رواية سداد وبنت العرب الفصل الأربعون 40 بقلم الزهيريه

تهوى الانثى ذلك المجنون 

الذي يفرض حبه عليها 

اكثر من ذلك الذي يستأذنها 

قبل ان يحبها 

ألق/ صعبه من ينباع بيت انت تربيت بي  وكل ذكرياتك بي ومن وگف سردار السياره يم بيت جدي القديم سبحان الله هاجت كل الذكريات عليه بزينها وبشينها وحمد لله والشكر الشين چان اكثر من الزين ويا مكثر الشين آلي بحياتي وشفت بيت جدي منزلي للگاع وراجعين يبنون بي بس بعده البناء ما مكملي ظليت أتلفت شفت بيت هيثم وچان عبالك مهجور وسردار انتبه عليه اباوع على بيت هيثم وسألني 

سردار/ بعدچ تحنين اله 

الق/شلون احن لهيثم  لو يرجع بيه الوقت الا ارگعه بمية قندره وإذا اغلط بعدد القنادر الا أرجع اعيدهن عليه  على الصار بيه  بس الذنب ذنبي لان صدگت بي 

وسردار ما حچى شي ظل بس يهز براسه علامة إستنكار  واني گتله/ أحسن شي أروح على كونه هي تعرف هذا الرجال الي يعرف آهل أمي وين 

سردار/ كونه منو 

الق/ كونه الراعي الرسمي مال المنطقة وما تفوتها لا شارده ولا وراده وتعرف كل الناس  لهذا أروح عليها أحسن 

ورحت على بيت كونه وحمد لله دائمآ الباب مالتهم مردود بحيث واحد گبل يگدر يدخل وما يحتاج أحد يدگ الباب بس اني ما دخلت وظليت ادگ بالباب لما سمعت صوت كونه وهي صيح/ هذا يا هو كسر الباب علينه تكسر  خايبين شكو 

وطلعت وهي تعدل بشالها  ومن فتحت الباب وشافتني وفتحت عيونها كونه / ياااا هاي ألق بنت رياض المنغولي شجابچ علينه شذكرچ بينه 

ألق/ وحضنتني كونه وظلت تبوس بيه من خدودي وهي 

تگلي /خايبه وين وليتي  فص ملح وذاب خليتي فكري عندچ كل مره اذكرچ اگول هسه وين صفى بيها الدهر وهذا شبي وجهچ صاير خطوط خطوط مثل الحمار الوحشي 

الق/ موجوده بأرض الله الواسعه بس شبعت ضيم وبس شبي وجهي ما جاوبتها عليه وگتلها خاله تذكرين من نفصخت أيدي واخذتني على هذا الرجال الي يسوي فصوخ أريد توديني عليه اني ما أذكر هو بيته وين 

كونه/ قصدچ ابو وهاب خايبه إنتي نايمه ورجليچ بالشمس هذا هسه ناكر ونكير رفعوا حسابه هذا مات قبل شهر ونص وحتى لحم الأربعين مالته أكلنا 

الق/ طبعًا هاي الكفخه ما چنت متوقعتها فتر راسي هسه شلون وين أروح والمن الجئ 

گتلها/ ما سمعتي خبر عن أبويه عن أخويه 

كونه/ شبيچ خايبه غير ابوچ بالشماعيه واخوچ سمعت آخر شي من نزار گال خلوه عند اهل امچ بعد العلم عند الله قابل شنو نزار ولي من أولياء الله ويحچي صدگ 

الق/ بعد كل آمل ما عندي حتى نزلت دموعي 

وكونه تباوع على سردار وتگلي / يا شبيچ يا خايبه بس لا تبچين على نزار خايبه هذا زلمتچ يا شبي حظي أغبر ما جابلي هيچ واحد حلو بس هو الحظ للزرگات قابل مثل حظ كونه رحت أدور عليه بالگبور طلع الميت دفرني ورجع نام بگبره 

الق/ ظليت صافنه أنوب على كونه ليش هو اني هم أكو واحد يحسدني شو حظي مطين أنوب اجى سردارگال لكونه / العفو أختي اعذرينه اخاف ازعجناچ 

