رواية خفايا القدر الفصل السادس والثلاثون بقلم انين الروح
فتحت عيوني
شفته كاعد يمي ركبه ونص ولابس القميص الابيض المنقط الي اني اشتريته اله وبنطرونه الاسود وكاف اردانه
يهمسلي بذني كوم ياعسل انت
احتركت عشيرتج واحد واحد
انتي نايمه عالفراش اهنا مرتاحه
وانه اهناك وحدي بفراشي اتكلب ...ايا بنت الجلاب
كمت حضنته قوي وبوس بي وشم عطره السطرني من اول يوم شفته هو هذا عطره نفسه ميغيره ابد اشكد احبه
بسته من شفته
اله اسكرت بنبيذ حبه
ها شو هم رجعنه عالغلط
لا حبيبي هذا مو غلط
هذا دلع هههههههههه..
تره حلو القميص عليك
هو انه اتقصدت البسه وجيلج بي لان اعرفج تحبي كم مره انه صايدج بي تشمين وتحضنين
اني 😜😜😜😜..؟
اي انتي لا تنكرين
لا حبيبي انت متوهم ما اشم ولا ابوس قميص احد
.يله كومي
كام هو وسحبني من يدي كمت ونلزكت ع صدره حوطني بيده من خصري واني حضنته من ركبته وصعدت ع جف رجله
كمنه واحد يبوس الثاني اول مره بهدوء بعدين صارت بوسات قويه
يله عيني عوفوا الحب والاشتياق بعدين من ترجعون البيتكم بلشوا
جراح ..طبعا اختج اتكولين ضابط استخبارات والله
رهف ..هههههههه عود ليش
مشوفين شلون جتي وضبطت علينه
اي احسن لان لو ما جايه اختي جان اتمادينه اني وانت وسوينه اشياء
مثل شنو اشياء
ما اكلك
كولي رهف احب اسمع شنو هالاشياء
كافي جرااااااح يله خلي نطلع
تعاي وين ماشيه
يمعود والله عيب من طه واختي هاي اشبيك
ولج غير محروم صار اربع اشهور شكلتي الربج من عفتيني وحدي شنو من كلب احجاره شايله الخاطر الله
اي احسن حتى تعرف اني مو لينه ونكسر ابساع
لاعمي انتي مو لينه ابد طلعت اني الين ونكسر ابساع
يله خلي نطلع
طلعنه باوعت بالبيت ماكو الجهال
جراح شنو مجبت الجهال وياك
لاحبيبي مجبتهم والله يتعبون الطريق طويل مهلك عليهم عفتهم يم امي والبنات واحنه ان شالله اليوم نرد مانبقه
كعدنه وياهم سوالف وحجي هواي كمنه اني ورفيف نصبنه الغده تغدينه وشربنه جاي صارت الساعه ٣ الظهر
جراح ..يله بويه لازم نتوكل ورانه طريق شكده
رحنه اني ورفيف خلينه شغلاتنه بالسياره
ونطلقنه الطريق كله جراح يغني ومتونس ومشغل مسجل ومنطلق ويه الاغاني
طه بسيارته جاي يباوع علينه هو ورفيف ويضحكون
وجراح كل اشويه ماد يده ع مكان وكارصني ويغني العب بيها يابو اسميره اليله هاي بس الك ولعب بيها يابو اسميره
واني اضحك ع اسوالفه وحركاته
وصلنه بالليل دخل سيارته بالكراج هو وطه
نزلنه واول واحد شفته
واجالي يركض طيران صكر
اركضت عليه 😍😍😍😍😍 واني فرحانه
اوكعدت ع اركبي وحضنته لزمته من راسه وابووووس وحضن وشمشم
يمه حبيبي فديتك كبرا ياعمي
وبوس وبي وما اشبع اريد افتح كلبي وضمه بي وما اطلعه ابد منه
وجالي جبل يعيط من بعيد
صكر ابحضني وفتحت يدي الخ الجبل وخذتهم اثنينهم ابوس بيهم وابجي متت متت بجي 😭😭😭😭😭😭😭😭😭😭😭😭😭😭😭😭😭😭😭
