رواية قيود العوف الفصل الثالث 3 بقلم ريتا

- جُمان: اشَم ريَحة مو طيَبة ريَحة قذارة مكان مو نظيَف 

فتحَت عيَوني وأحس راسي يريَد ينفجر ويطلع من مكَانة 

- المكان أظلم وريَحة تلعَب النفس بالمكان سديَت أنفي بأيدي

حَتىٰ امنَع تسَرب هذي الروائح لأنفي لأن مداتحمل اشمهَا

- للحظَة تذكرت شصَار اني چنت راجعة من الخطَوبة واعترضوا الي اشخاص مُلثميَن بس شنو الي يردونة ؟ 

منو همة منعرف احد احنة ومالنة أذية ع احد بقيَت اتلمَس أريد جنطتي جهازي بيَها أريده وسَط الظلام افرفر واتلمس بهلع وخوف بس ماكو شيء 

المكان اظلم بشكل مخيف الوحيد الي ينشاف هو الضوة الي ديجي 

من جوة الباب مشيَت بأتجاه الضوة اريد اوصلَه بس .. وصلت فرحت دافتح بالباب بس ميفتح مقفول 

انهبطت اتلفتت براسي على المُكان ورجعت اضرب بالباب بكُل قوتي واني بالگوا داصبر نفسَي حتىٰ ما اتقيء من الريحة الدتوصلني ... داسمع صوت يعني أكو احد هنا والله اكو 

مر على بالي طيف ماما انعصر گلبي .. شصار بيَها اكيد دتفكر بيَه أكيد گلبها محروگ وجاي تهرول تدور عليه  .. 

اخخ شگد الساعة هسة شگد مر وقت دمعت عيوني وضاق نفسَي وضربت بالباب بكُل ماعندي من قوة ابچي واصييييح بصوووت عاااالي

- فتحوا الباب فتحوا منو انتوا منو الله يخليكم فتحوا .. ولكممم شنوو ماعندكم مخافة الله تاركيني بهيچي مُكان أظلم منووو انتوووا منووو الي دزكم عليييييه

صرخت ، شهگت ، صوتي انبح وصدري تعب الخوف والقلق لحظة مافارگوني..لحد ما نشف واني علىٰ هلوگفة يم الباب واعيط واترجىٰ الي يسمع صوتي يفتحلي إياه ..  داسمع صوت الموجود وديسمعني بس رافض يفتح الباب

حقرررراااء حقررراء لميت رجليَة لصدري وصرت ابچي بخوف بقلق مرعوبة افكر شنو مسوية اني حتى ماعندي صديقات ولا صاحبَة مشاكل ولا اعرف احد زين ليش اني هنااا 

غمضت عيوني واني لامة نفسي ، فكري يم امي ياروحـي يايمة وين تدوريني هسة گـلبج الي من الصبح مغموت سببه هذي المصيبة الي صابتني والمادري بأسبابها...

-  تعاليلي يمه تعاليلي اني أخاف من الظلمة أخاااف

نزلت دموعي وهمست وگـلبي محروگ وارجف .. 

                                            

              

                    

-يارب دخيَلك اني بيَن ايديَك قبل البشَر ارحمني يارحيَم 

مر وقت بعد زيادة لحد ما اتشبعت بالريحة القذرة بالمكان وحتىٰ صرت ما اخلي أيدي على انفي صرت اشمها وعادي عنَدي كُل الاريدة ينفتح الباب أريد أعرف اني وين ..

دخت من البچي والعياط عيَوني بدت تغمض وحدَها من التعب ماحسيَت اله علىٰ صَوت قفل دينفتح فزيَت بسُرعة ونهضَت من مكُاني عدلَت حجابي وعدلت ملابسيَ لفيَت نفسي بالبشَت وارجف رجييييف...

انفتَح الباب واجة ضوة كُلش قوي الغرفَة وضحَت وكُل الي بيَها وضح چان موجود بيَها نفايات وعليَهم ملتَم الذبان عرفت الريحة الداشمها بسببَها شحيت نظري من تقدم الي واحَد چان اسمر اللون وشَكلة قذر وضعيف كُلش

مشَىٰ خطوات 

اول ما شفَتة اتقرب انتفضت بوجهة وصوتي عله  بچيت وعطت ..