ورجع گال الي/ يله ألق تعالي 

الق/ وكونه تگلي يله شوف حظ الزرگه ألق شلون گاعد زلمتها شكر شكر 

رجعت ويه سردار للسياره وهو حرك السياره بعد ما سلم على كونه وبس هي رجعت وگفتنه 

كونه / اگلچ قبل فتره تدرين منو اجه وسال عليچ 

الق/ منو هذا الله يوفقه وينطي الصحة والعافيه إلي ذكر ألق وسال عليها 

كونه/ بسمه زوجة عمچ زهير الله يرحمه وانطتني رقمها وحلفتني وگالت الله عليچ اذا سمعتي خبر على الق بلغيني 

الق/ صدگ الله عليچ انطيني رقمها 

ودخلت كونه وجابت موبايلها طبعًا هذا اذا يسمى موبايل لأن الشاشه مفطره اما الكڤر كارثه لازگته بتيب مال كهرباء وانطت الموبايل لسردار وهي تگله/ طلع رقم بسمه أم حمودي كاتبه على رقمها 

وسردار آخذ منها الموبايل ويگلب بي وهي انتبهت عليه شلون يباوع على الموبايل 

كونه/  شبيك خايب نفسه تكش من موبايلي غير على گد لحافك مد رجلك بلكت من لزمت موبايلي بركة أيدك ويصير موبايلي يفون 

الق/ مات  من الضحك عليها سردار وگاللها عندي موبايل بالبيت هسه اجيبه الچ وهم ايفون وكل شي ما بي بس يحتاجله بطاقة ابل أيدي وخلي بي رقمچ 

كونه / شوف حظي منين أجيب ديدي 

سردار/ والله باچر أجيب الچ بطاقة والموبايل تدللين بعيني 

الق/ وطلع الرقم مال عمه بسمه ورجع موبايل كونه إلها وسلمنه عليها وحرك سردار السياره وهي توصي بي على الموبايل ومن ابتعدنه سألني 

سردار/ هاااا هسه وين راح تروحين يا بنت الناس رجعي ويايه وربچ يحلها من عنده ربچ كريم أكرم مني ومنچ 

الق/ أبد بعد ما أرجع  عندي استعداد ابقى بالشارع وما ارجع وياك لبيتكم بس اريد منك هسه تتصل على عمه بسمه من موبايلك أريد احچي وياها 

وهو ظل يهز براسه عدم رضى على كلامي وبعدها  أتصل على الرقم ألي أخذنا من كونه وهو فتح مايك من دگ وانطى ألي ودگ تقريبًا 4 دگات يله جاوبت 

وما أوصف فرحتي من سمعت صوتها وهي تسألني انتي منو 

ألق/ عمه آني ألق انطتني رقمچ كونه 

بسمه/ ولچ ألق حبيبتي وين إنتي اجيت سألت عليچ مشتاقتلچ والله گليلي عنوانچ حتى آجي عليچ 

الق/ ما عندي عنوان عمه وسالفه طويله من نشاوف احچيها الچ أريد عنوان بيت أهل أمي 

وانطتني العنوان بسمه/ روحي يمهم اليوم وباچر آني يمچ من الصبح راح آجي لبغداد والله راح اتعنى على مودچ لبغداد 

الق/ وسلمت عليها بعد ما أتفقت وياها على ثاني يوم تجي عليه وأخذني سردار للعنوان إلي گالت عليه عمه بسمه وهذا چان ما يقارب الساعه 3 الظهر ومن وصلنه ما نعرف العنوان ظلينه نسأل لما الناس الخيره دلونه على البيت ومن وصلت للبيت شفت منظر تگطع گلبي بي شفت أخويه گاعد بالباب والجهال ملتمين عليه ويضربون بي نزلت ركض من السياره واجيت عليه وحتى سردار هم نزل وبعدنه الجهال منه طبعًا اذا اريد احچي بملابسه الوسخ البيهن مال واحد صار شهر ما سابح وحتى صاير بي ريحه تكتل كتل حضنته وظليت ابچي عليه 

وسردار راح  دگ الباب قوي وطلع رجال چبير بالعمر وهو شافنه وگام يصيح على سردار على شلون دگ الباب هيچ ما تگول ناس نايمين شنو احنه بشر لو حشر 

جاوبه سردار/ العفو حجي بس هذا خطيه أبنكم گاعد بره والجهال تضرب بي شلون عايفي هيچ 

فيما بعد عرفت هذا جدي آبو أمي 

جدي/ أدري شايفه رجال وجايبلي عيشه شو هو مخبل اذا مات واذا عاش شنو راح يسوي 

جاوبه سردار/ حجي الرحمه حلوه وأرحم ترحم على العموم جبتلك ألق حفيدتك 

وجدي مو عبالك سردار گاله حفيدتك تخبل على اني كوم المخابيل العندي كافي عليه انوب فوگ الحمل علاوه وجايبلي علاگه زايده ألق وظل مد والجزر بالحچي بين سردار وجدي  ما يقارب ربع ساعه وبعدها سردار سلم عليه وراح 