والله صار عندي فد احساس بس اريد افتح كلبي وضمهم بي الله لا يحرمني منكم بعد ياعمري انتوا
اباوع ع يقين واكفه يم الباب
صحتها وجتلي نركض سوده عليه يمه شلون عفتكم
عمت عيني عليكم احضن بيهم وما اشبع
شكد كبرتوا شبساع
بعدين كمت بوست وسلمت عالموجودين كلهم
رحت ع عمتي سلمت عليها وبوستها
ورحت عالجده هم كذلك وهي ضلت تشعرلي كلام حلو
احبنك وما احبن غيرك
وللموت انه امشيلك
وع جمرات كلبي انه كاعده اغنيلك
وينك تعال مو نهجم بيتك
خل حبيبتك تكعد تهفيلك
وتكصلك الحمه وبصيله تشويلك
وع الثيلات نكعد نلف لفات وانه انطيلك
حتى جكاير تتن الفلك ووديلك
بس تعال انه كلشي اسويلك
رهف ..شنو هاي بيبي هذا شعر لو مجرد كلام مصفط وجاي تشعري النه
الجده ..اسكتي ولا اتكاطعيني شلون تهدبن الزلمه اوحده خو وفريخاته ما خفتي تجي اوحيده وتلفه منج تشوفه اوحيد وحلو ومحتاج مره تاخذه وتشرد
بيبي ..قصدج هو اليشرد بيها
لان هو معترس ماينشال حتى تكدر تشرد بي
يله بسج اخذي زلمتج واليوم شبعي انه لو زلمتي عايش اله يوميه نعرس انه وياه
عزه هاي بيبي هم روحها بعدها خضره وتعرف سوالف الزعلانين من يرجعون شيسوون
الكل ضحك ع اسوالفها والحمدلله اتعشينه ودجهالي كاعدين اتلاثتهم يمي وبحضني
جبل خو خانكني من ركبتي ميقبل ينزل وصكر ويقين كاعدين ع رجلي
وابوهم بصفي هم كاعد
احسهم خايفين لا اروح اطير منهم ههههههه
حلو هالشعور من تحس الكل محتاجك ورايدك وحاس بالامان ابوجودك وقربك منهم
يارب خلي ادوم فرحتي ابرجعتي الهم وما اتندم ع شي يارب
كعدنه نسولف اهواي امور صارت تقريب ساعه ١٢ بليل باوعت ع جراح اشرلي براسه
اترخصت من الكل وشلت جبل وطلبت من رباب اشيل صكر
وجتي يقين ويانه صعدنه فوك خليتهم ع جرابيهم ونيمت يقين
واني انومها كعدنه اني ورباب نسولف
لج احجيلي شنو وضعج
والله يارهف ما اعرف شو همه بس حجو والحد الان ماكو اي خبر منهم
زين ماخابرتي عليه فهمتي منه شي
دكيت يكلي اصبري
اي اصبرلي لعد ما طول كلج هيج لابد عنده فد شغله وميكدر هسه يجي
والله يارهف اني خايفه اخاف اهلي
يرفضوه
لا لتخافين جواد خوش ولد وهو يشتغل ويه اخوتج واكيد كلشي يعرفون عنه
وانتي الصدك غير محد من ولد اعمومج اتقدم الج الحد الان حتى اخوتج ترفض جواد
ادعي من الله يوافقون ويصير من نصيبج ان شالله
نامت يقين خليتها ونزلت فرشت الاختي والزوجها بغرفه خاليها لضيوف
بعدها صعدت فتت سبحت وطلعت تعطرت وبدلت شي حلو مال نوم
وتمددت عالجربايه انتظر دخلت جراح
تقريب عشر دقايق ودخل
شافني لو طار عقله وكلبه من مكانهم
اجه يمي يبوس ويحضن
اوووووف ياريحتج الما هدت بخشمي وحاسيسي فديوم
رهف والله انتي خبلتيني طيرتي برج عقلي ماخلتي عقل بيه
انه الماعشكت مره ولا حبيت
جيتي انتي صرتي كل حياتي انه بدونج هيكل بدون روح
