 |
القضية الثاني والعشرون كورو الفصل الثالث بقلم اية السحماوي
_ كورو ملهوش علاج نهائي.. الشخص بيفضل يضحك لحد ما يموت..
اتعدلت و أنا بستوعب كلامه و بعدين قولت:-
_ يعني إيه؟ و يعني إيه كورو أصلًا أول مره اسمع عن المرض ده؟ و اشمعنى الضحك!!
سِكت شوية و اخد فنجان القهوه اللي الشاب عمله، و جاب ليا واحد.
شرب منها شوية و أنا و هو لسه بنحاول نهدى و نستوعب احنا أكلنا إيـه، و حقيقي الواحد في معدته كمية قرف مش طبيعيه..
وصلت أن البني أدم يخلي البني أدم ياكل لحم أخوه!!
عشان إيـــه؟ الفلـوس دا معلون الفلـوس اللي تعمل في الناس كده.
الفلوس لحست المخ خلاص، معتش حد عارف يفكر صح.
رفعت عنيا على كريم اللي بدأ يشرح ليا و جاب ليا صور غريبة و باين عليها من زمان جداً و بدأ يشرح بهدوء:-
_ كورو ده مش مرض جديد دا ظهر أول مرة موثقة في الخمسينات، يعني من حوالي 1957، في قبيلة معزولة اسمها فوراي
في بابوا غينيا الجديدة يعني في آخر الدنيا القبيلة دي كانت عندهم طقس جنائزي مقرف كانوا بياكلوا جثث موتاهم كانوا بياكلوا أهاليهم تكريم ليهم، الستات والأطفال كانوا بياكلوا المخ بالذات عشان فاكرين إنهم كده بياخدوا حكمة وروح الميت والرجالة كانوا بياكلوا العضلات انتشر بقى المرض ده اسمه كورو و بلغة القبيلة معناه الرعشة، عشان أول الأعراض بتظهر على المريض إنه يترعش ومبيعرفش يمسك حاجة يعني مرض بريوني يعني مش فيروس ولا بكتيريا، ده بروتين طبيعي في مخك اسمه PrP اسمه بروتين البريون الطبيعي فجأة بيتجنن ويتني غلط ويتحول لشكل سام والمصيبة إن الشكل السام ده معدي بيخلي كل البروتينات السليمة اللي جنبه تتجنن زيه، المخ يبدأ يتاكل من جوه ويبقى عامل زي السفنجة كلها ثقوب،
عشان كده اسمه العلمي Spongiform Encephalopathy
اعتلال دماغي إسفنجي..
ظهر على وشي الأشمئزاز حرفيًا، آه بشوف جثث كل يوم و بحقق و يمكن عايش معاهم اكتر من مراتي.. لكن فكرة ان البني أدم بياكل لحم بني أدم.. صعبـه أوي بجد.. الموضوع مقزز بطريقة بشعـة.
ركزت تاني مع كريم لما قال و هو جايب صورة تانيه على اللاب:-
_ الأعراض بقى بتبقى إيه؟ أول حاجة رعشة في الإيد والرجل، بعدين المريض مبيعرفش يمشي و فقدان توازن كامل وبعدين مبيعرفش يبلع، ولا يتكلم، ولا يتحكم في عينه، وأوسخ عرض فيهم الضحك الهستيري. بيضحك من غير سبب و دا ضحك عصبي مميت، عشان كده سموه مرض الضحك المميت Laughing Death
بيفضل يضحك ويضحك لحد ما مركز التنفس في جذع المخ يتاكل ويتخنق ويموت ومفيش علاج أبداً لا مضاد حيوي نافع، ولا مصل، ولا دوا البريونات مش بتموت بالغليان ولا بالأشعة ولا بالفورمالين،
بتفضل عايشة في التربة سنين اللي بيجيله كورو خلاص بيودع
فترة الحضانة في الطبيعي من خمس سنين لحد خمسين سنة.