-جُمان: منوووو أنتَ وليش اني هنااا ليششش

اتغاضىٰ عني راح اخذ الكُرسي المُوجود بالغرفة فرة وگعد وگال بأبتسامة حقيرة علىٰ وجهة القذر ..

-ياهله بجُمان ياهله بالي منورتنا

-جُمان: شداسووووي هناااااا 

- خطارنَا أنتِ 

انقبض گلبي من حچاها وضحك عقدت حاجبي وحچيت مستغربة كلمتة ..

-جُمان: تعرفني انتَ 

- تعرفيني انتِ ؟

- جُمان: لا لا والله لا ما اعرفك اني

- اني هم ما اعرفج والله 

- جُمان: اييي لعد ليششش اني هنا ليش قافلين الباب عليه وتاركيني وسسسط هلمزبلة ليش اخذتونييي بهلطريقة هههه العفوووا العفوا اخذتوني شنو ماا اخذتونييي هذااا خطف فهمنييي ليش خاطفينيي ليش اني هنا عندكم عداوة وياااااايه انتووا ؟؟؟

- لا شنو خاطفينَج مو گلتلج خطارنَا  ترىٰ أنتِ ثگيلة عليَنا 

هزيت راسي حچيت متأسفة ومقهورة والخوف تعبني ..

- جُمان: شنو ثگيلة عليكم شتريد انتَ مني بس احچيييي لتراووغ بالكلاممم

- بعدين تعرفين ارتاحي هسة 

 يحچي واني مطايقتة ريحتة تلعب النفس ويحچي وكُل شويَة يتحرك ويمَشي ويرجَع بنفَس المكان ايده علىٰ وجهة يفكر .. 

اباوع اله بقرف بشنو ديفكر الله ياخذه ويفكني هلكني منو هذا ياربييي منوو ..

- جُمان: شبيَك تفتر دوخَتني داگولك رجعنَي رجعنَي ليش مبقيَني هناااا !!

نظر الي بطرف عينة ورجع يفتر ويحرك بأيدة علىٰ وجهة استفزني بحركاتة خبلني نكثت أيدي وحچيت بعلوا صوتي ..

            

              

                    

-ولكككككك منوووو انتوووووا منووووووو جاوووووبني

-اسكتي

حچاها ببرود وگعد اتلتفت بمكاني رفعت ايدي نكثتهه گدامة وصرخت بيه بصوت ممبحوح وخازرتة بقرف  ..

-هيووو الووو داسووووولف ويااااااككك !! ليش ساكتتتت ليشش جاوبنييييييي

وسع عيونة عليه وتقدم الي بخطوات سريَعة من شفتَة اجاني هيچي وعيونة صارت براسة شهگت خليت ورجعت بخطواتي وصلني رفع أيدة بوجهي انهضمت وانقهرت من فشر وسب ابوية وبعدهة حچة بصوت عالي ..

- شگد تسولفين صمي حلگج خليني افكر صميييي حلگججج اسكتتتتيييي اسكتتتتي !! 

گال الكلام وطلع بسرعة ورجع قفل الباب ويَاه واني اتخبلت ركضت للباب بقيت ادفر بالباب واعيط واسَب بيه من حرگة گـلبي من وضعي ومن مسبتة لأبوية وألي .

- الله لينطيَك ابن الكلبببب حقيييييييير نذذذذل

دفرت الباب بكل قوتي بحرگان گلب وصرخت ..

-فتحوا الباب افتحوا الباااااااب ياا انذاااال واجهونييي مو تشمرونيييي هنا وتشرررردووون

بقيت ادفر واتصارع ويَ الباب بس ماكو نتيجة ولا فاد صريخي ولا كلامي كأنُ ميسمعوني ولا هامهم منطيني أذن الطرشة واني أعرف سمعوا كل شيء وصوتهم ديوصلني .. گعدت ورجعت گمت ادفر بالباب عطت وحچيت منقرفة ..

