتج طبيت لكيتها تحجي وي
ذيج الساقطه لاااا وشايله همها وخايفه
عليها
ووج هاي اختج
مووووو اختي
صرخت بجنون نوار اجتني لزمتني من شافتني
كمت ارجف صرخت بجنون
اااختي ماتت من طعتني بظهري واخذت
رجلي مني ماااتت ماما من غدرتني وهي ويا
ماتووو وانتهو عندي وجان لازم هم تنتهي
عندج بس ااانتي من زمان تفضليها
عليه
ااني ليان
ااي اانتي ومحد خلاها تصير هيج انانيه وغداره
غيرج اانتي
فقدت وكمت اصيح عليها باب المطبخ
نوار تريد تهديني ماكدرت اصرخ
فاقده وابجي
لييييش فهميني ليش ااني موو بنتج ماااتخافين
عليه ماتفكرين بيه مووو متت بذاك اليوم
وردتني تدفنني بايدج
لياان خليني افهمج
ااافتهمت وعرفت اني شنو بالنسبه الج
من شفتج شلون نسيتي الصار بيه ورجعتي
تحجين وياها
صرخت بوجهها من قربت عليه تريد تهديني درت وجهي منها مشيت بسرعه ابجي واشهك نوار
ورايه تصيح هي وياها
ليان اوكفي ولج وين رايحه
باب انفتح مالك صار بوجهي شاف وضعي
صاح بخوف
هااي شبيج ليان تصيحين منو وياج
انهاريت على رگبتي بجيت بشهكه
وغطيت وجهي بايدي
وج كاافي راح يصير بيج شي
من لزمتني امي من جتفي كمت ردت اوكع
هو لزمني وكال
الله يابه على كيفج وي روحج
وخرت منه طلعت ابجي واشهك ومااشوف
دربي نوار لزمتني هي وياها صحت
بخبال
لااحد يلزمني عوفوني
وين رايحه ليان
مالك صار بوجهي رديت بصياح
للگبور السود التاخذني
مشيت لسياره اريد اافتح الباب مقفول
ماعرفت شلون اتصرف امي كامت تبجي وتردد
وج والله بعد مااحجي وياها بس تعالي طبي
مااااريد اطب عوفيني ماريد اشوفج
خليج وراها لارااا صدكي بيها وجذبيني
صرخت عامر طلع يباوع علينا مالك حجه
ليان تعالي وي نوار لبيتي
اخته لزمتني وتوسلت بيه بدموع
الله يخليج امشي وياي لبيت اخويه
سندت روحي على السياره من دخت هو لزمني واخته ويا مشيت وياهم جسمي كله يرجف امي ورايه تبجي وتبرر مالك كال الها
خاله عوفيها هساع خليها يمنا تهدأ وترتاح
حيلي راح ماظل بيه لي ذرة قوه يتردد براسي
اجاهم ولد وحامل باللخ عايشين حياتهم
واني تمرضت من وراهم وردت
اموت
طبيت اتعثر ومااشوف طريقي اكثر من مرة
ردت اوكع وهو يلزمني كعدوني بالاستقبال شبه
فاقده واردد بشهكه
صار عدهم ولد وحامل عايشين حياتهم
ونسوه السوه بيه
مالك
رجعت الظهر للبيت نزلت عكدت حواجبي
من سمعت صياح بيت حجي مصطفى رحت
بسرعه دفعت الباب ليان صارت
بوجهي مااعرف شبيها
تبجي ومبين عليها منهاره كلش اختي وراها
هي وامها ردت تهج من البيت گوة جبتها اني ونوار لبيتنا كعدنها بالاستقبال ادحك عليها
ترجف وتبجي بشهكه مثل
الطفله حجيت وي اختي
نوار جيبي مي بسرعه
رفعت عيونها علي رددت بجنون
ليييش هالتفرقه مو اني هم بنتها ليش مالك
ماتصدك بالحجيت بي والله كالت سلمت
روحي الك بهاااي اذني سمعتها
تحجي هالكلام
كاافي يولي راح يصير بيج شي
فزت وصاحت وهي تضرب على گلبها
صااار وردت اموووت
رحت بسرعه لزمتها دفعتني فاقده
ضربت روحها اكثر من مره وهي تصرخ
صاار مالك بس ليييش مامتت ليش يااربي
گلبي وجعني عليها كلش تصرفت بدون وعي
حبي الها خلاني اخذها لحظني دفعتني اكثر من
مره وضربتني تصيح
عووفني ولكم عووفني خلي اموت واااخلص من
الشفته والسمعته
تحملت صراخها وبجيها وضربها اليه
اختي واكفه مسافه عني تبجي عليها انهارت
بحظني كعدت بيها بالگاع بين ايدي تشهك وتبجي
وتردد
صاااار عدهم ولد وحامل نسوه السوه بيه
نسووه مالك وعاشووو وخلوني ميته واتنفس
الهوه
غمضت عيوني بقهر شهگتها زرفت گلبي حظنتها
بقوه اريدها تهدأ رددت
ااش ليان اش مايستاهلون دمعه منج
كاافي يولي والله مايلوك الج انتي وين وهو وين
ااختي ذبحتني هي وااامي