يعني ممكن تاكل انهاردة وتموت بعد عشرين سنة ومتكونش فاكر أكلت إيه أصلاً.
ساب اللاب و جاب التقرير الورقي حطه قدامي و كمل شرح:-
_ بس اللي بيحصل هنا مختلف السلالة دي متحورة يعني سريعة أنا قريت عنها في أبحاث نادرة، لما البريون يدخل بكميات كبيرة وعن طريق الأكل مباشرة وبالذات لو من مخ بشري فيه جلوتامات عالي فترة الحضانة بتنهار بدل سنين بتبقى شهور والحج سعيد بقاله 4 شهور بيأكل الناس منها، كل اللي أكل بانتظام بقاله 4 شهور
بقى جهازه العصبي خلاص بيتنخر و السبع جثث دول هما أول دفعة بس لكن في خلال أسبوعين بالكتير المستشفى هتتملي هيبتدوا بالرعشة، وبعدين يقعوا في الشارع، وبعدين يضحكوا وبعدين يموتوا.
_ و الحل!!
سألته و أنا مصدوم، يعني كل الناس دي هتروح ضحايا؟
و أنا مش هعرف أعمل حاجة!!
سمعته و هو بيقول:-
_ المشكلة ان مفيش حل أصلًا، حتى الدكتور Carleton Gajdusek و الدكتور Vincent Zigas دول اللي اكتشفوا مرض كورو سنة 1957 و الطقوس دي فضلت من أول الخمسينات لحد أواخر السبعينات.. كان بيموت 200 شخص سنوياً.. و العالم كارلتون جايدوسك Carleton Gajdusek اللي اكتشف المرض ده خد جايزة نوبل في الطب سنة 1976 بسبب أبحاثه على كورو.. لكن كعلاج؟ مفيش.
و المرض ده انقرض بقاله عشرين سنة لما الطقوس دي بطلت تتعمل.
لكن يظهر تاني و بالشكل البشع ده؟ يبقى في حد عايز يعيد امجاد الطقوس دي تاني لكن بشكل غير مباشر.. و طلما الحج سعيد قالك ان في شخص بيوزع لحمه.. يبقى كده للأسف مش الحج سعيد لوحده اللي بياخد منه.. أكيد في محلات كتير و مطاعم.. لكن أنهي محل و أنهي مطعم!! احنا منعرفش.. يبقى لازم نمسك راس الأفعى نفسها مش الديل..
وقفت و أنا بلف عنيا في المكان و قولتله و انا مدايق و حاسس ان الحج سعيد بريئ فعلاً لأن راجل بالغُلب ده و الحال مستحيل يكون سبب خراب و كل البلاوي دي.. لكن هسمع وجهة نظر كريم برضه:-
_ انت ليه متاكد كده إن كلام الحج سعيد صح؟ رغم اننا ملقناش حد بالاسم ده، و طلع وهمـي!
وقف هو كمان بيقلع الجلافز يرميه في السلة و قال بثقة:-
_ لو هو فعلاً بيشفي الجثث و يعمل منهم كفته، مكنتش هتلاقي المحل بالنضافه دي، كانت الريحة هتغلب المكان كله حتى لو مليان فحم.. و إن واحد يقتل أو يخطف و يشفي الجثث كده و يلف على المحلات يبيع اللحمه، دا شخص قلبه ميت 500 مرة.. و أظن مش محتاج إني أقولك كل المعلومات دي يحضرة المقدم.. و إن واحد بيعمل كل البلاوي دي و يوزع اللحمه فهو حاطط في اعتبارة أن هو هيتكشف في يوم من الأيام، عشان كده مش بيقول على أسمه الحقيقي، يعني تلاقيه قايل للحج سعيد أن اسمه فلان، و قايل لمحل تاني أنا اسمي فلان و قايل لمطعم تالت أنا أبن فلان.. اسماء مختلفه.