-ابووووووو ريحة قذرررررة افتح الباب افتح البااااااااب

حيل تعبت ومابقت بيَه طاقة وجُوعانة من المغرب مماكلة شيء وما اعرف شكد مر وقت ماشوف ولا أعرف أشبه بـ أنُ تتركين شيء بصندوق وتقفلينة هيچ العتمة يمي وهذا وضعي صار..

 ابتسمت بحزن من بين دموعي اشتاقيت الها سَودة عليَه يا أمي سَودة علىٰ گلبي شَلون بيَه وبيج إذا اني نفسي مداعرف وضعي وشديصيرلي .

الي خوفني وقلقني هو كلامة ميعرفني منو وماقبل يگول شنو اليريدة مني وشكلة الخوفني وقرفني والمكان الاظلم الي شمروني بيه مدشوف حتى أصبع ايدي .

بس بقة لسانَي يلهَج بذكر الله وبالادعية وكُل شوي اصلي علىٰ محمد بطني گطعتني من الجوع وريگي حسيَتة نشف جسمي نحل بس ماگدرت أنام خفت واني نايمة يسوون بيَه شيء بقيَت گاعدة رفضت النَوم بسبب تفكيري وخوفي وهلعي ..

حتىٰ شباك أگدر اتنفس منه هوىٰ طبيعي ماكو اختنگت وگعدت اطگطگ بأصابعي وصبَري قل اريد اطلع اني وين شنو هذا المكان منو هذا راسي صكني تخبلتتت ..

وعدت فترة شگد بالوقت ماعرف بس طويلة هواي عليه باوعت بأرهاق من رجع انفتح الباب ودخل هو نفسَة هذا القذر وهو فرحَان ويصفگ بأيدة

            

              

                    

- جبتلج اكل گلت جوعانة اكيد واني مااعوف خطاري جوعان 

صاح عليَه واحَد يم الباب بصوت عالي ...

- مديوي افتح الباب ماجاي اگدر افتحة

نفخ وگام اله فتح الباب وگال ..

- مفتوح وثول بس رده زلمة بطل لبن باب مادبرت تفتحة شبييك

- شبيَك مديوي غير بأيدي الصينيَة متروسة شلون افتحة يعني عندي ايدين ورة بظهري ادور ويفتحنة الي ؟

-مديوي: شجايب وياك

-حنتوش: مركة حمص

- مديوي: اي جيبة جيبة خطارنا جاعت اكييد ولك 

اخذ الصينية وجابَها يمي ضحك بوجهي وگال .. 

-شوفي مااعوفج جوعانة اريدج تاكلين وتنشنشين صارلج چم ساعة وجهج صار اصفررر !!

بقيت ساكتة گوة عليه اباوع اله بجمود رجع باوعلي وگال .. 

-اي بله شو خدودج لونهن تغير ؟ 

-حنتوش: خاف جانت صابغتهن 

-مديوي: اي صدگ مدري چنتي حاطة محمر مدري شسمة وصابغتهن بس حلوه بكل الاحوال حلوه علمود هيج اختاريتج چا عبث

عضيت شفتي واني أشوفة يسَولف ومرتاح عبالك الگاعدة يمَة وحدة يعرفها من سنَوات وداگ ميَانة ما ادري خبل صاحي عبَالك شاخط هذاااا !! 

واني مقهورة وراسي يأذيني وجسَمي يرجف من الخوف شنو مصيري ما اعرف ويحچي ملعب وأطراف كلام بـس .

حط الصينية گدامي وگال وعينة مثبتة بوجهي ..

- مديوي: هَاي مرگة حمص طبخها حنتوش هو صح مايعرف يطبخ بس اهم شيء الواحد يسد جوعتة 

دفعت الصينية وسعت عيوني وحجيت بحدة ..

-جُمان: منو گلك اني اريد اكل ؟ شنو هاي الصلافة العندك جايبني وحابسني هنا لا انتَ المسولف العندك ولا العايفني ؟؟

-مديوي: فوك ماجيبلج اكل ؟

-جُمان: شبيك اخاف خاطفني وتريَد تطلب بيَه مقابل فلوس وترجعني ؟

-مديوي: اي يمكن يجوز 

-جُمان: ههههههه خطيه ترىٰ مگطوعة من شجرة لا قريب ولا بعيد ربَع ماراح تحصل بسببي ومحد يسأل عني وين الله حاطني راحت عليك 

تغيرت ملامحي من ضحك مرتاح وگال ..