صاحت بشهكه امها طبت تبجي اشرت الها ماحجت شي نوار اجتي خلت كلاص المي
يمي راحت ليمها اخذتها من الاستقبال
وطلعن
ظلت بحظني تبجي وتشهك وتردد
حسبي الله عليك ايهم انت ولارا حسبي
الله عليكم كلكم حوبتي اريدها تطلع بيكم اليوم
قبل باجر
وخرتها من عندي مغمضه والوجه غده دم والشفه
ترجف هي والجسم غسلت وجهها بمي
خليت الكلاص يم حلكها
ااشربي ليان
ماقبلت تشرب بجت هي مغمضه وتون
لزمت قميصي رددت بقهر
استغفر الله ياربي كافي يولي تره زرفتي
گلبي
وسيم طب خايف صاح
شبيها ليااان
شاف وضعها تخبل اجه بسرعه عليها الحجي
وراه يصيح
شبيج بابا منو وياج
اخوها اخذها لحظنه تبجي ماسكتت
كومها واني ويا كعدنها على القنفه حاوطها هو
وابوها سال بخوف
شبيج بنتي منو وياج
نوار طبت وسيم سالها
شصاير فهميني ليان شبيها وليش هيج
صارت
اختي دحكت لي اني حجيت
اسالو الحجيه هي تحجي الكم شصاير
وسيم كعد اگبالها سألها
ليان شبيها امي وياج
غطت وجهها اسمع صوت بجيها وشهگتها
ابوها سال بتوسل وهو خايف عليها
احجي بابا شصاير
امها طبت كامو عليها سالو
احجي شبيها ليان
دحكت عليها وهي تبجي ترددت وكالت
سمعتني احجي وي لاراا
مو كلام كالت ذبيت نار عليهم وشبووو خصوصا
وسيم صاح بغضب
وووليش تحجين وي هاااي الساقطه
منو كلج خااابريها
ابوها انهد بمرتو ردت
هي خابرت بنتك جاااي تتاذه من هذااا
اااااش ولا كلمه
عم مصطفى صاح بيها باعصاب كمل
اااني ماعندي بنيه غير ليان ذيج ماتتت بنظري
ونظر الكل ماتتت اني ماعندي غير
وسيم وهالبنيه
اشر عليها كامت من يمنا تريد تطلع
وسيم گضبها وكال
وين رايحه ليان
مااريد اشوفها طلعوني مناا
انهارت تبجي بحظن اخوها ابوها اشر لمرتو
بغضب
روحي منااا اجي للبيت واني اعرف شلون اتصرف
وياج انتي وذيج الساقطه
مشت من يمنا تبجي ادحك لابوها غده نار
هو وابنو الي انطعن وجهو وظل يهدي باختو
اامشي ليان
مااريد اروح هناك ودوني لبيت خالتي
بابا لاتقهرين روحج والله الي تريدي يصير
بس اسكتي وبطلي بجي
مااروح هناك مااريد اشوف امي جذبتني
بابا وسيم مااتصدك بالسمعته من لارااا
ولكم والله سمعتها باذني
ادكول سلمتك روحي
ااش كافي بنتي سديها للسالفه وخلينا ننسى
ابوها حجه راحت اله منهاره تردد
بشهكه
بابا اجاهم ولد وحامل ولكم عبالك مااسوه
شي عبالك ماغدروني عايشين حياتهم
اثنيهم واني متت بابا لاتشوفوني
اروح واجي واحجي واضحك
هاي كله كاعد اجذب عليكم وعلى روحي حتى
ابين لنفسي والكم اني بخير
بس ااااني مو بخير
جااي اموت بابا وسيم اني متتت
بذاك اليوم من شفتهم سووه
ولكم متتت
انهارت بالگاع اخوها وابوها بسرعه لزموها
غمضت تبجي وجسمها كله كام يرجف
مااللك
وسيم صاح بخوف ووجهه صار كركم
صحت بي
ووخر
شلتها بسرعه اخوها كام وگع رجع كام ولحكني
ابوها سندت نوار تصيح
صااار بيها شي من القهر
خليتها ليوره وسيم صعد يمها حظنها لصدرو ابوها
مايعرف شيسوي يردد بفزع
ضربتها ذبحه اللخ راح تروح بنتي من ااايدي
ااركب حجي
ركبته كوه امها طلعت شافت الوضع
صرخت ماادرت بال بسرعه صعدت وطلعت
بشحطه ادحك لها بالمرايه خايف
كلش لا هم ضربتها ذبحه
جسمها كلو يرجف بين ايد اخوها
يمسح بوجهها ويبجي عليها هو والحجي داير
روحو عليها ويتوسل بيها تهدأ
يارب الطف بحالنا يارب مااريد اعيش
ذيج اللحظه لاتعيدها علينا مره اللخ
اذااا صار شي بيها والله ماارحم لارااا ذابحها
اني هالمره
وسيم كام يهدد اسوق گوة وگلبي احسو راح
يطلع من مچانو من وره الخوف وصلت لمستشفى
اهلي وسيم نزل شالها ورگض بيها لزمت
الحجي من راد يگع واخذتو لجوه
نيموها بالطوارئ الدكتور اجه فحصها
كلنا فوك راسو نريد يحجي ويطمنا