كلامه صح و دا اللي أنا شكيت فيه فعلاً.
شديت الجاكت لبسته و أنا باخد نفس سريع و قولتله قبل ما اطلع:-
_ هتروح المشرحه قسم 2 هتلاقي عسكري واقف على الباب.. تستلم الجثث و تشرح و تشوف و تتأكد هل فعلاً كورو ولا حاجة تانية.. و لما تخلص ترن عليا فوراً.. بالتوفيـق.
خرجت من المعمل ركبت العربية و اتحركت جهة القسم.
بعد وقت مش طويل نزلت بسرعة و دخلت للحج سعيد تاني.
وقفت قدامه حطيت ورقة و قلم و قولتله و أنا باخد نفس سريع:-
_ أكيد في رقم كنت بتكلم العربي منه صح؟ عايز الرقم دا حالاً.. و توصف شكل العربية اللي كان بيجي فيها!
هز راسه بتوتر و أنا عنيا عليه بتركيز، كتب الرقم و بدأ يشرح ليا شكل العربية عامل ازاي، و شكل الراجل عامل ازاي.
و انا بسمعه بهـدوء..
_ أخر مره نزلت منه لحمه كان أمتى!؟
_ من أسبوع..
هزيت راسي بتمام و هدوء مريب و بعد شوية خرجت من القسم.
و روحت للشارع اللي فيه محل الكفته بتاع الحج سعيد.
وقفت على أول الشارع بشوف أنهي محل فيه كاميرات.
لقيت تلاته، محل موبايلات و محل أجهزة كهربائيه، و محل ملابس..
نزلت من العربية دخلت لمحل الأجهزة و قدمت نفسي و الكارنية و طلبت أشوف تسجيلات الكاميرا للأسبوع اللي فات.
ظهرت التسجيلات، لكن مفيش حاجة غريبة.. مفيش عربيات وقفت قدام محل الحج سعيد...
جبت باقي الأيام، و كبرت الشاشة على عربية صغيرة.
وقفت قدام المحل، لكن الشخص اللي راكب وشه مش للكاميرا و كأنه عارف مكان الكاميرات كويس، و كمان منزلش من العربية.. الحج سعيد اللي خرج فتح باب العربية شال كراتين لحمه و قفل الباب تاني، و دفع فلوس.. و العربية مشيت من نفس الشارع تاني.. وقفت التسجيل..
و طلعت فوني رنيت على مروان الصياد..
جالي صوته واثق قوي و قال:-
_مممم
_ صباحك وحش.. المهم تعاله شارع النيل تحديداً محل أجهزة كهربائيه.. مروان في أسرع وقت مفيش وقت للشرح..
مسبتلهوش فرصة يرد حتى، لأن عارف رده و هو اصلًا لسانه فالت.. فِضلت قاعد مكاني عنيا على الساعة في إيدي.
ربع ساعة و لقيت عربية BMW بتقف قدام المحل.
و نزل منها، باين كان قريب من المكان هنا.
دخل عندي و قعد جنبي، حكيت ليه كل حاجة من طقطق لسلام عليكم، لحد لحظة العربية.. و بعدين ختمت كلامي و قولت:-
_ العربية أهي.. أنا بقى عايز اتتبع خط سيرها؟ لكن للأسف مفيش هنا في الشارع غير تلات محلات بس فيهم كاميرات، و هو باين حافظ مكانهم عشان كده بيرجع من نفس الشارع عشان وشه ميبانش..
لقيته طلع فونه فتح على صورة، و كانت نفس العربية.
و قال ببسمة بسيطة:-
_ دا الخيوط مربوطه في بعضها.. أنا كنت لسه بحقق في قضية اختطاف لبنتين توأم 12 سنة من قدام البيت بتاعهم، و لما تتبعت الكاميرات لقيت نفس العربية دي بالظبط، و الخاطف خرج من العربية، لكن لابس جاكت اسود كبير.. لكن معرفتش اتتبع خط سيره لأن للأسف الطريق مفيش على الطريق ده أي كاميرات زي هنا..