ومن راح سردار حسيت بيأس ملآ نفسي يا ترى الله كاتبلي آنه أشوف سردار مره ثانية 

سداد/ مرات الأنسان يكذب بس كذبه يطلع ولان الله خالق الكون وما يرضى بالظلم  ومن تهمني نزار إلي عمري كله ما شايفه رب العالمين ظهر الحق وطلعت برائه وبيومها من طلعت صدگ تخبلت يعني شنو من بشر فوگ ما تهمتني بنت اخو واخذ فلوس من عدنه كومه يريد يموتني حتى هو وبنت اخو الساقطه يرثون مني وعاهدت نفسي ألا إنزل حمل الساقطه ألق هو ما يدري العقد مزور يريد يموتني عباله ألق زوجتي أنوب يعرف بيها حامل مني هسه يذبحني اني وبنتي لهذا اسلم حل إنه أنزل حمل بنت اخو وأخلص 

ورحت على بيت خالتي مومه مثل المخبل وگبل دخلت للبيت بهجوم مكتسح بحيث صرت بنص البيت وصيح خاله خاله وين أنتي 

وهي طلعت من غرفتها وهي صيح / شكو سداد صاير شي 

سداد/ ألق وين 

مومه/ ما موجوده راحت طلعت من يمي ليش تسأل عليها 

وبعدني ما جاوبت خالتي نزل سردار من فوگ وهو يصيح/ شكو شبيك صيح ترى هذا مو بيتك حتى تعلي صوتك بي 

سداد/ آني ما جاوبته حاچيت خالتي/ خاله ألق وين الي كربستوني بيها أنتي وابنچ 

سردار/ ما موجوده طلعت من يمنه شنسويلها راحت لحال سبيلها 

سداد وظليت مجاهل وجود سردار/ خاله شلون تخلوها تطلع بدون ما تنزل حملها هاااا هو عمها الگواد بعقد مزور چان راح يموتني أنوب أكو طفل شنو راح يسووا وهمه ما شاء الله عصابه ما تعرفون منو وراها وهذا الطفل مشوه وبقته في بطنها يعني عدها غايه بس الله اليعلم بيها 

سردار/ اني ما أعرف انت ليش ظن الناس كلها كذابه وبس انت صادگ البنيه حالها بس ربك يعلم بي وانت ما أعرف شلون تفكر 

سداد/ خاله أريد اعرف وين راحت أريد تنزل الحمل لا اطلع روحها بيدي 

سردار/ وانت ما طلعت روح آريا الي جابت رجال براسك متعه وگادر بس على هاي المسكينه ألق 

سداد/ وما خليته يكمل كلامه گبل هجمت عليه وضربته بوكس على حلگه وهو الظاهر ما چان متوقع راح أضربه وهو وگع ورجع گام بسرعه ورجع ضربني وصرنه واحد يضرب الثاني وخالتي مومه بنصنه وهي تعيط وبعد جهد من خالتي مومه دفعت سردار لغرفتها وقفلت الباب عليه ورجعت عليه 

وگالت / روح سداد بعد ما اريدك تعتب بيتي أبد إذا اموت لا تجي توگف على جنازتي ولك چان خليت خاطر الي بعد كلمه ما أريد أسمع منك ألق راحت من يمنه وهذا سردار تگدر تروح تشتكي عليه وذبه بالسجن بتهمة التزوير ما اگلك لا أبد بس بيتي يحرم عليك بعد هاي اللحظة 

سداد/ وآني صدگ انقهرت لآنه أحب خالتي مومه مثل أمي بالضبط وما رديت على كلامها أبد بس أتقربت عليها وبست راسها وطلعت 

وآني من نزلت يم بيت خالتي عفت يبرق بالسياره ما نزلتها ورجعت عليها وآني اباوع عليها وانقهر خطيه تبهذلت وحركت سيارتي واني ظليت بس أفتر بالشوارع الى ما صار المغرب يله رجعت وقررت خلاص إنه أرجع لأربيل بعد ما اريد شغلي يكون في بغداد وأطلب من مديري يقبل بنقلي لأربيل وخصوصًا بعد ما عرفت كوجر كذلك راح يرجع لبغداد 