شاف وضعها كال
احد قاهرها
رديت گوة
اي دكتور صارت سالفه وغثتها
البنيه صاير بيها انهيار عصبي حاد هسه ننطيها
مهدأ وترتاح
دكتور هي ضربتها ذبحه قبل سنه وشويه
وسيم حجه الدكتور باوع عليها وصفن ردد
هاي ضربتها ذبحه
اي دكتور
استغفر الله يارب
ردد وسيم سال بخوف
دكتور اختي بيها شي
لازم نسوي الها تخطيط مادام ضاربتها ذبحه
قديمه نخاف لا هم رجعت
ابوها انهار كعدتو على كرسي بجه عليها
وهو يون وسيم سند روحو على الحايط الدكتور
كال
لاتخافون يعني لازم الواحد يطمن عليها هي
تاخذ دوه للذبحه
محد رد صحت بوسيم
ولك ماااترد
رد بصوت مخنوك
لاا دكتور اخذت فتره وعافته لان بعد ماتحتاجه
حالتها استقرت وتحسنت عن الاول
يالله ان شاء الله ماكو شي هسه نسويلها تخطيط
ونطمن عليها
اخذنها لغرفه التخطيط وكفت بره ادعي
اني وابوها ووسيم مااضاربتها ذبحه اللخ طلعوها
وره مشوار الدكتور طمنا وكال
مابيها شي لاتخافون مجرد انهيار عصبي
وراح نضربها ابر مهدأه حتى تهدا وتروح رجفه
جسمها
اي دكتور
ضربوها ابره مهدأه وخلو الها مغذي
ابوها كاعد يمها لازم ايدها ودمعتو بعينو وسيم
يفتر يمها وكل ساع يدحك لها بقهر
ووجهه مطعون
وره دقائق هد لبره لحكتو بسرعه لزمتو بالممر
حجيت
وين رايح
رد بغضب
ارووح اگبرها لهاي الساقطه هي وذاك
العاار
ااش حسك يول لاتفضح روحك
جريتو على صفحه جسمو يرجف من الغضب
واحسو لازم نفسو گوة رددت
مو وكتو وسيم فكر باختك ووابوك شوفو تره
گوه واكف باي لحظه ينهار
ااخ مااالك لو صاير بيها شي اني شأحصل
مااصار شي والحمد لله بس انت اهدأ وتصرف
بعقل هي هسه محتاجه للهدؤ وتخلوها
بمچان بعيد عن الحجيه
لان اعرفها ماراح
تتحمل شوفتها بهل جم يوم
اامي هي السبب بكلشي صار بينا هي
السبب مالك بضياع ذيج من دللت زايد وماخلتني
لا اني ولا ابويه نربيها
سكتت سند ظهرو على الحايط نزل
للگاع لزم راسو ردد بقهر وبصوت مخنوك
هم عرفت شي خلاها تنهار مثل ذيج المره
هم سمعت منها لذيج كلام خلاها تفقد ويصير
بيها انهيار عصبي ليش شنو ذنبها والله طيبه ومااذيه احد ليش كاعد يصير بيها هيج فهمني مالك احنا عوج لو الدنيا هي
صارت عوجه
مارديت خليتو يطلع الب بگلبو حتى يرتاح
جهازي دك للمره مدري شكد جانت نوار فتحت
الخط طمنتها على ليان وسديت الخط
هيله
زين التهى بعزه نجم اخو عوض وماالتحق
بالفيلق بهل جم يوم امو شدت معي تردد
مابيج خير لو صدك تحبي جان ماخليتي يروح
للموت برجلي
مااردها الحجيه ترد بمچاني مرات من تكون
يمنا لجن من وحدي اسمع وماارد لان هي تعرف
ابنها مايمشي،،،،،، بجلمه حرمه بس هيج
تريد تذب الصوج بيه وتبرد حرگه گلبها
بي
جان اليوم الثالث من عزه نجم واكفه
نحضر بالعشه حدي هاجر وامو كاعده سمعت صوتو بالمجلس كالت
فض العزه وراح يروح
كامت من يمنا متوتره وخايفه هاجر دحكت لي
كالت
امي ماراح تسكت
حگها ياهاجر هذا وحيدها وخايفه علي
اي غير هو يحس بها بيج يكول عروس وعرست
عليها قبل جم يوم،،،،، ومايصير اعوفها واسري
للموت برجلي شيريد يجيبو اسم الله علي ملفوف بالعلم مثل نجم ويفجعنا به
من كالت هيج مااعرف شصار بيه تخيلت يجيبو
شهيد وملفوف بالعلم لزمت گلبي
من وجعني وكعدت
هيله شبيج
اجت عليه بسرعه حيلي راح مدري شصار بيه
حسيت گلبي كام يدك بزردومي سرت
من يمي بالعجل سمعت صوتو
شبييها
اجه بسرعه عليه كعد اگبالي على رگبتو
سال بقلق
هيله شبيج
عمي دش هو ومرتو الحجيه وراهم رديت
گوه
مابي شي
شلون مابيج وانتي وجهج غده اصفر
خايفه عليك يازين
هاجر حجت دحك لها وبعدين عليه نزلت
راسي وكتمت دموعي هي رددت
تانحجي بسالفتك وتخربطت فجأه
شوف مرتك ولك ماتحملت القهر ماتحملت تسري