فديت اليحبني اتمنى يبقه حبك هذا طول حياتي وما يتغير ويايه ابد ومتاخذك وحده مني
حبيبي انه بس الج وما اصير الغيرج يله عاد كافي حجي تعاي الحضني خلي اشبع منج
عندي حرمان اربع اشهور لازم اليوم كله اعوضه
وجعععع شنو هالحجي جراح والله اخجل
والله دنعل ابو الخجل تعااااااي
ورحنه العالمنه الخاص
صبحنه الصبح شفنه جايبين ذبيحه
وعمي راح يطبخون الباجه والكراعين مالتها
ويعععععع لعبت نفسي ما احب اشوف حتى منظرها
اتوسلت يبهن ميطبخوها بالمطبخ ماحب ريحتها
كامت زينب طبختها بالترك خلف البيت اكو مخزن صغير
قبل الغده بساعتين اجالي جراح
يله كومي خل اخذج البيتنه تشوفي
ليش هو خلص
اي بس بقه نشتريله غراض بسيطه ونكعد بي
يله بس انطي خبر الاختي
.
ونطي خبر الامي خل تجي ويانه
صار
طلعت ونطيت خبر الاختي والامه تحضرنه وصعدنه بالسياره
صح هو مو بعيد بس جراح ماقبل نطلع ونمشيله ع رجلينه
وصلنه وفتح باب البستان دخلنه جوه مسافه نزلنه
جراح ...رهف هاج
شنو
هذا مفتاح بيتج روحي بيدج فتحي بابه
اني الصدك طرت من الفرحه واخيرا صار عندي بيت ورجعتلي عائلتي
مشيت افتحت الباب ودا ادخل صاحت عمتي اوكفي
التفتت عليها ..ها عمه شكو
يمه سمي باسم الله وفوتي برجلج اليمنه
خطيه جانت جايبه وياها جيس جكليت وكامت اطش علينه وتهلهل وتكول
ان شالله عتبت الخير والسعاده عليكم
حيل جنت فرحان ومن فرحتي الدنيا ماسايعتها
افترينه بالبيت فصاله حيل حلو مرتب وجبير صح ناقصه شغلات بس كلي جراح نطلع اني وياه نشتريهن
صعدنه فوك باني تقريبا بالخمس غرف
جراح شدعوه هالكد غرف
ضحك ههههههههه حتى نمليها جهال
لاوالله قابل شكو ابزازين
اي شعدنه انتي خلفي وانه اربي و اكبرهم
لاوالله صدكتك انت بس تسمعه يبجي اتكوم من مكانك عبالك ضربك بكلبك ومتتحمل صوته
اي ما اتحمل صوت بجي الطفل بس احب الاعبه الطفل حلو بالبيت
يله خلي انسوي طفل ولزم يدي وجرني اله
تره جبل كبر ومحتاج اخ
شنو هاي انت
وين انام عالكاشي روح عني جراح الله يخليك
ولج اليوم يجيبون غرفتج وينصبوها
اليوم انبات ابيتنه وشوف شلون ميصير اخ الجبل
تدري اني حابه شي بيك
شنوه بله كولي خل اسمعج
انت رغم عندك جهال اثنين يقين بجرك وجبل ابنك بس ابد متقبل واحد يصيحك بسمهم
باقي ع اسم صكر والكل يصيحك
ابو صكر
لان صدك صكر ابني مو ابن اخوي انه الشلته اول مابجه واول ماتنفس هوه الدنيا
لو نسيتي
لا شلون انسه
ما انسه من شلته وحضنته وهو بدمه
ومن سئلوا ع اسمه
كبل كتلهم صكر وبصوتك هذا الخشن
اني احمد ربي لان ابني ماتربه يتيم وصار عنده اب واخوان
ولج غير انه راح اسطرله دسته اخوان لخليهم فريق كره قدم
هههههه انت مجنون
اي غير انتي جننتيني
صدكي يارهف بس يمج ما اعرف اتغير شكد انه قاسي مشاعر ويمج مشاعري كلها تظهر
احسن مالحك ع كلبي وعقلي يصيرآ يضاربن واحدهن بالثاني ويردن بس يلحكن عليج ويضمنج الهن