جات في ملعبي كده.. متشكرين يا حُب.
حُب؟ أنا حُب! اللهم طولك يا روح عيل سئيل.
خَلص كلامه و وقف فتح العربية اخد اللاب توب بتاعه، و رجع تاني قعد جنبي، وصل سلك من الكومبيوتر و بعدين في اللاب.. و بعدين بعت حاجة على فونـه..
و انا جنبه متابع كل حاجة بهدوء، مروان قدها و عارف أنه يقدر يوصل لتتبع الكاميرات و أخر مره العربية وقفت فين.
ظهر شاشات كتير على اللاب و على الكومبيوتر، شاشات كتير منفصله.. بقى يقبل لينكات و شبكات، و يضغط على حاجات غريبة.. الفيديو بتاع تنزيل اللحمه هيفيده في موضوع اختطاف البنات.. ولكن للأسف البنات خلاص مش راجعين..
الـمره دي مروان بيشتغل في جون ليا و ليه..
لقيته بيضحك بهدوء و عينه على الشاشات، و غمزلي.
فهمت على طول، طلعت فوني بسرعة و كلمت الفريق يجهز.
و لقيته هو كمان بيكلم فريقه يجهز..
و شاور ليا على شاشة منهم و أنا عنيا على العربية اللي ظهرت.. بتخرج من شارع و تدخل شارع تاني، و ماشية على الطريق.. و نزلت قدام اكتر من محل تنزل لحمه برضه.
يابن الــ...
و أخر مره ظهرت، نزلت في أرض زراعيـه كبيرة، مزروعه دُوره كتير و عالي..
خرجنا من المكان لقيت فوني بيرن و كان بلاغ بظهور حالات جديدة، و موت مجهول في المستشفى العام..
ركبت العربية و سندت راسي على السواقة.
أعمل ليهم إيه؟ يعني حتى لو مسكت الفاعل.
الناس دي كلها خلاث بقت ضحايا! مفيش في إيدي حاجة أعملها..
بعت للفريق المكان و اخر ظهور للعربية كانت فيه..
و حذرتهم يدخلو المكان بدون صوت تماماً..
شغلت العربية و اتحركت ورا مروان على الطريق.
لقيت رسالة جيالي، كانت من كريم..
فتحتها بسرعة كانت صور لشيئ اسفنجي!!
دي سفنجه؟ و ثقوب غريبة.
لقيته بيسجل ريكورد، ثواني و خلص و وصل.
فتحته بسرعة و كان صوته بيقول:-
_ للاسف يا أحمد، فعلاً مصابين بكورو.. الصور اللي وصلتك دي لمخ جثة منهم ثقوب إسفنجية Spongiform Changes.
عملت تحليل سريع و دقيق للبريونات PrP Sc Test
اخدت عينة من نسيج المخ.
حاولت أعالجها بإنزيم Proteinase K الإنزيم ده يا أحمد بياكل أي بروتين سليم.. لكن البريون المسبب لكورو PrP Sc مقاوم للإنزيم و للأسف مش بيتكسر نهائي.. كورو العادي الناس كانت بتاكل مخ كل سنة او فترة كويسة بين كل مره، لكن هنا الناس بتاكل كفته كل يوم يعتبر لمدة 4 شهور كمية البريون اللي داخله الجسم مرعبة، فبتسرّع كل حاجة مش سلالة متحورة زي ما قولت في الأول ولا الهدف طقوس و قرف دا Overdose جرعة زيادة خلت فترة الحضانه تنهار بدل سنين تبقى شهور.. يعني بالمختصر مفيش علاج و دا أكيد مية في المية كـورو.. و الله يرحم كل الضحايا و يرحم اللي لسة متعبش.. لأن مفيش مفـر للاسف حتى لو قعد عشر سنين عايش..