من يمها وهي بعدها عروس
عمه تكلمت بقهر عمي كال
يابه نوديج للمستشفى
لا ياعم مابي شي
كمت لحيلي زين نهض معي لازمني رفعت
عيوني له يدحك عليه ومبين علي
القلق كلت
مابي شي لاتشيلون همي
امشي ارتاحي لاتظلين واكفه
تكلم امو ردت
يول بطل من
يمه رحمه لاهلج سدي هالسالفه
رد بضوجه كلت
زين مابيه شي مااريد اصعد فوك
روحي هيله كملنا كلشي من اخلي العشه
اصيحكم
هاجر تكلمت هو اشر لي وكال
امشي جدامي وبلا لغوه زايده
عمي كمل
اسمعي جلمه زلمتج ياهيله وروحي معه
هزيت راسي باي سريت مع زين صعدنا سوه
رحت لغرفتنا وهو ورايه رحت كعدت
على الجربايه اتجنب ادحك له ذب
البشت والعگال والغتره ظل بالگبع گرب
علي كعد اگبالي سالني
شلونج هساع
بخير لايظل بالك
رديت منزله راسي ماحجه شي سكت
وطول رفعت عيوني له صافن عليه بنظرات
خربطت كلشي بيه ابتسم وسال
خايفه عليه ياهيله
غمضت عيوني مااعرف
شصعد لراسي ولا ليش دمعت
حالج بهل جم يوم يوم يكول انتي خايفه
عليه من هالروحه
مارديت دمعتي نزلت وجان الجواب الي
يريدو گرب من يمي مد ايدو ماا رجعت ليوره
مسحها غمضت من طخت خدي
كال
يويل حالي من هالدمعه اخاف اكولن حدرت لي
ويخيب الظن
رفعت عيوني له صفن بيهن ردد
وره لحظه
عز الله هي لي
خليت ايدي على وجهي وشهكت بالبجي
ختلت وضميتو عنه لجن حالي وودموعي خبرتو
بالگلب وش به
اخذني لحظنو ماوخرت ختلت
به ابجي مثل الطفله ومااريدو يروح لمني بهدواه
كال
اش يبعد حي وحياني لاتبجين تأذيني
شهگه صدرج ودموعج تنزل نار بگلبي
حنيته وكلامو الحلو زيد من قهري بجيت
بحظنه وانا لازم دشادشتو بگوه
ردد
ياهيله بس تبجين خابرج گويه ودمعتج عزيزه
وخرت منو امسح بدموعي وماادحك
له اخذ كلينس انطاه لي لزمتو بايدي وشهكه
صدري تطلع كل ساع تكلم
شتريدين ابطل مااروح ياهيله
دحكت له مبتسم سالتو
تسويها يازين اذا طلبتها منك
سكت وهز راسو بلاااا
نزلت راسي ووجع گلبي زاد سال
يولي انا شاد ظهري بج اكول راح اسري واعرف حرمتي سبعه وراح تگوي امي وتصبرها
على روحتي
مارديت كمل بضحك
هههه وطلعت حرمتي اضرب من امي هم ام دميعه
وخايفه عليه
سكت للحظه بعدين سال
مو خايفه عليه ياهيله
رفعت راسي له يريد جوابي رديت
انت زلمتي يازين شلون مااخاف عليك
ردي خله وجهو يتغير الفرح ترس ملامحو
رد بصوت مخنوك
عز الله زلمتج وسندج طول العمر
الباب اندك سمعنا صوت هاجر كالت
تعالو تعشو
رد
اي هساع ننزل
اندار عليه يتفرس بوجهي مبتسم وفرحان
كام وكال
كومي خله نتعشه
اي
رديت گوة كمت ورحت للحمام غسلت
دحكت لروحي بالمرايه الدموع والخوف بعيوني
خلوني احس اني حبيت زين حب جبير
والجنت احسو مع ابن عمي
تعلق مو حب
كبرت معه اشوفو جدام عيوني تعودت علي
وهو هم تعود عليه اسمي له وهو لي
لجن الگلب ماجان له
جان موعود لواحد ماجنت افكر اصير
له من وره كرهي له وهالكره تحول لحب جبير
سكن گلبي وگلبو
هيله يله
سمعت صوتو مسحت وجهي طلعت
مبدل ولابس تراك دحك لي وهو مبتسم هالابتسامه والنظرات مااعرف شسوي بيه
تخربط وضعي كلش وتخلي گلبي يدك بجنون
انهزمت منو لهيت روحي البس شالي
فتح الباب وكال
يله ترة جتلنا الجوع وانهفينا
اي يله خلي ننزل
زين العابدين
كعدت وي اهلي الفرح تارس گلبي وكل
ساع ادحك لهيله الي فضحت روحها من انهارت
من وره خوفها عليه كلت هالليله راح
تصير لي مادام لانت من يمي
تعشت قليل واحس
بها بعدها تهوجس من وره روحتي وره
العشه كعدت اشرب جاي مع ابويه
هي التهت بالشغل وي هاجر بالمطبخ جهازي
دك شفت لواء شوكت متصل
كلت للشيخ
يابه هذا لواء شوكت متصل
رد يازين
فتحت الخط رديت وعرفت منو لازم هساع