-مديوي: هو هذا المطلوب ماوراج احد ارتاحيَت اكثر هسة

نغزني گلبي چني چفصت گدامة معقولة چان يفكر بسبب هلموضوع !! عباله أكو احد وراي ويدورني ياربي عزززا شبيييه غبييه شبيييه 

ابتعد عني وگف وحچة ..

- مديوي: والله الاكلتي والما اكلتي لا راح تضريني ولا شيء راح تضرين روحج طبج مرض 

            

              

                    

گال الكلام ودار ظهرة ومشىٰ وراها وگف ورجع گال 

- مديوي: اكلج اكلي خو ماترحين صفرة اريدج ترحين حمرة برصة 

مثل ماشفناج ترحيلة صفرة يرجعج علينااا متفيدينه هيچ 

غمضت عيوني بقلة صبر وفتحتهم وگفت بحركة سريعة ميلت راسي خزرته وعيني صارت علىٰ الباب واگف واحد برا گدامه شحيت نظري وحچيت ..

-جُمان: شبيك انتَ صااااحي ؟ انتَ بيك شيء متعرفنييييي متعرفنيييييي اروح لمنووووو شهلمييييااانة والراحة بالحچييي شتريد منيي شتريد

- مديوي: شگد تصرخين بعدين اگلج وين ترحين وشريد هسة انتِ  اكلي أكلي شبيج تفوتج مرگة الحمص من ايد حنتوش يمكن شوي بيها شعواط بس مثل ما گتلج تسد جوعة

ضحك وبوز شفتة بأستفزاز بعدها طلع وسد الباب رجعلي الظلمة مـن رجع قفلة واسمع صوتة يصيح بواحد ..

گعدت بالگاع وتكرفصت ولزمت راسي ياخذني لمنوو هلمستفززز المقرف شنو هلنااس وشدتسووووي بينه  !!

معقولة يعرفني ؟ لالا مستحييل لو يعرفني ليش يشمرني هنا مثل الحيوانات زين معقولة يعرف أحد من قرايبي شلون وهو بس اهل بابا وكُلهم مسافرين وميتذكرونة يمكن !! 

وماما معندهاا احد لا اخو ولا اخت وامها وابوها متوفين يعني وضعيتنة مگطوعين من شجرة ومحد النا ومحد يعرفناا ولهذا السبب اني مبتعدة عن الناس والمشاكل والضيم زين هذول منيييين اجونييي ياربيييي منييين ..

فركت وجهي وبَاوعت علىٰ الصينية جوعانة وبطني توجعني من الجوع شسوي أخاف يصيرلي شيء ويستغلونها فرصة ويسوون بيه شي قربت الصينية الي واكلت منها لگمة واني وگفت لا اني الگادرة اكملها ولا اني الذابتها حشىٰ نعمة الله طعمها يشبه كُل شيء اله المرگة !! 

وزفرة الطماطة صخاام الصخمنييي شهلطعم شهلضيييم البيَها تنهدت بقهر ولعبان نفس مجبورة اكل حتىٰ لو تلعب نفسي ميخالف ماگدرت ابقىٰ بدون اكل خفت ابقىٰ صرت اتخيل ينغمي عليَ ويسوون بيَه شيء لو يعتدون عليَه لو يهجمون عليه..

لأن وجَوهم مو وجَوه ناس طبيعيَة وجَوه شر وجَوه مُجرمين 

مو أنتقاص من خلقة ربي حشىٰ بس اكو ناس سمر كُلش بس الله يحُط كُل القبول بوجهم بحَيث تحس تريد تباوع بوجهم اكثر وجه كله قبول وراحة ..

بس هذا والي ويَاه متگدر تصفَن بوجهم دقايق الله يصدك عن النظر الهم تنقرف وگلبك ينغمت من كل شيء صوت وصورة ..