و متقلقش أنا و أنا مفيش ضرر علينا، الضرر بيكون لو الأكل منها كل يوم زي ما حصل مع كل الضحايا دول.. الله يكوم في العون..
كده مهمة كريم خلصت، و حاسس إن روحي خلصت معاه.
كريم حاول لحد اخر لحظة، و أنا لسة بحاول..
لكن مفيش!! مفيش حل للضحايا دي غير دعواتنا وبس.
وقفت العربية و سندت راسي على الكرسي.
حاسس إني مهبط و محبط، الناس دي ملهاش ذنب..
شغلت العربية تاني و فتحت الفون اسجل فيديو، دي اسرع وسيلة عشان أوصل كل كلمة لكل شخص..
لكن قبل ما أسجل رنيت على جريدة اخبارة معروفة و مشهور و قولتلهم ينشرو الخبر و مليتهم الكلام كويس.. و يتم توزيع الجرايد على كل المطاعم و المحلات في أسرع وقت ممكن.
و بعدين بدأت أسجل الفيديو و انا عنيا على الطريق:-
_ السلام عليكم، لكل شخص بيسمع الفيديو.. في كارثة في اللحوم و بقت مغشوشة.. رجاء من كل المطاعم و المحلات أي لحمة متخزنة أو متلجه اتخلصوا منها فوراً و استبدلوها بلحوم جديدة من جزارة موثوقة و معروفة.. و لكل شخص بيسمعني العشر ايام دول محدش ياكل من أي مطعم ولا أي محل كفته.. في مواد مش كويسة في اللحمه و في حالات وفاة كتير و تم كشف الفاعل بالفعل.. اللهم بلغت اللهم فاشهد.
قفلت الفيديو و قفلت الفون، محبتش أقول لحم بشري عشان اللي متصابش ومحصلهوش حاجة، لما يسمع هيحصله قرفه و ممكن يتعب.. في ناس مش بتستحمل حتى ذِكر الأسم..
وصلت للمكان لقيت الفريق حاوط الأرض كلها من كل مكان و العربيات كمان على اول الطريق و أخر الطريق..
جهزت سلاحي و مروان كمان، قالي و احنا بننزل الأرض:-
_ الخمس فدداين اللي جنب بعض دول، لشخص واحد اشتراهم من سنة.. و مش بيزرع غير دُوره بس.. اللي وصلتله أن اللي اشتراهم راجل اسمه سامي عبدالسميع..
هزيت راسي بهدوء و الفريق بقى يدخل معانا من كل حته دا غير اللي واقفين برا، السلاح مرفوع..
دخلنا الارض لقينا في وسط الأرض حته كبيرة بايره، و محطوط على وشها عيدان دُوره و ورق دُوره..
بقيت حافظ الأشاكل دي و لعابهم، قربنا شيلنا الورق و كل ده.
و حفرنا لقينا عضـم؟؟ عضم كتيــــر..
_ عالم نتنه اقسم بالله..
كان صوت مروان و هو بيبصق على الأرض.
عضم و هـدوم متقطعه مردوم عليهم بالردم..
لقيت هدوم لسه عليها دم لزج و عضم لسه فيه بواقي لحم..
وقفت بسرعة و لفيت عنيا حواليا، دول لسة مدفونين من دقايق بسيطـة.. يعني الفاعل لسة هنا؟
و الجريمة ملهاش مقر اصلا، دا مقرهم الوحيد.
بينفذ كل حاجة جوه الدُره، عشان ميبقاش محط شك.
و محدش أصلًا بينزل أرض حد هنا..
مشيت خطوتين و عنيا في كل ركن زي الفهـد.
شاروت لمروان، و للفريق.. بقى الكل بيلف عينه حواليه.
خرجت و دخلت الأرض التانية و لسة الكل متابع معايا.