بهل الساعه نتحرك ونلتحق بالفيلق
راح يبدون يحررون مناطقنا
لان ربيعه قريبه من الحدود السوريه ومنفذ مهم ولازم يرجعوها بالعجل ويريدونا حنا لان نعرف الدروب كلها
بس سديت الخط امي حجت بخوف
راح تروح هساع
اي يمه هيله
صحتها اجتي عليه كلت
بالعجل حضري لي هدوم ثخينه شويه
وين رايح يازين
راح نلتحق هساع
ايدها وكعت على صفحه صفنت عليه بخوف
ابويه كام لحيلو كال
هيرو الولد بالعجل خلي يطلعون بامان
الله
ياابو زين
فضه مااريد ولا چلمه خل الولد يسري بدون
عارض ولا تفاولين علي بالشر
امي دحكت لي بقهر والحزن ترس وجهها
هيله سرت من يمنا منزله راسها صعدت اخذت
جهازي خابرت فزاع هيرتو هو وباقي
الولد سريت للدرج صعدت
رحت لغرفتي تفتر بها ومبين عليها التوتر
دحكت لي وجهها مطعون وغادي
دم سالت
راح تروح
اي وين هدومي
ماردت رحت بسرعه طلعت الاسلحه
خليتهن بجنطه سوده تكلمت
هيله هدومي
لاتروح يازين
رفعت روحي صفنت عليها دموعها تسف على
وجهها رددت
لخاطري لاتروح
ابتسمت من تكلمت بتوسل رديت
يولي لاتعلبين معي هاللعبه الشغله حمت مو مال
اهد كلشي هساع
ماردت گربت منها وكملت بحنيه
خاطرج انتي عزيزه عندي كلش لجن هذا
شرف لي شلون تريدين اهدو واكعد حدج مثل
الحريم
خايفه عليك يازين
گلبي زادت داگاتو گربت بعد اكثر وهالخوف
وهالجلمه لعبت بحالي لعب دخت
وضعت اخذتها لحظني
ذبت روحها به
تبجي وتشهك
يويلي منج هساع گلبج حن من راح
اروح
شهكت بصوت قوي وحظنتي بگوه
لميتها بحظني ورفعتها لصدري خليت وجهي
برگبتها بستها منها بشمه نفس
طويل كلت بصوت مخنوك
ياريت الوگت يوگف شويه جان شوفتج
نار گلبي وجويتج بها
ظل يازين
حبي لها جبير لجن مو انا الي اتراجع عن قرار
اخذتو وخرت منها گوة صفنت بعيونها
الدمعه تحدر على الخد
والحزن تارس الملامح ابتسمت حبيتها
من خدها وخليت الدمعه
بحلكي تكلمت
اريد اظل يولي نفسي بيج واريد اشوفج
حبي اريد هالليله تصيرين حرمتي
لجن الجلمه يبنت العرب
مو انا الي اخلفها
بعد ماحجيتها
نزلت راسها مسحت دموعها بايدي كلت
گويني ياهيله خلي اسري بامان الله وادعيلي
ارد الج سالم وغانم
ماردت رفعت عيونها لي الشفه ترجف
والخلقه مطعونه نزلت
بهداوه وبستها من الشفه دخت هناك
وضعت وياريتني ماگربت منها عطبتني وخلتني
افقد ردت اسوي المشتاگ الو
صارلي دهر لجن جهازي
دك ولح وخرت گوة اتنفس قوي وتعبان
من هاللحظه الي صارت بوگت غير مناسب
انسحبت من يمي دارت روحها تمسح
بدموعها تمالگت روحي گوة
سريت لجهازي
ها ياعوض لااا انت مو معنا ياخويه صوابك
حار هساع واهلك بحاجتك هم وعيال اخوك
من نرد مره ثانيه اسري معنا يول
لاتلح الشيخ محتاجك
حنا كلنا راح نسري انت ابقى معه
هو وعبد العزيز وحگ الله ناخذك بس
خلي نرتب امورنا ادعيلنا
ياخوي بالنصر ورفعه الراس
تمام لاتوصي ثار اخوك بهل الرگبه
ترخصت منو سديت الخط دحكت لها
راح تحضر لي هدومي وهي ساكته وكاتمه دمعتها
بدلت على السريع لان جهازي ماسكت
نزلت الجنطه لجوه ابويه كاعد بالصاله امي تفتر خايفه عليه جدتي دحكت لي كالت
يازين ااسمع
اسمع يااجده
يكولون من البيضه مهيوب الحر وانت شيخ
ابن شيوخ اريدك ترفع راسنا انت ولدنا
وتحررون ارضنا من ذوله
الانجاس
ابشري ياجده بالعز
وانت كدها يااازين
ردت بفخر امي اجت لي حظتني تگهد
بالبجي تلوم بيه وتعتب ابويه تكلم
ادعيلو بدل هالكلام
وخرت مني ادحك لي بقهر وحزن ابتسمت
بوجهها وكلت
ادعيلي يمه وارضي عليه
راضيه يايمه لجن هل هل الله بروحك
خاف الله بيه وبأبوك وحرمتك
دحكت لهيله واكفه يم الدرج ادحك لي
بقهر وخوف جهازي دك
جان فزاع جاوبتو
ها اجيتو تمام طالع لكم
خواتك مااشافنك
امي تكلمت بدموع