رهف اني لكيت بيج شي مالكيته عد غيرج
انتي حيل طيبه وبريئه وفقيره بيج كل الصفات الانه الاحبها وحيل تعلمتي مني اشياء جنت فعلا اتمنى اشوفها بيج
والحمدلله ربي ماقصر وياي
من دزج الي بيوم ماجنت بي اتوقع تكونين الي زوجه ومره وام جهالي
حضنته حيل وبسته من شفته وبدلع مني انزلت ع ركبته وفتحت زيج دشداشته عالخفيف
هو خدر حيل راد يوكع من طوله
كرصته بزنده
فتح عيونه
انت وين سرحت
والعباس معت بيج ..تعاي رهف خلي اندشن غرفتنه
اني ابتعدت عنه وتوجهت سريع نحو الباب حتى اطلع
وجان هو يغلبني ابساع وصل للباب وسده وكام يضحك 😂😂😂😂
وين ماكو طلعه منا ليش هو دخلت الحمام مثل طلعتها
لا الله عليك جراح خليني اطلع والله عيب من عمتي ورفيف
احنه مجاي انسوي شي عيب
ميخالف بس مو هسه الله يخليك خوما عالكاشي
اي شكو بيها هو اكو احلى من الكاشي
اني اركضت هو ركض ورايه واني متت ضحك عليه 😄😄😄😄😄😄😄
كافي جراح والنبي كلبي راح يوكف والحمدلله سمعت صوت امه اصيح علينه
وجان تدخل للغرفه شافتنه واحد يركض وره الثاني
خايبين اشمالكم رادين جهال وتتراكضون جنكم احصونه وتعلبون
اي يمه ردينه جهال
غير انه اريد منها جهال و تجي يمي وهي تشرد
خاب استحي من حالك لا تحجي هيج جدامي
ليش يمه الحجي مامنطيج حقج مقصر وياج الزلمه
خاب تسكت لو شلون ..يله انتي شني عاجبتج الحاله لو هم تردين طفل
لا عمه اني جايه وياج
خليت وطلعت بعدها رجعنه للبيت
تغدينه
وبدو الشباب يحولون غرفته للبيت الجديد
واني ورفيف ورباب وجراح وطه رحنه للمعارض حتى نشتري شغلات للبيت لان معوزين كم غرض
اشترينه وعزمنه جراح لا عصاير طبيعيه كازينو عالشط
لليل تعشينه ورجعنه
نزلنه ابيت اعيالي
وجراح هو وطه راحو البيتي ينزلون الغراض
وبعدين رجعوا للبيت جراح كلي اليوم ننام اهنا وباجر عودن نتحول
ما اعترضت
رفيف باجر هم ترجع البيتها لان عدها دوام
ودعناها هي وصت جراح عليه
للظهر كلي يله امشينه البيتنه
رحت سلمت ع عمتي والجده وكل الموجودين بالبيت
عمتي والجده كامن يبجن لان موقف صعب هاي اول مره جراح يبتعد عنهم وبعد مايرد للبيت
كل مره يسافر اسبوع شهر بس يرد الهم
هاي الطلعه ماراح يرجع ينام يمهم وبحضن امه وجدته
اخذت جهالي اتلاثتهم حتى يقين اخذتها ويايه لان اني ربيتها من هي عمرها اشهور
دخلنه بيتنه كمنه اني وجراح صلينه بي هو فتح القران وكام يجود بصوت عالي شكد صوته حلو وحنين
كمت حضرت عشه النه وتعشينه صارت الساعه ٩ بليل شو الجهال كبل نامو
وجراح مطلع من البيت ظل كاعد يمي
جانت طالعه مسريحه قديمه حيل مال الواد سيد الشغال
نتفرج ونضحك
كمت شلت الجهال وديتهم للغرفه
هو جان شايل يقين
خليناهم بفراشهم
يله رهف خلي ننام انه حدي تعبان
هاي شنو بعد وكت توها بالعشره جراح
والحسين تعبان انه حيل ظهري حاس بي يريد يصير نصين