وعلى ثاني يوم ندگ الباب ومن طلعت للباب وفتحته صار گدامي كوجر بصراحة ما چنت متوقع هو راح يجيني وسلمنه واحد على الثاني ودخل ويايه للبيت وچنت مخنوگ أريد شخص احچيله كل ألي بداخلي والله جابلي كوجر وحچيت شكو شي بداخلي لكوجر 

كوجر/ شوف اني زوجتك چنت متاكد انه تخونك من مره دخلت للمستشفى اجينه اني واوزجان الله يرحمه وشفناها وتحچي ويه واحد وبوقتها اكدت لاوزجان انه تخونك بس سكتنه شوف صاحبي وأخويه سداد خلي أنصحك نصيحه لوجه الله إلي صار صار بعد لا تفكر بالماضي أبد ولا تقارن بين ماضيك وحاضرك راح تتعب هواي اشمر وره ظهرك ولا تخلي في بالك شي 

بالعكس هذا درس آلك إنه مو كل كرديه يعني شريفه ولا كل عربيه اخلاقها سيئة مثل ما اكو بالأكراد زينين اكو موزينين كذلك العرب مثلنه اكو الزين واكو المو زين واما نصيحتي انه هاي البنيه حامل منك ازوجها وخليها يمك ويجوز ربك يعوضك عوض ربك حلو لا تتقوقع على خيانة آريا هاي مو نهاية الدنيا 

سداد/ تحچي كل عقلك كوجر أزوج وحده من ملهى شنو عقلي وين حتى اقبل بهيچ نماذج 

كوجر/ ما تعرف شنو ظروفها لا تحكم عليها لان انت ما عشت حياتها وانت بعد حر وبكيفك هاي حياتك وأنت أعرف بيها 

وبعدها ظلينه نسولف الى ما راح كوجر وبقيت أني عقلي يودي ويجيب شنو أموت وما أقبل بالق وراسلت مديري وترجيته ينقلني لاربيل وهو وأفق واجى على بالي شي وهو نزار عم الق اني ما شفته وما أعرف خلقته لهذا قررت أروح اشوفه وبنفس الوقت أودع الضابط فرقد چان ونعم الأخ 

ومن إتصلت بي وطلبت منه آجي أشوفه لأنه راح أرجع لأربيل قبل آجي عليه للمركز ورحت عليه ودخلت يمه للمكتب وهو من شافني گام واحد بوس الثاني وهويگول 

فرقد/ هاي أول مره أشوفك بدون ما تكون متهم ولا اكو قضيه ضدك هاي يرادلها ذبيحه كاكا سداد والمعلاگ ألي 

سداد/ سيدي أريد أطلب منك طلب قبل ما أروح لاربيل واحتمال بعد ما نلتقي 

فرقد/ أطلب واذا چان في مقدوري تدلل 

سداد/ أريد أشوف نزار عم ألق 

فرقد/ ليش تريد تاخذ ويا سلفي للذكرى والذكرى تبقى ولا تزول 

سداد/ أريد بس أسأله كم سؤال لإن هو چان يريد يموتني  وأريد انطي مفاجأة قبل ما أروح لأربيل يا ريت تبلغ نقيب صفاء ينطيني آذن بالزياره 

فرقد/ اني موافق انطيك آذن بالزياره بس أريد احچي وياك بموضوع وهي أعتبرها نصيحه أخويه 

سداد/ شكرًا سيدي تفضل بشنو النصيحة 

فرقد/ آني بالنسبة عني الخيانه عندي وبقاموسي ما إلها مبرر أبد وما أسامح عليها طول ما راسي يشتم الهوه بس أكو فرق بين أعفي وبين اسامح وگتلك قبل شويه سماح ما أسامح أبد بس أعفي والله يحب العفو وبالمقابل أعفي إنسان بس بشروط واني لو انت وحدك وما عندك أطفال من آريا ما انصحك بهاي النصيحه أبد 

بس سداد انت عندك بنات 2 بنات لو آريا تحاكمت وطلعت من المحكمه ثبوت واقعة الزنا عن طريق كتاب رسمي  صادر من محكمة تدري بناتك شلون راح يتآذن مستقبلًا بسبب هذا الشي لهذا خليها توقع تتنازل عن كل حقوقها واولها حضانة البنات واعفي عنها وخليها تطلع فكر في بناتك فقط انتقامك من آريا يدمر بناتك قبل لا يدمر آريا نفسها 

سداد/ وعدته افكر في كلامه 

 

الفصل الواحد والأربعون من هنا