سلملي عليهن وحده وحده وادعولنا
بالنصر
حبيت امي من راسها وجدتي هاجر
اجتي لحظني تبجي وتردد
ديربالك على روحك ياخويه وخابرنا لاتگطع
بالاتصال
ان شاء الله هاجر
دحكت للشيخ فتح ايدو رحت له
لمني بحظنو بگوه شميت ريحتو وكلت
ادعيلنا يابه
منصورين باذن الله تروح وتجي وانت والوياك
بامانه الله وحفظو
امين يارب
رديت وخرت منو وجهو مطعون وكاتم
البي كال
ودع مرتك يازين
من شافتني گربت عليها راحت جوه الدرج
سمعت صوت شهگتها سريت لها
واكفه ومنطيتني ظهرها
هيله
الله وياك زين
ردت گوة وبصوت مخنوك رحت
لها وصرت جدامها دحكت لي بعيون تبجي
اخذتها لحظني وبستها من راسها
تكلمت
راح اروح لجن اطلبج ليله تستحق اگولن بها
من عقبك اشوف تحتي سحابه وش يقنعني
اني على الارض
ختلت بحظني اسمع صوت بجيها
وخرتها مني وكلت
ودعيني ياهيله بأيد الله
مودع يازين بايد الله وامانو
ردت بشهكه ابتسمت وكلت
اسري معي وگوي گلبج ياحرمه الشيخ
دحكت لي بعدين نزلت راسها سريت وكدتها
رحت للصاله هدت ايدي شلت الجنط
وطلعت بها لبره الولد اجوي
اخذوهن مني
واكفين كلهم بالساحه مال دارنا ونصهم بره
ابويه طلع وراح وكف بنصهم
صاح
يامااال العز ياااولد ذيبه
ياالبي العزوة
ردو بصوت واحد ابويه كمل
مهما يزيد الخطر وتجور الايام گلبي
شجاع مايهاب المخاطر
تشهد لنا البقاع سهولها وهضابها فينا
الوفى وفينا الكرم وفينا الشجاعه والسطر
دنتين يوم الحرا ينكسر حربها
صغيرنا قبل الگبير ان عودت كر وفر
نحرد على حوض المنيا كلنا
مانهابها عز يااامال العز
ابويه حمس ولدنا بهل الشعر وصاحو كلهم
ااابشر بالعز ياااشيخ ابشر يالعزوة
يدحك لهم بفخر ورافع راسو بهل النشامى
الي هبو هبه السيل الجارف بس نادى ابويه بالفزعه
اندار لي ملامح وجهو تغيرت گرب خل
ايدو على جتفي وكال
يااازين
رمال الصحراء تبلع الضعيف
وان ماكنت ذيب تاكلك الذيابه
ارفع راسي ياولدي وعگب لنا سالم
ابشر بالنصر يااشيخ
هاي حگوتي بيكم النصررر ياولد ورفعه
الراس
صاح بنص الولد ردو
ابشر به يااشيخ
اسرووو بامان الله
عم حميد حظني وظل يدعي لنا بالنصر
دحكت لدارنا امي واكفه هي وجدتي هيله
ماهيه سريت وي ربعي صعدت
لسيارتي فزاع يسوق
دحكت لابويه اشر
بايدو واشرت له
الكل تحرك وبده يطلع من السااحه جهازي
دك برساله جانت من هيله
فتحتها كاتبه
يازين دحك لفوك
رفعت عيوني بسرعه واكفه بالشباج مال
غرفه اختي هاجر خاله اللثام على وجهها اشرت
بايدها گلبي مااعرف شصار به كام
يدك بجنون وجن روحي مااسرت معي
ظلت حدها لاراديا رفعت ايدي
لها عيوني عليها فزاع استدار ودحكت لها بالمرايه
دارت روحها وراحت كتبت بسرعه
لاتبجين ياهيله وخليني اسري ماشايل همج
قرت الكتبتو دزت وره لحظه
اسفه يازين انا مالي،سلطان على گلبي ودموعي
رددت وي روحي
ااخ يويل گلبي هساع ولج بهل اليوم لان
الگلب وكام اللسان يتكلم كلام يوجع من وره الفرگه
كتبت
گويني يولي گلبي رجيج من يمج لاتخليني
اعگب وافضح روحي بين العربان
قرت الكتبتو طولت جن اسمع صوت
بجيها وشهگتها بأذني گلبي وجعني قريت
من دزت
دعائك مستجابه يازين والي طلبتو من ربك
انطاها الك الضعف
غمضت وخليت الجهاز على گلبي فرحان وبنفس
الوگت مقهور كلامها اجه بوكت
انا بها بعيد عنها
رساله اللخ اجتني قريت
ودعتك بأيد الله رافع السحاب
يحفظك من كل شر ياوليفي
ادعي الله في كل ليل ونهار
تردا سالما والنصر حليفك
رديت
تسلمين يااهيله وانا هم ودعتج
بايد الله الماتضيع يمو وديعه
ردت
لاتگطع يازين خابرنا وطمنا عليك
فزاع تكلم
وين راح نلتقي بيهم
هساع اتصل واشوف هم كالو مچان قريب
من ديرتنا بس خل اتاكد منهم مرة ثانيه