انتي اذا عاجبج ظلي باوعي عالمسريحيه وانه فايت انام
لا لا هسه اجي بس اطفي التلفزيون والاضويه
خليت ولحكته فتت سبحت عالسريع شفته هو هم سابح بس متسطح عالجربايه وخال يده ع عينه
اتقربت يمه اباوع شنو ماله حس الزمت ايده ما انطاني رد فعل
خطيه يمكن نام
عفته وداريد انام
جان يسحبني الصدره صرت انه وياه طول بطول يضحك
وين تهربين مني اليوم
😋😋😋😋 اني مهربانه منك اصلا اني جيت عليك وشفتك نايم
لا انه سويت هيج ردت اشوفج رايدتني مثل ما انه رايدج
هاي مراح اجوز من اسوالفك جراح شنو كل سالفه وتكلي رايدتني
اني اذا ما اريدك شلون ارجعتلك
جان بقيت ابيت اختي وطلكنه
جراح اني احبك اكثر من روحي خلي هالشي في بالك وللموت ما ابدلك بكنوز الدنيا
حضني وضل يبوس ويلعب ابخصل شعري ورحنه بغير عالم
الحمدلله حيل ارتاحيت بهذا بيتي صح ميفرغ من العزايم مال جراح
بس هدوء وسعاده حيل حلوه
الجده جابها جراح يمنه خصصنه غرفه وكل فتره تجي يمنه تظل اسبوع اكثر وترجع البيتهم
عمتي كذلك والبنات
واني ايضا اروح يمهم بس ما ابات اروح الصبحيه ومرات ارجع العصريه او بليل حسب الخطار المتواجد يمهم والشغل
وبعد عده اشهور جابت موج ولد وجانت خطيه ولادتها حيل صعبه بحيث وصلت للموت وبعدين ولدته بس شرفعه صدك يخوف
عمتي سمته ايوب ع اسم المرحوم
مر اسبوع ع ولادته ايوب
وعمي جبار
خابر ع الولد والعمام يجيبون المطهرجي وجوي وطهروه الولد جهالي اثنينهم صكر وجبل وابن رقيه عبدالله وايوب
سوينه حفله لا صارت ولا دارت ابكل الديره جابو مطرب والذبايح والطبخ والناس كتل ماتنوصف ولا تنعد من كثرتهم
رفيف ..اكلج رهف
ها اعيوني كولي
اكلج يمكن اني حامل
😃😃😃 صدك تحجين
اي والله لان فاتتني صار عشرين يوم واني كلشي مماخذه قبلها
اي لعد الف مبروك سويتي تحليل
لا
اي غير تحجين حتى اندز ع جهاز الاختبار ونعرف
هسه حدز واحد من الجهال عالصيدليه
اجه ابن زينب بيده الجهاز
اخذته وطلعت فعلا حامل
افرحت حيل واتمنى اجيب ابنيه
وبعد فتره سمعنه ازهار خطبها واحد بس من غير عشيره
ومرت الايام والشهور علينه اختي جابت بنوته سمتها ع اسم امي اميمه الله يرحمها
اني استغربت ع حالتي مجنت اعرف حالي حامل لان ابد ما صارت عندي عوارض حمل
جانت هاي احبالتي تختلف عن هذنيج البطنين ابد لاتعب ولا لعبان نفس ولا شي من هالقبيل
فرحت حيل كلت اكيد هاي ابنيه اني حامل بيها
جنت اتمني يكون عندي بنوته تشيلني من اكبر اني حيل احب البنات
جنت حتى من اسمع نانسي اغنيه يبنات اتخبل بس اريد يصير عندي وحده
وجراح يدخل ويطلع يكلي صايره كونيه عود يعيب عليه لان سمنت شي خرافي
حتى اني خفت ع حالي
وبيوم جنه نجبز واكفين اني ورباب وموج لان عدنه عزيمه ومنلحك والكل مشلوش لان المحافظ راح يجي علينه
صدك انخبصنه
كمنه نسمع صوت رمي عبالنه المحافظ وصل