اكلت لگمتين بالگوه جبَرت نفَسي بأكلهم واني مااحس داكُل اصلاً خلصَت ودفعت الصينيَة عني تعبَت وردت انام بس اني وين مو مكاني هذا اني كُل يوم راسي يم راس امي واباوع الها من تنام بطنها تصعد وتنزل لولا ومن اشوفها تتنفس ارتاح وانام يمَها 

            

              

                    

اخاف ع امي اخاف عليَها من الهَوا الهاب لعد شلون هسة ؟ شلون حالها سودة ع گلبي اخخخ گلبييي اخخ ياربي فكهم عني أبعدهمم خااايفة وخوفي راح يوووگفلي گلبيي ..

 تعبت وخلصت طاقتي كلش لميَت نفسي ولفيت البشت عليَ وقريت سورة الفاتحة لأم البنين كُل يوم قبل ما انام اقراها واقرة المعوذات وبألف علي يابو علي غمضت عيوني..

ساعة بعد ساعة يوم بعد يوم الايام بدت تمر علىٰ وضعي متروكة ومشمورة هنا موت بس بطيء صرت انهلك واتخبل منهم عيشوني بجحيم حرب نفسية سوولي عاملوني علىٰ وضع يجون يجيبولي الاكل ويطلعون عني بسرعة ميطولون ولا دقيقة زيادة ما اللحگ احچي وياهم وإذا لحگت وحچيت الجواب يكون ..

-بعدين نگلج بالوقت المناسب لا تستعجلين علىٰ رزقج وهسة اكلي اكلي لا تضعفيين داري روحج واكلي الاكل الي نجيبه الج 

اتسودنت واتخبلت و ويه الأيام صارو يدخلون عليَه هو ويَاه 3 كل واحد اله اسم غريب أسمعه منهم ... ويسولفون بهمس وصوت ناااصي حيل مثَل العندهم سالفة براسهم ساعَة واحد يلزم راسة ساعة واحد يعيط باللخ ! وع هلقوانة الممفتهمة منها شيء ..

اي مليت انهلكت من وضعي الغرفة الظلمَة صارتلي عذابي النفسي اني بين اربع حيطان بس ممبينات ينشافن بس من ينفتح الباب أگدر اشوفهن ومكاني ميتغير نفسَة صرت بالظلمَة ارسم واگول لا غلط مو صح رسمي لأن مدشوفة 

وارجع اعيد رسمي بأصبعي بالهوا واني ماشوف شيء ويجيني صَوت الذبان والوزوزة مالتَه يبقىٰ يرن بأذني رن اسد أذني من صوتهم واصرخ بجنون منهن ..

لأن الصوت يصير قوي والغرفة هادئة مابيها صوت غيرهن ميسكت صوتهن وميرحن لأن الوساخة كُلها موجودة ومركونة هنا حطيت أيدي علىٰ حلگي بچيت بصوت مكتوم لأن صوتي انبح من الصريخ من أصرخ توجعني جهة صدري ..

ادگ الباب وينفتح بس من اگلهم محتاجة حمام ينفتح الباب وأشوف الضوة واشم الهوىٰ النظيف لمُدة ثواني بس وبَعدها ادخل بممر صغير وافوت منَه ع الحمام شگد دورت مكان اگدر اشرد منه بس مالگيت المكان الچنت بيه محكم من كل الاتجاهات وماله مخرج گدامي أنتبه عليه واحد منهم ضحك بوجهي بأستفزاز وحقارة وگال .. 

-حنتوش: لا اتعبين نفسج وتدورين علىٰ مكان تشردين منه ماكو 

-جُمان: حقير 

-حنتوش: ماتگدرين تخطين خطوة خارج هلمكان ألا من احنة نسمح بهذا الشيء ونطلعج بأيدنه منه .

-جُمان: الله ياخذكمممم ويلووووعكم مثل مدتلوعوووون بيه

-حنتوش: بس يله بس أمشي ولي گدامي تحركي 

دفعني بظهري وجرني للغرفة دخلت بدفعة منه وسد الباب ..