جابتو وكتبت لهيله
اترخص ياهيله لازم اتصل
الله وياك يازين
ليان
فتحت عيوني وره مااعرف شكد راسي
يوجعني فد مرة وسيم اجه بسرعه عليه سال هو ونوار
هاا ليان شلونج هسه
مارديت درت وجهي منهم دموعي نزلت
بابا طب هو ومالك شافوني اجه عليه
يردد
ها بابا شلونج هسه
قرب عليه نزل راسه باسني من راسي
حظنته وكمت ابجي
اش بابا لاتبجين وتقهرين روحج وتقهريني
والله الي تريدي اسوي الج بس
لاتاذين روحج وتاذيني
وياج
ماردت اباوع لمالك اعرف روحي انهاريت كدامه
والصار بيني وبين امي خلاني
اخجل منه حس بيه
كال
راح انتظركم بره
طلع من يمنا وسيم حجه بتأثر ووجهه
مطعون
ليان لاتبجين دموعج غاليه عليه والله مااتحمل
اشوفج هيج كولي شاسوي الج شنو الي يريحج
واسوي الج
الدكتور طب فحص نبضي وحجه
وياي من شاف وضعي
اختي حاولي تهدأين مو زين عليج هيج
تظلين تبجين فكري بروحج وابوج شوفي شلون
صار من وراج
مارديت هو كمل وي وسيم
تكدرون تاخذوها بس ياريت تظل بجو هادئ
وبعيد عن اي توتر او ضغط
تمام دكتور
اخويه رد واجه ساعدني كمت احس
بتعب ودوخه وكلشي يوجعني ممروده من السمعته
واحس بالغدر من امي الي نست شسوت
بنتها بيه
طلعت سانده روحي على وسيم ونوار شفت مالك
يروح ويجي بالممر شافنا اجه بسرعه
سال
ها كال خلي تطلع
اي ابني
عجل يله خلي نرجع للبيت حتى ترتاح
هناك
وكفت
مااريد ارجع لبيتنا
بابا باوع عليه هو واخويه رددت
بدموع
مااريد اشوف ماما مااريد بابا راح اختنك
هناك واموت
اسم الله عليج بنتي لاتحجين هيج
رد عليه وسيم كمل
ليان انتي تعبان ويرادلج راحه يعني لازم
بيتنا ترتاحين
مااريد
صحت بجنون مراجعين وكفو ظل يباعون عليه
نزلت راسي خجلانه وابجي نوار حجت
عمو خليها بيت اخويه واني ادير بالي
عليها
مااعترضت اي مكان غير بيتنا ماردت اشوف
امي ذبحتني من عرفت بيها تتصل بذيج
وبعدها مصدكه بيها هي مااذبت روحها
على ذاك العار
محد حجه اخذوني للسياره صعدت بصعوبه
من وره التعب سندت روحي على نوار من صعدت
يمي لزمتني وسيم ويانا وبابا يم
مالك
غمضت عيوني دمعتي تنزل نوار تمسحها
وتردد بتأثر
لاتبجين والله روحي انمردت عليج
سمعت صوت واحد تحسر وردد
استغفر الله يارب
جان مالك مافتحت ولا باوعت على اي احد
منهم تعبانه ومقهوره وممروده واحس بروحي
رخيصه كلش يم امي وذيج الغاليه
وصلنا للشارع مالتنا مالك نزل فتح
الباب نزلت وي اخويه ومرته رحت لبيته
بابا ورايه اخذوني لغرفه نوار هناك
تمددت وغمضت عيوني غطوني
رددت واني مااريد اي
احد يمي
اريد انام تعبانه
خليني يمج بنتي
بابا رد نوار كالت
عمو اني اظل يمها لايظل بالك راح ابقى هنا
ومااعوفها
يله بابا خلي نطلع ونعوفها ترتاح
وسيم حجه ورة لحظه حسيت بوسه
على خدي جان بابا غمضت بقوه
طفرت دمعتي كال
لاتقهرين روحج ولاتبجين والله الي تريدي
اسوي الج بس لايصير بيج شي
مارديت مسح على شعري
يله بابا
اخويه حجه واخذه من يمي فتحت شفت نوار تتحرك يمي بعدين طلعت خلت
الباب مفتوح شويه
مالك
واكف بالصاله وادحك للحجي كعد تعبان
هو ووسيم الي صفن الوجه مطعون وغادي دم
نوار اجتي من يم ليان نفس وضعهم
حجت
وسيم راح اظل هنا يمها منا الما تتحسن حالتها
شلون تظل هنا نوار ماايصير
رد بقهر ابوه كمل
خلي بس شويه تتحسن واني اخذها لبيت
ام رسول
مايحتاج عم خلوها هينه
دحكو لي كملت
اني مو موجود طول اليوم وماارجع لليل ومن
ارجع وياي وسيم يعني خلي يجي هينه
ويبات يمنا خاف لاسامح
الله يصير شي اني ويا
نكدر نتصرف
ابوه نزل راسو ردد بقهر
اذا صار بيها شي اني اموت والله مااطيب
رديت بسرعه
مااايصير شي بأذن الله بس خلوها براحتها
ولا حد يضغط عليها