واني حامل حسيت شي حار دخل ظهري باوعت رباب وكعت وموج ايضا واني اخر شي وكعت
افتحت عيني بالمستشفى
باوعت اول شي ع بطني وكمت ابجي وجراح واكف ع راسي
اتحمدلي عالسلامه
جراح اني ليش ماعندي حظ بالحباله احس كل ما احبل ابطفل
اموت الف موته الحد ما يجي صكر ايوب مات وبيوم زواجنه جبته لدنيا وجبل بيوم ما رموك جبته وهم جبته اسبيعي
وهاي البطن الله اعلم يعيش يموت ما اعرف
جراح اني ليش هيج حظي فهمني
بويه اذكري الله الحمدلله جهالج عايشين ومابيهم شي
هي ظروف اصير لا اكثر ولا اقل لاتظلين اتفكرين هيج حرام يابه
عرفت رباب هم مصوبه بطلقتين وحده برجلها وحده بيدها
وموج شظايه واصلتلها منعرف منين وهم خياطات اربع اماكن ابجسمها
ظليت ابجي وتحمدربي ع كل حال وادعي ربي يحفظلي هالطفل لان كالوا الطلقه صايره في مكان خطر قريبه عالعمود الفقري وخاف تأثر ع الولاده او الطفل
بعد فتره طلعت من المستشفى وعرفنه هاي العمليه الاستهدافيه من جماعه راجعين العشيره فلانيه وهاي العشيره هم اله يد مع عشيره يعكوب
عرفت نفسي بعد ما اكدر امشي ع رجلي متت من البجي 😭😭😭😭😭😭😭 ع حالي
لان الداشوفه والداعيشه اكبر بهواي من عمري
ظليت ست شهور نايمه ع ظهري ابيت اعيالي ع سديه خاصه حتى ما اتحرك والطلقه تتحرك من مكانها
وكل فتره ياخذوني واروح دكتوره اخذ سونار خاف صاير شي عالطفل لان الطلقه مكدرو يطلعوها ابسبب احبالتي بس ما اعرف شلون مليفيها ماعرف شلون حتى متأثر ع صحتي
وحسيت عالولاده من دخلت شهري
جبت بعمليه
بس بدل الوحده صارت اثنين عمليتين
هم ولاده وهم شالوا الطلقه
جبت ولد ثالث
ونقهرت لان اتمنيته ابنيه بس الحمدلله اجالي كامل الخلقه ومابي شي ولا متأثر بالطلقه
جراح سماه فهد ع صاحبه لان حيل يحبه وهو رجل سبع وابو الهمم وقوي ع زمانه وبكلشي واكف وياه
طلعت بس صرت اتحرك بكرسي متحرك
وسنه علاجي طبيعي وفيزيائي الدكتور كال بالعلاج تتحسن وترجع تمشي
وهسه اشويه اتحسنت وكدرت ارجع اوكف ع رجلي بس مشيتي بطيئه ولازمه عكازه يله امشي
وما اشيل شي ولا اسوي شي
اتوسلت بجراح ياخذني بس امتحن الكيمياء ونجحت الحمدلله
انخطبت رباب لجواد الجانت تحبه طلع صادق وياها وتقدملها ما رفضوه كبل وافقو عليه يمكن لان خوش ولد او ماكو واحد من عمامهم حجه برباب
وهذا من اتقدم محد اعترض وطلبها غيره
وصارت القسمه واليوم زواجها وجاي انجهز كلشي
رحت وياها للصالون اني و موج طلعنه حيل حلوات اتلاثتنه
رجعنه للبيت والكل يهوس ويغني ويركص
اجمل عرس حضرته هو عرسها
للمغرب جوي واخذوها بعد ومشت عنه راحت البيت عدلها
جراح حجزلها بالفندق لان خطيه زوجها جواد حالته الماديه مو حيل قويه
اليوم احنه هم نعرس مثلهم مو
😜😜😜 اي عادي انعرس بس ماريد نعرس ابيتنه
خاب وين تردين تعرسين
احجزلي ليله مثلهم بالفندق
صدك تحجين .