عنيا في كل حته، تركيز مرعب.. سلاحي مرفوع.
و في ثانية إلا ثانية كانت أول رصاصة في رجل واحد منهم لسة بيجري و بيهرب من الأرض..
وقع على وشه بيصرخ.. و التاني بيجري من النحية التانية. لكن مروان لحقـه.. أرض الدُوره مخيفه و دوره عالي و زحمه في بعضه.. يعني دا مخبئهم الوحيد.. أكيد.. و مش سهل حد يلاقيهم كده لو فعلاً مستخبين جوه منه.
العساكر نزلت باقي الأراضي، و أنا واقف قدام ترعه مليانه مايه و عنيا جوه الدُره.. لفيت وشي لما حسيت بحاجة في الماية.. ركزت جامد في المايه.. كانت ماية عكره من الطين.
و فجأة لقيت اللي طلع منها بسـرعة، واحد منهم مستخبي تحت المايه لكن مستحملش يفضل فتره طويله..
قبل ما اضرب رصاصه في رجليه، سبقني و ضربها هو في رجلي.. صرخت بوجع.. لكن تحكمت في الوضع بسرعة و ضربته في دراعه وقع منه المسدس.
العساكر مسكته.. و لقيت مروان جايب كمان واحد و في ايده شنطه كبيرة شوية.. الفريق دا كان اربع رجاله..
اتمسكو جوه البوكس، فتحنا الشنطه لقينا سكاكين بكل الأشكال و الأنواع و الأحجـام.. و كياس ملح كتير و جلافزات بيضه..
كشرت وشي بقـرف من البني أدم و لأي مدا بقت توصل وساخته بجد.. الشنطه اخدوها في العربية.. و الفريق بدأ يشيل العضم.. ازاي فريق من اربع رجالة بينفذو كل دا لوحدهم؟؟ عادي بتحصل مش هستغرب.. البني أدم بشع لأبعد درجه.. و السكاكين دي مخصصه لتشفيه اعضاء بدون خراب فيها.. و لتشفية اللحم..
يعني من قرفهم بيستفادو من الأعضاء و من اللحم.
عشان ميتين أم الفلــوس.. الله يخرجنا من الدنيا دي على خير.
و الضحيه اللي بيخطفوها بيخلصوا عليها في نفس اليوم، عشان مفيش مكان يحطو فيه المخطوفين أصلًا.. بيخلصو و يشفو الجثة من اللحم و كل دا.. جوه الــدُره.
اتألمت من رجلي، مروان أخد باله و شاف الدم على البنطلون.
قرب شد دراعي حطه حوالين رقبته، و سندني معاه و هو بيقول:-
_ بطل كُهـن.. دي رصـاصه
_ محسسني إنها طلق من بتاع مسدسات العيد.. انت عبيط؟!!
رديت عليه بسخرية و أنا بتألم بعنف و مش قادر ادوس على رجلي لقيته بيضحك بهدوء و كأنه بيداري ضحكـته.
هزيت راسي بيـأس.. عيل سئيل بس بحبه لأنه كان في يوم أعز صديق ليا.. لكن هغير الصورة اللي أخدها عني..
علشان يرجع مروان صحبي تاني..
لكن مطلعش اربعه بس، دول اعترفو على الدكتور و صاحب الأرض
_ سامي عبدالسميع _ اللي كان العقل المدبر لكل ده.. و طلع بيشتغل من الكرسي و هو مكانه، كان هو راس الأفعى.. لما عرف ان فريقه اتقبض عليه حاول يهرب لكن اتقبص عليه في المطار قبل ما الطيارة تطلع بربع ساعة..
كان هو العقل المدبر بيحركهم ووهو مكانه.. فعلاً مش كل دكتور يستحق شهادة الطب.. أنا عاجز من شرح البني أدم والله..
ــــــــــــــــــــــــــــــــــــــــــــــــــــــــــــــــــــــ
انتهــت