-جُمان: حيييييييييووووووااااان تفووو حيييواااان

            

              

                    

ولا يسمعوني ولا يمهم شحچي .. أكلي وشربي حيل قليلات احتاج الحمام مرة وحدة لو مرتين باليوم  صارت امنيتي اشوف الضوة لمدة طويلة وأتمعن بشوفة السما بس .. وبقيت كل يوم اصرخ بيهم واسبهم بصريخي بس ولا علىٰ بالهم ردت استفزهم حتىٰ اعرف شنو يريدون ليش هيج ديسوون بيه ومبقيني معلگة ومشمورة .. 

چنت گاعدة ومرجعة ظهري علىٰ الحايط ضحكت بحزن وحرگة بصدري صارت من اتذكرت كلام امي من چنت اگلها ع الاريد اسويه  والي ببالي الي مالحگت اسوي منهن ولا شيء ..

-جُمان: ماما اني مفكرة بس أتخرج اتعلم مهنَة ثانيَة ادخل دورات 

الرسم التصميَم الحلاقة اي شيء منهم ماما مااريد أبقىٰ  ثابتَة ع مجال واحَد

-امل: شكو بيَها أتعلمي وأعرفي المعرفة والتعليَم حلو 

-جُمان: اي ماما اذا اتعلمَت حلاقَة وصارت عنَدي خبرة بيه افتح الي صالون واشغل بيه بنات كل بنية خبرة بفد مجال وراح ينجح مشروعي أكيد..

-امل: وشلون تعرفين راح ينجح مشروعج بلا ؟ 

- جُمان: ينجح ماما !! اذا خبرة وكُل شيء تعرفين كُل شيء ينجح مثلاً اليوم اجتني بنيَة وشافت شغل الصالون حلو كُلها حتسألها وين سويتي ؟ راح تگولها سويت بكذا مكان وتجينا وهاي همَ حيسألونها  وين سويتي تكُلهم هم بكذا مكان ومن وحدَه لوحَده ماما ننعرف اهم شيء شغل مضبوط 

وماكيَرات وحلاقات مضبوطات

-امل: اي وشهادتج تضميَنها بالكنتور وتخمسيَنها ؟ 

- جُمان لا ماما شني داقصد يشتغلون عندَي بصالوني واشرف 

عليَهم اني المدير ماما بس هم اشتغل بشهادتي 

لعد شلون اضيع سنين دراستي

-امل: زين لعد 

-جُمان: اووووف ماما راتب منا وراتب منا الله شگد راح يتعدل وضعنا وشگد راح تنحل إلنا مشاكل ونسافر لأحلىٰ دول العالم ونشتري احلىٰ بيت نعيش بيه اني وياج واخليج تحجين وتعمرين يوم ..

باوعَت وضحكَت وگالتلي 

-امل: تخبل احلامج ماما ومن حقج تحلمين بس الگدر ما گدر والشلَه ماعبر حَال الدنيَا يتغير بثَواني لتگولين هسَة اريد اسوي هذا ورة هذا اريد هيچي وهيچي 

-جُمان: يعني شلون مافهمتج ماما ؟

-امل: بناتي انتِ اسعي بالي تردينة ومن الله يوفقج ويسهلها عليح ويصير الج بوقتَها گولي اريد اسافر لهاي الدولة واريد اشتري هذا وهذا لأن هَاي نتيجَة سعيَج 

ضحَكت ببهتان وجاوبتها ...

-جُمان: ماما راح واهسَي شنوو هاااي 

- امل: أسعي حبيبتي بس قبلها گولي أذا قدرني ربَي 

جريت نفسي ورجعت لواقعي وعيَوني مدمعَة وگلت 

اي والله يا ماما حَال الدنيَا بثواني تغير صار الي فوگ الاسبَوع اني ويَن هسة شنو مصيَري ومنو هذول كُل شيء ما اعرف ..

فزيت برعب علىٰ رگعة الباب انفتح القفل ودخل هذا الـ اسمَة مديوي گعد گبالي وگال

-مديوي: شنوو اسمج يمكن نسيته

باوعت بوجهة ببرود وبقيت ساكتة  ..

ها جُمان اي جُمان هسَة نحل السالفة واگلج شنو المَطلوب منَج تسَوينَة .