اي ليش لا قابل منكدر لو فلوسك قليله شو كل العالم تروح وتسافر وشافت دنيا اله اني لا شفت شمال ولا تركيا
لا والنوب تردين تركيا
ليش لعد وحد عن الناس شو جهالي وكبرو واكدر اسيطر عليهم واني صحتي الحمدلله اتحسنت وهم نروح اكشف ع اعظامي خاف بيها شي عالاقل اتلاحك النفسي قبل لا اتعب وعجز وانت تتركني وتروح تزوج عليه
بويه انه لو رايد زواج جان من قبل سنه انه مزوج
أحببتك فقلبي لك سكنآ ووقاء
أحببتك فصدري لك دفئآ وغطاء
أحببتك فشمسي تشرق لك صباحا ومساء
يله امشينه خل نروح للفندق مثلهم بس جهالج وين تتركيهم
اعوفهم يم عمتي شو همه اكبار بس فهد اخذه ويايه
لا حتى فهد عوفي يم امي هو مو يرضع ممه
اي هي ترضعه اذا بجه
لا خطيه جراح خاف يتعبها
لا امي ماتتعب من الجهال بالعكس راح تتونس بي يله امشينه تره صعدت الحماوه واليوم انتي لاعبه فلك بروحج
ونطلقنه وبضحك واغاني الكاظم
اسمها
انسى العالم كله انت بين احضاني
انت بدنيا جميله انت بعالم ثاني
عالم كله محبه لونته بحناني
غمض عيونك وسرح في عالم احساسي
ونسى اهمومك وفرح ياكل اهلي وناسي
ماعدنه اليجرح لا ظالم لا قاسي
انت عيوني وكلبي وذاكرتي وجداني انسى العالم كله وانت بين احضاني
وصلنه للفندق وحيل فرحانين ومستانسين
جانت ليله ولا الف ليله وليله
كلشي سوينه بيها ماخلينه
اول ما بده هو اني
بعد مادخلنه للغرفه وغلقنه الباب علينه رحتله امشي بدلع واتموع كدامه
وصلت اله هو لابس قميص وصدره عريض وخصره حلو ابد ماعنده كرش لان حيل مهتم ابجسمه يلعب رياضه بالجم ومخصص وكت الها
كمت افتح اول دكمه
هو محوط خصري بيده ويشم ابركبتي ويبوس
واني افتح بالدكم الى ان خلصتهن سحبت القميص ونزعته وبديت افتح بالحزام
جان يكعد ع الجربايه وكعدني ع رجله ورجع يبوسني ويشم عطري نزل من شفتي ع ركبتي وصدري
اخر شي بعد متحمل ولا اني
دفعته من صدره هو نام عالجربايه وسحبني الصدره وتهنه بغير عالم
الفجر كعدني جنت غاطه بالنومه
حبي تردين باجر نسافر
شلون انلحك جراح هاي اشبيك شنو جنت تحلم بالسفر
لا بس حبيت اصحيج لان ماريد هاي الليله تروح منه
وهم سحبني الصدره
الصبح كعد خربان ضحك يباوع عليه ويضحك 😄😄😄😄😄
شكو اشبيك ليش تضحك
والعباس يارهف ع شغله البارحه غير اله تحبلين بطفل
عزه بعينك ماريد بعد عفيه اعتقني من الخلفه والنبي هالمره اذا حبلت كبل اموت مابيها مجال لان كل ما احبل يصير بيه شي وظل مسكطه التسع شهور كلها
لا حبيبي هالمره اذا حبلتي اضمج ابكلبي حتى ميصير بيج شي
😍😍😍😍😍😍😍😍
كون هم الله يرزقنه بولد
ولك كافي ماريد ولد شبعت منهم اريد ابنيه عفيه والله احب البنات اموت عليهم .