عمو تره هنا احسن انت قريب منها تكدر
تجي عليها وتشوفها يعني هناك ماراح تاخذ
راحتها تعرف رسول راح يزوج ومشغولين بي
وبتجهيز بيته
اثنينهم سكتو وسيم دحك لي وكال وره لحظه
خاف زحمه مالك
لا يابه رحمه لاتنسى حنا صرنا اهل واليصير
عليكم يصير عليه
تسلم ابني وبارك الله بيك
الحجي رد وكام اشر لوسيم طلعو سوه نوار
ظلت يمي كالت من راحو
راح تعلك بينهم وبين عمه
خلي تعلك من عساااها بالحرك
رديت بغضب رجعت للمطبخ صاير نار حاولت
جدامهم ابين هادئ بس اني جنت لازم اعصابي
بالگوه رددت بغضب واني
جاز على سنوني
ووج هي وحده گحبه وساااقطه انطت شرفها
لذاك العار وهي راضيه وذيج المسكينه
اشرت باعصاب على الغرفه النايمه
بيها ليان كملت
سمعت كلشي عرفت اختها سوت السوتو حتى
بس تاخذ زلمتها لان طاك وعندو فلوس
ومنصب طمعت به الكل
يشوف هالشي الا عمتج الثوله عميه
عيون وگلب ماتشوف ماتفهم الا تروح ليان
من ايدها
اختي لزمتني وحجت بخوف
اش مالك راح تسمعك
ووج ااخ لو بأيدي اذبحو للعار هو وذيج
البربوك حتى تبرد نار گلب ليان وترتاح
اكعد الله يخليك واهدأ لاتروح تسمع وهي
مااتكدر وصايرة فد مرة
رووحي شوفيها
اي هسه بس لاتعصب
مشت من يمي جرس الباب اندك كمت طلعت
جان وسيم جايب توته توها كاعده من
النوم وتفرك بعيونها وجهو
جان مطعون ومبين
علي الغضب
كلت تعارك وي امو كال
كعدت ادور على ليان ونوار
جيبها
اخذتها منو رجع لبيتهم رحت للمطبخ نوار بي
سألت
وسيم جابها
اي
كعدت بنتي بحظني اهز برحلي متوتر
وضايج ومقهور من الشفتو انهارت وانكسرت
للمره الثانيه من اقرب الناس الها
بنتي دحكت لي كالت
ابا
صفنت عليها نامت على صدري
حظنتها اختي سالت
اسويلك ريوك
مااشتهي اي شي
اجتي كعدت يمي توته راحت الها كمت
تمشيت للصاله وكفت يم باب الغرفه دحكت
من الفتحه نايمه ومبين عليها
التعب
شهم
بعد استشهاد احمد الحجيه وريتاج
ماظل الهن احد غيري
جانو مكطوعين من شجره بس عدها عم واحد
وجان معوق وظل بالموصل
سكنا بمدرسه مؤقت بعدين اجرت
مشتمل صغير كلش هول وغرفه وحيده هن
كعدن بيها وانا انام بالهول
الفلوس من ام احمد خلصن باول شهر وكمت
اشتغل مره عماله مره بالعلوه واسد
حاجه البيت
بليل طبيت شايل مسواك
ريتاج تلكتني مثل كل يوم تسلم بخجل
الله يساعدك
هلا ريتاج
تقوم بواجبي من كلشي حمام واكل وتظل
يمي كاعده هي وامها نتعشه سوه
اشوفهن الحزن تارس وجهن الاسود ثوبهن
سالت امها من شربنا الجاي
شلونج اليوم
الحمد لله ابني
جبتلج دوه الضغط اخذي حتى مايصعد
ضغطج
تسلم ماقصرت ويانا بشي احمد جان
يكول عليك انت نشمي وابن اودام وطلع كلامه
صح
حجت هيج وكامت تبجي
ريتاج دحكت لها دمعتها نزلت ذبيت حسره
وكلت
االله يرحمو جان صاحب نخوه ومروة
ربي يجعل الجنه مئواه
امين يارب
رددن سوه سكتنا ريتاج كامت وراحت للمطبخ
امها دحكت لي وكالت
يمه ثائر اريد احجي وياك بسالفه
تسميت بهل الاسم من احمد وسوه لي
هويه مزوره ،،،،،حتى اكدر اتزوج بها اختو
واطلع من الموصل رديت
تفضلي يمه اسمعج
انت مثل ماتعرف تزوجت ريتاج بس على
الورق لان ردنا نطلع من الموصل وجنا خايفين
عليها لاياخذوها ذوله الانجاس
اي
وتعرف كلش زين انت ماتذكر منو انت ولا
منو اهلك يعني تزوجتها باسم مو اسمك وبهويه
مزروة ةهالشي مايصير ولايجوز
اعرف خاله وكلنا هذا مؤقت
حتى بس نسلم من ذوله الچلاب
اي اعرف بس
سكتت دحكت للمطبخ رددت وره لحظه
بكسره نفس
تعرف احنا بعد مااعدنا غير الله وانت يعني
الجان لامني اني وياها راح وسكن
الگبور
بجت من حجت هيج رديت
يمه الي يريحج شنو كولي اسمعج عيوني
لج انا ماانسى فضلكم عليه منا الما
اموت
مسحت دموعها رددت
اريد بنتي