اي كعدي احجي وياه ويأشر ع.....؟
عابتلك شكد ماصخ شنو هالحجي
عابت والله عابت يله خلي نطلع ظل بالي عالجهال
وبعد يومين حققلي حلمي جراح وسافرنه التركيا ضلينه اسبوع ورجعنه
ماخلينه مكان يعتب علينه رحنه السكاريا محافظه حيل حلوه وبيها عراقيين كومه
بعدها رحنه دكتور عظام مختص والحمدلله بشرني ماعندي شي يستدعي للخوف ظهري سليم ورجلي قويه
رحنه بحيره سبانجا وزنبيق
وصعدنه المترو
وكثير من الاماكن الحلوه واكلنه الاسماك البحريه حتى السلطعون والمحار طلبناه وضكنه طعمه مثل طعم السمج بالضبط
جراح ماكلهن من قبل لان هم موجود منها بالبصره بس اني لا مماكلته هاي اول مره اضوكه وعجبني حيل
رجعنه للعراق وبعد شهر من رجعتي فعلا طلعت حامل ورباب ايضا سمعت بيها حامل
اكيد هسه الكل حيكول شنو انتي بزون كل سنه مخلفه طفل
بس هاي مشيئه الله شي مو بيدي والحمدلله والشكر ع عطاياه
واكيد الكل حيكول هيج نصلح جراح وبطل عصبيه وضرب ونسوان
لا مستحيل ماكو هيج شي
جراح هو هو
ما بطل لاصياح ولا عصبيه ولا مسبه بس النسوان اي ابتعد عنهن حيل
بس بعده ع كلشي يتناكر ومرات يضرب
بس شسوي كل ما اعصب اطلب الطلاك بس ارجع افكر ابجهالي منو الهم
وهاي راح يخلص العمر كله ويه جراح
بين مد وجزر ماكو رجال نبي ع وجه الارض
ولا اكو مره ملاك
مثل مايكولون
(ذيل ال ........ماينعدل لو تشده ٤٠ يوم)
الحياه الزوجيه مو كلها عسل ولا كلها بصل
يوم حلو ويوم مر
والحياه اتعلمه كلشي ونمر بكلشي والتجارب اتخلينه نقوه ع زمانه ونكون شديدين
اتمنى قصتي عجبتكم ونالت رضاكم وستحسانكم
واتمنى ما طولت عليكم
هاي كل قصتي حجيتها الكم بالتفصيل الممل واتمنى من كل البنات متترك حلمها ولا تترك عائلتها مهما يكن
لان سلاح المرءه الصدك هو شهادتها واسرتها فقط
وخفايا القدر محد يعرفها غير الله سبحانه وتعالى
انت تريد وانا اريد والله يفعل مايريد
وكلشي مكتوب علينه لازم نشوفه
احبكم حيل واتمنالكم السعاده في حياتكم العلميه والعمليه
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
